subeera farhath Archives - Valanchery Online

സുബീറ ഫർഹത്തിൻ്റെ മൃതദേഹം ഖബറടക്കി

വളാഞ്ചേരിക്കാരൻ — Tue, 27 Apr 2021 01:24:02 +0000

ആതവനാട്: ആതവനാട് ചോറ്റുരിൽ കൊല്ലപ്പെട്ട സുബീറ ഫര്‍ഹത്തിന് കണ്ണീരില്‍ കുതിര്‍ന്ന യാത്രാമൊഴി. പോസ്റ്റുമോര്‍ട്ടം കഴിഞ്ഞ് ബന്ധുക്കള്‍ക്ക് വിട്ടുനല്‍കിയ മൃതദേഹം തിങ്കളാഴ്ച ഉച്ചക്ക് ശേഷം വീട്ടിലെത്തിച്ചു. ശേഷം ചോറ്റൂര്‍ ജുമാമസ്ജിദില്‍ മയ്യിത്ത് ഖബറടക്കി

The post സുബീറ ഫർഹത്തിൻ്റെ മൃതദേഹം ഖബറടക്കി appeared first on Valanchery Online.

സുബീറ ഫർഹത്ത് വധക്കേസ് തെളിയിച്ച അന്വേഷണ സംഘത്തിലെ ഉദ്യോഗസ്ഥൻ്റെ കുറിപ്പ് വൈറലാകുന്നു

