youth Archives - Valanchery Online

ആതവനാട് ചെലൂർ പഞ്ചായത്ത് കുളത്തിൽ യുവാവ് മുങ്ങി മരിച്ചു

വളാഞ്ചേരിക്കാരൻ — Wed, 17 May 2023 00:58:32 +0000

ആതവനാട്: ചെലൂർ ഭരണിപാടത്ത്‌ പഞ്ചായത്ത് കുളത്തിൽ കുടക് സ്വദേശിയായ യുവാവ് മുങ്ങി മരിച്ചു. കർണാടക കുടക് കുട്ട സ്വദേശി മിദ്ലാജ് കലിയത്ത് (21) ആണ് മുങ്ങിമരിച്ചത്. സുഹൃത്തിന്റെ കൂടെ പുന്നത്തലയിൽ വിവാഹ സൽക്കാരത്തിൽ പങ്കെടുത്തതിന് ശേഷം ഇന്നലെ രാത്രി ഏഴു മണിയോടെ സുഹൃത്തുക്കളുമൊത്ത് കുളിക്കാൻ എത്തിയതായിരുന്നു. മുങ്ങി താഴ്ന്നതറിഞ്ഞ കൂടെയുള്ളവർ വെള്ളത്തിൽ നിന്നും എടുത്ത് തൊട്ടടുത്തുള്ള പുത്തനത്താണിയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ബി.ടെക് അവസാന വർഷ വിദ്യാർത്ഥിയാണ്. തിരൂർ ജില്ലാ ആശുപത്രിയിൽ പോസ്റ്റുമോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുകൊടുത്തു. ഉപ്പ : മുസ്തഫ കലയത്ത്. ഉമ്മ: സമീറ. സഹോദരൻ : അജ്മൽ

The post ആതവനാട് ചെലൂർ പഞ്ചായത്ത് കുളത്തിൽ യുവാവ് മുങ്ങി മരിച്ചു appeared first on Valanchery Online.

എടയൂർ ഒടുങ്ങാടുകുളത്തിൽ യുവാവ് മുങ്ങി മരിച്ചു

വളാഞ്ചേരിക്കാരൻ — Mon, 24 Oct 2022 23:41:25 +0000

എടയൂർ: എടയൂർ ഒടുങ്ങാട്ടുകുളത്തിൽ യുവാവ് മുങ്ങി മരിച്ചു. എടയൂർ വായനശാലയിൽ താമസിക്കുന്ന കരടിക്കുന്ന് മണികണ്ഠൻ്റെ മകൻ രാഹുൽ എന്ന മണി(24)യാണ് മരണമടഞ്ഞത്. തിങ്കളാഴ്ച വൈകുന്നേരം 5.30 നാണ് സംഭവം. പ്രദേശത്തെ ഏറ്റവും വലിയ കുളമാണ് എടയൂർ മണ്ണത്തുപറമ്പിലെ ഒടുങ്ങാട്ടുകുളം. വിസ്തൃതിയേറിയ കുളത്തിൻ്റെ മറുകരയിൽ നിന്നും തിരിച്ച് നീന്തുന്നതിനിടയിൽ ശരീരം കുഴഞ്ഞ് യുവാവ് താഴേക്ക് പോകുകയായിരുന്നു എന്ന് കൂടെ നീന്തിയിരുന്ന സുഹൃത്തുക്കളും സ്ഥലത്തെത്തിയ നാട്ടുകാരും പറഞ്ഞു. നാട്ടുകാർ മുങ്ങിയെടുത്ത് ഏകദേശം 6 മണിക്ക് വളാഞ്ചേരിയിലെ സ്വകാര്യ അശുപത്രിയിൽ എത്തിച്ചപ്പോഴേക്കും മരണപ്പെടുകയായിരുന്നു. വളാഞ്ചേരി പോലീസും സ്ഥലത്തെത്തിയിരുന്നു. മാതാവ്: മയങ്ങനാലുക്കൽ ശാന്ത. സഹോദരങ്ങൾ: അക്ഷയ്, രൊഹിത്ത്

The post എടയൂർ ഒടുങ്ങാടുകുളത്തിൽ യുവാവ് മുങ്ങി മരിച്ചു appeared first on Valanchery Online.

