station Archives - Valanchery Online

കുറ്റിപ്പുറം ഉൾപ്പടെ മൂന്ന് റെയിൽവേ സ്റ്റേഷനുകളിൽ സി.സി.ടി.വി. ക്യാമറകൾ ഏപ്രിലിൽ സ്ഥാപിക്കും

വളാഞ്ചേരിക്കാരൻ — Fri, 07 Mar 2025 01:53:32 +0000

കുറ്റിപ്പുറം : റെയിൽവേ പാലക്കാട് ഡിവിഷന് കീഴിലെ കുറ്റിപ്പുറം, കൊയിലാണ്ടി, ഒറ്റപ്പാലം റെയിൽവേസ്റ്റേഷനുകളിൽ സി.സി.ടിവി. ക്യാമറകൾ ഏപ്രിലിൽ സ്ഥാപിക്കും. ബുള്ളറ്റ് ക്യാമറ, ഡോം ക്യാമറ, യു.എച്ച്.ഡി. ക്യാമറ, പി.ടി. സെഡ് ക്യാമറ എന്നീ അതിനൂതനമായ 40 ക്യാമറകളാണ് ഈ റെയിൽവേ സ്റ്റേഷനുകളിൽ സ്ഥാപിക്കുന്നത്. ക്യാമറകൾ സ്ഥാപിക്കുന്നതിന്റെ വയറിങ് ജോലികൾ പൂർത്തിയാക്കിയിട്ട് മാസങ്ങൾ കഴിഞ്ഞു. എന്നാൽ ക്യാമറകൾ ലഭ്യമാകാത്തതാണ് പദ്ധതി പൂർത്തിയാക്കാൻ തടസ്സമായത്.

എന്നാൽ ഇപ്പോൾ ക്യാമറകൾ ഈ മാസാവസാനത്തോടെ ലഭ്യമാകുമെന്നാണ് റെയിൽവേ അധികൃതർക്ക് ലഭ്യമായ വിവരം. റെയിൽവേ നേരിട്ടുതന്നേയാണ് ക്യാമറകൾ സ്ഥാപിക്കുന്നത്. സി.സി.ടിവി. ക്യാമറകൾ ഇല്ലാത്തതിനാൽ ഈ റെയിൽവേസ്റ്റേഷനുകളിൽ നടക്കുന്ന കുറ്റകൃത്യങ്ങളുടെ തെളിവുകൾ കൃത്യമായി ആർ.പി.എഫിനും പോലീസിനും ലഭിക്കാത്തത് കേസന്വേഷണത്തെ കാര്യമായി ബാധിക്കുന്നുണ്ട്. മംഗള എക്സ്പ്രസ് വരുന്ന സമയങ്ങളിൽ കുറ്റിപ്പുറം റെയിൽവേ സ്റ്റേഷന് സമീപത്തെ റെയിൽപ്പാളങ്ങൾ ചേർക്കുന്ന പോയിന്റിൽ കരിങ്കല്ലുകൾ നിറച്ചുവെയ്ക്കുന്ന സംഭവം മൂന്നുതവണ ഉണ്ടായ സാഹചര്യത്തിലാണ് കുറ്റിപ്പുറത്ത് സി.സി.ടിവി. ക്യാമറകൾ സ്ഥാപിക്കാൻ തീരുമാനമുണ്ടായത്.

The post കുറ്റിപ്പുറം ഉൾപ്പടെ മൂന്ന് റെയിൽവേ സ്റ്റേഷനുകളിൽ സി.സി.ടി.വി. ക്യാമറകൾ ഏപ്രിലിൽ സ്ഥാപിക്കും appeared first on Valanchery Online.

