kottakunnu Archives - Valanchery Online

പ്രളയം ജീവിതം തൂത്തെറിഞ്ഞ ശരത്തിന് ഓണക്കൈനീട്ടവുമായി പാണക്കാട് കുടുംബം

വളാഞ്ചേരിക്കാരൻ — Tue, 10 Sep 2019 11:38:44 +0000

കേരളം കണ്ട മഹാ പ്രളയത്തിൽ സർവ്വം നഷ്ടപ്പെട്ട മലപ്പുറത്തെ ശരത്തിന് ഓണസമ്മാനമായി വീടും പറമ്പും നൽകി പാണക്കാട് തങ്ങൾ കുടുംബം. പാണക്കാട് ശിഹാബുദ്ദീൻ ഖബീലയാണ് തങ്ങളുടെ വിളിപ്പാടകലെ സംഭവിച്ച മഹാദുരന്തത്തിന്റെ ഇരകൾക്ക് സ്നേഹ തണൽ വിരിച്ച് അവരെ സ്വന്തം കുടുംബം പോലെ കണ്ട് മാറോട് ചേർത് പിടിച്ചത്. ശരത്തിന്റെ അമ്മയെയും ഭാര്യയെയും ഒന്നര വയസ്സുള്ള കുഞ്ഞിനെയുമാണ് ഓഗസ്റ്റ് ഒമ്പതിന് ഉരുൾപൊട്ടിയതിനെ തുർന്നുണ്ടായ മലവെള്ളപാച്ചിലിൽ എന്നന്നേക്കുമായി നഷ്ടമായത്. ഉറ്റവരുടെ ചലനമറ്റ ശരീരംപോലും കാണാന്‍ ശരത്തിന് നീറുന്ന ഓര്‍മകളുമായി ദിവസങ്ങളോളം ദുരന്ത ഭൂമിയുടെ സമീപത്ത് കാത്തിരിക്കേണ്ടിവന്നിരുന്നു.

തുടര്‍ച്ചയായ മഴയില്‍ കോട്ടക്കുന്ന് മലമുകളിലെ വെള്ളം വീടിന് മുകളിലെത്തുകയും ,തുടർന്ന് ഗീതുവും കുട്ടിയും മുറിയിലിരിക്കെ വെള്ളം ചാലുകീറിവിടാന്‍ അമ്മ സരോജിനിയും ശരത്തും പുറത്തിറങ്ങിയത്. വീടിനുമുന്നിലെ റോഡില്‍ രണ്ടുപേരും എത്തിയപ്പോഴായിരുന്നു ദുരന്തം. നിമിഷനേരംകൊണ്ട് എല്ലാം തകര്‍ന്നടിഞ്ഞു. സമീപത്തെ ടൂറിസ്റ്റ് ഹോം സിസി ടിവിയില്‍ കണ്ട ദുരന്ത ദൃശ്യങ്ങൾ മാത്രമാണ് പിന്നെ ബാക്കിയായത്.
അപകടത്തിന്റെ മൂന്നാം ദിവസം മാത്രമാണ് ശരത്തിന്റെ ഭാര്യയുടെയും ഒന്നര വയസുകാരിയായ കുഞ്ഞിന്റെയും മൃതദേഹവും , നാലാം ദിവസം അമ്മയുടേതും കണ്ടെടുക്കാനായത്.
ദുരന്തത്തില്‍ ശരത്ത് തലനാരിഴക്കാണ് രക്ഷപ്പെട്ടത്. വന്‍തോതില്‍ ഉരുളുകള്‍ പതിച്ച വീടിന്റെ തറയുടെ ചില ഭാഗങ്ങള്‍മാത്രമാണ് ഇപ്പോൾ അവശേഷിക്കുന്നത്.

ഉറ്റവർ മൂന്നു പേരും നഷ്ടപ്പെട്ട ശരത്തിനൊപ്പം അഛൻ സത്യനും സഹോദരൻ സജിനും മാത്രമാണ് ഇപ്പോൾ നിലവിലുള്ളത്. ഇവർക്ക് മുമ്പിലേക്കാണ് ഓണ സമ്മാനമായി ആശ്വാസത്തിന്റെ തെളിനീരുമായി പാണക്കാട് കുടുംബം കടന്ന് വന്നത്. എന്നും നന്മയുടെ പൂമരത്തണലായ പാണക്കാട് കുടുംബത്തിന്റെ കാരണവർ സയ്യിദ് ഹൈദറലി തങ്ങളുടെ വസതിയിൽ വെച്ച് ചൊവ്വാഴ്ച ഇതിന്റെ പ്രഖ്യാപനവും, നിർമ്മാണ സ്ഥലത്തെത്തി കുറ്റിയടിക്കൽ ചടങ്ങും നടന്നു. പ്രളയത്തിലകപ്പെട്ട് മാസങ്ങളായിട്ടും നഷ്ടപരിഹാരം ലഭിക്കാതെ ജനങ്ങൾ പ്രയാസപ്പെടുകയാണ്. അർഹരായ പലരെയും, ബന്ധു വീട്ടിൽ കഴിഞ്ഞ വരെയും പട്ടികയിൽ നിന്ന് ഒഴിവാക്കിയത് ശരിയായ നടപടിയല്ലെന്നും, വിഷയത്തിന്റെ ഗൗരവം മനസ്സിലാക്കി പാവങ്ങളുടെ കണ്ണീരൊപ്പാൻ സർക്കാർ മുന്നോട്ട് വരണമെന്ന് തങ്ങൾ പറഞ്ഞു.

