railway Archives - Valanchery Online

‘Where is my Train’ ഔദ്യോഗിക യാത്രാ വിവര ആപ്പ് അല്ലെന്ന് റെയിൽവേ; ചാർജ്ജ് വ്യത്യാസം സംബന്ധിച്ച് കുറ്റിപ്പുറം സ്വദേശി നൽകിയ പരാതിയിലാണ് ഈ മറുപടി

വളാഞ്ചേരിക്കാരൻ — Fri, 30 May 2025 02:07:58 +0000

കുറ്റിപ്പുറം: “വേർ ഈസ് മൈ ട്രെയിൻ ” റെയിൽവേയുടെ ഔദ്യോഗിക യാത്രാ വിവര ആപ്പ് അല്ലെന്ന് പാലക്കാട് റെയിൽവെ ഡിവിഷണൽ പബ്ലിക്ക് ഗ്രിവൻസ് സെൽ. ട്രെയിൻ യാത്രക്കാർ വ്യാപകമായി ഉപയോഗിച്ച് വരുന്ന വേർ ഈസ് മൈ ട്രെയിൻ എന്ന ആപ്പ് റെയിൽവേ ഔദ്യോഗിക സംവിധാനം അല്ലെന്നും ഇത് ഒരു മൂന്നാം കക്ഷിയുടെ നിയന്ത്രണത്തിൽ ഉള്ളത് ആണെന്നുമാണ് റെയിൽവേ അധികൃതർ വ്യക്തമാക്കുന്നത്.

ഷൊർണൂർ – കണ്ണൂർ ( 06031) സ്പെഷ്യൽ ട്രെയിനിൻ്റെ ടിക്കറ്റ് ചാർജിൽ ആപ്പിൽ കാണിക്കുന്നതും റെയിൽവേ ഈടാക്കുന്നതും സംബന്ധിച്ച വ്യത്യാസം ചൂണ്ടിക്കാട്ടി പാലക്കാട് റെയിൽവേ ഡിവിഷണൽ മാനേജർക്ക് കുറ്റിപ്പുറത്തെ പൊതു പ്രവർത്തകനായ അസ്ക്കർ കൊളത്തോൾ നൽകിയ പരാതിക്കുള്ള മറുപടിയിലാണ് റെയിൽവെ ഇക്കാര്യം വ്യക്തമാക്കിയത്. വേർ ഈസ് മൈ ട്രെയിൻ ആപ്പിൽ ഈ ട്രെയിനിൻ്റെ മിനിമം ചാർജ് മെമു ട്രെയിനിന് തുല്യമായി 10 രൂപയാണ് കാണിക്കുന്നത്. എന്നാൽ റെയിൽവേ ടിക്കറ്റിൽ ഈ ട്രെയിനിന് മിനിമം ചാർജ് 30 രൂപയാണ്. ഈ വ്യത്യാസം സംബന്ധിച്ച് ചൂണ്ടിക്കാട്ടിയ പരാതിയിലാണ് റെയിൽവെയുടെ മറുപടി. ഇതു സംബന്ധിച്ച് പരിശോധിച്ച് നടപടി എടുക്കാമെന്ന് റെയിൽവേ മറുപടി നൽകിയെങ്കിലും ആപ്പിൽ ഇതുവരെ മാറ്റം വരുത്തിയിട്ടില്ല.

സ്റ്റാർട്ടപ് കമ്പനിയായ സിഗ്മോയ്ഡ് ലാബ്സ് ആണ് വേർ ഈസ് മൈ ട്രെയിൻ ആപിൻ്റെ നിർമ്മാതാക്കൾ. എന്നാൽ 2022ൽ ഈ കമ്പനിയെ ടെക് ഭീമന്മാരായ ഗൂഗിൾ ഏറ്റെടുത്തിരുന്നു.

The post ‘Where is my Train’ ഔദ്യോഗിക യാത്രാ വിവര ആപ്പ് അല്ലെന്ന് റെയിൽവേ; ചാർജ്ജ് വ്യത്യാസം സംബന്ധിച്ച് കുറ്റിപ്പുറം സ്വദേശി നൽകിയ പരാതിയിലാണ് ഈ മറുപടി appeared first on Valanchery Online.

കുറ്റിപ്പുറം ഉൾപ്പടെ മൂന്ന് റെയിൽവേ സ്റ്റേഷനുകളിൽ സി.സി.ടി.വി. ക്യാമറകൾ ഏപ്രിലിൽ സ്ഥാപിക്കും

വളാഞ്ചേരിക്കാരൻ — Fri, 07 Mar 2025 01:53:32 +0000

കുറ്റിപ്പുറം : റെയിൽവേ പാലക്കാട് ഡിവിഷന് കീഴിലെ കുറ്റിപ്പുറം, കൊയിലാണ്ടി, ഒറ്റപ്പാലം റെയിൽവേസ്റ്റേഷനുകളിൽ സി.സി.ടിവി. ക്യാമറകൾ ഏപ്രിലിൽ സ്ഥാപിക്കും. ബുള്ളറ്റ് ക്യാമറ, ഡോം ക്യാമറ, യു.എച്ച്.ഡി. ക്യാമറ, പി.ടി. സെഡ് ക്യാമറ എന്നീ അതിനൂതനമായ 40 ക്യാമറകളാണ് ഈ റെയിൽവേ സ്റ്റേഷനുകളിൽ സ്ഥാപിക്കുന്നത്. ക്യാമറകൾ സ്ഥാപിക്കുന്നതിന്റെ വയറിങ് ജോലികൾ പൂർത്തിയാക്കിയിട്ട് മാസങ്ങൾ കഴിഞ്ഞു. എന്നാൽ ക്യാമറകൾ ലഭ്യമാകാത്തതാണ് പദ്ധതി പൂർത്തിയാക്കാൻ തടസ്സമായത്.

