land mine Archives - Valanchery Online

കുറ്റിപ്പുറം പാലത്തിനു താഴെ വെടിക്കോപ്പുകൾ കണ്ടെത്തിയ സംഭവം: അന്വേഷണം സിബിഐ ഏറ്റെടുത്തു

വളാഞ്ചേരിക്കാരൻ — Sun, 07 Jul 2019 13:15:33 +0000

മലപ്പുറം: കുറ്റിപ്പുറം പാലത്തിനടിയിൽ നിന്നും ഭാരതപ്പുഴയിൽ നിന്നും സൈന്യം ഉപയോഗിച്ചിരുന്ന മൈനുകൾ അടക്കമുള്ള വെടിക്കോപ്പുകൾ ഉപേക്ഷിച്ച നിലയിൽ കണ്ടെത്തിയ കേസിന്റെ അന്വേഷണം സി.ബി.ഐ ഏറ്റടുത്തു. പ്രത്യേക കുറ്റകൃത്യങ്ങൾ അന്വേഷിക്കുന്ന തിരുവനന്തപുരം സി.ബി.ഐ യൂണിറ്റാണ് പുതിയ എഫ്.ഐ.ആർ രജിസ്റ്റർ ചെയ്ത് കേസ് അന്വേഷിക്കുന്നത്.

കഴിഞ്ഞ വർഷം ജനുവരി 18നാണ് കുറ്റിപ്പുറം പാലത്തിനു താഴെ ഭാരത പുഴയിൽ ചാക്കിൽ കെട്ടി ഉപേക്ഷിച്ച നിലയിൽ വെടിക്കോപ്പുകൾ കണ്ടെത്തിയത്. കേന്ദ്ര പ്രതിരോധ മന്ത്രാലയത്തിന്റെ കീഴിലുള്ള മഹാരാഷ്ട്രയിലെ ചന്ദ്രാപ്പുരിലെ വെടിക്കോപ്പ് നിർമ്മാണശാലയിൽ നിർമ്മിച്ചതാണ് ഇതെന്ന് കേരള പൊലീസ് അന്വേഷണത്തിൽ കണ്ടെത്തിയിരുന്നു.

ഇവിടെ നിന്ന് പുൽഗാവ് ,പൂണെ വെടിക്കോപ്പ് സംഭരണശാലകളിലേക്ക് മൈനുകൾ കൈമാറിയതായും പൊലീസ് കണ്ടെത്തി. പിന്നീട് അന്വേഷണം വഴിമുട്ടിയതോടെയാണ് കേസ് ദേശീയ ഏജൻസി അന്വേഷിക്കണമെന്ന് പൊലീസ് ആവശ്യപ്പെട്ടത്. ഈ ആവശ്യം പരിഗണിച്ചാണ് അന്വേഷണം ഇപ്പോൾ സി.ബി.ഐക്ക് വിട്ടത്.

The post കുറ്റിപ്പുറം പാലത്തിനു താഴെ വെടിക്കോപ്പുകൾ കണ്ടെത്തിയ സംഭവം: അന്വേഷണം സിബിഐ ഏറ്റെടുത്തു appeared first on Valanchery Online.

ഭാരതപ്പുഴയി‍ൽ നിന്ന് കണ്ടെത്തിയ വെടിക്കോപ്പുകൾ സൈന്യം ഉപയോഗിക്കുന്ന തരത്തിലുള്ളവ

വളാഞ്ചേരിക്കാരൻ — Fri, 12 Jan 2018 07:52:42 +0000

കുറ്റിപ്പുറം: ഭാരതപ്പുഴയി‍ൽനിന്ന് ഇന്നലെ കണ്ടെത്തിയ വെടിക്കോപ്പുകൾ മുഴുവൻ സൈന്യം ഉപയോഗിക്കുന്നവ. കുഴിബോംബുകൾ പൊട്ടിക്കാൻ ഉപയോഗിക്കുന്ന ആറ് പൾസ് ജനറേറ്റർ, രണ്ട് ട്യൂബ് ലോഞ്ചർ, 32 വെടിയുണ്ടകൾ ഉള്ള കാട്രിജ്, വിവിധ സ്ഫോടക വസ്തുക്കൾ ബന്ധിപ്പിക്കുന്ന വയറുകൾ എന്നിവയാണ് 560 വെടിയുണ്ടകൾക്കൊപ്പം കണ്ടെത്തിയത്.

