mango Archives - Valanchery Online

റംസാന്‍ വിപണിയില്‍ കാര്‍ബൈഡ് പഴങ്ങള്‍; പെരിന്തല്‍മണ്ണയില്‍ അരലോഡ് നാടൻ മാങ്ങ പിടികൂടി

വളാഞ്ചേരിക്കാരൻ — Wed, 08 May 2019 23:40:35 +0000

പെരിന്തൽമണ്ണ: കാത്സ്യം കാർബേഡ് ഉപയോഗിച്ച‌് പഴുക്കാൻ വച്ച അരലോഡ് നാടൻ മാങ്ങ പെരിന്തൽമണ്ണ നഗരസഭ ആരോഗ്യ വിഭാഗം പിടികൂടി. പെരിന്തൽമണ്ണ പിടിഎം കോളേജിനുസമീപം താമസിക്കുന്ന പതായ്ക്കര കേലശേരി മുഹമ്മദലിയുടെ വീടിനോട് ചേർന്നുള്ള ഷെഡ്ഡിലെ മുറിയിൽനിന്നാണ് മാങ്ങ പിടികൂടിയത്. പെരിന്തൽമണ്ണ നഗരസഭയിലെ ഹെൽത്ത് ഇൻസ്പക്ടർ സി റഫീഖ്, ജെഎച്ച്ഐ ടി രാജീവ് എന്നിവരടങ്ങിയ സംഘം നടത്തിയ പരിശോധനയിലാണ് മാങ്ങ കാർബേഡ് വച്ചനിലയിൽ കണ്ടെത്തിയത്.

മുറിക്കുള്ളിൽ കൂട്ടിയിട്ട മാങ്ങക്കിടയിൽ ചെറിയ കടലാസ് പൊതികളിലായി കാത്സ്യം കാർബേഡ് വച്ചിരിക്കയായിരുന്നു. പിടികൂടിയ മാങ്ങ നഗരസഭയുടെ മാലിന്യസംസ്കരണ പ്ലാന്റിൽ കൊണ്ടുപോയി നശിപ്പിച്ചു. വീട്ടുടമസ്ഥനിൽനിന്ന് പിഴ ഈടാക്കുമെന്നും അധികൃതർ പറഞ്ഞു.

റമദാൻ വിപണി ലക്ഷ്യമിട്ടാണ് നാട്ടിൽനിന്ന് ശേഖരിച്ച മാങ്ങ ഇത്തരത്തിൽ പെട്ടെന്ന് പഴുപ്പിച്ച് മാർക്കറ്റിലെത്തിക്കുന്നത്. നാടൻ മാങ്ങ എന്ന പേരിൽ വിലകൂട്ടിയാണ് ഇത്തരം മാങ്ങ കടകളിൽ വിൽക്കുന്നത്. പിടിച്ചെടുത്ത മാങ്ങ വിദഗ്ദ പരിശോധനക്കായി ലാബിലേക്ക് അയക്കുമെന്നും അധികൃതർ പറഞ്ഞു. പെരിന്തൽമണ്ണയിലെ വിവിധ ഭാഗങ്ങളിൽ നാടൻ മാങ്ങകൾ ശേഖരിച്ച് ഇത്തരത്തിൽ പഴുപ്പിച്ച് മാർക്കറ്റിൽ എത്തിക്കുന്ന കേന്ദ്രങ്ങൾ പ്രവർത്തിക്കുന്നുണ്ടെന്ന് അറിയുന്നു.
മാർക്കറ്റിൽ ലഭിക്കുന്ന തണ്ണി മത്തനിലും നല്ല ചുവപ്പ് നിറം കിട്ടാൻ ഇത്തരം കൃത്രിമമാർഗങ്ങൾ ഉപയോഗിക്കുന്നുണ്ടെന്നും അറിയുന്നു. പെരിന്തൽമണ്ണയിൽ വരും ദിവസങ്ങളിൽ പരിശോധന കർശനമാക്കുമെന്ന് അധികൃതർ അറിയിച്ചു.

The post റംസാന്‍ വിപണിയില്‍ കാര്‍ബൈഡ് പഴങ്ങള്‍; പെരിന്തല്‍മണ്ണയില്‍ അരലോഡ് നാടൻ മാങ്ങ പിടികൂടി appeared first on Valanchery Online.

