kozhikode Archives - Valanchery Online

കടംവീട്ടാൻ എടിഎം കവർച്ച; കവർച്ചാശ്രമത്തിനിടെ കോട്ടക്കൽ സ്വദേശിയായ യുവ എൻജിനീയർ പിടിയിൽ

വളാഞ്ചേരിക്കാരൻ — Fri, 14 Feb 2025 06:29:52 +0000

കോഴിക്കോട്: 42 ലക്ഷം രൂപയുടെ കടബാധ്യത തീര്‍ക്കാന്‍ എ.ടി.എം. യന്ത്രം കട്ടര്‍ ഉപയോഗിച്ച് തകര്‍ക്കാര്‍ ശ്രമിച്ച യുവ എന്‍ജിനീയറെ പോലീസ് കൈയോടെ പിടികൂടി. കംപ്യൂട്ടര്‍ സയന്‍സ് ബി.ടെക്. ബിരുദധാരിയായ മലപ്പുറം ഒതുക്കുങ്ങല്‍ മറ്റത്തൂര്‍ മോന്തയില്‍ വീട്ടില്‍ വിജേഷാണ് (37) സിറ്റി കണ്‍ട്രോള്‍ റൂം പോലീസിന്റെ പിടിയിലായത്. വ്യാഴാഴ്ച പുലര്‍ച്ചെ 2.20-ഓടെ കോഴിക്കോട്ടുനിന്ന് 15 കിലോമീറ്റര്‍ അകലെ പറമ്പില്‍ബസാറിനടുത്തുള്ള പറമ്പില്‍ക്കടവിലെ ഹിറ്റാച്ചി എ.ടി.എമ്മാണ് തകര്‍ക്കാന്‍ ശ്രമിച്ചത്. നൈറ്റ് പട്രോളിങ് നടത്തുകയായിരുന്ന പോലീസ്സംഘം, ഷട്ടര്‍ താഴ്ത്തിയിട്ട എ.ടി.എം. റൂമില്‍ വെളിച്ചവും അസ്വാഭാവികശബ്ദവും കേട്ടതാണ് പ്രതി കൈയോടെ പിടിയിലാകാന്‍ ഇടയാക്കിയത്. ബാറ്ററിയില്‍ പ്രവര്‍ത്തിക്കുന്ന കട്ടര്‍, കമ്പിപ്പാര, ചുറ്റിക, പണം ഉള്‍പ്പെട്ട ലോക്കറിലെ ബോക്‌സ് തിരികെ കൊണ്ടുപോകുന്നതിനുള്ള ബാഗ് എന്നിവയുമായാണ് വിജേഷ് എ.ടി.എമ്മിലെത്തിയത്.

സി.സി.ടി.വി.ദൃശ്യങ്ങളില്‍ മുഖം വരാതിരിക്കാന്‍ മഫ്‌ളര്‍ ഉപയോഗിച്ച് തലയും മുഖവും മറച്ചാണ് എ.ടി.എമ്മിലേക്ക് എത്തിയത്. ഈ മുറിയുടെ തൊട്ടടുത്തുള്ള രണ്ട് കടകളിലെ ക്യാമറകള്‍, പുറകിലൂടെയെത്തി മുകളിലേക്ക് തിരിച്ചുവെച്ചാണ് എ.ടി.എമ്മിലെത്തിയത്. എ.ടി.എമ്മിനുള്ളിലെ ക്യാമറകളില്‍ പശിമയുള്ള ദ്രാവകം സ്‌പ്രേ ചെയ്തു. കടം വീട്ടാന്‍ കവര്‍ച്ച ആസൂത്രണംചെയ്ത വിജേഷ് ഒന്നരമാസമായി വീടുവിട്ട് കോഴിക്കോട്ടെ വിവിധ ഡോര്‍മിറ്ററികളിലാണ് താമസം. സ്വന്തം കാറിലെത്തി എ.ടി.എമ്മിന്റെ ഒരുകിലോമീറ്റര്‍ അകലെ കാര്‍ പാര്‍ക്ക്‌ചെയ്ത് നടന്നാണ് എ.ടി.എം റൂമിലേക്കെത്തിയത്.

