police Archives - Valanchery Online

74,625 പാക്കറ്റ് നിരോധിത ലഹരി ഉത്പന്നങ്ങളുമായി എടയൂർ സ്വദേശി അടക്കം 2 പേർ പട്ടർനടക്കാവിൽ പിടിയിലായി

വളാഞ്ചേരിക്കാരൻ — Sat, 02 May 2026 04:35:09 +0000

തിരുനാവായ: ലക്ഷങ്ങൾ വിലമതിക്കുന്ന നിരോധിത പുകയില ഉത്പന്നങ്ങളുമായി രണ്ട് പേരെ പട്ടർനടക്കാവ് നമ്പ്യായംകുന്നിൽ നിന്നും കൽപകഞ്ചേരി പോലിസ് പിടികൂടി. മൂന്നിയൂർ തലപ്പാറ സ്വദേശി മാലക്കോത്ത് സുലൈമാൻ, എടയൂർ തിണ്ടലം സ്വദേശി തെറ്റപറമ്പിൽ മുഹമ്മദ് ഹനീഫ എന്നിവരാണ് പിടിയിലായത്.

വ്യാഴാഴ്ച രാത്രി 12 ഓടെ പോലീസിന് ലഭിച്ച രഹസ്യത്തിന്റെ അടിസ്ഥാനത്തിൽ നമ്പ്യായാകുന്നിലുള്ള ആക്രികടയിൽ സൂക്ഷിച്ച നിരോധിത പുകയില ഉൽപ്പന്നങ്ങൾ പരിശോധനയിൽ കണ്ടെത്തിയത്.

98 ചാക്കുകളിൽ ആയി 74,625 പാക്കറ്റ് നിരോധിത പുകയില ഉത്പന്നങ്ങളാണ് പിടികൂടിയത്. കടകളിൽ മൊത്തമായും ചില്ലറയായും വിൽപ്പന നടത്താനായി സൂക്ഷിച്ച് തായിരുന്നു ലഹരി വിൽപ്പന്നങ്ങൾ.
പ്രതികളെ പോലീസ് കോടതിയിൽ ഹാജരാക്കി.

കൽപകഞ്ചേരി സി.ഐ സി.കെ രാജേഷ്,
എസ്.ഐ സി.കെ രാഗവൻ, എ.എസ്.ഐ മാരായ ഒ. ദീപക്, സി.ടി ശ്രീരാമചന്ദ്രൻ, സിപിഎം മാരായ എസ് പ്രവീൺ തുടങ്ങിയവർ സംഘത്തിൽ സംഘത്തിൽ ഉണ്ടായിരുന്നു.

The post 74,625 പാക്കറ്റ് നിരോധിത ലഹരി ഉത്പന്നങ്ങളുമായി എടയൂർ സ്വദേശി അടക്കം 2 പേർ പട്ടർനടക്കാവിൽ പിടിയിലായി appeared first on Valanchery Online.

മോഷ്ടിച്ച ബൈക്കിൽ കാമുകിയെ കാണാനെത്തി; വാഹനപരിശോധനയ്ക്കിടെ പിടിയിൽ, സംഭവം മലപ്പുറം കുറ്റിപ്പുറത്ത്

വളാഞ്ചേരിക്കാരൻ — Thu, 03 Jul 2025 00:49:47 +0000

കുറ്റിപ്പുറം : മോഷ്ടിച്ച ബൈക്കിൽ സുഹൃത്തുമൊത്ത് കാമുകിയെക്കാണാൻ വരികയായിരുന്ന യുവാവ് കുറ്റിപ്പുറം പോലീസിന്റെ പിടിയിലായി. കാഞ്ഞിരപ്പള്ളി സ്വദേശികളായ പട്ടിമറ്റം നെല്ലിമല പുതുപ്പറമ്പിൽ അജ്‌മൽ ഷാജഹാൻ (25), സുഹൃത്ത് പാറക്കൽ മുക്കാലി ശ്രീജിത്ത് (19) എന്നിവരാണ് അറസ്റ്റിലായത്. തിങ്കളാഴ്ച രാത്രി എറണാകുളത്തെ ഒരു ഫ്ലാറ്റിന്റെ പാർക്കിങ് സ്ഥലത്തുനിന്ന് ഇരുവരുംചേർന്ന് ബൈക്ക് മോഷ്ടിച്ചു. അവിടെനിന്ന് അജ്‌മൽ ഷാജഹാന്റെ മലപ്പുറത്തുള്ള കാമുകിയെക്കാണാൻ പോകുന്നതിനിടയിലാണ് ചൊവ്വാഴ്ച പുലർച്ചെ കുറ്റിപ്പുറത്ത് വാഹനപരിശോധന നടത്തുകയായിരുന്ന പോലീസിന്റെ മുന്നിൽപ്പെട്ടത്.

