kuttippuram Archives - Valanchery Online

കുറ്റിപ്പുറത്ത് ക്ഷേത്ര വളപ്പിലെ ഗാനമേളക്കിടെ കത്തിക്കുത്ത്; മൂന്ന് പേർ അറസ്റ്റിൽ

വളാഞ്ചേരിക്കാരൻ — Wed, 18 Feb 2026 20:01:37 +0000

കുറ്റിപ്പുറം: കുറ്റിപ്പുറത്ത് ഗാനമേളക്കിടെയുണ്ടായ കത്തികുത്തിൽ മൂന്ന് പേരെ പോലീസ് പിടികൂടി. മാത്തൂർ ശിവക്ഷേത്രത്തിലെ ശിവരാത്രി പ്രമാണിച്ച് നടന്ന ഗാനമേളക്കിടെ രണ്ടുപേരെ കത്തികൊണ്ട് കുത്തി ഗുരുതരമായി പരിക്കേൽപ്പിച്ച കേസിലെ പ്രതികളായ നരിപ്പറമ്പ് സ്വദേശി അയ്യപ്പൻ കളത്തിൽ യഹിയ, അതളൂർ സ്വദേശി വലിയ വളപ്പിൽ മുബഷിർ, നരിപ്പറമ്പ് സ്വദേശി വളവത്ത് വളപ്പിൽ ശ്രീരാഗ് എന്നിവരെയാണ് കുറ്റിപ്പുറം പോലീസ് പിടികൂടിയത്. പോലീസിന്റെ കൃത്യമായ അന്വേഷണവും സൈബർ സെല്ലിന്റെ സഹായവുമാണ് ഒ:ഇവിൽ കഴിഞ്ഞ പ്രതികളെ സംഭവം നടന്ന് മൂന്ന് ദിവസങ്ങൾക്കുള്ളിൽ പിടികൂടാൻ വഴിയൊരുക്കിയത്. യഹിയയെ കോയമ്പത്തൂരിൽ നിന്നും മുബഷിർ, ശ്രീരാഗ് എന്നിവരെ നരിപ്പറമ്പിലെ വീട്ടിൽ നിന്നുമാണ് അറസ്റ്റ് ചെയ്തത്.

ഫെബ്രുവരി 15ന് ശിവരാത്രി പ്രമാണിച്ച് മാത്തൂർ ശിവക്ഷേത്രത്തിൽ നടന്ന ഗാനമേളക്കിടെയാണ് കേസിനാസ്പദമായ സംഭവം.
പരിപാടിക്കിടെ രണ്ടുപേരെ കത്തി കൊണ്ട് കുത്തി പരിക്കേൽപ്പിച്ച ശേഷം പ്രതികൾ ഒളിവിൽ പോകുകയായിരുന്നു. ഗുരുതരമായി പരിക്കേറ്റ രണ്ട് പേരുടെയും മൊഴിയുടെ അടിസ്ഥാനത്തിൽ കുറ്റിപ്പുറം പോലീസ് അന്വേഷണം ആരംഭിച്ചു. ഒന്നാം പ്രതിയായ യഹിയ സംഭവം കഴിഞ്ഞ ഉടൻ തൃശൂരിലേക്ക് പോയ ശേഷം മൊബൈൽ ഫോൺ സ്വിച്ച് ഓഫ് ചെയ്ത് ഒളിവിൽ കഴിയുകയായിരുന്നു. തുടർന്ന് ലഭിച്ച രഹസ്യ വിവരങ്ങളുടെ അടിസ്ഥാനത്തിൽ കുറ്റിപ്പുറം സർക്കിൾ ഇൻസ്പെക്ടർ
നൗഫൽ കെ, എസ്.ഐ കെ.എസ്. സുധീർ എന്നിവരുടെ മേൽനോട്ടത്തിൽ പ്രത്യേക അന്വേഷണസംഘം രൂപീകരിച്ചു. സൈബർ സെല്ലിന്റെ സഹായത്തോടെ അന്വേഷണസംഘം ഫെബ്രുവരി 17ന് കോയമ്പത്തൂരിൽ തിരച്ചിൽ ശക്തമാക്കി. കോയമ്പത്തൂർ കേന്ദ്രീകരിച്ച് അമ്പതോളം ലോഡ്ജുകളിൽ നടത്തിയ പരിശോധനക്കൊടുവിൽ ഒന്നാം പ്രതിയുടെ സാന്നിധ്യം കണ്ടെത്താനായെങ്കിലും ആദ്യം പിടികൂടാൻ കഴിഞ്ഞില്ല. പിന്നീട് ലോഡ്ജ് രജിസ്റ്റർ പരിശോധിക്കുന്നതിനിടയിൽ നരിപ്പറമ്പ്,പൊന്നാനി സ്വദേശികളുടെ അഡ്രസ്സ് ശ്രദ്ധയിൽപ്പെട്ടത്. സംശയാസ്പദരായ യുവാക്കളെ ചോദ്യം ചെയ്യുകയും ചെയ്തതിനെ തുടർന്നാണ് യഹിയയെ പിടികൂടാനായത്. ഇയാളെ ചോദ്യം ചെയ്തതോടെയാണ് മറ്റു രണ്ട് പ്രതികളുടെ ഒളിവിടത്തെക്കുറിച്ചുള്ള സൂചന ലഭിച്ചത്. തുടർന്ന് നടത്തിയ അന്വേഷണത്തിൽ ഇവരെയും പോലീസ് പിടികൂടി. പ്രതികൾക്കെതിരെ വധശ്രമക്കുറ്റം ചുമത്തി തിരൂർ മജിസ്ട്രേറ്റ് കോടതിയിൽ ഹാജരാക്കി റിമാൻഡ് ചെയ്തു. ഡാൻസാഫ് എ.എസ്.ഐ ജയപ്രകാശ്, എസ്.സി.പി.ഒ പ്രദീപ്, സി.പി.ഒ ഹൈഡ്രിൻ കർവാലിയ എന്നിവർ ഉൾപ്പെട്ട അന്വേഷണ സംഘത്തെ തിരൂർ ഡിവൈഎസ്പി എ.എം സിദ്ദീഖ് അഭിനന്ദിച്ചു. നിരവധി കേസുകളിലെ പ്രതികളെ പിടികൂടുന്നതിൽ എസ്.ഐ കെ.എസ്. സുധീറിന്റെ അന്വേഷണ മികവിന് മുഖ്യമന്ത്രിയുടെ അംഗീകാരം ലഭിച്ചിരുന്നു.

