pv anvar Archives - Valanchery Online

കസ്റ്റഡി അപേക്ഷ തള്ളി; പി.വി. അന്‍വറിന് ഉപാധികളില്ലാതെ ജാമ്യം

വളാഞ്ചേരിക്കാരൻ — Mon, 06 Jan 2025 12:00:41 +0000

നിലമ്പൂര്‍: വനംവകുപ്പ് ഓഫീസ് ആക്രമിച്ച കേസില്‍ പി.വി. അന്‍വര്‍ എം.എല്‍.എ.യ്ക്ക് ജാമ്യം. തിങ്കളാഴ്ചയാണ് നിലമ്പൂര്‍ കോടതി അന്‍വറിന് ജാമ്യം അനുവദിച്ചത്. കഴിഞ്ഞദിവസം അറസ്റ്റ് ചെയ്ത എം.എല്‍.എ.യെ റിമാന്‍ഡ് ചെയ്തിരുന്നു. ഉപാധികളില്ലാതെയാണ് അന്‍വറിന് കോടതി ജാമ്യം അനുവദിച്ചത്. എം.എല്‍.എ.യെ കസ്റ്റഡിയില്‍ ചോദ്യംചെയ്യണമെന്ന പ്രോസിക്യൂഷന്‍റെ ആവശ്യവും കോടതി തള്ളി. പി.വി. അന്‍വറിന് അറസ്റ്റ് ചെയ്ത് 24 മണിക്കൂറിനുള്ളില്‍ തന്നെ ജാമ്യം ലഭിച്ചത് സര്‍ക്കാരിനുള്ള തിരിച്ചടിയാണെന്ന് ഡി.എം.കെ. നേതാക്കള്‍ പ്രതികരിച്ചു. ഉപാധികളില്ലാതെയാണ് കോടതി അന്‍വറിന് ജാമ്യം അനുവദിച്ചതെന്നും കോടതി ഉത്തരവ് ജയിലിലെത്തിയാലുടന്‍ അന്‍വറിന് പുറത്തിറങ്ങാനാകുമെന്നും അദ്ദേഹത്തിന്റെ അഭിഭാഷകനും മാധ്യമങ്ങളോട് പറഞ്ഞു. ഞായറാഴ്ച രാത്രിയാണ് അന്‍വറിനെ പോലീസ് സംഘം വീട്ടിലെത്തി കസ്റ്റഡിയിലെടുത്തത്. നാടകീയരംഗങ്ങള്‍ക്കൊടുവിലാണ് വന്‍ പോലീസ് സംഘം എം.എല്‍.എ.യുടെ വീട്ടിലെത്തി അദ്ദേഹത്തെ കസ്റ്റഡിയിലെടുത്തത്. തന്റെ അറസ്റ്റ് ഭരണകൂട ഭീകരതയാണെന്നായിരുന്നു അന്‍വറിന്റെ പ്രതികരണം. പിന്നാലെ അന്‍വറിനെ കോടതിയില്‍ ഹാജരാക്കി റിമാന്‍ഡ് ചെയ്ത് ജയിലിലടച്ചു.

കാട്ടാന ആക്രമണത്തില്‍ ആദിവാസി യുവാവ് കൊല്ലപ്പെട്ട സംഭവത്തില്‍ എം.എല്‍.എ.യുടെ നേതൃത്വത്തില്‍ കഴിഞ്ഞദിവസം പ്രതിഷേധം അരങ്ങേറിയിരുന്നു. ഇതിനിടെ നിലമ്പൂര്‍ നോര്‍ത്ത് ഡി.എഫ്.ഒ. ഓഫീസിന്റെ പൂട്ട് തകര്‍ത്ത് ഉള്ളില്‍ കയറി സാധന സാമഗ്രികള്‍ നശിപ്പിച്ചെന്നാണ് കേസ്. വനംവകുപ്പ് ഓഫീസ് ആക്രമിച്ച സംഭവത്തില്‍ പി.വി. അന്‍വര്‍ ഉള്‍പ്പെടെ 11 പേര്‍ക്കെതിരേയാണ് ജാമ്യമില്ലാ വകുപ്പുകള്‍പ്രകാരം പോലീസ് കേസെടുത്തത്. പോലീസിന്റെ കൃത്യനിര്‍വ്വഹണം തടസ്സപ്പെടുത്തല്‍, പൊതുമുതല്‍ നശിപ്പിക്കല്‍ തുടങ്ങിയ വകുപ്പുകളാണ് ചുമത്തിയിരുന്നത്. കേസെടുത്തതിന് പിന്നാലെയാണ് പോലീസ് സംഘം എം.എല്‍.എ.യെ വീട്ടിലെത്തി കസ്റ്റഡിയിലെടുത്തത്.