പണമുണ്ടാക്കാന്‍ പല വഴികളും നോക്കി അവയെല്ലാം പരാജയപ്പെട്ടതിനെത്തുടര്‍ന്നാണ് എ.ടി.എം. കവര്‍ച്ചയിലെത്തിയത്. ഏത് എ.ടി.എം. എന്നുറപ്പിക്കാന്‍ കോഴിക്കോടിന്റെ തിരക്കൊഴിഞ്ഞ പ്രദേശങ്ങളിലൂടെ ധാരാളം യാത്ര നടത്തി. എങ്ങനെ എ.ടി.എം തകര്‍ക്കാമെന്നത് മനസ്സിലാക്കാന്‍ യുട്യൂബ് വീഡിയോകളെ ആശ്രയിച്ചു. ഇതിനുള്ള ഉപകരണങ്ങള്‍ ഓണ്‍ലൈനിലൂടെ വരുത്തി. ഡമ്മി ലോക്കറിന്റെ തകിട് മുറിച്ച് പരിശീലിക്കുകയും ചെയ്തു. aനൈറ്റ് പട്രോളിങ്ങില്‍ ഏര്‍പ്പെട്ട കണ്‍ട്രോള്‍ റൂം പോലീസുകാരായ മുക്തിദാസ്, അനീഷ്, സിദ്ദീഖ് എന്നിവര്‍ ചേര്‍ന്നാണ് വിജേഷിനെ പിടികൂടിയത്. പുലര്‍ച്ചെ രണ്ടേമുക്കാലോടെതന്നെ വിവരമറിഞ്ഞ് അസി. കമ്മിഷണര്‍ എ. ഉമേഷ്, ചേവായൂര്‍ ഇന്‍സ്‌പെക്ടര്‍ എസ്. സജീവ് എന്നിവരുള്‍പ്പെട്ട സംഘം അവിടെയെത്തി. പ്രതിയെ വ്യാഴാഴ്ച സന്ധ്യയോടെ ജുഡീഷ്യല്‍ ഒന്നാംക്‌ളാസ് മജിസ്‌ട്രേറ്റ് (ഒന്ന്) എസ്.വി. മനേഷ് മുന്‍പാകെ ഹാജരാക്കി.

The post കടംവീട്ടാൻ എടിഎം കവർച്ച; കവർച്ചാശ്രമത്തിനിടെ കോട്ടക്കൽ സ്വദേശിയായ യുവ എൻജിനീയർ പിടിയിൽ appeared first on Valanchery Online.

മലബാറിനോടുള്ള റെയിൽവേ അവഗണന: കോഴിക്കോട്ട് നടത്തിയ ബഹുജന സംഗമത്തിൽ പ്രതിഷേധമിരമ്പി

വളാഞ്ചേരിക്കാരൻ — Mon, 25 Nov 2024 02:11:51 +0000

കോഴിക്കോട്: കേരളത്തോടുള്ള റെയില്‍വേ അധികാരികളുടെ നിലപാട് മാറണമെന്നും മലബാറിലെ ട്രെയിന്‍ യാത്രക്കാരുടെ പ്രയാസങ്ങള്‍ക്ക് അടിയന്തിര പരിഹാരം കാണണമെന്നും കാലിക്കറ്റ് പ്രസ് ക്ലബ്ബ് പ്രസിഡന്റ് ഇ പി മുഹമ്മദ് ആവശ്യപ്പെട്ടു. കേരളത്തിലേക്കുള്ള റെയില്‍വേയുടെ പദ്ധതികൾ പ്രഖ്യാപനത്തില്‍ ഒതുങ്ങുകയാണെന്നും ഇക്കാര്യത്തില്‍ എംപിമാര്‍ പോലും കബളിപ്പിക്കപ്പെടുകയാണെന്നും അദ്ദേഹം പറഞ്ഞു. മലബാറിനോടുള്ള റെയില്‍വേയുടെ നിരന്തരമായ അവഗണന അവസാനിപ്പിക്കണമെന്നും നിർത്തലാക്കിയ ഷൊര്‍ണൂര്‍ – കോഴിക്കോട് പാസ്സഞ്ചർ വണ്ടികൾ പുനസ്ഥാപിക്കണമെന്നും ആവശ്യപ്പെട്ട് മലബാർ ട്രെയിന്‍ പാസ്സഞ്ചേഴ്സ് വെൽഫേർ അസോസിയേഷന്‍ കോഴിക്കോട്ട് നടത്തിയ പ്രതിഷേധ സംഗമം ഉദ്ഘാടനം ചെയ്യുകയായിരുന്നു അദ്ദേഹം. കോഴിക്കോട് റെയില്‍വേ സ്റ്റേഷന്‍ പരിസരത്ത് നടന്ന പ്രതിഷേധ സംഗമത്തിൽ നൂറു കണക്കിന് സ്ഥിരം ട്രെയിന്‍ യാത്രക്കാര്‍ പങ്കെടുത്തു. സംഗമത്തിലെ വൻ വനിതാ പങ്കാളിത്തം അവർ അനുഭവിക്കുന്ന യാത്രാ ക്ലേശം വിളിച്ചോതുന്നതായിരുന്നു.

