letter Archives - Valanchery Online

ചന്ദ്രയാൻ 3; ഐ.എസ്.ആർ.ഒ.യിലെ ശാസ്ത്രജ്ഞർക്ക് അഭിനന്ദന കത്തുകളയച്ചു പേരശ്ശന്നൂർ ഗവ. ഹയർസെക്കന്റി സ്കൂൾ വിദ്യാർഥികൾ

വളാഞ്ചേരിക്കാരൻ — Fri, 01 Sep 2023 05:12:44 +0000

കുറ്റിപ്പുറം : ചാന്ദ്രസ്പർശത്തിന് നേതൃത്വംനൽകി ഭാരതത്തെ ലോകത്തിന്റെ നെറുകയിൽ എത്തിച്ച ഐ.എസ്.ആർ.ഒ.യിലെ ശാസ്ത്രജ്ഞർക്ക് പേരശ്ശന്നൂർ ഗവ. ഹയർസെക്കന്റി സ്കൂൾ വിദ്യാർഥികൾ അഭിനന്ദന കത്തുകൾ അയച്ചു. സ്കൂളിലെ സയൻസ് ക്ലബ്ബ് അംഗങ്ങളുടെ നേതൃത്വത്തിലാണ് അഭിനന്ദനങ്ങൾ എഴുതിയ പോസ്റ്റ് കാർഡുകൾ അയച്ചത്. രേഷ്മ, അലീഷ, അർച്ചന, ശ്രേയ, വൈഗ, അനഘ തുടങ്ങിയവർ നേതൃത്വംനൽകി.

The post ചന്ദ്രയാൻ 3; ഐ.എസ്.ആർ.ഒ.യിലെ ശാസ്ത്രജ്ഞർക്ക് അഭിനന്ദന കത്തുകളയച്ചു പേരശ്ശന്നൂർ ഗവ. ഹയർസെക്കന്റി സ്കൂൾ വിദ്യാർഥികൾ appeared first on Valanchery Online.

ഓൺലൈൻ പഠനത്തിന് സൗകര്യമില്ലെന്ന് കത്തെഴുതി വിദ്യാർത്ഥി; സ്മാർട്ഫോൺ സമ്മാനിച്ച് ജില്ലാ പഞ്ചായത്തംഗം എ പി സബാഹ്

വളാഞ്ചേരിക്കാരൻ — Sun, 13 Jun 2021 08:48:08 +0000

എടയൂർ: സ്കൂളിലെ ക്ലാസുകൾ ഓൺലൈനായി പഠിക്കാൻ സാഹചര്യം ഇല്ലെന്ന് കത്തയച്ച വിദ്യാർത്ഥിനിക്ക് സ്മാർട്ഫോണുമായി ജില്ലാ പഞ്ചായത്തംഗം. ജില്ലാ പഞ്ചായത്തിലെ എടയൂർ ഡിവിഷൻ അംഗമായ എ പി സബാഹാണ് എടയൂർ ഗ്രാമപഞ്ചായത്തിലെ പതിനൊന്നാം വാർഡിലെ താമസക്കാരിയായ പൂവത്തുംതറയിൽ വാടകയ്ക്ക് താമസിക്കുന്ന മുഹമ്മദ് ബഷീറിൻ്റെ മകൾ മുബഷീറയ്ക്ക് സബാഹ് ഫോൺ സമ്മാനിച്ചത്.

ഹോട്ടൽ ജോലി ചെയ്ത് ജീവിച്ചിരുന്ന ഈ കുട്ടിയുടെ പിതാവിന് ലോക്ക് ഡൗൺ കാരണം ജോലി ഇല്ലാതായതോടെ പ്രയാസത്തിലായിരുന്നു ഇവർ. അഞ്ച് കുട്ടികൾ പിതാവിൻ്റെ ഒരു ഫോണിലാണ് പഠനം നടത്തിയിരുന്നത്. ഇത് പ്രയാസമായതോടെയാണ് താൻ ഇങ്ങനെയൊരു കത്തെഴുതിയതെന്ന് മുബഷിറ പറയുന്നു. കത്ത് ലഭിച്ച എ.പി സബാഹ് പുത്തനൊരു ഫോണുമായി വീട്ടിലെത്തി. മുബഷിറ ഇപ്പോൾ ഫോൺ ലഭിച്ചതിൻ്റെ സന്തോഷത്തിലാണ്. എ.പി സബാഹിനൊപ്പം എടയൂർ ഗ്രാമ പഞ്ചായത്ത് പ്രസിഡണ്ട് എം.പി ഹസീന, മൊയ്തു എടയൂർ, ടി.കെ.ജംഷീദ്, നിഷാദ് മൊയ്തു എന്നിവരും ഉണ്ടായിരുന്നു.