ഇരിമ്പിളിയം സ്വദേശി യുവാവ് യു.എ.ഇയിൽ അന്തരിച്ചു

വളാഞ്ചേരിക്കാരൻ — Sun, 07 Aug 2022 10:37:57 +0000

അബുദാബി: ഇരിമ്പിളിയം സ്വദേശി യുവാവ് യു.എ.ഇയിൽ അന്തരിച്ചു. ഇരിമ്പിളിയം കോലോത്തുപറമ്പിൽ കരീമിൻ്റെ മകൻ അൽഫാസ് മുഹമ്മദാ(23)ണ് അബുദാബിയിൽ മരിച്ചതായി ബന്ധുക്കൾക്ക് വിവരം ലഭിച്ചിരിക്കുന്നത്. മുസാഫയിലെ കോൾഡ് സ്റ്റോറേജ് സ്ഥാപനത്തിലെ ജീവനക്കാരനായിരുന്നു. വിദേശത്തെ ജോലിക്കായി ആദ്യമായി പോയ അൽഫാസ് ഒരു വർഷമായി ഈ സ്ഥാപനത്തിലാണ് ജോലി ചെയ്തുവന്നിരുന്നത്. മൃതദേഹം നാട്ടിലെത്തിക്കാനുള്ള നടപടി സ്വീകരിച്ചതായി ബന്ധപ്പെട്ടവർ അറിയിച്ചു. മാതാവ്: കദിയാമ്മുകുട്ടി, സഹോദരൻ: അൻസിൽ

The post ഇരിമ്പിളിയം സ്വദേശി യുവാവ് യു.എ.ഇയിൽ അന്തരിച്ചു appeared first on Valanchery Online.

കുറ്റിപ്പുറത്ത് യുവാവിനെ ലോഡ്ജിൽ മരിച്ച നിലയിൽ കണ്ടെത്തി

വളാഞ്ചേരിക്കാരൻ — Thu, 23 Sep 2021 17:44:15 +0000

കുറ്റിപ്പുറം: കുറ്റിപ്പുറത്തു ലോഡ്‌ജിൽ യുവാവിൻ്റെ മൃതദേഹം കണ്ടെത്തി. കണ്ടെത്തിയ മൃതുദേഹത്തിന് മൂന്ന് ദിവസം പഴക്കം ഉണ്ടെന്നാണ് നിഗമനം.ലോഡ്ജിന്റെ പരിസരത്ത് ദുർഗന്ധം വമിച്ചതിനെ തുടർന്ന് നടത്തിയ അന്വഷണത്തിലാണ് മൃതദേഹം കണ്ടെത്തിയത്. കുറ്റിപ്പുറം CI ശശീന്ദ്രൻ മേലയിലിൻ്റെ നേതൃത്വത്തിൽ പോലീസെത്തി വാതിൽ പൊളിച്ചാണ് അകത്ത് കയറിയത്.

കുറ്റിപ്പുറം തിരൂർ റോഡിലുള്ള സ്വകാര്യ ലോഡ്ജിൽ വ്യാഴാഴ്ച ഉച്ചയോടെയായിരുന്നു പരിശോധന നടത്തിയത്, അമ്പലപുഴ സ്വദേശിയായ വൈശാഖ് (28 വയസ്സ്) ആണ് തൂങ്ങി മരിച്ചതെന്ന് പോലീസ് പറഞ്ഞു.ലോഡ്ജിലെ മുറിയിൽ നിന്നും ബാഗ് കണ്ടെത്തിയിരുന്നു. ഇതിൽ നിന്നും ലഭിച്ച ഐ ഡി കാർഡിൽ നിന്നാണ് അമ്പലപ്പുഴ സ്വദേശിയാണ് മരിച്ചതെന്ന് കണ്ടെത്തിയത്.

The post കുറ്റിപ്പുറത്ത് യുവാവിനെ ലോഡ്ജിൽ മരിച്ച നിലയിൽ കണ്ടെത്തി appeared first on Valanchery Online.

പേരശന്നൂരിൽ ഒഴുക്കിൽപ്പെട്ട് കാണാതായ യുവാവിന്റെ മൃതദേഹം കണ്ടെത്തി

വളാഞ്ചേരിക്കാരൻ — Tue, 13 Jul 2021 04:36:13 +0000

കുറ്റിപ്പുറം:ഭാരതപ്പുഴയിൽ ഒഴുക്കിൽപ്പെട്ട് കാണാതായ യുവാവിന്റെ മൃതദേഹം കണ്ടെത്തി. പേരശ്ശനൂർ എടച്ചലം പന്നിക്കഴായിൽ അബ്ദുൽകരീമിന്റെ മകൻ സഹദി(27) ന്റെ മൃതദേഹമാണ് ഇന്ന് രാവിലെ കിട്ടിയത്.