ഷൊര്‍ണൂര്‍ – കോഴിക്കോട് പാസ്സഞ്ചർ ട്രെയിനുകൾ നിർത്തലാക്കിയത് മൂലം മലബാറിലെ സ്ഥിരം യാത്രക്കാർ അനുഭവിക്കുന്ന പ്രയാസങ്ങള്‍ പ്രതിഷേധക്കാർ അക്കമിട്ട് നിരത്തി. വന്ദേ ഭാരത് തളച്ചിടുന്ന എക്സിക്യൂട്ടീവ് എക്സ്പ്രസ്സിലെ യാത്രക്കാരുടെ ദുരിത യാത്രക്ക് പരിഹാരം വേണം,
06459 കോയമ്പത്തൂര്‍- ഷൊര്‍ണൂര്‍ പാസ്സഞ്ചർ കോഴിക്കോട്ടേക്ക് നീട്ടണം, സീനിയര്‍ സിറ്റിസന്‍ ആനുകൂല്യങ്ങള്‍ പൂനസ്ഥാപിക്കണം, 06031 വണ്ടിയുടെ ഷൊര്‍ണൂരില്‍ നിന്ന് പുറപ്പെടുന്ന സമയമാറ്റം പിൻവലിക്കണം, സ്ത്രീ യാത്രക്കാരുടെ വർദ്ധനവ് കണക്കിലെടുത്ത് രണ്ട് ലേഡീസ് ഒൺലി ഫുൾ കോച്ചുകൾ അനുവദിക്കണം, അശാസ്ത്രീയമായ ട്രെയിന്‍ സമയക്രമം കാലോചിതമായി പരിഷ്കരിക്കണം, വന്ദേഭാരത് മറ്റു ദീർഘ ദൂര വണ്ടികള്‍ക്ക് വേണ്ടി പാസ്സഞ്ചർ ട്രെയിനുകൾ പിടിച്ചിടുന്നത് ഒഴിവാക്കുക, റെയില്‍വേ സ്റ്റേഷനില്‍ വർദ്ധിച്ചു വരുന്ന നായ ശല്യം തടയണം. തുടങ്ങിയ ആവശ്യങ്ങള്‍ പ്രതിഷേധക്കാർ ഉന്നയിച്ചു.

പ്രസിഡന്റ് കെ രഘുനാഥ് അദ്ധ്യക്ഷത വഹിച്ചു. അബ്ദുല്‍ റഹ്മാന്‍ വള്ളിക്കുന്ന് മുഖ്യ പ്രഭാഷണം നടത്തി. സെക്രട്ടറി ഫിറോസ് കാപ്പാട്, ഓർഗനൈസിംഗ് സെക്രട്ടറി രാമനാഥൻ വേങ്ങേരി, സുജ മഞ്ഞോളി, കെ കെ റസ്സാഖ് ഹാജി തിരൂർ, മുഹ്സിൻ ഷാരോണ്‍, അഷ്റഫ് അരിയല്ലൂര്‍, മുനീര്‍ മാസ്റ്റര്‍ കുറ്റിപ്പുറം, പ്രമോദ് പന്നിയങ്കര, രതീഷ് ചെറൂപ്പ തുടങ്ങിയവര്‍ സംസാരിച്ചു. ഡോക്ടര്‍ ഷീന കടലുണ്ടി, ഫസലുർറഹ്മാൻ തിരൂർ, സത്യനാഥന്‍ ചേവായൂര്‍, സർജിത് കോട്ടൂളി, സജ്ന ഫറോക്ക്, ജസ്വന്ത് കുമാര്‍ ചേവായൂര്‍, നിഷ ടീച്ചര്‍ വൈഎംസിഎ തുടങ്ങിയവര്‍ നേതൃത്വം നല്‍കി.

The post മലബാറിനോടുള്ള റെയിൽവേ അവഗണന: കോഴിക്കോട്ട് നടത്തിയ ബഹുജന സംഗമത്തിൽ പ്രതിഷേധമിരമ്പി appeared first on Valanchery Online.

നിപ: മലപ്പുറത്തും ജാഗ്രതാ നിർദേശം

വളാഞ്ചേരിക്കാരൻ — Wed, 13 Sep 2023 01:21:27 +0000

മലപ്പുറം : അയൽജില്ലയായ കോഴിക്കോട്ട് രണ്ട് നിപ മരണം സ്ഥിരീകരിച്ചതോടെ മലപ്പുറത്തും ആരോഗ്യവകുപ്പിന്റെ ജാഗ്രതാ നിർദേശം. നിലവിലെ സമ്പർക്കപ്പട്ടികയിൽ ജില്ലയിൽനിന്നുള്ളവർ ഇല്ലെന്നാണ് വിവരം. വേണ്ട മുൻകരുതലുകളെടുക്കാൻ ആശുപത്രികൾക്കും ആരോഗ്യപ്രവർത്തകർക്കും നിർദേശം നൽകിയതായി ജില്ലാ മെഡിക്കൽ ഓഫീസർ ഡോ. ആർ. രേണുക അറിയിച്ചു. 2018-ൽ മലപ്പുറത്ത് നിപ മരണം റിപ്പോർട്ട് ചെയ്തിരുന്നു. അന്ന് കർശന സുരക്ഷാനടപടികളാണ് ആരോഗ്യവകുപ്പ് സ്വീകരിച്ചത്. 2021 സെപ്‌റ്റംബറിൽ കോഴിക്കോട് ജില്ലയിൽ 12 വയസ്സുള്ള കുട്ടി നിപ ബാധിച്ച് മരിച്ചപ്പോഴും മലപ്പുറത്ത് ജാഗ്രതാ നിർദേശമുണ്ടായിരുന്നു.