ബൈക്കിന്റെ നമ്പർ പ്ലേറ്റുകൾ ഊരിമാറ്റിയ നിലയിലായിരുന്നു. എസ്ഐ അയ്യപ്പൻ, സിപിഒ രഘു എന്നിവർക്ക് സംശയം തോന്നിയതോടെ ചോദ്യംചെയ്യുകയായിരുന്നു. ഇതിനിടെ പ്രതികൾ ബൈക്കുമായി രക്ഷപ്പെടാൻ ശ്രമം നടത്തിയെങ്കിലും പോലീസ് ആ നീക്കം പൊളിച്ചു. ബൈക്കിന്റെ പിറകിലിരിക്കുകയായിരുന്ന ശ്രീജിത്ത് ഓടിരക്ഷപ്പെട്ടു. എന്നാൽ, അജ്മലിനെക്കൊണ്ടുതന്നെ പോലീസ് തന്ത്രപരമായി ശ്രീജിത്തിനെ തിരികെയെത്തിച്ചു. അതിനുശേഷമാണ് കസ്റ്റഡിയിലെടുത്തത്. എൻജിൻ നമ്പറും ചെയ്സിസ് നമ്പറും പരിശോധിച്ച് ബൈക്കിന്റെ ഉടമയെ കണ്ടെത്തി പോലീസ് ഫോണിൽ ബന്ധപ്പെട്ടപ്പോഴാണ് ഉടമ മോഷണവിവരം അറിഞ്ഞത്.

ബൈക്ക് മോഷ്ടിക്കുന്നതിന്റെ സിസിടിവി ദൃശ്യം ഫ്ളാറ്റിൽനിന്ന് പോലീസിന് ലഭിച്ചിട്ടുണ്ട്. എസ്ഐ കെ. ഗിരി, എസ്.ഐ. സുധീർ എന്നിവരും പോലീസ് സംഘത്തിലുണ്ടായിരുന്നു. പ്രതികൾക്കെതിരേ ഒട്ടേറെ കേസുകൾ ഇടപ്പള്ളി, കോട്ടയം പോലീസ്‌സ്റ്റേഷനുകളിലുണ്ടെന്ന് കണ്ടെത്തി. പ്രതികളെ തിരൂർ ജുഡീഷ്യൽ മജിസ്ട്രേറ്റ് കോടതി റിമാൻഡ് ചെയ്തു.

The post മോഷ്ടിച്ച ബൈക്കിൽ കാമുകിയെ കാണാനെത്തി; വാഹനപരിശോധനയ്ക്കിടെ പിടിയിൽ, സംഭവം മലപ്പുറം കുറ്റിപ്പുറത്ത് appeared first on Valanchery Online.

11.5 ലക്ഷം രൂപയുടെ കുഴൽപ്പണവുമായി കുറ്റിപ്പുറത്ത് ഒരാൾ പിടിയിൽ

വളാഞ്ചേരിക്കാരൻ — Sun, 22 Jun 2025 01:58:33 +0000

കുറ്റിപ്പുറം: ബൈക്ക് യാത്രക്കാരനിൽനിന്നും 11.5 ലക്ഷം രൂപയുടെ കുഴൽപ്പണം കുറ്റിപ്പുറം പോലീസ് പിടികൂടി. കേസിൽ മക്കരപ്പറമ്പ് സ്വദേശി കരിയാത്ത് അഷ്റഫി (37) നെ അറസ്റ്റ് ചെയ്തു. അഷ്‍റഫ് ഏറെനാളായി കുറ്റിപ്പുറം പോലീസിന്റെ നിരീക്ഷണത്തിലായിരുന്നു. ദേശീയപാത 66-ലെ പൈങ്കണ്ണൂരിൽനിന്നും അഷ്റഫിന്റെ ബൈക്കിനെ പിന്തുടർന്ന പോലീസ് മിനി പമ്പയിൽവെച്ചാണ് പിടികൂടിയത്. ഇയാൾ ബൈക്കിന്റെ പെട്രോൾടാങ്കിനോടു ചേർന്ന് പ്രത്യേക അറയുണ്ടാക്കി അതിലായിരുന്നു പണം സൂക്ഷിച്ചിരുന്നത്. സിഐ നൗഫലിന്റെ നിർദേശപ്രകാരം എസ്‍ഐ സുധീർ, സിപിഒ മാരായ സുനിൽ ബാബു, രഞ്ജിത് എന്നിവരടങ്ങിയ സംഘമാണ് പ്രതിയെ പിടികൂടിയത്.

The post 11.5 ലക്ഷം രൂപയുടെ കുഴൽപ്പണവുമായി കുറ്റിപ്പുറത്ത് ഒരാൾ പിടിയിൽ appeared first on Valanchery Online.