പാണക്കാട് കുടുംബത്തിന്റെ അടുത്ത സുഹൃത്തും പ്രമുഖ വ്യവസായിയുമായ ആരിഫ് കളപ്പാടനാണ് മുനവ്വറലി ശിഹാബ് തങ്ങൾ വിഷയം സൂചിപ്പിച്ചപ്പോഴേക്കും പാണക്കാട് – പട്ടർകടവ് ഭാഗത്തെ തന്റെ കണ്ണായ ഭൂമിയിൽ നിന്ന് ആറ് സെന്റ് ഭൂമി ദാനമായി നൽകിയത്. അത്യാവശ്യ സൗകര്യങ്ങളോടെ നിർമ്മിക്കുന്ന വീടിന്റെ പണികൾ ആറു മാസം കൊണ്ട് തന്നെ പൂർത്തിയാക്കും. ശിഹാബുദ്ദീൻ കുടുംബ കൂട്ടായ്മയുടെ സംരഭങ്ങളിലൊന്നാണ് പ്രളയ ദുരിതാശ്വാസ ഭവന പദ്ധതി. കഴിഞ്ഞ വർഷത്തെ പ്രളയത്തിലും പല വീടുകളും നഷ്ടമാകുകയും കേടുപാടുകൾ വരികയും ചെയ്തപ്പോൾ ശിഹാബുദ്ദീൻ കുടുംബം ഇടപെടുകയും നിർമ്മാണ പ്രവർത്തനകൾ നടത്തുകയും ചെയ്തിട്ടുണ്ട്. ഈ പ്രളയത്തിലും വിവിധ സ്ഥലങ്ങിൽ ആവശ്യമായ സഹായങ്ങൾ എത്തിക്കാനും തങ്ങൾ കുടുംബം മുന്നോട്ട് വന്നിരുന്നു.

ചടങ്ങിൽ സയ്യിദ് ഹൈദറലി ശിഹാബ് തങ്ങൾ പ്രഖ്യാപനം നടത്തി. സയ്യിദ് ഹുസൈൻ ശിഹാബ് തങ്ങൾ അധ്യക്ഷത വഹിച്ചു. സയ്യിദ് സാദിഖലി ശിഹാബ് തങ്ങൾ, പി.കെ. കുഞ്ഞാലിക്കുട്ടി എം.പി, സയ്യിദ് നാസർ ഹയ്യ് ശിഹാബ് തങ്ങൾ, അബ്ബാസലി ശിഹാബ് തങ്ങൾ, ബഷീർ അലി ശിഹാബ് തങ്ങൾ, മുനവ്വറലി ശിഹാബ് തങ്ങൾ
റഷീദലി ശിഹാബ് തങ്ങൾ, ഹമീദലി ശിഹാബ് തങ്ങൾ, ഉബൈദുല്ല എം.എൽ.എ, എ.പി. ഉണ്ണികൃഷ്ണൻ, കുഞ്ഞാപ്പു തങ്ങൾ, മുത്തുപ്പ തങ്ങൾ, സ്വാലിഹ് തങ്ങൾ കോഴിക്കോട് എന്നിവർ പങ്കെടുത്തു.

The post പ്രളയം ജീവിതം തൂത്തെറിഞ്ഞ ശരത്തിന് ഓണക്കൈനീട്ടവുമായി പാണക്കാട് കുടുംബം appeared first on Valanchery Online.