സ്വാതന്ത്ര ദിനത്തോടനുബന്ധിച്ച് വളാഞ്ചേരി പോലീസ് സ്റ്റേഷനിൽ പതാക ഉയർത്തൽ ചടങ്ങ് നടന്നു

വളാഞ്ചേരിക്കാരൻ — Sat, 15 Aug 2020 04:47:51 +0000

വളാഞ്ചേരി: വളാഞ്ചേരി പോലീസ് സ്റ്റേഷനിലെ സ്വാതന്ത്ര്യ ദിനത്തോടനുബന്ധിച്ച് നടന്ന പതാക ഉയർത്തൽ ലളിതമായ ചടങ്ങിൽ കോവിഡ് മാനദണ്ഡങ്ങൾ പാലിച്ച് കൊണ്ട് രാവിലെ 8.00 മണിക്ക് എസ്.ഐ കെ.കെ രാജേഷ് നിർവ്വഹിച്ചു. സ്റ്റേഷനിലെ സേനാംഗങ്ങളായ അനീഷ്, രാധാകൃഷ്ണൻ, സുബീഷ്, രജ്ഞിത്, ഷെഫീഖ്, സ്പെഷ്യൽ ബ്രാഞ്ച് ഓഫീസർ നസീർ തീരൂർക്കാട് എന്നിവർ പങ്കെടുത്തു.

The post സ്വാതന്ത്ര ദിനത്തോടനുബന്ധിച്ച് വളാഞ്ചേരി പോലീസ് സ്റ്റേഷനിൽ പതാക ഉയർത്തൽ ചടങ്ങ് നടന്നു appeared first on Valanchery Online.

തൃശൂര്‍ റെയിഞ്ചിലെ മികച്ച പോലീസ് സ്റ്റേഷന്‍ എന്ന ബഹുമതി പെരിന്തല്‍മണ്ണ പോലീസ് സ്റ്റേഷന്

വളാഞ്ചേരിക്കാരൻ — Sat, 26 Jan 2019 18:32:44 +0000

തൃശൂര്‍ റെയിഞ്ചിലെ മികച്ച പോലീസ് സ്റ്റേഷനായി പെരിന്തല്‍മണ്ണ പോലീസ് സ്റ്റേഷനെ തിരഞ്ഞെടുത്തു. തൃശൂര്‍ തേക്കിന്‍കാട് മൈതാനിയില്‍ ഇന്ന് കാലത്ത് നടന്ന റിപ്പബ്ലിക് ദിനാഘോഷ ചടങ്ങില്‍ ബഹുമാനപ്പെട്ട തൃശൂര്‍ റെയിഞ്ച് ഐ.ജി ശ്രീ എം.ആര്‍ അജിത്ത്കുമാര്‍ ഐ.പി.എസ് അവര്‍കളില്‍ നിന്ന് പെരിന്തല്‍മണ്ണ പോലീസ് ഇന്‍സ്പെക്ടര്‍ ശ്രീ ടി.എസ് ബിനു മികച്ച സ്റ്റേഷനുള്ള ബഹുമതി ഏറ്റുവാങ്ങി. ഏറ്റവും മികച്ച വൃത്തിയും ശുചിത്വവും പരിഗണിച്ചാണ് സ്റ്റേഷനെ ബഹുമതിക്കായി തിരഞ്ഞെടുത്തത്. കഴിഞ്ഞ ദിവസം മലപ്പുറം ജില്ലാ പോലീസ് ആസ്ഥാനത്ത് നടന്ന ചടങ്ങില്‍ ജില്ലാ പോലീസ് മേധാവി ശ്രീ. പ്രതീഷ്കുമാര്‍ ഐ.പി.എസ് അവര്‍കള്‍ പെരിന്തല്‍മണ്ണ സ്റ്റേഷനെ ജില്ലയിലെ മികച്ച സ്റ്റേഷനായി തിരഞ്ഞെടുത്ത് മുഖ്യമന്തിയുടെ ബഹുമതിക്കായി നിര്‍ദ്ദേശിക്കുകയായിരുന്നു.

തൃശൂര്‍ റെയിഞ്ചിലെ മലപ്പുറം, പാലക്കാട് തൃശൂര്‍ സിറ്റി തൃശൂര്‍ റൂറല്‍ ജില്ലകളില്‍ നിന്നുള്ള നൂറോളം പോലീസ് സ്റ്റേഷനുകളെ പിന്തള്ളിയാണ് പെരിന്തല്‍മണ്ണ പോലീസ് സ്റ്റേഷന്‍ കേരള മുഖ്യമന്തിയുടെ ബഹുമതി കരസ്തമാക്കിയത്. പെരിന്തല്‍മണ്ണ പോലീസ് സ്റ്റേഷനോടൊപ്പം പൊന്നാനി പോലീസ് സ്റ്റേഷന്‍, തൃശൂര്‍ ജില്ലയിലെ വലപ്പാട് പോലീസ് സ്റ്റേഷന്‍ എന്നിവയും റെയിഞ്ചിലെ മികച്ച പോലീസ് സ്റ്റേഷന്‍ എന്ന ബഹുമതിക്ക് അര്‍ഹമായി.