The post കസ്റ്റഡി അപേക്ഷ തള്ളി; പി.വി. അന്‍വറിന് ഉപാധികളില്ലാതെ ജാമ്യം appeared first on Valanchery Online.

സാമ്പത്തിക തട്ടിപ്പുകേസിൽ പി.വി. അൻവറിന് തിരിച്ചടി; പുനരന്വേഷിക്കണമെന്ന് കോടതി

വളാഞ്ചേരിക്കാരൻ — Wed, 23 Feb 2022 00:45:30 +0000

മഞ്ചേരി : മംഗളൂരു ക്രഷർ തട്ടിപ്പുകേസിൽ നിലമ്പൂർ എം.എൽ.എ. പി.വി. അൻവറിന് കോടതിയിൽനിന്നു തിരിച്ചടി. കേസ് സിവിൽ സ്വഭാവമുള്ളതാണെന്നു കാണിച്ച് ക്രൈംബ്രാഞ്ച് സമർപ്പിച്ച അന്തിമ റിപ്പോർട്ട് മഞ്ചേരി സി.ജെ.എം. കോടതി തള്ളി. കേസ് പുനരന്വേഷിക്കാനും കോടതി ഉത്തരവിട്ടു.

തട്ടിപ്പിനിരയായ മലപ്പുറം സ്വദേശി നടുത്തൊടി സലീമിനെ വഞ്ചിക്കാൻ അൻവർ ഉദ്ദേശിച്ചിട്ടില്ലെന്ന ക്രൈംബ്രാഞ്ചിന്റെ കണ്ടെത്തൽ ശരിയല്ലെന്നും ക്രഷറിന്റെ ഉടമസ്ഥാവകാശം അൻവറിനാണെന്ന് തെളിയിക്കുന്നതടക്കമുള്ള രേഖകൾ ഹാജരാക്കാൻ ക്രൈംബ്രാഞ്ചിന് കഴിഞ്ഞില്ലെന്നും കോടതി വിലയിരുത്തി.

മംഗളൂരു ബൽത്തങ്ങാടി തണ്ണീരുപന്ത പഞ്ചായത്തിലെ ക്രഷറും ഇതോടൊപ്പമുള്ള 26 ഏക്കർ ഭൂമിയും സ്വന്തം ഉടമസ്ഥതയിലാണെന്നും ക്രയവിക്രയ അവകാശമുണ്ടെന്നും പറഞ്ഞ് 10 ശതമാനം ഓഹരിയും മാസം അരലക്ഷം ലാഭവിഹിതവും വാഗ്‌ദാനംചെയ്ത് പരാതിക്കാരനിൽനിന്ന് 50 ലക്ഷം രൂപ തട്ടിയെടുത്തെന്നാണു കേസ്.

എം.എൽ.എ. പ്രഥമദൃഷ്ട്യാ വഞ്ചന നടത്തിയതായി ക്രൈംബ്രാഞ്ച് ഡിവൈ.എസ്.പി. പി. വിക്രമൻ നേരത്തേ കോടതിയിൽ സമർപ്പിച്ച ഇടക്കാല റിപ്പോർട്ടിൽ പറഞ്ഞിരുന്നു. എന്നാൽ എം.എൽ.എ.യെ അറസ്റ്റുചെയ്യേണ്ടിവരുമെന്ന ഘട്ടമെത്തിയപ്പോൾ കേസ് സിവിൽ സ്വഭാവമുള്ളതാണെന്നു കാണിച്ച് അന്തിമ റിപ്പോർട്ട് സമർപ്പിക്കുകയായിരുന്നു.

