road Archives - Valanchery Online

മലപ്പുറം ജില്ലയിൽ ദേശീയപാത 66-ന്റെ സർവീസ് റോഡുകൾ ഇനി വൺവേ;

വളാഞ്ചേരിക്കാരൻ — Tue, 11 Nov 2025 06:50:41 +0000

മലപ്പുറം: ജില്ലയിൽ ദേശീയപാത 66-ന്റെ സർവീസ് റോഡുകൾ വൺവേ ആയി മാത്രം ഉപയോഗിക്കാൻ തീരുമാനം. ജില്ലാ കളക്ടർ അധ്യക്ഷനായ റോഡ് സുരക്ഷാസമിതി യോഗമാണ് ഈ തീരുമാനമെടുത്തത്. സർവീസ് റോഡുകൾ ടു വേ ആണെന്നും അതേസമയം അതത് പ്രാദേശിക ഭരണകൂടങ്ങൾക്ക് അതിൽ മാറ്റംവരുത്താൻ അധികാരമുണ്ടെന്നും ദേശീയപാത അതോറിറ്റി നേരത്തേ വിവരാവകാശനിയമപ്രകാരം അറിയിച്ചിരുന്നു. ഇപ്പോൾ ജില്ലയിൽ പലയിടങ്ങളിലും സർവീസ് റോഡുകളിലൂടെ വാഹനങ്ങൾ തലങ്ങും വിലങ്ങും ഓടുന്നുണ്ട്. ഇതുകാരണം അപകടവും ഗതാഗതക്കുരുക്കും ഉണ്ടാകുന്നുണ്ട്. ആറരമീറ്റർ മാത്രം വീതിയിലാണ് കേരളത്തിൽ സർവീസ് റോഡുകൾ നിർമിച്ചിട്ടുള്ളത്. അതിൽത്തന്നെ സ്ളാബും റോഡും രണ്ടുനിരപ്പിലാണ്. അതുകൊണ്ട് രണ്ടുവാഹനങ്ങൾക്ക് അങ്ങോട്ടുമിങ്ങോട്ടും പോകാനുള്ള വീതിയില്ല. ചില ഭാഗങ്ങളിൽ ആറരമീറ്റർപോലും വീതിയില്ല. പ്രധാന കവലകളിലും അടിപ്പാലമുള്ള സ്ഥലങ്ങളിലുമെല്ലാം വലിയ ഞെരുക്കമാണ് ഇപ്പോൾത്തന്നെ അനുഭവപ്പെടുന്നത്. ഈ സാഹചര്യത്തിലാണ് സർവീസ് റോഡുകൾ വൺവേ ആക്കാൻ റോഡ് സുരക്ഷാസമിതി തീരുമാനിച്ചത്.

The post മലപ്പുറം ജില്ലയിൽ ദേശീയപാത 66-ന്റെ സർവീസ് റോഡുകൾ ഇനി വൺവേ; appeared first on Valanchery Online.

അങ്ങാടിപ്പുറം -വളാഞ്ചേരി റോഡിൽ പൊടിയിൽ പൊറുതിമുട്ടി ജനം

വളാഞ്ചേരിക്കാരൻ — Sat, 10 May 2025 17:43:48 +0000

അങ്ങാടിപ്പുറം : വളാഞ്ചേരി-അങ്ങാടിപ്പുറം റോഡ് വഴി പോകുമ്പോൾ പാലച്ചോട് എത്തിയാൽ പിന്നെ നാലു കിലോമീറ്ററോളം യാത്ര ദുസ്സഹമാണ്. പൊടിയിൽ കുളിച്ചൊരു യാത്ര. പാലച്ചോട് മുതൽ കുളത്തൂർ അമ്പലപ്പടി വരെയാണ് രൂക്ഷമായ പൊടിശല്യം. ചെറിയൊരു വാഹനം കടന്നുപോയാൽ മതി വാഹനത്തിനു പിന്നിൽനിന്ന് ഉയരുന്നു പുക പോലെ പൊടി. പിന്നെ റോഡ് മുഴുവൻ പുകപടലം. ബസും ലോറിയും അടക്കമുള്ള വലിയ വാഹനങ്ങളാണെങ്കിൽ പറയേണ്ട. എംഇഎസ് മെഡിക്കൽ കോളേജ് സ്ഥിതിചെയ്യുന്നത് മാലാപറമ്പിലേക്കെത്താൻ വളാഞ്ചേരി ഭാഗത്തുള്ളവർക്കും മലപ്പുറം ഭാഗത്തുള്ളവർക്ക് എളുപ്പവഴിയാണിത്. സ്ഥിരമായി ആംബുലൻസുകൾ കടന്നുപോകുന്ന റോഡ്.