നോമ്പ് നാളുകളിലെ രാത്രികൾ സജീവമാക്കി തൊട്ടാപൂരിമാംഗോ മസാല

വളാഞ്ചേരിക്കാരൻ — Sat, 19 May 2018 16:11:20 +0000

കൊളത്തൂർ: നോമ്പായത്തോടെ കവലകളിലും മറ്റും തൊട്ടാപൂരി മാംഗോ മസാലയുമായി യുവാക്കൾ സജീവമാകുന്നു. പഴുത്ത മാമ്പഴത്തിൽ ഉപ്പും മുളകും ചെമ്മീൻ പൊടിയും പ്രത്യേക ചേരുവകളും ചേർത്ത് നൽകുന്ന ഈ മസാല മാങ്ങ തിന്നാൻ ദൂരെ ഇടങ്ങളിൽ നിന്ന് പോലും ആളുകൾ എത്തുന്നുണ്ട്. കഴിഞ്ഞ കുറച്ചു വർഷങ്ങളായി മലപ്പുറം – പടപ്പറമ്പ് ഭാഗങ്ങളിലാണ് ജില്ലയിൽ ഇവ ആദ്യമായി എത്തിയത് യുവാക്കളുടെ ഇടയിലടക്കം പെട്ടന്ന് തരംഗമായതോടെ മറ്റിടങ്ങളിലേക്കും ഇവയുടെ കച്ചവടം വ്യാപിക്കുകയായിരുന്നു.
നോമ്പ് ഒന്നുമുതൽ പുലാമന്തോൾ – എടപ്പലം പാലങ്ങൾക്ക് സമീപം ഇതിന്റ കച്ചവടം പൊടിപൊടിക്കുന്നുണ്ട്. തൊട്ടാപൂരി മാംഗോ മസാല എന്നാണ് ഇതിനു പേരിട്ടിരിക്കുന്നത്. ചിലയിടങ്ങളിൽ മറ്റു പേരുകളിലും ഇവ അറിയപ്പെടുന്നുണ്ട്. നോമ്പ് തുറക്കുശേഷം സജീവമാകുന്ന തട്ടുകടകളിലാണ് ഇവ വിൽപ്പനക്ക് ഒരുക്കുന്നത് 20 രൂപക്ക് മൂന്ന് വലിയ കഷ്ണം ഉൾക്കൊള്ളിച്ച പേക്കുകളായും കൂടുതൽ വേണ്ടവർക്ക് അതനുസരിച്ചുമാണ് വിൽപ്പന. പഴുക്കാൻ പാകമായ മാങ്ങയാണ് ഇതിന് കൂടുതലായി ഉപയോഗിക്കുന്നത് നോമ്പ് കാലങ്ങളിൽ രാത്രിയാണ് ഇവ കൂടുതലായും വിൽപ്പന നടക്കുന്നത് എന്നാണ് കച്ചവടക്കാർ പറയുന്നത്. യുവാക്കളുടെ നേതൃത്വത്തിൽ നടക്കുന്ന കച്ചവടം ഏതായാലും യുവാക്കളുടെയും കുട്ടികളുടെയും ഇടയിൽ ജനപ്രിയമായിട്ടുണ്ട്.

The post നോമ്പ് നാളുകളിലെ രാത്രികൾ സജീവമാക്കി തൊട്ടാപൂരിമാംഗോ മസാല appeared first on Valanchery Online.

വൈവിധ്യമോടെ ചക്ക-മാമ്പഴം മേള വളാഞ്ചേരിയില്‍ തുടങ്ങി

വളാഞ്ചേരിക്കാരൻ — Wed, 13 Dec 2017 17:02:45 +0000

വളാഞ്ചേരി: വളാഞ്ചേരിയില്‍ ചക്ക-മാമ്പഴം മേള തുടങ്ങി. ചക്കയുടെ മുന്നൂറിലധികവും മാങ്ങയുടെ ഇരുപത്തഞ്ചോളവും വിഭവങ്ങളാണ് പ്രദര്‍ശനത്തിനും വില്‍പ്പനയ്ക്കുമായുള്ളത്.

ചക്കക്കുരുകൊണ്ടുള്ള പുട്ടുപൊടി, ഉണ്ണിയപ്പം, ചമ്മന്തിപ്പൊടി, സ്‌ക്വാഷ് തുടങ്ങിയ അപൂര്‍വം ഉത്പന്നങ്ങള്‍ മേളയുടെ സവിശേഷതയാണെന്ന് ഭാരവാഹികളായ റെജി തോമസ്, എബി ഫ്രാന്‍സിസ് എന്നിവര്‍ പത്രസമ്മേളനത്തില്‍ പറഞ്ഞു. പഴുത്ത ചക്കയും തേന്‍, ഇഞ്ചി, വെളുത്തുള്ളി തുടങ്ങിയവയും മേളയിലുണ്ട്.

അഖിലകേരള ജാക്ക്ഫ്രൂട്ട് പ്രൊമോഷന്‍ അസോസിയേഷനും മലബാര്‍ മാവ് കര്‍ഷകസമിതിയും കണ്ണൂര്‍ ഇരിട്ടിയിലെ എസ്‌പോസല്‍ കൗണ്‍സില്‍ ഓഫ് റിസോഴ്‌സസും ചേര്‍ന്നാണ് ചക്ക-മാമ്പഴ മേള ഒരുക്കിയത്.

ഇരുപതുദിവസത്തെ മേള ആബിദ്ഹുസൈന്‍ തങ്ങള്‍ എം.എല്‍.എ. ഉദ്ഘാടനംചെയ്തു. നഗരസഭാ ഉപാധ്യക്ഷന്‍ കെ.വി. ഉണ്ണിക്കൃഷ്ണന്‍ അധ്യക്ഷതവഹിച്ചു. ആദ്യവില്‍പ്പന നഗരസഭാ പ്രതിപക്ഷനേതാവ് ടി.പി. അബ്ദുള്‍ഗഫൂര്‍ നിര്‍വഹിച്ചു. ഇ.പി. അച്യുതന്‍, ടി. ഷിഹാബുദ്ദീന്‍, കെ.പി. അബ്ബാസ്, കെ.പി. ശങ്കരന്‍, എബി ഫ്രാന്‍സിസ്, റെജി തോമസ് എന്നിവര്‍ പ്രസംഗിച്ചു.

The post വൈവിധ്യമോടെ ചക്ക-മാമ്പഴം മേള വളാഞ്ചേരിയില്‍ തുടങ്ങി appeared first on Valanchery Online.