പെരിന്തല്‍മണ്ണ പോലീസ് സ്റ്റേഷന്‍റെ വിജയ കുതിപ്പിന് ചുക്കാന്‍ പിടിച്ച പെരിന്തല്‍മണ്ണ പോലീസ് ഇന്‍സ്പെക്ടര്‍ ശ്രീ ടി.എസ് ബിനു, പ്രവര്‍ത്തനങ്ങള്‍ക്ക് എന്നും പിന്തുണയായി നിന്ന മലപ്പുറം ജില്ലാ പോലീസ് മേധാവി ശ്രീ. പ്രതീഷ്കുമാര്‍ ഐ.പി.എസ്, മുന്‍ മലപ്പുറം ജില്ലാ പോലീസ് മേധാവി ശ്രീ. ദേബേഷ്കുമാര്‍ ബെഹ്റ ഐ.പി.എസ്, പെരിന്തല്‍മണ്ണ ഡി.വൈ.എസ്.പി എം.പി മോഹനചന്ദ്രന്‍, പെരിന്തല്‍മണ്ണ സബ്-ഇന്‍സ്പെക്ടര്‍ മഞ്ജിത്ത്ലാല്‍ പി.എസ്, സ്റ്റേഷനിലെ മറ്റ് പോലീസ് ഉദ്യോഗസ്ഥര്‍ എന്നിവരുടെ ശ്രമ ഫലമായാണ് പെരിന്തല്‍മണ്ണ പോലീസ് സ്റ്റേഷന് ഈ അഭിമാനനേട്ടം കൈവരിക്കാനായത്.

The post തൃശൂര്‍ റെയിഞ്ചിലെ മികച്ച പോലീസ് സ്റ്റേഷന്‍ എന്ന ബഹുമതി പെരിന്തല്‍മണ്ണ പോലീസ് സ്റ്റേഷന് appeared first on Valanchery Online.

ഹംസഫറിനും തിരൂരിൽ സ‌്റ്റോപ്പില്ല; പ്രക്ഷോഭം കനക്കുന്നു

വളാഞ്ചേരിക്കാരൻ — Mon, 02 Jul 2018 01:18:51 +0000

തിരൂർ: അന്ത്യോദയ അടക്കമുള്ള ട്രെയിനുകൾക്ക് സ്റ്റോപ്പ് അനുവദിക്കണമെന്നാവശ്യപ്പെട്ട് തിരൂരിൽ പ്രക്ഷോഭം കനക്കുന്നതിനിടയിൽ വ്യാഴാഴ‌്ച ആരംഭിക്കുന്ന ഹംസഫർ ട്രെയിനിനും ജില്ലയിൽ സ‌്റ്റോപ്പില്ല.ഗാന്ധിധാം – തിരുനെൽവേലി ഹംസഫർ എക്സ്പ്രസിനാണ‌് തിരൂരിൽ സ്റ്റോപ്പ് അനുവദിക്കാൻ റെയിൽവേ തയ്യാറാകാതിരുന്നത‌്.

കഴിഞ്ഞ വർഷത്തെ റെയിൽവേ ടൈംടേബിളിൽ പ്രഖ്യാപിച്ച പ്രതിവാര ട്രെയിനാണിത‌്. എല്ലാ തിങ്കളാഴ്ചയും പകൽ 1.50ന‌് ഗാന്ധിധാമിൽനിന്നും പുറപ്പെട്ട് ബുധനാഴ്ച രാവിലെ 4.05ന് എറണാകുളത്തും 7.45ന് തിരുവനന്തപുരത്തും 11.30ന് തിരുനെൽവേലിയിലുമെത്തും. വ്യാഴാഴ്ചകളിൽ രാവിലെ 7.45ന് തിരുനെൽവേലിയിൽനിന്ന് പുറപ്പെട്ട് ശനിയാഴ്ച 4.40ന് ഗാന്ധിധാമിലെത്തും.