പരാതിക്കാരന്റെ ഭാര്യയുടെ അക്കൗണ്ടിലേക്ക് 50,000 രൂപയുടെ ചെക്ക് ഡെൽമ കമ്പനിയുടെ പേരിൽ നൽകിയത് കരാറിലെ ലാഭവിഹിതമാണെന്ന വാദവും കോടതി തള്ളി. ഇതല്ലാതെ ഒരു തുകയും പരാതിക്കാരനു നൽകിയതായുള്ള ഒരു രേഖയും ഹാജരാക്കാൻ കഴിഞ്ഞിട്ടില്ലെന്നും അതിനാൽ ഇത് ലാഭവിഹിതമായി കണക്കാക്കാനാവില്ലെന്നും കോടതി വിലയിരുത്തി.

എം.എൽ.എ.യെ ചോദ്യംചെയ്തതായോ മൊഴി രേഖപ്പെടുത്തിയതായോ ക്രൈംബ്രാഞ്ച് റിപ്പോർട്ടിൽ പറയുന്നില്ല. അതേസമയം പരാതിക്കാരനിൽനിന്ന് ക്രഷർ ബിസിനസിലെ പങ്കാളിത്തത്തിനായി 50 ലക്ഷം വാങ്ങിയെന്ന് അൻവർ മുൻപ് ഹൈക്കോടതിയിൽ നൽകിയ സത്യവാങ്മൂലത്തിൽ വ്യക്തമാക്കിയിട്ടുണ്ടെന്നും കേസന്വേഷണസമയത്ത് പോലീസിനോടു സമ്മതിച്ചുവെന്നുമാണ് റിപ്പോർട്ടിലുള്ളത്.

അൻവറിന്റെ സാമ്പത്തിക തട്ടിപ്പുസംബന്ധിച്ച് 2017-ലാണ് പരാതി ഉയർന്നത്. തുടർന്ന് മഞ്ചേരി പോലീസ് അന്വേഷിച്ച് കേസിന് സിവിൽ സ്വഭാവമാണെന്നു റിപ്പോർട്ട് സമർപ്പിച്ചു. ഇതിനെതിരേ പരാതിക്കാരൻ ഹൈക്കോടതിയെ സമീപിച്ചു.ഹൈക്കോടതിയാണ് കേസ് ക്രൈംബ്രാഞ്ചിന് കൈമാറി ഉത്തരവിട്ടത്. വർഷങ്ങൾ കഴിഞ്ഞിട്ടും എം.എൽ.എ.യെ ചോദ്യംചെയ്യാതെ ക്രൈംബ്രാഞ്ച് അന്വേഷണം അട്ടിമറിക്കുകയാണെന്നാരോപിച്ച് നടുത്തൊടി സലീം നൽകിയ ഹർജിയിലാണ് കേസ് മഞ്ചേരി കോടതിയുടെ മേൽനോട്ടത്തിലാക്കിയത്.

The post സാമ്പത്തിക തട്ടിപ്പുകേസിൽ പി.വി. അൻവറിന് തിരിച്ചടി; പുനരന്വേഷിക്കണമെന്ന് കോടതി appeared first on Valanchery Online.

പൊന്നാനിയിൽ തോൽക്കുമെന്ന റിപ്പോർട്ട് വാസ്തവവിരുദ്ധം-ഇ.എൻ മോഹൻദാസ്

വളാഞ്ചേരിക്കാരൻ — Mon, 29 Apr 2019 02:41:46 +0000

മലപ്പുറം: പൊന്നാനിയിൽ പി.വി. അൻവറിന് തോൽവിയുണ്ടാവുമെന്ന് സംസ്ഥാനക്കമ്മിറ്റിക്ക് റിപ്പോർട്ട് നൽകിയെന്ന വാർത്ത വാസ്തവ വിരുദ്ധമെന്ന് ജില്ലാസെക്രട്ടറി ഇ.എൻ. മോഹൻദാസ്. 35,000 വോട്ടിനെങ്കിലും അൻവർ തോൽക്കുമെന്ന് സംസ്ഥാന കമ്മിറ്റിക്ക് റിപ്പോർട്ട് നൽകിയെന്നാണ് വാർത്ത പ്രചരിക്കുന്നത്.

