meat waste Archives - Valanchery Online

കുറ്റിപ്പുറത്ത് ജനവാസമേഖലയിൽ വീണ്ടും അറവുമാലിന്യം തള്ളി

വളാഞ്ചേരിക്കാരൻ — Fri, 15 Jun 2018 01:16:35 +0000

കുറ്റിപ്പുറം: പൊലീസിനെയും നാട്ടുകാരെയും വെല്ലുവിളിച്ച് ജനവാസമേഖലയിൽ അജ്ഞാതർ വീണ്ടും അറവുമാലിന്യം തള്ളി. ദേശീയപാതയോരത്തെ കുറ്റിപ്പുറം മൂടാലിലാണ് ഇന്നലെ പുലർച്ചെ ലോഡ് കണക്കിന് മാംസാവശിഷ്ടങ്ങൾ ചാക്കുകളിലാക്കി തള്ളിയത്. ഇതേ പാതയിലെ കുറ്റിപ്പുറം കൈലാസ് ഓഡിറ്റോറിയത്തിന് മുന്നിൽ കഴിഞ്ഞ മാസം 50 ചാക്കോളം അറവുമാലിന്യം തള്ളിയിരുന്നു. ഇതെ തുടർന്ന് പ്രദേശവാസികൾ പൊലീസിൽ പരാതി നൽകി നിരീക്ഷിക്കുന്നതിനിടെയാണ് ഒരുകിലോമീറ്റർ അകലെ വീണ്ടും വൻതോതിൽ മാലിന്യം കൊണ്ടിട്ടത്.
മൂടാൽ ആശുപത്രിക്ക് എതിർവശത്തെ ഇടവഴിയിലാണ് ദുർഗന്ധംവമിക്കുന്ന മാംസാവശിഷ്ടങ്ങൾ ഉപേക്ഷിച്ച നിലയിൽ കണ്ടെത്തിയത്. പ്രദേശത്തെ ആറു വീടുകളിലേക്കുള്ള വഴിയിലാണ് ചാക്കുകൾ ഉപേക്ഷിച്ചത്. സമീപത്ത് മറ്റു സ്ഥലങ്ങൾ ഉണ്ടായിട്ടും ഈ വീട്ടുകാർ സഞ്ചരിക്കുന്ന വഴിയിൽതന്നെ തള്ളിയത് മനഃപൂർവമാണെന്ന് കരുതുന്നു. ജില്ലയുടെ വിവിധ ഭാഗങ്ങളിലെ അറവുശാലകളിൽനിന്നും കോഴിക്കടകളിൽനിന്നുമുള്ള മാലിന്യമാണ് തുടർച്ചയായി ഇത്തരത്തിൽ കുറ്റിപ്പുറത്തും പരിസരപ്രദേശങ്ങളിലും തള്ളുന്നത്.
പൊലീസിലും മറ്റും പലതവണ പരാതിപ്പെട്ടെങ്കിലും ഇതിനു പിന്നിലുള്ളരെ പിടികൂടാനായിട്ടില്ല. അറവുശാലകളിൽനിന്നു മാംസാവശിഷ്ടങ്ങൾ ശേഖരിക്കുന്ന സംഘത്തെ പിടികൂടി ചോദ്യംചെയ്താൽ സംഭവത്തിനു പിന്നിലുള്ളവരെ കണ്ടെത്താമെന്ന് നാട്ടുകാർ ചൂണ്ടിക്കാട്ടുന്നുണ്ട്. എന്നാൽ, നാട്ടുകാരുടെ ഇത്തരം പരാതി പൊലീസ് കാര്യമായി എടുക്കുന്നില്ലെന്നാണ് ആരോപണം. വിവിധ ഭാഗങ്ങളിൽനിന്ന് അറവുമാലിന്യം പണംവാങ്ങി ശേഖരിക്കുന്ന സംഘത്തിന് സംഭവത്തിൽ പങ്കുണ്ടെന്നാണ് നാട്ടുകാരുടെ‍ പരാതി.
കിലോഗ്രാമിന് 15 രൂപവരെ നിരക്കിൽ ശേഖരിക്കുന്ന മാലിന്യം പാലക്കാട്ടെ പന്നിഫാമിലേക്ക് നൽകാനാണെന്നാണ് പറയുന്നത്. എന്നാൽ, ശേഖരിക്കുന്ന മാലിന്യം രാത്രിയിൽ ആളൊഴിഞ്ഞ ഭാഗത്ത് തട്ടുകയാണ് ചെയ്യുന്നത.് കുറ്റിപ്പുറത്ത് മാത്രം ഇത് അഞ്ചാമത്തെ തവണയാണ് ഇത്തരത്തിൽ വൻതോതി‍ൽ അറവുമാലിന്യം തള്ളുന്നത്. ഇന്നലെ കണ്ടെത്തിയ മാലിന്യം കുറ്റിപ്പുറം പഞ്ചായത്തിന്റെ നേതൃത്വത്തിൽ സമീപത്തുതന്നെ കുഴിച്ചുമൂടി.