പിഞ്ചുകുഞ്ഞിനെ ഒന്നര ലക്ഷം രൂപയ്ക്ക് വിറ്റു; തിരൂരിൽ അമ്മയും കാമുകനുമുൾപ്പെടെ അഞ്ചുപേർ അറസ്റ്റിൽ

വളാഞ്ചേരിക്കാരൻ — Wed, 18 Jun 2025 01:28:32 +0000

തിരൂർ : ഒൻപതുമാസം പ്രായമുള്ള പെൺകുഞ്ഞിനെ ഒന്നരലക്ഷം രൂപയ്ക്ക് വിറ്റ കേസിൽ കുഞ്ഞിന്റെ അമ്മയും കാമുകനുമുൾപ്പെടെ അഞ്ചുപേർ അറസ്റ്റിൽ. കുഞ്ഞിന്റെ മാതാവ് തമിഴ്നാട് കള്ളക്കുറിശ്ശി നെടുമാണൂർ ശങ്കരപുരം സ്വദേശിനി കീർത്തന (23), കാമുകനും ഓട്ടോ ഡ്രൈവറുമായ കള്ളക്കുറിശ്ശി പിള്ളയാർ കോവിൽ സ്ട്രീറ്റിൽ നത്തകരൈ ആത്തൂർ സ്വദേശി ശിവ (24), കുട്ടിയെ വിലയ്ക്കു വാങ്ങിയ കോഴിക്കോട് കല്ലായി ചക്കുംകടവ് സ്വദേശി കവിതാലയത്തിൽ രാജഗോപാലിന്റെ ഭാര്യ ആദിലക്ഷ്മി (39), ഇടനിലക്കാരായി നിന്ന തിരൂരിൽ താമസിക്കുന്ന സെന്തിൽകുമാർ (49), ഭാര്യ കോഴിക്കോട് ചക്കുംകടവ് സ്വദേശിനി പ്രേമലത (46) എന്നിവരാണ് അറസ്റ്റിലായത്.

കുഞ്ഞിന്റെ പിതൃത്വത്തെച്ചൊല്ലിയുണ്ടായ അഭിപ്രായവ്യത്യാസത്തെത്തുടർന്ന് കീർത്തനയെ ഭർത്താവ് അയ്യപ്പൻ ഉപേക്ഷിക്കുകയായിരുന്നുവെന്ന് പോലീസ് പറഞ്ഞു. തുടർന്ന് ശിവയുമായി കീർത്തന പ്രണയത്തിലാകുകയും കുട്ടിയുമായി ശിവയ്ക്കൊപ്പം തിരൂരിലെത്തി സുഹൃത്തിന്റെ വീട്ടിൽ താമസിക്കുകയായിരുന്നു. ഇതിനിടെ, കീർത്തന വീണ്ടും ഗർഭിണിയായി. സാമ്പത്തിക ഭദ്രതയില്ലാത്തതിനാൽ ആദ്യ ഭർത്താവിലെ കുഞ്ഞിനെ വിൽക്കാൻ തീരുമാനിക്കുകയായിരുന്നുവെന്ന് പോലീസ് പറഞ്ഞു. മൂന്നുലക്ഷം രൂപയാണ് കുട്ടിയുടെ വിലയായി ചോദിച്ചതെങ്കിലും ഒന്നര ലക്ഷം രൂപയ്ക്ക് ഉറപ്പിക്കുകയായിരുന്നു. ഞായറാഴ്ച ആദിലക്ഷ്മി തിരൂരിലെത്തി പണംനൽകി കുട്ടിയുമായി പോയി. സമീപവാസികളിൽനിന്ന് വിവരം ലഭിച്ച പോലീസ്, കീർത്തനയുടെ ഫോൺ രേഖകൾ പരിശോധിച്ചാണ് കുട്ടിയെ വാങ്ങിയവരെയും സഹായിച്ചവരെയും പിടികൂടിയത്. കീർത്തനയുടെ കൈയിൽനിന്ന് 1,38,000 രൂപയും പോലീസ് പിടിച്ചെടുത്തു.

തിരൂർ എസ്ഐ ആർ.പി. സുജിത്ത്, എസ്ഐമാരായ ബാബുജി, പ്രതീഷ് കുമാർ, ജയപ്രകാശ്, എഎസ്ഐ രാജേഷ്, സീനിയർ സിപിഒമാരായ അരുൺ, രാജേഷ്, ജയപ്രകാശ്, സിപിഒ ഷാമില ഷാജി, കൈലാസ് എന്നിവർ ചേർന്നാണ് പ്രതികളെ അറസ്റ്റു ചെയ്തത്. പ്രതികളെ തിരൂർ ഒന്നാം ക്ലാസ് ജുഡീഷ്യൽ മജിസ്ട്രേറ്റ് കോടതിയിൽ ഹാജരാക്കി റിമാൻഡ് ചെയ്തു. കുട്ടിയെ പോലീസ് ചൈൽഡ് വെൽഫെയർ കമ്മിറ്റി അംഗം അഡ്വ. രാജേഷ് പുതുക്കാട് മുൻപാകെ ഹാജരാക്കി മലപ്പുറം ശിശുസംരക്ഷണ സമിതിക്ക് കീഴിലുള്ള ശിശു പരിപാലന കേന്ദ്രത്തിലേക്ക് മാറ്റി.

The post പിഞ്ചുകുഞ്ഞിനെ ഒന്നര ലക്ഷം രൂപയ്ക്ക് വിറ്റു; തിരൂരിൽ അമ്മയും കാമുകനുമുൾപ്പെടെ അഞ്ചുപേർ അറസ്റ്റിൽ appeared first on Valanchery Online.

