kottakkal arya vaidya sala Archives - Valanchery Online

ഡോ. പി.എം വാരിയർ കോട്ടക്കൽ ആര്യവൈദ്യശാല മാനേജിങ് ട്രസ്റ്റി

വളാഞ്ചേരിക്കാരൻ — Sun, 11 Jul 2021 15:12:16 +0000

കോട്ടക്കൽ: കോട്ടക്കൽ ആര്യവൈദ്യശാലയുടെ പുതിയ മാനേജിങ് ഡയറക്ടറായി ഡോ.പി.എം വാരിയരെ (മാധവൻ കുട്ടി വാര്യർ) നിയമിച്ചു. ഇന്ന് നടന്ന ട്രസ്റ്റ് ബോർഡ് യോഗത്തിലാണ് ഡോ.പി.എം.വാരിയരെ മാനേജിങ് ട്രസ്റ്റിയായി തിരഞ്ഞെടുത്തത്. ഇന്നലെ അന്തരിച്ച പി.കെ വാര്യരുടെ മരുമകനാണ് (സഹോദരിയുടെ പുത്രൻ) ഇദ്ദേഹം.

തിരുവനന്തപുരം ആയുർവ്വേദ കോളേജിൻ നിന്നും എം.ഡി. ബിരുദം നേടി. 1969 ൽ അസി. ഫിസിഷ്യനായി ജോലിയിൽ പ്രവേശിച്ചു. 2007 മുതൽ ട്രസ്റ്റ് ബോർഡ് അംഗമാണ്. ഗവേണിംഗ്‌ ബോഡി കേരളാ ആയുർവ്വേദിക് സ്റ്റഡീസ് & റിസർച്ച് സൊസൈറ്റി, പ്രസിഡണ്ട് ട്രാവൻകൂർ കൊച്ചിൻ മെഡിക്കൽ കൗൺസിൽ ഐ.എസ്.എം, സിസ്റ്റം ഫെലോരാഷട്രീയ വിദ്യാപീഠം, കേരള സംസ്ഥാനം ഏർപ്പെടുത്തിയധന്വന്തരീ അവാർഡ് (2014) ഭിഷക് ശ്രഷ്ഠ അവാർഡ് (2015) എന്നിവ കരസ്ഥമാക്കിയിട്ടുണ്ട്. നിരവധി ദേശീയ അന്തർദേശീയ സെമിനാറുകളിൽ പേപ്പറുകൾ അവതരിപ്പിച്ചിട്ടുണ്ട്. അച്ഛൻ ചെറുനെല്ലിക്കാട്ട് രാമ വാരിയർ, അമ്മ പന്നിയമ്പള്ളി വാരിയത്ത് പാർവ്വതി എന്ന കുഞ്ഞുകുട്ടി വാരസ്യാർ, ഭാര്യ ഷെലജാ മാധവൻകുട്ടി (സീനിയർ മാനേജർ മെറ്റീരിയൽസ്, ആര്യവൈദ്യശാലാ)

The post ഡോ. പി.എം വാരിയർ കോട്ടക്കൽ ആര്യവൈദ്യശാല മാനേജിങ് ട്രസ്റ്റി appeared first on Valanchery Online.

ആയുർവേദ ആചാര്യൻ പി.കെ വാര്യർ അന്തരിച്ചു

വളാഞ്ചേരിക്കാരൻ — Sat, 10 Jul 2021 07:51:51 +0000

കോട്ടക്കൽ: കോട്ടക്കൽ ആര്യവൈദ്യശാല മാനേജിങ്ങ് ട്രസ്റ്റി പി.കെ വാര്യർ (100) അന്തരിച്ചു. ഇന്ന് ഉച്ചക്ക് പന്ത്രണ്ടരയോടെയായിരുന്നു അന്ത്യം. കഴിഞ്ഞ മാസമാണ് ഇദ്ദേഹത്തിൻ്റെ നൂറാം പിറന്നാൾ ആഘോഷിച്ചത്. ആര്യവൈദ്യശാല ഫാക്ടറി മാനേജരായി 1947ലായിരുന്നു അദ്ദേഹത്തിൻ്റെ നിയമനം. സഹോദരൻ പി എം വാര്യരുടെ നിര്യാണത്തെ തുടർന്ന് 1953ലാണ് ഇദ്ദേഹം വൈദ്യശാലയുടെ മാനേജിങ്ങ് ട്രസ്റ്റിയായി ചുമതലയേറ്റത്. കഴിഞ്ഞ 68 വർഷമായി ആര്യവൈദ്യശാലയുടെ മാനേജിങ്ങ് ട്രസ്റ്റിയായി പ്രവർത്തിച്ചു വരികയായിരുന്നു. ആയുർവേദത്തെ ലോകത്തിൻ്റെ നെറുകയിൽ കൊണ്ടെത്തിച്ച വ്യക്തിയാണ് അദ്ദേഹം. പത്മബൂഷൻ, പത്മശ്രീ ബഹുമതികൾ നൽകി രാജ്യം അദ്ദേഹത്തെ ആദരിച്ചിരുന്നു.

