nipah virus Archives - Valanchery Online

കലക്ടർക്കും ഡി.എം.ഒക്കും നാളെ ജില്ലയുടെ ആദരം

വളാഞ്ചേരിക്കാരൻ — Sun, 17 Jun 2018 16:25:31 +0000

മലപ്പുറം: നിപ വൈറസ് ഭീതിയില്‍ ജില്ലയില്‍ സമയോചിതമായ ഇടപെടല്‍ നടത്താൻ നേതൃത്വം നൽകിയ ജില്ല കലക്ടര്‍ അമിത് മീണയെയും ജില്ല മെഡിക്കല്‍ ഓഫിസര്‍ ഡോ. കെ. സക്കീനയെയും ജില്ല പഞ്ചായത്ത് ആദരിക്കും. തിങ്കളാഴ്ച ഉച്ചക്ക് മൂന്നിന് ജില്ല പഞ്ചായത്ത് കോൺഫറൻസ് ഹാളിലാണ് ചടങ്ങ്.

The post കലക്ടർക്കും ഡി.എം.ഒക്കും നാളെ ജില്ലയുടെ ആദരം appeared first on Valanchery Online.

ആരോഗ്യജാഗ്രതാ പ്രവര്‍ത്തനങ്ങള്‍ രാഷ്ട്രീയ പാര്‍ട്ടികളും മതസംഘടനകളും ഏറ്റെടുക്കണം -ജില്ലാ കലക്ടര്‍

വളാഞ്ചേരിക്കാരൻ — Wed, 06 Jun 2018 02:20:26 +0000

മലപ്പുറം: ജില്ലയിലെ ആരോഗ്യ ജാഗ്രത പ്രവര്‍ത്തനങ്ങള്‍ രാഷട്രീയ പാര്‍ട്ടികളും മത സംഘടനകളും ഏറ്റെടുക്കണമെന്ന് ജില്ലാ കല്കടര്‍ അമിത് മീണ. ആരോഗ്യ ജാഗ്രതാ പ്രവര്‍ത്തനങ്ങള്‍ തദ്ദേശ സ്ഥാപനങ്ങളുടെയും ആരോഗ്യ വകുപ്പിന്റെയും മാത്രമാണ് എന്നാണ് പലരും വിശ്വസിക്കുന്നത്. ഈ ധാരണ തിരുത്താന്‍ രാഷട്രീയ പാര്‍ട്ടികളുടെ മത സംഘടനകളുടെയും സഹകരണം ആവശ്യമാണ്. ജില്ലയില്‍ നിപ വൈറസ് ആശങ്കയുടെ പേരില്‍ ജില്ലാ കലക്ടര്‍ നല്‍കിയ നിര്‍ദ്ദേശങ്ങളോട് പൊതുജനങ്ങളില്‍ നിന്ന് മികച്ച് പ്രതികരണമാണുണ്ടായത്. പകര്‍ച്ച പനിയും മറ്റും ജില്ലക്ക് ഭീഷണി ഉയര്‍ത്തി നില്‍ക്കുന്നുണ്ട്. ഇതിനെ നമുക്ക് മറികടക്കണം.
നിപ വൈറസ് നിയന്ത്രണവുമായി ബന്ധപ്പെട്ട്് ഇതു വരെ നടത്തിയ പ്രവര്‍ത്തനങ്ങളില്‍ എല്ലാവരുടെയും സഹകരണം ഉണ്ടായിട്ടുണ്ട്. എന്നാല്‍ ലക്ഷ്യം കാണണമെങ്കില്‍ കുറച്ചു ദിവസം കൂടി നാം കാത്തിരിക്കണം. ജൂണ്‍ 12 ന് വൈറസ് പ്രവര്‍ത്തനത്തിന്റെ ശക്തിയുടെ ഒരു ഘട്ടം കഴിയും. ഈ കാലയളവില്‍ മത പ്രഭാഷണങ്ങള്‍, രാഷട്രീയ പാര്‍ട്ടകളുടെ പൊതു യോഗങ്ങള്‍ എന്നിവ നിര്‍ബന്ധമായും മാറ്റി വച്ച് സഹകരിക്കണം. പൂര്‍ണ സുരക്ഷിതരായി എന്ന് ഉറപ്പാക്കാന്‍ ജുലായ് ഒന്ന് വരെ കാത്തിരിക്കണം.