എന്നാൽ ഇപ്പോൾ ക്യാമറകൾ ഈ മാസാവസാനത്തോടെ ലഭ്യമാകുമെന്നാണ് റെയിൽവേ അധികൃതർക്ക് ലഭ്യമായ വിവരം. റെയിൽവേ നേരിട്ടുതന്നേയാണ് ക്യാമറകൾ സ്ഥാപിക്കുന്നത്. സി.സി.ടിവി. ക്യാമറകൾ ഇല്ലാത്തതിനാൽ ഈ റെയിൽവേസ്റ്റേഷനുകളിൽ നടക്കുന്ന കുറ്റകൃത്യങ്ങളുടെ തെളിവുകൾ കൃത്യമായി ആർ.പി.എഫിനും പോലീസിനും ലഭിക്കാത്തത് കേസന്വേഷണത്തെ കാര്യമായി ബാധിക്കുന്നുണ്ട്. മംഗള എക്സ്പ്രസ് വരുന്ന സമയങ്ങളിൽ കുറ്റിപ്പുറം റെയിൽവേ സ്റ്റേഷന് സമീപത്തെ റെയിൽപ്പാളങ്ങൾ ചേർക്കുന്ന പോയിന്റിൽ കരിങ്കല്ലുകൾ നിറച്ചുവെയ്ക്കുന്ന സംഭവം മൂന്നുതവണ ഉണ്ടായ സാഹചര്യത്തിലാണ് കുറ്റിപ്പുറത്ത് സി.സി.ടിവി. ക്യാമറകൾ സ്ഥാപിക്കാൻ തീരുമാനമുണ്ടായത്.

The post കുറ്റിപ്പുറം ഉൾപ്പടെ മൂന്ന് റെയിൽവേ സ്റ്റേഷനുകളിൽ സി.സി.ടി.വി. ക്യാമറകൾ ഏപ്രിലിൽ സ്ഥാപിക്കും appeared first on Valanchery Online.

മലബാറിനോടുള്ള റെയിൽവേ അവഗണന: കോഴിക്കോട്ട് നടത്തിയ ബഹുജന സംഗമത്തിൽ പ്രതിഷേധമിരമ്പി

വളാഞ്ചേരിക്കാരൻ — Mon, 25 Nov 2024 02:11:51 +0000

കോഴിക്കോട്: കേരളത്തോടുള്ള റെയില്‍വേ അധികാരികളുടെ നിലപാട് മാറണമെന്നും മലബാറിലെ ട്രെയിന്‍ യാത്രക്കാരുടെ പ്രയാസങ്ങള്‍ക്ക് അടിയന്തിര പരിഹാരം കാണണമെന്നും കാലിക്കറ്റ് പ്രസ് ക്ലബ്ബ് പ്രസിഡന്റ് ഇ പി മുഹമ്മദ് ആവശ്യപ്പെട്ടു. കേരളത്തിലേക്കുള്ള റെയില്‍വേയുടെ പദ്ധതികൾ പ്രഖ്യാപനത്തില്‍ ഒതുങ്ങുകയാണെന്നും ഇക്കാര്യത്തില്‍ എംപിമാര്‍ പോലും കബളിപ്പിക്കപ്പെടുകയാണെന്നും അദ്ദേഹം പറഞ്ഞു. മലബാറിനോടുള്ള റെയില്‍വേയുടെ നിരന്തരമായ അവഗണന അവസാനിപ്പിക്കണമെന്നും നിർത്തലാക്കിയ ഷൊര്‍ണൂര്‍ – കോഴിക്കോട് പാസ്സഞ്ചർ വണ്ടികൾ പുനസ്ഥാപിക്കണമെന്നും ആവശ്യപ്പെട്ട് മലബാർ ട്രെയിന്‍ പാസ്സഞ്ചേഴ്സ് വെൽഫേർ അസോസിയേഷന്‍ കോഴിക്കോട്ട് നടത്തിയ പ്രതിഷേധ സംഗമം ഉദ്ഘാടനം ചെയ്യുകയായിരുന്നു അദ്ദേഹം. കോഴിക്കോട് റെയില്‍വേ സ്റ്റേഷന്‍ പരിസരത്ത് നടന്ന പ്രതിഷേധ സംഗമത്തിൽ നൂറു കണക്കിന് സ്ഥിരം ട്രെയിന്‍ യാത്രക്കാര്‍ പങ്കെടുത്തു. സംഗമത്തിലെ വൻ വനിതാ പങ്കാളിത്തം അവർ അനുഭവിക്കുന്ന യാത്രാ ക്ലേശം വിളിച്ചോതുന്നതായിരുന്നു.