കഴിഞ്ഞ ഞായറാഴ്ച ഉച്ചയ്ക്കാണ് കാണാതായത്. ഒഴുക്കിൽപ്പെട്ട സഹോദരനെയും ബന്ധുവിനെയും രക്ഷപ്പെടുത്തുന്നതിനിടെയാണ് സഹദ് ഒഴുക്കിൽ പെട്ടത്. പൊന്നാനി, തിരൂർ, മലപ്പുറം എന്നിവിടങ്ങളിൽനിന്നുള്ള അഗ്നിരക്ഷാസേനയുടെ നേതൃത്വത്തിൽ സ്കൂബാ ഡൈവിങ് വിദഗ്ധരും തിങ്കളാഴ്ച പരിശോധന നടത്തി. കൂടാതെ, പൊന്നാനി കോസ്റ്റൽ പോലീസും ഇരിമ്പിളിയത്തുനിന്നുള്ള മുങ്ങൽവിദഗ്ധരും കൂട്ടായിയിൽനിന്നെത്തിയ മത്സ്യത്തൊഴിലാളികളുടെ സംഘവും പരിശോധന നടത്തി.

പോലീസിന്റെ നേതൃത്വത്തിൽ നാട്ടുകാരും തിരച്ചിൽ നടത്തിയിരുന്നു. മിനിപമ്പയിലെ രക്ഷാപ്രവർത്തകരും ട്രോമാകെയർ വിഭാഗവും പുഴയിൽ തിരഞ്ഞെങ്കിലും കണ്ടെത്താനായില്ല. നാട്ടുകാരുടെ നേതൃത്വത്തിൽ ഡ്രോൺ ഉപയോഗിച്ച് തിരച്ചിൽ നടത്തിയിട്ടും ഫലമുണ്ടായില്ല. രാത്രിയോടെ നിർത്തിവെച്ച തിരച്ചിൽ ചൊവ്വാഴ്ച രാവിലെ ആരംഭിച്ചപ്പോഴാണ് ലഭിച്ചത്.

സഹോദരൻ സാബിത്ത്, ബന്ധുവായ ഷാഹുൽഹമീദ് എന്നിവരോടൊപ്പമാണ് സഹദ് കുളിക്കാനെത്തിയത്. കുളിക്കുന്നതിനിടെ കയത്തിൽ അകപ്പെട്ട സാബിത്തിനെയും ഷാഹുൽഹമീദിനെയും രക്ഷിക്കുന്നതിനിടെയാണ് സഹദ് കയത്തിലെ ഒഴുക്കിൽപ്പെട്ടത്. ഇരുവരും കയത്തിൽനിന്ന് രക്ഷപ്പെട്ടെങ്കിലും സഹദ് ഒഴുക്കിൽപ്പെട്ട് മുങ്ങിത്താഴുകയായിരുന്നു.

The post പേരശന്നൂരിൽ ഒഴുക്കിൽപ്പെട്ട് കാണാതായ യുവാവിന്റെ മൃതദേഹം കണ്ടെത്തി appeared first on Valanchery Online.

കുറ്റിപ്പുറം പേരശന്നൂർ കടവിൽ യുവാവിനെ ഒഴുക്കിൽപെട്ട് കാണാതായി; രണ്ട് പേരെ രക്ഷപ്പെടുത്തി