നിപ വൈറസ് ആശങ്കയുടെ പശ്ചാത്തലത്തില്‍ വിളിച്ചു ചേര്‍ത്ത രാഷട്രീയ കക്ഷി നേതാക്കളുടെയും മത സംഘടന നേതാക്കളുടെയും യോഗത്തില്‍ സംസാരിക്കുകയായിരുന്നു കലക്ടര്‍. മുഖ്യമന്ത്രി നിര്‍ദ്ദേശത്തിന്റെ അടിസ്ഥാനത്തിലാണ് യോഗം വിളിച്ചത്. നിപ രോഗികളുമായി ബന്ധപ്പെട്ട് 200 ഓളം പേരാണ് ഇപ്പോള്‍ ജില്ലയില നിരീക്ഷണത്തിലുള്ളത്. ഇവരെ എല്ലാ ദിവസവും ആരോഗ്യ വകുപ്പ് നിരീക്ഷിച്ച് റിപ്പോര്‍ട്ട് നല്‍കുന്നുണ്ട്. ഇതു സംബന്ധിച്ച് എല്ലാ ദിവസവും കലക്‌ട്രേറ്റില്‍ അവലോകനവും നടക്കുന്നുണ്ട്.

പനി,ജലദോഷം മറ്റ് അസുഖങ്ങള്‍ ഉള്ളവര്‍, പൊതു പരിപാടികളില്‍ പങ്കെടുക്കരുത്. പരിപാടികളില്‍ ജ്യൂസ്,മറ്റ് തണുത്ത് പാനീയങ്ങള്‍ ഒഴിവാക്കുക പകരം ചായ കൊടുക്കുക. പൊതു പരിപാടികളില്‍ സ്റ്റീല്‍ പാത്രങ്ങള്‍ ഉപയോഗിക്കുക. ലോഷന്‍ ഉപയോഗിച്ച് കൈ കഴുകുക. കല്ല്യാണത്തിന് പങ്കെടുത്തവര്‍ക്കാണ് കഴിഞ്ഞ വര്‍ഷം ഏറ്റെവും കൂടതല്‍ മഞ്ഞപ്പിത്തം ഉണ്ടായിട്ടുള്ളതെന്ന് ആരോഗ്യ വകുപ്പിന്റെ കണക്കുകള്‍ കാണിച്ചു ജില്ലാ മെഡിക്കല്‍ ഓഫിസര്‍ ഡോ.കെ. സക്കീന പറഞ്ഞു. തണുത്ത വെള്ളം,വെല്‍ക്കം ഡ്രിങ്ക്‌സ്, എന്നിവ കഴിച്ച പുരുഷന്‍മാരാണ് ഇതില്‍ കൂടുതലും പെട്ടത്.
കലക്‌ട്രേറ്റ് കോണ്‍ഫ്രന്‍സ് ഹാളില്‍ നടന്ന യോഗത്തില്‍ എ.ഡി.എം വി.രാമചന്ദ്രന്‍, ആര്‍.ഡി.ഒ. കെ.അജീഷ്,ജില്ലാ മെഡിക്കില്‍ ഓഫിസര്‍ കെ.സക്കീന,ഡപ്യുട്ടി ഡി.എം.ഒ. ഡോ.മുഹമ്മദ് ഇസ്മായില്‍ തുടങ്ങിയവര്‍ പങ്കെടുത്തു.

