kidnap Archives - Valanchery Online

പ്രാർത്ഥനകൾ സഫലം, അബിഗേൽ സാറയെ കണ്ടെത്തി

വളാഞ്ചേരിക്കാരൻ — Tue, 28 Nov 2023 08:39:43 +0000

കൊല്ലം: പൂയപ്പള്ളിയിൽ നിന്ന് അജ്ഞാത സംഘം തട്ടികൊണ്ടുപോയ ആറുവയസുകാരി അബിഗേൽ സാറയെ കണ്ടെത്തി. കൊല്ലം ആശ്രമം മൈതാനത്ത് ഉപേക്ഷിച്ച നിലയിലാണ് കുട്ടിയെ കണ്ടെത്തിയതെന്നാണ് സ്ഥിരീകരിക്കുന്ന വിവരങ്ങൾ. കുട്ടിയെ സിറ്റി പൊലീസ് കമ്മിഷണർ ആസ്ഥാനത്തേക്ക് മാറ്റിയിട്ടുണ്ട്. തട്ടിക്കൊണ്ടുപോയ സംഘം കുട്ടിയെ കൊല്ലം ആശ്രാമം മൈതാനത്ത് ഉപേക്ഷിച്ച് കടന്നുകളഞ്ഞതായാണ് പോലീസിന്റെ നിഗമനം. ഇവരെ കണ്ടെത്താനായുള്ള അന്വേഷണം തുടരുകയാണ്. നവംബര്‍ 27, തിങ്കളാഴ്ച വൈകിട്ട് 4.20-ഓടെയാണ് വീട്ടില്‍നിന്ന് ട്യൂഷന് പോയ ആറുവയസ്സുകാരി അബിഗേല്‍ സാറാ റെജിയെ കാറിലെത്തിയ അജ്ഞാത സംഘം തട്ടിക്കൊണ്ടുപോയത്. ഓയൂരിനു സമീപം പൂയപ്പള്ളി കാറ്റാടി ഓട്ടുമലയില്‍ റജി ജോണിന്റെയും സിജി റജിയുടെയും മകളാണ് അബിഗേല്‍ സാറാ റെജി. ഒപ്പമുണ്ടായിരുന്ന സഹോദരന്‍ ജോനാഥനെ(9)യും കാറിലെത്തിയവര്‍ പിടിച്ചുകൊണ്ടുപോകാന്‍ ശ്രമിച്ചെങ്കിലും ചെറുത്തുനിന്നതിനാല്‍ അല്പദൂരം വലിച്ചിഴച്ചശേഷം വണ്ടിയില്‍നിന്ന് പുറത്തേക്ക് തള്ളിയിട്ടു. കാലുകള്‍ റോഡിലുരഞ്ഞ് ജോനാഥന് പരിക്കേറ്റിട്ടുണ്ട്.

The post പ്രാർത്ഥനകൾ സഫലം, അബിഗേൽ സാറയെ കണ്ടെത്തി appeared first on Valanchery Online.

എടയൂർ മൂന്നാക്കലിൽ നിന്ന് കാണാതായ കുട്ടിയെ കണ്ടെത്തി; 19 കാരൻ പിടിയിൽ

വളാഞ്ചേരിക്കാരൻ — Wed, 30 Mar 2022 05:56:08 +0000

എടയൂർ: എടയൂർ മൂന്നാക്കലിൽ നിന്നു കാണാതായ ഏഴു വയസ്സുകാരനെ കണ്ടെത്തി. വളാഞ്ചേരി മുന്നാക്കൽ എം.ആർ അപ്പാർട്ടമെന്റിലെ താമസക്കാരായ നവാസ്-അഫീല ദമ്പതികളുടെ മകനായ മുഹമ്മദ് ഹർഹാനെയാണ് ഇന്ന് രാവിലെ കൊടുങ്ങല്ലൂരിൽ നിന്ന് കണ്ടെത്തിയത്. കുട്ടിയെ തട്ടിക്കൊണ്ടുപോയ അയൽവാസിയായ പത്തൊമ്പതുകാരൻ ഷിനാസിനെ പൊലീസ് അറസ്റ്റ് ചെയ്തു. ഇന്നലെ രാത്രി ഒമ്പത് മണിയോടെയാണ് ഇയാൾ കുട്ടിയെ തട്ടിക്കൊണ്ടു പോയത്. മാതാപിതാക്കളോടുള്ള വൈരാഗ്യം മൂലമാണ് ഇയാൾ കുട്ടിയെ തട്ടിക്കൊണ്ടു പോയതെന്നാണ് വിവരം.