വളാഞ്ചേരിക്കാരൻ — Sun, 11 Jul 2021 10:01:06 +0000

കുറ്റിപ്പുറം: കുറ്റിപ്പുറത്തിനടുത്ത് പേരശ്ശനൂരിൽ യുവാക്കൾ ഒഴുക്കിൽപെട്ടു. ഭാരതപ്പുഴയിൽ കുളിക്കാനിറങ്ങിയ സഹോദരപുത്രന്മാരടങ്ങുന്ന മൂന്ന് യുവാക്കളിൽ ഒരാളെയാണ് കാണാതായത്. എടച്ചലം പന്നിക്കാലയിൽ വീട്ടിൽ അബ്ദുൽ കരീമിൻ്റെ മകൻ ഫഹദി(24) നെയാണ് കാണാതായത്. ഉച്ചക്ക് 12.40 ഓടെയാണ് അപകടം. പേരശ്ശനൂര്‍ ദുര്‍ഗ ഭഗവതി ക്ഷേത്രത്തിന് സമീപത്തെ കടവിലാണ് അപകടമുണ്ടായത്. ഫഹദിൻ്റെ സഹോദരനും അമ്മാവൻ്റെ മകനും പുഴയിൽ കുളിക്കുന്നതിനിടെ ഒഴുക്കിൽപെടുകയായിരുന്നു. ഒഴുക്കിൽപെട്ട യുവാക്കളെ ഫഹദ് രക്ഷപ്പെടുത്തിയെങ്കിലും ഇയാൾക്ക് കരയിൽ കയറാനായില്ല. നാട്ടുകാർ വിവരമറിയിച്ചതിനെ തുടർന്ന് കുറ്റിപ്പുറം സി.ഐ ശശീന്ദ്രന്‍ മേലേയിലിന്റെ നേതൃത്വത്തിലുളള പൊലിസ് സംഘവും ഫയർ ഫോഴ്സും സ്ഥലത്തെത്തി തിരച്ചിൽ ആരംഭിച്ചിട്ടുണ്ട്. മഴയും പുഴയിലെ ഒഴുക്കും തിരച്ചിലിന് തടസ്സമായിട്ടുണ്ട്.

The post കുറ്റിപ്പുറം പേരശന്നൂർ കടവിൽ യുവാവിനെ ഒഴുക്കിൽപെട്ട് കാണാതായി; രണ്ട് പേരെ രക്ഷപ്പെടുത്തി appeared first on Valanchery Online.

കൊടികുത്തിമലയിൽ അതിക്രമിച്ചു കയറിയ പൈങ്കണ്ണൂർ സ്വദേശികളായ നാലുപേർ പിടിയിൽ

വളാഞ്ചേരിക്കാരൻ — Tue, 22 Oct 2019 05:17:29 +0000

പെരിന്തൽമണ്ണ: വിനോദസഞ്ചാരകേന്ദ്രമായ കൊടികുത്തിമലയിൽ വിലക്കുലംഘിച്ച് കയറിയ നാലുപേരെ വനംവകുപ്പ് അറസ്റ്റ്‌ചെയ്തു. വളാഞ്ചേരി പൈങ്കണ്ണൂർ സ്വദേശികളായ പി.പി. ശരത്ത് (23), ടി.പി. ജിതേഷ് (23), പി.സി. സജീവ് (30), ടി.പി. സജിൻ (23) എന്നിവരെയാണ് കാളികാവ് റെയ്ഞ്ച് ഫോറസ്റ്റ് ഓഫീസർ പി. സുരേഷ് അറസ്റ്റ്‌ചെയ്തത്. കഴിഞ്ഞ ദിവസം വൈകീട്ടോടെയാണ് യുവാക്കളുടെ സംഘം മലയിലെത്തിയത്. പ്രളയസമയത്ത് മണ്ണിടിച്ചിലുണ്ടായതിനാലും ഇപ്പോൾ നടക്കുന്ന ഇക്കോ ടൂറിസം പ്രവൃത്തികളുടെ ഭാഗമായും മൂന്നുമാസത്തോളമായി കൊടികുത്തിമലയിൽ സന്ദർശകർക്ക് വിലക്കേർപ്പെടുത്തിയിരുന്നു. ഇതുസംബന്ധിച്ച മുന്നറിയിപ്പുകൾ വകവെക്കാതെ മറ്റൊരുവഴിയിലൂടെ യുവാക്കൾ മലയിലെത്തുകയായിരുന്നുവെന്ന് വനം ഉദ്യോഗസ്ഥർ പറഞ്ഞു.

ഇരുട്ടിയതോടെ തിരിച്ചിറങ്ങാൻ വഴിയറിയാതെ യുവാക്കൾ മലയിൽപ്പെട്ടു. വിവരമറിഞ്ഞ് പെരിന്തൽമണ്ണ പോലീസും അഗ്നിരക്ഷാസേനയും ട്രോമാകെയർ സംഘവും തിരച്ചിൽ നടത്തിയെങ്കിലും കണ്ടെത്താനായില്ല. കനത്ത മഴയ്ക്കും കോടമഞ്ഞിനുമിടയിൽ യുവാക്കൾ മഴക്കോട്ട് ധരിച്ചിരുന്നതിനാലാണ് അപകടമില്ലാതെ രക്ഷപ്പെട്ടതെന്ന് വനം ഉദ്യോഗസ്ഥർ പറയുന്നു. തിങ്കളാഴ്ച രാവിലെ കണ്ടെത്തിയ ഇവരെ അറസ്റ്റ്‌ചെയ്ത് ജാമ്യത്തിൽ വിട്ടു. സെക്‌ഷൻ ഫോറസ്റ്റ് ഓഫീസർമാരായ യു. സുരേഷ്‌കുമാർ, ലാൽ വി. നാഥ്, ബീറ്റ് ഓഫീസർമാരായ വൈ. മുത്തലി, വി.എ. വിനോദ്, പി. നിസാർ എന്നിവരാണ് വനംവകുപ്പ് സംഘത്തിലുണ്ടായിരുന്നത്.