The post കുറ്റിപ്പുറത്ത് ക്ഷേത്ര വളപ്പിലെ ഗാനമേളക്കിടെ കത്തിക്കുത്ത്; മൂന്ന് പേർ അറസ്റ്റിൽ appeared first on Valanchery Online.

യുഡിഎഫ്-17/17; പ്രതിപക്ഷമില്ലാതെ കുറ്റിപ്പുറം ബ്ലോക്ക് പഞ്ചായത്ത്

വളാഞ്ചേരിക്കാരൻ — Tue, 16 Dec 2025 04:04:19 +0000

വളാഞ്ചേരി : പ്രതിപക്ഷമില്ലാത്ത ഭരണസമിതിയാണ് ഇക്കുറി കുറ്റിപ്പുറം ബ്ലോക്ക് പഞ്ചായത്ത് ഭരിക്കുക. പതിനേഴിടങ്ങളിലും യുഡിഎഫ് വിജയിച്ചതോടെ ഏകപക്ഷീയമായി മാറി ഭരണസമിതി. മുസ്‍ലിം ലീഗ് 12 ഡിവിഷനുകളിലും കോൺഗ്രസ് അഞ്ചിടത്തും വിജയിച്ചു. 2020-ൽ 16 ഡിവിഷനുകളിൽ പത്തിടത്തായിരുന്നു മുസ്‍ലിം ലീഗ് ജയിച്ചത്. നാലിടത്ത് കോൺഗ്രസും രണ്ട് ഡിവിഷനുകളിൽ സിപിഎമ്മുമാണ് ജയിച്ചത്. ഇക്കുറി ബ്ലോക്ക് പ്രസിഡന്റുസ്ഥാനം പട്ടികജാതി(ജനറൽ)വിഭാഗത്തിന് സംവരണം ചെയ്തതിനാൽ പൈങ്കണ്ണൂർ ഡിവിഷനിൽനിന്ന് തിരഞ്ഞെടുക്കപ്പെട്ട മുസ്‍ലിം ലീഗ് പ്രതിനിധി എ.വി. അജയ് കുമാറാകും പ്രസിഡന്റാവുക.

ഡിവിഷൻ, വിജയി, പാർട്ടി
1. കല്ലിങ്ങൽപ്പറമ്പ് -കെ.പി. അബ്ദുൽകരീം (മുസ്‍ലിംലീഗ്), 2. ചേലക്കുത്ത്-ജംഷീറ തെക്കരകത്ത് (കോൺഗ്രസ്), 3. മേൽമുറി-സലീന മുസ്തഫ (മുസ്‍ലിം ലീഗ്), 4. കരേക്കാട്-സുഹറാബി ഹുസൈൻ വടക്കേ പീടിയേക്കൽ (മുസ്‍ലിം ലീഗ്), 5. വടക്കുമ്പ്രം-അസീസ് ആയപ്പിള്ളി കോടിയിൽ (മുസ്‍ലിം ലീഗ്), 6. എടയൂർ-ബഷീർ മാവണ്ടിയൂർ (കോൺഗ്രസ്), 7. പൂക്കാട്ടിരി-അബ്ദുൽറഷീദ് കിഴിശ്ശേരി (മുസ്‍ലിം ലീഗ്), 8. വലിയകുന്ന് -സി.പി. ഉമ്മുകുൽസു (മുസ്‍ലിം ലീഗ്), 9. വെണ്ടല്ലൂർ -ഷമീലടീച്ചർ (കോൺഗ്രസ്), 10. പൈങ്കണ്ണൂർ -എ.വി. അജയ്കുമാർ(മുസ്‍ലിം ലീഗ്), 11. കുറ്റിപ്പുറം -എം.വി. ജമീല(മുസ്‍ലിം ലീഗ്)12. ചെല്ലൂർ -സി.കെ. സൈനബ(മുസ്‍ലിം ലീഗ്), 13. നടുവട്ടം -അഷറഫ് രാങ്ങാട്ടൂർ (കോൺഗ്രസ്), 14. കുറുമ്പത്തൂർ-എ.പി. വഹീദ(മുസ്‍ലിം ലീഗ്), 15. വെട്ടിച്ചിറ-വി.കെ. അഷറഫ്(മുസ്‍ലിം ലീഗ്), 16. പുത്തനത്താണി -ടി.പി. സമീറാ മാനു(കോൺഗ്രസ്), 17. കടുങ്ങാത്തുകുണ്ട് -മഖ്ബുൽ തൊട്ടേങ്ങൽ (മുസ്‍ലിം ലീഗ്).