The post കുറ്റിപ്പുറത്ത് ജനവാസമേഖലയിൽ വീണ്ടും അറവുമാലിന്യം തള്ളി appeared first on Valanchery Online.

സ്വകാര്യ സ്ഥലത്ത് തള്ളാനെത്തിച്ച അറവുമാലിന്യം തള്ളിയവരുടെ വീട്ടിൽ കൊണ്ടിട്ട് നാട്ടുകാരുടെ പ്രതിഷേധം-വീഡിയോ കാണാം

വളാഞ്ചേരിക്കാരൻ — Wed, 16 May 2018 01:44:45 +0000

കൊളത്തൂര്‍: കരിഞ്ചാംപടി പൊരുന്നം പറമ്പില്‍ വ്യക്തിയുടെ പറമ്പില്‍ മാലിന്യം തള്ളാനെത്തിയവരെ നാട്ടുകാര്‍ പിടികൂടി. പിടിച്ചെടുത്ത വാഹനം പ്രതികളിലൊരാളുടെ വീട്ടില്‍ കൊണ്ടിട്ടാണ് നാട്ടുകാര്‍ പ്രതികരിച്ചത്.
ഞായറാഴ്ച രാത്രി ഒന്നരയോടെയാണ് ഏഴ് ടണ്ണോളം അറവ് മാലിന്യവുമായെത്തിയ ലോറി നാട്ടുകാര്‍ പിടികൂടിയത്. സ്ഥിരമായി മാലിന്യംതള്ളുന്നത് നാട്ടുകാര്‍ ദിവസങ്ങളായി നിരീക്ഷിക്കുകയായിരുന്നു. ഡ്രൈവറും ഒരു സഹായിയുമാണ് വാഹനത്തിലുണ്ടായിരുന്നത്. നാട്ടുകാര്‍ വാഹനം പിടികൂടിയപ്പോള്‍ ഇരുവരും ഇറങ്ങിയോടി.

ഇവരെ രക്ഷിക്കാന്‍ KL-14-N-5565 നമ്പർ കാറിലെത്തിയ അറവ് മാലിന്യത്തിന്റെ ഉടമ രണ്ടുപേരേയും വാഹനം നല്‍കി രക്ഷപ്പെടാന്‍ സഹായിച്ചു. ഉടമ വാഹനത്തില്‍ കയറാതെ സ്ഥലത്തും നിന്നു. ഇയാളാണ് സംഘത്തലവനെന്ന് നാട്ടുകാര്‍ക്ക് അറിയില്ലായിരുന്നു. ഇയാളുടെ ഫോണില്‍ നിന്ന് ഡ്രൈവറെയും സഹായിയെയും വിളിച്ചുവരുത്തിയശേഷം പിടികൂടിയ ആളെ നാട്ടുകാര്‍ വിടുകയുംചെയ്തു.
ഡ്രൈവറെയും സഹായിയെയും ചോദ്യംചെയ്തപ്പോഴാണ് പിടികൂടിയ ആളാണ് മാലിന്യം തള്ളാന്‍ നിര്‍ദേശിച്ചതെന്ന് സമ്മതിച്ചത്. ഉടന്‍ തന്നെ ഇരുവരേയും കയറ്റി നാട്ടുകാര്‍ ലോറിയുമായി ചുള്ളിക്കോടുള്ള ഉടമയുടെ വീട്ടിലെത്തുകയായിരുന്നു.