The post കൊടികുത്തിമലയിൽ അതിക്രമിച്ചു കയറിയ പൈങ്കണ്ണൂർ സ്വദേശികളായ നാലുപേർ പിടിയിൽ appeared first on Valanchery Online.

പെരിന്തൽമണ്ണയിൽ പ്രണയിച്ചതിന് യുവാവിന് നേരെ ഗുണ്ടാ ആക്രമണം

രാജേഷ് വി അമല — Sun, 02 Jun 2019 23:04:48 +0000

പെരിന്തൽമണ്ണ: യുവാവിന് നേരെ ഗുണ്ടാ ആക്രമണമെന്ന് പരാതി. റെയിൽവേ ട്രാക്കിൽ കൊണ്ട് പോയി ഇരുമ്പ് വടി കൊണ്ട് മർദ്ദിച്ചു. കത്തി കൊണ്ട് കയ്യിലും കാലിലും മുറിവേൽപ്പിച്ചു. തലകീഴായി കെട്ടിത്തൂക്കിയും ഇരുമ്പ് കമ്പി കൊണ്ട് കാലിലും മര്‍ദ്ദിച്ചെന്നുമാണ് ആരോപണം. പാതാക്കര സ്വദേശി നാഷിദ്അലിക്കാണ്‌ മര്‍ദ്ദനമേറ്റത്. പ്രണയിച്ചതിന്‍റെ പേരില്‍ പെണ്‍കുട്ടിയുടെ ബന്ധുക്കളാണ് മര്‍ദിച്ചതെന്നാണ് പരാതിയില്‍ പറയുന്നത്.

പെരിന്തൽമണ്ണ പാതായ്ക്കര സ്വദേശി നാഷിദ്അലിയാണ് മർദ്ധനത്തിന് ഇരയായത്. വലമ്പൂർ സ്വദേശിയായ പെൺകുട്ടിയുമായുള്ള പ്രണയത്തിന്റെ പേരിലായിരുന്നു മർദ്ദനം. യുവാവിനെ വിളിച്ചു വരുത്തിയ സംഘം റയിൽവെ ട്രാക്കിൽ കൊണ്ട് പോയി ഇരുമ്പ് വടി കൊണ്ട് കാലിന് അടിച്ച് പരിക്കേൽപ്പിച്ചു. പിന്നീട് മറ്റൊരു സ്ഥലത്തേക്ക് കൊണ്ട് പോയി തലകീഴായി കെട്ടിതൂക്കി കയ്യിലും കാലിലും കത്തി കൊണ്ട് മുറിവേൽപ്പിച്ചതായും ആരോപണമുണ്ട്. പെൺകുട്ടിയുടെ ബന്ധുവിന്റെ നേതൃത്വത്തിലായിരുന്നു ആക്രമണമെന്ന് യുവാവ് പറയുന്നു. ഗുരുതരാവസ്ഥയിലായ യുവാവിനെ സ്വകാര്യ ആശുപത്രിയിൽ പ്രവേശിപിച്ചു. യുവാവിന്റെയും ബന്ധുക്കളുടെയും പരാതിയെ തുടർന്ന് പെരിന്തൽമണ്ണ പോലീസ് അന്വേഷണം ആരംഭിച്ചിട്ടുണ്ട്.
Summary:moral policing occured in perinthalmanna as a Youth beaten to a pulp for having a affair with a girl

The post പെരിന്തൽമണ്ണയിൽ പ്രണയിച്ചതിന് യുവാവിന് നേരെ ഗുണ്ടാ ആക്രമണം appeared first on Valanchery Online.