റോഡ് പുനർനിർമാണത്തിന്റെ ഭാഗമായി മെറ്റൽ വിരിച്ചിട്ട് ഒരു മാസത്തിലധികമായെന്നാണ് നാട്ടുകാർ പറയുന്നത്. വെയിലും ചൂടും കാരണം പൊടിശല്യം അസഹ്യമായ അവസ്ഥയിലാണിപ്പോൾ. ചൊറിച്ചിൽ, കഫക്കെട്ട്, ശ്വാസംമുട്ടൽ, ആസ്‌മ തുടങ്ങി വിട്ടുമാറാത്ത അസുഖങ്ങളാണ് പരിസരവാസികൾക്ക്. റോഡിന്റെ വശത്തെ കടകൾ അടഞ്ഞു കിടപ്പാണ്. കച്ചവടക്കാർ പറയുന്നു ഒരു മാസമായി വല്ലപ്പോഴുമേ തുറക്കൂ. വിശ്വാസികൾക്ക് തൊട്ടടുത്ത ക്രിസ്ത്യൻ പള്ളിയിലേക്ക് പോകാനും പ്രയാസം. നിർമാണത്തിലുള്ള പുതിയ ചർച്ചിന്റെ പണി നിർത്തിവെച്ചിരിക്കുന്നു. പൊതുമരാമത്തു വകുപ്പ് തുടർച്ചയായി വണ്ടിയിൽ വെള്ളം തളിക്കുന്നുണ്ടെങ്കിലും കടുത്ത ചൂടിൽ ഇതൊന്നും ഫലവത്താകുന്നില്ല. മിനിറ്റുകൾക്കകം വീണ്ടും പൊടിമയമാകും. പൊട്ടിപ്പൊളിഞ്ഞ് ഏറെ ദുർഘടമായി കിടന്നിരുന്ന അങ്ങാടിപ്പുറം-വളാഞ്ചേരി റോഡിന്റെ പുനർനിർമ്മാണം ഘട്ടംഘട്ടമായാണ് നടക്കുന്നത്. ഒന്നാംഘട്ടത്തിൽ മൂന്നുകോടി ചെലവിൽ അങ്ങാടിപ്പുറം മുതൽ പുത്തനങ്ങാടി വരെയുള്ള നവീകരണമാണ് നടന്നത്. രണ്ടാംഘട്ടത്തിൽ പുത്തനങ്ങാടി മുതൽ മാലാപറമ്പ് വരെ അഞ്ചു കോടിയുടെ പണി നടന്നു. മൂന്നാംഘട്ടം രണ്ടു ഘട്ടങ്ങളായാണ് പൂർത്തീകരിക്കുന്നത്.

മൂന്നാംഘട്ടത്തിൽ പാലച്ചോട് മുതലാണ് നവീകരണം. മെറ്റൽ ഇട്ടതിനു ശേഷം ടാറിങ് തുടങ്ങാൻ താമസിക്കുന്നതാണ് പൊടിശല്യംകൊണ്ട് പൊറുതിമുട്ടാൻ കാരണം. ആരോഗ്യപ്രശ്‌നങ്ങൾ: ഒന്നരമാസമായി വീട്ടിൽനിന്ന് പുറത്തിറങ്ങാത്ത രോഗികളായ ഒട്ടേറെ പേരുണ്ടിവിടെ. പൊടിശല്യം കാരണം വീട്ടിലിരിക്കുകയല്ലാതെ മാർഗമില്ല. അവധിക്കാലമായതിൽ കുട്ടികൾക്ക് അനുഭവിക്കേണ്ടല്ലോ എന്നത് ആശ്വാസമാണെന്ന് പലരുടേയും അഭിപ്രായം. ചൊറിച്ചിലും കഫക്കെട്ടും ശ്വാസംമുട്ടൽ എന്നിവ വിട്ടുമാറുന്നില്ല. ആസ്‌മയുള്ളവർ വീട്ടിൽനിന്ന് പുറത്തിറങ്ങാൻ പറ്റാത്ത അവസ്ഥയാണ്. കാൻസർ അടക്കമുള്ള രോഗമുള്ളവർ ഭീതിയിലാണ് കഴിയുന്നത്. ഈ മാസം തുടക്കത്തിൽ ടാറിങ് ആരംഭിക്കും എന്നാണ് പൊതുമരാമത്ത് വകുപ്പ് അധികൃതർ പറഞ്ഞിരുന്നത് എങ്കിലും ഇതുവരേയും ടാറിങ് ആരംഭിക്കാത്തതിനാൽ പ്രതിഷേധത്തിലാണ് പ്രദേശവാസികൾ. കഴിഞ്ഞദിവസം പൊതുമരാമത്ത് വകുപ്പിന്റെ വെള്ളം സ്‌പ്രേചെയ്യുന്ന ലോറി നാട്ടുകാർ തടഞ്ഞു നിർത്തി. എല്ലാഭാഗത്തും ഒരുപോലെ നനയുന്ന രീതിയിൽ കൂടുതൽ വെള്ളം തളിക്കണമെന്നായിരുന്നു ആവശ്യം.

The post അങ്ങാടിപ്പുറം -വളാഞ്ചേരി റോഡിൽ പൊടിയിൽ പൊറുതിമുട്ടി ജനം appeared first on Valanchery Online.

വളാഞ്ചേരി നഗസഭയിൽ നവീകരണം പൂർത്തിയായ കുളമംഗലം കിഴക്കേകര കൊട്ടാരം റോഡിൻ്റെ ഉദ്ഘാടനം നടന്നു

വളാഞ്ചേരിക്കാരൻ — Fri, 25 Apr 2025 00:37:07 +0000

വളാഞ്ചേരി:-വളാഞ്ചേരി നഗസഭ 2023-24 വാർഷിക പദ്ധതിയിൽ ഉൾപ്പെടുത്തി സൈഡ് വൈഡനിംഗ് നടത്തി നവീകരിച്ച കുളമംഗലം കിഴക്കേകര കൊട്ടാരം റോഡിൻ്റെ ഉദ്ഘാടനം നഗരസഭ ചെയർമാൻ അഷ്റഫ് അമ്പലത്തിങ്ങൽ നിർവ്വഹിച്ചു.മരാമത്ത് സ്റ്റാൻ്റിംഗ് കമ്മിറ്റി ചെയർപേഴ്സൺ റൂബി ഖാലിദ് അദ്ധ്യക്ഷത വഹിച്ചു.1499000 രൂപ വിനിയോഗിച്ചാണ് വാർഡ് അതിർത്തി വരെ ആദ്യഘട്ടത്തിൽ നവീകരണം നടത്തിയത്.പൂർത്തികരണത്തിനായി രണ്ടാംഘട്ടത്തിൽ ഫണ്ട് വകയിരുത്തിയിട്ടുമുണ്ട്.വൈസ് ചെയർപേഴ്സൺ റംല മുഹമ്മദ്,സ്റ്റാൻ്റിംഗ് കമ്മിറ്റി ചെയർമാൻമാരായ മുജീബ് വാലാസി,മാരാത്ത് ഇബ്രാഹിം,കൗൺസിലർമാരായ ഈസ നബ്രത്ത്,ആബിദ മൻസൂർ,എൻ.നൂർജഹാൻ,സുബിത രാജൻ,ബദരിയ്യ മുനീർ,മുസ്തഫ മാസ്റ്റർ,ഹമീദ് ഹാജി, സെയ്ദ് കാരയിൽ, നാസർ കാരയിൽ, പത്മമകുമാർ പി.പി തുടങ്ങിയവർ സംബന്ധിച്ചു.

