ramzan Archives - Valanchery Online

മാസപ്പിറവി കണ്ടു; സംസ്ഥാനത്ത് നാളെ റമളാൻ വ്രതാരംഭം

വളാഞ്ചേരിക്കാരൻ — Mon, 12 Apr 2021 14:00:29 +0000

കോഴിക്കോട്: സംസ്ഥാനത്ത് നാളെ ( ചൊവ്വ ) റമളാൻ വ്രതാരംഭം. ഇന്ന് കാപ്പാട് മാസപ്പിറവി കണ്ടതിനെ തുടർന്ന് നാളെ(ചൊവ്വ) റമളാൻ ഒന്നായിരിക്കുമെന്ന് ഖാളിമാരായ സയ്യിദ് പാണക്കാട് ഹൈദരലി ശിഹാബ് തങ്ങൾ, സയ്യിദ് ജിഫ്രി മുത്തുക്കോയ തങ്ങൾ, എന്നിവരും മറ്റു ഖാളിമാരും അറിയിച്ചു.

The post മാസപ്പിറവി കണ്ടു; സംസ്ഥാനത്ത് നാളെ റമളാൻ വ്രതാരംഭം appeared first on Valanchery Online.

ശിഹാബ്‌ തങ്ങൾ ഡയാലിസിസ്‌ സെന്ററിലേക്കുള്ള റംസാൻ ധസമാഹരണത്തിന് തുടക്കമായി

വളാഞ്ചേരിക്കാരൻ — Sun, 03 May 2020 07:14:10 +0000

വളാഞ്ചേരി: വളാഞ്ചേരിയിൽ പ്രവർത്തിച്ചു വരുന്ന ശിഹാബ്‌ തങ്ങൾ ഡയാലിസിസ്‌ സെന്ററിലേക്കുള്ള ധനശേഖരണത്തിന്റെ ഉദ്ഘാടനം, ഐ എം എ വളാഞ്ചേരി യൂണിറ്റ്‌ ജനറൽ സെക്രട്ടറി ഡോ. റിയാസിൽ നിന്നും ആദ്യ ഫണ്ട്‌ സ്വീകരിച്ച്‌ കോട്ടക്കൽ മണ്ഡലം എം എൽ എ പ്രൊഫസർ ആബിദ്‌ ഹുസൈൻ തങ്ങൾ നിർവ്വഹിച്ചു. മെയ്‌ 5 മുതൽ ജൂൺ 5 വരെയാണ്‌ ഡയാലിസിസ്‌ സെന്ററിനായുള്ള റമളാൻ ധനസമാഹരണം നടക്കുക. ഉദാരമതികളും സഹായ മനസ്‌കരുമായ സുമനസ്സുകളുടെ സഹായത്താലാണ്‌ ഡയാലിസിസ്‌ സെന്റർ മുന്നോട്ട്‌ പോകുന്നത്‌. എല്ലാവരുടേയും സഹായ സഹകരണങ്ങൾ ഇതിനായി ഉണ്ടാവണമെന്ന് എം എൽ എ ആബിദ്‌ ഹുസൈൻ തങ്ങൾ അഭ്യർത്ഥിച്ചു. ശിഹാബ്‌ തങ്ങൾ ട്രസ്റ്റ്‌ ചെയർമാൻ അഷ്‌റഫ്‌ അമ്പലത്തിങ്ങൽ, ചീഫ്‌ കോ-ഓഡിനേറ്റർ സലാം വാലാഞ്ചേരി, ട്രസ്റ്റ്‌ അംഗങ്ങളായ കെ മുസ്‌തഫ മാസ്റ്റർ, പി പി ഷാഫി, വിപി കുഞ്ഞലവി എന്നിവർ സ്ബന്ധിച്ചു. ശിഹാബ്‌ തങ്ങൾ സെന്റർ ചാരിറ്റബ്‌ൾ ട്രസ്റ്റിന്റെ ആഭിമുഖ്യത്തിൽ വളാഞ്ചേരിയിൽ നടന്ന് വരുന്ന ശിഹാബ്‌ തങ്ങൾ ഡയാലിസിസ്‌ സെന്ററിൽ 50- ഓളം രോഗികളാണ്‌ ഡയാലിസിസ്‌ ചെയ്തു വരുന്നത്‌. ഡയാലിസിസ്‌ സൗജന്യമായാണ് ചെയ്ത് വരുന്നത്.

