rail Archives - Valanchery Online

സിൽവർ ലൈൻ റെയിൽപ്പാത; സ്ഥലമേറ്റെടുക്കാൻ 12 ഓഫീസുകൾതുടങ്ങുന്നു

വളാഞ്ചേരിക്കാരൻ — Sat, 28 Aug 2021 01:23:28 +0000

എടപ്പാൾ : നിർദിഷ്ട തിരുവനന്തപുരം -കാസർകോട് സിൽവർ ലൈൻ റെയിൽപ്പാതയ്ക്ക് (സെമി ഹൈസ്പീഡ് റെയിൽ കോറിഡോർ പ്രോജക്ട്) ആവശ്യമായ ഭൂമി ഏറ്റെടുക്കൽ നടപടികൾക്കായി സംസ്ഥാനത്ത് 12 ഓഫീസുകൾ തുടങ്ങുന്നു. എറണാകുളം ആസ്ഥാനമായി ഒരു സ്പെഷ്യൽ െഡപ്യൂട്ടി കളക്ടർ ഓഫീസും 11 ജില്ലകളിൽ സ്പെഷ്യൽ തഹസിൽദാർ ഓഫീസുകളും ഒരു വർഷം പ്രവർത്തിപ്പിക്കാനുള്ള മൂലധനമായി 13.49,47,730 രൂപയുമനുവദിച്ചു. തിരുവനന്തപുരം മുതൽ കാസർകോട് വരെ 540 കിലോമീറ്റർ ദൂരത്തിലുള്ള പാത നിർമിക്കാൻ 11 ജില്ലകളിലായി 955.13 ഹെക്ടർ ഭൂമിയാണ് ഏറ്റെടുക്കേണ്ടത്. ഇതിെന്റ തുടക്കമെന്ന നിലയിൽ നടന്ന ഉപഗ്രഹസർവേക്കു ശേഷം ഏറ്റെടുക്കേണ്ട ഭൂമികളുടെ സർവേ നമ്പറടക്കമുള്ള വിവരങ്ങൾ അതത് വില്ലേജ് ഓഫീസുകളിലേക്ക് നൽകിയിരുന്നു. ഇവ മാർക്ക് ചെയ്ത് ഉടമകൾക്ക് നോട്ടീസ് നൽകിയ ശേഷം വില നിശ്ചയിച്ചു നൽകിയാണ് ഏറ്റെടുക്കുക.

ഈ പ്രവർത്തനങ്ങൾ ഏകോപിപ്പിക്കാനും വേഗത്തിലാക്കാനുമായി ആരംഭിക്കുന്ന ഓഫീസുകൾ തിരുവനന്തപുരം, കൊല്ലം, ആലപ്പുഴ, പത്തനംതിട്ട, കോട്ടയം, എറണാകുളം, തൃശ്ശൂർ, മലപ്പുറം, കോഴിക്കോട്, കണ്ണൂർ, കാസർകോട് ജില്ലകളിലാണ് ആരംഭിക്കുക. എറണാകുളത്തുള്ള സ്പെഷ്യൽ െഡപ്യൂട്ടി കളക്ടർ ഓഫീസാണ് ഇത് ഏകോപിപ്പിച്ച് നിയന്ത്രിക്കുക. സ്പെഷ്യൽ തഹസിൽദാർ ഓഫീസുകളിൽ അദ്ദേഹത്തെ കൂടാതെ ജെ.എസ്., വാല്വേഷൻ അസിസ്റ്റന്റ്, റവന്യൂ ഇൻസ്‌പെക്ടർ (മൂന്ന്), സീനിയർ ക്ലർക്ക് (രണ്ട്), സർവെയർ (നാല്), ക്ലർക്ക് (രണ്ട്), വില്ലേജ് ഫീൽഡ് അസിസ്റ്റന്റ് (മൂന്ന്), ഒ.എ. (ഒന്ന്) എന്നിങ്ങനെ 18 ജീവനക്കാരുണ്ടാകും. െഡപ്യൂട്ടി കളക്ടർ ഓഫീസിൽ ഒരു കംപ്യൂട്ടർ ഓപ്പറേറ്ററുൾപ്പെടെ ഏഴു പേരുമുണ്ടാകും.