The post ഓൺലൈൻ പഠനത്തിന് സൗകര്യമില്ലെന്ന് കത്തെഴുതി വിദ്യാർത്ഥി; സ്മാർട്ഫോൺ സമ്മാനിച്ച് ജില്ലാ പഞ്ചായത്തംഗം എ പി സബാഹ് appeared first on Valanchery Online.

അഭിനന്ദനക്കുറിപ്പിന് നന്ദിയറിയിക്കാൻ ഇഷയെ തേടിയെത്തി വളാഞ്ചേരി പോലീസ്

വളാഞ്ചേരിക്കാരൻ — Sat, 09 May 2020 17:52:35 +0000

വളാഞ്ചേരി: പത്രത്താളിൽ താൻ കണ്ട ഒരു ചിത്രമാണ് രണ്ടാം ക്ലാസുകാരി ഇഷ മെഹറിന്റെ മനസ്സിൽ തൊട്ടത്. വീടു വിട്ട് തെരുവിലലഞ്ഞ വയോധികനെ വളാഞ്ചേരി പോലീസ് സ്റ്റേഷനിലെ രണ്ട് പോലീസുകാരുടെ സമയോചിത ഇടപെടൽ മൂലം ബന്ധുക്കളുടെ അരികിലെത്തിച്ചിരുന്നു. വളരെയധികം അവശനായ അദ്ദേഹത്തെ പരിചരിച്ച ശേഷമാണ് ബന്ധുക്കളുടെ അരികിലെത്തിച്ചത്. ഈ സംഭവത്തെക്കുറിച്ച് വളാഞ്ചേരി ഓൺലൈനിൽ അടക്കമുള്ള മാധ്യമങ്ങളിൽ പ്രസിദ്ധീകരിച്ചിരുന്നു. വാർത്തയും ചിത്രങ്ങളും കണ്ടാണ് കഴിഞ്ഞ ദിവസം ഇഷ വളാഞ്ചേരി പോലീസ് സ്റ്റേഷനിലേക്ക് കത്തെഴുതിയത്. തന്റെ കത്തിൽ ഒരു വയോധികന് മാസ്ക് കെട്ടികൊടുക്കുന്ന ചിത്രത്തിന്റെ കട്ടിങ്ങും വച്ചിരുന്നു.

കത്ത് വായിച്ച വളാഞ്ചേരി എസ്.എച്.ഒ എം.കെ ഷാജിയും സംഘവും കത്തെഴുതിയ ആളെ നേരിൽ കാണാൻ ഇഷയുടെ ബാവപ്പടിയിലെ വീട്ടിലെത്തി. വീട്ടിൽ എത്തിയ പോലീസുകാരെ ഇഷയും വല്ല്യൂപ്പ നാലകത്ത് സൈതലവിയും വല്യുമ്മ ഫാത്തിമയും ചേർന്ന് സ്വീകരിച്ചു. ആശംസക്കുള്ള നന്ദി അറിയിക്കുകയും ഇഷക്കായി കൊണ്ടുവന്ന സമ്മാനങ്ങൾ കൈമാറുകയും ചെയ്തു, നന്നായി പഠിച്ച് നാടിന് നന്മ ചെയ്യുന്ന നല്ല വിദ്യാർത്ഥിയായി മാറണമെന്ന് സമ്മാനം നൽകിക്കൊണ്ട് എസ്.എച്ച്.ഒ എം.കെ ഷാജി ഇഷയെ അഭിനന്ദിക്കുകയും പോലീസ് സ്റ്റേഷനിലെ പ്രവർത്തനങ്ങളെക്കുറിച്ച് പഠിക്കാൻ സ്റ്റേഷനിലേക്ക് ക്ഷണിക്കുകയും ചെയ്തു. കോവിഡിനെ പ്രതിരോധിക്കുന്ന പോലീസുകാർക്ക് കത്തെഴുതൂ എന്ന തപാൽ വകുപ്പ് നടപ്പിലാക്കിയ പദ്ധതിയിൽ ഉൾപ്പെടുത്തിയാണ് ഇഷ വളാഞ്ചേരി പോലീസിന് കത്തെഴുതിയത്. എസ്.എച്ച്.ഒ.എം.കെ.ഷാജിയോടൊപ്പം സീനിയർ സിവിൽ പോലീസ് ഓഫീസർമാരായ ജെറീഷ്, മനോജ്, സ്പെഷ്യൽ ബ്രാഞ്ച് പോലീസ് ഓഫീസർ നസീർ തിരൂർക്കാട് എന്നിവരുമുണ്ടായിരുന്നു. മാധ്യമ പ്രവർത്തകൻ നാലകത്ത് നൂറുൽ ആബിദിന്റെയും ബേബി ഷഹ് നാസിന്റെയും മകളായ ഇഷ മെഹ്റിൻ പൂക്കാട്ടിരി സഫ സ്കൂളിലെ രണ്ടാം ക്ലാസ് വിദ്യാർഥിനിയാണ്.