മലപ്പുറത്ത് കുഞ്ഞാലിക്കുട്ടിയുടെ ഭൂരിപക്ഷം നന്നായി കുറയുമെന്നും റിപ്പോർട്ടിലുള്ളതായി പറയുന്നു. ബൂത്ത് കമ്മിറ്റികളിൽനിന്ന് ശേഖരിച്ച വിവരങ്ങളുടെ അടിസ്ഥാനത്തിലാണ് റിപ്പോർട്ട് നൽകിയതെന്നാണ് പറയുന്നത്. തവനൂർ, തൃത്താല, പൊന്നാനി മണ്ഡലങ്ങളിൽ മാത്രമേ അൻവറിന് ലീഡുണ്ടാവൂ. താനൂരിലടക്കം ഇ.ടിക്കാവും ഭൂരിപക്ഷമെന്ന് റിപ്പോർട്ടിലുണ്ടെന്ന് പറയുന്നു. എന്നാൽ ഇത്തരം വാർത്തകളെല്ലാം ഊഹങ്ങൾ മാത്രമാണെന്നും പൊന്നാനിയിൽ പാർട്ടിക്ക് നല്ല വിജയപ്രതീക്ഷയാണുള്ളതെന്നും സി.പി.എം ജില്ലാ സെക്രട്ടറി ഇ.എൻ മോഹൻദാസ് പറഞ്ഞു. 20,000 വോട്ടിനെങ്കിലും അൻവർ ജയിക്കുമെന്നാണ് പാർട്ടിയുടെ വിലയിരുത്തൽ. മലപ്പുറത്ത് നല്ല മുന്നേറ്റമുണ്ടാക്കാനും സാധിക്കുമെന്നും ഇ.എൻ. മോഹൻദാസ് പറഞ്ഞു.

The post പൊന്നാനിയിൽ തോൽക്കുമെന്ന റിപ്പോർട്ട് വാസ്തവവിരുദ്ധം-ഇ.എൻ മോഹൻദാസ് appeared first on Valanchery Online.

പരിസ്ഥിതിക്കാര്‍ പറഞ്ഞിട്ടുപോയാല്‍ മതിയെന്ന് നാട്ടുകാര്‍; തടയാന്‍ പോലീസും തടസപ്പെടുത്താന്‍ ഇടതുപക്ഷവും

വളാഞ്ചേരിക്കാരൻ — Sun, 21 Apr 2019 22:44:17 +0000

താനൂര്‍: പരിസ്ഥിതി പ്രവര്‍ത്തകരെ മര്‍ദ്ദിച്ചതിനെതിരായ പ്രതിഷേധം തടയാനുള്ള പോലീസ്, ഇടതുമുന്നണി പ്രവര്‍ത്തകരുടെ ശ്രമം സംഘര്‍ഷാവസ്ഥ സൃഷ്ടിച്ചു. പരിസ്ഥിതിയെ തകര്‍ക്കുന്നവര്‍ക്കു വോട്ടുചെയ്യരുതെന്ന സന്ദേശവുമായുള്ള പരിസ്ഥിതി സംരക്ഷണയാത്രക്കുനേരെ വെള്ളിയാഴ്ച വൈകുന്നേരം താനൂരില്‍ അക്രമമുണ്ടായിരുന്നു. പി.വി അന്‍വറിനെതിരെ പ്രസംഗിച്ചതിന് വിവരാവകാശ പ്രവര്‍ത്തകന്‍ കെ.വി ഷാജി, കേരള നദീസംരക്ഷണസമിതി ജനറല്‍ സെക്രട്ടറി ടി.വി രാജന്‍, പശ്ചിമഘട്ട സംരക്ഷണസമിതി പ്രവര്‍ത്തകന്‍ അബ്ദുല്‍മജീദ് മൊല്ലഞ്ചേരി എന്നിവര്‍ക്കാണ് മര്‍ദ്ദനമേറ്റത്. നോട്ടീസുകളും ബാനറുകളും നശിപ്പിക്കുകയും ചെയ്തിരുന്നു.