നിപയും ലക്ഷണങ്ങളും
തലച്ചോറിനെ ബാധിക്കുന്ന എൻസെഫലിറ്റീസ് രോഗം ഉണ്ടാക്കുന്ന വൈറസാണ് നിപ വൈറസ്. തുടക്കത്തിൽ പനിയോടുകൂടിയുള്ള ശരീരവേദന, തലവേദന, ക്ഷീണം, ചുമ, തൊണ്ടവേദന തുടങ്ങിയവാണു ലക്ഷണങ്ങൾ. തുടർന്ന് ഛർദി, കാഴ്‌ചമങ്ങൽ, സ്ഥലകാലവിഭ്രാന്തി, ശ്വാസതടസ്സം, അപസ്‌മാരം, ബോധക്ഷയം എന്നീ ലക്ഷണങ്ങളും വരാം. വൈറസ് ശരീരത്തിനുള്ളിൽ കടന്ന് നാലുമുതൽ 14 ദിവസത്തിനുള്ളിൽ രോഗലക്ഷണങ്ങൾ പ്രകടമാകും. ചിലപ്പോൾ 21 ദിവസം വരെയാകാം.

The post നിപ: മലപ്പുറത്തും ജാഗ്രതാ നിർദേശം appeared first on Valanchery Online.

കരിപ്പൂരിൽ നിന്നുള്ള എയർ ഇന്ത്യാ വിമാനങ്ങൾ നിർത്താനുള്ള നീക്കം ഉപേക്ഷിക്കണമെന്നാവശ്യപ്പെട്ട് മലബാർ ഡെവലപ്‌മെന്റ് ഫോറം പ്രതിഷേധ സംഗമം നടത്തി

വളാഞ്ചേരിക്കാരൻ — Tue, 21 Feb 2023 00:39:02 +0000

കോഴിക്കോട്: കരിപ്പൂരിൽ നിന്നും ദുബൈ,ഷാർജ സെക്ടറിലേക്കും തിരിച്ചും സർവീസ് നടത്തുന്ന എയർ ഇന്ത്യാ വിമാനങ്ങൾ മാർച്ച് മുതൽ നിർത്താനുള്ള എയർഇന്ത്യാ തീരുമാനം പുന:പരിശോധിച്ചില്ലെങ്കിൽ ബഹുജനങ്ങളെ അണിനിരത്തി ജനകീയ പ്രക്ഷോഭത്തിന് നേതൃത്വം നൽകുമെന്ന് എം.കെ.രാഘവൻ എം.പി. കോഴിക്കോട് വിമാനത്താവളത്തിൽ നിന്നും എയർ ഇന്ത്യാ വിമാനങ്ങൾ നിർത്താനുള്ള നീക്കം ഉപേക്ഷിക്കണമെന്നാവശ്യപ്പെട്ട് മലബാർ ഡെവലപ്‌മെന്റ് ഫോറം (എം.ഡി.എഫ്) സെൻട്രൽ കമ്മിറ്റി കോഴിക്കോട് നടത്തിയ പ്രതിഷേധ സംഗമം ഉദ്ഘാടനം ചെയ്യുകയായിരുന്നു അദ്ദേഹം.

കോഴിക്കോട് മൊഫ്യൂസൽ ബസ് സ്റ്റാൻഡ് പരിസരത്ത് നടന്ന പരിപാടിയിൽ മുൻമന്ത്രി എം.കെ.മുനീർ എം.എൽ.എ.മുഖ്യപ്രഭാഷണം നടത്തി.ചടങ്ങിൽ എം.ഡി.എഫ്.പ്രസിഡന്റ് എസ്.എ.അബൂബക്കർ അദ്ധ്യക്ഷത വഹിച്ചു. എം.ഡി.എഫ്.ചെയർമാൻ യു.എ.നസീർ സമരപ്രഖ്യാനം നടത്തി. സഹദ് പുറക്കാട് സാഗതവും അഷറഫ് കളത്തിങ്ങൽ പാറ നന്ദിയും പറഞ്ഞു. ഗുലാം ഹുസൈൻ കൊളക്കാടൻ, സന്നാഫ് പാലക്കണ്ടി, ഫ്രീഡാ പോൾ, കരീം വളാഞ്ചേരി, നിസ്താർ ചെറുവണ്ണൂർ തുടങ്ങിയവർ പ്രസംഗിച്ചു.

The post കരിപ്പൂരിൽ നിന്നുള്ള എയർ ഇന്ത്യാ വിമാനങ്ങൾ നിർത്താനുള്ള നീക്കം ഉപേക്ഷിക്കണമെന്നാവശ്യപ്പെട്ട് മലബാർ ഡെവലപ്‌മെന്റ് ഫോറം പ്രതിഷേധ സംഗമം നടത്തി appeared first on Valanchery Online.