ഫ്ളാറ്റിനുള്ളിൽ കളിച്ചുകൊണ്ടിരുന്ന കുട്ടിയെ പെട്ടന്ന് കാണാതാവുകയായിരുന്നു എന്നാണ് മാതാപിതാക്കൾ പൊലീസിനു പരാതി നൽകിയത്. അപ്പാർട്ട്‌മെന്റിലെ താമസക്കാരുടെ മൊഴികളുടെ അടിസ്ഥാനത്തിലാണ് ഷിനാസിനെ കേന്ദ്രീകരിച്ച പൊലീസ് അന്വേഷണം നടത്തിയത്. ഇയാളും ഇതേ അപ്പാർട്ടമെന്റിലെ താമസക്കാരനായിരുന്നു. എന്നാൽ സ്വഭാവ ദൂഷ്യത്തിന്റെ പേരിൽ കഴിഞ്ഞ ദിവസം ഇയാളെ ഇവിടെ നിന്ന് പുറത്താക്കിയിരുന്നു. എന്നാൽ കുട്ടിയെ കാണാതായ സമയത്ത് ഇയാൾ ഇവിടെ എത്തിയിരുന്നുവെന്ന് താമസക്കാർ പൊലീസിന് മൊഴി നൽകി. സൈബർ സെല്ലിന്റെ സഹായത്തോടെ നടത്തിയ അന്വേഷണത്തിലാണ് കുട്ടിയെ കണ്ടെത്താനായത്.

The post എടയൂർ മൂന്നാക്കലിൽ നിന്ന് കാണാതായ കുട്ടിയെ കണ്ടെത്തി; 19 കാരൻ പിടിയിൽ appeared first on Valanchery Online.

കുറ്റിപ്പുറത്ത് നിന്ന് പെൺകുട്ടിയെ തട്ടിക്കൊണ്ടുപോയ കേസിലെ പ്രതി 22 വർഷങ്ങൾക്ക് ശേഷം പിടിയിൽ

വളാഞ്ചേരിക്കാരൻ — Thu, 11 Nov 2021 10:00:56 +0000

കുറ്റിപ്പുറം: പെൺകുട്ടിയെ തട്ടിക്കൊണ്ടുപോയ കേസിലെ പ്രതിയെ 22 വർഷത്തിനു ശേഷം പിടികൂടി. ഇടുക്കി കട്ടപ്പന നെരിയംപാറ സ്വദേശി താഴത്ത് ഇല്ലത്ത് ഹരികൃഷ്ണൻ നമ്പൂതിരിയെ(64)യാണ് കുറ്റിപ്പുറം എസ്.എച്.ഒ ശശീന്ദ്രൻ മേലയിലിൻ്റെ നേതൃത്വത്തിലുള്ള പോലീസ് സംഘം പിടികുടിയത്. 1999ലാണ് കേസിനാസ്പതമായ സംഭവമുണ്ടായത്. അക്കാലത്ത് കടകശ്ശേരി സുബ്രഹ്മണ്യ ക്ഷേത്രത്തിൽ പൂജാരിയായിരുന്നു ഹരികൃഷ്ണൻ നമ്പൂതിരി. ഇയാളുടെ അളിയനും സഹായിയുമായ കോട്ടയം കല്ലറ സ്വദേശി തിയ്യത്ത് ഇല്ലത്ത് ഹരികുമാർ നമ്പൂതിരി കുറ്റിപ്പുറത്ത് നിന്നും ഇതരമതസ്ഥയായ ഒരു പെൺകുട്ടിയെ തട്ടിക്കൊണ്ട് പോയെന്ന പേരിൽ കേസ് നിലനിന്നിരുന്നു.