The post യുഡിഎഫ്-17/17; പ്രതിപക്ഷമില്ലാതെ കുറ്റിപ്പുറം ബ്ലോക്ക് പഞ്ചായത്ത് appeared first on Valanchery Online.

തദ്ദേശ തിരഞ്ഞെടുപ്പ്: കുറ്റിപ്പുറം പഞ്ചായത്തിൽ പോളിംഗ് ശതമാനം 75.19%

വളാഞ്ചേരിക്കാരൻ — Fri, 12 Dec 2025 09:48:45 +0000

കുറ്റിപ്പുറം: പഞ്ചായത്തിൽ ഇത്തവണത്തെ തിരഞ്ഞെടുപ്പിൽ 75.19 ശതമാനം വോട്ട് രേഖപ്പെടുത്തി. കഴിഞ്ഞ തവണ 76.75 ശതമാനമായിരുന്നു. വൈകീട്ട് ആറിനുമുൻപുതന്നെ എല്ലാ വാർഡുകളിലും വോട്ടിങ് പൂർത്തിയായിരുന്നു. പല ബൂത്തുകളിലും രാവിലെ 11 വരെയും വൈകീട്ട് മൂന്നിനുശേഷവുമാണ് വോട്ടർമാർ കൂടുതലായെത്തിയത്. 11-ാം വാർഡായ ഹിൽടോപ്പിന്റെ പോളിങ് ബൂത്തായ പേരശ്ശന്നൂർ ഗവ. ഹയർസെക്കൻഡറി സ്കൂളിലെ രണ്ടാം ബൂത്തിൽ രാവിലെ രണ്ടു തവണയായി അരമണിക്കൂറോളം വോട്ടിങ് മെഷീൻ തകരാറിലായി. ശക്തമായ മത്സരം നടന്ന വാർഡുകളിൽ രാവിലെ മുതൽ വോട്ടർമാരുടെ നല്ല തിരക്കായിരുന്നു. വാർഡ് 13 എടച്ചലം, 22 നരിക്കുളം എന്നിവിടങ്ങളിൽ എൽഡിഎഫ്-യുഡിഎഫ് പ്രവർത്തകർ തമ്മിൽ വാക്കേറ്റമുണ്ടായി. എടച്ചലത്ത് കൈയാങ്കളിയും നടന്നു. പഞ്ചായത്ത് ഭരണം നിലനിർത്തുമെന്ന് യുഡിഎഫും ഇത്തവണ ഭരണം തിരിച്ചുപിടിക്കുമെന്ന് എൽഡിഎഫും അവകാശപ്പെടുന്നു.

The post തദ്ദേശ തിരഞ്ഞെടുപ്പ്: കുറ്റിപ്പുറം പഞ്ചായത്തിൽ പോളിംഗ് ശതമാനം 75.19% appeared first on Valanchery Online.

കുറ്റിപ്പുറം ചെല്ലൂർ പോത്തിനിപ്പാടം കുളം പുനർനിർമിക്കുന്നു

വളാഞ്ചേരിക്കാരൻ — Tue, 11 Nov 2025 06:41:16 +0000

കുറ്റിപ്പുറം : വാർഡ് അഞ്ചിലെ ചെല്ലൂർ പോത്തിനിപ്പാടം കുളം പുനർനിർമിക്കുന്നു. പതിറ്റാണ്ടുകളായി തകർന്നുകിടക്കുന്ന കുളത്തിന്റെ പുനർനിർമാണത്തിന് വാർഡംഗം സാബാ കരീമിന്റെ നിരന്തര ഇടപെടലിലൂടെ ജലസേചന വകുപ്പിൽനിന്ന് 35 ലക്ഷം രൂപ അനുവദിച്ചു. ജലസേചന വകുപ്പ് ഉദ്യോഗസ്ഥർ സ്ഥലം സന്ദർശിച്ച് അടങ്കൽ തയ്യാറാക്കി. ഈ മാസം അഞ്ചിന് ടെൻഡർ നടപടിയും പൂർത്തീകരിച്ചു. വേനൽക്കാലത്ത് നവീകരണ പ്രവർത്തനങ്ങൾക്ക് തുടക്കമാകും. പുനർനിർമാണം പൂർത്തീകരിക്കുന്നതോടെ പ്രദേശവാസികൾക്ക് കുളിക്കാനും കർഷകർക്ക് കൃഷി ആവശ്യങ്ങൾക്കും കുളത്തിലെ വെള്ളം ഉപയോഗപ്പെടുത്താം.