നാട്ടുകാര്‍ കൊളത്തൂര്‍ പോലീസില്‍ പരാതി നല്‍കി. പോലീസ് മൂന്ന് പേരേയും കസ്റ്റഡിയില്‍ എടുത്തിട്ടുണ്ട്.

The post സ്വകാര്യ സ്ഥലത്ത് തള്ളാനെത്തിച്ച അറവുമാലിന്യം തള്ളിയവരുടെ വീട്ടിൽ കൊണ്ടിട്ട് നാട്ടുകാരുടെ പ്രതിഷേധം-വീഡിയോ കാണാം appeared first on Valanchery Online.

പേരശ്ശനൂരിൽ അറവ് മാലിന്യം തള്ളാനെത്തിയ ലോറി നാട്ടുകാർ തല്ലി തകർത്തു

വളാഞ്ചേരിക്കാരൻ — Mon, 26 Feb 2018 00:07:41 +0000

കുറ്റിപ്പുറം∙ ജനവാസമേഖലയിലെ ചെങ്കൽ ക്വാറിയി‍ൽ അറവുമാലിന്യം തള്ളാനെത്തിയ ലോറി നാട്ടുകാർ അടിച്ചുതകർത്തു. ലോറിയിലെ മൂന്നു ജീവനക്കാരെയും ലോറി ഉടമയെയും കുറ്റിപ്പുറം പൊലീസ് അറസ്റ്റ് ചെയ്തു. കോഡൂർ സ്വദേശി മുഹമ്മദ് കബീർ(32), വടക്കാങ്ങര സ്വദേശി മൊയ്തീൻകുട്ടി (35), ചട്ടിപ്പറമ്പ് സ്വദേശി അജ്മൽ (20) ലോറി ഉടമ ഈസ്റ്റ് കോഡൂർ സ്വദേശി മുഹമ്മദ് റജുൽ (24) എന്നിവരാണ് അറസ്റ്റിലായത്. പേരശ്ശനൂർ ബിലാൽ നഗറിൽ ഇന്നലെ പുലർച്ചെ രണ്ടരയോടെയാണു സംഭവം.

സ്ഥലത്തെ സ്വകാര്യ ക്വാറിയി‍ൽ നേരത്തേ മാലിന്യം തള്ളിയിരുന്നത് നാട്ടുകാരുടെ ശ്രദ്ധയിൽപെട്ടിരുന്നു. പ്രദേശത്ത് ദുർഗന്ധം രൂക്ഷമായതോടെയാണ് ഇന്നലെ പുലർച്ചെ നാട്ടുകാർ കാത്തിരുന്ന് ലോറി പിടികൂടിയത്. പ്രതിഷേധവുമായി എത്തിയ പ്രദേശവാസികൾ ലോറി അടിച്ചുതകർത്തു. പിന്നീട് കുറ്റിപ്പുറം പൊലീസ് എത്തിയാണ് ലോറിയിലുണ്ടായിരുന്ന മൂന്നു പേരെ കസ്റ്റഡിയിലെടുത്തത്. ലോറിഉടമയെ പിന്നീട് പിടികൂടി. മലപ്പുറം ഭാഗത്തെ അറവുശാലകളിൽനിന്നുള്ള മാലിന്യമാണ് ലോറിയിലെത്തിച്ച് തള്ളിയിരുന്നത്.

ക്വാറിയിൽ കുഴിയെടുത്ത് മാലിന്യം സംസ്കരിക്കാനായിരുന്നു നീക്കമെന്നും ക്വാറി ഉടമയുടെ അനുവാദത്തോടെയാണ് ഇതെന്നും കുറ്റിപ്പുറം എസ്ഐ നിപുൺ ശങ്കർ പറഞ്ഞു. ക്വാറിയിലെ കുഴികളിൽ നേരത്തേ തള്ളിയ മാലിന്യം കെട്ടിക്കിടക്കുന്നുണ്ട്. ജനവാസ മേഖലയിൽ ഇത്തരത്തിൽ മാലിന്യം തള്ളാനുള്ള നീക്കം അനുവദിക്കില്ലെന്ന നിലപാടിലാണ് പ്രദേശവാസികൾ. ‍‍

The post പേരശ്ശനൂരിൽ അറവ് മാലിന്യം തള്ളാനെത്തിയ ലോറി നാട്ടുകാർ തല്ലി തകർത്തു appeared first on Valanchery Online.