ഷൊര്‍ണൂര്‍ – കോഴിക്കോട് പാസ്സഞ്ചർ ട്രെയിനുകൾ നിർത്തലാക്കിയത് മൂലം മലബാറിലെ സ്ഥിരം യാത്രക്കാർ അനുഭവിക്കുന്ന പ്രയാസങ്ങള്‍ പ്രതിഷേധക്കാർ അക്കമിട്ട് നിരത്തി. വന്ദേ ഭാരത് തളച്ചിടുന്ന എക്സിക്യൂട്ടീവ് എക്സ്പ്രസ്സിലെ യാത്രക്കാരുടെ ദുരിത യാത്രക്ക് പരിഹാരം വേണം,
06459 കോയമ്പത്തൂര്‍- ഷൊര്‍ണൂര്‍ പാസ്സഞ്ചർ കോഴിക്കോട്ടേക്ക് നീട്ടണം, സീനിയര്‍ സിറ്റിസന്‍ ആനുകൂല്യങ്ങള്‍ പൂനസ്ഥാപിക്കണം, 06031 വണ്ടിയുടെ ഷൊര്‍ണൂരില്‍ നിന്ന് പുറപ്പെടുന്ന സമയമാറ്റം പിൻവലിക്കണം, സ്ത്രീ യാത്രക്കാരുടെ വർദ്ധനവ് കണക്കിലെടുത്ത് രണ്ട് ലേഡീസ് ഒൺലി ഫുൾ കോച്ചുകൾ അനുവദിക്കണം, അശാസ്ത്രീയമായ ട്രെയിന്‍ സമയക്രമം കാലോചിതമായി പരിഷ്കരിക്കണം, വന്ദേഭാരത് മറ്റു ദീർഘ ദൂര വണ്ടികള്‍ക്ക് വേണ്ടി പാസ്സഞ്ചർ ട്രെയിനുകൾ പിടിച്ചിടുന്നത് ഒഴിവാക്കുക, റെയില്‍വേ സ്റ്റേഷനില്‍ വർദ്ധിച്ചു വരുന്ന നായ ശല്യം തടയണം. തുടങ്ങിയ ആവശ്യങ്ങള്‍ പ്രതിഷേധക്കാർ ഉന്നയിച്ചു.

പ്രസിഡന്റ് കെ രഘുനാഥ് അദ്ധ്യക്ഷത വഹിച്ചു. അബ്ദുല്‍ റഹ്മാന്‍ വള്ളിക്കുന്ന് മുഖ്യ പ്രഭാഷണം നടത്തി. സെക്രട്ടറി ഫിറോസ് കാപ്പാട്, ഓർഗനൈസിംഗ് സെക്രട്ടറി രാമനാഥൻ വേങ്ങേരി, സുജ മഞ്ഞോളി, കെ കെ റസ്സാഖ് ഹാജി തിരൂർ, മുഹ്സിൻ ഷാരോണ്‍, അഷ്റഫ് അരിയല്ലൂര്‍, മുനീര്‍ മാസ്റ്റര്‍ കുറ്റിപ്പുറം, പ്രമോദ് പന്നിയങ്കര, രതീഷ് ചെറൂപ്പ തുടങ്ങിയവര്‍ സംസാരിച്ചു. ഡോക്ടര്‍ ഷീന കടലുണ്ടി, ഫസലുർറഹ്മാൻ തിരൂർ, സത്യനാഥന്‍ ചേവായൂര്‍, സർജിത് കോട്ടൂളി, സജ്ന ഫറോക്ക്, ജസ്വന്ത് കുമാര്‍ ചേവായൂര്‍, നിഷ ടീച്ചര്‍ വൈഎംസിഎ തുടങ്ങിയവര്‍ നേതൃത്വം നല്‍കി.

The post മലബാറിനോടുള്ള റെയിൽവേ അവഗണന: കോഴിക്കോട്ട് നടത്തിയ ബഹുജന സംഗമത്തിൽ പ്രതിഷേധമിരമ്പി appeared first on Valanchery Online.

