veena george Archives - Valanchery Online

വളാഞ്ചേരി നഗരസഭ പാലിയേറ്റീവ് ഐ.പി ക്രോണിക്ക് ഡിസബിലിറ്റി മാനേജ്മെൻ്റ് ഫിസിയോ തെറാപ്പി യൂണിറ്റ് പ്രവർത്തനമാരംഭിച്ചു

വളാഞ്ചേരിക്കാരൻ — Fri, 07 Nov 2025 12:19:26 +0000

വളാഞ്ചേരി: വളാഞ്ചേരി നഗരസഭ പാലിയേറ്റീവ് ഐ.പി ക്രോണിക്ക് ഡിസബിലിറ്റി മാനേജ്മെൻ്റ് ഫിസിയോ തെറാപ്പി യൂണിറ്റ് ആരോഗ്യ ശിശു വികസന വകുപ്പ് മന്ത്രി വീണ ജോർജ് ഓൺലൈൻ ആയി നിർവ്വഹിച്ചു. കോട്ടക്കൽ നിയോജക മണ്ഡലം എം.എൽ.എ പ്രൊഫ.ആബിദ് ഹുസൈൻ തങ്ങൾ അദ്ധ്യക്ഷത വഹിച്ചു.നഗരസഭ ചെയർമാൻ അഷ്‌റഫ് അമ്പലത്തിങ്ങൽ സ്വാഗതം പറഞ്ഞു. കിടപ്പിലായ രോഗികളെ വളരെ മികച്ചരീതിയിൽ ശുശ്രൂഷ നൽകുന്നതിനും അത്തരത്തിലുള്ള രോഗികൾക്ക് മികച്ച ചികിത്സ നൽകുന്നതിന് വേണ്ടിയാണ് പാലിയേറ്റ് ഐ.പി ആരംഭിച്ചിട്ടുള്ളത്. തദ്ദേശസ്വായം ഭരണത്തിന് കീഴിൽ കേരളത്തിൽ തന്നെ ആദ്യമായി ആരംഭിക്കുന്ന പാലിയേറ്റീവ് ഐ.പി കേന്ദ്രമാണ് വളാഞ്ചേരി നഗരസഭയിൽ ആരംഭിച്ചത്.കുടുംബാരോഗ്യ കേന്ദ്രത്തിന് സമീപമുള്ള കെട്ടിടത്തിൽ നവീകരണം നടത്തിയാണ് ഐ.പി കേന്ദ്രം ആരംഭിച്ചിട്ടുള്ളത്. ഡോക്‌ടറുടെ നേതൃത്വത്തിൽ പരിശോധയും, 24×7നഴ്‌സിൻ്റെ സേവനം ലഭ്യമാകുകയും ചെയ്യും. പാലിയേറ്റീവ് ജനറൽ സെക്രട്ടറി ഡോ.എൻ.എം മുജീബ്റഹ്മാൻ, നഗരസഭ വൈസ് ചെയർപേഴ്‌സൺ റംല മുഹമ്മദ്,സ്ഥിരം സമിതി അദ്ധ്യക്ഷന്മാരായ ഇബ്രാഹിം മാരാത്ത്, മുജീബ് വാലാസി, ദീപ്‌തി ഷൈലേഷ്,ജില്ല മെഡിക്കൽ ഓഫീസർ ഇൻ-ചാർജ് ഷിബുലാൽ,മെഡിക്കൽ ഓഫീസർ ഡോ.നസീറ ചെറുവക്കത്ത്, കെ.എം ഗഫൂർ,വി.പി സാലിഹ്,ഡോ.റിയാസ്, ജബ്ബാർ നടക്കാവിൽ തുടങ്ങിയവർ സംസാരിച്ചു. കൗൺസിലർയാരായ ഈസ മാസ്റ്റർ,എൻ.നൂർജഹാൻ,സദാനന്ദൻ കോട്ടീരി,കമറുദ്ധീൻ പാറക്കൽ,നൗഷാദ് നാലകത്ത്, സിദ്ധീഖ് ഹാജി കളപ്പുലാൻ,കെ.വി ഉണ്ണികൃഷ്ണൻ തുടങ്ങി രാഷ്ട്രീയ സാമൂഹ്യ രംഗത്തെ പ്രമുഖവ്യക്തിത്വങ്ങൾ, ആരോഗ്യ വിഭാഗം ജീവനക്കാർ,ആശവർക്കർമാർ പരിപാടിയിൽ പങ്കെടുത്തു.