The post കുറ്റിപ്പുറം ചെല്ലൂർ പോത്തിനിപ്പാടം കുളം പുനർനിർമിക്കുന്നു appeared first on Valanchery Online.

കാങ്കക്കടവ് റെഗുലേറ്റർ കം ബ്രിഡ്‌ജ്‌ അനുബന്ധ റോഡ്; കുറ്റിപ്പുറത്ത് 10 ഭൂവുടമകൾ സമ്മതപത്രം കൈമാറി

വളാഞ്ചേരിക്കാരൻ — Sat, 08 Nov 2025 04:29:10 +0000

കുറ്റിപ്പുറം: കാങ്കക്കടവ് റെഗുലേറ്റർ കം ബ്രിഡ്‌ജ്‌ നിർമാണത്തിന്റെ ഭാഗമായി കുറ്റിപ്പുറം ഭാഗത്ത് അനുബന്ധറോഡ് നിർമാണത്തിനായി സ്ഥലം വിട്ടുനൽകുന്നവരുടെ യോഗം നടന്നു. സ്ഥലം എംഎൽഎ പ്രൊഫ. ആബിദ്ഹുസൈൻ തങ്ങൾ വിളിച്ചുചേർത്ത യോഗത്തിൽ 10 ഭൂവുടമകൾ സ്ഥലം വിട്ടുനൽകാനുള്ള സമ്മതപത്രം എംഎൽഎയ്ക്ക് കൈമാറി. ഏറ്റെടുക്കേണ്ട ഭൂമി, വസ്തുവകകൾ, നഷ്ടപരിഹാരം എന്നിവ സംബന്ധിച്ച് പാലക്കാട് സ്ഥലമേറ്റെടുക്കൽ വിഭാഗം തഹസിൽദാർ എ. മുരളീധരൻ യോഗത്തിൽ വിശദീകരിച്ചു. കുറ്റിപ്പുറം ഭാഗത്ത് 41 ആളുകളിൽനിന്നായി 58.78 സെന്റ് ഭൂമിയാണ് അനുബന്ധറോഡിനായി ഏറ്റെടുക്കേണ്ടത്. സമ്മതപത്രം നൽകിയ ഭൂവുടമകൾക്ക് അവർക്കു കണക്കാക്കിയ നഷ്ടപരിഹാരത്തുക സംബന്ധിച്ച വിശദവിവരങ്ങൾ യോഗത്തിൽ തഹസിൽദാർ അറിയിച്ചു. സി.കെ. ജയകുമാർ, പരപ്പാര സിദ്ദീഖ്, ടി.കെ. മുഹമ്മദ് ബഷീർ, എം.എസ്. അനിൽകുമാർ, കെ. സുമിത, ടി.എം. രാജ്, റഹീസ് പുത്തലത്ത് എന്നിവരും വിവിധ വകുപ്പ് ഉദ്യോഗസ്ഥരും യോഗത്തിൽ പങ്കെടുത്തു.

The post കാങ്കക്കടവ് റെഗുലേറ്റർ കം ബ്രിഡ്‌ജ്‌ അനുബന്ധ റോഡ്; കുറ്റിപ്പുറത്ത് 10 ഭൂവുടമകൾ സമ്മതപത്രം കൈമാറി appeared first on Valanchery Online.

കുറ്റിപ്പുറം ഉപജില്ലാ കലോത്സവം സമാപിച്ചു; ഹയർസെക്കൻഡറി വിഭാഗത്തിൽ കുറ്റിപ്പുറം ജി.എച്.എസ്.എസ് ചാമ്പ്യന്മാർ