18 ഗ്രാം എം.ഡി.എം.എ.യുമായി എടയൂർ സ്വദേശി യുവാവ് കോഴിക്കോട് പിടിയിൽ

വളാഞ്ചേരിക്കാരൻ — Sat, 23 Jul 2022 02:17:13 +0000

കോഴിക്കോട് : അതിമാരക മയക്കുമരുന്നായ എം.ഡി.എം.എ. യുമായി യുവാവ് പിടിയിൽ. എടയൂർ പൂക്കാട്ടിരി മുഹമ്മദ് യാസിർ (24) ആണ് പിടിയിലായത്. മെഡിക്കൽ കോളേജ് പോലീസ് സ്റ്റേഷൻ പരിധിയിലെ അൻസാരി ഹോട്ടലിന് സമീപത്തുനിന്ന് നർക്കോട്ടിക് സെൽ അസിസ്റ്റന്റ് കമ്മിഷണർ പ്രകാശൻ പടന്നയിലിന്റെ നേതൃത്വത്തിലുള്ള പ്രത്യേക പോലീസ് സംഘവും (ഡൻസാഫ്) മെഡിക്കൽ കോളേജ് പോലീസ് ഇൻസ്പെക്ടർ എം.എൽ. ബെന്നി ലാലുവിന്റെ നേതൃത്വത്തിലുള്ള പോലീസും ചേർന്നാണ് 18 ഗ്രാം എം.ഡി.എം.എ. യുമായി മുഹമ്മദ് യാസിറിനെ പിടികൂടിയത്. പിടിച്ചെടുത്ത ലഹരിവസ്തുവിന് ചില്ലറവിപണിയിൽ ഒരു ലക്ഷത്തോളം രൂപ വരും.

പെയിന്റിങ് തൊഴിലാളിയായ മുഹമ്മദ് യാസിർ ജില്ലയുടെ വിവിധ ഭാഗങ്ങളിൽ ലഹരിവിൽപ്പന നടത്തുന്നതായി പോലീസിന് വിവരം ലഭിച്ചിരുന്നു. മെഡിക്കൽ കോളേജ് പരിസരത്തെ ഹോസ്റ്റലുകൾ കേന്ദ്രീകരിച്ച് ലഹരിമരുന്നിന്റെ ഉപയോഗം വർധിച്ചുവരുന്നതായി പരാതി പോലീസിന് ലഭിച്ചിരുന്നു. പ്രതിക്ക് മയക്കുമരുന്ന് ലഭിച്ച ഉറവിടത്തെപ്പറ്റിയും ഇയാളുമായി മയക്കുമരുന്ന് ഇടപാട് നടത്തുന്നവരെക്കുറിച്ചും അന്വേഷണം തുടങ്ങിയിട്ടുണ്ട്. മെഡിക്കൽ കോളേജ് സബ്ബ് ഇൻസ്പെക്ടർ റാംമോഹൻ റോയ്, സീനിയർ സി.പി.ഒ. മനോജ്, സി.പി.ഒ.മാരായ പ്രമോദ്, രാരിഷ്, ഡൻസാഫ് എ.എസ്.ഐ. മനോജ് എടയേടത്ത്, കെ. അഖിലേഷ്, ജിനേഷ് ചൂലൂർ, സുനോജ് കാരയിൽ, അർജുൻ അജിത്ത് എന്നിവർ ചേർന്നാണ് പ്രതിയെ അറസ്റ്റുചെയ്തത്.

The post 18 ഗ്രാം എം.ഡി.എം.എ.യുമായി എടയൂർ സ്വദേശി യുവാവ് കോഴിക്കോട് പിടിയിൽ appeared first on Valanchery Online.

വ്യാപാരി വ്യവസായി ഏകോപനസമിതി സംസ്ഥാന പ്രസിഡന്‍റ് ടി. നസിറുദ്ദീൻ അന്തരിച്ചു

വളാഞ്ചേരിക്കാരൻ — Thu, 10 Feb 2022 17:47:40 +0000

കോഴിക്കോട്: വ്യാപാരി വ്യവസായി ഏകോപനസമിതി സംസ്ഥാന പ്രസിഡന്‍റ് ടി. നസിറുദ്ദീൻ (78) നിര്യാതനായി. കോഴിക്കോട് മിഠായിത്തെരുവിലെ ബ്യൂട്ടി സ്റ്റോഴ്സ് ഉടമയായിരുന്നു. വൃക്ക സംബന്ധമായ അസുഖത്തെ തുടർന്ന് കോഴിക്കോട് സ്വകാര്യ ആശുപത്രിയിൽ ചികിത്സയിലായിരുന്നു. വ്യാഴാഴ്ച രാത്രി 10.30 ഓടെയാണ് മരണം. 1991 മുതൽ സംഘടനയുടെ സംസ്ഥാന പ്രസിഡന്‍റാണ്.

ഭാരത് വ്യാപാരസമിതി അംഗം, വാറ്റ് ഇംപലിമെന്‍റേഷൻ കമ്മിറ്റി മെമ്പർ, വ്യാപാരി ക്ഷേമ നിധി വൈസ് ചെയർമാൻ, കേരള മർക്കന്‍റയിൽ ബാങ്ക് ചെയർമാൻ, ഷോപ് ആന്‍റ് കോമേഴ്ഷ്യൽ എസ്റ്റാബ്ലിഷ്മെന്‍റ് ക്ഷേമ നിധി ബോർഡ് മെമ്പർ തുടങ്ങിയ നിലകളിൽ പ്രവർത്തിച്ചിട്ടുണ്ട്.

The post വ്യാപാരി വ്യവസായി ഏകോപനസമിതി സംസ്ഥാന പ്രസിഡന്‍റ് ടി. നസിറുദ്ദീൻ അന്തരിച്ചു appeared first on Valanchery Online.