ഈ കേസിലെ കൂട്ടുപ്രതിയായിരുന്നു ഹരികൃഷ്ണൻ നമ്പൂതിരി. കേസ് പിന്നീട് തീർന്നെങ്കിലും കോടതിയിൽ ഹജരാകാതെ മുങ്ങി നടക്കുകയായിരുന്നു ഇയാൾ. മറ്റ് ജില്ലകളിൽ അമ്പലങ്ങളിലെ ശാന്തിക്കാരനായ ഇയാളെ കണ്ടെത്താൻ പൊലീസിനും കഴിയാതെ വന്നതോടെ കോടതി ഇയാളെ പിടികിട്ടാപ്പുള്ളിയായി പ്രഖ്യാപിക്കുകയായിരുന്നു. മലപ്പുറം ജില്ലാ പൊലീസ് മേധാവിയുടെ നിർദ്ദേശപ്രകാരം പിടിക്കിട്ടാപുള്ളികളെ പിടികൂടാനുള്ള പ്രത്യേക നീക്കത്തിന്റെ ഭാഗമായാണ് ഇയാൾ ഇടുക്കിയിൽ നിന്ന് പിടിയിലായത്. സി.പി. ഒമാരായ നിഷാദ്, അലക്സ് പ്രതിയെ പിടികൂടിയ സംഘത്തിലുണ്ടായിരുന്നു.

The post കുറ്റിപ്പുറത്ത് നിന്ന് പെൺകുട്ടിയെ തട്ടിക്കൊണ്ടുപോയ കേസിലെ പ്രതി 22 വർഷങ്ങൾക്ക് ശേഷം പിടിയിൽ appeared first on Valanchery Online.

കുഴൽപ്പണം തട്ടിയ കേസ്; പ്രതി ഒരു വർഷത്തിനു ശേഷം കുറ്റിപ്പിറം പോലീസിൻ്റെ പിടിയിൽ

വളാഞ്ചേരിക്കാരൻ — Fri, 05 Nov 2021 12:30:57 +0000

കുറ്റിപ്പുറം : കുഴൽപ്പണം തട്ടിയെടുത്ത കേസിൽ ഒരു വർഷത്തിനുശേഷം ഒരാൾ പോലീസ് പിടിയിലായി. കടകശ്ശേരിയിൽവെച്ച് കഴിഞ്ഞവർഷം കുഴൽപ്പണവുമായി വന്നയാളെ തട്ടിക്കൊണ്ടുപോയി പണം കവർന്ന കേസിലാണ് കടകശ്ശേരി ചാക്കയിൽ അക്ബറിനെ(35) കുറ്റിപ്പുറം സി.ഐ. ശശീന്ദ്രൻ മേലേയിൽ അറസ്റ്റ് ചെയ്തത്.

കടകശ്ശേരി ഭാഗത്ത് കുഴൽപ്പണം വിതരണം ചെയ്യാനെത്തിയ മലപ്പുറം പടിഞ്ഞാറ്റുമുറി സ്വദേശിയായ യുവാവിനെ പിടികൂടി കണ്ണുകെട്ടി കാറിൽ കയറ്റി മർദ്ദിച്ചവശനാക്കിയതിനുശേഷം പണം കവർന്ന് പാലക്കാട് ജില്ലയിലെ കോങ്ങാട് ഉപേക്ഷിക്കുകയായിരുന്നു. തട്ടിക്കൊണ്ടുപോകാൻ ഉപയോഗിച്ച കാർ പിന്നീട് പോലീസ് പാലക്കാട് ഭാഗത്തുനിന്ന് പിടിച്ചെടുത്തിരുന്നു. ഈ കേസിലെ അക്ബറിന്റെ കൂട്ടുപ്രതിയായ കോങ്ങാട് പൂളക്കുണ്ട് വിജേഷിനെ (24) നേരത്തേ പോലീസ് അറസ്റ്റ് ചെയ്തിരുന്നു. കേസിലെ മറ്റ് പ്രതികൾക്ക് വേണ്ടിയുള്ള അന്വേഷണം ഊർജിതമാക്കിയതായി പോലീസ് അറിയിച്ചു.

