warning Archives - Valanchery Online

ജാഗ്രതാ ലംഘനം: 5 പേർക്കെതിരെ കേസ്‌

വളാഞ്ചേരിക്കാരൻ — Tue, 24 Mar 2020 00:39:51 +0000

മലപ്പുറം: ജാഗ്രതാ നിർദേശങ്ങൾ ലംഘിച്ചതിന് ജില്ലയിൽ അഞ്ച് കേസുകൾകൂടി രജിസ്റ്റർചെയ്തതായി ജില്ലാ പൊലീസ് മേധാവി യു അബ്ദുൾ കരീം അറിയിച്ചു. ഇതോടെ ജില്ലയിൽ രജിസ്റ്റർചെയ്ത കേസുകളുടെ എണ്ണം 29 ആയി. നിരീക്ഷണത്തിലിരിക്കെ പൊതുസമ്പർക്കത്തിലേർപ്പെട്ടവർക്കെതിരെയാണ് കേസുകൾ. നിർബന്ധിത നിരീക്ഷണ നിർദേശം ലംഘിച്ച സ്വകാര്യ ടാക്‌സ് പ്രാക്ടീഷണറെ പെരിന്തൽമണ്ണ പൊലീസ് അറസ്റ്റുചെയ്ത് ആശുപത്രിയിൽ ഐസൊലേഷനിലാക്കി. പുലാമന്തോൾ പഞ്ചായത്ത് ചെമ്മലശേരി സ്വദേശികളെയാണ്‌ പെരിന്തൽമണ്ണ നഗരത്തിലെ സ്ഥാപനത്തിൽനിന്ന്‌ ഹെൽത്ത് സ്ക്വാഡ് പിടികൂടിയത്‌.
പട്ടാമ്പി റോഡിൽ വർഷങ്ങളായി പ്രവർത്തിക്കുന്ന ടാക്സ് പ്രാക്ടീഷണറും ഭാര്യയുമാണ്‌ പിടിയിലായത്‌.

നിർദേശമനുസരിക്കാതെയാണ് കഴിഞ്ഞ കുറച്ചുദിവസമായി പെരിന്തൽമണ്ണ ഓഫീസിലെത്തി ജോലി ചെയ്യുന്നത്. നഗരസഭ ഹെൽത്ത് സ്ക്വാഡ് എച്ച്‌ഐ കെ ദിലീപ് കുമാറിന്റെ നേതൃത്വത്തിൽ ഇവരുമായി സംസാരിച്ചെങ്കിലും സഹകരിച്ചില്ല. പിന്നീട് പൊലീസും ആംബുലൻസും എത്തിയതോടെ മയപ്പെട്ടു. ഈ ഓഫീസുമായി സമ്പർക്കം പുലർത്തിയ 21 പേരുടെ വിവരം ഹെൽത്ത് സ്ക്വാഡിന് കൈമാറി. ഇവരെ ആംബുലൻസിൽ മഞ്ചേരി മെഡിക്കൽ കോളേജിലെത്തിച്ചു. പൊലീസ് കേസെടുത്തു.
നിർബന്ധിത നിരീക്ഷണം ലംഘിച്ച രണ്ടുപേർക്കെതിരെ കുറ്റിപ്പുറം പൊലീസ് കേസെടുത്തു. ആരോഗ്യ ജാഗ്രതാ നിർദേശം പാലിക്കാൻ ആവശ്യപ്പെട്ട ആശാ വർക്കറെ ആക്രമിച്ച കേസിൽ പാണ്ടിക്കാട് പൊലീസും മുഖ്യമന്ത്രിയുടെ ഫെയ്‌സ്ബുക്ക് പോസ്റ്റ് വർഗീയമായി ചിത്രീകരിച്ച് സമൂഹ മാധ്യമങ്ങളിൽ പ്രചരിപ്പിച്ചതിന് തിരൂർ പൊലീസും കേസുകൾ രജിസ്റ്റർചെയ്തു.

The post ജാഗ്രതാ ലംഘനം: 5 പേർക്കെതിരെ കേസ്‌ appeared first on Valanchery Online.

ഫോനി മുന്നറിയിപ്പ്; മത്തിക്കും അയലക്കും തീവില

വളാഞ്ചേരിക്കാരൻ — Mon, 29 Apr 2019 02:12:15 +0000

ഫോനി ചുഴലിക്കാറ്റ് മുന്നറിയിപ്പ് വന്നപ്പോൾ തന്നെ വിപണിയിൽ മത്സ്യത്തിന് തീ വില. ഒരു കിലോ അയലയ്ക്ക് ഞായറാഴ്ച 260 രൂപയായി വില. മത്തിയ്ക്ക് 200 രൂപയും ചൂരയ്ക്ക് 240 രൂപയും അയക്കൂറയുടേത് 1000രൂപയിലുമെത്തി. കണവ, ആവോലിമുള്ളൻ പോലെയുള്ള ചെറുമീനുകൾക്ക് 160 രൂപയാണ് വില.