The post ശിഹാബ്‌ തങ്ങൾ ഡയാലിസിസ്‌ സെന്ററിലേക്കുള്ള റംസാൻ ധസമാഹരണത്തിന് തുടക്കമായി appeared first on Valanchery Online.

ചെറിയ പെരുന്നാള്‍; സ്‌കൂള്‍ തുറക്കുന്നത് ജൂണ്‍ ആറിലേക്ക് മാറ്റി

വളാഞ്ചേരിക്കാരൻ — Wed, 29 May 2019 14:48:43 +0000

തിരുവനന്തപുരം∙ സംസ്ഥാനത്ത് സ്കൂൾ പ്രവേശനോൽസവം ജൂൺ 6 ലേക്കു മാറ്റാൻ തീരുമാനിച്ചു. നേരത്തെ മൂന്നിനു തുറക്കാനാണ് നിശ്ചയിച്ചിരുന്നത്. എന്നാൽ തൊട്ടടുത്ത ദിവസങ്ങളിൽ വരുന്ന പെരുന്നാൾ അവധികൾ കണക്കിലെടുത്താണ് മന്ത്രിസഭയുടെ തീരുമാനം.

മധ്യവേനലവധിക്കു ശേഷം വിദ്യാലയങ്ങൾ തുറക്കുന്നതു നീട്ടണമെന്ന് ആവശ്യപ്പെട്ടു പ്രതിപക്ഷം സർക്കാരിനു കത്തുനൽകിയിരുന്നു. നേരത്തെ ആറിലേക്കു മാറ്റിയെന്ന മട്ടിലുള്ള സമൂഹമാധ്യമ പ്രചാരണം അടിസ്ഥാനരഹിതമാണ് വിദ്യാഭ്യാസ വകുപ്പ് അറിയിച്ചിരുന്നു.

അതേസമയം, ഒന്നാം വർഷ ഡിഗ്രി ക്ലാസുകൾ 24നും പിജി ക്ലാസുകൾ 17നും തുടങ്ങുമെന്ന് മന്ത്രി കെ.ടി.ജലീൽ അറിയിച്ചു. എൻജിനിയറിങ് ആദ്യ സെമസ്റ്റർ, എൽഎൽബി ക്ലാസുകൾ ജൂലൈ 15ന് തുടങ്ങും.

Summary: The schools reopen after ramzan on june 6

The post ചെറിയ പെരുന്നാള്‍; സ്‌കൂള്‍ തുറക്കുന്നത് ജൂണ്‍ ആറിലേക്ക് മാറ്റി appeared first on Valanchery Online.

തറാവീഹ്: റമളാന്‍റെ ശ്രേഷ്ഠസുകൃതം

വളാഞ്ചേരിക്കാരൻ — Thu, 16 May 2019 14:27:16 +0000

തറാവീഹ് കേവലമൊരു ആചാരമല്ല. മഹത്തായ ആരാധന, പാപമോചനം, വിശ്വാസ പൂര്‍ത്തീകരണം, ആദര്‍ശ ശത്രുക്കള്‍ക്ക് മറുപടി, ഇജ്മാഇനെ അംഗീകരിക്കല്‍ തുടങ്ങി നിരവധി അര്‍ത്ഥതലങ്ങള്‍ ഉള്‍ക്കൊള്ളുന്ന അമൂല്യനിധിയാണ് തറാവീഹ്. ഏതൊരു ഇബാദത്തിന്‍റെയും സ്ഥാനവും ബഹുമതിയും ഉയരുന്നത് കല്‍പനയുടെ ശൈലിയും പ്രവര്‍ത്തന രീതിയും സമയവും പ്രതിഫലവും പരിഗണിച്ചാണ്. ഇത്തരത്തില്‍ വീക്ഷിക്കുമ്പോള്‍ ആരാധനകളില്‍ മുന്‍പന്തിയിലാണ് തറാവീഹിന്‍റെ സ്ഥാനം.

ഒന്നാമതായി കല്‍പനയുടെ ശൈലി നോക്കാം. തിരുമേനി(സ്വ) പറയുന്നു: ‘ആരെങ്കിലും വിശ്വാസം ശരിപ്പെടുത്തിയും പ്രതിഫലം കാംക്ഷിച്ചും റമളാനിലെ നിസ്കാരം നിര്‍വഹിച്ചാല്‍ അവന്‍റെ കഴിഞ്ഞകാലത്തെ പാപങ്ങള്‍ പൊറുക്കപ്പെടും’ (ബുഖാരി, മുസ്ലിം, തുര്‍മുദി).