മോഷണം കഴിഞ്ഞ് കടന്നു കളയവെ അപകടം; പ്രതിയെ പിടികൂടി കുറ്റിപ്പുറം പോലീസ്

വളാഞ്ചേരിക്കാരൻ — Sat, 18 Jan 2025 09:22:02 +0000

കുറ്റിപ്പുറം: മോഷണം നടത്തി കടന്നുകളയാൻ ശ്രമിക്കുന്നതിനിടെ അപകടത്തിൽ പെട്ട് ചികിത്സയിൽ കഴിഞ്ഞ പ്രതിയെ പൊക്കി കുറ്റിപ്പുറം പോലീസ്. കൊല്ലം പട്ടത്താനം സ്വദേശി വായാലിൽത്തോപ്പ് നിസാറിന്റെ മകൻ നദീർഷാൻ (34) ആണ് പിടിയിലായത്.
കാസറഗോഡ് കാഞ്ഞങ്ങാടിൽ നിന്നും മോഷണം നടത്തി അവിടെ നിന്നും ബൈക്കും മോഷ്ടിച്ച് അമിത വേഗതയിൽ വരുന്നതിനിടെയാണ് കുറ്റിപ്പുറത്ത് വച്ച് ഒരു കാറുമായി കൂട്ടിയിടിച്ചു അപകടം സംഭവിക്കുന്നത്.

അപകടത്തിൽ പരിക്കേറ്റ് കുറ്റിപ്പുറത്തെ സ്വകാര്യ ആശുപത്രിയിൽ ചികിത്സയിൽ കഴിഞ്ഞു വരികയായിരുന്നു ഇയാൾ. അപകടത്തെ സംബന്ധിച്ച് കുറ്റിപ്പുറം പോലീസിന്റെ വിദഗ്ദന്വേഷണത്തിലാണ് നദീർഷാൻ മോഷണം നടത്തി വന്നതാണെന്ന് കണ്ടെത്തിയത്. തുടർന്ന് കുറ്റിപ്പുറം എസ്‌.എച്.ഒ നൗഫൽ കെ യുടെ നേതൃത്വത്തിൽ എസ്‌.ഐ സുധീർ , എസ്‌.സി.പി.ഒ വിപിൻസേതു എന്നിവർ ചേർന്ന് പ്രതിയെ പിടികൂടിയത്. ഇയാളെ ഇന്ന് തന്നെ കാഞ്ഞങ്ങാട് പോലീസിന് കൈമാറും

The post മോഷണം കഴിഞ്ഞ് കടന്നു കളയവെ അപകടം; പ്രതിയെ പിടികൂടി കുറ്റിപ്പുറം പോലീസ് appeared first on Valanchery Online.

പോലീസ് ചമഞ്ഞ് യുവാവിനെ കൊള്ളയടിച്ച സംഘത്തിലെ രണ്ടുപേർ കൂടി അറസ്റ്റിൽ

വളാഞ്ചേരിക്കാരൻ — Thu, 09 Nov 2023 01:51:08 +0000

കുറ്റിപ്പുറം : പോലീസുകാരെന്നു പറഞ്ഞ് ബൈക്ക് യാത്രക്കാരനായ യുവാവിനെ തടഞ്ഞ് മൊബൈൽഫോണുകളും എ.ടി.എം. കാർഡും പണവും മറ്റും കവർന്ന നാലംഗസംഘത്തിലെ രണ്ടുപേർ കൂടി അറസ്റ്റിലായി. പൊന്നാനി വെളിയംകോട് സ്വദേശി ഷമീർ എന്ന ബെല്ലാരി ഷമീർ (32), ആലപ്പുഴ വണ്ടാനം സ്വദേശി സഫീർ (31) എന്നിവരെയാണ് കുറ്റിപ്പുറം ഇൻസ്പെക്ടർ പി.കെ. പത്മരാജിന്റെ നേതൃത്വത്തിലുള്ള സംഘം ആലപ്പുഴ സൗത്ത് ബീച്ചിൽനിന്ന് പിടികൂടിയത്. സംഘത്തിലുള്ള തൃശ്ശൂർ മെഡിക്കൽകോളേജ് സ്വദേശിയായ സായൂജിനെ പിടികൂടാനുണ്ട്. തൃശ്ശൂർ പേരാമംഗലത്തുണ്ടായിരുന്ന ഇയാൾ അന്വേഷണസംഘം എത്തുമ്പോഴേക്കും രക്ഷപ്പെട്ടു. സംഘത്തിലുണ്ടായിരുന്ന തൃശ്ശൂർ വടക്കേക്കാട് പുന്നയൂർ പൊന്തയിൽ സുബിനി (33) നെ രണ്ടാഴ്ച മുൻപ് അറസ്റ്റുചെയ്തിരുന്നു.