ഓരോ ജില്ലയിലും ഏറ്റെടുക്കുന്ന ഭൂമി (ഹെക്ടറിൽ)
തിരുവനന്തപുരം : 78.42, കൊല്ലം: 83.06, ആലപ്പുഴ: 26.09, പത്തനംതിട്ട: 44.47, കോട്ടയം: 108.11, എറണാകുളം: 64.28, തൃശൂർ: 111.47, മലപ്പുറം: 109.94, കോഴിക്കോട്: 42.03, കണ്ണൂർ: 53.95, കാസർകോട്: 161.26.

The post സിൽവർ ലൈൻ റെയിൽപ്പാത; സ്ഥലമേറ്റെടുക്കാൻ 12 ഓഫീസുകൾതുടങ്ങുന്നു appeared first on Valanchery Online.

കെ-റെയില്‍: പരപ്പനങ്ങാടിയില്‍ ഇരുനൂറോളം കുടുംബങ്ങള്‍ ആശങ്കയില്‍

വളാഞ്ചേരിക്കാരൻ — Tue, 24 Aug 2021 06:00:19 +0000

പരപ്പനങ്ങാടി: കെ റെയില്‍ പദ്ധതി വീണ്ടും സജീവമായതോടെ പരപ്പനങ്ങാടി നഗരസഭയിലെ ഇരുനൂറോളം കുടുംബങ്ങള്‍ വലിയ ആശങ്കയിലാണ്. തിരുവനന്തപുരം-കാസര്‍കോട് തിവേഗ സില്‍വര്‍ ലൈന്‍ റെയില്‍വേക്ക് വേണ്ടിയുള്ള നടപടികള്‍ ആരംഭിച്ചതോടെ പരപ്പനങ്ങാടി ചെറമംഗലം ഭാഗത്തുള്ളവരാണ് വലിയ ആശങ്കയില്‍ കഴിയുന്നത്. ഇപ്പോള്‍ റയില്‍ കടന്ന് പോകുന്ന സ്ഥലത്ത് നിന്നും 30 മീറ്റര്‍ ആണ് സ്വീകരിക്കുന്നതെങ്കില്‍ ഇവിടത്തെ 174 വീടുകളെയാണ് അത് ബാധിക്കുക. പരപ്പനങ്ങാടി ടൗണിലെ അടക്കം നിരവധി കെട്ടിടങ്ങളെയും ബാധിക്കും. പല ടൗണുകളും ഇല്ലാതാകുകയും ചെയ്യും. കൃത്യമായ നഷ്ടപരിഹാരം നേരത്തെ ലഭിച്ചാല്‍ സ്ഥലവും വീടും വിട്ടു നല്‍കുന്നതിന് ഇവര്‍ക്ക് എതിര്‍പ്പില്ല. എന്നാല്‍ കൃത്യമായി അക്കൗണ്ടില്‍ പണമെത്താതെ ഒരു തിര ഭൂമിയും വിട്ടു നല്‍കാന്‍ ഇവര്‍ ഒരുക്കമല്ല. ഇതിനായി സംഘടിക്കാനൊരുങ്ങുകയാണ് പ്രദേശത്തുകാര്‍.