ഏറ്റവും പരിശുദ്ധമായ മാസത്തിലെ മുഴുവന്‍ ദിവസങ്ങളിലും തറാവീഹ് നിര്‍വഹിക്കണം. ഓരോ സല്‍കര്‍മത്തിനും നിരവധി ഇരട്ടി പുണ്യങ്ങള്‍ നല്‍കപ്പെടുന്ന ഈ മാസത്തില്‍ നിര്‍വഹിക്കുന്ന തറാവീഹ് ഏറ്റവും മികച്ച സ്ഥാനമുള്ള ശാരീരിക ആരാധനകളില്‍ പെട്ടതാണ്. പരിശുദ്ധ ഖുര്‍ആനിന്‍റെ വാര്‍ഷിക മാസമായ റമളാനിലെ തറാവീഹിന്‍റെ നിര്‍വഹണം പരമാവധി ഖുര്‍ആന്‍ ഭാഗങ്ങള്‍ പാരായണം ചെയ്തു കൊണ്ടായിരിക്കണം. അതിന് അനുയോജ്യരായവരുടെ കൂടെ ജമാഅത്തായി നിര്‍വഹിക്കുന്നതാണ് ഏറ്റവും ഉത്തമം. ഒരു റക്അത്തില്‍ ഇരുപത്തേഴിരട്ടി പ്രതിഫലം നല്‍കപ്പെടുന്ന സംഘമായുള്ള നിസ്കാരത്തിന്‍റെ ഗണത്തിലാണ് തറാവീഹ് ഉള്‍പ്പെടുന്നത്.

തറാവീഹിന്‍റെ ജമാഅത്തിലുള്ള പുണ്യങ്ങളെ വിശദീകരിക്കുന്ന ഒരു ഹദീസ് ഇങ്ങനെ വായിക്കാം: ‘ഒരാള്‍ ഇമാമിനോടൊന്നിച്ച് നിസ്കരിച്ചു കഴിഞ്ഞാല്‍ ആ മുഴുവന്‍ രാത്രി നിന്ന് നിസ്കരിച്ച പ്രതിഫലം അവന് എഴുതപ്പെടും’ (അബൂദാവൂദ്).

നിര്‍വഹണരീതിയും സമയവും എല്ലാം തറാവീഹിന്‍റെ മഹത്ത്വം വിളിച്ചോതുന്നു. ഈ മഹത്തായ ഇബാദത്ത് നിര്‍വഹിക്കേണ്ടത് അല്‍പം സമയം എടുത്തിട്ടാവണമെന്ന് തറാവീഹ് എന്ന പദത്തില്‍ നിന്ന് തന്നെ ലഭിക്കുന്നുണ്ട്. ഇടയ്ക്കിടെ ആശ്വാസത്തിന് സമയം ചെലവഴിക്കുന്നത് എന്നാണ് തറാവീഹ് എന്നത് കൊണ്ട് ഉദ്ദേശിക്കുന്നത്.

ഇമാം നവവി(റ) എഴുതുന്നു: ഉമര്‍(റ)ന്‍റെ കാലത്ത് ജനങ്ങള്‍ റമളാനില്‍ ഇരുപത് റക്അത്തായിരുന്നു തറാവീഹ് നിസ്കരിച്ചത് എന്ന സാഇബുബ്നു യസീദ്(റ)വില്‍ നിന്നുള്ള ഹദീസിനെ ഇമാം ബൈഹഖി(റ)യും മറ്റും സ്വഹീഹായ സനദോടെ റിപ്പോര്‍ട്ട് ചെയ്തത് നാം തെളിവായി എടുക്കുന്നു (ശറഹുല്‍ മുഹദ്ദബ്).

