popular front Archives - Valanchery Online

മുസ്ലിം യുവാക്കളെ അന്യായമായി വേട്ടയാടുന്നതിന്റെ ദേശീയ തലസ്ഥാനമായി യു.പി മാറിയിരിക്കുന്നു: ഒ. എം. എ. സലാം

വളാഞ്ചേരിക്കാരൻ — Wed, 17 Feb 2021 20:08:14 +0000

പുത്തനത്താണി: അധികാരം നിലനിര്‍ത്താനായി ജനങ്ങള്‍ക്ക് മേല്‍ അമിതാധികാര പ്രയോഗവും ബലാല്‍ക്കാരവും പ്രയോഗിച്ച ഏകാധിപതികളെല്ലാം ചരിത്രത്തിന്റെ ചവറ്റുകുട്ടയിലേക്ക് എറിയപ്പെട്ട കാര്യം ഇന്ത്യന്‍ ഫാസിസ്റ്റുകള്‍ ഓര്‍ക്കുന്നത് നല്ലതാണെന്ന് പോപുലര്‍ ഫ്രണ്ട് ഓഫ് ഇന്ത്യ ചെയര്‍മാന്‍ ഒ. എം. എ സലാം അഭിപ്രായപ്പെട്ടു. പോപുലര്‍ ഫ്രണ്ട് ഡേ യോടനുബന്ധിച്ച് മലപ്പുറം വെസ്റ്റ് ജില്ലാ കമ്മിറ്റി പുത്തനത്താണിയില്‍ സംഘടിപ്പിച്ച യൂണിറ്റി മാര്‍ച്ചിന്റെ സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം.
മുസ്ലിം യുവാക്കളെ അന്യായമായി വേട്ടയാടുന്നതിന്റെ ദേശീയ തലസ്ഥാനമായി ഉത്തര്‍പ്രദേശ് മാറിയിരിക്കുകയാണ്. മോദിയെയും ആര്‍.എസ്.എസിനെയും വിമര്‍ശിക്കുന്നവരെയെല്ലാം വേട്ടയാടി തുറുങ്കിലടക്കുകയാണ്. ഇതിന്റെ ഏറ്റവും അവസാനത്തെ ഉദാഹരണമാണ് ഭീകരാക്രമണം എന്ന കെട്ടുകഥ ചമച്ച് രണ്ട് പോപുലര്‍ ഫ്രണ്ട് പ്രവര്‍ത്തകരെ ഉത്തര്‍പ്രദേശില്‍ അറസ്റ്റ് ചെയ്തത്.