മരണത്തിലും വിട്ടില്ല പിഞ്ചോമനയെ; നോവായി കോട്ടക്കുന്ന്

വളാഞ്ചേരിക്കാരൻ — Mon, 12 Aug 2019 00:16:53 +0000

കോട്ടക്കുന്ന്: മണ്ണ് മുകളില്‍ വീണ് തിരിച്ചറിയാനാകാത്തവിധമാണ് അവരുടെ മൃതദേഹങ്ങള്‍ കണ്ടെത്തിയത്. പക്ഷേ അപ്പോഴും ഒന്നരവയസുകാരന്‍ ധ്രുവിന്റെ കൈയ്യില്‍ അവന്റെ അമ്മ ഗീതു മുറുകെ പിടിച്ചിരുന്നു. ധ്രുവന്റേയും അവനെ മുറുകെ പിടിച്ചു ചെളിയില്‍ പൊതിഞ്ഞ് കിടന്ന ഗീതുവിന്റേയും മൃതദേഹങ്ങൾ രക്ഷാപ്രവര്‍ത്തകരുടെയും നാട്ടുകാരുടെയും ഉള്ളുലച്ചു. രണ്ടു ദിവസമായി തുടരുന്ന തിരച്ചിലുകള്‍ക്ക് ശേഷമാണ് ഇവരെ കണ്ടെത്തിയത്.

കോട്ടക്കുന്ന് പടിഞ്ഞാറെ ചെരുവില്‍ ഉണ്ടായ ഉരുള്‍പൊട്ടലിലാണ് ചാത്തക്കുളം സത്യന്റെ മരുമകൾ ഗീതുവും (22) പേരമകൻ ധ്രുവനും (ഒന്നര) മരിച്ചത്. ഉരുൾ പൊട്ടലിൽ സത്യന്റെ ഭാര്യ സരോജിനി (50)യേയും കാണാതായിട്ടുണ്ട്. ശരത്തിന്റെ കണ്‍മുന്നിലാണ് അമ്മയും ഭാര്യയും കുഞ്ഞും മണ്ണിനടിയില്‍ പെട്ടുപോയത്.

വെള്ളിയാഴ്ച ഉച്ചയ്ക്ക് രണ്ട് മണിയോടെയാണ് സംഭവം. ശരത്തും അമ്മ സരോജിനിയും കോട്ടക്കുന്നിന്റെ മുകളില്‍നിന്ന് ഒഴുകിയെത്തുന്ന വെള്ളം വീടിലേക്ക് കയറാതിരിക്കാന്‍ തൂമ്പയെടുത്ത് മറ്റൊരുവശത്തേക്ക് തിരിച്ചുവിടുകയായിരുന്നു. ഈ സമയത്താണ് നേരത്തേ വിണ്ടുകീറി നിന്നിരുന്ന മലയുടെ ഭാഗം കനത്ത മഴയില്‍ ഇടിഞ്ഞ് താഴേക്ക് പതിച്ചത്. ശരത്ത് അമ്മയുടെ കൈയുംപിടിച്ച് ഓടിമാറാന്‍ ശ്രമിച്ചെങ്കിലും അമ്മ മണ്ണിനടിയില്‍പ്പെട്ടു. നിമിഷ നേരംകൊണ്ട് ഓടിട്ട വീട് ഒന്നാകെ മണ്ണിനടിയില്‍ അമര്‍ന്നു. ഇതിനകത്തുണ്ടായിരുന്ന ഭാര്യയും മകനും അതിനടിയില്‍പ്പെട്ടു.ശരത്തിന്റെ സുഹൃത്ത് ശക്കീബും സംഭവസ്ഥലത്തുണ്ടായിരുന്നെങ്കിലും ശക്കീബ് അത്ഭുതകരമായി രക്ഷപ്പെട്ടു. സത്യനും മറ്റൊരു മകനായ സജിത്തും വീട്ടിലുണ്ടായിരുന്നില്ല.

വെള്ളിയാഴ്ച അപകടം നടന്ന് ഒരുമണിക്കൂറോളം കഴിഞ്ഞാണ് മണ്ണുമാന്തിയന്ത്രം ഉപയോഗിച്ച് തിരച്ചില്‍ ആരംഭിക്കാനായത്. അഗ്‌നിരക്ഷാസേനയും പോലീസും നാട്ടുകാരുംചേര്‍ന്ന് പിന്നീട് മണിക്കൂറുകള്‍ നീണ്ട തിരച്ചില്‍ നടത്തിയെങ്കിലും ഇവരെ കണ്ടെത്താനായില്ല. കലാവസ്ഥ മോശമായതിനെത്തുടര്‍ന്ന് രക്ഷാപ്രവര്‍ത്തനം വൈകീട്ട് ഏഴോടെ അവസാനിപ്പിച്ചു. തിരച്ചില്‍ ശനിയാഴ്ച വീണ്ടും തുടര്‍ന്നെങ്കിലും ഇവരെ കണ്ടെത്താന്‍ കഴിഞ്ഞിരുന്നില്ല.വീണ്ടും ഞായറാഴ്ച നടത്തിയ തിരച്ചിലിലാണ് ഇരുവരെയും കണ്ടെത്തിയത്.

The post മരണത്തിലും വിട്ടില്ല പിഞ്ചോമനയെ; നോവായി കോട്ടക്കുന്ന് appeared first on Valanchery Online.