ചുഴലിക്കാറ്റ് മുന്നറിയിപ്പുള്ളതിനാൽ മത്സ്യബന്ധനത്തിനായി കടലിലേക്ക് ബോട്ടുകൾ പോകുന്നില്ല. മത്സ്യലഭ്യത കുറഞ്ഞതാണ് വിപണിയിൽ വിലകൂടാനുള്ള കാരണമെന്ന് കച്ചവടക്കാർ പറയുന്നു. ചെറുവള്ളങ്ങളിൽ പോയി പിടിക്കുന്ന മത്സ്യം മാത്രമെ ലഭിക്കുന്നുള്ളു. മത്സ്യം വാങ്ങാൻ ആവശ്യക്കാർ ഏറെയാണെങ്കിലും ലഭ്യത കുറഞ്ഞത് വിൽപനക്കാർക്ക് തിരിച്ചടിയായി.
കോഴി വില ഉയർന്നതോടെ മത്സ്യത്തിന് ആവശ്യക്കാർ ഏറിയിരുന്നു. നല്ല വിൽപന നടന്നുകൊണ്ടിരുന്ന സമയത്താണ് ഫോനി ചുഴലിക്കാറ്റ് മുന്നറിയിപ്പ് വന്നതും ആഴക്കടലിൽ മത്സ്യബന്ധനത്തിന് പോകാൻ കഴിയാതെ വന്നതുമെന്ന് മത്സ്യത്തൊഴിലാളികൾ പറഞ്ഞു. വേനൽ ചുട്ടുപൊള്ളുന്നതോടെ അവശ്യ സാധനങ്ങൾക്കും തീവിലയാണ്. ഈ സാഹചര്യത്തിലാണ് മത്സ്യത്തെ തൊട്ടാലും പൊള്ളും എന്ന അവസ്ഥയിലെത്തിയിരിക്കുന്നത്.

ആഴക്കടലിൽ മത്സ്യബന്ധനത്തിന് പോകാൻ കഴിയാത്തതോടെ തീരപ്രദേശവും വറുതിയിലാണ്. കേരളത്തിൽ ഇനി മൂന്നുദിവസം കനത്തമഴയും കാറ്റും ഉണ്ടാകാമെന്നതിനാൽ മത്സ്യത്തൊഴിലാളികൾ കടലിൽ പോകരുതെന്ന് മുന്നറിയിപ്പുണ്ട്.

The post ഫോനി മുന്നറിയിപ്പ്; മത്തിക്കും അയലക്കും തീവില appeared first on Valanchery Online.

ഭാരതപ്പുഴയിൽ ജലനിരപ്പ് ഉയർന്നു; തീരത്ത് ജാഗ്രത

വളാഞ്ചേരിക്കാരൻ — Wed, 15 Aug 2018 01:56:33 +0000

തിരൂർ: തീരവാസികളെ ഭീതിയിലാഴ്ത്തി ഭാരതപ്പുഴ വീണ്ടും കരകവിഞ്ഞൊഴുകി. പൊന്നാനി ഇൗശ്വരമംഗലം ഭാഗത്തെ ഒട്ടേറെ വീടുകളിലേക്ക് വെള്ളം കയറി. ഭാരതപ്പുഴയുടെ തീരപ്രദേശങ്ങളായ ഇൗഴുവതിരുത്തി, തവനൂർ, കാലടി തുടങ്ങിയ വില്ലേജുകളിൽ ജാഗ്രതാ നിർദേശം നൽകിയിട്ടുണ്ട്. കഴിഞ്ഞ ദിവസം മലമ്പുഴ ഡാം തുറന്നതും തുടർച്ചയായുള്ള മഴയുമാണ് പുഴയിൽ വീണ്ടും ജലനിരപ്പുയരാൻ കാരണം. പൊന്നാനി മേഖലയിൽ മഴവെള്ളം പുഴയിലേക്ക് ഒഴുക്കിവിടാൻ നിർമിച്ച പൈപ്പുകളിലൂടെ പുഴയിൽ ജലനിരപ്പുയർന്നതോടെ വെള്ളം കരയിലേക്ക് തള്ളിക്കയറുകയായിരുന്നു.

ഇൗശ്വരമംഗലം ഭാഗത്ത് വൈദ്യുതി കണക്‌ഷൻ താൽക്കാലികമായി വിച്ഛേദിച്ചിട്ടുണ്ട്.16 കുടുംബങ്ങളാണ് പൊന്നാനി ചമ്രവട്ടം പ്രോജക്ട് ഓഫിസിലെ ദുരിതാശ്വാസ ക്യാംപിൽ കഴിഞ്ഞിരുന്നത്. ഇതിൽ മുക്കാൽഭാഗം കുടുംബങ്ങളും വീടുകളിലേക്ക് മടങ്ങിയിരിക്കുകയാണ്. പൊന്നാനി ഭാഗത്ത് ഇന്നലെ കടലാക്രമണം രൂക്ഷമായിരുന്നു. അഴീക്കൽ മേഖലയിലെ പത്തോളം വീടുകളിലേക്ക് വെള്ളംകയറി. ഭാരതപ്പുഴയോരത്ത് താമസിക്കുന്നവർക്ക് അധികൃതർ ജാഗ്രതാ നിർദേശം നൽകിയതിനെ തുടർന്ന് വിവിധ സംഘടനകളുടെ സഹായത്തോടെ പുഴയോരങ്ങളിൽ തോണികൾ സജ്ജമാക്കി. മുങ്ങൽ വിദഗ്ധരെ സ്ഥലത്തെത്തിച്ചു.

The post ഭാരതപ്പുഴയിൽ ജലനിരപ്പ് ഉയർന്നു; തീരത്ത് ജാഗ്രത appeared first on Valanchery Online.