പരിസ്ഥിതി സംരക്ഷയാത്ര തൃത്താലയില്‍ സമാപിച്ചതോടെയാണ് താനൂരിലെ നാട്ടുകാര്‍ അന്‍വറിന്റെ നിയമലംഘനങ്ങള്‍ക്കെതിരെ പാതിവഴി നിര്‍ത്തിയ പ്രസംഗം തുടരാന്‍ പരിസ്ഥിതി പ്രവര്‍ത്തകരെ വീണ്ടും താനൂരിലേക്കു ക്ഷണിച്ചത്. അക്രമം നേരിട്ട താനൂര്‍ ബസ്സ്റ്റാന്റ് പരിസരത്ത് ഇന്നലെ പരിസ്ഥിതി പ്രവര്‍ത്തകര്‍ പ്രസംഗം തുടങ്ങിയതോടെ തടയാനായി സി.ഐ സിദ്ദിഖിന്റെയും എസ്.ഐ സുമേഷ് സുധാകറിന്റെയും നേതൃത്വത്തില്‍ പോലീസ് സംഘം കുതിച്ചെത്തി. ഒരു കാരണവശാലും പ്രസംഗിക്കാന്‍ അനുവദിക്കില്ലെന്ന് പോലീസ് അറിയിച്ചു. തെരഞ്ഞെടുപ്പ് കമ്മീഷന്റെ മൈക്ക് പെര്‍മിഷന്‍ കാണിച്ചിട്ടും വഴങ്ങിയില്ല. വിവരാവകാശ പ്രവര്‍ത്തകന്‍ കെ.വി ഷാജിയെ താനൂര്‍ സി.ഐ അസഭ്യം വിളിച്ചതും പിടിച്ചുതള്ളിയതും സംഘര്‍ഷാവസ്ഥക്കിടയാക്കി. ഇതോടെ നാട്ടുകാര്‍ ഇടപെട്ട് പരിസ്ഥിതി പ്രവര്‍ത്തകര്‍ക്ക് പറയാന്‍ അവസരം കൊടുക്കണമെന്നാവശ്യപ്പെടുകയായിരുന്നു. പരിസ്ഥിതി സംരക്ഷണയാത്രയുടെ നോട്ടീസുകളും വിതരണം ചെയ്തു. ഇതിനിടെ ഇടതുമുന്നണി പ്രവര്‍ത്തകര്‍ ലോറിയില്‍ വലിയ ശബ്ദസംവിധാനത്തോടെയെത്തിച്ചു പ്രസംഗം തടസപ്പെടുത്താനും ശ്രമിച്ചു. ഇതോടെ നാട്ടുകാര്‍ക്കൊപ്പം യു.ഡി.എഫ് പ്രവര്‍ത്തകരും പരിസ്ഥിതിപ്രവര്‍ത്തകര്‍ക്ക് സംരക്ഷണമൊരുക്കി.

തടസം തുടര്‍ന്നതോടെ പരിസ്ഥിതി പ്രവര്‍ത്തകരുടെ യോഗം താനൂര്‍ ജംങ്ഷനിലേക്കു മാറ്റി. പശ്ചിമഘട്ടസംരക്ഷണ സമിതി ചെയര്‍മാന്‍ ജോണ്‍ പെരുവന്താനം ഉദ്ഘാടനം ചെയ്തു. പരിസ്ഥിതി പ്രവര്‍ത്തകരെ ആക്രമിച്ച ഗുണ്ടാസംഘത്തെ അറസ്റ്റു ചെയ്യാതെ പോലീസ് അവര്‍ക്ക് സംരക്ഷണമൊരുക്കുകയാണെന്നും കുറ്റവാളികളെ പിടികൂടണമെന്നും ആവശ്യപ്പെട്ടു. ടി.വി രാജന്‍ ആധ്യക്ഷം വഹിച്ചു. കെ.വി ഷാജി, അബ്ദുല്‍മജീദ് മൊല്ലഞ്ചേരി, പി.കെ രമാദേവി, ഗഫൂര്‍ പൂവത്തിങ്കല്‍, പി.എച്ച് താഹ, മൊയ്തു കണ്ണങ്കോടന്‍, കെ. എ ഷുക്കൂര്‍ പ്രസംഗിച്ചു.

The post പരിസ്ഥിതിക്കാര്‍ പറഞ്ഞിട്ടുപോയാല്‍ മതിയെന്ന് നാട്ടുകാര്‍; തടയാന്‍ പോലീസും തടസപ്പെടുത്താന്‍ ഇടതുപക്ഷവും appeared first on Valanchery Online.