ഒക്ടോബർ രണ്ടിന് പുലർച്ചെ ഒരു മണിയോടെ വയനാട്ടിൽ വിനോദയാത്രപോയി മടങ്ങി ബൈക്കിൽ സുഹൃത്തിനെ കുറ്റിപ്പുറത്താക്കി തിരിച്ചുപോവുകയായിരുന്ന തിരൂർ പുല്ലുണി സ്വദേശി അരുൺജിത്തിനെയാണ് തിരൂർ റോഡിലെ റെയിൽവേ മേൽപ്പാലത്തിനുകീഴെ വെച്ച് നാലംഘസംഘം പിടികൂടിയത്. ബൈക്കിലും സ്കൂട്ടറിലും വന്ന സംഘം തങ്ങൾ പോലീസുകാരാണെന്നു പറഞ്ഞ് അരുൺജിത്തിനെ തടഞ്ഞു. തുടർന്ന് അവിടെനിന്നും ബൈക്കിൽ വൺവേ റോഡിലെ ആളൊഴിഞ്ഞ പഴയ കെ.എസ്.ഇ.ബി. കെട്ടിടത്തിലേക്ക് കൊണ്ടുപോയി ക്രൂരമായി മർദിച്ച് വിലകൂടിയ രണ്ട് മൊബൈൽ ഫോണുകളും എ.ടി.എം. കാർഡ്, പവർ ബാങ്ക്, വാച്ച്, പണം എന്നിവയും കവർന്നു. പിന്നീട് ബൈക്കിൽ കയറ്റി എടപ്പാളിനടുത്ത നടുവട്ടത്ത് എത്തിച്ച് ഉപേക്ഷിച്ച് രക്ഷപ്പെടുകയുമായിരുന്നു.

മലപ്പുറം, പാലക്കാട്, കോഴിക്കോട് ജില്ലകളിലായി ഒട്ടേറെ അക്രമ, കവർച്ച, ലഹരി വിൽപ്പന, കളവു കേസുകളിലെ പ്രതിയാണ് അറസ്റ്റിലായ ബെല്ലാരി ഷമീർ. സഫീറും വിവിധ കേസുകളിലെ പ്രതിയാണ്. പിടിയിലാകാനുള്ള സായൂജ് പേരാമംഗലം പോലീസ് സ്റ്റേഷനിൽ ഗുണ്ടാലിസ്റ്റിൽപ്പെട്ടയാളാണ്. പോലീസ് സംഘത്തിൽ എസ്.ഐ.മാരായ മനോജ്, സെൽവകുമാർ, ഡാൻസാഫ് അംഗങ്ങളായ എ.എസ്.ഐ. മാരായ ജയപ്രകാശ്, രാജേഷ്, സീനിയർ സി.പി.ഒ. ജയപ്രകാശ് എന്നിവരുണ്ടായിരുന്നു.

The post പോലീസ് ചമഞ്ഞ് യുവാവിനെ കൊള്ളയടിച്ച സംഘത്തിലെ രണ്ടുപേർ കൂടി അറസ്റ്റിൽ appeared first on Valanchery Online.

എടയൂർ മൂന്നാക്കൽ പള്ളിവളപ്പിൽ നിന്ന്‌ ചന്ദനം മുറിച്ച് കടത്താൻ ശ്രമം; പ്രതി പിടിയിൽ

വളാഞ്ചേരിക്കാരൻ — Tue, 17 Oct 2023 01:41:45 +0000

എടയൂർ: മലപ്പുറം എടയൂരിലെ പുരാതനമായ മൂന്നാക്കൽ ജുമാമസ്ജിദ് വളപ്പിൽ നിന്നും ചന്ദനം കടത്താൻ ശ്രമിച്ച മോഷ്ടാവിനെ നാട്ടുകാർ ചേർന്ന് പിടികൂടി പോലീസിൽ ഏൽപ്പിച്ചു. മോഷ്ടാവ് പട്ടാമ്പി ആമയൂർ സ്വദേശിയായ യുവാവാണ് പിടിയിലായത്.

രണ്ടാഴ്ച മുമ്പ് പള്ളി വളപ്പിൽ നിന്ന് ചന്ദനം മുറിച്ച് കടത്തിയതായി‌ സംശയം തോന്നിയതിനെ തുടർന്ന് നാട്ടുകാർ മൂന്നാക്കൽ പള്ളിയിലെ വഖഫ് ബോർഡ് അംഗത്തെ വിവരമറിയിക്കുകയും ഇവർ നടത്തിയ തിരച്ചിലിൽ ചന്ദനം വെട്ടിയതായും ബാക്കിയുള്ള ചന്ദനം വെട്ടാനുള്ള തയ്യാറെടുപ്പിലായതായും കണ്ടെത്തിയിരുന്നു. സമീപത്ത് നിന്ന് വെട്ടാനുള്ള ആയുധവും കണ്ടെത്തിയിരുന്നു.