വളാഞ്ചേരി ഒമാൻ കൂട്ടായ്മ യൂത്ത് ഐക്കൺ അവാർഡിനായി എൻട്രികൾ ക്ഷണിക്കുന്നു

വളാഞ്ചേരിക്കാരൻ — Wed, 03 Apr 2019 09:10:22 +0000

വളാഞ്ചേരി പ്രദേശത്ത് നിന്നും വിവിധ സാമൂഹിക മേഖലകളിൽ വ്യക്തിമുദ്ര പതിപ്പിച്ച വ്യക്തികൾക്ക് വളാഞ്ചേരി ഒമാൻ കൂട്ടായ്മ നൽകുന്ന VOK YOUTH ICON 2018 അവാർഡിനായി എൻട്രികൾ ക്ഷണിക്കുന്നു. കല, സാഹിത്യം, സാംസ്ക്കാരികം, കായികം, കാർഷികം, വിദ്യാഭ്യാസം, ആരോഗ്യ രംഗം, സാമൂഹിക സേവനം. തുടങ്ങിയ ഏതെങ്കിലും രംഗങ്ങളിൽ വ്യത്യസ്തമായ ഇടപെടലിലൂടെ സമൂഹത്തിന് മാതൃകയാവുക വഴി തന്റേതായ വ്യക്തിമുദ്ര പതിപ്പിച്ച 35 വയസ്സിന് താഴെയുള്ള വ്യക്തികളെയാണ് അവാർഡിനായി പരിഗണിക്കുന്നത്.
എൻട്രികൾ മാർച്ച് 31ന് മുമ്പായി vokyouthicon@gmail.com
എന്ന മെയിൽ ഐഡിയിലേക്ക് അയക്കേണ്ടതാണ്.

കൂടുതൽ വിവരങ്ങൾക്ക്: WhatsApp
Ismayil Kt +96898861428
Said Ali +96892836424
Shabeer +919746571371

The post വളാഞ്ചേരി ഒമാൻ കൂട്ടായ്മ യൂത്ത് ഐക്കൺ അവാർഡിനായി എൻട്രികൾ ക്ഷണിക്കുന്നു appeared first on Valanchery Online.

കേരള യൂത്ത് വോളന്ററി ആക്ഷന്‍ഫോഴ്‌സ് പരിശീലനത്തിനായി ജില്ലയില്‍ നിന്ന് 90 അംഗ സംഘം യാത്രതിരിച്ചു

Jishad VK — Fri, 22 Feb 2019 18:11:16 +0000

വളാഞ്ചേരി കേരള സംസ്ഥാന യുവജനക്ഷേമബോര്‍ഡിന്റെ കീഴില്‍ രൂപീകരിക്കുന്ന കേരള യൂത്ത് വോളന്ററി ആക്ഷന്‍ഫോഴ്‌സിന്റെ പരിശീലനത്തിനായി ജില്ലയില്‍ നിന്നുള്ള സംഘം യാത്രതിരിച്ചു. 90 അംഗസംഘത്തിന് യാത്രയയപ്പ് നല്‍കി. സംസ്ഥാന യുവജനക്ഷേമബോര്‍ഡ് മെമ്പര്‍ ശരീഫ് പാലോളി ഫഌഗ് ഓഫ് ചെയ്തു. ജില്ലാ യൂത്ത് പ്രോഗാം ഓഫീസര്‍ പ്രദീപ്കുമാര്‍ അധ്യക്ഷത വഹിച്ചു. കവി നാസര്‍ ഇരിമ്പിളിയം, ജില്ലാ പരിസ്ഥിതി സംഘം കോര്‍ഡിനേറ്റര്‍ എം.പി.എ ലത്തീഫ്, യുവജനക്ഷേമ ബോര്‍ഡ് കോര്‍ഡിനേറ്റര്‍മാരായ ശുക്കൂര്‍ എം സി പുല്‍പറ്റ, ഷാജര്‍ തൃപ്രങ്ങോട്, ആയിശ തെന്നല, വഹാബ് തിരൂരങ്ങാടി, ശഹീദ് സജാദ് മഞ്ചേരി, അസ്‌ക്കറലി കൊണ്ടോട്ടി, അനീഷ് വലിയക്കുന്ന്, ജിഷാദ് വളാഞ്ചേരി, നൂറൂല്‍ ആബിദ്, ശ്രീകുമാരന്‍ മാസ്റ്റര്‍ സംബന്ധിച്ചു.