തറാവീഹ് ഇരുപത് റക്അത്ത് സുന്നത്താക്കിയതിന് പിന്നിലെ രഹസ്യം ഇബ്നു ഹജറുല്‍ ഹൈതമി(റ) കുറിച്ചു: മുഅക്കദായ റവാതിബ് സുന്നത്ത് നിസ്കാരങ്ങള്‍ പത്ത് റക്അത്താണ്. എന്നാല്‍ റമളാന്‍ കൂടുതല്‍ പരിശ്രമിക്കേണ്ട മാസമായതിനാല്‍ തറാവീഹിനെ അവകളുടെ ഇരട്ടി എണ്ണമാക്കപ്പെട്ടു (തുഹ്ഫ). ഒരു ദിവസത്തിലെ ഫര്‍ളായ പതിനേഴ് റക്അത്തും ശക്തമായ സുന്നത്തുള്ള വിത്റ് നിസ്കാരത്തില്‍ നിന്ന് മൂന്ന് റക്അത്തും കൂടിയ എണ്ണമാണ് ഇരുപത് ഈ തരത്തിലും അഭിപ്രായപ്പെട്ടിട്ടുണ്ട്.

The post തറാവീഹ്: റമളാന്‍റെ ശ്രേഷ്ഠസുകൃതം appeared first on Valanchery Online.

എസ്.വൈ.എസ്. വളാഞ്ചേരി മേഖലാതല റംസാൻ പ്രഭാഷണം കാടാമ്പുഴയിൽ

വളാഞ്ചേരിക്കാരൻ — Wed, 15 May 2019 00:13:46 +0000

കാടാമ്പുഴ: എസ്.വൈ.എസ്. വളാഞ്ചേരി മേഖലാതല റംസാൻപ്രഭാഷണം കാടാമ്പുഴയിൽ ജില്ലാപ്രസിഡന്റ്‌ സയ്യിദ് സലാഹുദ്ദീൻ ബുഖാരിയുടെ പ്രഭാഷണത്തോടെ ആരംഭിച്ചു.

സയ്യിദ് ബായാർ തങ്ങൾ ഉദ്ഘാടനംചെയ്തു. സി. മുസ്തഫ സഖാഫി കാടാമ്പുഴ അധ്യക്ഷനായി. എസ്.വൈ.എസ്. ജില്ലാ സെക്രട്ടറി വി.പി. മുഹമ്മദ് ബഷീർ പറവന്നൂർ, യു.ടി. ജലീൽ ബാഖവി, എം. മുനീർ പാഴൂർ, പി.കെ. അഷറഫലി സഖാഫി, പി. സിദ്ദീഖ് സഖാഫി, കെ.പി. ഷുക്കൂർ സഖാഫി, പി. ഷറഫുദ്ദീൻ മങ്കേരി, സി.പി. കുഞ്ഞീതു, പി. കുഞ്ഞാവഹാജി എന്നിവർ സംസാരിച്ചു. നാലുദിവസമാണ് പ്രഭാഷണം.

The post എസ്.വൈ.എസ്. വളാഞ്ചേരി മേഖലാതല റംസാൻ പ്രഭാഷണം കാടാമ്പുഴയിൽ appeared first on Valanchery Online.

അനധികൃത അച്ചാർ വിൽപ്പന: ആരോഗ്യ വകുപ്പിന്റെ നേതൃത്വത്തിൽ പരിശോധന ശക്തമാക്കി

വളാഞ്ചേരിക്കാരൻ — Tue, 14 May 2019 02:37:11 +0000

മലപ്പുറം: നോമ്പ് സമയങ്ങളിൽ രാത്രികാലങ്ങളിൽ നടക്കുന്ന വഴിയോര അച്ചാർ വിൽപ്പന കേന്ദ്രങ്ങളിൽ ആരോഗ്യ വകുപ്പിന്റെ നേതൃത്വത്തിൽ പരിശോധന ശക്തമാക്കാൻ ജില്ലാ മെഡിക്കൽ ഓഫീസർ ഡോ. കെ സക്കീനയുടെ നേതൃത്വത്തിൽ നടന്ന ആരോഗ്യ ജാഗ്രത അവലോകനയോഗത്തിൽ തീരുമാനമായി. അച്ചാറിന് പുറമെ ഉപ്പിലിട്ടത്, ഉപയോഗ്യമല്ലാത്ത വെള്ളമുപയോഗിച്ച് നിർമ്മിച്ച ഐസ് ഉത്പന്നങ്ങളുടെ വിൽപ്പന എന്നിവയും പരിശോധനാ വിധേയമാക്കും.