ഇതിന്റെ അടിസ്ഥാനത്തിൽ വളാഞ്ചേരി പോലീസിനെ വിവരം അറിയിക്കുകയും നാട്ടുകാരായ രണ്ടു പേർ പള്ളിപ്പറമ്പിൽ കാവൽ നിൽക്കുകയും ഉണ്ടായി. ഇതിനിടയിലാണ് ഇന്നലെ അർദ്ധരാത്രിയോടെ മോഷ്ടാവ് പള്ളിപ്പറമ്പിൽ എത്തിയത്. ബൈക്കിൽ എത്തിയ മോഷ്ടാവ് ആയുധവുമായി പള്ളിപ്പറമ്പിലെ ചന്ദനം വെട്ടി ചാക്കിൽ ആക്കി മടങ്ങി പോകുമ്പോഴാണ് നാട്ടുകാർ ചേർന്ന് ഓടിച്ചിട്ട് പിടികൂടിയത്. വളാഞ്ചേരി പോലീസ് സ്ഥലത്തെത്തി മോഷ്ടാവിനെ കൊണ്ടുപോയി. തുടർനടപടികളുടെ ഭാഗമായി‌ പ്രതിയെ കോടതിയിൽ ഹാജരാക്കും.

The post എടയൂർ മൂന്നാക്കൽ പള്ളിവളപ്പിൽ നിന്ന്‌ ചന്ദനം മുറിച്ച് കടത്താൻ ശ്രമം; പ്രതി പിടിയിൽ appeared first on Valanchery Online.

കോട്ടക്കലിൽ എം.ഡി.എം.എ.യുമായി യുവാവ് പിടിയിൽ

വളാഞ്ചേരിക്കാരൻ — Sun, 24 Sep 2023 01:59:58 +0000

കോട്ടയ്ക്കൽ : എം.ഡി.എം.എ.യുമായി യുവാവ് പിടിയിൽ. കോട്ടയ്ക്കൽ കുറ്റിപ്പുറം പരിയാരത്ത് മുഹമ്മദ് ഇർഫാൻ (21) ആണ് 1.4 ഗ്രാം എം.ഡി.എം.എ.യുമായി പിടിയിലായത്. ഇയാൾ ഉപയോഗിച്ച സ്കൂട്ടറും കസ്റ്റഡിയിലെടുത്തു. ശനിയാഴ്ച രാവിലെ 11.40-ന് നായാടിപ്പാറയിൽ വെച്ച് വാഹനപരിശോധന നടത്തുന്നതിനിടെ നിർത്താതെ പോയ വാഹനം പിന്തുടർന്നാണ് എസ്.ഐ. എസ്.കെ പ്രിയനും സംഘവും ഇയാളെ പിടിച്ചത്.

പ്രതിയുടെ പഴ്‌സിൽനിന്ന്‌ കണ്ടെത്തിയ എം.ഡി.എം.എ. വിൽപ്പനയ്ക്കായി കൊണ്ടുപോകുകയായിരുന്നു. പ്രതിയെ കോടതി റിമാൻഡ് ചെയ്തു. സ്‌പെഷ്യൽ സ്‌ക്വാഡ് സംഘങ്ങളായ വിശ്വനാഥൻ, ബിജു, ജിനേഷ്, അനൂപ് എന്നിവരും പോലീസ് സംഘത്തിൽ ഉണ്ടായിരുന്നു.

The post കോട്ടക്കലിൽ എം.ഡി.എം.എ.യുമായി യുവാവ് പിടിയിൽ appeared first on Valanchery Online.

പത്തു വയസുകാരനു നേരെ പീഢനം; കുറ്റിപ്പുറത്ത് 62 കാരൻ പിടിയിൽ

വളാഞ്ചേരിക്കാരൻ — Sun, 10 Sep 2023 01:19:22 +0000

കുറ്റിപ്പുറം : പത്തുവയസ്സുകാരനെ പ്രകൃതിവിരുദ്ധ പീഡനത്തിന് ഇരയാക്കിയ കേസിലെ പ്രതിയെ അറസ്റ്റുചെയ്തു.കുറ്റിപ്പുറം സ്വദേശിയും കാലടിയിൽ താമസക്കാരനുമായ മാഞ്ചേരി ഹംസ (62)യെ ആണ് കുറ്റിപ്പുറം പോലീസ് പോക്സോവകുപ്പു പ്രകാരം ശനിയാഴ്ച അറസ്റ്റു ചെയ്തത്.

The post പത്തു വയസുകാരനു നേരെ പീഢനം; കുറ്റിപ്പുറത്ത് 62 കാരൻ പിടിയിൽ appeared first on Valanchery Online.