വളാഞ്ചേരിക്കാരൻ — Sat, 08 Nov 2025 01:58:36 +0000

കല്പകഞ്ചേരി : കല്ലിങ്ങൽപ്പറമ്പ് എംഎസ്എം ഹയർസെക്കൻഡറി സ്കൂളിൽ നാലു ദിവസങ്ങളിലായി നടന്ന 36-ാമത് കുറ്റിപ്പുറം ഉപജില്ലാ സ്കൂൾ കലോത്സവം സമാപിച്ചു. ഹയർ സെക്കൻഡറി വിഭാഗത്തിൽ കുറ്റിപ്പുറം ഹയർസെക്കൻഡറി സ്കൂൾ ഓവറോൾ ചാമ്പ്യന്മാരായി. ഇരിമ്പിളിയം എംഇഎസ് എച്ച്എസ്എസ്, കല്ലിങ്ങൽ പറമ്പ് എംഎസ്എം എച്ച്എസ്എസ് എന്നീ സ്കൂളുകൾ രണ്ടും മൂന്നും സ്ഥാനങ്ങൾ നേടി. ഹൈസ്കൂൾ വിഭാഗത്തിൽ ഇരിമ്പിളിയം എംഇഎസ് എച്ച്എസ്എസ് ഒന്നാം സ്ഥാനവും മാറാക്കര വിവിഎം എച്ച്എസ്എസ്, ഇരിമ്പിളിയം ജിഎച്ച്എസ്എസ് രണ്ടുംമൂന്നും സ്ഥാനം നേടി. യുപി വിഭാഗത്തിൽ മാറാക്കര എയുപിഎസ്, ഇടയൂർ കെഎംഎച്ച്എസ്എസ്, കാടാമ്പുഴ എംഎംയുപിഎസ് യഥാക്രമം ഒന്നുംരണ്ടും മൂന്നും സ്ഥാനങ്ങൾ നേടി. എൽപി വിഭാഗത്തിൽ കരിപ്പോൾ ജിഎംഎൽപിഎസ്, ആലിയ ഇംഗ്ലീഷ് മീഡിയം സ്കൂൾ, എടയൂർ എഎംഎൽപി സ്കൂൾ ഒന്നും രണ്ടും മൂന്നും സ്ഥാനങ്ങൾ നേടി. സമാപനം കുറ്റിപ്പുറം എഇഒ കെ. അജിത്ത് കുമാർ ഉദ്ഘാടനംചെയ്തു. പിടിഎ പ്രസിഡന്റ് മക്ബൂൽ പൊട്ടേങ്കൽ അധ്യക്ഷനായി. ജില്ലാ പഞ്ചായത്ത് സ്ഥിരംസമിതി അധ്യക്ഷ മയ്യേരി നസീബ അസീസ്, കല്പകഞ്ചേരി പഞ്ചായത്ത് പ്രസിഡന്റ് കെ.പി. വഹീദ, പി. മുഹമ്മദ് ഫൈസൽ, മാനേജർ കോട്ടയിൽ അബ്ദുൾ ലത്തീഫ്, സി.പി. രാധാകൃഷ്ണൻ, പ്രിൻസിപ്പൽ ഷാജി മാത്യു, പ്രഥമാധ്യാപകൻ എസ്. ദേവരാജൻ തുടങ്ങിയവർ സംസാരിച്ചു.

The post കുറ്റിപ്പുറം ഉപജില്ലാ കലോത്സവം സമാപിച്ചു; ഹയർസെക്കൻഡറി വിഭാഗത്തിൽ കുറ്റിപ്പുറം ജി.എച്.എസ്.എസ് ചാമ്പ്യന്മാർ appeared first on Valanchery Online.

പൈങ്കണ്ണൂർ പുഞ്ചപ്പാടം വിസിബി ഉദ്ഘാടനംചെയ്തു

വളാഞ്ചേരിക്കാരൻ — Mon, 22 Sep 2025 01:34:14 +0000

കുറ്റിപ്പുറം : പൈങ്കണ്ണൂർ പുഞ്ചപ്പാടം പാടശേഖരത്ത് ജില്ലാ പഞ്ചായത്തംഗം ബഷീർ രണ്ടത്താണി അനുവദിച്ച ഫണ്ട് ഉപയോഗിച്ച് നിർമ്മിച്ച വിസിബിയുടേയും തോട് പുനരുദ്ധാരണം നടത്തിയതിന്റേയും ഉദ്ഘാടനം ജില്ലാ പഞ്ചായത്ത് വൈ. പ്രസിഡന്റ് ഇസ്‌മായിൽ മൂത്തേടം നിർവഹിച്ചു.

ജില്ലാ പഞ്ചായത്തംഗം ബഷീർ രണ്ടത്താണി അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡൻറ്‌ വസീമ വേളേരി, കുറ്റിപ്പുറം പഞ്ചായത്ത് പ്രസിഡൻറ്‌ നസീറ പറത്തൊടി, വൈ. പ്രസിഡൻറ്‌ വേലായുധൻ, വാർഡംഗം കെ.ടി. ഹമീദ്, പരപ്പാര സിദ്ദിഖ്, മഠത്തിൽ ശ്രീകുമാരൻ, കൈപ്പള്ളി അബ്ദുല്ലക്കുട്ടി, കെ.പി. ബാവ, കെ.പി. കബീർ, ആഷിഖ് കൊളത്തോൾ, വി. അയ്യൂബ്, റിയാസ് കൂരി തുടങ്ങിയവർ പ്രസംഗിച്ചു.

The post പൈങ്കണ്ണൂർ പുഞ്ചപ്പാടം വിസിബി ഉദ്ഘാടനംചെയ്തു appeared first on Valanchery Online.