അച്ചാർ വിൽപ്പന സംബന്ധിച്ച് നോമ്പിന്റെ തുടക്കം മുതൽ പരാതികൾ ഉയർന്ന സാഹചര്യത്തിലാണ് നടപടി. രുചി കൂട്ടാനുപയോഗിക്കുന്ന ഏതെങ്കിലും രാസ വസ്തുക്കളോ ഒരിക്കൽ കഴിച്ചാൽ വീണ്ടും വാങ്ങിക്കഴിപ്പിക്കാൻ പ്രേരകമായ മയക്കു മരുന്നുൾപ്പെടെയുള്ളവയോ അടങ്ങിയിട്ടുണ്ടെന്നാണ് വ്യാപകമായി പരാതി ഉയർന്നിരിക്കുന്നത്. എന്നാൽ ഇക്കാര്യത്തിൽ കഴമ്പുണ്ടോ എന്നത് ആരോഗ്യ വകുപ്പ് പരിശോധന സമയത്ത് ശേഖരിക്കുന്ന സാമ്പിൾ പരിശോധനയിലൂടെ വ്യക്തമാകും. ആരോഗ്യ വകുപ്പിനെക്കൂടാതെ ഭക്ഷ്യസുരക്ഷ വകുപ്പും പൊലീസ് വകുപ്പും പരിശോധനയിൽ പങ്കെടുക്കും.

The post അനധികൃത അച്ചാർ വിൽപ്പന: ആരോഗ്യ വകുപ്പിന്റെ നേതൃത്വത്തിൽ പരിശോധന ശക്തമാക്കി appeared first on Valanchery Online.

എം.ഇ.എസ്. മെഡിക്കൽ കോളേജിൽ ഇഫ്താർ വിതരണം തുടങ്ങി

വളാഞ്ചേരിക്കാരൻ — Thu, 09 May 2019 01:48:09 +0000

അങ്ങാടിപ്പുറം: മാലാപറമ്പ് എം.ഇ.എസ്. മെഡിക്കൽ കോളേജിലെ രോഗികളുടെ കൂട്ടിരിപ്പുകാർക്കുള്ള നോമ്പുതുറയും അത്താഴവിരുന്നും ഇഫ്താർ വിതരണവും ജില്ലാ മുസ്‌ലിംലീഗ് പ്രസിഡന്റ് സാദിഖലി ശിഹാബ്തങ്ങൾ ഉദ്ഘാടനംചെയ്തു.

ജില്ലാസെക്രട്ടറി ഉമ്മർ അറക്കൽ അധ്യക്ഷനായി. മണ്ഡലം മുസ്‌ലിംലീഗ് പ്രസിഡന്റ് എം അബ്ദുല്ല, ജനറൽസെക്രട്ടറി കുഞ്ഞാലി, ട്രഷറർ കുന്നത്ത് മുഹമ്മദ്, ജില്ലാ മുസ്‌ലിം യൂത്ത്‌ലീഗ് വൈസ് പ്രസിഡന്റ് പാതാരി അമീർ, ജില്ലാ എം.എസ്.എഫ്. സെക്രട്ടറി നിഷാദ്, പഞ്ചായത്ത് ലീഗ് സെക്രട്ടറി ഹാരിസ് കളത്തിൽ, ഖത്തർ മങ്കട മണ്ഡലം കെ.എം.സി.സി. ഭാരവാഹികളായ മുസ്തഫ കുറുവ, റഫീക്ക് വടക്കാങ്ങര, സലാം കൊളത്തൂർ, അബ്ദുറഹ്‌മാൻ മുസ്‌ലിയാർ കൊളത്തൂർ തുടങ്ങിയവർ സംസാരിച്ചു.

മങ്കട കേന്ദ്രമായി പ്രവർത്തിക്കുന്ന സി.എച്ച്. സെന്ററിന്റെ നേതൃത്വത്തിലാണ് എട്ടുവർഷം മുമ്പ് മെഡിക്കൽ കോളേജിലെ ഇഫ്താർ വിതരണം തുടങ്ങിയത്. മങ്കട മണ്ഡലം ഖത്തർ കെ.എം.സി.സിയാണ് കഴിഞ്ഞ അഞ്ചുവർഷമായി ഈ പ്രവർത്തനത്തിന് നേതൃത്വംനൽകുന്നത്.

The post എം.ഇ.എസ്. മെഡിക്കൽ കോളേജിൽ ഇഫ്താർ വിതരണം തുടങ്ങി appeared first on Valanchery Online.