The post ആരോഗ്യജാഗ്രതാ പ്രവര്‍ത്തനങ്ങള്‍ രാഷ്ട്രീയ പാര്‍ട്ടികളും മതസംഘടനകളും ഏറ്റെടുക്കണം -ജില്ലാ കലക്ടര്‍ appeared first on Valanchery Online.

നിപ്പയ്ക്ക് ഹോമിയോ മരുന്ന്: ഡോക്ടർക്കെതിരെ നടപടിക്ക് ശുപാർശ

വളാഞ്ചേരിക്കാരൻ — Wed, 06 Jun 2018 01:28:00 +0000

മലപ്പുറം: നിപ്പ വൈറസ് ബാധയുമായി ബന്ധപ്പെട്ട് വ്യാജ പ്രചാരണം നടത്തിയ ഹോമിയോ ഡോക്ടർക്കെതിരെ നിയമനടപടി സ്വീകരിക്കാൻ കലക്ടർ അമിത് മീണ, ജില്ലാ പൊലീസ് മേധാവിക്കു നിർദേശം നൽകി. പുത്തനത്താണിയിൽ പ്രാക്ടീസ് നടത്തുന്ന ഡോക്ടർക്കെതിരെയാണ് നടപടിക്കു ശുപാർശ. നിപ്പ വൈറസ് രോഗത്തിന് ഹോമിയോ വിഭാഗത്തിൽ മരുന്നു ലഭ്യമാണെന്ന വ്യാജ സന്ദേശം ഇയാൾ സമൂഹമാധ്യമങ്ങളിലൂടെ പ്രചരിപ്പിച്ചെന്നാണ് പരാതി. താനൂർ മുക്കോല അംബേദ്കർ കോളനിയിലെ ചിലർ നിപ്പ രോഗബാധിതരുമായി അടുത്തിടപഴകിയിട്ടുണ്ടെന്നും അവരെ ഒറ്റപ്പെടുത്തണമെന്നും ആഹ്വാനം ചെയ്തു വ്യാജ സന്ദേശം പ്രചരിപ്പിച്ചവർക്കെതിരെ സ്പെഷൽ ബ്രാഞ്ച് അന്വേഷണം തുടങ്ങി.

The post നിപ്പയ്ക്ക് ഹോമിയോ മരുന്ന്: ഡോക്ടർക്കെതിരെ നടപടിക്ക് ശുപാർശ appeared first on Valanchery Online.