അമീനയുടെ മരണം; കുറ്റിപ്പുറത്ത് ഇന്ന് നിരവധി പ്രതിഷേധങ്ങൾ

വളാഞ്ചേരിക്കാരൻ — Wed, 16 Jul 2025 02:01:09 +0000

കുറ്റിപ്പുറം: നഴ്സ് അമീനയുടെ മരണത്തിൽ സമഗ്ര അന്വേഷണം ആവശ്യപ്പെട്ട് വിവിധ സംലടനകൾ രംഗത്തെത്തി.അമീനയുടെ മരണത്തിൽ സമഗ്ര അന്വേഷണം ആവശ്യപ്പെട്ട് മുസ് ലിം യൂത്ത് ലീഗ്, ഡി.വൈ.എഫ്.ഐ, സി.പി.എം, പി.ഡി.പി, എസ്.ഡി.പി.ഐ, കേരള നേഴ്സസ് അസോസിയേഷൻ, യു.എൻ.എ, ക്ലീൻ കുറ്റിപ്പുറം തുടങ്ങിയ സംഘടനകളാണ് പ്രതിഷേധ സമരങ്ങൾക്ക് ഒരുങ്ങുന്നത്. സംഭവത്തിൽ യൂത്ത് ലീഗും ,പി.ഡി.പിയും അന്വേഷണവും നടപടിയും ആവശ്യപ്പെട്ട് പൊലിസിൽ പരാതി നൽകിയിട്ടു.ഇന്ന് രാവിലെ 10 മണിക്ക് ഡി.വൈ.എഫ്.ഐയുടെ നേതൃത്വത്തിൽ അമാന ആശുപത്രയിലേക്ക് പ്രതിഷേധ മാർച്ച് സംഘടിപ്പിക്കുന്നുണ്ട്, 10.30 ന് പി.ഡി.പിയും, മൂന്ന് മണിക്ക് യു.എൻ.എയും പ്രതിഷേധ മാർച്ച് നടത്തുന്നുണ്ട്. അമീനയുടെ മരണത്തിൽ ശക്തമായ പ്രതിഷേധമാണ് മുൻ മാനേജർക്കെതിരെയും ആശുപത്രിക്കെതിരെയും ഉയർന്നിട്ടുള്ളത്.

The post അമീനയുടെ മരണം; കുറ്റിപ്പുറത്ത് ഇന്ന് നിരവധി പ്രതിഷേധങ്ങൾ appeared first on Valanchery Online.

കാങ്കക്കടവ്; സ്ഥലമുടമകളുടെ യോഗം വിളിച്ചുചേർത്ത് എംഎൽഎ

വളാഞ്ചേരിക്കാരൻ — Sun, 06 Jul 2025 23:57:55 +0000

കുറ്റിപ്പുറം : കാങ്കക്കടവ് റെഗുലേറ്റർ കം ബ്രിഡ്‌ജ്‌ പദ്ധതിയുടെ ഭാഗമായുള്ള അനുബന്ധറോഡ് നിർമാണത്തിന്റെ ഭാഗമായി പ്രൊഫ. ആബിദ്ഹുസൈൻ തങ്ങൾ എംഎൽഎ കുറ്റിപ്പുറത്തെ സ്ഥലമുടമകളുടെ യോഗം വിളിച്ചുചേർത്തു. അനുബന്ധറോഡിന്റെ വീതി വർധിപ്പിക്കുന്നതിന് സ്ഥലമേറ്റെടുക്കുന്ന ഭൂവുടമകൾ സ്ഥലം വിട്ടുനൽകാനുള്ള നടപടിക്രമങ്ങൾ പാലിക്കാത്ത സാഹചര്യത്തിൽ അവരുടെ ആശങ്കകൾ ദുരീകരിക്കാനാണ് യോഗം വിളിച്ചത്. വിട്ടുനൽകുന്ന സ്ഥലത്തിന്റെ നഷ്ടപരിഹാരത്തുക സർക്കാർ വ്യക്തമാക്കണമെന്നും ഭൂമി ഏറ്റെടുക്കുന്ന വേളയിൽത്തന്നെ തുക നൽകണമെന്നും ഒരുവിഭാഗം ഭൂവുടമകൾ ആവശ്യപ്പെട്ടു. എന്നാൽ അത് പ്രായോഗികമല്ലെന്നും സ്ഥലമേറ്റെടുക്കൽ വിജ്ഞാപനം പുറപ്പെടുവിപ്പിച്ച 2024 ഡിസംബർ 12 മുതൽ ചെക്ക് നൽകുന്ന തീയതിവരെ 12 ശതമാനം പലിശസഹിതമാണ് നഷ്ടപരിഹാരത്തുക നൽകുകയെന്നും റവന്യൂ വകുപ്പ് നേരത്തേ വ്യക്തമാക്കിയ വിവരം എംഎൽഎ യോഗത്തിൽ അറിയിച്ചു. ഇതിനെത്തുടർന്ന് സ്ഥലമുടമകൾ സ്ഥലം വിട്ടുനൽകാനുള്ള രേഖകൾ റവന്യൂവകുപ്പിന് കൈമാറാൻ സന്നദ്ധത അറിയിച്ചു. എന്നാൽ സ്ഥലം വിട്ടുനൽകാനായി തയ്യാറാക്കുന്ന സമ്മതപത്രം എല്ലാ മാനദണ്ഡങ്ങളും പാലിച്ചുള്ളതാകണമെന്ന് സ്ഥലമുടമകൾ ആവശ്യപ്പെട്ടു. ഈ ആവശ്യം സ്ഥലമെടുപ്പ് വിഭാഗം ഉദ്യോഗസ്ഥരെ അറിയിക്കാമെന്ന് എംഎൽഎ പറഞ്ഞു.