നിപ: മലപ്പുറം ജില്ലയിലും ജാഗ്രത നിർദേശം

വളാഞ്ചേരിക്കാരൻ — Sun, 05 Sep 2021 23:42:04 +0000

മലപ്പുറം : കോഴിക്കോട്ട് നിപ മരണമുണ്ടായ സാഹചര്യത്തിൽ മലപ്പുറം ജില്ലയിലും അതിജാഗ്രത. ഡി.എം.ഒ. ഡോ. കെ. സക്കീന, ആരോഗ്യ വിദഗ്ധർ എന്നിവരുൾപ്പെടുന്ന ജില്ലാതല ആർ.ആർ.ടി.യുടെ അടിയന്തര യോഗം മന്ത്രി വി. അബ്ദുറഹിമാന്റെ അധ്യക്ഷതയിൽ ചേർന്നു. രോഗം റിപ്പോർട്ട് ചെയ്ത സ്ഥലം മലപ്പുറം ജില്ലയിൽനിന്ന് അധികം ദൂരെയല്ലാത്തതിനാലും 2018-ൽ മലപ്പുറത്തും നിപ മരണം ഉണ്ടായിരുന്നതിനാലും ജനങ്ങൾ ജാഗ്രത പുലർത്തണം. പ്രത്യേകിച്ച് കോഴിക്കോട് ജില്ലയുടെ അതിർത്തിയിലുള്ളവർ.

മഞ്ചേരി മെഡിക്കൽ കോളേജ് ഉൾപ്പെടെയുള്ള എല്ലാ പ്രധാന ആശുപത്രികളിലും നിപ ലക്ഷണമുള്ളവർക്കായി പ്രത്യേക ഐസൊലേഷൻ വാർഡുകളും ചികിത്സാ സൗകര്യങ്ങളും ഒരുക്കാൻ മന്ത്രി നിർദേശംനൽകി. രോഗലക്ഷണമുള്ളവർ ആശുപത്രികളിലോ ലാബിലോ എത്തിയാൽ സ്വീകരിക്കേണ്ട മാനദണ്ഡം സംബന്ധിച്ചും രോഗപ്പകർച്ച തടയാനുള്ള നടപടികൾ സംബന്ധിച്ചും ആരോഗ്യപ്രവർത്തകർക്ക് പരിശീലനം നൽകും- മന്ത്രി പറഞ്ഞു.

The post നിപ: മലപ്പുറം ജില്ലയിലും ജാഗ്രത നിർദേശം appeared first on Valanchery Online.

പാണക്കാട് സയ്യിദ് മുഹമ്മദലി ശിഹാബ് തങ്ങളുടെ ജീവിതം ആസ്പദമാക്കി രചിച്ച ‘തങ്ങള്‍ എന്ന ലോകം’ സ്മരണിക പ്രകാശനം ചെയ്തു

വളാഞ്ചേരിക്കാരൻ — Sat, 05 Sep 2020 17:18:41 +0000

കോഴിക്കോട്: പാണക്കാട് സയ്യിദ് മുഹമ്മദലി ശിഹാബ് തങ്ങളുടെ ജീവിതം ആസ്പദമാക്കി കൊല്ലം കരുനാഗപ്പള്ളി ശിഹാബ് തങ്ങള്‍ മോമ്മോറിയല്‍ ചാരിറ്റബിള്‍ ട്രസ്റ്റ് പുറത്തിറക്കിയ ‘തങ്ങള്‍ എന്ന ലോകം’ സ്മരണികയുടെ പ്രകാശനം ഇടി മുഹമ്മദ് ബശീർ എം.പി പ്രതിപക്ഷ ഉപനേതാവ് ഡോ. എം.കെ മുനീര്‍ എം.എല്‍.എക്ക് നല്‍കി നിര്‍വഹിച്ചു. പാണക്കാട് സയ്യിദ് ബശീറലി ശിഹാബ് തങ്ങള്‍ അധ്യക്ഷനായി. ചന്ദ്രിക സീനിയർ ന്യൂസ് എഡിറ്റർ കമാല്‍ വരദൂര്‍, സുപ്രഭാതം എക്സിക്യൂട്ടീവ് എസിറ്റർ എ സജീവന്‍, നവാസ് മൂന്നാംകൈ, അശ്ഷറഫ് നെടുന്തോൾ, എം.എസ്എഫ് ദേശീയ വൈപ്രസിഡന്റ് പിവി അഹമ്മദ് സാജു, എം. എസ്എഫ് സംസ്ഥാന പ്രസിഡന്റ് പി.കെ നവാസ് റാഫി എളമ്പാറ, എം.ആർ മുഹമ്മദലി, ഫൈസൽ വയനാട്, സുബൈർ അൽ ഖാസിമി, ഷഹനാസ് കുറ്റിവെട്ടം പ്രസംഗിച്ചു.

The post പാണക്കാട് സയ്യിദ് മുഹമ്മദലി ശിഹാബ് തങ്ങളുടെ ജീവിതം ആസ്പദമാക്കി രചിച്ച ‘തങ്ങള്‍ എന്ന ലോകം’ സ്മരണിക പ്രകാശനം ചെയ്തു appeared first on Valanchery Online.