The post വളാഞ്ചേരി നഗസഭയിൽ നവീകരണം പൂർത്തിയായ കുളമംഗലം കിഴക്കേകര കൊട്ടാരം റോഡിൻ്റെ ഉദ്ഘാടനം നടന്നു appeared first on Valanchery Online.

വളാഞ്ചേരി മൂച്ചിക്കൽ കരിങ്കല്ലത്താണി ബൈപ്പാസ് റോഡ് പുനരുദ്ധാരണം നടത്തി

വളാഞ്ചേരിക്കാരൻ — Wed, 27 Nov 2024 14:17:58 +0000

വളാഞ്ചേരി:-വളാഞ്ചേരി നഗരസഭ 17,18 വാർഡുകളിലൂടെ കടന്നു പോകുന്നതും,ടൗണിലെ ഗതാഗത കുരുക്കിന് പരിഹാരമാകുന്നതിനുമായി 2 വർഷം മുമ്പ് വീതി കൂട്ടി പുനരുദ്ധാരണം നടത്തിയ മൂച്ചിക്കൽ കരിങ്കല്ലത്താണി ബൈപ്പാസ് റോഡ് നഗരസഭ ചെയർമാൻ അഷ്റഫ് അമ്പലത്തിങ്ങലിൻ്റെ പ്രത്യോക താൽപര്യ പ്രകാരം വീണ്ടും ടാറ് ചെയ്ത് പുനരുദ്ധാരണം നടത്തി.നഗരസഭ ചെയർമാൻ നാഷ്ണൽ ഹൈവേ വർക്ക് നടത്തുന്ന കെ.എൻ.ആർ.സി.എൽ കമ്പനിയോട് ആവശ്യപ്പെട്ടതുപ്രകാരംമാണ് പുനരുദ്ധാരണം നടത്തിയത്.കേരള വാട്ടർ അതോറിട്ടി സ്ഥാപിച്ച പൈപ്പ് ലൈൻ നിരന്തരമായി പൊട്ടിയതുമൂലം റോഡിലൂടെ വെള്ളം പറന്നുഒഴുകുകയും തൻമൂലം റോഡ് കേടുവരുകയുമാണ് ഉണ്ടായത്.ടൗണിൽ ഗതാഗത കുരുക്ക് രൂക്ഷമാക്കുന്ന സാഹചര്യത്തിൽ പെരിന്തൽമണ്ണ,പട്ടാമ്പി ഭാഗങ്ങിലേക്ക് യാത്രചെയ്യുന്നവർക്ക് വീതികൂട്ടി പുനരുദ്ധാരണം നടത്തിയ ബൈപ്പാസ് റോഡ് വളരെ ഉപകാരപ്രദമായിരുന്നു.നഗരസഭ ചെയർമാൻ അഷ്റഫ് അമ്പലത്തിങ്ങൽ,18-ാംവാർഡ് കൗൺസിലർ തസ്ലീമ നദീർ,ജലാലുദ്ധീൻ എന്ന മാനു തുടങ്ങിയവർ സ്ഥലം സന്ദർഷിച്ചു,

The post വളാഞ്ചേരി മൂച്ചിക്കൽ കരിങ്കല്ലത്താണി ബൈപ്പാസ് റോഡ് പുനരുദ്ധാരണം നടത്തി appeared first on Valanchery Online.

ആസ്‌തി രജിസ്റ്ററിൽ റോഡ് കാണ്മാനില്ല; കുറ്റിപ്പുറം പഞ്ചായത്തിനു മുന്നിൽ നിൽപ് സമരം

വളാഞ്ചേരിക്കാരൻ — Mon, 04 Nov 2024 12:53:10 +0000

നടുവട്ടം നാഗപറമ്പ് ഹെൽത്ത് സെൻ്റർ – ഒറുവിൽ കുഞ്ഞിമ റോഡിനെ ആസ്തി രജിസ്റ്ററിൽ നിന്നും “വെട്ടിയത്” വിവാദമാവുന്നു. വാർഡ് 22 ലെ ഈ റോഡിൻ്റെ ഗുണഭോക്താക്കളായ രണ്ട് പൊതു പ്രവർത്തകർ കുറ്റിപ്പുറം ഗ്രാമ പഞ്ചായത്ത് ഓഫീസിന് മുമ്പിൽ പ്രതിഷേധ നിൽപ്പു സമരം നടത്തി. ഈ റോഡിനെ ആസ്തി രജിസ്റ്ററിൽ ഉൾപ്പെടുത്താത്തതിനാൽ പ്രദേശത്തെ ഗ്രാമീണ റോഡ് വികസനം പ്രതിസന്ധിയിലായി എന്നാണ് നാട്ടുകാരുടെ പരാതി. നാട്ടുകാരുടെ പ്രതിഷേധം കനത്തതിൻ്റെ ഭാഗമായാണ് കെ എം തൗഫീഖും കുന്നക്കാട്ട് സൈതലവിയും കുറ്റിപ്പുറം ഗ്രാമ പഞ്ചായത്ത് ഓഫീസിന് മുമ്പിൽ പ്രതിഷേധ നിൽപ്പു സമരം നടത്തിയത്.

