way Archives - Valanchery Online

ദേശീയപാതയോരത്തെ വീട്ടിലേക്കുള്ള വഴി വേഗത്തിൽ അനുവദിക്കും; റോഡ് കരാർ കമ്പനി നിർമിച്ചു നൽകും

വളാഞ്ചേരിക്കാരൻ — Fri, 01 May 2026 11:29:42 +0000

കുറ്റിപ്പുറം: ദേശീയപാതയുടെ സർവീസ് റോഡിൽനിന്ന് വീട്ടിലേക്കുള്ള വഴി ഇനി വേഗത്തിൽ കിട്ടും. മൂന്നരമീറ്റർ വീതിയിൽ വീട്ടിലേക്ക് നിർമാണ ഏജൻസി നിർമിച്ചുകൊടുക്കും. ദേശീയപാതാ അതോറിറ്റിക്ക് വെള്ളക്കടലാസിൽ നേരിട്ട് അപേക്ഷ നൽകിയാൽ മതി.

ഇതുവരെ റോഡ് ഗതാഗത ഹൈവേ മന്ത്രാലയത്തിന്റെ സൈറ്റിൽ കയറി അപേക്ഷിക്കണമായിരുന്നു. വീട് നിർമാണത്തിനുള്ള പെർമിറ്റ്, പ്ലാൻ തുടങ്ങിയവ അപ്‌ലോഡ് ചെയ്യുകയും ചെയ്യേണ്ടിയിരുന്നു. ഇനി അതൊന്നും വേണ്ട. പുതിയ വീട്‌ പണിയുന്നവർക്കും പണിയാൻ പോകുന്നവർക്കും റോഡിന് അപേക്ഷിക്കാം. വീടുകൾക്ക് സൗജന്യമായി നിർമിച്ചുനൽകും. വാണിജ്യ-വ്യാപാര കെട്ടിടങ്ങളാണെങ്കിൽ വലുപ്പത്തിനനുസരിച്ച് ഫീസുണ്ട്. മുമ്പത്തെപ്പോലെ പോർട്ടൽ മുഖാന്തരം അപേക്ഷിക്കുകയും വേണം.

സർവീസ് റോഡിന്റെ അരികിൽ ഫൂട്ട്പാത്ത് ആണ് വരിക. വഴി ആവശ്യമുള്ളവർക്ക് ഫൂട്ട്പാത്തിന്റെ ഉയരം താഴ്ത്തി മൂന്നര മീറ്ററിൽ വാഹനം കടന്നുപോകാനുള്ള നിർമിതി ഒരുക്കുകയാണ് ചെയ്യുന്നത്. ഓൺലൈനിൽ നിരവധി അപൂർണ അപേക്ഷകൾ കെട്ടിക്കിടക്കുന്ന സാഹചര്യത്തിലാണ് പുതിയ തീരുമാനം.

The post ദേശീയപാതയോരത്തെ വീട്ടിലേക്കുള്ള വഴി വേഗത്തിൽ അനുവദിക്കും; റോഡ് കരാർ കമ്പനി നിർമിച്ചു നൽകും appeared first on Valanchery Online.

കോട്ടപ്പടി-കുർബാനി മിനി ബൈപ്പാസ്‌ ; കുരിശുപള്ളി പൊളിച്ച് സ്ഥലംവിട്ടു നൽകി പള്ളിക്കമ്മിറ്റി

വളാഞ്ചേരിക്കാരൻ — Wed, 22 May 2019 10:28:00 +0000

കോട്ടയ്ക്കൽ: കോട്ടപ്പടി മുതൽ കുർബാനിവരെയുള്ള മിനിബൈപ്പാസ്‌ നിർമാണത്തിനായി കോട്ടയ്ക്കൽ സെന്റ് ഗ്രിഗോറിയോസ് ഓർത്തഡോക്സ് പള്ളിയുടെ കുരിശുപള്ളി പൊളിച്ചുമാറ്റി. മൂന്നുമീറ്റർ ആയിരുന്ന റോഡിന്റെ വീതി അഞ്ചരമീറ്ററായി വർധിപ്പിച്ചപ്പോഴാണ് റോഡിനോടുചേർന്ന കുരിശുപള്ളി വീതികൂട്ടലിന് തടസ്സമായത്. ഇതോടെ കുരിശുപള്ളി പൊളിച്ചുമാറ്റുന്നതിനേക്കുറിച്ച് പള്ളിക്കമ്മിറ്റിയുമായി അധികൃതർ ചർച്ച ചെയ്യുകയും പൊളിക്കുന്നതിന് കമ്മിറ്റി അനുവാദം നൽകുകയുമായിരുന്നു.

