polling booth Archives - Valanchery Online

കല്ല്യാണ വീടൊന്നുമല്ല, പക്ഷെ ഇന്നിവിടെ വോട്ടുത്സവം നടക്കുകയാണ്. അറിയാം അനന്താവൂരിലെ മാതൃകാ പോളിങ്ങ് ബൂത്തിലെ വിശേഷങ്ങൾ

വളാഞ്ചേരിക്കാരൻ — Tue, 06 Apr 2021 10:54:35 +0000

തിരുന്നാവായ: ഓരോ തെരഞ്ഞെടുപ്പ് കാലം കാഴ്ചകള്‍ കൊണ്ടും സമ്പന്നമാണ്. വേറിട്ട വ്യത്യസ്തമായ പ്രവര്‍ത്തനങ്ങള്‍ നടത്തി മാതൃക ബൂത്ത് ഒരുക്കിയിരിക്കുകയാണ് തിരൂര്‍ നിയോജക മണ്ഡലം അനന്താവൂര്‍ വില്ലേജിലേ കുത്ത്കല്ല് ജി.എം.എല്‍.പി സ്‌കൂളിലേ 149,149 A,150 പോളിംഗ് ബൂത്തുകള്‍. ഒരുക്കൾ കണ്ടാൽ കല്ല്യാണ വീടു പോലെ ആയിരുന്നു. എന്നാൽ ഇവിടെ കല്ല്യാണം ഒന്നുമല്ല, പക്ഷെ ഇവിടെ കേരളത്തിലെവിടെയും എന്നപോലെ ഒരു സുപ്രധാന ഉത്സവം നടക്കുന്നുണ്ട്. അതെ ജനാധിപത്യത്തിൻ്റെ ഉത്സവം.

കാഴ്ചക്കാര്‍ക്ക് വിസ്മയമായി കവാടത്തില്‍ പുല്‍പായയിലും, വാഴ ഇലയിലാണ് സ്വാഗത ബോര്‍ഡ് എഴുതി വെച്ചിട്ടുള്ളത് ‘ ക്ഷീണമകറ്റാന്‍ വലിയ സ്റ്റില്‍ റമ്മില്‍ തന്നെ തിളപ്പിച്ചാറിയ വെള്ളവും, ശീതീകരിച്ച വെള്ളവും, സംഭാരവും പ്രത്യേകം തയ്യാര്‍ ചെയ്തിട്ടുണ്ട്.പൂര്‍ണ്ണമായും ഹരിത പ്രോട്ടോകോള്‍ പാലിച്ച ബൂത്തില്‍ സൂചനാ ബോര്‍ഡുകള്‍ എല്ലാം വാഴ ഇലയിലാണ് എഴുതി വച്ചിട്ടുള്ളത് വോട്ടര്‍മാരില്‍ കൗതകമേകിയത്.

വോട്ടര്‍മാര്‍ക്കുള്ള ഇരിപ്പിടത്തിലും മേശ പുറത്തും പ്രത്യേക വിരികളും തയാര്‍ ചെയ്ത ബൂത്തില്‍ കവാടം മുതല്‍ തന്നെ ഇലക്ട്രിക്ക് ബള്‍ബുകളും, ഈന്തോലകളും കൂടാതെ മേലാപ്പ് കൊണ്ടും ശ്രദ്ധേയമായി.വര്‍ണ്ണശബളമായ അലങ്കാര ലൈറ്റുകള്‍ കൊണ്ടും,വ്യത്യസ്തമായ ചിന്താഗതിയിലൂടെയും വേറിട്ട കാഴ്ചകളിലൂടെയും ഒരുക്കിയ തീര്‍ത്തും മാതൃക ബൂത്ത്. ഒരു പക്ഷെ പഴയ കാല കല്യാണ വീടിനെ അനുസ്മരിപ്പിക്കുംവിധം പ്രധാനകവാടം ഒരുക്കിയും.

കൈക്കുഞ്ഞുങ്ങളുമായി എത്തുന്ന അമ്മമാര്‍ക്ക് കുഞ്ഞുങ്ങള്‍ക്ക് മുലയൂട്ടാന്‍ വരെ സൗകര്യങ്ങളും, നടക്കാന്‍ കൈയ്യാത്തവര്‍ക്ക് വീല്‍ചെയറും ഒരുക്കിയും സുന്ദരമായ സൗഹാര്‍ദ അന്തരീക്ഷത്തില്‍ എല്ലാവിധ സൗകര്യങ്ങളോടും കൂടിയും വോട്ടെടുപ്പിന്റെ ആവേശത്തെ വാനോളമുയര്‍ത്തി ഒരു പോളിംഗ് ബൂത്ത് സജ്ജീകരിച്ചിരിക്കുകയാണ്.