The post ആസ്‌തി രജിസ്റ്ററിൽ റോഡ് കാണ്മാനില്ല; കുറ്റിപ്പുറം പഞ്ചായത്തിനു മുന്നിൽ നിൽപ് സമരം appeared first on Valanchery Online.

ഭരണാനുമതി ലഭിച്ച് വർഷങ്ങളായിട്ടും കുറ്റിപ്പുറം-ഷൊർണൂർ തീരദേശപാത പദ്ധതി എങ്ങുമെത്തിയില്ല

വളാഞ്ചേരിക്കാരൻ — Sat, 28 Sep 2024 02:40:36 +0000

കുറ്റിപ്പുറം: ഭരണാനുമതി ലഭിച്ച് വർഷങ്ങളായിട്ടും കുറ്റിപ്പുറം-ഷൊർണൂർ തീരദേശപാത പദ്ധതി എങ്ങുമെത്തിയില്ല. തുടർച്ചയായി വന്ന രണ്ട് പ്രളയങ്ങളുടെ പശ്ചാത്തലത്തിൽ 2020 ജൂണിൽ വീണ്ടും പഠനറിപ്പോർട്ട് തയ്യാറാക്കാൻ പൊതുമരാമത്ത് വകുപ്പ് നിർദേശിച്ചിരുന്നു. ഇതുമായി ബന്ധപ്പെട്ട സർവേനടപടി പൂർത്തിയായാൽ മാത്രമേ ഏറ്റെടുക്കേണ്ട സ്ഥലങ്ങൾ കണ്ടെത്താനാവുകയുള്ളൂ. 2015-ൽ ബജറ്റിലുൾപ്പെടുത്തിയ പദ്ധതിക്ക് 2016-ലാണ് ഭരണാനുമതി ലഭിച്ചത്. മലപ്പുറം, പാലക്കാട്, തൃശ്ശൂർ ജില്ലകളിലുള്ളവർക്ക് യാത്രാദൂരം കുറയ്ക്കുന്നതും സുഗമമായ ഗതാഗതം ഉറപ്പുവരുത്തുന്നതുമാണ് പദ്ധതി. പട്ടാമ്പിയിൽ പുതിയ പാലംകൂടി ഉൾപ്പെടുത്തിയാണ് പദ്ധതി വിഭാവനം ചെയ്തിരുന്നതെങ്കിലും പിന്നീട് പാലം ഇതിൽനിന്ന് മാറ്റി.

കുറ്റിപ്പുറം-പട്ടാമ്പി, പട്ടാമ്പി-ഷൊർണൂർ ഭാഗങ്ങളാക്കി രണ്ട് ഘട്ടമായി നിർമാണം നടത്താനാണ് ലക്ഷ്യമിടുന്നത്. നിലവിൽ പട്ടാമ്പി പാലം പദ്ധതിയിൽ തീരദേശപാതയ്ക്കായി പട്ടാമ്പിയിൽ പുതിയ ജങ്ഷനുള്ള സ്ഥലംകൂടി ഉൾപ്പെടുത്തിയിട്ടുണ്ട്. പട്ടാമ്പി പാലം മുതൽ ചെങ്ങണാംകുന്ന് വരെയാണ് ഇപ്പോൾ റോഡുള്ളത്. ഈ റോഡിന് എട്ടുമീറ്റർ വീതിയാണുള്ളത്. ഓങ്ങല്ലൂർ ചെങ്ങണാംകുന്നിലാണ് നിലവിൽ നിർദിഷ്ട കുറ്റിപ്പുറം-ഷൊർണൂർ തീരദേശറോഡിന്റെ ഭാഗം അവസാനിക്കുന്നത്. ഇവിടെ പൊതുമരാമത്ത് റോഡിന്റെ വീതിയനുസരിച്ച് സ്ഥലമേറ്റെടുക്കൽ വേണ്ടിവരും. വീതി കൂട്ടാൻ സ്വകാര്യ ഉടമകളുടെയടക്കം സ്ഥലം ഏറ്റെടുക്കണം. ചെങ്ങണാംകുന്ന് മുതൽ ഷൊർണൂർ വരെ പലേടത്തും പുതുതായി റോഡ് നിർമിക്കണം. പുഴയിൽ കോൺക്രീറ്റ് തൂണുകൾ സ്ഥാപിച്ചുവരെ റോഡ് പണിയേണ്ടിവരും. ഇതിനിടയിലുള്ള കാരമണ്ണ പാലം വീതികൂട്ടി നവീകരിച്ചത് ആശ്വാസമാണ്.

കുറ്റിപ്പുറം മുതൽ പട്ടാമ്പി വരെ കുളപ്പുള്ളിവഴി 37.6 കിലോമീറ്റർ ദൂരമുണ്ട്. തീരദേശപാത വന്നാൽ ഇത് 32 ആയി ചുരുങ്ങും. കൂടാതെ തൃത്താല, പട്ടാമ്പി മേഖലയിൽനിന്ന് തൃശ്ശൂരിലേക്കുള്ള ബൈപ്പാസായും ഇത് ഉപയോഗിക്കാം. പട്ടാമ്പി നഗരത്തിലെ ഗതാഗതക്കുരുക്ക് കുറയ്ക്കാനും ഷൊർണൂരിന്റെ വികസനത്തിനും വഴിയൊരുങ്ങും. തൃശ്ശൂർ മെഡിക്കൽ കോളേജ് ആശുപത്രിയിലേയ്ക്കടക്കം ആംബുലൻസിനും മറ്റും എളുപ്പത്തിൽ എത്തിച്ചേരാനുമാവും. തീരദേശപാത വന്നാൽ കിഴായൂർ നമ്പ്രം മേഖലകളിലെ ഒറ്റപ്പെട്ട ഗ്രാമങ്ങൾക്കും തുണയാവും. ഒരു വശം റെയിൽവേ ലൈനും മറുവശം ഭാരതപ്പുഴയും തുരുത്താക്കി മാറ്റിയ മേഖലകൾക്ക് തീരദേശപാത വരുന്നത് ഗുണകരമാണ്.