The post അഭിനന്ദനക്കുറിപ്പിന് നന്ദിയറിയിക്കാൻ ഇഷയെ തേടിയെത്തി വളാഞ്ചേരി പോലീസ് appeared first on Valanchery Online.

ഭാഗ്യക്കുറി മേഖലയിലെ പ്രതിസന്ധി പരിഹരിക്കണമെന്ന് ആവശ്യപ്പെട്ട് ധനകാര്യ മന്ത്രിക്ക് കത്തയച്ച് തൊഴിലാളികൾ

വളാഞ്ചേരിക്കാരൻ — Thu, 30 Apr 2020 13:14:24 +0000

കുറ്റിപ്പുറം: സംസ്ഥാന ഖജനാവിന് വലിയ വരുമാനം നൽകുന്നവരും സമൂഹത്തിലെ ദുർബല വിഭാഗങ്ങളിൽപെട്ട കൂടുതൽ പേർ ജോലി ചെയ്യുന്നതുമായ കേരള ഭാഗ്യക്കുറി മേഖലയെ സംരക്ഷിക്കുന്നതിനും ലോട്ടറി തൊഴിലാളികൾ നേരിടുന്ന കടുത്ത പ്രതിസന്ധി പരിഹരിക്കുന്നതിനും വിവിധ ആവശ്യങ്ങൾ അനുവദിക്കണമെന്ന് അഭ്യർത്ഥിച്ച്‌ ധനകാര്യ മന്ത്രി ഡോ. ടി.എം തോമസ് ഐസക്കിന്‌ ആൾ കേരള ലോട്ടറി ഏജന്റ്സ് & സെല്ലേർസ് കോൺഗ്രസ് (INTUC) ഒരു ലക്ഷം കത്തയക്കുന്നതിന്റെ ഭാഗമായി കോട്ടക്കൽ നിയോജക മണ്ഡലം കമ്മിറ്റി കത്തയക്കൽ സമരം നടത്തി. നറുക്കെടുപ്പ് റദ്ദാക്കിയ മുഴുവൻ ടിക്കറ്റുകളും പിൻവലിച്ച് പുതിയ ടിക്കറ്റുകൾ അച്ചടിച്ചു നൽകുക, ലോട്ടറി ടിക്കറ്റിന്റെ വില 30 രുപയായി പുന:സ്ഥാപിക്കുക, ലോട്ടറിത്തൊഴിലാളികർക്ക് 5000 രൂ ധനസഹായം അനുവദിക്കുക തുടങ്ങിയ ആവശ്യങ്ങൾ ഉന്നയിച്ചാണ് കത്തയച്ചത്.