രാഷ്ട്രീയ കാഴ്ചപ്പാടുകള്‍ മാറ്റിവെച്ച് ഒരു കൂട്ടം ചെറുപ്പക്കാരും,നാട്ടിലെ മുതിര്‍ന്നവരും ചേര്‍ന്ന് കൂട്ടായ്മയിലൂടെ ഒരുമയിലൂടെ ഒരു നാടിന്റെ സൗഹാര്‍ദ്ദംപ്രകടിപ്പിക്കുകയാണ് ഇവിടെ. കഴിഞ്ഞകാല ഇലക്ഷനുകളിലും സമാനമായ അനുഭവസാക്ഷ്യങ്ങള്‍ക്ക് നേതൃത്വം കൊടുത്തിട്ടുണ്ട് കുത്ത്കല്ല് പോളിംഗ് ബൂത്ത്.
Courtesy:SN

The post കല്ല്യാണ വീടൊന്നുമല്ല, പക്ഷെ ഇന്നിവിടെ വോട്ടുത്സവം നടക്കുകയാണ്. അറിയാം അനന്താവൂരിലെ മാതൃകാ പോളിങ്ങ് ബൂത്തിലെ വിശേഷങ്ങൾ appeared first on Valanchery Online.

പോളിംഗ് ബൂത്തിൽ പ്രവേശിക്കുമ്പോൾ ശ്രദ്ധിക്കേണ്ട കാര്യങ്ങൾ

വളാഞ്ചേരിക്കാരൻ — Tue, 23 Apr 2019 03:42:32 +0000

മലപ്പുറം: ലോക്‌സഭ തിരഞ്ഞെടുപ്പിൽ വോട്ടു രേഖപ്പെടുത്താൻ വോട്ടർ പോളിംഗ് ബൂത്തിലെത്തി വോട്ടു രേഖപ്പെടുത്തും വരെ വോട്ടർ എല്ലാം ക്രമത്തിലാണോ ചെയ്യുന്നതെന്ന് പോളിംഗ് ഉദ്യോഗസ്ഥർ ഉറപ്പുവരുത്തും. ഒന്നാം പോളിംഗ് ഉദ്യോഗസ്ഥനാണ് വോട്ടറെ തിരിച്ചറിയുന്ന വോട്ടർ പട്ടിക കൈവശം വയ്ക്കുന്നത്. പോളിംഗ് ബൂത്തിലെത്തുന്ന സമ്മതിദായകൻ ആദ്യമെത്തുന്നത് ഒന്നാം പോളിംഗ് ഉദ്യോഗസ്ഥന്റെ മുന്നിലേക്കാണ്. ഇദ്ദേഹം വോട്ടറെ തിരിച്ചറിയുന്നതോടെ വോട്ടിംഗിന്റെ നടപടിക്രമങ്ങൾ ആരംഭിക്കും.

രണ്ടാം പോളിംഗ് ഉദ്യോഗസ്ഥനാണ് സമ്മതിദായകന്റെ ഇടതുകൈയിലെ ചൂണ്ടാണി വിരലിൽ മഷി തേക്കുന്നത്. നഖത്തിനു മുകളിൽ നിന്നും താഴേക്കാണ് മഷിപുരട്ടേണ്ടത്. ഇദ്ദേഹം തന്നെയാണ് 17എ പട്ടിക പ്രകാരം സമ്മതിദായപ്പട്ടികയുടെ ഉത്തരവാദിത്തം വഹിക്കുന്നത്.

മൂന്നാം പോളിംഗ് ഉദ്യോഗസ്ഥനാണ് ഇലക്ട്രോണിക് വോട്ടിംഗ് യന്ത്രത്തിന്റെ ചുമതല വഹിക്കുന്നത്. രണ്ടാം പോളിംഗ് ഉദ്യോഗസ്ഥനൊപ്പം തന്നെയാണ് ഇദ്ദേഹവുമിരിക്കുന്നത്. രണ്ടാം പോളിംഗ് ഉദ്യോഗസ്ഥൻ നൽകുന്ന വോട്ടർ സ്ലിപ്പിന്റെ അടിസ്ഥാനത്തിൽ സമ്മതിദായകരെ വോട്ടുചെയ്യിക്കുന്നത് ഇദ്ദേഹത്തിന്റെ ചുമതലയാണ്. കൂടാതെ മഷി കൈയിൽ പുരട്ടിയിട്ടുണ്ടോയെന്നും നിരീക്ഷിക്കും. മൂന്നാം പോളിംഗ് ഉദ്യോഗസ്ഥന്റെ മേശയിൽ സജ്ജീകരിച്ചിരിക്കുന്ന കൺട്രോൾ യൂണിറ്റിലെ ബാലറ്റ് ബട്ടണിൽ അമർത്തിയ ശേഷം വോട്ടർക്ക് വോട്ടുയന്ത്രം സജ്ജീകരിച്ചിരിക്കുന്ന കമ്പാർട്ട്‌മെന്റിലെത്തി വോട്ടു ചെയ്ത് വോട്ടിംഗ് പ്രക്രിയ പൂർത്തിയാക്കാം. അന്ധനോ അവശനോ ആയ ആളിന് സ്വന്തമായി വോട്ടുചെയ്യാൻ കഴിയില്ലായെന്ന് പ്രിസൈഡിംഗ് ഓഫീസർക്ക് ബോദ്ധ്യപ്പെട്ടാൽ വോട്ടർ കൊണ്ടു വരുന്ന സഹായിയെ അനുവദിക്കും. ഇതിനായി സഹായിയുടെ ഡിക്ലറേഷൻ എഴുതി വാങ്ങും.