വെടിയുണ്ടകൾ സ്വയം നിറയ്ക്കുന്ന തോക്കുകളിൽ (സെൽഫ് ലോഡിങ് റൈഫിൾസ്) ഉപയോഗിക്കുന്ന വലിയ ഉണ്ടകളാണ് ഇന്നലെ കണ്ടെടുത്തവ. 7.62 എംഎം വലുപ്പമുള്ളവയാണ് ഇവ. വെടിയുതിർത്ത ഉണ്ടകളുടെ 45 ഷെല്ലുകളും കണ്ടെടുത്തിട്ടുണ്ട്. ഇതിനു പുറമേ ചതുപ്പുനിലങ്ങളിൽ ടാങ്കുകൾ അടക്കമുള്ളവ താഴാതിരിക്കാൻ ഉപയോഗിക്കുന്ന ഇരുമ്പ് ഷീറ്റിന്റെ ഒരു ഭാഗവും ലഭിച്ചു. ഇവയെല്ലാം ഇന്ത്യൻ സൈന്യം ഉപയോഗിക്കുന്നവയാണ്.

ദേശീയപാതയിലെ കുറ്റിപ്പുറം പാലത്തിനു മുകളിൽനിന്ന് ഇവ തള്ളിയതാകാനുള്ള സാധ്യതയും പുഴയിൽ നേരിട്ടെത്തി ഒളിപ്പിച്ചതാകാനുള്ള സാധ്യതയും അന്വേഷണ സംഘം പരിശോധിക്കുന്നുണ്ട്. കുഴിബോംബുകൾ മഹാരാഷ്ട്രയിലെ ചന്ദ്രപുർ ഓർഡനൻസ് ഫാക്ടറിയിൽ നിർമിച്ചവയാണെന്ന് കണ്ടെത്തിയിരുന്നു. പ്രതിരോധ വകുപ്പിനു കീഴിലുള്ള ഫാക്ടറിയിൽനിന്നു പുറത്തെത്തിയ കുഴിബോംബുകൾക്ക് ഒപ്പം എത്തിച്ചതാകാം വെടിക്കോപ്പുകളുമെന്ന് കരുതുന്നു. കണ്ടെടുത്ത വെടിക്കോപ്പുകൾ ഏത് ക്യാംപിൽനിന്നാണെന്ന് സൈന്യത്തിന്റെ പരിശോധനയിൽ മാത്രമേ വ്യക്തമാകൂ.

The post ഭാരതപ്പുഴയി‍ൽ നിന്ന് കണ്ടെത്തിയ വെടിക്കോപ്പുകൾ സൈന്യം ഉപയോഗിക്കുന്ന തരത്തിലുള്ളവ appeared first on Valanchery Online.

കുഴിബോംബല്ല: കുറ്റിപ്പുറത്ത് കണ്ടെടുത്തത് ഡയറക്ഷണല്‍ ബോംബ്

വളാഞ്ചേരിക്കാരൻ — Sat, 06 Jan 2018 23:49:02 +0000

കുറ്റിപ്പുറം പാലത്തിനുസമീപം കണ്ടെത്തിയത് കുഴിബോംബല്ലെന്നും ഡയറക്ഷണല്‍ ബോംബാണെന്നും പൊലീസ്. കുഴിബോംബ് ഭൂമിക്കടിയില്‍വച്ചാണ് പ്രവര്‍ത്തിപ്പിക്കുന്നതെങ്കില്‍ ഡയറക്ഷണല്‍ ബോംബ് മരത്തിന്റെയോ കെട്ടിടങ്ങളുടെയോ വാഹനങ്ങളുടെയോ മുകളില്‍ ഘടിപ്പിച്ചശേഷം റിമോട്ടിന്റെ സഹായത്തോടെ പ്രവര്‍ത്തിപ്പിക്കാനാകും. കുഴിബോംബ് സ്ഥാപിച്ച സ്ഥലത്തുകൂടി ശത്രുക്കള്‍ സഞ്ചരിക്കുമ്പോഴാണ് പ്രവര്‍ത്തിപ്പിക്കുന്നതെങ്കില്‍, ഡയറക്ഷണല്‍ ബോംബ് ശത്രുക്കള്‍ അഭിമുഖമെത്തുമ്പോള്‍ പ്രവര്‍ത്തിപ്പിക്കാനാകും. കുറ്റിപ്പുറത്ത് കണ്ടെത്തിയ ബോംബുകള്‍ മിലിട്ടറി, ബിഎസ്എഫ്, സിആര്‍പിഎഫ് തുടങ്ങിയ സേനകളാണ് ഉപയോഗിക്കുന്നത്. കുഴിബോംബുകളെപ്പോലെതന്നെയാണ് ഇവയുടെ പ്രഹരശേഷി. 50 മീറ്റര്‍ അകലെവരെയുള്ള ശത്രുക്കളെ വകവരുത്താനും 250 മീറ്റര്‍ ചുറ്റളവിലുള്ളവര്‍ക്ക് മാരകമായി പരിക്കേല്‍പ്പിക്കാനും കഴിയുമെന്ന് വിദഗ്ധര്‍ ചൂണ്ടിക്കാട്ടുന്നു.