The post ഭരണാനുമതി ലഭിച്ച് വർഷങ്ങളായിട്ടും കുറ്റിപ്പുറം-ഷൊർണൂർ തീരദേശപാത പദ്ധതി എങ്ങുമെത്തിയില്ല appeared first on Valanchery Online.

കുറ്റിപ്പുറം മാണിയംകാട് എടക്കുളം റോഡ് യാഥാർത്യമാക്കാൻ കർമ്മരംഗത്തിറങ്ങി നാട്ടുകാർ

വളാഞ്ചേരിക്കാരൻ — Wed, 10 Jul 2024 06:44:06 +0000

കുറ്റിപ്പുറം: മാണിയംകാടിനെ എടക്കുളവുമായി ബന്ധിപ്പിക്കുന്ന റോഡ് എന്ന ആശയത്തിന് ഏതാണ്ട് പതിനഞ്ച് വർഷത്തിലേറെ പഴക്കമുണ്ട് റെയിൽ പാതക്ക് സമാന്തരമായി നിർമ്മിക്കാൻ ഉദ്ദേശികുന്ന റോഡിന് നിലവിൽ ആനപ്പടി മുതൽ വലിയപറപ്പൂർ താമരക്കായൽ വരെ സ്ഥലമെടുപ്പ് പൂർത്തിയാട്ടുണ്ട് എന്നാൽ റോഡ് അവസാനിക്കുന്ന എടക്കുളം മേലെ അങ്ങാടിയിൽ സ്ഥലം ലഭ്യമാവാനുള്ള പ്രയാസവും നിർമ്മാണത്തെ മന്ദഗതിയിലാക്കിയിരുന്നു എന്നാൽ പുതിയ പദ്ധതി പ്രകാരം എടക്കുളം പഴയ അങ്ങാടിയിലെ ഓട്ടോ ടാക്സി സ്റ്റാൻൻ്റിലേക്ക് റോഡ് പ്രവേശിക്കുന്ന രീതിയിലാണ് ചർച്ചകൾ നടക്കുന്നത് പ്രസ്തുത പ്രദേശത്തെ നാട്ടുകാർ വിലയായും സൗജന്യമായും സ്ഥലം വിട്ടുത്തരാം എന്ന ഉറപ്പ് നാട്ടുകാർക്ക് ഏറെ പ്രതീക്ഷ നൽകുന്നതാണ്. മാണിയകാട് സ്കൂളിൽ വെച്ച് നടന്ന യോഗത്തിൽ കുറ്റിപ്പുറം ഗ്രാമപഞ്ചായത്ത് മെമ്പർ കെ.ടി സിദ്ദിഖ്, തുവ്വാട്ട് രാജൻ, പി.പി ഹംസ, സമീർ പരുത്തിപ്ര, എ. രാജേന്ദ്രൻ, വിനോദ് കെ.പി, ബൈജു സോപാനം എന്നിവർ പങ്കെടുത്തു സംസാരിച്ചു.

The post കുറ്റിപ്പുറം മാണിയംകാട് എടക്കുളം റോഡ് യാഥാർത്യമാക്കാൻ കർമ്മരംഗത്തിറങ്ങി നാട്ടുകാർ appeared first on Valanchery Online.

ബാവപ്പടി-മാവണ്ടിയൂർ റോഡ് സഞ്ചാരയോഗ്യമാക്കുക; ജനകീയ ആക്ഷൻ കമ്മിറ്റി രൂപീകരിച്ചു

വളാഞ്ചേരിക്കാരൻ — Mon, 20 May 2024 08:34:22 +0000

വളാഞ്ചേരി: നൂറുകണക്കിന് വിദ്യാർത്ഥികളും നാട്ടുകാരും ഉപയോഗിക്കുന്ന റോഡ്. കാൽനടയാത്രക്ക് പോലും പറ്റാത്ത അവസ്ഥയിലാണ് ഇപ്പോൾ, പതിറ്റാണ്ടുകളായി ഈ പ്രദേശത്തുകാർ ഭരണകൂട അവഗണന നേരിട്ട് കൊണ്ടിരിക്കുകയാണെന്ന് ആക്ഷൻ കമ്മിറ്റി യോഗത്തിൽ നാട്ടുകാർ അഭിപ്രായപ്പെട്ടു. ടിപി വാഹിദ് സ്വാഗതവും ടിപി സ്വാലിഹ് അധ്യക്ഷത വഹിച്ച യോഗത്തിൽ പി ജലാൽ നന്ദിയും പറഞ്ഞു. റോഡിന്റെ വിഷയം അധികാരികളുടെ ശ്രദ്ധയിൽ കൊണ്ടുവരുന്നതിനു വേണ്ടി ജനകീയ സമരപരിപാടികൾക്ക് യോഗം രൂപം നൽകി. സിപി സാഹിർ ഷാൻ കൺവീനർ ജോയിന്റ് കൺവീനർമാരായി കെ.പി ജൗഹർ, പി ജലാൽ, ട്രഷറർ ടിപി സ്വാലിഹ് എക്സിക്യൂട്ടീവ് അംഗങ്ങൾ കെ.പി സലാം, ടിപി വാഹിദ്, കെ.പി ഷമീം, ടി ഷാഫി, പി.കെ ദിൽഷാദ് എന്നിവരെയും യോഗം തിരഞ്ഞെടുത്തു.