വളാഞ്ചേരിയിൽ ബൈക്കിലെത്തി സ്ത്രീയുടെ മാല മോഷ്ടിച്ച പ്രതിയും മോഷണ മുതൽ വാങ്ങിയ വ്യാപാരിയും പിടിയിൽ

വളാഞ്ചേരിക്കാരൻ — Thu, 27 Jul 2023 13:30:40 +0000

വളാഞ്ചേരി: ബൈക്കിലെത്തി മാല മോഷ്ടിച്ച കേസിൽ പ്രതിയും തൊണ്ടിമുതലുകൾ വാങ്ങുന്നത് പതിവാക്കിയ വ്യാപാരിയും പിടിയിൽ. ഇക്കഴിഞ്ഞ ജുലൈ 24നാണ് ജോലി കഴിഞ്ഞ് വീട്ടിലേക്ക് മടങ്ങുകയായിരുന്ന അജിതയെന്ന 54 കാരിയായ അംഗൻവാടി ടീച്ചറുടെ മാലയാണ് നഷ്ടപ്പെട്ടത്. വളാഞ്ചേരി കോഴിക്കോട് റോഡിൽ റിലയൻസ് പമ്പിന്റെ പുറകുവശത്തുള്ള റോഡിൽ വച്ച് ബൈക്കിൽ വന്ന പ്രതി മാല പൊട്ടിച്ച് കടന്നു കളയുകയായിരുന്നു.

പോലീസിന്റെ അന്വേഷണത്തിൽ പ്രതി വളാഞ്ചേരി കാവുംപുറം സ്വദേശി പാറപ്പള്ളി വീട്ടിൽ ഹനീഫ ഹാജിയുടെ മകൻ 39കാരനയ മുഹമ്മദ് റഫീഖ് അറസ്റ്റ് ചെയ്തു. ഇയാൾ കുറ്റകൃത്യത്തിന് ഉപയോഗിച്ച ബൈക്കും പിടികൂടി. മോഷ്ടിച്ച മൂന്ന് പവനോളം തൂക്കം വരുന്ന മാല വളാഞ്ചേരി ടൗണിൽ ജ്വല്ലറിയിൽ വിറ്റത് അന്വേഷണത്തിന്റെ ഭാഗമായി കണ്ടെടുത്തു. സ്ഥിരമായി മോഷ്ടാക്കളിൽ നിന്നും സ്വർണ്ണം അമിത ലാഭം എടുത്ത് വാങ്ങി വില്പന നടത്തിയിരുന്നു വളാഞ്ചേരിയിലെ തൃമൂർത്തി ജല്ലറി ഉടമയായ ദത്തസേട്ടിനെയും പോലീസ് അറസ്റ്റ് ചെയ്തു. ഇരുവരെയും തിരൂർ മജിസ്ട്രേറ്റ് കോടതി മുമ്പാകെ ഹാജരാക്കി.

വളാഞ്ചേരി SHO കമറുദ്ദീൻ വള്ളിക്കാടൻ, സബ് ഇൻസ്പെക്ടർ ജലീൽ കറുത്തേടത്ത്, ASI ജയപ്രകാശ്, സീനിയർ സിവിൽ പോലീസ് ഓഫീസർ ജയപ്രകാശ്, സിവിൽ പോലീസ് ഓഫീസർമാരായ ഗിരീഷ്, വിനീത്, ശൈലേഷ്, രജിത എന്നിവർ അടങ്ങുന്ന സംഘമാണ് പ്രതികളെ പിടികൂടിയത്.

The post വളാഞ്ചേരിയിൽ ബൈക്കിലെത്തി സ്ത്രീയുടെ മാല മോഷ്ടിച്ച പ്രതിയും മോഷണ മുതൽ വാങ്ങിയ വ്യാപാരിയും പിടിയിൽ appeared first on Valanchery Online.

ലോട്ടറി കടകളിൽ പരിശോധന നടത്തി വളാഞ്ചേരി പോലീസ്; മൂന്നക്ക നമ്പർ ചൂതാട്ടം നടത്തിയ 6 പേർ അറസ്റ്റിൽ

വളാഞ്ചേരിക്കാരൻ — Sat, 15 Jul 2023 11:19:13 +0000

വളാഞ്ചേരി: ലോട്ടറി കടയുടെ മറവിൽ മൂന്നക്ക നമ്പർ ചൂതാട്ടം നടത്തിയ 6 പേരെ അറസ്റ്റ് ചെയ്തു. ജില്ലാ പോലീസ് മേധാവിയുടെ നിർദ്ദേശപ്രകാരം വളാഞ്ചേരി പോലീസ് വ്യാഴാഴ്ചയാണ് നഗരത്തിലെ ലോട്ടറി കടകളിൽ പരിശോധന നടത്തിയത്. പരിശോധനയിൽ മൂന്നക്ക എഴുത്തു ലോട്ടറി നടത്തുന്ന 6 പേരെ പോലീസ് അറസ്റ്റ് ചെയ്തു. വളാഞ്ചേരി പൈങ്കണ്ണൂർ പാലക്കോട്ടുപടി സുബ്രഹ്മണ്യന്റെ മകൻ സിനീഷ്, വളാഞ്ചേരി കാവുംപുറം തൊഴുവാനൂർ
മുത്താട്ടിൽ വീട്ടിൽ ചന്ദ്രന്റെ മകൻ ശ്രീനാഥ്, വളാഞ്ചേരി കോതോട് പാറമ്മൽ വീട്ടിൽ കുട്ടിപ്പഞ്ഞന്റെ മകൻ രാധാകൃഷ്ണൻ, വളാഞ്ചേരി താണിയപ്പൻകുന്ന് ചെമ്മൻ കാട്ടിൽ വീട്ടിൽ രാമ വാര്യരുടെ മകൻ അരവിന്ദൻ, ആതവനാട് വെട്ടിക്കാട്ട് കൊളരിക്കാട്ടിൽ അബ്ദുൽ റഹിമാന്റെ മകൻ ഹൈദ്രോസ് കുട്ടി, ഇല്ലത്തുവളപ്പിൽ താമിയുടെ മകൻ സജിത്ത് എന്നിവരെയാണ് വളാഞ്ചേരി പോലീസ് അറസ്റ്റ് ചെയ്തത്.