ജനാധിപത്യത്തെ നോക്കു കുത്തിയാക്കി ഭരണഘടനാ സ്ഥാപനങ്ങളെ തങ്ങളുടെ ഗൂഢ ലക്ഷ്യങ്ങള്‍ നേടാനുള്ള ഉപകരണങ്ങളാക്കി മാറ്റുന്ന കേന്ദ്ര ഭരണകൂടം തങ്ങളുടെ വന്‍ തകര്‍ച്ചക്കു മുമ്പേയുള്ള ആളിക്കത്തലിലാണ്. തുല്യ നീതി പുലരുന്ന പുതിയ ഒരു ഇന്ത്യയെ സ്വപ്നം കണ്ട് ഫാസിസ്റ്റ് അതിക്രമങ്ങളെ ജനകീയമായി ചെറുക്കുന്നതിനായി 2007 ഫെബ്രുവരി 17 ന് നിലവില്‍ വന്ന പോപുലര്‍ ഫ്രണ്ട് അതിന്റെ പ്രയാണം തുടരുകയാണ്. അന്വേഷണ പ്രഹസനങ്ങളോ കുപ്രചരണങ്ങളോ അതിനെ തടയാന്‍ പര്യാപ്തമല്ല എന്ന് അദ്ദേഹം അഭിപ്രായപെട്ടു. മാത്രമല്ല നാള്‍ക്കു നാള്‍ സംഘടനയുടെ ജനകീയ പിന്തുണ വര്‍ദ്ധിച്ചു വരുന്നു. ഫാസിസ്റ്റ് അതിക്രമങ്ങള്‍ക്കെതിരെ ഇരകള്‍ക്കൊപ്പം എന്നും ഞങ്ങള്‍ നില കൊള്ളും. അതില്‍ നിന്ന് ഞങ്ങളെ പിന്തിരിപ്പിക്കാനോ രാജ്യത്തിന്റെ ശത്രുക്കളുമായി രാജിയാക്കുവാനോ ഒരു ശക്തിക്കും കഴിയുകയില്ല. കര്‍ഷകര്‍ മുതല്‍ ജനപ്രതിനിധികള്‍ വരെ, വിദ്യാര്‍ത്ഥികള്‍ മുതല്‍ പണ്ഡിതന്‍മാര്‍ വരെ RSS കാരും കോര്‍പറേറ്റുകളുമല്ലാത്ത എല്ലാവരും ഭരണകൂട വേട്ടക്ക് വിധേയമാകുന്ന ഈ കെട്ട കാലത്ത്, വര്‍ഗീയ ഫാസിസ്റ്റുകളില്‍ നിന്നും രാജ്യത്തെ രക്ഷിക്കാന്‍ എല്ലാ വിഭാഗം ജനങ്ങളും യോജിക്കുകയും ഒരുമിച്ച് മുന്നേറുകയും ചെയ്യണമെന്ന് സമ്മേളനം ആഹ്വാനം ചെയ്തു.

പൊതുസമ്മേളനത്തില്‍ ഡല്‍ഹിയില്‍ കര്‍ഷക വിരുദ്ധ ബില്ലിനെതിരെ സമരം ചെയ്യുന്ന കര്‍ഷകര്‍ക്ക് ഐക്യദാര്‍ഢ്യം പ്രഖ്യാപിച്ച് കൊണ്ട് മൗനം ആചരിച്ചു. പോപുലര്‍ ഫ്രണ്ട് ജില്ലാ പ്രസിഡന്റ് വി.കെ അബ്ദദുല്‍ അഹദ് അദ്ധ്യക്ഷത വഹിച്ചു. ഇമാംസ് കൗണ്‍സില്‍ സംസ്ഥാന വൈസ് പ്രസിഡണ്ട് കെ. കെ. അബ്ദുല്‍ മജീദ് ഖാസിമി വിഷയാവതരണം നടത്തി.മലബാര്‍ സമര അനുസ്മരണ സമിതി വൈസ് ചെയര്‍മാന്‍ പി. സുന്ദര്‍ രാജ്,ആതവനാട് ഗ്രാമ പഞ്ചായത്തംഗം എം.കെ. സക്കരിയ്യ, വ്യാപാരി വ്യവസായി ഏകോപന സമിതി നേതാവ് വി.പി ഉസ്മാന്‍ ഹാജി, SDPI മലപ്പുറം ജില്ല പ്രസിഡണ്ട് സി.പി. എ ലത്തീഫ് ,NCHRO സംസ്ഥാന ട്രഷറര്‍ കെ. പി. ഒ റഹ്മതുല്ല,ഇമാംസ് കൗണ്‍സില്‍ ജില്ല സെക്രട്ടറി സഈദ് മൗലവി, PDP നേതാവ് ബീരാന്‍ ഹാജി, NWF മലപ്പുറം വെസ്റ്റ് ജില്ലാ പ്രസിഡന്റ്
സമീറ നാസര്‍, കാംപസ് ഫ്രണ്ട് ജില്ലാ പ്രസിഡന്റ് ശുഹൈബ് ഒഴൂര്‍ തുടങ്ങിയവര്‍ സംസാരിച്ചു. ജില്ലാ സെക്രട്ടറി പി. കെ അബ്ദുല്‍ ജലീല്‍ സ്വാഗതവും പുത്തനത്താണി ഡിവിഷന്‍ പ്രസിഡണ്ട് സി. വി. നൗഷാദ് നന്ദിയും പറഞ്ഞു.