നിലവിലെ റോഡിലെ കൈയേറ്റഭൂമികൾ തിരിച്ചുപിടിക്കണമെന്ന നിർദേശവും ഭൂവുടമകൾ ഉന്നയിച്ചു. പദ്ധതി നവംബറിൽ കമ്മിഷൻ ചെയ്യാനാണ് ഇപ്പോഴത്തെ ശ്രമം. എന്നാൽ കുറ്റിപ്പുറം, കുമ്പിടി പ്രദേശങ്ങളിൽനിന്ന്‌ റോഡിന് വീതി വർധിപ്പിക്കുന്നതിന് സ്ഥലം വിട്ടുനൽകുന്നവരുടെ സ്ഥലരേഖകൾ പരിശോധിച്ച് അവയിൽ സാങ്കേതികവിഷയങ്ങൾ ഉണ്ടെങ്കിൽ അവ പരിഹരിക്കാൻ ഏറെ സമയം ആവശ്യമായി വരുമെന്നതിനാൽ നവംബറിൽ കമ്മിഷൻ ചെയ്യാൻ കഴിയുമോയെന്ന ആശങ്കയുമുണ്ട്. പഞ്ചായത്ത് പ്രസിഡന്റ് നസീറ പറതൊടി, പഞ്ചായത്തംഗങ്ങളായ സിദ്ദീഖ് പരപ്പാര, സി.കെ. ജയകുമാർ, പഞ്ചായത്ത് അസിസ്റ്റന്റ്‌ സെക്രട്ടറി എ. ജാബിർകുട്ടി തുടങ്ങിയവർ പങ്കെടുത്തു.

The post കാങ്കക്കടവ്; സ്ഥലമുടമകളുടെ യോഗം വിളിച്ചുചേർത്ത് എംഎൽഎ appeared first on Valanchery Online.

കുറ്റിപ്പുറം ലയേൺസ് ക്ലബ്ബിന്റെ ആഭിമുഖ്യത്തിൽ ഔഷധസസ്യ വിതരണവും നടീലും നടന്നു

വളാഞ്ചേരിക്കാരൻ — Thu, 03 Jul 2025 01:35:43 +0000

കുറ്റിപ്പുറം : മലപ്പുറം ജില്ല ലയൺസ് 318 ഡി1 രൂപീകരണത്തിന്റെ ആദ്യദിന പ്രവർത്തനത്തിന്റെ ഭാഗമായി മലപ്പുറം ജില്ലയിലെ വിവിധ സ്കൂളുകളിൽ ഔഷധസസ്യങ്ങളുടെ വിതരണവും നടീലും നടന്നു. കുറ്റിപ്പുറം ഗവ. ടെക്നിക്കൽ ഹൈസ്കൂളിൽ നടന്ന പരിപാടിയിൽ ലയൺസ് ക്ലബ് കുറ്റിപ്പുറം ഭാരവാഹികളായ സതീഷ് പി.ടി, സാബു ടി എസ്, മനോഹരൻ പി, പത്മദാസ് എം വി, ചന്ദ്രമോഹൻ മണികണ്ഠൻ എസ് വി, ഷാജി പി, എൻ ഹരീഷ് എന്നിവർ പങ്കെടുത്തു. സ്കൂൾ സൂപ്രണ്ട് ജയപ്രസാദ് പി, ചിന്തു , പി ടി എ പ്രസിഡന്റ് സി പി രാജൻ , അധ്യാപകരായ ലിൻസൺ ആൻ്റണി, സുബൈർ കെ റിയാസ് ഐ.പി, ജയകുമാർ .കെ, ജിജി , സിദ്ധാർത്ഥൻ ടി.ടി തുടങ്ങിയവർ നേതൃത്വം നൽകി.

The post കുറ്റിപ്പുറം ലയേൺസ് ക്ലബ്ബിന്റെ ആഭിമുഖ്യത്തിൽ ഔഷധസസ്യ വിതരണവും നടീലും നടന്നു appeared first on Valanchery Online.

മോഷ്ടിച്ച ബൈക്കിൽ കാമുകിയെ കാണാനെത്തി; വാഹനപരിശോധനയ്ക്കിടെ പിടിയിൽ, സംഭവം മലപ്പുറം കുറ്റിപ്പുറത്ത്

വളാഞ്ചേരിക്കാരൻ — Thu, 03 Jul 2025 00:49:47 +0000

കുറ്റിപ്പുറം : മോഷ്ടിച്ച ബൈക്കിൽ സുഹൃത്തുമൊത്ത് കാമുകിയെക്കാണാൻ വരികയായിരുന്ന യുവാവ് കുറ്റിപ്പുറം പോലീസിന്റെ പിടിയിലായി. കാഞ്ഞിരപ്പള്ളി സ്വദേശികളായ പട്ടിമറ്റം നെല്ലിമല പുതുപ്പറമ്പിൽ അജ്‌മൽ ഷാജഹാൻ (25), സുഹൃത്ത് പാറക്കൽ മുക്കാലി ശ്രീജിത്ത് (19) എന്നിവരാണ് അറസ്റ്റിലായത്. തിങ്കളാഴ്ച രാത്രി എറണാകുളത്തെ ഒരു ഫ്ലാറ്റിന്റെ പാർക്കിങ് സ്ഥലത്തുനിന്ന് ഇരുവരുംചേർന്ന് ബൈക്ക് മോഷ്ടിച്ചു. അവിടെനിന്ന് അജ്‌മൽ ഷാജഹാന്റെ മലപ്പുറത്തുള്ള കാമുകിയെക്കാണാൻ പോകുന്നതിനിടയിലാണ് ചൊവ്വാഴ്ച പുലർച്ചെ കുറ്റിപ്പുറത്ത് വാഹനപരിശോധന നടത്തുകയായിരുന്ന പോലീസിന്റെ മുന്നിൽപ്പെട്ടത്.