കുറ്റിപ്പുറം റെയിൽവേ സ്റ്റേഷൻ : രണ്ടാം നമ്പർ പ്ളാറ്റ്ഫോം മുഖംമിനുക്കും

വളാഞ്ചേരിക്കാരൻ — Mon, 12 Aug 2024 05:35:00 +0000

കുറ്റിപ്പുറം : കുറ്റിപ്പുറം റെയിൽവേ സ്റ്റേഷനിലെ രണ്ടാം നമ്പർ പ്ളാറ്റ്ഫോം അമൃത് ഭാരത് പദ്ധതിയിൽ ഉൾപ്പെടുത്തി ആധുനികരീതിയിൽ പുനർനിർമിക്കുമെന്ന് റെയിൽവേ പാലക്കാട് ഡിവിഷൻ മാനേജർ അരുൺകുമാർ ചതുർവേദി പറഞ്ഞു. കുറ്റിപ്പുറം റെയിൽവേ സ്റ്റേഷനിൽ അമൃത് ഭാരത് പദ്ധതി പ്രകാരമുള്ള പദ്ധതികളുടെ നിർമാണപുരോഗതി വിലയിരുത്താനെത്തിയ ഡി.ആർ.എം. കുറ്റിപ്പുറം റെയിൽവേ ആക്ഷൻ ഫോറം ഭാരവാഹികളുമായി സംസാരിക്കുകയായിരുന്നു. രണ്ടാം നമ്പർ ഫ്ളാറ്റ്ഫോമിന്റെ നിലം പുതുക്കിനിർമിക്കും. ലൈറ്റുകൾ, ഫാനുകൾ, ഇരിപ്പിടങ്ങൾ എന്നിവ പുതുതായി സ്ഥാപിക്കും. ശൗചാലയം നിർമിക്കും. ഈ വികസനപ്രവർത്തനങ്ങൾക്കുള്ള ഫണ്ട് അനുവദിക്കപ്പെട്ടതായും നിർമാണപ്രവർത്തനങ്ങൾ വേഗത്തിൽ ആരംഭിക്കുമെന്നും അദ്ദേഹം പറഞ്ഞു. വിശാലമായ സംവിധാനങ്ങളോടെ പൂമുഖ മാതൃകയിൽ നിർമിക്കുന്ന പോർച്ചിന്റെ നിർമാണപുരോഗതിയാണ് അദ്ദേഹം കൂടുതലായും വിലയിരുത്തിയത്. കുറ്റിപ്പുറം റെയിൽവേ സ്റ്റേഷനുമായി ബന്ധപ്പെട്ട വികസനവിഷയങ്ങൾ റെയിൽവേ ആക്ഷൻ ഫോറം ഭാരവാഹികളായ ടി.പി. മോഹനൻ, നാസർ പൊറ്റാരത്ത്, വി.വി. ദേവരാജൻ, കമ്പാല മുഹമ്മദാലി, പി. അഷ്റഫ് എന്നിവർ ഡി.ആർ.എമ്മിനു മുൻപിൽ അവതരിപ്പിച്ചു.

The post കുറ്റിപ്പുറം റെയിൽവേ സ്റ്റേഷൻ : രണ്ടാം നമ്പർ പ്ളാറ്റ്ഫോം മുഖംമിനുക്കും appeared first on Valanchery Online.

കുറ്റിപ്പുറം റെയിൽവേസ്റ്റേഷനിലെ പോർച്ച് പുതുക്കിപ്പണിയുന്നു

വളാഞ്ചേരിക്കാരൻ — Sat, 29 Jun 2024 13:18:17 +0000

കുറ്റിപ്പുറം : റെയിൽവേസ്റ്റേഷനിലെ കാർ പോർച്ച് പുതുക്കിപ്പണിയുന്നു. അമൃത് ഭാരത് പദ്ധതിപ്രകാരം അടുത്തിടെ നിർമിച്ച കാർ പോർച്ച് പൊളിച്ചുമാറ്റിയാണ് പുതിയത് നിർമിക്കുന്നത്. അമൃത് ഭാരത് പദ്ധതിപ്രകാരം നിർമിച്ച കാർ പോർച്ചിന് വീതിയും നീളവും കുറവായതുമൂലം യാത്രക്കാരുമായി എത്തുന്ന വാഹനങ്ങൾ നിർത്താൻ സൗകര്യം കുറവായിരുന്നു. ഒന്നിൽക്കൂടുതൽ വാഹനങ്ങൾ ഒരേസമയം ഇവിടെ നിർത്താൻ കഴിഞ്ഞിരുന്നില്ല. പ്രത്യേകിച്ച് മഴപെയ്യുന്ന സമയത്ത് വാഹനം നിർത്തി ഇറങ്ങുന്ന യാത്രക്കാർ മഴകൊള്ളേണ്ട അവസ്ഥയിലായിരുന്നു. ഈ സാഹചര്യത്തിലാണ് പുതിയതു നിർമിക്കാൻ റെയിൽവേ തീരുമാനിച്ചത്. 14 മീറ്റർ വീതിയിലും 12 മീറ്റർ നീളത്തിലുമാണ് പുതിയ പോർച്ച് നിർമിക്കുന്നത്. ഇവിടെ ഒരേസമയം നാലു കാറുകൾ നിർത്താൻ കഴിയും. 80 ലക്ഷം രൂപയാണ് നിർമാണത്തിന് അനുവദിച്ചിരിക്കുന്നത്.

The post കുറ്റിപ്പുറം റെയിൽവേസ്റ്റേഷനിലെ പോർച്ച് പുതുക്കിപ്പണിയുന്നു appeared first on Valanchery Online.

കുറ്റിപ്പുറത്ത് കാൽവഴുതി പാളത്തിലേക്കു വീഴുകയായിരുന്ന യുവതിയെ രക്ഷിച്ച് റെയിൽവേ പോർട്ടർ