കൊങ്കൺവഴിയാണ് ട്രെയിൻ സർവീസ് നടത്തുക. അഹമ്മദബാദ്, വഡോദര, സൂറത്ത്, പനവേൽ, വസായ് റോഡ്, രത്നഗിരി, മഡ്ഗാവ്, കാർവാർ‍, മംഗളൂരു ജങ്ഷൻ, കോഴിക്കോട്, ഷൊർണൂർ, എറണാകുളം, തിരുവനന്തപുരം എന്നിവിടങ്ങളിൽ മാത്രമാണ് സ്റ്റോപ്പുകൾ അനുവദിച്ചിരിക്കുന്നത്.
ഹംസഫർ എക്സ്പ്രസിനും തിരൂരിൽ സ്റ്റോപ്പ് അനുവദിക്കാത്തതോടെ തിരൂരിൽ നിർത്താതെയോടുന്ന ട്രെയിനുകളുടെ എണ്ണം 34 ആയി. കേരളത്തിൽ മാത്രമോടുന്ന അന്ത്യോദയ എക്സ്പ്രസിനടക്കം സ്റ്റോപ്പ് അനുവദിക്കാൻ തയ്യാറാകാത്ത റെയിൽവേ ഹംസഫർ ദീർഘദൂര ട്രെയിനിന് സ്റ്റോപ്പ് അനുവദിക്കുമോ എന്നാണ് നാട്ടുകാരുടെ ചോദ്യം.

The post ഹംസഫറിനും തിരൂരിൽ സ‌്റ്റോപ്പില്ല; പ്രക്ഷോഭം കനക്കുന്നു appeared first on Valanchery Online.

കുറ്റിപ്പുറം റെയില്‍വെ സ്റ്റേഷനെ പരിശോധനയ്ക്കിറങ്ങിയ ജനറല്‍ മാനേജരും അവഗണിച്ചു.

വളാഞ്ചേരിക്കാരൻ — Tue, 19 Nov 2013 04:00:27 +0000

പരിശോധനയ്ക്കിറങ്ങിയ ജനറല്‍ മാനേജരും കുറ്റിപ്പുറം റെയില്‍വെ സ്റ്റേഷനെ അവഗണിച്ചു. ദക്ഷിണ റെയില്‍വെ ജനറല്‍ മാനേജര്‍ രാഖേഷ് മിശ്രയാണ് റെയില്‍വെ സ്റ്റേഷനുകളിലെ പരിശോധനയ്ക്കിടയിലും കുറ്റിപ്പുറത്തെ അവഗണിച്ചത്. ജനറല്‍ മാനേജര്‍ സഞ്ചരിച്ച പ്രത്യേക വണ്ടി സിഗ്‌നല്‍ കിട്ടാനായി മാത്രമാണ് കുറ്റിപ്പുറത്ത് നിര്‍ത്തിയത്.

തിങ്കളാഴ്ച രാവിലെ കോഴിക്കോട്ടുനിന്നാണ് ജനറല്‍ മാനേജരുടെ പരിശോധന തുടങ്ങിയത്. ഫറോക്ക്, കടലുണ്ടി, പരപ്പനങ്ങാടി, താനൂർ, തിരൂർ, തിരുനാവായ, പട്ടാമ്പി എന്നീ സ്റ്റേഷനുകളില്‍ അദ്ദേഹം പരിശോധന നടത്തി. ദേശീയപാതയോട് ചേര്‍ന്നുള്ള ജില്ലയിലെ ഏക സ്റ്റേഷനാണ് കുറ്റിപ്പുറം. ദിനംപ്രതി ആയിരക്കണക്കിനാളുകള്‍ ആശ്രയിക്കുന്ന പ്രധാന സ്റ്റേഷനുകളിലൊന്നായിട്ടും ജനറല്‍മാനേജര്‍ സന്ദര്‍ശിക്കാത്തത് വ്യാപക പ്രതിഷേധമാണുണ്ടാക്കിയത്.