പ്രകൃതി ക്ഷോഭങ്ങളിലും മറ്റും രക്ഷാസേനയായി മാറാന്‍ പോകുന്ന കേരള യൂത്ത് വോളന്ററി ആക്ഷന്‍ ഫോഴ്‌സിന്റെ വോളന്ററിയര്‍മാര്‍ക്കുള്ള മൂന്ന് ദിവസത്തെ പരിശീലനം മൂന്നാറില്‍ വെച്ചാണ് നടക്കുന്നത്. പ്രകൃതിക്ഷോഭം, വെള്ളപൊക്കം, വരള്‍ച്ച, തീപിടുത്തം, ഉരുള്‍പൊട്ടല്‍, അപകടം തുടങ്ങിയ സാഹചര്യങ്ങളില്‍ രക്ഷാഭൗത്യം ഏറ്റെടുക്കാന്‍ മാനസികവും ശാരീരികവുമായി സജ്ജമാക്കുന്ന പരിശീലനമാണ് വോളന്റിയര്‍മാര്‍ക്ക് നല്‍കുന്നത്. സംസ്ഥാനത്ത് നേരത്തെ റജിസ്റ്റര്‍ ചെയ്ത 1500 പേര്‍ക്കാണ് ആദ്യഘട്ടത്തില്‍ പരിശീലനം നല്‍കുന്നത്.

The post കേരള യൂത്ത് വോളന്ററി ആക്ഷന്‍ഫോഴ്‌സ് പരിശീലനത്തിനായി ജില്ലയില്‍ നിന്ന് 90 അംഗ സംഘം യാത്രതിരിച്ചു appeared first on Valanchery Online.

വളാഞ്ചേരിയിൽ നിന്ന് സൈക്കിളിൽ ഒറ്റക്കൊരു കാശ്മീർ യാത്ര

വളാഞ്ചേരിക്കാരൻ — Fri, 16 Nov 2018 02:16:00 +0000

അറുപത് ദിവസം കൊണ്ട് പത്ത് സംസ്ഥാനങ്ങളിലൂടെ 4200 കിലോമീറ്റർ പിന്നിട്ട് സൈക്കിളിലൊരു ഒറ്റയാൻ സവാരി. വളാഞ്ചേരി സ്വദേശിയായ യുവാവാണ് കേരളാ ടൂ കാശ്മീർ എന്ന ടൈറ്റിലിൽ തന്റെ സ്വപ്നസവാരിക്കിറങ്ങിയത്..

വളാഞ്ചേരി പൈങ്കണ്ണൂർ സ്വദേശിയും സഞ്ചാരപ്രിയനുമായ പരവക്കൽ നൗഫലിന്റെ പ്രഥമ സൈക്കിൾ ദൗത്യമാണിത്. അദ്ധ്വാനത്തിൽ നിന്ന് മിച്ചം പിടിച്ച നാണയത്തുട്ടുകൾ ഒരുക്കൂട്ടി വെച്ച് മേടിച്ച സൈക്കിളിൽ ഒരു കൗതുക സവാരി നടത്തണമെന്ന ഏറെക്കാലത്തെ ആഗ്രഹമാണ് ഇപ്പോൾ യാദാർത്ഥ്യമായത്. സൈക്കിൾ സവാരിയെങ്കിൽ അത് വെള്ളപ്പുതപ്പണിഞ്ഞ് മഞ്ഞിൽ കുളിച്ചുകിടക്കുന്ന സ്വർഗഭൂമി തന്നെയാകണമെന്ന ആഗ്രഹമാണ് കാശ്മീർ തെരഞ്ഞെടുക്കാൻ ഇദ്ദേഹത്തെ പ്രേരിപ്പിച്ചത്.

മണ്ണും പരിസരവും മലിനമാക്കുന്ന പൊതുശീലത്തിനെതിരെ ജനങ്ങളെ ബോധവൽക്കരിക്കേണ്ടതുണ്ടെന്നും അതിനായി പരിസ്ഥിതി സൗഹൃദവും ലഹരി വിരുദ്ധ ബോധവൽക്കരണവും എന്ന ലക്ഷ്യം കൂടി തന്റെ സൈക്കിൾ സവാരിക്കുണ്ടെന്ന് ഈ യുവാവ് സാക്ഷ്യപ്പെടുത്തുന്നു. ആരോഗ്യമുള്ള ശരീരത്തിന് സൈക്കിൾ യാത്ര ശീലമാക്കുക എന്നൊരു സന്ദേശം കൂടി ഈ യാത്രക്കുണ്ടെന്ന് ഇദ്ദേഹം പറയുന്നു.