നാടിന്റെ വികസനത്തിൽ പള്ളിക്ക്‌ പങ്കാളിയാകുവാൻ കഴിഞ്ഞതിൽ സന്തോഷമുണ്ടെന്ന് വികാരി ഫാ. പി.കെ. പൗലോസ് പറഞ്ഞു. പള്ളിക്ക് കോൺക്രീറ്റ് മതിൽ നിർമിച്ചുനൽകുമെന്ന് പി.ഡബ്ലു.ഡി. എക്സിക്യുട്ടീവ് എൻജീനിയർ ഷമീർ പറഞ്ഞു.

വ്യക്തികളും സ്ഥാപനങ്ങളുമടക്കം 61 ഭൂവുടമകൾ സൗജന്യമായി ഭൂമി നൽകിയാണ് മിനി ബൈപ്പാസ് നിർമാണം നടക്കുന്നത്. രാജാസ് ഹയർസെക്കൻഡറി സ്കൂൾ, പുലിക്കോട് പള്ളിക്കമ്മിറ്റി, ചങ്കുവെട്ടിക്കുണ്ട് പള്ളിക്കമ്മിറ്റി തുടങ്ങിയവരും മിനി ബൈപ്പാസിനായി ഭൂമി വിട്ടുനൽകി.

The post കോട്ടപ്പടി-കുർബാനി മിനി ബൈപ്പാസ്‌ ; കുരിശുപള്ളി പൊളിച്ച് സ്ഥലംവിട്ടു നൽകി പള്ളിക്കമ്മിറ്റി appeared first on Valanchery Online.

പെരിന്തല്‍മണ്ണയില്‍ നിന്നും കുഞ്ഞിനേയും കൊണ്ട് ആംബുലന്‍സ് തിരുവനന്തപുരത്തേക്ക്; വഴി നല്‍കുക

വളാഞ്ചേരിക്കാരൻ — Wed, 17 Apr 2019 12:10:16 +0000

പെരിന്തല്‍മണ്ണ : മൂന്നു ദിവസം പ്രായമായ കുഞ്ഞിനേയും കൊണ്ട് പെരിന്തല്‍മണ്ണയില്‍ നിന്നും തിരുവനന്തപുരം ശ്രീചിത്ര ആശുപത്രിയിലേക്ക് ആംബുലന്‍സ് യാത്ര തിരിച്ചു. ഹൃദയ സംബന്ധമായ അസുഖമുള്ള കുഞ്ഞിന് അടിയന്തിര ചികിത്സക്കാണ് പെരിന്തല്‍മണ്ണ ആശുപത്രിയില്‍ നിന്നും കുഞ്ഞിനെ കൊണ്ടു പോകുന്നത്. 5.40നാണ് യാത്ര തിരിച്ചത്.

മലപ്പുറം ജില്ലയിലെ വേങ്ങൂര്‍ സ്വദേശിയായ കളത്തില്‍ നജാദ് – ഇര്‍ഫാന ദമ്പതികളുടെ കുഞ്ഞിനേയും കൊണ്ടാണ് ആംബുലന്‍സ് യാത്ര ചെയ്യുന്നത്. ആരോഗ്യമന്ത്രിയുടെ ഓഫീസ് ഇടപെട്ട് ഹൃദ്യം പദ്ധതിയുടെ ഭാഗമായാണ് ചികിത്സ ഒരുക്കിയതെന്ന് കുഞ്ഞിന്റെ ബന്ധു പറഞ്ഞു.

Vehicle Details: KL 02BD 8296 ടാറ്റാ വിങ്ങര്‍
റൂട്ട്
പെരിന്തല്‍മണ്ണ – അങ്ങാടിപ്പുറം -വളാഞ്ചേരി – കുറ്റിപ്പുറം – എടപ്പാള്‍ -ചങ്ങരംകുളം – പെരുമ്പിലാവ് – കുന്നുംകുളം-അമല
മിഷന്‍ – ആമ്പല്ലൂര്‍ – ചാലക്കുടി – അങ്കമാലി- ആലുവ – ഇടപ്പള്ളി – വൈറ്റില – ചേര്‍ത്തല- ആലപ്പുഴ- അമ്പലപ്പുഴ – ഹരിപ്പാട് – കായംകുളം – കരുനാഗപ്പള്ളി – കൊല്ലം ബൈപ്പാസ് – ചാത്തന്നൂര്‍ – പാരിപ്പള്ളി – കല്ലമ്പലം – ആറ്റിങ്ങല്‍ – മംഗലാപുരം – കഴക്കൂട്ടം – ശ്രീചിത്ര ഹോസ്പിറ്റല്‍

The post പെരിന്തല്‍മണ്ണയില്‍ നിന്നും കുഞ്ഞിനേയും കൊണ്ട് ആംബുലന്‍സ് തിരുവനന്തപുരത്തേക്ക്; വഴി നല്‍കുക appeared first on Valanchery Online.