ഉച്ചയ്ക്ക് 1.30ഓടെയാണ് ജനറല്‍ മാനേജര്‍ ഉള്‍പ്പെട്ട സംഘം സഞ്ചരിച്ച പ്രത്യേകവണ്ടി കുറ്റിപ്പുറത്തെത്തിയത്. ഇതിന് മുമ്പേ മറ്റൊരു വണ്ടി കടന്നുപോയതിനാല്‍ സിഗ്‌നല്‍ ലഭിക്കാനായി ഏഴ് മിനിറ്റ് വണ്ടി കുറ്റിപ്പുറത്ത് നിര്‍ത്തി. എന്നിട്ടും സംഘത്തിലെ ആരുംതന്നെ സ്റ്റേഷനില്‍ ഇറങ്ങി പരിശോധന നടത്താന്‍ തയ്യാറായില്ല.

സ്റ്റേഷന്റെ വികസനം ആവശ്യപ്പെട്ട് നിവേദനങ്ങളുമായി പാസഞ്ചേഴ്‌സ് അസോസിയേഷന്‍, വ്യാപാരി സംഘടനാ പ്രതിനിധികള്‍ എന്നിവരും പ്രാദേശിക രാഷ്ട്രീയ നേതാക്കളും സ്റ്റേഷനില്‍ കാത്തുനിന്നു.

ജനറല്‍ മാനേജര്‍ പുറത്തിറങ്ങുന്നില്ലെന്നറിഞ്ഞതോടെ കാത്തുനിന്നവര്‍ നിവേദനങ്ങളുമായി തീവണ്ടിക്കരികിലെത്തിയെങ്കിലും വാതില്‍ തുറക്കാന്‍ അദ്ദേഹം തയ്യാറായില്ല. പിന്നീട് ആർ.പി.എഫ് ഉദ്യോഗസ്ഥന്‍ വഴി ജനറല്‍ മാനേജരുടെ പേഴ്‌സണല്‍ സെക്രട്ടറി പ്രഭാകരന് നിവേദനം നല്‍കുകയായിരുന്നു.

Summary: Southern Railway general manager Rakesh Mishra avoided Kuttippuram railways station during his inspection in the railways stations started from Kozhikode on monday.

The post കുറ്റിപ്പുറം റെയില്‍വെ സ്റ്റേഷനെ പരിശോധനയ്ക്കിറങ്ങിയ ജനറല്‍ മാനേജരും അവഗണിച്ചു. appeared first on Valanchery Online.

കുറ്റിപ്പുറം റെയിൽ‌വെ സ്റ്റേഷനോടുള്ള അവഗണനക്കെതിരെ ആക്ഷൻ കമ്മിറ്റി പ്രക്ഷോഭത്തിനൊരുങ്ങുന്നു

വളാഞ്ചേരിക്കാരൻ — Wed, 06 Nov 2013 15:34:56 +0000

റെയില്‍വെ സ്റ്റേഷനോട് അധികൃതര്‍ കാണിക്കുന്ന അവഗണന അവസാനിപ്പിക്കണമെന്നാവശ്യപ്പെട്ട് ശക്തമായ പ്രക്ഷോഭം സംഘടിപ്പിക്കാന്‍ സര്‍വകക്ഷി ആക്ഷന്‍ കമ്മിറ്റിയോഗം തീരുമാനിച്ചു. ദീര്‍ഘദൂര വണ്ടികള്‍ക്ക് സ്റ്റോപ്പ് അനുവദിക്കുക, പ്രാഥമിക സൗകര്യങ്ങളൊരുക്കുക, പ്ലാറ്റ്‌ഫോമിന് മേല്‍ക്കൂര നിര്‍മിക്കുക തുടങ്ങിയ ആവശ്യങ്ങള്‍ ഉന്നയിച്ചാണ് പ്രക്ഷോഭം. വിപുലമായ സമരപ്രഖ്യാപന കണ്‍വെന്‍ഷന്‍ വിളിച്ചുചേര്‍ക്കാനും യോഗം തീരുമാനിച്ചു.

കുറ്റിപ്പുറം വ്യാപാരഭവനില്‍ ചേര്‍ന്ന യോഗം ഡോ. സി.പി.കെ. ഗുരുക്കള്‍ ഉദ്ഘാടനംചെയ്തു. എ.എ. കുഞ്ഞാപ്പുട്ടി അധ്യക്ഷതവഹിച്ചു. കെ. രാമചന്ദ്രന്‍, കെ.പി. അശോകന്‍, വി.വി. ഭാസി, ടി.വി. അബ്ദുള്ളക്കുട്ടി, ടി. രാമനാഥന്‍, എ.എ. സുല്‍ഫിക്കര്‍ എന്നിവര്‍ പ്രസംഗിച്ചു.