വളാഞ്ചേരിക്കാരൻ — Sat, 24 Apr 2021 13:25:49 +0000

വളാഞ്ചേരി: ആതവനാട് ചോറ്റൂർ സ്വദേശിനി സുബീറ ഫർഹത്തിൻ്റെ തിരോധാനം അന്വേഷിച്ച് അവരുടെ കൊലപാതകിയെ കണ്ടെത്തിയ അന്വേഷണ സംഘത്തിലെ ഉദ്യോഗസ്ഥൻ്റെ ഫേസ്ബുക്ക് കുറിപ്പ് വൈറലാകുന്നു. മാർച്ച് പത്തിന് കാണാതായ ആതവനാട് കഞ്ഞിപ്പുരയിലെ ചോറ്റൂർ കിഴക്കത്ത് പറമ്പാട്ട് കബീറിന്റെ മകൾ സുബീറ ഫർഹത്തി(21)ന്റെ മൃതദേഹം 20-ന് വൈകീട്ടാണ് ഫർഹത്തിന്റെ വീടിനടുത്തുള്ള ചെങ്കൽക്വാറിയിൽ കുഴിച്ചിട്ട നിലയിൽ കണ്ടത്. സംഭവവുമായി ബന്ധപ്പെട്ട് റിമാൻഡിലായ യുവതിയുടെ അയൽവാസി വരിക്കോടൻ അൻവർ(38)തെളിവെടുപ്പിനായി പോലീസ് കസ്റ്റഡിയിലാണ്. വളാഞ്ചേരി പോലീസ് സ്റ്റേഷൻ എസ്.എച്.ഒ പി.എം ഷമീറിൻ്റെ വികാരപരമായ പോസ്റ്റാണ് വായിച്ചവരുടെ കണ്ണുകളെ ഈറനണിയിക്കുന്നതും ചിന്തിക്കുവാൻ പ്രേരിപ്പിക്കുന്നതും. സുബീറ ഫർഹത്തിൻ്റെ കാണാതായതിന് 41 ദിവസങ്ങൾക്ക് ശേഷമാണ് അവരുടെ മൃതദേഹം കണ്ടെടുക്കുന്നത്. അന്വേഷണാവശ്യങ്ങൾക്കായി മകളുടെ സ്വകാര്യ വസ്തുക്കൾ അവശ്യപ്പെട്ട് ചെന്ന പോലീസുകാർക്ക് തൻ്റെ മകൾ മറ്റെവിടെയോ ജീവിച്ചിരിക്കുന്നുവെന്ന വിശ്വാസത്തിൽ അവൾക്ക് വേണ്ടെതെല്ലാം കൊടുത്തുവിടുകയായിരുന്നുവത്രെ. ഏതൊരു മക്കളും വീട്ടിൽ നിന്ന് യാത്രപറഞ്ഞിറങ്ങിപോയതിനുശേഷം അവർ ഇനി ജീവനോടെ തിരിച്ചെത്തില്ല എന്ന് മാതാപിതാക്കൾ എങ്ങനെ ഉൾകൊള്ളുമെന്ന വേദനയും ആ വാക്കുകളിൽ കാണാം.
കുറിപ്പ് വായിക്കാം
*സുബീറ ഫർഹത്തിൻ്റെ തിരോധാനം* .
*ഒരു നൊമ്പരക്കാഴ്ച*
വളാഞ്ചേരി കഞ്ഞിപുരയിൽ ഒരു മാസത്തിലേറെയായി കാണാതായ 21 കാരിയുടെ മൃതദേഹം കിട്ടിയതും വളരെ വിദഗ്ദമായ അന്വേഷണത്തിലൂടെ പ്രതിയെ കണ്ടെത്തിയതും സർവീസ് ജീവിതത്തിലെ അവിസ്മരണീയവും അഭിമാനകരവും ആയ സംഭവമാണ്. പെൺകുട്ടിയെ കാണാതായതിനു തൊട്ടുപിറകെ ബന്ധുക്കളുടേയും നാട്ടുകാരുടേയും വിശ്വാസം ഏറ്റെടുത്ത് അന്വേഷണം മുന്നോട്ടു കൊണ്ടുപോകുവാൻ കഴിഞ്ഞതുകൊണ്ടാണ് പോലീസിനെതിരെ യാതൊരുവിധ ആക്ഷേപങ്ങളും ഇല്ലാതെ കേസ് അന്വേഷണം പൂർത്തിയാക്കാൻ കഴിഞ്ഞത്. സുബീറ എന്ന പെൺകുട്ടി രാവിലെ 9 മണിക്ക് സാധാരണ പോകാറുള്ളത് പോലെ തൊട്ടടുത്ത ടൗണിലെ ക്ലിനിക്കിലേക്ക് ജോലിക്ക് പോയതായിരുന്നു. അതിനുശേഷം നാൽപ്പതാം ദിവസം പെൺകുട്ടിയെ സ്വന്തം വീടിന് 300 മീറ്റർ അകലെയുള്ള പറമ്പിൽ കുഴിച്ചു മൂടപ്പെട്ട നിലയിൽ കണ്ടെത്തുകയായിരുന്നു. വിവരമറിഞ്ഞ് നാടും നാട്ടുകാരും സംഭവസ്ഥലത്തേക്ക് ഒഴുകി. കേസന്വേഷണത്തിന് ഭാഗമായി ശാസ്ത്രീയ പരിശോധനക്ക് പെൺകുട്ടി ഉപയോഗിച്ചിരുന്ന സ്വകാര്യ വസ്തുക്കൾ എന്തെങ്കിലും കിട്ടുമോ എന്നറിയാൻ പോലീസുകാരെ പെൺകുട്ടിയുടെ വീട്ടിലേക്ക് അയക്കുകയുണ്ടായി. ഒരു ദുരന്തം നടന്നാൽ അത് ഏറ്റവും അവസാനം അറിയുന്നത് ബന്ധപ്പെട്ട വീട്ടുകാർ ആയിരിക്കും എന്നത് നമ്മൾ പലപ്പോഴും കേട്ടിട്ടുള്ള കാര്യമാണ്. ഇവിടെയും അനുഭവം മറ്റൊന്നായിരുന്നില്ല.സ്വന്തം മകളെ കണ്ടെത്തി എന്ന പ്രതീക്ഷ നിറഞ്ഞ മനസ്സോടെ കൂടിയാണ് പെറ്റമ്മ പോലീസുകാരെ സ്വീകരിച്ചത്. ആ ഉമ്മ നൽകിയ വസ്തുക്കളുമായി പോലീസുകാർ സ്റ്റേഷനിലേക്ക് തിരിച്ചെത്തി. അത് തുറന്നുനോക്കിയപ്പോൾ അതിലെ കാഴ്ച ദയനീയമായിരുന്നു. ഒരു പെൺകുട്ടിക്ക് ധരിക്കുവാൻ ആവശ്യമായ എല്ലാ വസ്ത്രങ്ങളും ഒരു ബ്രഷ്, പേസ്റ്റ് ഒരു ചെറിയ കുപ്പി വാസന പൗഡർ എന്നിവയാണ് അതിലുണ്ടായിരുന്നത്. ഏതോ ദുരവസ്ഥയിൽ നിന്നും തന്റെ മകളെ കണ്ടെത്തി എന്ന പ്രതീക്ഷ ആയിരിക്കാം ആ ഉമ്മയെ ഈ വസ്തുക്കൾ തന്നയക്കാൻ പ്രേരിപ്പിച്ചത്. തൻ്റെ മകൾ മണ്ണിൽ അലിഞ്ഞു ചേർന്ന കാര്യം ആ ഉമ്മയുണ്ടോ അറിയുന്നു? ഒരു മാതാവിനു മാത്രമല്ലേ അത്തരം പ്രതീക്ഷകൾ വച്ചു പുലർത്താൻ പറ്റൂ..ഔദ്യോഗിക ജീവിതത്തിൽ പലപ്പോഴും പല രീതിയിലുള്ള സംഭവങ്ങൾ അഭിമുഖീകരിക്കേണ്ടി വന്നിട്ടുണ്ടെങ്കിലും ആ ഉമ്മയുടെ പ്രതീക്ഷ ഒരു തീരാ വേദനയായി അവശേഷിക്കും. ദൈവം അവരുടെ മനസ്സിന് ശാന്തി നൽകട്ടെ