The post മുസ്ലിം യുവാക്കളെ അന്യായമായി വേട്ടയാടുന്നതിന്റെ ദേശീയ തലസ്ഥാനമായി യു.പി മാറിയിരിക്കുന്നു: ഒ. എം. എ. സലാം appeared first on Valanchery Online.

പോപുലര്‍ ഫ്രണ്ട് യൂണിറ്റി മാര്‍ച്ച്; സ്വാഗത സംഘം ഓഫീസ് ഉദ്ഘാടനം ചെയ്തു

വളാഞ്ചേരിക്കാരൻ — Thu, 04 Feb 2021 04:20:12 +0000

ആതവനാട്:’രാജ്യത്തിനായി പോപുലര്‍ ഫ്രണ്ടിന് ഒപ്പം’ എന്ന പ്രമേയത്തില്‍ ഫെബ്രുവരി 17 പോപുലര്‍ ഫ്രണ്ട് ഡേയുടെ ഭാഗമായി പുത്തനത്താണിയില്‍ നടക്കുന്ന യൂണിറ്റി മാര്‍ച്ചിന്റെ സ്വാഗതസംഘം ഓഫീസ്
പോപുലര്‍ ഫ്രണ്ട് സംസ്ഥാന പ്രസിഡന്റ് സി.പി മുഹമ്മദ് ബഷീര്‍ ഉദ്ഘാടനം ചെയ്തു. രാജ്യത്ത് അപ്രഖ്യാപിത ഹിന്ദുത്വ വല്‍ക്കരണവും കര്‍ഷകര്‍ക്ക് നേരെ അപ്രഖ്യാപിത അടിയന്തരാവസ്ഥ നിലനില്‍ക്കുകയാണെന്നും സംസ്ഥാന പ്രസിഡന്റ് സി പി മുഹമ്മദ് ബഷീര്‍ പറഞ്ഞു. ജില്ലാ പ്രസിഡണ്ട് അബ്ദുല്‍ അഹദ് വളാഞ്ചേരി അധ്യക്ഷത വഹിച്ചു. നൗഷാദ് തിരുനാവായ, ജലീല്‍ എടപ്പാള്‍ എന്നിവര്‍ സംസാരിച്ചു.

The post പോപുലര്‍ ഫ്രണ്ട് യൂണിറ്റി മാര്‍ച്ച്; സ്വാഗത സംഘം ഓഫീസ് ഉദ്ഘാടനം ചെയ്തു appeared first on Valanchery Online.

മലബാർ സമരത്തിൻ്റെ നൂറാം വാർഷികം; ഒരു വര്‍ഷം നീണ്ട് നില്‍ക്കുന്ന പരിപാടികളുമായി മലബാര്‍ സമര അനുസ്മരണ സമിതി

വളാഞ്ചേരിക്കാരൻ — Thu, 21 Jan 2021 23:53:21 +0000

ആതവനാട്: 1921ലെ മലബാര്‍ സമരം നടന്നിട്ട് നൂറ് വര്‍ഷം പിന്നിടുമ്പോൾ ഒരു വര്‍ഷം നീണ്ട് നില്‍ക്കുന്ന പരിപാടികളുമായി മലബാര്‍ സമര അനുസ്മരണ സമിതി. പരിപാടികളുടെ പ്രഖ്യാപനം
പുത്തനത്താണിയിൽ പോപുലർ ഫ്രണ്ട് ഓഫ് ഇന്ത്യ സംസ്ഥാന പ്രസിഡന്റ് സി.പി മുഹമ്മദ് ബഷീർ നിർവ്വഹിച്ചു. ഇന്ത്യന്‍ സ്വാതന്ത്ര്യ സമരത്തിന്റെ ഭാഗമായി ബ്രിട്ടീഷ് അധിനിവേശത്തിനും ജന്മിത്വ ചൂഷണത്തിനും എതിരായി 1921ല്‍ മലബാറില്‍ നടന്ന ഉജ്ജ്വല പോരാട്ടത്തിന് നൂറു വര്‍ഷം തികയുന്ന വേളയിൽ ഒരു വര്‍ഷം നീണ്ട് നില്‍ക്കുന്ന വിവിധ പരിപാടികൾ സംഘടിപ്പിക്കുവാൻ മലബാര്‍ സമര അനുസ്മരണ സമിതി തീരുമാനിച്ചു.