വളാഞ്ചേരിക്കാരൻ — Thu, 15 Feb 2024 00:23:05 +0000

കുറ്റിപ്പുറം : ട്രെയിനിൽനിന്ന് ഇറങ്ങുന്നതിനിടെ കാൽവഴുതി പാളത്തിലേക്കുവീണ യുവതിക്ക് രക്ഷകനായി റെയിൽവേ പോർട്ടർ. കുറ്റിപ്പുറം റെയിൽവേസ്റ്റേഷനിൽ ബുധനാഴ്ച ഉച്ചയ്ക്ക് 1.10-നാണ് സംഭവം. ചങ്ങരംകുളം കോക്കൂർ പുത്തൻവളപ്പിൽ ബഷീർ (53) ആണ് രക്ഷകനായത്. ചെന്നൈ-മംഗളൂരു-എഗ്‌മോർ എക്സ്പ്രസിൽ പോകുന്ന മൂത്തമകളെ യാത്രയാക്കാൻ എത്തിയതായിരുന്നു യുവതിയും മറ്റൊരു മകളും. ട്രെയിൻ സ്റ്റേഷനിൽ എത്തിയപ്പോൾ മൂവരും കയറി. സാധനങ്ങളെല്ലാം സുരക്ഷിതമായി വെക്കുന്നതിനിടെ ട്രെയിൻ നീങ്ങിത്തുടങ്ങി. ഉടനെ അമ്മയും മകളും പ്ലാറ്റ്ഫോമിലേക്ക് ചാടാൻ ശ്രമിച്ചു. ആദ്യം ചാടിയ മകൾ സുരക്ഷിതമായി എത്തി. അമ്മ പ്ലാറ്റ്ഫോമിനും ട്രെയിനിനും ഇടയിലായിപ്പോയി.

ഈ സമയത്ത് പ്ലാറ്റ്ഫോമിൽ ഉണ്ടായിരുന്ന ബഷീർ കുതിച്ചെത്തി പാളത്തിലേക്ക് വീണുകൊണ്ടിരുന്ന യുവതിയെ വലിച്ചുകയറ്റുകയായിരുന്നു. യുവതിയെ രക്ഷിക്കുന്നതിനിടയിൽ ബഷീറിന് നെറ്റിയിൽ ചെറിയ മുറിവേൽക്കുകയും ചെയ്തു. രണ്ടുമാസം മുൻപും ഇത്തരത്തിൽ ഇദ്ദേഹം ജീവൻരക്ഷാ പ്രവർത്തനം നടത്തിയിരുന്നു. വർഷങ്ങളായി ഇവിടെ പോർട്ടറായി ജോലിചെയ്യുന്ന ബഷീർ ഏറെപ്പേരെ വലിയ അപകടങ്ങളിൽനിന്ന് ജീവൻ പണയംവെച്ച് രക്ഷപ്പെടുത്തിയിട്ടുണ്ട്.

The post കുറ്റിപ്പുറത്ത് കാൽവഴുതി പാളത്തിലേക്കു വീഴുകയായിരുന്ന യുവതിയെ രക്ഷിച്ച് റെയിൽവേ പോർട്ടർ appeared first on Valanchery Online.

ട്രെയിനിൽ ടിക്കറ്റില്ലാതെ യാത്ര; പിഴയടയ്ക്കാത്ത യുവാവിന് 15 ദിവസം ജയിൽശിക്ഷ

വളാഞ്ചേരിക്കാരൻ — Thu, 30 Nov 2023 06:31:53 +0000

കുറ്റിപ്പുറം: ട്രെയിനിൽ ടിക്കറ്റില്ലാതെ യാത്രചെയ്ത വല്ലപ്പുഴ സ്വദേശിക്ക് 15 ദിവസം ജയിൽശിക്ഷ. ഏപ്രിൽ 27-ന് മംഗളൂരു- കോയമ്പത്തൂർ എക്സ്പ്രസ് ട്രെയിനിൽ തിരൂരിൽനിന്ന് പാലക്കാട്ടേക്ക് ടിക്കറ്റില്ലാതെ യാത്രചെയ്ത മുഹമ്മദ് ഷാഫി(30)ക്കാണ് ജയിൽശിക്ഷ ലഭിച്ചത്. യാത്രക്കിടെ പിടിക്കപ്പെട്ട യുവാവ് പിഴയും യാത്രാക്കൂലിയും അടയ്ക്കാത്തതിനാൽ കോഴിക്കോട് ടിക്കറ്റ് പരിശോധനാവിഭാഗം യുവാവിനെ ഷൊർണൂർ ആർ.പി.എഫിന് കൈമാറിയിരുന്നു. തുടർന്ന് ആർ.പി.എഫ്. കേസ് രജിസ്റ്റർചെയ്ത് യുവാവിനെ ജാമ്യത്തിൽവിട്ടു. എന്നാൽ ആറുമാസമായിട്ടും ഷൊർണൂർ റെയിൽവേകോടതിയിൽ ഹാജരായി പിഴ അടയ്ക്കാത്തതിനാൽ സമൻസ് അയച്ചു. എന്നിട്ടും യുവാവ് ഹാജരാവാത്തതിനെത്തുടർന്ന് കോടതി അറസ്റ്റു വാറണ്ട് പുറപ്പെടുവിക്കുകയായിരുന്നു.

പാലക്കാട് ആർ.പി.എഫ്. അസിസ്റ്റന്റ് കമ്മിഷണറുടെ നിർദേശപ്രകാരം ഷൊർണൂർ ആർ.പി.എഫ്. സബ് ഇൻെസ്പക്ടർ ഹരികുമാർ യുവാവിനെ വല്ലപ്പുഴയിലെ വീട്ടിൽനിന്ന് അറസ്റ്റുചെയ്ത് കോടതിയിൽ ഹാജരാക്കി. 1000 രൂപ പിഴ അടയ്ക്കാത്തതിനാൽ 15 ദിവസത്തേക്ക് റിമാൻഡ് ചെയ്ത യുവാവിനെ ഒറ്റപ്പാലം സബ് ജയിലിലേക്കു മാറ്റി. ഇത്തരത്തിൽ പിഴ അടയ്ക്കാനുള്ള കേസുകളിൽ ജാമ്യത്തിൽപ്പോയി കോടതിയിൽ ഹാജരാകാത്തവർക്കെതിരേ കർശന നിയമനടപടികളുമായി മുന്നോട്ടു പോകുമെന്ന് ആർ.പി.എഫ്. പോസ്റ്റ് കമാൻഡർ ക്ലാരി വൽസ അറിയിച്ചു.