നിപ: ഒരു മാസം ആരോഗ്യ ജാഗ്രത-മന്ത്രി കെ.ടി ജലീൽ

വളാഞ്ചേരിക്കാരൻ — Sat, 02 Jun 2018 02:45:13 +0000

മലപ്പുറം: ഈ മാസം തദ്ദേശഭരണ സ്ഥാപനങ്ങൾ ആരോഗ്യജാഗ്രതാ പ്രവർത്തനങ്ങൾക്കായി മാറ്റിവയ്ക്കണമെന്ന് മന്ത്രി കെ.ടി.ജലീൽ. നിപ്പ വൈറസ് ആശങ്ക തീരുന്നതുവരെ ആരോഗ്യവകുപ്പിന്റെ സൂക്ഷ്‌മനിരീക്ഷണം തുടരും. ഡെങ്കിപ്പനി ഉൾപ്പെടെയുള്ള പകർച്ചപ്പനി ചില ഭാഗങ്ങളിൽ ഭീഷണി ഉയർത്തുന്നുണ്ട്. പൊതുജനങ്ങളുടെയും സന്നദ്ധ സംഘടനകളുടെയും കൂട്ടായ്‌മയിലൂടെ ശുചിത്വ ബോധവൽക്കരണ പ്രവർത്തനങ്ങൾ നടപ്പാക്കണം. ഉദ്യോഗസ്ഥർ പ്രവർത്തനങ്ങളിൽ വിട്ടുവീഴ്‌ച ചെയ്യുന്നില്ലെന്ന് തദ്ദേശസ്ഥാപന അധ്യക്ഷർ ഉറപ്പാക്കണം.
ജില്ലയിലെ ആരോഗ്യജാഗ്രതാ പ്രവർത്തനങ്ങൾ വിലയിരുത്തുന്നതിനായി ചേർന്ന യോഗത്തിൽ ആധ്യക്ഷ്യം വഹിക്കുകയായിരുന്നു മന്ത്രി. എല്ലാ ദിവസവും വിലയിരുത്തൽ വേണം തദ്ദേശസ്ഥാപന സെക്രട്ടറിമാർ ഈ മാസത്തെ എല്ലാ ദിവസവും രാവിലെ ഏഴിന് ഓഫിസിലെത്തി പഞ്ചായത്ത് വാഹനം ഉപയോഗിച്ച് പ്രധാന സ്ഥലങ്ങൾ സന്ദർശിക്കണമെന്ന് മന്ത്രിയുടെ നിർദേശം. വാർഡ്‌തല ശുചീകരണ പ്രവർത്തനങ്ങൾ ദിവസവും വിലയിരുത്തണം. പഞ്ചായത്ത് സെക്രട്ടറിമാരും മെഡിക്കൽ ഓഫിസർമാരും നിരന്തരം ആശയവിനിമയം നടത്തണം. ആരോഗ്യവകുപ്പ് ജീവനക്കാർ ഒരുമാസം കൂടുതൽ സമയം ജോലി ചെയ്യാൻ തയാറാവണം.

ഡോക്‌ടർമാരുടെ സേവനം ഡിഎംഒ ഉറപ്പാക്കണം. നഗരസഭാ സെക്രട്ടറിമാർ നഗരപരിധിയിൽ താമസിക്കുന്നെന്ന് തദ്ദേശസ്ഥാപന അധ്യക്ഷർ ഉറപ്പുവരുത്തണം. നഗരസഭയിൽ ആരോഗ്യവകുപ്പ് ജീവനക്കാർ ഡ്യൂട്ടി സമയങ്ങളിൽ യൂണിഫോം ധരിക്കണം. നിരീക്ഷണത്തിന് സോഫ്റ്റ്‌വെയർ ആരോഗ്യ മേഖലയിലുൾപ്പെടെയുള്ള തദ്ദേശസ്ഥാപനങ്ങളുടെ പ്രവർത്തനം നിരീക്ഷിക്കാൻ പ്രത്യേക സോഫ്‌റ്റ്‌വെയർ തയാറാകുന്നു. അഞ്ചിന് പ്രവർത്തിച്ചുതുടങ്ങും. ഫണ്ട് വിനിയോഗം ഉൾപ്പെടെയുള്ള ദൈനംദിന പ്രവർത്തനങ്ങൾ എല്ലാ ദിവസവും അപ്‌ലോഡ് ചെയ്യണം.
തദ്ദേശസ്ഥാപന അധ്യക്ഷർ, സെക്രട്ടറിമാർ, മെഡിക്കൽ ഓഫിസർമാർ എന്നിവർ പങ്കെടുത്തു. കലക്‌ടർ അമിത് മീണ, ഡിഎംഒ കെ.സക്കീന, എൻഎച്ച്എം മാനേജർ എ.ഷിബുലാൽ, ഡപ്യൂട്ടി ഡിഎംഒ മുഹമ്മദ് ഇസ്‌മായിൽ, പഞ്ചായത്ത് ഡപ്യൂട്ടി ഡയറക്‌ടർ കെ.മുരളീധരൻ, പഞ്ചായത്ത് അസോസിയേഷൻ സെക്രട്ടറി ടി.സത്യൻ എന്നിവർ പ്രസംഗിച്ചു.

The post നിപ: ഒരു മാസം ആരോഗ്യ ജാഗ്രത-മന്ത്രി കെ.ടി ജലീൽ appeared first on Valanchery Online.