എങ്ങനെ വോട്ട് ചെയ്യാം
1. പോളിംഗ് ബൂത്തിൽ പ്രവേശിക്കുക
വോട്ട് ചെയ്യാനായി സജ്ജീകരിച്ച കമ്പാർട്ട്‌മെന്റിനുള്ളിൽ വോട്ടർ പ്രവേശിക്കുമ്പോൾ പ്രിസൈഡിംഗ് ഓഫീസർ ബാലറ്റ് യൂണിറ്റ് വോട്ട് ചെയ്യുന്നതിനായി സജ്ജമാക്കും.
2.വോട്ട് രേഖപ്പെടുത്തുക
ബാലറ്റ് യൂണിറ്റിൽ വോട്ട് ചെയ്യാനുദ്ദേശിക്കുന്ന സ്ഥാനാർത്ഥിയുടെ പേരിന് /ചിഹ്നത്തിന് നേരെയുള്ള നീല ബട്ടൺ അമർത്തുക.
3.ലൈറ്റ് ശ്രദ്ധിക്കുക
വോട്ട് ചെയ്ത സ്ഥാനാർത്ഥിയുടെ പേര്/ ചിഹ്നത്തിന് നേരെയുള്ള ചുവന്ന ലൈറ്റ് പ്രകാശിക്കുന്നതായി കാണാം.
4.പ്രിന്റ് ശ്രദ്ധിക്കുക
ബാലറ്റ് യൂണിറ്റിന് സമീപം വച്ചിരിക്കുന്ന വി.വി പാറ്റ് മെഷീനിലെ പ്രിന്ററിൽ വോട്ട് ചെയ്ത സ്ഥാനാർത്ഥിയുടെ ക്രമനമ്പർ, പേര്, ചിഹ്നം എന്നിവ അച്ചടിച്ച സ്ലിപ്പ് കാണാനാവും. ഈ സ്ലിപ്പ് ഏഴ് സെക്കന്റ് നേരമേ കാണാനാവൂ. ശേഷം പ്രിന്ററിന്റെ ഡ്രോപ്പ് ബോക്‌സിലൂടെ തിരികെ നിക്ഷേപിക്കപ്പെടുകയും ഒരു ബീപ്പ് ശബ്ദം കേൾക്കുകയും ചെയ്യും. ബാലറ്റ് അച്ചടിച്ച സ്ലിപ്പ് കാണാതിരിക്കുകയും ബീപ്പ് ശബ്ദം കേൾക്കാതിരിക്കുകയും ചെയ്താൽ പ്രിസൈഡിംഗ് ഓഫീസറുമായി ബന്ധപ്പെടണം.

പോളിംഗ് ബൂത്തിലേക്കുള്ള പ്രവേശനം ഇവർക്ക് മാത്രം
സമ്മതിദായകർ, പോളിംഗ് ഉദ്യോഗസ്ഥർ, സ്ഥാനാർത്ഥി, സ്ഥാനാർത്ഥിയുടെ ഏജന്റ്, പോളിംഗ് ഏജന്റ്, തിരഞ്ഞെടുപ്പ് കമ്മിഷൻ നിയോഗിച്ച ഉദ്യോഗസ്ഥർ, തിരഞ്ഞെടുപ്പ് ജോലിയിൽ ഏർപ്പെട്ടിട്ടുള്ള ജീവനക്കാർ, കൈക്കുഞ്ഞ്, കാഴ്ചയില്ലാത്തതോ പരസഹായം ആവശ്യമുള്ളതോ ആയ സമ്മതിദായകരുടെ സഹായികൾ എന്നിവർക്ക് മാത്രമാണ് തിരഞ്ഞെടുപ്പ് ദിവസം പോളിംഗ് ബൂത്തിലേക്കുള്ള പ്രവേശനം

The post പോളിംഗ് ബൂത്തിൽ പ്രവേശിക്കുമ്പോൾ ശ്രദ്ധിക്കേണ്ട കാര്യങ്ങൾ appeared first on Valanchery Online.