കുറ്റിപ്പുറം പോസ്റ്റ് ഓഫിസ് പരിസരത്ത് കോവിഡ് നിയന്ത്രണങ്ങൾ പാലിച്ച് സാംസ്‌ഥാന സെക്രട്ടറി കെ.പി സോമസുന്ദരന്റെ അദ്ധ്യക്ഷതയിൽ നടന്ന സമരം ആദ്യ കത്ത് പോസ്റ്റ് ചെയ്ത് കുറ്റിപ്പുറം ബ്ലോക്ക് കോൺഗ്രസ് കമ്മിറ്റി പ്രസിഡന്റ് അഡ്വ. മുജീബ് കൊളക്കാട് ഉദ്ഘാടനം ചെയ്തു. നിയോജകമണ്ഡലം സെക്രട്ടറി ഷലീജ് പി സ്വാഗതവും ഇറക്കിങ്ങൽ ഭാസ്കരൻ നന്ദിയും പറഞ്ഞ സമരത്തിന് മണികണ്ഠൻ കെ.പി, സുബോധനൻ സി, സുബ്രമണ്യൻ, സായിബാബു, സലീം എ, ജോസ് വി.കെ, സന്തോഷ് എന്നിവർ വിവിധ സമയങ്ങളിലായി അഭിവാദ്യമാർപ്പിക്കുകയും ചെയ്തു.

The post ഭാഗ്യക്കുറി മേഖലയിലെ പ്രതിസന്ധി പരിഹരിക്കണമെന്ന് ആവശ്യപ്പെട്ട് ധനകാര്യ മന്ത്രിക്ക് കത്തയച്ച് തൊഴിലാളികൾ appeared first on Valanchery Online.

‘ഒരുനാൾ ഞാൻ കേരളത്തിൽ വരും നിങ്ങളെയൊക്കെ കാണാൻ ..’ പൊന്നാനി സ്വദേശിനി അമാന അഷ്‌റഫിന് ന്യൂസിലാൻഡ് പ്രധാനമന്ത്രി ജസീന്ത ആർഡന്റെ കത്ത്

വളാഞ്ചേരിക്കാരൻ — Thu, 24 Oct 2019 05:31:21 +0000

പൊന്നാനി സ്വദേശിനി പത്താം ക്ലാസ്സ് വിദ്യാർത്ഥിനി അമാന അഷ്‌റഫിന് ന്യൂസിലാൻഡ് പ്രധാനമന്ത്രി ജസീന്ത ആർഡന്റെ കത്ത്. ഇക്കഴിഞ്ഞ ജൂലൈ 26 ന് 39 വയസ്സുതികഞ്ഞ ന്യൂസിലാൻഡ് പ്രധാനമന്ത്രി ജസീന്ത ആർഡന്, വിദ്യാർത്ഥിനിയായ അമാന അഷ്‌റഫ് അയച്ച ജന്മദിനാശംസയ്ക്കുള്ള മറുപടിയിലാണ് അവർ പ്രകൃതി മനോഹരിയായ കേരളത്തെപ്പറ്റി കേട്ടിട്ടുണ്ടെന്നും ഒരിക്കൽ ഇവിടെ വരുമെന്നും പറഞ്ഞിരിക്കുന്നത്.

ജന്മദിനാശംസക്കൊപ്പം ന്യൂസിലാൻഡിൽ മുസ്ലീങ്ങൾക്കെതിരേ നടന്ന വംശീയ കൊലപാതകങ്ങളിൽ ശക്തമായ നടപടികൾ കൈക്കൊണ്ട ജസീന്തയെ അഭിനന്ദിക്കാനും അമാന മറന്നില്ല.കൂടാതെ പ്രധാനമന്ത്രി യായിരിക്കെ പ്രസവിച്ച ജസീന്തയുടെ കുഞ്ഞിനെക്കുറിച്ചും കത്തിൽ അമാന അന്വേഷിച്ചിരുന്നു.ഒപ്പം തനിക്ക് ന്യൂസിലാൻഡിൽ പഠിക്കണമെന്ന ആഗ്രഹവും അമാന പ്രധാനമന്ത്രിക്കെഴുതി. അമാനയുടെ കത്തിനുള്ള മറുപടിയിൽ പ്രധാനമന്ത്രി ജസീന്ത ഇങ്ങനെയെഴുതി :-