The post വളാഞ്ചേരി നഗരസഭ പാലിയേറ്റീവ് ഐ.പി ക്രോണിക്ക് ഡിസബിലിറ്റി മാനേജ്മെൻ്റ് ഫിസിയോ തെറാപ്പി യൂണിറ്റ് പ്രവർത്തനമാരംഭിച്ചു appeared first on Valanchery Online.

വളാഞ്ചേരിയിലെ നിപ സ്ഥിരീകരണം; അടിയന്തിര യോഗം വിളിച്ച് ആരോഗ്യ മന്ത്രി, മലപ്പുറം ജില്ലയില്‍ ആരോഗ്യ ജാഗ്രതാ നിര്‍ദ്ദേശം

വളാഞ്ചേരിക്കാരൻ — Thu, 08 May 2025 17:23:21 +0000

മലപ്പുറം: ജില്ലയിലെ വളാഞ്ചേരി നഗരസഭയില്‍ നിപ സ്ഥിരീകരിച്ചതായി ആരോഗ്യ- കുടംബക്ഷേമ വകുപ്പു വീണ ജോര്‍ജ്. നഗരസഭയിലെ രണ്ടാം വാര്‍ഡില്‍ താമസിക്കുന്ന 42 കാരിക്കാണ് നിപ രോഗബാധ സ്ഥിരീകരിച്ചത്. നിലവില്‍ അവര്‍ പെരിന്തല്‍മണ്ണയിലെ ആശുപത്രിയില്‍ ചികിത്സയിലാണ്. ഏപ്രില്‍ 25 ന് പനി ബാധിച്ച് വളാഞ്ചേരിയിലെ സ്വകാര്യ ക്ലിനിക്കില്‍ ചികിത്സ തേടിയ ഇവര്‍ പിന്നീട് ഡോക്ടറുടെ നിര്‍ദ്ദേശ പ്രകാരം മെയ് ഒന്നിന് പെരിന്തല്‍മണ്ണയിലെ ആശുപത്രിയില്‍ എത്തുകയായിരുന്നു. സംസ്ഥാനത്ത് നടത്തിയ ടെസ്റ്റില്‍ നിപ കണ്ടെത്തിയതിനെ തുടര്‍ന്ന് പുനെ വൈറോളജി ലാബില്‍ നടത്തിയ പരിശോധനയിലാണ് രോഗം സ്ഥിരീകരിച്ചത്. അതേസമയം രോഗിയുടെ അടുത്ത ബന്ധുക്കള്‍ ഉള്‍പ്പെടെ ഹൈറിസ്‌ക് വിഭാഗത്തില്‍ പെട്ട ഏഴു പേരുടെ 21 സാമ്പിളുകള്‍ പരിശോധിച്ചതില്‍ എല്ലാം നെഗറ്റീവായതായി മന്ത്രി അറിയിച്ചു.

നിപ രോഗബാധ സ്ഥിരീകരിച്ചതിനെ തുടര്‍ന്ന് അടിയന്തരമായി ജില്ലയിലെത്തിയ മന്ത്രി വൈകീട്ട് കളക്ടറേറ്റില്‍ ഉന്നതതല യോഗം വിളിച്ച് ചേര്‍ത്ത് സ്ഥിതിഗതികള്‍ വിലയിരുത്തുകയും ഉദ്യോഗസ്ഥര്‍ക്ക് ആവശ്യമായ നിര്‍ദ്ദേശങ്ങള്‍ നല്‍കുകയും ചെയ്തു. രോഗിയെ ചികിത്സിക്കുന്ന ഡോക്ടര്‍ കൂടി യോഗത്തില്‍ ഓണ്‍ലൈനായി പങ്കെടുത്തു. രോഗിക്ക് മോണോ ക്ലോണല്‍ ആന്റി ബോഡി നല്‍കാന്‍ സംസ്ഥാന മെഡിക്കല്‍ ബോര്‍ഡ് ശുപാര്‍ശ ചെയതതായും ആശുപത്രി എത്തിക്കല്‍ കമ്മിറ്റിയുടെ അനുമതി കൂടി ലഭിക്കുന്ന മുറയ്ക്ക് അത് നല്‍കുമെന്നും മന്ത്രി അറിയിച്ചു. രോഗി ചികിത്സയിലുള്ള ആശുപത്രിയില്‍ തന്നെ തുടരുന്നതാണ് പ്രോട്ടോക്കോള്‍ എങ്കിലും ബന്ധുക്കള്‍ ആവശ്യപ്പെടുന്ന പക്ഷം മഞ്ചേരി മെഡിക്കല്‍ കോളെജിലേക്ക് മാറ്റുന്ന കാര്യം പരിശോധിക്കും.