The post സുബീറ ഫർഹത്ത് വധക്കേസ് തെളിയിച്ച അന്വേഷണ സംഘത്തിലെ ഉദ്യോഗസ്ഥൻ്റെ കുറിപ്പ് വൈറലാകുന്നു appeared first on Valanchery Online.

സുബീറയുടെ കൊലപാതകം : പ്രതിയുടെ കസ്റ്റഡി കാലാവധി ഇന്ന് അവസാനിക്കും

വളാഞ്ചേരിക്കാരൻ — Sat, 24 Apr 2021 08:12:32 +0000

വളാഞ്ചേരി : സുബീറ ഫർഹത്തിനെ ശ്വാസംമുട്ടിച്ച് കൊലപ്പെടുത്തി കുഴിച്ചുമൂടിയ സംഭവത്തിൽ റിമാൻഡിലായ പ്രതിയെ തെളിവെടുപ്പിനായി അനുവദിച്ച കസ്റ്റഡി കാലാവധി ശനിയാഴ്ച അവസാനിക്കും. യുവതിയെ കൊന്നത് സ്വർണാഭരണം കവരാനായിരുന്നു എന്ന് പ്രതി സമ്മതിച്ചിട്ടുണ്ടങ്കിലും കവർന്നെടുത്ത ആഭരണം വീണ്ടെടുക്കാൻ പോലീസിന് കഴിഞ്ഞിട്ടില്ല. പ്രതിയിൽനിന്നും ചില പ്രധാനവിവരങ്ങൾ അറിയാനുള്ളതിനാൽ വെള്ളിയാഴ്ച തെളിവെടുപ്പുണ്ടായില്ലെന്ന് വളാഞ്ചേരി സ്‌റ്റേഷൻ എസ്.എച്ച്.ഒ. പി.എം. ഷമീർ പറഞ്ഞു.

അതിനിടെ യുവതിയുടെ ആഭരണം വളാഞ്ചേരിയിൽ വിൽപ്പന നടത്തുകയോ പണയം വെക്കുകയോ ചെയ്തതായി സൂചനയുണ്ട്. വ്യാഴാഴ്ചനടന്ന തെളിവെടുപ്പിൽ യുവതിയുടെ ഷോൾഡർബാഗ് ചെങ്കൽക്വാറിയിൽനിന്ന് കണ്ടെടുത്തു. കൂടാതെ പ്രതി കൃത്യം നടത്തുന്ന സമയത്ത് ധരിച്ചിരുന്ന വസ്ത്രം, മൃതദേഹം കുഴിച്ചിടാൻ ഉപയോഗിച്ച കൈക്കോട്ട് എന്നിവയും ലഭിച്ചിരുന്നു. യുവതിയുടെ മൊബൈൽഫോൺ കുഴൽകിണറിലേക്കിട്ടതിനാൽ അത് എടുക്കാനായിട്ടില്ല.

The post സുബീറയുടെ കൊലപാതകം : പ്രതിയുടെ കസ്റ്റഡി കാലാവധി ഇന്ന് അവസാനിക്കും appeared first on Valanchery Online.