കോട്ടക്കലിലെ ഒരു ഇടത്തരം കുടുംബത്തില്‍ 1921 ജൂണ്‍ 5 നാണ് പന്ന്യം പിള്ളി കൃഷ്ണന്‍കുട്ടി വാരിയര്‍ ജനിക്കുന്നത്. ശ്രീധരന്‍ നമ്പൂതിരിയുടെയും പന്ന്യംപള്ളി കുഞ്ഞിവാരസ്യാരുടെയും മകനായിട്ടായിരുന്നു ജനനം.കോട്ടക്കല്‍ രാജാസ് ഹൈസ്‌കൂളിലായിരുന്നു പ്രാഥമിക വിദ്യാഭ്യാസം പൂര്‍ത്തിയാക്കിയത്. വൈദ്യപഠനം പൂര്‍ത്തിയാക്കിയത് വൈദ്യരത്നം പി.എസ് വാര്യര്‍ ആയുര്‍വേദ കോളേജിലായിരുന്നു. ആര്യ വൈദ്യപാഠശാലയായാണ് ഈ സ്ഥാപനം അറിയപ്പെട്ടത്. 1942 ല്‍ അദ്ദേഹം സ്വാതന്ത്ര്യ സമരത്തില്‍ ആകൃഷ്ടനാകുകയും അതിന്റെ ഭാഗമാകുകയും ചെയ്തു. അദ്ദേഹത്തിന്റെ ആത്മകഥയായ ‘സ്മൃതിപര്‍വം’ കേരള സാഹിത്യ അക്കാദമി അവാര്‍ഡ് നേടി.ബഹുമുഖ വ്യക്തിത്വമുള്ള ആയുര്‍വേദ പണ്ഡിതനായിരുന്നു പി.കെ വാര്യരുടെ അമ്മാവനായ വൈദ്യരത്നം ഡോ.പി.എസ് വാര്യര്‍. ആയുര്‍വേദത്തിലും അലോപ്പതിയിലും അദ്ദേഹം പ്രാവീണ്യം നേടിയിട്ടുണ്ട്. ഗുരുകുല സമ്പ്രദായത്തിലാണ് അദ്ദേഹം ആയുര്‍വേദ പഠനം നടത്തിയത്. 1902ല്‍ അദ്ദേഹം മലപ്പുറം ജില്ലയില്‍ സ്ഥാപിച്ചതാണ് കോട്ടക്കല്‍ ആര്യവൈദ്യശാല. ഇന്ത്യയിലും വിദേശത്തുമുള്ള രോഗികള്‍ക്ക് ആയുര്‍വേദ ചികിത്സാവിധികള്‍ ലഭ്യമാക്കുന്ന വിശ്വസനീയമായ സ്ഥാപനമാണ് ഇത്. ആയുര്‍വേദ മരുന്നുകള്‍ ചിട്ടകളൊന്നും തെറ്റിക്കാതെ പരിശുദ്ധമായി ഉണ്ടാക്കി രോഗികള്‍ക്ക് നല്‍കുക എന്നതായിരുന്നു അദ്ദേഹത്തിന്റെ ലക്ഷ്യം. അദ്ദേഹത്തിന്റെ പ്രവര്‍ത്തനങ്ങളെ മാനിച്ച് 1933ല്‍ വൈദ്യരത്നം എന്ന സ്ഥാനം നല്‍കി ആദരിച്ചു.

The post ആയുർവേദ ആചാര്യൻ പി.കെ വാര്യർ അന്തരിച്ചു appeared first on Valanchery Online.

കൈലാസ മന്ദിരത്തിൽ നിന്ന് പ്രാതലോടെ ഇ.ടിയുടെ പര്യടനം

വളാഞ്ചേരിക്കാരൻ — Mon, 18 Mar 2019 23:19:38 +0000

കോട്ടക്കൽ: പൊന്നാനി മണ്ഡലം യു ഡി എഫ് സ്ഥാനാർഥി ഇ. ടി മുഹമ്മദ് ബഷീർ ആര്യവൈദ്യശാല കൈലാസ മന്ദിരം സന്ദർശിച്ചു. ആര്യവൈദ്യശാല ട്രസ്റ്റി പി. രാഘവ വാര്യർ, ട്രസ്റ്റീ കെ ആർ അജയ്, ഡോ. പി ആർ രമേശ്, ശൈലജ മാധവൻകുട്ടി, ഡോ. കെ എം മധു, സരസ്വതി എസ് വാര്യർ, ലക്ഷ്മി ആർ വാര്യർ, സുഭദ്ര രാമചന്ദ്രൻ, ആര്യവൈദ്യശാല പി ആർ ഒ എം ടി രാമകൃഷ്ണൻ, പ്രീതി രമേശ് എന്നിവർ ചേർന്ന് ഇ.ടിയെ സ്വീകരിച്ചു.