ബൈക്കിന്റെ നമ്പർ പ്ലേറ്റുകൾ ഊരിമാറ്റിയ നിലയിലായിരുന്നു. എസ്ഐ അയ്യപ്പൻ, സിപിഒ രഘു എന്നിവർക്ക് സംശയം തോന്നിയതോടെ ചോദ്യംചെയ്യുകയായിരുന്നു. ഇതിനിടെ പ്രതികൾ ബൈക്കുമായി രക്ഷപ്പെടാൻ ശ്രമം നടത്തിയെങ്കിലും പോലീസ് ആ നീക്കം പൊളിച്ചു. ബൈക്കിന്റെ പിറകിലിരിക്കുകയായിരുന്ന ശ്രീജിത്ത് ഓടിരക്ഷപ്പെട്ടു. എന്നാൽ, അജ്മലിനെക്കൊണ്ടുതന്നെ പോലീസ് തന്ത്രപരമായി ശ്രീജിത്തിനെ തിരികെയെത്തിച്ചു. അതിനുശേഷമാണ് കസ്റ്റഡിയിലെടുത്തത്. എൻജിൻ നമ്പറും ചെയ്സിസ് നമ്പറും പരിശോധിച്ച് ബൈക്കിന്റെ ഉടമയെ കണ്ടെത്തി പോലീസ് ഫോണിൽ ബന്ധപ്പെട്ടപ്പോഴാണ് ഉടമ മോഷണവിവരം അറിഞ്ഞത്.

ബൈക്ക് മോഷ്ടിക്കുന്നതിന്റെ സിസിടിവി ദൃശ്യം ഫ്ളാറ്റിൽനിന്ന് പോലീസിന് ലഭിച്ചിട്ടുണ്ട്. എസ്ഐ കെ. ഗിരി, എസ്.ഐ. സുധീർ എന്നിവരും പോലീസ് സംഘത്തിലുണ്ടായിരുന്നു. പ്രതികൾക്കെതിരേ ഒട്ടേറെ കേസുകൾ ഇടപ്പള്ളി, കോട്ടയം പോലീസ്‌സ്റ്റേഷനുകളിലുണ്ടെന്ന് കണ്ടെത്തി. പ്രതികളെ തിരൂർ ജുഡീഷ്യൽ മജിസ്ട്രേറ്റ് കോടതി റിമാൻഡ് ചെയ്തു.

The post മോഷ്ടിച്ച ബൈക്കിൽ കാമുകിയെ കാണാനെത്തി; വാഹനപരിശോധനയ്ക്കിടെ പിടിയിൽ, സംഭവം മലപ്പുറം കുറ്റിപ്പുറത്ത് appeared first on Valanchery Online.

11.5 ലക്ഷം രൂപയുടെ കുഴൽപ്പണവുമായി കുറ്റിപ്പുറത്ത് ഒരാൾ പിടിയിൽ

വളാഞ്ചേരിക്കാരൻ — Sun, 22 Jun 2025 01:58:33 +0000

കുറ്റിപ്പുറം: ബൈക്ക് യാത്രക്കാരനിൽനിന്നും 11.5 ലക്ഷം രൂപയുടെ കുഴൽപ്പണം കുറ്റിപ്പുറം പോലീസ് പിടികൂടി. കേസിൽ മക്കരപ്പറമ്പ് സ്വദേശി കരിയാത്ത് അഷ്റഫി (37) നെ അറസ്റ്റ് ചെയ്തു. അഷ്‍റഫ് ഏറെനാളായി കുറ്റിപ്പുറം പോലീസിന്റെ നിരീക്ഷണത്തിലായിരുന്നു. ദേശീയപാത 66-ലെ പൈങ്കണ്ണൂരിൽനിന്നും അഷ്റഫിന്റെ ബൈക്കിനെ പിന്തുടർന്ന പോലീസ് മിനി പമ്പയിൽവെച്ചാണ് പിടികൂടിയത്. ഇയാൾ ബൈക്കിന്റെ പെട്രോൾടാങ്കിനോടു ചേർന്ന് പ്രത്യേക അറയുണ്ടാക്കി അതിലായിരുന്നു പണം സൂക്ഷിച്ചിരുന്നത്. സിഐ നൗഫലിന്റെ നിർദേശപ്രകാരം എസ്‍ഐ സുധീർ, സിപിഒ മാരായ സുനിൽ ബാബു, രഞ്ജിത് എന്നിവരടങ്ങിയ സംഘമാണ് പ്രതിയെ പിടികൂടിയത്.

The post 11.5 ലക്ഷം രൂപയുടെ കുഴൽപ്പണവുമായി കുറ്റിപ്പുറത്ത് ഒരാൾ പിടിയിൽ appeared first on Valanchery Online.