മഹത്തായ ചരിത്രത്തെ സമുചിതമായി അനുസ്മരിക്കുന്നതിന്റെ ഭാഗമായി സമര നായകന്‍ വാരിയന്‍ കുന്നത്ത് കുഞ്ഞഹമ്മദ്ഹാജി വീര രക്ത സാക്ഷ്യം വരിച്ച ജനുവരി 20 ന് പുത്തനത്താണി മലബാര്‍ ഹൗസില്‍ പോപുലർ ഫ്രണ്ട് ഓഫ് ഇന്ത്യ സംസ്ഥാന പ്രസിഡന്റ് സി.പി മുഹമ്മദ് ബഷീർ പരിപാടിയുടെ പ്രഖ്യാപനം നിർവ്വഹിച്ചു. ഇന്ന് ഇന്ത്യ ഭരിക്കുന്നവർക്ക് നമ്മുടെ സ്വാതന്ത്ര സമരത്തിൽ ഉണ്ടായ പങ്ക് എന്താണെന്ന് എല്ലാവരും ഓർക്കണമെന്നും ഒരു ജനത മൊത്തം നടത്തിയ ചെറുത്ത് നിൽപ്പിനെയാണ് ബ്രിട്ടീഷ് ചരിത്രം അവലംബമാക്കി വർഗ്ഗീയ ലഹളയെന്നും കലാപമെന്നും മുദ്ര കുത്തുന്നതെന്നും അദ്ദേഹം അഭിപ്രായപ്പെട്ടു.

മലബാർ സമരം ജാലിയൻ വാലാ ബാഗ് പോലെ ഐതിഹാസികമായിരുന്നു. മുസ് ലിംകൾ നേതൃത്വം നൽകിയതിനാൽ അതിനെയും അവഗണിക്കുകയാണ്. 1921ലെ സമരത്തിന് സംഘപരിവാരം തെറ്റായ വ്യാഖ്യാനങ്ങൾ ചമക്കാനുള്ള ഗൂഢാലോചനയും കുൽസിത ശ്രമങ്ങളും ആരംഭിച്ചിട്ടുണ്ടെന്നും ഈ സമരത്തിന് എതിരായ എല്ലാ തെറ്റായ പ്രചരണങ്ങളെയും അതിജീവിക്കുന്ന കാലം ഉണ്ടാവുകതന്നെ ചെയ്യുമെന്നും അദ്ദേഹം കൂട്ടിച്ചേർത്തു. തേജസ് മാനേജിംഗ് എഡിറ്റർ കെ.എച്ച് നാസർ ചടങ്ങിൽ അധ്യക്ഷത വഹിച്ചു. സി അബ്ദുൽ ഹമീദ് രചിച്ച ‘മലബാറിന്റെ വിപ്ലവ നായകൻ: വാരിയൻകുന്നത്ത് കുഞ്ഞഹമ്മദ്ഹാജി’എന്ന പുസ്തകം കെ.അബ്ദുൽ മജീദിന് നൽകിക്കൊണ്ട് ഡോ: പി ഇബ്രാഹിം പ്രകാശനം ചെയ്തു. ലോഗോ പ്രകാശനം ആക്ടിവിസ്റ്റ് പി.സുന്ദർ രാജ് പ്രഫ. പി സൈതലവിക്ക് നൽകി നിർവ്വഹിച്ചു. വി.ടി ഇഖ്റാമുൽ ഹഖ് അനുസ്മരണ സന്ദേശം നൽകി.കെ.വി ഷാജി, പി.പി റഫീഖ്, കെ.പി.ഒ റഹ്മത്തുല്ല തുടങ്ങിയവർ സംസാരിച്ചു.