രാവിലെ എട്ടരയോടെയാണ് ഇ.ടി കൈലാസ മന്ദിരത്തിലെത്തിയത്. തുടർന്ന് കുടുംബാംഗങ്ങളോടൊപ്പം പ്രഭാത ഭക്ഷണം. സൗഹൃദം പങ്കുവെച്ചും, കുശലാന്വേഷണം നടത്തിയും അരമണിക്കൂറോളം ഇ.ടി അവിടെ ചെലവഴിച്ചു. കുടുംബാംഗങളോട് പിന്തുണ അഭ്യർഥിച്ചാണ് അദ്ദേഹം യാത്ര തിരിച്ചത്.

ആര്യവൈദ്യത്തെ ജനകീമാക്കിയ വാര്യർ കുടുംബത്തോട് അടുത്ത ബന്ധമാണുള്ളതെും കൈലാസ മന്ദിരത്തിൽ നിന്നും പ്രചരണമാരംഭിക്കുത് ഏറെ ആഹ്ലാദം നൽകുന്നുവെന്നും ഇ.ടി പറഞ്ഞു. കോട്ടക്കൽ ആര്യവൈദ്യശാലയുടെ എല്ലാ സദുദ്യമങ്ങൾക്കും ഇ.ടി മുഹമ്മദ് ബഷീറിന്റെ പിന്തുണയുണ്ടായിട്ടുണ്ടെന്ന് കുടുംബം അനുസ്മരിച്ചു. ആബിദ് ഹുസൈൻ തങ്ങൾ എം എൽ.എ, നഗരസഭാ ചെയർമാൻ കെ.കെ നാസർ, പി ഉസ്മാൻ കുടി, സുധീർ കോട്ടക്കൽ എന്നിവരും അദ്ദേഹത്തെ അനുഗമിച്ചു.

The post കൈലാസ മന്ദിരത്തിൽ നിന്ന് പ്രാതലോടെ ഇ.ടിയുടെ പര്യടനം appeared first on Valanchery Online.

അപകടത്തിൽപ്പെട്ടയാളെ രക്ഷിക്കുന്നതിനിടെ ലോറിയിടിച്ചു മരണം; മലപ്പുറം സ്വദേശികൾക്ക് 1.04 കോടി രൂപ നഷ്ടപരിഹാരം നൽകാൻ വിധി

വളാഞ്ചേരിക്കാരൻ — Sat, 05 May 2018 01:33:39 +0000

തിരൂർ: വാഹനാപകടത്തിൽ പരുക്കേറ്റ യുവാവിനെ രക്ഷപ്പെടുത്തുന്നതിനിടെ ലോറിയിടിച്ചു മരിച്ച മൂന്നുപേരുടെ കുടുംബങ്ങൾക്കായി 1.04 കോടി രൂപ നഷ്ടപരിഹാരം നൽകാൻ വിധി. കോട്ടയ്ക്കൽ ആര്യവൈദ്യശാലയുടെ പാലക്കാട് കഞ്ചിക്കോട് യൂണിറ്റിലെ ജീവനക്കാരായ മഞ്ചേരി പുൽപ്പറ്റ സ്വദേശി അലിക്കപറമ്പിൽ രാജേഷ്, കോട്ടയ്ക്കൽ ആമപ്പാറ സ്വദേശി രാഗത്തിൽ ശശിപ്രസാദ്, കോട്ടയ്ക്കൽ കാവതികളം സ്വദേശി കടക്കോട്ടിൽ രമേഷ് എന്നിവർ മരിച്ച സംഭവത്തിൽ തിരൂർ വാഹനാപകട പരാതിപരിഹാര ട്രൈബ്യൂണലാണ് വിധി പുറപ്പെടുവിച്ചത്. 92.6 ലക്ഷം രൂപ നഷ്ടപരിഹാരവും 12 ലക്ഷം രൂപ പലിശയും നൽകാനാണ് യുണൈറ്റഡ് ഇന്ത്യ ഇൻഷുറൻസ് കമ്പനിയോട് ആവശ്യപ്പെട്ടിരിക്കുന്നത്.
2015 ഓഗസ്റ്റ് 26നു കഞ്ചിക്കോട്ടായിരുന്നു അപകടം. ജോലി കഴിഞ്ഞു താമസസ്‌ഥലത്തേക്കു മടങ്ങുമ്പോൾ റോഡപകടത്തിൽ പരുക്കേറ്റ യുവാവിനെ കണ്ട മൂവരും അയാളെ രക്ഷപ്പെടുത്താൻ ശ്രമിക്കുകയായിരുന്നു. അതിനിടെ, അമിതവേഗത്തിലെത്തിയ ലോറി മൂവരെയും ഇടിച്ചുതെറിപ്പിക്കുകയായിരുന്നു. എല്ലാവരും തൽക്ഷണം മരിച്ചു.

The post അപകടത്തിൽപ്പെട്ടയാളെ രക്ഷിക്കുന്നതിനിടെ ലോറിയിടിച്ചു മരണം; മലപ്പുറം സ്വദേശികൾക്ക് 1.04 കോടി രൂപ നഷ്ടപരിഹാരം നൽകാൻ വിധി appeared first on Valanchery Online.