The post ട്രെയിനിൽ ടിക്കറ്റില്ലാതെ യാത്ര; പിഴയടയ്ക്കാത്ത യുവാവിന് 15 ദിവസം ജയിൽശിക്ഷ appeared first on Valanchery Online.

ടി.ടി.ഇ. ബലമായി പുറത്താക്കിയ അമ്മയെ കണ്ടെത്താൻ മകൾ ചങ്ങല വലിച്ച്‌ വണ്ടി നിർത്തി; സംഭവം കുറ്റിപ്പുറത്ത്

വളാഞ്ചേരിക്കാരൻ — Fri, 01 Sep 2023 01:20:24 +0000

കുറ്റിപ്പുറം : ടി.ടി.ഇ. ബലമായി തീവണ്ടിയിൽനിന്ന്‌ പുറത്താക്കിയ വയോധികയായ അമ്മയെ കണ്ടെത്തുന്നതിനായി സഹയാത്രികരുടെ സഹായത്തോടെ മകൾ ചങ്ങല വലിച്ച് തീവണ്ടി നിർത്തി. മംഗലാപുരത്ത്‌ നിന്ന്‌ ചെന്നൈയിലേക്ക് പോകുകയായിരുന്ന ചെന്നൈ മെയിലാണ് കഴിഞ്ഞ ദിവസം കുറ്റിപ്പുറത്തിനടുത്ത പേരശ്ശന്നൂരിൽ ചങ്ങല വലിച്ച് യുവതി നിർത്തിയത്. കഞ്ചിക്കോട് സ്വദേശികളായ അമ്മയും അവരുടെ മക്കളും കോഴിക്കോടുനിന്നാണ് നാട്ടിലേക്ക് വരുന്നതിനായി മെയിലിൽ കയറിയത്. തീവണ്ടിയുടെ ജനറൽ കമ്പാർട്ടുമെന്റുകളിൽ യാത്രക്കാരുടെ വലിയ തിരക്കായിരുന്നു. തീവണ്ടി പോകാൻനേരമാണ് ഈ കുടുംബം എത്തുന്നത്. തിരക്കിനിടയിൽ ഇവർ കയറിയത് റിസർവേഷൻ കമ്പാർട്ടുമെന്റിലായിരുന്നു.

ഈ കുടുംബം ഉൾപ്പെടെ നിരവധി യാത്രക്കാരാണ് ജനറൽ കമ്പാർട്ടുമെന്റിൽ സ്ഥലമില്ലാത്തതിനാൽ റിസർവേഷൻ കമ്പാർട്ടുമെന്റിൽ നിന്ന് യാത്ര ചെയ്തത്. തീവണ്ടി തിരൂരിൽ എത്തിയപ്പോൾ പരിശോധനക്കായി എത്തിയ ടി.ടി.ഇ. അനധികൃതമായി റിസർവേഷൻ കമ്പാർട്ടുമെന്റിൽ യാത്ര ചെയ്യുന്നവരോട് അടുത്ത സ്റ്റേഷനായ കുറ്റിപ്പുറത്ത് ഇറങ്ങാൻ ആവശ്യപ്പെട്ടു. എന്നാൽ കുറ്റിപ്പുറത്ത് എത്തിയപ്പോൾ തീവണ്ടിയിൽനിന്ന്‌ ഇറങ്ങാൻ യാത്രക്കാർ തയ്യാറായില്ല. ഇറങ്ങാൻ വിസമ്മതിച്ച സ്ത്രീകളടക്കമുള്ള യാത്രക്കാരോട് പിന്നീട് വളരെ മോശമായാണ് ടി.ടി. ഇ. പെരുമാറിയതെന്നാണ് യാത്രക്കാർ പറയുന്നത്. ഇതിനിടെയാണ് കഞ്ചിക്കോട് സ്വദേശിനിയായ വയോധികയെയും മറ്റു സഹയാത്രികരെയും ടി.ടി.ഇ. ബലം പ്രയോഗിച്ച് കുറ്റിപ്പുറത്ത് ഇറക്കിവിട്ടത്.

എന്നാൽ വയോധികയുടെ മകൾ ഇതിനിടെ തീവണ്ടിയിൽ തിരികെ കയറിപ്പറ്റിയിരുന്നു. കുറ്റിപ്പുറം വിട്ടതിനുശേഷമാണ് അമ്മയെ കാണാതായ വിവരം മകൾ അറിയുന്നത്. ഇതോടെ ബഹളംവെച്ച യുവതി സഹയാത്രികരുടെ സഹായത്തോടെ എടച്ചലത്ത് വെച്ച് ചങ്ങല വലിച്ച് തീവണ്ടി നിർത്തി. റെയിൽപ്പാളത്തിലൂടെ രണ്ട് കിലോമീറ്ററിലധികം രാത്രിയിൽ നടന്നാണ് യുവതി കുറ്റിപ്പുറം റെയിൽവേ സ്റ്റേഷനിൽ ഭയന്നിരുന്ന അമ്മയുടെ അടുത്ത് എത്തുന്നത്. ടി.ടി.ഇയുടെ മനുഷ്യത്വരഹിതമായ നടപടിക്കെതിരേ അമ്മയും മകളും കുറ്റിപ്പുറം സ്റ്റേഷൻ മാസ്റ്റർക്ക് പരാതി നൽകി.