രാഹുല്‍ ഗാന്ധിയെ കുറിച്ചുള്ള നിലപാട് ഇടത് സ്ഥാനാര്‍ഥി വ്യക്തമാക്കണം: ഇ. ടി മുഹമ്മദ് ബഷീര്‍

വളാഞ്ചേരിക്കാരൻ — Thu, 04 Apr 2019 01:10:47 +0000

കോട്ടക്കല്‍: രാഹുല്‍ ഗാന്ധിയെ കുറിച്ചുള്ള മുന്‍നിലപാട് തന്നെയാണോ പൊന്നാനിയിലെ ഇടതുപക്ഷ സ്ഥാനാര്‍ഥിക്ക് ഇപ്പോഴുമുള്ളതെന്ന് വ്യക്തമാക്കണമെന്ന് ഇ. ടി മുഹമ്മദ് ബഷീര്‍. പൊന്നാനിയിലെ ഇടത് സ്ഥാനാര്‍ഥിയുടെ നയം തന്നെയാണോ സി പി എമ്മിനുള്ളതെന്ന് പാര്‍ട്ടി നേതൃത്വം വ്യക്തമാക്കണം. രാഹുല്‍ ഗാന്ധിയെ നരേന്ദ്രമോദിയുടെ വാക്കുകള്‍ കടമെടുത്ത് ദേശാഭിമാനി പത്രത്തില്‍ പപ്പു എന്ന് വിളിച്ചതിലൂടെ സി പി എമ്മിന്റെ ആദര്‍ശ പാപ്പരത്തമാണ് വെളിവാകുന്നത്.
മാര്‍ക്‌സിസ്റ്റ് പാര്‍ട്ടിയുടെ കാപട്യമാണ് ഓരോ ദിവസവും വെളിവാകുന്നത്.

രമ്യ ഹരിദാസിനെ അവഹേളിച്ച എ വിജയരാഘവന്റെ നടപടി പാര്‍ട്ടി സംസ്ഥാന ഘടകം അന്വേഷിക്കുമെന്നാണ് സീതാറാം യെച്ചൂരി പറയുന്നത്. സി പി എമ്മിന് രാഷ്ട്രീയ ധാര്‍മ്മികതയുണ്ടെങ്കില്‍ പാര്‍ട്ടിയില്‍ നിന്ന് സസ്‌പെന്റ് ചെയ്യുകയാണ് ചെയ്യേണ്ടത്. ഇടതു മുന്നണിയുടെ കണ്‍വീനര്‍ക്ക് പോലും സംസ്‌കാര സമ്പന്നമായ സമൂഹത്തില്‍ ഇടപെടേണ്ട രീതി അറിയില്ല. സ്ത്രീത്വത്തെ അപമാനിച്ചതിന് വിജയരാഘവന്റെ പേരില്‍ കേസെടുക്കാന്‍ പോലീസ് തയ്യാറാകണമെന്നും ഇ. ടി മുഹമ്മദ് ബഷീര്‍ പറഞ്ഞു. തിരൂരിലെ പര്യടനത്തിനിടെയായിരുന്നു ഇ. ടിയുടെ പ്രതികരണം.

The post രാഹുല്‍ ഗാന്ധിയെ കുറിച്ചുള്ള നിലപാട് ഇടത് സ്ഥാനാര്‍ഥി വ്യക്തമാക്കണം: ഇ. ടി മുഹമ്മദ് ബഷീര്‍ appeared first on Valanchery Online.

അൻവർ ഇന്ന‌് തൃത്താല മണ്ഡലത്തിൽ

വളാഞ്ചേരിക്കാരൻ — Sat, 23 Mar 2019 02:23:43 +0000

പൊന്നാനി ലോക്‌സഭാ മണ്ഡലം എൽഡിഎഫ് സ്ഥാനാർഥി പി വി അൻവറിന്റെ ശനിയാഴ‌്ചത്തെ പര്യടനം: പകൽ 3 പരുതൂർ, 3.20 കൊടിക്കുന്ന്, 3.40 തൃത്താല, 4 ഞാങ്ങാട്ടിരി, 4.20 ആറങ്ങോട്ടുകര, 4.40 കറുകപുത്തൂർ, 5 വാവനൂർ, 5.20 പെരിങ്ങോട്, 5.40 ചാലിശേരി, 6 തണ്ണീർകോട്‌ എച്ച്സി, 6.20 കാഞ്ഞിരത്താണി, 6.40 കുമരനെല്ലൂർ, 7 ആനക്കര, 7.20 കൂടല്ലൂർ, 7.40 ആലൂർ, 8 കക്കാട്ടിരി.

The post അൻവർ ഇന്ന‌് തൃത്താല മണ്ഡലത്തിൽ appeared first on Valanchery Online.