The post കുഴൽപ്പണം തട്ടിയ കേസ്; പ്രതി ഒരു വർഷത്തിനു ശേഷം കുറ്റിപ്പിറം പോലീസിൻ്റെ പിടിയിൽ appeared first on Valanchery Online.

തുവ്വൂരിൽ യുവാക്കളെ തട്ടിക്കൊണ്ടുപോയ കേസിൽ 2 പേർ കൂടി അറസ്റ്റിൽ

രാജേഷ് വി അമല — Thu, 13 Jun 2019 00:10:27 +0000

കരുവാരക്കുണ്ട്: തുവ്വൂരിൽ വച്ച് യുവാക്കളെ തട്ടിക്കൊണ്ടുപോയി കേസിൽ രണ്ടു പേർ കൂടി പിടിയിലായി. ഇതോടെ 7 പ്രതികളെയാണ് പിടികൂടിയത്. കഴിഞ്ഞ 29 ന് രാത്രിയിൽ കരുവാരക്കുണ്ട് തുവ്വൂരിൽ വച്ച് കണ്ണൂർ കൂത്തുപറമ്പ് സ്വദേശികളായ രണ്ടു യുവാക്കളെ അവർ സഞ്ചരിച്ച കാറിൽ ജീപ്പുകൊണ്ടിടിച്ച് ഭീകരാന്തരീക്ഷം സൃഷ്ടിച്ച് തട്ടിക്കൊണ്ടുപോയി അരീക്കോട് ഭാഗത്ത് ഒരു വീട്ടിൽ കൊണ്ടുപോയി മർദ്ദിച്ചും പൊള്ളലേൽപ്പിച്ചും പരിക്കേൽപ്പിച്ച കേസിൽ രണ്ടു പേരെ കൂടി പെരിന്തൽമണ്ണ Dysp P.A ശിവദാസൻ്റെ നേതൃത്വത്തിൽ പ്രത്യേക അന്വേഷണസംഘം അറസ്റ്റ് ചെയ്തു.

എടവണ്ണ മുണ്ടേങ്ങര സ്വദേശി ചീരാംതൊടിക ഹാഫിദ് (21) , കാളികാവ് പേവുന്തറ സ്വദേശി കല്ലിടുമ്പൻ അനീസ് (32) എന്നിവരെയാണ് മലപ്പുറം ജില്ലാപോലീസ് മേധാവി പ്രതീഷ്കുമാർ IPS ൻ്റെ നേതൃത്വത്തിൽ പെരിന്തൽമണ്ണ Dysp P.A ശിവദാസനും സംഘവും അറസ്റ്റ് ചെയ്തത്. ഈ കേസിൽ നേരത്തേ അഞ്ചുപേരെ പ്രത്യേകഅന്വേഷണസംഘം അറസ്റ്റ് ചെയ്തിരുന്നു. എടവണ്ണ, കൊടുവള്ളി, അരീക്കോട്, കരുവാരക്കുണ്ട്, ഭാഗത്ത് പ്രതികളെ സഹായിച്ച കൂടുതൽ പേരെ കുറിച്ച് സൂചന ലഭിച്ചതായും അവരെയെല്ലാം ഉടൻ അറസ്റ്റ് ചെയ്യുമെന്നും അന്വേഷണസംഘത്തലവൻ Dysp P.A.ശിവദാസൻ അറിയിച്ചു. പ്രത്യേക അന്വേഷണസംഘത്തിലെ സതീഷ് കുമാർ, C.P മുരളി, T ശ്രീകുമാർ, N.T കൃഷ്ണകുമാർ, M മനോജ്കുമാർ, ആസിഫ് അലി, ശശികുമാർ എന്നിവരാണ് സംഘത്തിലുണ്ടായിരുന്നത്.
Summary: two more arrest made in the kidnap case registered by karuvarakund police

The post തുവ്വൂരിൽ യുവാക്കളെ തട്ടിക്കൊണ്ടുപോയ കേസിൽ 2 പേർ കൂടി അറസ്റ്റിൽ appeared first on Valanchery Online.