The post മലബാർ സമരത്തിൻ്റെ നൂറാം വാർഷികം; ഒരു വര്‍ഷം നീണ്ട് നില്‍ക്കുന്ന പരിപാടികളുമായി മലബാര്‍ സമര അനുസ്മരണ സമിതി appeared first on Valanchery Online.

നേതാക്കളടെ വീടുകളിലെ റെയ്ഡ്: പോപുലർ ഫ്രണ്ട് കാടാമ്പുഴയിൽ പ്രതിഷേധ പ്രകടനം നടത്തി

വളാഞ്ചേരിക്കാരൻ — Fri, 04 Dec 2020 00:30:11 +0000

മാറാക്കര: പോപുലർ ഫ്രണ്ട് ദേശീയ ചെയർമാൻ ഒ.എം.എ സലാമിൻ്റെ വീട് ഉൾപ്പടെ അഞ്ച് നേതാക്കളുടെ വീടുകൾ എൻഫോഴ്സ്മെൻ്റ് ഡയറക്ടറേറ്റ് അന്യായമായി റെയ്ഡ് ചെയ്തതെന്നാരോപിച്ച് പ്രതിഷേധിച്ച് കാടാമ്പുഴയിൽ പ്രതിഷേധ പ്രകടനം നടത്തി. മല റോഡിൽ നിന്ന് തുടങ്ങിയ പ്രകടനം ടൗൺ ചുറ്റി ജംഗ്ഷനിൽ അവസാനിച്ചു. വിരുതുള്ളി മുസ്തഫ, ഫൈസൽ, ഷാഫി എന്നിവർ പ്രതിഷേധ പ്രകടനത്തിന് നേതൃത്വം നൽകി.

The post നേതാക്കളടെ വീടുകളിലെ റെയ്ഡ്: പോപുലർ ഫ്രണ്ട് കാടാമ്പുഴയിൽ പ്രതിഷേധ പ്രകടനം നടത്തി appeared first on Valanchery Online.

പോപുലർ ഫ്രണ്ട് ഓഫ് ഇന്ത്യ കുറ്റിപ്പുറത്ത് നിർമിച്ച വീടിന്റെ താക്കോൽ കൈമാറി

വളാഞ്ചേരിക്കാരൻ — Mon, 26 Oct 2020 05:39:38 +0000

കുറ്റിപ്പുറം: പോപുലർ ഫ്രണ്ട് ഓഫ് ഇന്ത്യ പ്രളയ പുനരധിവാസ പദ്ധതിയുടെ ഭാഗമായി മലപ്പുറം ജില്ലയിലെ കുറ്റിപ്പുറത്ത് നിർമിച്ച് നൽകിയ വീടിന്റെ താക്കോൽ പോപുലർ ഫ്രണ്ട് സംസ്ഥാന പ്രസിഡന്റ് സി പി മുഹമ്മദ് ബഷീര്‍കൈമാറി. ചടങ്ങില്‍ മലപ്പുറം സോണൽ സെക്രട്ടറി പി കെ മൊയ്തീൻ കുട്ടി, മലപ്പുറം വെസ്റ്റ് ജില്ലാ പ്രസിഡന്റ് വി.കെ അബ്ദുള്‍ അഹദ്, ഡിവിഷൻ പ്രസിഡന്റ് ടി പി സ്വാലിഹ്, സെക്രട്ടറി നൗഷാദ്, എസ്.ഡി.പി.ഐ വളാഞ്ചേരി മേഖല പ്രസിഡന്റ് മുസ്തഫ കെ പി, സെക്രട്ടറി അബ്ദുല്‍ അസീസ് വി.പി എന്നിവർ സംബന്ധിച്ചു.

The post പോപുലർ ഫ്രണ്ട് ഓഫ് ഇന്ത്യ കുറ്റിപ്പുറത്ത് നിർമിച്ച വീടിന്റെ താക്കോൽ കൈമാറി appeared first on Valanchery Online.