കുറ്റിപ്പുറത്തുനിന്ന് കണ്ടെത്തിയ ഡയറക്ഷണല്‍ ബോംബ് സൈന്യത്തിന് അനുവദിച്ചതാണെന്ന് കോയമ്പത്തൂരില്‍നിന്നെത്തിയ എന്‍എസ്ജി സംഘവും സ്ഥിരീകരിച്ചിട്ടുണ്ട്. ബോംബ് സൂക്ഷിച്ച സഞ്ചിയും ലോട്ട് നമ്പറും പരിശോധിച്ച് ഇവ ഏത് കേന്ദ്രത്തിലേക്കാണ് വിതരണംചെയ്തതാണെന്ന് ദിവസങ്ങള്‍ക്കുള്ളില്‍ തിരിച്ചറിയാനാകും. ഇത് ചണ്ഡീഗഢില്‍ നിര്‍മിച്ചതാണെന്നും വ്യക്തമായിട്ടുണ്ട്.

സൈന്യം ഉപയോഗിക്കുന്ന ബോംബ് കുറ്റിപ്പുറത്തെത്തിയത് സംബന്ധിച്ച അന്വേഷണം ഉയര്‍ന്ന മിലിട്ടറി ഉദ്യോഗസ്ഥരിലേക്കും നീളാന്‍ സാധ്യതയുണ്ട്. മലേഗാവ് സ്ഫോടനത്തില്‍ ഉയര്‍ന്ന സൈനിക ഉദ്യോഗസ്ഥരുടെ പങ്ക് തെളിഞ്ഞതിന്റെ അടിസ്ഥാനത്തിലാണിത്. മാവോയിസ്റ്റുകളുടെ പങ്കും പൊലീസ് തള്ളിക്കളയുന്നില്ല. സാധാരണയായി മിലിട്ടറി വിഭാഗത്തിന് അനുവദിക്കുന്ന യുദ്ധോപകരണങ്ങള്‍ നിശ്ചിത കാലയളവില്‍ ഉപയോഗിക്കുന്നില്ലെങ്കില്‍ ബിഎസ്എഫ്, സിആര്‍പിഎഫ് സേനകള്‍ക്ക് കൈമാറുകയാണ് പതിവ്. ഉത്തരേന്ത്യന്‍ സംസ്ഥാനങ്ങളിലെ മാവോവാദി സംഘങ്ങള്‍ സൈനിക ക്യാമ്പുകള്‍ ആക്രമിച്ച് കൈവശപ്പെടുത്തിയ ബോംബ് കൈമാറി ഇവിടെയെത്തിയതാകാനുള്ള സാധ്യതയും പൊലീസ് തള്ളിക്കളയുന്നില്ല. വരുംദിവസങ്ങളില്‍ പൊലീസിന്റെയും മിലിട്ടറി ഉള്‍പ്പെടെയുള്ള സേനകളുടെയും ഉന്നത ഉദ്യോഗസ്ഥരും യുദ്ധോപകരണ മേഖലയിലെ വിദഗ്ധരും മലപ്പുറത്തെത്തും.

കണ്ടെത്തിയ ഡയറക്ഷണല്‍ ബോംബ് നിലവില്‍ മലപ്പുറം മേല്‍മുറി എആര്‍ ക്യാമ്പില്‍ കനത്ത പൊലീസ് സുരക്ഷയില്‍ സൂക്ഷിച്ചിരിക്കയാണ്. പരിശോധന പൂര്‍ത്തിയാക്കിയശേഷമേ ഇവ നിര്‍വീര്യമാക്കുകയുള്ളൂ.

The post കുഴിബോംബല്ല: കുറ്റിപ്പുറത്ത് കണ്ടെടുത്തത് ഡയറക്ഷണല്‍ ബോംബ് appeared first on Valanchery Online.