ഇന്ന് (നവംബർ 15 വ്യാഴം) രാവിലെ ഒമ്പത് മണിയോടെയാണ് സവാരിക്ക് തുടക്കമായത്. മംഗലാപുരം, ഗോവ, മുംബൈ, സൂറത്ത്, അഹമ്മദാബാദ്, അജ്മീർ, ജെയ്പൂർ, ആഗ്ര, ദില്ലി, ഷിംല, മണാലി, ജമ്മു എന്നീ നഗരങ്ങൾ പിന്നിട്ട് ജനുവരി പതിനഞ്ചോടെ ഫിനിഷിംഗ് പോയിന്റ് ആയ ശ്രീനഗറിൽ എത്തിച്ചേരും വിധമാണ് ഇദ്ദേഹം തന്റെ സവാരി ഷെഡ്യൂൾ ചെയ്തിട്ടുള്ളത്.

രാവിലെ ഒമ്പതു മണിക്ക് വളാഞ്ചേരി ടൗണിൽ കോഴിക്കോട് റോഡിൽ നടന്ന ലളിതമായ ചടങ്ങിൽ പോലീസ് സബ് ഇൻസ്പെക്ടർ കാർത്തികേയൻ ഫ്ലാഗ് ഓഫ് ചെയ്തതോടെയാണ് സൈക്കിൾ സവാരിക്ക് തുടക്കമായത്. അഡീഷണൽ സബ് ഇൻസ്പെക്ടർ കെ. ശശി, സി.പി.ഒ എം. കൃഷ്ണപ്രസാദ് എന്നിവരും സന്നിഹിതരായിരുന്നു. വളാഞ്ചേരി പൈങ്കണ്ണൂരിലെ പരവക്കൽ അബ്ദുൽ ഹമീദിന്റെ മകനാണ് ഇരുപത്തിരണ്ടുകാരനായ നൗഫൽ.

The post വളാഞ്ചേരിയിൽ നിന്ന് സൈക്കിളിൽ ഒറ്റക്കൊരു കാശ്മീർ യാത്ര appeared first on Valanchery Online.

ഇടിയറക്കടവിൽ തടയണ നിർമിക്കണമെന്ന് ഇരിമ്പിളിയം മണ്ഡലം യൂത്ത് കോൺഗ്രസ് കമ്മിറ്റി

വളാഞ്ചേരിക്കാരൻ — Tue, 30 Jan 2018 00:10:16 +0000

ഇരിമ്പിളിയം: മേച്ചേരിപ്പറമ്പിൽ തൂതപ്പുഴയിലെ ഇടിയറക്കടവിൽ തടയണ നിർമിക്കാൻ നടപടി വേണമെന്ന് മണ്ഡലം യൂത്ത്കോൺഗ്രസ് കമ്മിറ്റി. വേനൽ വറുതിക്കു മുൻപായി ഇതിനുള്ള നടപടി വേണമെന്നും ആവശ്യമുന്നയിച്ചു. നിലവിൽ പുഴയോരത്തുള്ള ത്വരിതഗ്രാമീണ ശുദ്ധജലവിതരണ പദ്ധതിയുടെ സുഗമമായ നടത്തിപ്പിനു തടയണ അനിവാര്യമാണ്.

ഇരിമ്പിളിയം പഞ്ചായത്തിലും വളാഞ്ചേരി നഗരസഭയിലും ശുദ്ധജലവിതരണം നടത്തുന്ന പദ്ധതിയാണ്. ഭാവിയിൽ എടയൂർ പഞ്ചായത്തിലേക്കും പദ്ധതിയുടെ പ്രവർത്തനം നീട്ടാനും സാധ്യതയുണ്ട്. ഇതിന്റെ വെളിച്ചത്തിൽ ഈ ഭാഗത്ത് സ്ഥിരം തടയണ പണിയാനും നടപടി സ്വീകരിക്കണമെന്ന് യോഗം ആവശ്യപ്പെട്ടു. ആവശ്യങ്ങൾ ഉന്നയിച്ചു പഞ്ചായത്ത് അധികൃതർക്കു നിവേദനവും സമർപ്പിച്ചു. മണ്ഡലം പ്രസിഡന്റ് വിനു പുല്ലാനൂർ, ബിനീഷ് മങ്കേരി, യൂസഫ്, മണികണ്ഠൻ എന്നിവർ പ്രസംഗിച്ചു.

The post ഇടിയറക്കടവിൽ തടയണ നിർമിക്കണമെന്ന് ഇരിമ്പിളിയം മണ്ഡലം യൂത്ത് കോൺഗ്രസ് കമ്മിറ്റി appeared first on Valanchery Online.