സ്ഥലത്തെ താങ്ങുവില കണക്കാക്കി നാലിരട്ടി നല്‍കുമെന്ന് കെ റെയില്‍ സി.ഇ.ഒ പ്രഖ്യാപിച്ചെങ്കിലും ജനങ്ങള്‍ വലിയ ആശങ്കയിലാണ്. ഇതിന്റെ അടിസ്ഥാനത്തില്‍ കഴിഞ്ഞ ദിവസം പ്രദേശവാസികള്‍ യോഗം ചേര്‍ന്നിരുന്നു. എല്ലാവര്‍ക്കും മാന്യമായ നഷ്ടപരിഹാരം ലഭ്യമാക്കുന്നതിനും മറ്റും സമതി രൂപീകരിക്കാനും അടുത്ത ദിവസം തന്നെ വിപുലമായ യോഗം ചേരാനും തീരുമാനിച്ചാണ് പിരിഞ്ഞത്. മുതിര്‍ന്നവരും സ്ത്രീകളുമടക്കം നിരവധി പേര്‍ യോഗത്തില്‍ പങ്കെടുത്തു. ഷരീഫ് വടക്കയില്‍, യു.എ റസാഖ്, അനീസ് കൂരിയാടന്‍, നവാസ് ചെറമംഗലം, യു.വി സുരേന്ദ്രന്‍, ചങ്ങാടന്‍ ഹംസ, ചെങ്ങാടന്‍ മുഹമ്മദ്, പൂഴിക്കല്‍ അഷ്‌റഫ്, കൗണ്‍സിലര്‍മാരായ ബേബി അച്ചുതല്‍, ജാഫര്‍ നെച്ചിക്കാട്ട്, ചോലയില്‍ ഹംസ, പി.വി സാലിം, കാരാടന്‍ മുഹമ്മദ്, ശിഹാബ് കുഞ്ഞോട്ട്, അരീക്കന്‍ ബഷീര്‍ മറ്റു പ്രമുഖരും പങ്കെടുത്തു.

The post കെ-റെയില്‍: പരപ്പനങ്ങാടിയില്‍ ഇരുനൂറോളം കുടുംബങ്ങള്‍ ആശങ്കയില്‍ appeared first on Valanchery Online.

റെയില്‍വേ ബജറ്റ്: ആകെ കിട്ടിയത് ഒരുകോടി; പതിവു പോലെ പ്രതീക്ഷകള്‍ മാത്രം ബാക്കിയായി