The post ബാവപ്പടി-മാവണ്ടിയൂർ റോഡ് സഞ്ചാരയോഗ്യമാക്കുക; ജനകീയ ആക്ഷൻ കമ്മിറ്റി രൂപീകരിച്ചു appeared first on Valanchery Online.

കാടാമ്പുഴ ദേവസ്വം റോഡ് സംരക്ഷിക്കണം -ബി.ജെ.പി

വളാഞ്ചേരിക്കാരൻ — Thu, 04 Apr 2024 23:44:02 +0000

വളാഞ്ചേരി : കാടാമ്പുഴ ദേവസ്വത്തിന്റെ പൂർണ അധികാരത്തിലും നിയന്ത്രണത്തിലുമുള്ള ദേവസ്വം സ്വകാര്യറോഡ് സംരക്ഷിക്കണമെന്ന് ബി.ജെ.പി. മാറാക്കര പഞ്ചായത്ത് കമ്മിറ്റി ആവശ്യപ്പെട്ടു. റോഡിൽ നടപ്പന്തൽ നിർമിച്ചും ഡിവൈഡർ സ്ഥാപിച്ചും ക്ഷേത്രത്തിലെത്തുന്ന വിശ്വാസികൾക്ക് സൗകര്യമൊരുക്കാൻ ദേവസ്വം നടപടികൾ സ്വീകരിക്കണമെന്ന് കാടാമ്പുഴ ദേവസ്വം മാനേജർ എൻ.വി. മുരളീധരൻ, എൻജിനീയർ കെ. വിജയകൃഷ്ണൻ എന്നിവർക്ക് സമർപ്പിച്ച നിവേദനത്തിൽ ബി.ജെ.പി. ആവശ്യപ്പെട്ടു.

ബി.ജെ.പി. പഞ്ചായത്ത് കമ്മിറ്റി പ്രസിഡന്റ് ബാലകൃഷ്ണൻ, കോട്ടയ്ക്കൽ നിയോജകമണ്ഡലം ട്രഷറർ മുകുന്ദൻ, പഞ്ചായത്ത് കമ്മിറ്റി അംഗം കോന്നല്ലൂർ ഭാസ്‌കരൻ, ഒ.ബി.സി. മോർച്ച സംസ്ഥാനസമിതി അംഗം വിജയകുമാർ കാടാമ്പുഴ എന്നിവർചേർന്നാണ് നിവേദനം നൽകിയത്.
റോഡിൽ കാടാമ്പുഴ ദേവസ്വം ഡിവൈഡർ സ്ഥാപിക്കുന്നതിനിടെ നിർമാണപ്രവൃത്തികൾ മാറാക്കര പഞ്ചായത്ത് ഭരണസമിതി തടസ്സപ്പെടുത്തുകയാണെന്നും ക്ഷേത്രഭരണത്തിൽ പഞ്ചായത്ത് കൈകടത്തുന്നുവെന്നും ആരോപിച്ച് സനാതന പുരോഹിതസമാജം രംഗത്തെത്തിയിരുന്നു.

The post കാടാമ്പുഴ ദേവസ്വം റോഡ് സംരക്ഷിക്കണം -ബി.ജെ.പി appeared first on Valanchery Online.

റെയിൽവേക്കും പഞ്ചായത്തിനും പറയാനുള്ളത് സാങ്കേതികതടസ്സം; കോൺക്രീറ്റ് ചെയ്യാതെ പേരശ്ശന്നൂർ -പിഷാരിക്കൽ ക്ഷേത്രം റോഡ്

വളാഞ്ചേരിക്കാരൻ — Tue, 26 Mar 2024 05:45:05 +0000

കുറ്റിപ്പുറം : റെയിൽവേയും പഞ്ചായത്തും പരസ്പരം സാങ്കേതിക തടസ്സങ്ങൾ പറഞ്ഞ് കൈമലർത്തുമ്പോൾ യാത്രാദുരിതംമൂലം യാതന അനുഭവിക്കുന്നത് 50-ൽപ്പരം കുടുംബങ്ങൾ. പേരശ്ശന്നൂർ റെയിൽവേ ട്രാക്കിന്റെ തെക്കു ഭാഗത്തുള്ള ഒന്നരക്കിലോമീറ്ററോളം ദൂരംവരുന്ന പേരശ്ശന്നൂർ -പിഷാരിക്കൽ ക്ഷേത്രം റോഡ് ഉപയോഗിക്കുന്ന കുടുംബങ്ങളാണ് പതിറ്റാണ്ടുകളായി ദുരിതം നേടുന്നത്. ആനപ്പടി കോളനി ഉൾപ്പെടെ അമ്പതോളം വീട്ടുകാരുടെ ഗതാഗതത്തിനുള്ള ഏക മാർഗമാണ് ഈ റോഡ്. നേരത്തേ വീതി കുറഞ്ഞ ഇടവഴിയായിരുന്നു. വീടുകളുടെ എണ്ണം വർധിച്ചതോടെ ഇടവഴി റോഡാക്കാൻ താമസക്കാരിൽ ചിലർതന്നെ രംഗത്തിറങ്ങി. ഇവർ പണം നൽകിയാണ് പലരിൽനിന്നും ആവശ്യമായ സ്ഥലം വാങ്ങിയത്. റോഡ് കോൺക്രീറ്റ് ചെയ്ത് ഗതാഗതയോഗ്യമാക്കണമെന്ന ആവശ്യത്തിന് പതിറ്റാണ്ടുകളുടെ പഴക്കമുണ്ട്. റോഡ് കോൺക്രീറ്റ് ചെയ്ത് ഗതാഗത യോഗ്യമാക്കാൻ റെയിൽവേയുടെ അനുമതിപത്രം വേണമെന്ന നിലപാടിലാണ് പഞ്ചായത്ത് അധികൃതർ. റെയിൽവേ പാതയിൽനിന്ന് എഴരമീറ്റർ അകന്നാണ് റോഡുള്ളതെന്നതിനാൽ ആ സ്ഥലത്തിന് തങ്ങൾക്ക് അവകാശമില്ലെന്നും അതിനാൽ സമ്മതപത്രം നൽകാനാവില്ലെന്നുമാണ് റെയിൽവേയുടെ നിലപാട്.