Summary: The all party action council has decided to start protests against the Railway’s ignore towards the Kuttippuram railway station

The post കുറ്റിപ്പുറം റെയിൽ‌വെ സ്റ്റേഷനോടുള്ള അവഗണനക്കെതിരെ ആക്ഷൻ കമ്മിറ്റി പ്രക്ഷോഭത്തിനൊരുങ്ങുന്നു appeared first on Valanchery Online.

സ്റ്റോപ്പനുവദിക്കുന്നതിൽ കുറ്റിപ്പുറത്തിനോട് പതിവുപോലെ അവഗണന

വളാഞ്ചേരിക്കാരൻ — Sat, 26 Oct 2013 15:09:30 +0000

കുറ്റിപ്പുറം റെയില്‍വേ സ്റ്റേഷനോട് വീണ്ടും അധികൃതരുടെ അവഗണന. ഇന്റര്‍സിറ്റി എക്‌സ്പ്രസ്സിന് പരപ്പനങ്ങാടിയില്‍ സ്റ്റോപ്പ് അനുവദിച്ചപ്പോഴും ജില്ലയിലെ പ്രധാന സ്റ്റേഷനായ കുറ്റിപ്പുറത്തെ അധികൃതര്‍ തഴഞ്ഞു. മംഗലാപുരം-കോയമ്പത്തൂര്‍ ഇന്റര്‍സിറ്റി എക്‌സ്പ്രസ്സിനാണ് പരപ്പനങ്ങാടിയില്‍ പുതിയ സ്റ്റോപ്പ് അനുവദിച്ചത്. ഈ വണ്ടിക്ക് കുറ്റിപ്പുറത്ത് സ്റ്റോപ്പ് അനുവദിക്കണമെന്ന ആവശ്യം ശക്തമായിരിക്കുമ്പോഴാണ് പ്രതീക്ഷകള്‍ പാളംതെറ്റിച്ചുകൊണ്ട് വണ്ടി പരപ്പനങ്ങാടിയില്‍ നിര്‍ത്താന്‍ അനുമതിയായത്. തിരൂരില്‍ മാത്രമാണ് ജില്ലയില്‍ ഈ വണ്ടിക്ക് സ്റ്റോപ്പുണ്ടായിരുന്നത്. രാവിലെ 8.30നും വൈകീട്ട് 4.10നുമാണ് ഇന്റര്‍സിറ്റി എക്‌സ്പ്രസ് കുറ്റിപ്പുറത്തുകൂടി കടന്നുപോകുന്നത്. മറ്റ് ജില്ലകളിലെല്ലാം രണ്ട് സ്റ്റോപ്പുകള്‍ ഉണ്ടെങ്കിലും ജില്ലയില്‍ ഒരിടത്ത് മാത്രമാണ് വണ്ടി നിര്‍ത്തിയിരുന്നത്. ബസ്സ്റ്റാന്‍ഡിനോട് ചേര്‍ന്ന് കിടക്കുന്ന സ്റ്റേഷനായതിനാല്‍ കുറ്റിപ്പുറത്ത് വണ്ടി നിര്‍ത്തുന്നത് യാത്രക്കാര്‍ക്കും ഏറെ സൗകര്യപ്രദമാണ്. തിരുനാവായ നാവാമുകുന്ദക്ഷേത്രം, കാടാമ്പുഴ ഭഗവതിക്ഷേത്രം, ഗുരുവായൂര്‍ക്ഷേത്രം, പുത്തന്‍പള്ളി ജാറം, കാര്‍ഷിക എന്‍ജി. കോളേജ്, എം.ഇ.എസ് എന്‍ജി. കോളേജ് എന്നിവിടങ്ങളിലേക്കുള്ളവരെല്ലാം കുറ്റിപ്പുറം സ്റ്റേഷനെയാണ് ആശ്രയിക്കുന്നത്. പാസഞ്ചര്‍ അസോസിയേഷന്‍ ഭാരവാഹികള്‍ എം.പിയുമായി ബന്ധപ്പെട്ടെങ്കിലും സ്റ്റോപ്പ് അനുവദിക്കാന്‍ നിര്‍വാഹമില്ലെന്ന മറുപടിയാണത്രെ ലഭിച്ചത്. തുടര്‍ന്ന് ഇ. ശ്രീധരനെ സന്ദര്‍ശിച്ച ഭാരവാഹികള്‍ക്ക് യാത്രക്കാര്‍ ഒപ്പിട്ട നിവേദനം നല്‍കിയാല്‍ സ്റ്റോപ്പ് അനുവദിക്കാനുള്ള ശ്രമങ്ങള്‍ നടത്താമെന്നുള്ള ഉറപ്പ് ലഭിച്ചിരുന്നു. ഇതിനുള്ള തയ്യാറെടുപ്പുകള്‍ നടക്കുന്നതിനിടെയാണ് പരപ്പനങ്ങാടിയില്‍ സ്റ്റോപ്പ് അനുവദിച്ച് റെയില്‍വേയുടെ ഉത്തരവുണ്ടായിരിക്കുന്നത്.