രോഗം സ്ഥിരീകരിച്ച മേഖലയിലെ മൂന്ന് കിലോമീറ്റര്‍ ചുറ്റളവില്‍ കണ്ടെയ്ന്‍മെന്റ് സോണാകും. ഇത് സംബന്ധിച്ച് പൊതുജനാരോഗ്യ നിയമപ്രകാരവും ദുരന്തനിവാരണ നിയമപ്രകാരവും ജില്ലാ കളക്ടര്‍ പ്രത്യേക ഉത്തരവിറക്കും. വളാഞ്ചേരി നഗരസഭ, മാറാക്കര, എടയൂര്‍ പഞ്ചായത്ത് പരിധിയില്‍ ഉള്‍പ്പെടുന്ന പ്രദേശങ്ങളിലാണ് പ്രധാനമായും നിയന്ത്രണങ്ങള്‍ ഉണ്ടാകുക. നിപ പ്രോട്ടോക്കോളിന്റെ ഭാഗമായി വിവിധ തലങ്ങളിലുള്ള 25 കമ്മിറ്റികള്‍ രൂപീകരിച്ച് പ്രവര്‍ത്തനം തുടങ്ങി. രോഗിയുമായി സമ്പര്‍ക്കത്തിലുള്ളവരെ കണ്ടെത്തുന്നതിന് ഊര്‍ജിതമായ നടപടികള്‍ ആരംഭിച്ചിട്ടുണ്ട്. അധികം സമ്പര്‍ക്കത്തിന് സാധ്യതയില്ലെന്നാണ് കണ്ടെത്തിയതെങ്കിലും സൂക്ഷ്മമായ പരിശോധന നടത്തും. ഹൈസ് റിസ്‌ക്, ലോ റിസ്‌ക് വിഭാഗത്തില്‍ പെട്ട സമ്പര്‍ക്കത്തിലുള്ള എല്ലാവരും 21 ദിവസം നിര്‍ബന്ധമായും നിരീക്ഷണത്തില്‍ കഴിയണം.

മരുന്നുകളുടെ ലഭ്യത ഉറപ്പാക്കാന്‍ നിര്‍ദ്ദേശം നല്‍കിയിട്ടുണ്ട്. വൈറസിന്റെ ഉറവിടം കണ്ടെത്തുന്നതിന് പരിശോധന നടത്തും. പ്രദേശത്ത് ഒരു പൂച്ച ചത്തതായി റിപ്പോര്‍ട്ട് ചെയ്യപ്പെട്ട പശ്ചാത്തലത്തില്‍ മൃഗസംരക്ഷണ വകുപ്പു മുഖേന സാമ്പിള്‍ ശേഖരിച്ച് വിദഗ്ധ പരിശോധനയ്ക്ക് അയയ്ക്കും. നഗരസഭയിലും സമീപ പഞ്ചായത്തുകലിലും പനി സര്‍വേ നടത്തും. ആശുപത്രികള്‍ ഇന്‍ഫെക്ഷന്‍ കണ്‍ട്രോള്‍ പ്രോട്ടോക്കോള്‍ കര്‍ശനമായി പാലിക്കാന്‍ മന്ത്രി നിര്‍ദ്ദേശം നല്‍കി.

നിപ പശ്ചാത്തലത്തില്‍ ജില്ലയില്‍ പൊതുവായി ജാഗ്രത പാലിക്കണമെന്ന് ആരോഗ്യ വകുപ്പ് മന്ത്രി നിര്‍ദ്ദേശം നല്‍കി. എല്ലാവരും മാസ്‌ക് ധരിക്കുകയും സാനിറ്റൈസര്‍ ഉപയോഗിക്കുകയും ചെയ്യുന്നതാണ് അഭികാമ്യമെന്ന് മന്ത്രി പറഞ്ഞു. സംസ്ഥാന സര്‍ക്കാറിന്റെ നാലാം വാര്‍ഷികത്തോടനുബന്ധിച്ച് കോട്ടക്കുന്നില്‍ നടക്കുന്ന എന്റെ കേരളം പ്രദര്‍ശന- വിപണന മേളയില്‍ മാസ്‌കും സാനിറ്റൈസറും നിര്‍ബന്ധമാക്കും. അനാവശ്യമായ ആശുപത്രി സന്ദര്‍ശനങ്ങള്‍ ഒഴിവാക്കണമെന്നും മന്ത്രി നിര്‍ദ്ദേശം നല്‍കി.