റെയിൽവേ അധികൃതർ സമ്മതപത്രം നൽകേണ്ട സാഹചര്യമില്ലെങ്കിൽ എന്തുകൊണ്ട് പഞ്ചായത്തിന് റോഡ് കോൺക്രീറ്റ് ചെയ്യാൻ ഫണ്ട് അനുവദിക്കുന്നതിലെ തടസ്സമെന്താണെന്നാണ് ഇവിടുത്തുകാർക്ക് മനസ്സിലാകാത്തത്. ഈ റോഡിൽനിന്ന് ആനപ്പടി കോളനിയിലേക്കുള്ള റോഡ് ബ്ളോക്ക് പഞ്ചായത്ത് ഫണ്ട് ഉപയോഗിച്ച് കോൺക്രീറ്റ് ചെയ്തിട്ടുമുണ്ട്. റോഡ് തകരുമ്പോൾ താമസക്കാരിൽ ചിലർതന്നെ പണം ചെലവഴിച്ച് മണ്ണിട്ട് ഉയർത്തുമെങ്കിലും ശക്തമായ മഴയിൽ റോഡിലെ മണ്ണ് പുഴയിലേക്ക് ഒഴുകിപ്പോവുകയാണ് പതിവ്.അതോടൊപ്പം മണൽക്കള്ളക്കടത്ത് ലോറികളുടെ അനിയന്ത്രിതമായ യാത്രയും റോഡിന്റെ ദുരവസ്ഥയ്ക്ക് മറ്റൊരു കാരണമാകുന്നുണ്ട്.

The post റെയിൽവേക്കും പഞ്ചായത്തിനും പറയാനുള്ളത് സാങ്കേതികതടസ്സം; കോൺക്രീറ്റ് ചെയ്യാതെ പേരശ്ശന്നൂർ -പിഷാരിക്കൽ ക്ഷേത്രം റോഡ് appeared first on Valanchery Online.

ദേശീയപാത 66; 11 ടോൾ പ്ലാസകൾ, കാസറഗോഡ് മുതൽ തിരുവനന്തപുരം വരെ കാറിന് ടോൾ 1650 രൂപ

വളാഞ്ചേരിക്കാരൻ — Mon, 11 Mar 2024 00:56:46 +0000

തിരുവനന്തപുരം: ദേശീയപാത 66ന്റെ നിർമ്മാണം പൂർത്തിയാകുമ്പോൾ 11 ഇടത്ത് ടോൾ കേന്ദ്രം തുറക്കും. കാസർകോട് തലപ്പാടി മുതൽ തിരുവനന്തപുരം കാരോടുവരെ 645 കിലോമീറ്ററാണ് ദേശീയപാത. കാരോട് മുതൽ തലപ്പാടിവരെ പോകുമ്പോൾ കാറിന് ടോൾ 1650 രൂപയാകും. തിരിച്ചുവരുമ്പോഴും അത്രയും നൽകണം. ബസിനും മറ്റ് വാഹനങ്ങൾക്കും ഇതിലും കൂടും. തിരുവനന്തപുരം, കൊല്ലം ജില്ലകളിൽ രണ്ടുവീതവും ആലപ്പുഴ, എറണാകുളം, തൃശൂർ, മലപ്പുറം, കോഴിക്കോട്, കണ്ണൂർ, കാസർകോട് ഒരോന്നുമാണ് ഉണ്ടാവുക. ഓരോ 60 കിലോമീറ്ററിലും ടോൾബൂത്ത് ആകാമെന്നാണ് ചട്ടം.നിലവിൽ തിരുവല്ലത്തെ ടോൾ പ്ലാസയിൽ കാറിനു ഒരു വശത്തേക്ക് 150 രൂപയാണ്. ഫ്ലൈഓവറുകൾകൂടി കണക്കാക്കിയാണ് നിരക്ക് നിശ്ചയിക്കുക. അതിനാൽ ഓരോ പ്ലാസയിലും നിരക്ക് വ്യത്യസ്തമായിരിക്കും. തിരുവല്ലത്താണ് നിലവിൽടോൾ കൂടുതൽ.ജനവാസമേഖലകൾ പരമാവധി ഒഴിവാക്കി ആകാശപാത, മറ്റു മേല്പാലങ്ങൾ, ബൈപ്പാസ് എന്നിവ കൂടുതൽ ഉൾപ്പെടുത്തിയാണ് ദേശീയപാതയുടെ നിർമ്മാണം. പാതയെക്കാൾ കൂടുതൽ പണം പാലംനിർമ്മാണത്തിന് വേണ്ടിവരും. അതുകൊണ്ടാണ് ഉയർന്ന ടോൾനിരക്കെന്നാണ് ദേശീയപാത അധികൃതരുടെ വിശദീകരണം. 2008ലെ ‘ദേശീയപാതകളിൽ ചുങ്കം പിരിക്കാനുള്ള നിയമം” അടിസ്ഥാനമാക്കിയാണ് ടോൾനിരക്ക് നിശ്ചയിക്കുന്നത്.
കണക്കാക്കുക മേല്പാലം നീളത്തിന്റെ പത്തുമടങ്ങ്
60 മീറ്ററിൽ കൂടുതലുള്ള മേല്പാലങ്ങളുടെ ടോൾ നിശ്ചയിക്കുമ്പോൾ അതിന്റെ നീളത്തിന്റെ പത്തുമടങ്ങ് കണക്കിലെടുക്കണമെന്നാണ് ദേശീയപാത അതോറിട്ടിയുടെ ചട്ടം. ഉദാഹരണത്തിന് കഴിഞ്ഞവർഷം തുറന്ന കഴക്കൂട്ടം ആകാശപാതയുടെ ആകെനീളം 2.72 കിലോമീറ്റർ. ടോൾ കണക്കാക്കുമ്പോൾ എടുക്കുക 27.2 കിലോമീറ്റർ. എൻ.എച്ച് 66 പൂർത്തിയാകുന്നതോടെ 12.75 കി. മീറ്ററിൽ രാജ്യത്തെ ഏറ്റവുംവലിയ മേൽപ്പാലം വരുന്ന അരൂർ- തുറവൂർ റീച്ചിലാകും വലിയനിരക്ക് നൽകേണ്ടി വരിക. കഴക്കൂട്ടം ആകാശപാതകൂടി ടോളിൽ ഉൾപ്പെടുത്താൻ ആഗസ്റ്റിൽ കേന്ദ്രവിജ്ഞാപനം വന്നതോടെയാണ് തിരുവല്ലത്തെ നിരക്ക് ഉയർന്നത്. അതോടെ കാറിന് ഒരുഭാഗത്തേക്ക് 120 രൂപയിൽ നിന്ന് 150 ആയി. ടോൾബൂത്ത് പരിധിയിൽ പുതിയൊരു മേല്പാലംകൂടി ഈഞ്ചയ്ക്കലിൽ നിർമ്മിക്കുന്നുണ്ട്. അതുകഴിഞ്ഞാൽ ടോൾ വീണ്ടും കൂടും.
ടോൾ പ്ലാസകൾ
കാസർകോട്……………………………… പുല്ലൂർ പെരിയ
കണ്ണൂർ………………………………………..കല്യാശ്ശേരി
കോഴിക്കോട്……………………………… മാമ്പുഴ
മലപ്പുറം…………………………………….. വെട്ടിച്ചിറ
തൃശ്ശൂർ………………………………………..നാട്ടിക
എറണാകുളം……………………………. കുമ്പളം
ആലപ്പുഴ…………………………………….കൊമ്മാടി
കൊല്ലം………………………………………. ഓച്ചിറ (രണ്ടാമത്തെ സ്ഥലം നിശ്ചയിച്ചിട്ടില്ല)
തിരുവനന്തപുരം……………………… തിരുവല്ലം (രണ്ടാമത്തെ സ്ഥലം നിശ്ചയിച്ചിട്ടില്ല)