കുറ്റിപ്പുറം മിനി പമ്പയ്ക്ക് സമീപം കുഴിബോംബ് കണ്ടെടുത്തു

വളാഞ്ചേരിക്കാരൻ — Fri, 05 Jan 2018 08:17:45 +0000

കുറ്റിപ്പുറം: ശബരിമല തീര്‍ത്ഥാടകരുടെ ഇടത്താവളമായ കുറ്റിപ്പുറം മിനിപമ്പയ്ക്ക് സമീപത്ത് നിന്നും കുഴിബോം‌ബ് കണ്ടെടുത്തു. ഭാരതപ്പുഴയില്‍ കുറ്റിപ്പുറം പാലത്തിനടുത്ത് ഉഗ്രസ്‌ഫോടനശേഷിയുള്ള അഞ്ച് കുഴിബോംബുകള്‍ കണ്ടെത്തി. പാലത്തിന് ചുവട്ടില്‍നിന്ന് ഏതാനും മീറ്ററുകള്‍ മാറിയാണ് ബോംബുകള്‍ കണ്ടെത്തിയത്. സൈന്യം ഉപയോഗിക്കുന്ന മൈനുകളാണ് ഇവയെന്നാണ് പോലീസ് പറയുന്നത്. പാലത്തിന്റെ അഞ്ചാമത്തെയും ആറാമത്തെയും തൂണുകള്‍ക്കിടയില്‍ 30 മീറ്ററോളം മാറി ഉപേക്ഷിച്ച നിലയിലാണ് ബോംബുകള്‍ കണ്ടെത്തിയത്.

വ്യാഴാഴ്ച വൈകീട്ട് ആറോടെ വളാഞ്ചേരി സ്വദേശിയായ യുവാവാണ് കുഴിബോംബുകള്‍ കണ്ടത്. പട്ടാളപ്പച്ച നിറത്തിലുള്ള അഞ്ച് സഞ്ചികളും ഒരുചാക്കും സമീപത്ത് കിടക്കുന്നുണ്ടായിരുന്നു. ബോംബുകള്‍ ബാഗിനുള്ളില്‍നിന്ന് പുറത്തെടുത്തിട്ട നിലയിലാണ് കണ്ടത്. യുവാവ് വിവരമറിയിച്ചതനുസരിച്ച് പോലീസ് രാത്രിയോടെ സ്ഥലത്തെത്തുകയും ബോംബുകള്‍ കസ്റ്റഡിയിലെടുക്കുകയും ചെയ്തു. രാത്രിതന്നെ ബോംബ് സ്‌ക്വാഡ് സ്ഥലത്തെത്തി കുഴിബോംബുകള്‍ മലപ്പുറം എ.ആര്‍. ക്യാമ്പിലേക്ക് മാറ്റി.

ശബരി‌മല തീര്‍ഥാടനക്കാലത്ത് തിരക്കേറിയ മിനി പമ്പയ്ക്കു സമീപം സ്ഫോടകവസ്തു കണ്ടെത്തിയെന്നത് അതീവ്അ ജാഗ്രതയോടെയാണ് പോലീസ് നോക്കികാണുന്നത്. കുറ്റിപ്പുറം പോലീസ് കേസെടുത്ത് അന്വേഷണം ആരംഭിച്ചു. വെള്ളിയാഴ്ച ഉച്ചയോടെ തൃശൂര്‍ റേഞ്ച് ഐ.ജി എം ആര്‍ അജിത്ത് കുമാര്‍ ഉള്‍പ്പടെ ഉന്നത പോലീസ് ഉദ്യോഗസ്ഥര്‍ സ്ഥലത്തെത്തി പരിശോധന നടത്തി. സ്ഥലത്ത് പോലീസ് കാ‍വലേര്‍പ്പെടുത്തി. കണ്ടെടുത്ത സ്ഫോടകവസ്തുക്കള്‍ മലപ്പുറം മേല്‍‌മുറി എ.ആര്‍ ക്യാമ്പിലേക്ക് മാറ്റി. രഹസ്യാന്വേഷണ വിഭാഗം എസ്.പി ശശികുമാര്‍, തിരൂര്‍ ഡി.വൈ.എസ്.പി ഉല്ലാസ് എന്നിവര്‍ സ്ഥലത്തെത്തി.

The post കുറ്റിപ്പുറം മിനി പമ്പയ്ക്ക് സമീപം കുഴിബോംബ് കണ്ടെടുത്തു appeared first on Valanchery Online.