സ്വർണ്ണക്കടത്ത് കേസിൽ സമരത്തിനു നേരെ പോലീസ് നടപടി; യൂത്ത് ലീഗ് വളാഞ്ചേരിയിൽ പ്രതിഷേധിച്ചു-വീഡിയോ

വളാഞ്ചേരിക്കാരൻ — Fri, 10 Jul 2020 17:41:47 +0000

വളാഞ്ചേരി: സ്വർണ്ണക്കടത്ത് കേസിൽ കുറ്റാരോപിതനായ മുഖ്യമന്ത്രി പിണറായി വിജയൻ രാജിവെക്കണമെന്നാവശ്യപ്പെട്ടു കോഴിക്കോട് കലക്ട്രേറ്റിലേക്ക് കോഴിക്കോട് ജില്ലാ യൂത്ത് ലീഗ് നടത്തിയ കലക്ടറേറ്റ് മാർച്ചിനുനേരെ പോലീസ് നടപടി പ്രതിഷേധിച്ച് വളാഞ്ചേരി മുനിസിപ്പൽ യൂത്ത് ലീഗ് വളാഞ്ചേരി ടൗണിൽ പ്രതിഷേധ പ്രകടനം നടത്തി പ്രതിഷേധ പ്രകടനത്തിന് യൂത്ത് ലീഗ് മുൻസിപ്പൽ പ്രസിഡൻറ് സി എം റിയാസ് മുജീബ് വാലാസി വിപി അബ്ദുൽ ജബ്ബാർ കെ ടി നിസാർ ബാബുവി പി ഇസ്ഹാഖ് മാസ്റ്റർ സയ്യിദ് ഹാഷിം തങ്ങൾ മുഹ്സിൻ വടക്കുംമുറി ശിഹാബ് പാറക്കൽ അയ്യൂബ് ആലുക്കൽ ഫൈസൽ അകയിൽ എൻ ജിഷാർ എന്നിവർ പങ്കെടുത്തു.

The post സ്വർണ്ണക്കടത്ത് കേസിൽ സമരത്തിനു നേരെ പോലീസ് നടപടി; യൂത്ത് ലീഗ് വളാഞ്ചേരിയിൽ പ്രതിഷേധിച്ചു-വീഡിയോ appeared first on Valanchery Online.

ഇടശ്ശേരിയുടെ മണ്ണിൽ നിന്നും എഴുപത് കിലോമീറ്റർ താണ്ടി അവർ ശഹീൻ ബാഗിലെത്തി

വളാഞ്ചേരിക്കാരൻ — Mon, 02 Mar 2020 16:46:38 +0000

കുറ്റിപ്പുറം. മുസ്ലിം യൂത്ത് ലീഗ് സംസ്ഥാന കമ്മിറ്റി അനിശ്ചിതകാലത്തേക്ക് പ്രഖ്യാപിച്ച കോഴിക്കോട് ശഹീൻ ബാഗ് സ്ക്വയറിലേക്ക് കുറ്റിപ്പുറം പഞ്ചായത്ത് യൂത്ത് ലീഗ് കമ്മിറ്റിയുടെ നേതൃത്വത്തിൽ യൂത്ത് ലീഗ്, എം എസ് എഫ് പ്രവർത്തകർ കാൽനട യാത്ര നടത്തി.

കുറ്റിപ്പുറം മിനി പമ്പയിൽ നിന്നും പഞ്ചായത്ത് മുസ്ലിം ലീഗ് പ്രസിഡൻറ് സയ്യിദ് ലുഖ്മാൻ തങ്ങൾ ഫ്ലാഗ് ഓഫ് ചെയ്തു സെക്രട്ടറി സിദ്ധീഖ് പരപ്പാര, പി വി ഷാജി, കുഞ്ഞാപ്പ മാമ്പാറ, അജ്മൽ, ഹക്കീം, ഷംനാദ് എന്നിവർ അഭിവാദ്യമർപ്പിച്ചു
കുറ്റിപ്പുറം പഞ്ചായത്ത് യൂത്ത് ലീഗ് പ്രസിഡന്റ് കെ ടി ഹമീദ്, സെക്രട്ടറി ഷമീർ തടത്തിൽ, ട്രഷറർ റാഫി പകരനല്ലൂർ, സഖാഫ് തങ്ങൾ, ഷാഫി പൂങ്ങോട്ടിൽ, ആബിദ് വരിക്കപുലാക്കൽ, മുജീബ് തറക്കൽ, സിദ്ധീഖ് പാലാറ, സൈൻ സഖാഫ്, റാഷിദ് ചേലക്കൽ, സൈതലവി, നജ്മുദ്ദീൻ, റിയാസ്, ജാഫർ, റഷീദ് എന്നിവരാണ് ഒരു ദിവസം കൊണ്ട് എഴുപത് കിലോമീറ്റർ താണ്ടി കോഴിക്കോട് ശഹീൻ ബാഗിലെത്തിയത്ത് സംസ്ഥാന യൂത്ത് ലീഗ് സെക്രട്ടറി പി കെ ഫിറോസ് സമരഭടൻമാരെ ഷാളണിയിച്ചു സ്വീകരിച്ചു.

The post ഇടശ്ശേരിയുടെ മണ്ണിൽ നിന്നും എഴുപത് കിലോമീറ്റർ താണ്ടി അവർ ശഹീൻ ബാഗിലെത്തി appeared first on Valanchery Online.