മന്ത്രിയുടെ നേതൃത്വത്തില്‍ കളക്ടറേറ്റ് കോണ്‍ഫ്രന്‍സ് ഹാളില്‍ നടന്ന യോഗത്തില്‍ കോട്ടക്കല്‍ നിയജക മണ്ഡലം എം.എല്‍.എ ആബിദ് ഹുസൈന്‍ തങ്ങള്‍, ആരോഗ്യ വകുപ്പ് അഡീഷണല്‍ ചീഫ് സെക്രട്ടറി ഡോ. രാജന്‍ എന്‍ ഖോബ്രഗഡെ, ജില്ലാ കളക്ടര്‍ വി.ആര്‍ വിനോദ്, ദേശീയ ആരോഗ്യ ദൗത്യം സ്‌റ്റേഷന്‍ മിഷന്‍ ഡയറക്ടര്‍ ഡോ. വിനയ് ഗോയല്‍, ആരോഗ്യ വകുപ്പ് ഡയരക്ടര്‍ ഡോ.കെ.ജെ റീന, ആരോഗ്യ വിദ്യാഭ്യാസ വകുപ്പ് ഡയറക്ടര്‍ ഡോ. തോമസ് മാത്യു (ഓണ്‍ലൈന്‍), അഡീഷണല്‍ ഡയറക്ടര്‍ ഡോ. റീത, ജില്ലാ മെഡിക്കല്‍ ഓഫീസര്‍ ഡോ.ആര്‍ രേണുക, ബന്ധപ്പെട്ട മറ്റ് ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

The post വളാഞ്ചേരിയിലെ നിപ സ്ഥിരീകരണം; അടിയന്തിര യോഗം വിളിച്ച് ആരോഗ്യ മന്ത്രി, മലപ്പുറം ജില്ലയില്‍ ആരോഗ്യ ജാഗ്രതാ നിര്‍ദ്ദേശം appeared first on Valanchery Online.

വളാഞ്ചേരി നഗരസഭയുടെ ഗവ. ആയുർവേദ ഡിസ്പെൻസറി പുതിയ ഒ.പി. കെട്ടിടത്തിൻ്റെ നിർമ്മാണോദ്ഘാടനം നിർവ്വഹിച്ചു

വളാഞ്ചേരിക്കാരൻ — Tue, 24 Dec 2024 07:17:00 +0000

വളാഞ്ചേരി:-സംസ്ഥാനത്തെ ആയുഷ് സ്ഥാപനങ്ങളുടെ 14.05 കോടിയുടെ വികസന പ്രവർത്തനങ്ങളുടെ ഭാഗമായി, നാഷണൽ ആയുഷ് മിഷൻ്റെ 30 ലക്ഷം രൂപ ചെലവഴിച്ച് കാർത്തലയിൽ നിർമ്മിക്കുന്ന വളാഞ്ചേരി നഗരസഭയുടെ ഗവ. ആയുർവേദ ഡിസ്പെൻസറി പുതിയ ഒ.പി. കെട്ടിടത്തിൻ്റെ നിർമ്മാണോദ്ഘാടനം സംസ്ഥാന ആരോഗ്യ വനിതാ ശിശു വികസന വകുപ്പ് മന്ത്രി വീണ ജോർജ് ഓൺലൈനായി നിർവ്വഹിച്ചു.. ഇതിനോടനുബന്ധിച്ച് വളാഞ്ചേരി നഗരസഭയിൽ വച്ച് നടന്ന ചടങ്ങിൽ നഗരസഭ ചെയർമാൻ അഷ്റഫ് അമ്പലത്തിങ്ങൽ അദ്ധ്യക്ഷത വഹിച്ചു.ആരോഗ്യ സ്റ്റാൻ്റിംഗ് കമ്മിറ്റി ചെയർമാൻ മാരാത്ത് ഇബ്രാഹിം സ്വാഗതം പറഞ്ഞു.ഭാരതീയ ചികിത്സാ വകുപ്പ് ജില്ലാ മെഡിക്കൽ ഓഫീസർ ഡോ. എം.ജി ശ്യാമള മുഖ്യാത്ഥിതിയായി. ചടങ്ങിൽ വൈസ് ചെയർപേഴ്സൺ റംല മുഹമ്മദ്,കൗൺസിലർ സിദ്ധീഖ് ഹാജി കളപ്പുലാൻ,ഷിഹാബ് പാറക്കൽ,സാജിത ടീച്ചർ,നഗരസഭ സെക്രട്ടറി എച്ച്.സീന,ആയുഷ് വിഭാഗം മെഡിക്കൽ ഓഫീസർ ഡോ.സുജീഷ്,സിദ്ധ വിഭാഗം മെഡിക്കൽ ഓഫീസർ സുശാന്ത് എന്നിവർ സംസാരിച്ചു.