കൌതുകമായി മലപുറത്തെ ഹംസമാരുടെ സംഗമം

വളാഞ്ചേരിക്കാരൻ — Sun, 08 Apr 2018 01:17:19 +0000

മലപ്പുറം ∙ ‘ഹംസേ…’ എന്ന് ഒറ്റത്തവണ നീട്ടിവിളിച്ചാൽ മൂവായിരം പേർ ‘എന്തോ’ എന്നു തിരിച്ചുചോദിക്കുന്ന രംഗമാലോചിച്ചുനോക്കൂ. ജില്ലയിലെ, ഹംസ എന്നുപേരുള്ളവരുടെ ‘ഞാൻ ഹംസ’ സംഗമത്തിലാണ് 40 ദിവസം പ്രായമായ തിരൂരിലെ ഹംസ അമീൻ മുതൽ 88 വയസ്സുള്ള കരുവാരകുണ്ട് പുല്ലൂർശൻ ഹംസ വരെയുള്ള മൂവായിരത്തിലധികമാളുകൾ ഒത്തുചേർന്നത്. പ്രധാനസംഘാടകനായ ലൗലി ഹംസ ഹാജിയുടെ വക സ്വാഗതം. ആധ്യക്ഷ്യം വഹിച്ചത് മതപണ്ഡിതൻ ഹംസ ബാഫഖി, ഉദ്ഘാടനം ഹംസ അഞ്ചുമുക്കിൽ, പ്രസംഗകരായി ഹംസ യോഗ്യൻ, ഹംസ നെടിയിരുപ്പ്, ഹംസ ജെംസ് കോളജ്… അങ്ങനെ ഏറെപ്പേർ.

40 ദിവസം പ്രായമായ തിരൂരിലെ ഹംസ അമീൻഹംസ എന്നു പേരുള്ളവർക്കു മാത്രമായിരുന്നു ഓഡിറ്റോറിയത്തിൽ പ്രവേശനം. മലപ്പുറത്തെ വ്യാപാരിയായ ലൗലി ഹംസ ഹാജിക്കാണ് ‘ഹംസപ്പട’യെ വിളിച്ചുകൂട്ടിയാലോ എന്നു തോന്നിയത്. ഫോണിലെ കോണ്ടോക്ട്സ് നോക്കിയപ്പോൾതന്നെ ഹംസമാരുടെ ഒരു നിരയുണ്ട്. സംഗമം വച്ചാലോ എന്ന് ഒന്നുരണ്ടുപേരോടു പറ‍ഞ്ഞതേയുള്ളൂ, ആളുകൾ ഇങ്ങോട്ട് അന്വേഷിച്ചുതുടങ്ങി. ഹംസമാരെത്തേടി പത്രത്തിൽ അറിയിപ്പ് കൊടുത്തതോടെ ഒഴുക്കായി.
കാര്യങ്ങൾ കൈവിട്ടുപോകുമെന്ന് ഭയന്ന്, മലപ്പുറം ഹംസമാർക്കു മാത്രമാക്കി സംഗമം പരിമിതപ്പെടുത്തുകയായിരുന്നു. ‘ഞാൻ ഹംസ’ എന്നെഴുതിയ വെള്ളത്തൊപ്പി വച്ച്, ഏത് ഹംസയാണെന്നു വ്യക്തമാക്കുന്ന ബാഡ്ജ് ധരിച്ച് ഹംസമാർ ഓഡിറ്റോറിയത്തിൽ തിങ്ങിനിറഞ്ഞു. ആളുകൾ വന്നുകൊണ്ടിരുന്നപ്പോൾ മൂന്ന് ‘ബാച്ച്’ ആയി ഇരുത്തേണ്ടി വന്നു. പ്രതീക്ഷിച്ചതിലും കൂടുതൽ ആളുകളെത്തിയതോടെ ഭക്ഷണം തീർന്നു. ഹംസമാരുടെ കലാപരിപാടികളും ലൗലി ഹംസ ഹാജിയുടെയും മലയിൽ ഹംസയുടെയും മാജിക് ഷോയുമൊക്കെയായി പരിപാടി തകർത്തു. വാട്സാപ് ഗ്രൂപ്പും ഫെയ്സ്ബുക്ക് പേജും തുടങ്ങി, ഹംസമാരുടെ ചികിത്സാസഹായം ഉൾപ്പെടെയുള്ള ഭാവിപരിപാടികൾ ആസൂത്രണം ചെയ്തുപിരിഞ്ഞു. ‘സിംഹം’ എന്നാണ് ഹംസ എന്ന അറബിക് പേരിന് അർഥം.

The post കൌതുകമായി മലപുറത്തെ ഹംസമാരുടെ സംഗമം appeared first on Valanchery Online.