Summary: The railway continue ignoring the requirements of the Kuttippuram station in allotting stops,

The post സ്റ്റോപ്പനുവദിക്കുന്നതിൽ കുറ്റിപ്പുറത്തിനോട് പതിവുപോലെ അവഗണന appeared first on Valanchery Online.

കുറ്റിപ്പുറത്ത് തീവണ്ടിയുടെ എഞ്ചിനിൽ കയറി ഹോൺ മുഴക്കിയ യുവാവ് പിടിയിൽ

വളാഞ്ചേരിക്കാരൻ — Wed, 07 Aug 2013 11:36:38 +0000

നിര്‍ത്തിയിട്ടിരുന്ന തീവണ്ടിയുടെ എന്‍ജിന്‍മുറിയില്‍ കയറി ഹോണ്‍ മുഴക്കിയ യുവാവ് അറസ്റ്റിൽ. ഇരിമ്പിളിയം സ്വദേശി പെരിങ്ങാട്ടു തൊടിയില്‍ പി.എ. അബ്ദുള്‍ലത്തീഫിനെ(34)യാണ് തിരൂര്‍ റെയില്‍വേ സുരക്ഷാസേന എ.എസ്.ഐ എ.പി. ദീപക് അറസ്റ്റുചെയ്തത്. കുറ്റിപ്പുറത്തുവെച്ച് എന്‍ജിനില്‍ കയറി യുവാവ് ഹോണ്‍ മുഴക്കിയതോടെ റെയില്‍വേ ഉദ്യോഗസ്ഥര്‍ പിടികൂടി യുവാവിനെ റെയില്‍വേ സുരക്ഷാസേനയ്ക്ക് കൈമാറുകയായിരുന്നു. സ്റ്റേഷന്‍മാസ്റ്ററുടെ പരാതിപ്രകാരമാണ് അറസ്റ്റ് നടന്നത്. മഞ്ചേരി ജുഡീഷ്യല്‍ ഫസ്റ്റ്ക്ലാസ് മജിസ്‌ട്രേറ്റ് കോടതി (ഒന്നിൽ) ഹാജരാക്കിയ പ്രതിയെ കോടതി റിമാന്‍ഡ് ചെയ്തു. അഞ്ച് വര്‍ഷംവരെ ശിക്ഷ ലഭിക്കാവുന്ന കുറ്റമാണ് അബ്ദുള്‍ലത്തീഫ് ചെയ്തതെന്ന് ആര്‍.പി.എഫ് ഉദ്യോഗസ്ഥന്‍ പറഞ്ഞു. കുറ്റിപ്പുറത്തു നിന്ന് മംഗലാപുരത്തേക്ക് യാത്രചെയ്യാനെത്തിയതായിരുന്നു യുവാവ്.

Summary:A youth from Irimbiliyam was arrested by the Railway Protection Force for entering the engine room of a halted train and blow its horn at Kuttippuram Railway station.

The post കുറ്റിപ്പുറത്ത് തീവണ്ടിയുടെ എഞ്ചിനിൽ കയറി ഹോൺ മുഴക്കിയ യുവാവ് പിടിയിൽ appeared first on Valanchery Online.