The post ദേശീയപാത 66; 11 ടോൾ പ്ലാസകൾ, കാസറഗോഡ് മുതൽ തിരുവനന്തപുരം വരെ കാറിന് ടോൾ 1650 രൂപ appeared first on Valanchery Online.

കുറ്റിപ്പുറം ആശുപത്രിപ്പടി -പേരശ്ശന്നൂർ റോഡിന്റെ മുൻവശം താഴ്ത്തിത്തുടങ്ങി

വളാഞ്ചേരിക്കാരൻ — Wed, 24 Jan 2024 05:40:10 +0000

കുറ്റിപ്പുറം: ആക്‌ഷൻ കമ്മിറ്റിയുടെ പ്രതിഷേധങ്ങൾക്കും പരാതികൾക്കും ചെവി കൊടുക്കാതെ ദേശീയപാത അതോറിറ്റി താലൂക്ക് ആശുപത്രിപ്പടി -പേരശ്ശന്നൂർ റോഡിന്റെ മുൻവശം താഴ്ത്തിത്തുടങ്ങി. ആറുവരിപ്പാത നിർമാണത്തിന്റെ ഭാഗമായി സർവീസ് റോഡ് നിർമിക്കുന്നതിനാണ് താലൂക്ക് ആശുപത്രിപ്പടി -പേരശ്ശന്നൂർ റോഡിന്റെ മുൻവശം താഴ്ത്തുന്നത്. ഈ റോഡിന്റെ മുൻവശം താഴ്ത്തുന്നത് ഈ റോഡിലേക്കുള്ള വാഹനങ്ങളുടെ പ്രവേശനവും ഇറക്കവും ബുദ്ധിമുട്ടിലാക്കുമെന്ന വിഷയം ഉയർത്തിയാണ് ആക്‌ഷൻ കമ്മിറ്റി പ്രതിഷേധവും പരാതിയും ഉയർത്തിയത്. എന്നാൽ, കഴിഞ്ഞദിവസം മുതൽ പ്രവേശനഭാഗം നികത്തൽ കരാർ കമ്പനി ആരംഭിച്ചിരിക്കുകയാണ്. സർവീസ് റോഡിൽ നിന്നും താലൂക്ക് ആശുപത്രിപ്പടി -പേരശ്ശന്നൂർ റോഡിന്റെ മുൻവശം 100 മീറ്ററോളം ദൂരം താഴ്ത്തുന്നുണ്ട്. നിർമാണംകഴിഞ്ഞാൽ മാത്രമേ റോഡ് താഴ്ത്തിയത് വാഹന ഗതാഗതത്തിന് എത്രമാത്രം ബാധിക്കുമെന്ന് വ്യക്തമാകൂ.

The post കുറ്റിപ്പുറം ആശുപത്രിപ്പടി -പേരശ്ശന്നൂർ റോഡിന്റെ മുൻവശം താഴ്ത്തിത്തുടങ്ങി appeared first on Valanchery Online.