“നിങ്ങളുടെ ദയാപരമായ കത്തിന് നന്ദി.കഴിഞ്ഞ ഏതാനും മാസങ്ങൾമുമ്പ് ന്യൂസിലാൻഡിനു വളരെ പ്രയാസമായിരുന്നു. പ്രത്യേകിച്ചും മുസ്‌ലിം സോദരർക്ക്.വെറുപ്പിനും വിഭാഗീയതയ്ക്കും ഇടം നൽകാത്ത നിരവധിപ്പേർ ലോകത്ത് ഞങ്ങൾക്ക് സുഹൃത്തുക്കളായുണ്ടെന്ന് ഞങ്ങൾ തിരിച്ചറിയുന്നു.കുട്ടിയുടെ കത്തിലെ വരികൾ ഇഷ്ടമായി.കേരളം സന്ദർശിച്ചിട്ടില്ല.കേരളം വളരെ നയനമനോഹരമാണെന്നു കേട്ടിട്ടുണ്ട്.ഒരു ദിവസം ഞാൻ വരുമെന്നു തന്നെ പ്രതീക്ഷിക്കുന്നു. എന്റെ മകൾ ഒരു വയസ്സുകാരി നെവ് സുഖമായിരിക്കുന്നു .അവൾ വളരുകയാണ്.സംസാരിക്കാൻ തുടങ്ങിയിട്ടുണ്ട്, അതുകേൾക്കാൻ നല്ല രസമാണ്.കാണുന്നവരോട് ഹായ് പറയുന്നുണ്ട്.” —– ജസീന്ത ആർഡൻ, പ്രൈവറ്റ് ബാഗ്,പാർലമെന്റ് ബിൽഡിംഗ്, ന്യൂസിലാൻഡ് -6160 എന്ന പ്രധാനമന്ത്രിയുടെ ലെറ്റർ പാഡിലാണ് മറുപടി അയച്ചിരിക്കുന്നത്. മലപ്പുറം ജില്ലാ കോൺഗ്രസ് കമ്മിറ്റി സെക്രട്ടറി ടി.കെ.അഷ്‌റഫിന്റെയും വഹീദയുടെയും മകളായ അമാന അഷ്‌റഫ് പെരുമ്പിലാവ് ഇംഗ്ലീഷ് മീഡിയം സ്‌കൂളിലെ പത്താം ക്ലാസ്സ് വിദ്യാർത്ഥിനിയാണ്.

The post ‘ഒരുനാൾ ഞാൻ കേരളത്തിൽ വരും നിങ്ങളെയൊക്കെ കാണാൻ ..’ പൊന്നാനി സ്വദേശിനി അമാന അഷ്‌റഫിന് ന്യൂസിലാൻഡ് പ്രധാനമന്ത്രി ജസീന്ത ആർഡന്റെ കത്ത് appeared first on Valanchery Online.

രാജ്യറാണി തിരുവനന്തപുരത്തേക്ക് നീട്ടാൻ മന്ത്രിക്ക് രാഹുലിന്റെ കത്ത്

വളാഞ്ചേരിക്കാരൻ — Sat, 06 Jul 2019 16:15:35 +0000

മലപ്പുറം: നിലമ്പൂർ-തിരുവനന്തപുരം രാജ്യറാണി എക്സ്‌പ്രസ് തിരുവനന്തപുരം സെൻട്രൽവരെ നീട്ടണമെന്നാവശ്യപ്പെട്ട് രാഹുൽഗാന്ധി കേന്ദ്ര റെയിൽമന്ത്രി പീയൂഷ് ഗോയലിന് കത്തയച്ചു.

നിലവിൽ കൊച്ചുവേളി വരെയാണ് രാജ്യറാണി ഓടുന്നത്. തിരുവനന്തപുരത്ത്‌ എത്തണമെങ്കിൽ അവിടെനിന്ന് പിന്നെയും വാഹനം വിളിച്ച് പോകണം. പുലർച്ചെ ആറിനാണ് വണ്ടി കൊച്ചുവേളിയിലെത്തുക. ഈസമയത്ത് ടൗണിലേക്ക് വാഹനം കിട്ടാൻ പ്രയാസവുമാണ്. അങ്ങോട്ടുപോകുമ്പോൾ രണ്ടുമണിക്കൂറിലേറെ വർക്കലയിലും മടക്കയാത്രയിൽ അത്രയുംസമയം തൃശ്ശൂരിലും ട്രെയിൻ പിടിച്ചിടുന്നത് യാത്രക്കാർക്ക് വലിയ പ്രയാസമുണ്ടാക്കുന്നു. ഇതിനും പരിഹാരമുണ്ടാക്കണമെന്ന് കത്തിൽ രാഹുൽഗാന്ധി ആവശ്യപ്പെടുന്നു.

The post രാജ്യറാണി തിരുവനന്തപുരത്തേക്ക് നീട്ടാൻ മന്ത്രിക്ക് രാഹുലിന്റെ കത്ത് appeared first on Valanchery Online.