The post വളാഞ്ചേരി നഗരസഭയുടെ ഗവ. ആയുർവേദ ഡിസ്പെൻസറി പുതിയ ഒ.പി. കെട്ടിടത്തിൻ്റെ നിർമ്മാണോദ്ഘാടനം നിർവ്വഹിച്ചു appeared first on Valanchery Online.

കോട്ടക്കൽ ആര്യവൈദ്യശാല സന്ദർശിച്ചു മന്ത്രി വീണ ജോർജ്

വളാഞ്ചേരിക്കാരൻ — Sat, 30 Jul 2022 09:36:28 +0000

കോട്ടക്കൽ: മന്ത്രി വീണ ജോർജ് കോട്ടക്കൽ ആര്യവൈദ്യശാല സന്ദർശിച്ചു. കൈലാസ മന്ദിരത്തിൽ എത്തിയ മന്ത്രിയെ ആര്യവൈദ്യശാലാ മാനേജിംഗ് ട്രസ്റ്റിയും ചീഫ് ഫിസിഷ്യനുമായ ഡോ.പി.എം. വാരിയർ, സി.ഇ.ഒ ഡോ.ജി.സി. ഗോപാലപിള്ള, ട്രസ്റ്റിമാരായ പി. രാഘവവാരിയർ, ഡോ.കെ. മുരളീധരൻ, കെ.ആർ. അജയ്, ഡോ.സുജിത് എസ് വാരിയർ, ജോയന്റ് ജനറൽ മാനേജർ യു. പ്രദീപ്, കെ.വി രാമചന്ദ്ര വാരിയർ, ഷൈലജാ മാധവൻ കുട്ടി, പി.എസ്. സുരേന്ദ്ര വാരിയർ, കുടുംബാംഗങ്ങൾ തുടങ്ങിയവർ ചേർന്ന് സ്വീകരിച്ചു. ആബിദ് ഹുസൈൻ തങ്ങൾ എം.എൽ.എ, സി.പി.എം ജില്ലാ സെക്രട്ടറി ഇ.എൻ. മോഹൻദാസ്, ഡി.എം.ഒ ഡോ. രേണുക എന്നിവരും ഉണ്ടായിരുന്നു.

The post കോട്ടക്കൽ ആര്യവൈദ്യശാല സന്ദർശിച്ചു മന്ത്രി വീണ ജോർജ് appeared first on Valanchery Online.

തിരൂർ ജില്ലാ ആശുപത്രിയിൽ കാൻസർ ചികിത്സാ സൗകര്യം ഒരുക്കണം-കുറുക്കോളി മൊയ്തീൻ എം.എൽ.എ

വളാഞ്ചേരിക്കാരൻ — Thu, 27 May 2021 15:19:09 +0000

തിരൂർ: ജില്ലാ ആസ്പത്രിയിൽ കെട്ടിടം നിർമ്മാണം പൂർത്തിയാകുന്ന മുറക്ക് കാൻസർ ചികിത്സാ സൗകര്യം തുടങ്ങണമെന്നും, അതിലേക്കാവശ്യമായ സ്റ്റാഫിനേയും നിയമിക്കുന്നതിന് നടപടികൾ സ്വീകരിക്കണമെന്നും ആവശ്യപ്പെട്ട് കുറുക്കോ മൊയ്തീൻ എം.എൽ.എ ആരോഗ്യ മന്ത്രി വീണാ ജോർജിന് നൽകിയ നിവേദനത്തിൽ ആവശ്യപ്പെട്ടു.

The post തിരൂർ ജില്ലാ ആശുപത്രിയിൽ കാൻസർ ചികിത്സാ സൗകര്യം ഒരുക്കണം-കുറുക്കോളി മൊയ്തീൻ എം.എൽ.എ appeared first on Valanchery Online.