വളാഞ്ചേരിക്കാരൻ — Sat, 28 Feb 2015 02:22:29 +0000

കുറ്റിപ്പുറം: നരേന്ദ്രമോദി സര്‍ക്കാറിന്റെ ആദ്യ സമ്പൂര്‍ണ റെയില്‍വേബജറ്റില്‍ ജില്ലയ്ക്ക് കാര്യമായ നേട്ടങ്ങളില്ല. പ്രതീക്ഷകള്‍ മിക്കതും പാളംതെറ്റിയെങ്കിലും തിരുനാവായ-ഗുരുവായൂര്‍ പാതയ്ക്ക് ഒരുകോടി രൂപ അനുവദിച്ചതാണ് ആശ്വാസത്തിന് വകനല്‍കുന്നത്. പൊതുവായി കേരളത്തിനുലഭിച്ച നേട്ടങ്ങളില്‍ ആശ്വസിച്ച് ഇനിയും കാത്തിരിക്കാനാണ് ജില്ലക്കാരുടെ തലവിധി. കൂടുതലായി എന്തെങ്കിലുംകിട്ടുമോ എന്നറിയാന്‍ ഇനി ബജറ്റ് സമ്മേളനംവരെ കാത്തിരിക്കണം.
പുതിയ പാതകള്‍ക്കായി തുക വകയിരുത്തിയകൂട്ടത്തിലാണ് തിരുനാവായ-ഗുരുവായൂര്‍ പാത ഉള്‍പ്പെട്ടിട്ടുള്ളത്. അനിശ്ചിതത്വത്തിലായ പദ്ധതിക്ക് ഇനി വേഗം കൈവരുമെന്ന് പ്രതീക്ഷിക്കാം. സ്ഥലമേറ്റെടുക്കേണ്ട കാര്യത്തിലും അലൈന്‍മെന്റിന്റെ കാര്യത്തിലും ഇനിയും തീരുമാനമാകാനുണ്ട്. കോച്ചുകളുടെ എണ്ണം 26 ആക്കി ഉയര്‍ത്താനുള്ള തീരുമാനം ഗുണകരമാകും. മിക്ക തീവണ്ടികളിലും പലപ്പോഴും സൂചികുത്താന്‍ ഇടമില്ലാത്തതരത്തിലുള്ള തിരക്കാണ്. ജനറല്‍ കമ്പാര്‍ട്ട്‌മെന്റുകളില്‍ മൊബൈല്‍ ചാര്‍ജിങ് പോയിന്റുകള്‍ വരുന്നതും യാത്രക്കാര്‍ക്ക് സഹായമാണ്. വനിതാ കമ്പാര്‍ട്ട്‌മെന്റുകളില്‍ സുരക്ഷ ഉറപ്പാക്കാന്‍ നിരീക്ഷണകാമറകള്‍ സ്ഥാപിക്കുമെന്നത് സ്ത്രീ യാത്രക്കാരെ സംബന്ധിച്ചിടത്തോളം ആശ്വാസമാണ്.
വൈദ്യുതീകരണത്തിന് മുന്‍ഗണന നല്‍കുമെന്ന പ്രഖ്യാപനം ഷൊര്‍ണൂര്‍-മംഗലാപുരം പാതയുടെ വൈദ്യുതീകരണത്തിന്റെ വേഗം കൂട്ടിയേക്കും. പാതവികസനത്തിന് മുന്‍ഗണന നല്‍കുമെന്ന് ബജറ്റില്‍ പറയുമ്പോഴും ജില്ലയുടെ പ്രതീക്ഷകള്‍ പലതും അസ്ഥാനത്തായി. അങ്ങാടിപ്പുറം-ഫറോക്ക് പാതയ്ക്കും മലപ്പുറം, വയനാട് ജില്ലകളുടെ വികസനത്തിന് വഴിവെക്കുന്ന നിലമ്പൂര്‍-നഞ്ചന്‍കോട് പാതയ്ക്കും ജില്ല പച്ചക്കൊടി കാത്തിരുന്നിരുന്നു. അങ്ങാടിപ്പുറം-മലപ്പുറം- എയര്‍പോര്‍ട്ട്-കോഴിക്കോട് പാതയും പ്രതീക്ഷയുടെ ട്രാക്കിലായിരുന്നു. തിരുനാവായ-ഗുരുവായൂര്‍ പാതയിലൂടെ മാത്രമാണ് ജില്ല ബജറ്റില്‍ ഇടംനേടിയത്.
നിലവില്‍ ഓടുന്ന വണ്ടികള്‍ക്ക് കൂടുതല്‍ സ്റ്റോപ്പുകളാണ് വേണ്ടത്. ബജറ്റ് സമ്മേളനത്തില്‍ ഇതുസംബന്ധിച്ച് പ്രഖ്യാപനമുണ്ടാകുമോ എന്നാണ് ഇനിയറിയേണ്ടത്. 26 വണ്ടികള്‍ ജില്ലയിലെവിടെയും നിര്‍ത്താതെ പോകുന്നുണ്ട്. അങ്ങാടിപ്പുറം വഴി പോകുന്ന രാജ്യറാണി എക്‌സ്പ്രസ് ഷൊര്‍ണൂരില്‍നിന്ന് അമൃത എക്‌സ്പ്രസ്സിനോടുചേര്‍ത്താണ് തിരുവനന്തപുരത്തേയ്ക്കുപോകുന്നത്. രാജ്യറാണി എക്‌സ്പ്രസ്സിനെ സ്വതന്ത്രമായി ഓടിക്കണമെന്നതും പ്രധാന ആവശ്യമായിരുന്നു. മേല്‍പ്പാലങ്ങളുടെയും പ്ലാറ്റ്‌ഫോം മേല്‍ക്കൂരകളുടെയും നിര്‍മാണവും പൂര്‍ത്തീകരിക്കാനുണ്ട്.

The post റെയില്‍വേ ബജറ്റ്: ആകെ കിട്ടിയത് ഒരുകോടി; പതിവു പോലെ പ്രതീക്ഷകള്‍ മാത്രം ബാക്കിയായി appeared first on Valanchery Online.