The post ടി.ടി.ഇ. ബലമായി പുറത്താക്കിയ അമ്മയെ കണ്ടെത്താൻ മകൾ ചങ്ങല വലിച്ച്‌ വണ്ടി നിർത്തി; സംഭവം കുറ്റിപ്പുറത്ത് appeared first on Valanchery Online.

കുറ്റിപ്പുറത്ത് റെയിൽവേ മേൽപ്പാലത്തിന് മുകളിൽ ടെംമ്പോ ട്രാവലറിന് പിറകിൽ ടോറസ് ലോറിയിടിച്ചു; ആളപായമില്ല

വളാഞ്ചേരിക്കാരൻ — Thu, 31 Aug 2023 06:39:32 +0000

കുറ്റിപ്പുറം: കുറ്റിപ്പുറത്ത് റെയിൽവെ മേൽപ്പാലത്തിന് മുകളിൽ തീർത്ഥാടക സംഘം സഞ്ചരിച്ച വാഹനത്തിന് പിറകിൽ ലോറി ഇടിച്ചു. സംഭവത്തിൽ ആളപായമില്ല. മുകാംമ്പികയിൽ നിന്നും തീർത്ഥാടനം കഴിഞ്ഞ് എറണാകുണത്തേക്ക് പോകുകയായിരുന്ന ടെമ്പോ ട്രാവലർ കുറ്റിപ്പുറം റെയിൽവേ മേൽ പാലത്തിന് മുകളിൽ അപകടത്തിൽ പെട്ടത്. ദേശിയപാത 66ൽ നിർമ്മാണത്തിന് മണ്ണുമായി വരുകയായിരുന്ന കരാർ കമ്പനിയായ കെ.എൻ.ആർ.സി.എലിൻ്റെ ടോറസ് ലോറിയാണ് ഇടിച്ചത്. അമിത വേഗതയിലായിരുന്ന ലോറി ടെമ്പൊ ട്രാവലറിന്റെ മധ്യഭാഗത്ത് ഇടിച്ച് നിൽക്കുകയായിരുന്നു. അപകടത്തി യാത്രക്കാർക് ആർക്കും പരിക്കില്ല. 30 മിനിറ്റോളം ദേശിയ പാതയിൽ വാഹനഗതാഗതം തടസ്സപ്പെട്ടു. തുടർന്ന് ഹൈവേ പോലീസും കുറ്റിപ്പുറം പൊലീസ് സ്ഥലത്തെത്തി വാഹന ഗതാഗതം പുന:സ്ഥാപിച്ചു.

The post കുറ്റിപ്പുറത്ത് റെയിൽവേ മേൽപ്പാലത്തിന് മുകളിൽ ടെംമ്പോ ട്രാവലറിന് പിറകിൽ ടോറസ് ലോറിയിടിച്ചു; ആളപായമില്ല appeared first on Valanchery Online.

കുറ്റിപ്പുറം റെയിൽവേസ്റ്റേഷനോട് അവഗണന; യൂത്ത് കോൺഗ്രസ് ധർണ നടത്തി

വളാഞ്ചേരിക്കാരൻ — Mon, 16 Jan 2023 00:23:57 +0000

കുറ്റിപ്പുറം : റെയിൽവേസ്റ്റേഷനോടുള്ള അവഗണനയിൽ പ്രതിഷേധിച്ച് യൂത്ത് കോൺഗ്രസ് മണ്ഡലം കമ്മിറ്റി ഒപ്പുശേഖരണവും ധർണയും നടത്തി. ഡി.സി.സി. സെക്രട്ടറി ഉമ്മർ ഗുരുക്കൾ ഉദ്ഘാടനംചെയ്തു. പ്രസിഡന്റ് മുസ്തഫ പുഴനമ്പ്രം അധ്യക്ഷനായി. ബ്ലോക്ക് കോൺഗ്രസ് പ്രസിഡന്റ് മുജീബ് കൊളക്കാട്, മണ്ഡലം കോൺഗ്രസ് പ്രസിഡന്റ് ബഷീർ പാറക്കൽ, ഇസുദ്ദീൻ, മുജീബ്, അനീഷ്, സലാം പാഴൂർ, മഠത്തിൽ ശ്രീകുമാർ, അഷ്‌റഫ്‌ രാങ്ങാട്ടൂർ, അഹമ്മദ്കുട്ടി ചെമ്പിക്കൽ, യാസീൻ പൈങ്കണ്ണൂർ, ജയേഷ് എടച്ചലം തുടങ്ങിയവർ പ്രസംഗിച്ചു.

The post കുറ്റിപ്പുറം റെയിൽവേസ്റ്റേഷനോട് അവഗണന; യൂത്ത് കോൺഗ്രസ് ധർണ നടത്തി appeared first on Valanchery Online.