The post ലോട്ടറി കടകളിൽ പരിശോധന നടത്തി വളാഞ്ചേരി പോലീസ്; മൂന്നക്ക നമ്പർ ചൂതാട്ടം നടത്തിയ 6 പേർ അറസ്റ്റിൽ appeared first on Valanchery Online.

കുറ്റിപ്പുറം എം.ഇ.എസ്. എൻജി.കോളേജിൽ വിദ്യാർഥികൾ ഏറ്റുമുട്ടി; സംഘർഷത്തിൽ എസ്.ഐക്ക് പരിക്ക്, മൂന്നു വിദ്യാർഥികൾ അറസ്റ്റിൽ

വളാഞ്ചേരിക്കാരൻ — Thu, 15 Jun 2023 01:15:27 +0000

കുറ്റിപ്പുറം : എം.ഇ.എസ്. എൻജിനിയറിങ് കോളേജിൽ ഇരുവിഭാഗം വിദ്യാർഥികൾ ഏറ്റുമുട്ടി. സംഭവസ്ഥലത്തെത്തിയ കുറ്റിപ്പുറം എസ്.ഐ.യെ വിദ്യാർഥികൾ ആക്രമിച്ചു പരിക്കേൽപ്പിച്ചു. ബുധനാഴ്‌ച ഉച്ചയ്ക്ക് ഒന്നരയോടെയാണ് കോളേജിനു പുറത്ത് ഇരുവിഭാഗം വിദ്യാർഥികൾ ഏറ്റുമുട്ടിയത്. പിന്നീട് സംഘർഷം കോളേജ് വളപ്പിലേക്കു വ്യാപിച്ചു.

ഇതിനിടയിൽ പരിക്കേറ്റ ഒരു വിദ്യാർഥിയുമായി ഒരുസംഘം വിദ്യാർഥികൾ പ്രിൻസിപ്പലിന്റെ ഓഫീസിലെത്തി. പിന്നീട് ഇവർ ഓഫീസിനകത്തെ വസ്‌തുക്കൾ അടിച്ചുതകർത്തു. ഇതോടേയാണ് എസ്.ഐ ഒ.പി. വിജയകുമാരന്റെ നേതൃത്വത്തിൽ പോലീസ് കോളേജിലെത്തിയത്. സംഘർഷത്തിലേർപ്പെട്ട വിദ്യാർഥികളെ പിരിച്ചുവിടാൻ ശ്രമിക്കുന്നതിനിടെയാണ് ചില വിദ്യാർഥികൾ പോലീസിനെ ആക്രമിച്ചത്. എസ്.ഐ. വിജയകുമാരന്റെ കണ്ണിനു താഴെയാണു പരിക്കേറ്റത്. അദ്ദേഹത്തെ താലൂക്ക് ആശുപത്രിയിൽ പ്രവേശിപ്പിച്ചു. എസ്.ഐ.യെ ആക്രമിച്ച കേസിൽ മൂന്നു വിദ്യാർഥികൾ അറസ്റ്റിലായി. മെക്കാനിക്കൽ വിദ്യാർഥികളായ തിരുവേഗപ്പുറ കുന്നുംപുറത്ത് മുഹമ്മദ് മിസാബ് (21), കോഴിക്കോട് പാലേരി മുഫ്‌ലിഹ് (22), വേങ്ങര ഊരകം സ്വദേശി അർജുൻരാജ് (21) എന്നിവരെയാണ് സി.ഐ. പ്രമോദിന്റെ നേതൃത്വത്തിലുള്ള പൊലീസ് സംഘം അറസ്റ്റുചെയ്തത്.

പോലീസ് ലാത്തിച്ചാർജിൽ ഒട്ടേറെ വിദ്യാർഥികൾക്കും പരിക്കേറ്റിട്ടുണ്ട്. പരിക്കേറ്റവരെ ആശുപത്രിയിലെത്തിച്ച നിരപരാധികളെയാണ് പോലീസ് അറസ്റ്റുചെയ്തതെന്ന് ഒരുവിഭാഗം വിദ്യാർഥികൾ പറയുന്നു.

The post കുറ്റിപ്പുറം എം.ഇ.എസ്. എൻജി.കോളേജിൽ വിദ്യാർഥികൾ ഏറ്റുമുട്ടി; സംഘർഷത്തിൽ എസ്.ഐക്ക് പരിക്ക്, മൂന്നു വിദ്യാർഥികൾ അറസ്റ്റിൽ appeared first on Valanchery Online.