വീട്ടമ്മയെ തട്ടിക്കൊണ്ടുപോയതായി പരാതി; വളാഞ്ചേരിയിൽ വ്യാജസിദ്ധന്‍ അറസ്റ്റില്‍

വളാഞ്ചേരിക്കാരൻ — Thu, 16 Nov 2017 00:25:43 +0000

വളാഞ്ചേരി: വിവാഹിതയായ വീട്ടമ്മയേയും കുട്ടികളേയും തട്ടിക്കൊണ്ടുപോയതായി ഭര്‍ത്താവ് നല്‍കിയ പരാതിയില്‍ വ്യാജസിദ്ധന്‍ അറസ്റ്റില്‍. വളാഞ്ചേരി പൂക്കാട്ടിരി സ്വദേശിയായ വീട്ടമ്മയുടെ ഭര്‍ത്താവ് നല്‍കിയ പരാതിയിലാണ് വെങ്ങാട് ചേരിങ്കല്‍ വീട്ടില്‍ അബ്ദുള്‍ ഹക്കീമി(40)നെ വളാഞ്ചേരി എസ്.ഐ. ബഷീര്‍ സി.ചിറക്കലിന്റെ നേതൃത്വത്തിലുള്ള സംഘം അറസ്റ്റ് ചെയ്തത്. കോഴിക്കോട് കൊടുവള്ളിയില്‍ ഒളിവില്‍ താമസിക്കുന്നതിനിടെയാണ് സിദ്ധന്‍ പിടിയിലായത്. ഇയാള്‍ യുവതിയെ പ്രലോഭിപ്പിച്ച് തട്ടിക്കൊണ്ടുപോയതാണെന്ന് പോലീസ് പറഞ്ഞു. അബ്ദുള്‍ഹക്കീമിനേയും യുവതിയേയും കുട്ടിയേയും കോടതിയില്‍ ഹാജരാക്കി. കോടതിനിര്‍ദേശപ്രകാരം പോലീസ് സംരക്ഷണത്തില്‍ ഇവരെ വീട്ടിലേക്ക് മടക്കി അയച്ചു.

2008-ല്‍ കുറ്റിപ്പുറത്തുനിന്ന് ഒരു യുവതിയെ തട്ടിക്കൊണ്ടുപോയതും 2012-ല്‍ മേലാറ്റൂരില്‍ മന്ത്രവാദത്തിന്റെ പേരില്‍ പെണ്‍കുട്ടിയെ പീഡനത്തിനിരയാക്കിയതുമായി നിരവധി കേസുകള്‍ അബ്ദുള്‍ഹക്കീമിന്റെ പേരിലുണ്ടെന്ന് വളാഞ്ചേരി എസ്.ഐ. ബഷീര്‍ പറഞ്ഞു. എസ്.ഐക്കൊപ്പം പോലീസുകാരായ രാജേഷ്, അബ്ദുള്‍റഹ്മാന്‍, ദേവയാനി, മജീദ്, അനില്‍കുമാര്‍, സനല്‍കുമാര്‍, സുരേഷ് എന്നിവരും സംഘത്തിലുണ്ടായിരുന്നു.

Content highlights: fake godman kidnapping a woman vengad valanchery police arrested

The post വീട്ടമ്മയെ തട്ടിക്കൊണ്ടുപോയതായി പരാതി; വളാഞ്ചേരിയിൽ വ്യാജസിദ്ധന്‍ അറസ്റ്റില്‍ appeared first on Valanchery Online.