തീവണ്ടികളുടെ സ്റ്റോപ്പുകൾ പുനഃസ്ഥാപിക്കണമെന്നാവശ്യപ്പെട്ട് ടീം കുറ്റിപ്പുറം റെയിൽവേ ഡിവിഷണൽ മാനേജർക്ക് നിവേദനം നൽകി

വളാഞ്ചേരിക്കാരൻ — Sat, 12 Nov 2022 01:14:50 +0000

കുറ്റിപ്പുറം: കോവിഡ് മൂലം നിർത്തിവെച്ചിരുന്ന തീവണ്ടികളുടെ സർവീസുകൾ പുനരാരംഭിച്ചപ്പോൾ കുറ്റിപ്പുറം സ്റ്റേഷനിൽ നിർത്തിയിരുന്ന തീവണ്ടികളുടെ സ്റ്റോപ്പ് എടുത്തുകളഞ്ഞ റെയിൽവേ അധികൃതരുടെ നടപടി പുനഃപരിശോധിക്കണമെന്നാവശ്യപ്പെട്ട് ടീം കുറ്റിപ്പുറം റെയിൽവേ ഡിവിഷണൽ മാനേജർക്ക് നിവേദനം നൽകി. ഡൽഹിയിൽനിന്നുള്ള നിസാമുദീൻ വണ്ടിക്ക് കുറ്റിപ്പുറത്തെ സ്റ്റോപ്പ് ഒഴിവാക്കിയത് ദീർഘദൂര യാത്രികർക്ക് കനത്ത തിരിച്ചടിയാണ്. തിരുവനന്തപുരത്തേക്കുള്ള മലബാർ, മാവേലി എക്സ്പ്രസുകൾ നിർത്താത്തത് ആർ.സി.സി., ശ്രീചിത്ര തുടങ്ങിയ ആശുപത്രികളിലേക്കും സെക്രട്ടേറിയറ്റിലേക്കുമടക്കം പോകുന്നവരെ ദുരിതത്തിലാക്കിയിരിക്കുകയാണ്.

കുറ്റിപ്പുറത്തേക്കാൾ താരതമ്യേന ചെറുതും വരുമാനക്കുറവുമുള്ള സ്റ്റേഷനുകളിൽപ്പോലും ഈ തീവണ്ടികൾക്ക് സ്റ്റോപ്പുണ്ടെന്നിരിക്കെ കുറ്റിപ്പുറത്തെ സ്റ്റോപ്പുകൾ അടിയന്തരമായി പുനഃസ്ഥാപിക്കണമെന്നും ടീം കുറ്റിപ്പുറം നൽകിയ നിവേദനത്തിൽ ആവശ്യപ്പെട്ടു. പ്രസിഡന്റ് അഡ്വ. ഫൈസൽ റഹ്‌മാൻ, ജാസിർ ചുള്ളിയിൽ, സതീഷ്‍കുമാർ തടത്തിൽ എന്നിവരുടെ നേതൃത്വത്തിലാണ് ഡിവിഷണൽ മാനേജർക്ക് നിവേദനം നൽകിയത്.

The post തീവണ്ടികളുടെ സ്റ്റോപ്പുകൾ പുനഃസ്ഥാപിക്കണമെന്നാവശ്യപ്പെട്ട് ടീം കുറ്റിപ്പുറം റെയിൽവേ ഡിവിഷണൽ മാനേജർക്ക് നിവേദനം നൽകി appeared first on Valanchery Online.

തിരുനാവായ മേൽപ്പാലത്തിൽ മാലിന്യം തള്ളൽ പതിവാകുന്നു

വളാഞ്ചേരിക്കാരൻ — Sun, 22 May 2022 09:20:12 +0000

തിരുനാവായ : തിരുനാവായ മേൽപ്പാലത്തിൽ മാലിന്യം തള്ളൽ പതിവാകുന്നു. രാത്രിയുടെ മറവിൽ വലിയ പ്ലാസ്റ്റിക് കവറുകളിലാക്കിയ മാലിന്യങ്ങളാണ് സമൂഹവിരുദ്ധർ തള്ളുന്നത്. ഇതുമൂലം യാത്രക്കാർ മേൽപ്പാലത്തിലൂടെ മൂക്കുപൊത്തി പോകേണ്ട അവസ്ഥയാണ്. പുഴുവരിക്കുന്ന മാലിന്യങ്ങൾ തെരുവുനായ്ക്കൾ കടിച്ചുവലിക്കുന്നതും പതിവാണ്.

കോഴിയവശിഷ്ടങ്ങളും മൃഗാവശിഷ്ടങ്ങളുമാണ് കൂടുതലായും ഇവിടെ തള്ളുന്നത്. തെരുവുനായ്ക്കളുടെ ഭീഷണിയുമുണ്ട്. നാട്ടുകാരുടെ പരാതിയിൽ പഞ്ചായത്ത് അധികൃതർ ആരോഗ്യവകുപ്പ്, പോലീസ് എന്നിവരെ വിവരം അറിയിച്ചു. പാലത്തിൽ സി.സി.ടി.വി.യും മുന്നറിയിപ്പ് ബോർഡുകളും സ്ഥാപിക്കണമെന്നാണ് നാട്ടുകാരുടെ ആവശ്യം.

The post തിരുനാവായ മേൽപ്പാലത്തിൽ മാലിന്യം തള്ളൽ പതിവാകുന്നു appeared first on Valanchery Online.