സക്കരിയയുടെ ‘ഹലാൽ ലൗ സ്റ്റോറി’ ചിത്രീകരണം ആരംഭിച്ചു

വളാഞ്ചേരിക്കാരൻ — Sun, 17 Nov 2019 13:32:54 +0000

കോഴിക്കോട്: പപ്പായ ഫിലിംസിന്റെ ബാനറിൽ സക്കരിയ മുഹമ്മദ് സംവിധാനം ചെയ്യുന്ന ‘ഹലാൽ ലൗ സ്റ്റോറി’യുടെ ചിത്രീകരണം കോഴിക്കോട് ആരംഭിച്ചു. സക്കരിയയുടെ പിതാവ് മുഹമ്മദ് കുട്ടി സ്വിച്ച്ഓൺ കർമം നിർവഹിക്കുകയും സംവിധായകൻ മധു സി നാരായണൻ ആദ്യക്ലാപ്പടിക്കുകയും ചെയ്തു.

ആഷിഖ് അബു, ഹർഷാദ് അലി, ജസ്ന അഷീം എന്നിവർ ചേർന്നു നിർമിക്കുന്ന ചിത്രത്തിന്റെ തിരക്കഥ മുഹ്സിൻ പരാരിയും സക്കരിയ മുഹമ്മദും ചേർന്നാണ് രചിച്ചിരിക്കുന്നത്. അജയ് മേനോൻ ആദ്യമായി ഛായാഗ്രഹണം നിർവഹിക്കുന്ന ചിത്രത്തിന് ബിജിബാലും ഷഹബാസ് അമനും സംഗീതമൊരുക്കുന്നു.ഇന്ദ്രജിത്ത് സുകുമാരൻ, ജോജു ജോർജ്ജ്, ഷറഫുദ്ദീൻ, ഗ്രെയ്സ് ആന്റണി തുടങ്ങിയവർ പ്രധാനവേഷങ്ങളിൽ അണിനിരക്കുന്നു.

The post സക്കരിയയുടെ ‘ഹലാൽ ലൗ സ്റ്റോറി’ ചിത്രീകരണം ആരംഭിച്ചു appeared first on Valanchery Online.

ഓമശ്ശേരിയില്‍ ജ്വല്ലറിയില്‍ തോക്ക് ചൂണ്ടി കവര്‍ച്ച; ഒരാള്‍ പിടിയില്‍-വീഡിയോ

വളാഞ്ചേരിക്കാരൻ — Sun, 14 Jul 2019 09:29:01 +0000

കോഴിക്കോട്: ഓമശ്ശേരിയിലെ ജ്വല്ലറിയില്‍ തോക്ക് ചൂണ്ടി കവര്‍ച്ച. ഇന്നു രാത്രി ഏഴരയോടെ ഷാദി ഗോള്‍ഡ് ആന്റ് ഡയമണ്ട്‌സിലാണ് ജീവനക്കാരെ തോക്കിന്‍ മുനയില്‍ നിര്‍ത്തി മൂന്നംഗ സംഘം കവര്‍ച്ച നടത്തിയത്. ജ്വല്ലറി അടക്കുന്നതിനായി ജീവനക്കാര്‍ സ്‌റ്റോക്ക് എടുക്കാന്‍ തയ്യാറെടുക്കുന്നതിനിടെ അതിക്രമിച്ച് കയറിയ മൂന്നംഗ സംഘം ജീവനക്കാരെ തോക്ക് ചൂണ്ടി വിരട്ടി സ്വര്‍ണം കവരുകയായിരുന്നു. വളയുടെ സെക്ഷനിലുണ്ടായിരുന്ന ആഭരണങ്ങള്‍ വാരിയിട്ട് സംഘം രക്ഷപ്പെടുന്നതിനിടെ കവര്‍ച്ചാ സംഘത്തിലെ ഒരാളെ ജീവനക്കാര്‍ ചേര്‍ന്ന് കീഴ്‌പ്പെടുത്തി. മറ്റു രണ്ടു പേര്‍ രക്ഷപ്പെട്ടു. 15 ഓളം വളകള്‍ നഷ്ടപ്പെട്ടതായി ജീവനക്കാര്‍ പറഞ്ഞു.

പിടിവലിക്കിടെ ജീവനക്കാരായ മനുവിനും മറ്റൊരാള്‍ക്കും പരിക്കേറ്റു. കൊടുവള്ളി പോലിസ് സ്ഥലത്തെത്തി. പ്രതിയെ കസ്റ്റഡിയിലെടുത്തു. അബോധാവസ്ഥയിലുള്ള പ്രതിയെ ആശുപത്രില്‍ പ്രവേശിപ്പിച്ചു. പോലിസ് കേസെടുത്ത് അന്വേഷണം നടത്തിവരികയാണ്.

The post ഓമശ്ശേരിയില്‍ ജ്വല്ലറിയില്‍ തോക്ക് ചൂണ്ടി കവര്‍ച്ച; ഒരാള്‍ പിടിയില്‍-വീഡിയോ appeared first on Valanchery Online.