സുബീറ ഫർഹത്ത് വധം; തെളിവെടുപ്പ് തുടരുന്നു, സ്വർണം കണ്ടെത്താനായില്ല-വീഡിയോ

വളാഞ്ചേരിക്കാരൻ — Thu, 22 Apr 2021 11:10:47 +0000

ആതവനാട്: ആതവനാട് ചോറ്റൂരിലെ സൂബീറ ഫർഹത്തിൻ്റെ വധവുമായി ബന്ധപ്പെട്ട് പിടിയിലായ പ്രതി അൻവറുമായി പൊലീസ് തെളിവെടുപ്പ് തുടരുന്നു. ഇന്ന് നടന്ന തെളിവെടുപ്പിലും പ്രതി കവർന്ന സ്വർണം കണ്ടെത്താനായിട്ടില്ല. അതേസമയം പെൺകുട്ടിയുടെ ഹാന്റ് ബാഗും ചോറ്റ് പാത്രവും കണ്ടെടുത്തു. പെൺകുട്ടിയുടെ മൊബൈൽ ഫോൺ കുഴൽ കിണറില്‍ എറിഞ്ഞുവെന്ന് പ്രതി തന്നെ പൊലീസിനോട് പറഞ്ഞു.സ്വര്‍ണം ലക്ഷ്യമിട്ടാണ് പെണ്‍കുട്ടിയെ കൊലപ്പെടുത്തിയതെന്ന് പ്രതി അന്‍വര്‍ ഇന്നലെ പൊലീസിന് മൊഴി നല്‍കിയിരുന്നു. കേസില്‍ നിര്‍ണായകമായേക്കാവുന്ന ഈ സ്വര്‍ണം ഇതുവരെ പൊലീസിന് കണ്ടെത്താനായിട്ടില്ല. മെറ്റല്‍ ഡിറ്റക്ടറടക്കം ഉപയോഗിച്ച് സ്വര്‍ണം കണ്ടെത്താനുള്ള തീവ്രശ്രമത്തിലാണ് പൊലീസ്. അതേസമയം ഇന്നലെ കോടതിയില്‍ ഹാജരാക്കിയ പ്രതിയെ അഞ്ച് ദിവസത്തേക്ക് പൊലീസ് കസ്റ്റഡിയില്‍ വിട്ടു. കൃത്യം ചെയ്യുന്നതിനിടയ്ക്ക് മൊബൈല്‍ ഫോണ്‍ റിങ് ചെയ്തെന്നും സാങ്കേതികമായി പരിജ്ഞാനമില്ലാത്തതില്‍ കുഴല്‍കിണറിലെറിഞ്ഞെന്നുമാണ് പ്രതി പൊലീസിന് മൊഴി നല്‍കിയത്. ഈ മൊബൈല്‍ ഫോണ്‍ കണ്ടെത്താനുള്ള ശ്രമത്തിലാണ് പൊലീസ്.

The post സുബീറ ഫർഹത്ത് വധം; തെളിവെടുപ്പ് തുടരുന്നു, സ്വർണം കണ്ടെത്താനായില്ല-വീഡിയോ appeared first on Valanchery Online.

സുബീറ ഫർഹത്ത് വധം; പ്രതി പിടിയിൽ

വളാഞ്ചേരിക്കാരൻ — Wed, 21 Apr 2021 07:09:15 +0000

ആതവനാട്: ആതവനാട് ചോറ്റൂരിലെ കിഴക്കെ പറമ്പാട്ട് കബീറിൻ്റെ മകള്‍ സുബീറ ഫര്‍ഹത്തിൻ്റെ (21) മരണം കൊലപാതകമെന്ന് പോലീസ്. സംഭവവുമായി ബന്ധപ്പെട്ട് ഒരാൾ പിടിയിൽ. ചോറ്റൂർ സ്വദേശി പറമ്പൻ അൻവറിനെ (40) തിരൂർ ഡിവൈ.എസ്.പി കെ.എസ്. സുരേഷ് ബാബുവിൻ്റെ നേതൃത്വത്തിൽ അന്വേഷണസംഘം അറസ്റ്റ് ചെയ്തു. അൻവർ കാര്യസ്ഥനായ തെങ്ങിൻതോപ്പിലാണ് മണ്ണിട്ട് മൂടീയ നിലയിൽ മൃതദേഹം കണ്ടെത്തിയത്. മൃതേദഹം ലഭിച്ച തോട്ടം നോക്കിനടത്തുന്നയാളാണ് പ്രതി. യുവതി പീഡനത്തിനിരയായിട്ടുണ്ടോയെന്നതിൽ പോസ്റ്റ്മോർട്ടത്തിന് ശേഷം വ്യക്തത വരുമെന്നും പോലീസ് പറഞ്ഞു. ഏതാനും ദിവസമായി പ്രതി പൊലീസ് നിരീക്ഷണത്തിലായിരുന്നു. കസ്റ്റഡിയിലെടുത്ത അൻവറിനെ ചോദ്യം ചെയ്തതിലൂടെയാണ് മൃതദേഹം കുഴിച്ചിട്ട സ്ഥലം പൊലീസ് മനസ്സിലാക്കിയത്. തുടർന്ന് മണ്ണുമാന്തി യന്ത്രം ഉപയോഗിച്ച് മണ്ണ് നീക്കം ചെയ്തപ്പോഴാണ് മൃതദേഹാവശിഷ്ടം ലഭിച്ചത്. പ്രതിയെ ബുധനാഴ്ച സംഭവസ്ഥലത്ത് കൊണ്ടുവന്ന് തെളിവെടുപ്പുനടത്തി. തുടർന്ന് കോടതിയിൽ ഹാജരാക്കും.

The post സുബീറ ഫർഹത്ത് വധം; പ്രതി പിടിയിൽ appeared first on Valanchery Online.