kanakadurga Archives - Valanchery Online

കുട്ടികളെ വിട്ടുകിട്ടണമെന്ന ആവശ്യത്തിൽ കനകദുർഗയ്ക്ക് അനുകൂല വിധി

വളാഞ്ചേരിക്കാരൻ — Sun, 17 Feb 2019 04:25:15 +0000

കുറ്റിപ്പുറം ∙ ആഴ്ചയിൽ ഒരുദിവസം കുട്ടികളെ കനകദുർഗയ്ക്ക് വിട്ടുനൽകണമെന്ന് ശിശുക്ഷേമ സമിതിയുടെ നിർദേശം. കുട്ടികളെ കാണാനും പരിചരിക്കാനും അവസരം നൽകണമെന്ന കനകദുർഗയുടെ പരാതിയെ തുടർന്ന് തവനൂരിൽ നടന്ന സിറ്റിങ്ങിലാണ് സി‍ഡബ്ലിയുസി ചെയർമാൻ ഹാരിഷ് പഞ്ചിളിയുടെ ഉത്തരവ്. ശനിയാഴ്ച വൈകിട്ട് 6 മുതൽ ഞായറാഴ്ച വൈകിട്ട് 6 വരെയാണ് കനകദുർഗയ്ക്ക് കുട്ടികളെ ഒപ്പം താമസിപ്പിക്കാൻ അനുവാദം നൽകിയത്.

എല്ലാ ശനിയാഴ്ചയും ഭർത്താവ് കൃഷ്ണനുണ്ണി കുട്ടികളെ കനകദുർഗയുടെ വീട്ടിൽ എത്തിക്കണം. ഞായറാഴ്ച വൈക‌ിട്ട് കനകദുർഗ കുട്ടികളെ കൃഷ്ണനുണ്ണിയുടെ വീട്ടിൽ തിരിച്ചേൽപ്പിക്കണം. 23 മുതൽ ഉത്തരവ് നടപ്പാക്കണം. ഇന്നലെ രാവിലെ പത്തരയോടെ ആണ് കൃഷ്ണനുണ്ണി, മാതാവ് സുമതിയമ്മ, സഹോദരൻ എന്നിവർ കുട്ടികൾക്കൊപ്പം തവനൂരിലെ സിഡബ്ലിയുസി മുൻപാകെ ഹാജരായത്.

ഇതിനുശേഷം കനകദുർഗയുമെത്തി. കനകദുർഗയോടും ഭർത്താവ് കൃഷ്ണനുണ്ണിയോടും വിവരങ്ങൾ ആരാഞ്ഞ സമിതി കുട്ടികളുടെ അഭിപ്രായവും രേഖപ്പെടുത്തി. ഇതനുസരിച്ചാണ് സമിതി തീരുമാനമെടുത്തത്. ശബരിമല ദർശനത്തിനുശേഷം തിരിച്ചെത്തിയ തനിക്ക് കുട്ടികളെ വിട്ടുനൽകാൻ ഭർത്താവും അവരുടെ വീട്ടുകാരും തയാറായില്ല എന്ന പരാതിയുമായാണ് കനകദുർഗ ശിശുക്ഷേമ സമിതിയെ സമീപിച്ചത്. സിറ്റിങ്ങിൽ സിഡബ്ല്യുസി. അംഗങ്ങളായ നജ്മൽ ബാബു, കവിതാ ശങ്കർ എന്നിവരും പങ്കെടുത്തു.

The post കുട്ടികളെ വിട്ടുകിട്ടണമെന്ന ആവശ്യത്തിൽ കനകദുർഗയ്ക്ക് അനുകൂല വിധി appeared first on Valanchery Online.

കനകദുർഗയെ വീട്ടിലേക്ക് കൊണ്ടുപോകാൻ ഭർത്താവ് വിസമ്മതിച്ചു

വളാഞ്ചേരിക്കാരൻ — Tue, 22 Jan 2019 01:34:33 +0000

പെരിന്തൽമണ്ണ: ശബരിമല ദർശനം നടത്തിയ കനകദുർഗയെ (38) വീട്ടിലേക്ക് കൊണ്ടുപോകാൻ ഭർത്താവ് വിസമ്മതിച്ചു. ഇതേതുടർന്ന് കനക ദുർഗയെ പെരിന്തൽമണ്ണയിലെ ‘വൺ സ്റ്റോപ് സെൻററിൽ’ പൊലീസ് പ്രവേശിപ്പിച്ചു. മർദനമേറ്റ് ചികിത്സയിൽ കഴിഞ്ഞിരുന്ന കോഴിക്കോട് മെഡിക്കൽ കോളജ് ആശുപത്രിയിൽനിന്ന് പെരിന്തൽമണ്ണയിൽ എത്തിയ കനകദുർഗയെ വീട്ടിലേക്ക് കൊണ്ടുപോകാൻ ഭർത്താവ് വിസമ്മതിക്കുകയായിരുന്നു.

തിങ്കളാഴ്ച വൈകീെട്ടത്തിയ കനകദുർഗയെ കൂട്ടിക്കൊണ്ടുപോകാൻ ഭർത്താവ് കൃഷ്ണനുണ്ണിയോട് പൊലീസ് ആവശ്യപ്പെട്ടെങ്കിലും വിസമ്മതിക്കുകയായിരുന്നു. തുടർന്ന് എസ്.ഐ ടി.എസ്. ബിനു ഇടപെട്ടാണ് ‘വൺ സ്റ്റോപ് സെൻററിൽ’ രാത്രി വൈകി എത്തിച്ചത്. അതിക്രമത്തിനിരയാകുന്ന പെൺകുട്ടികൾക്കും സ്ത്രീകൾക്കും താൽകാലിക സംരക്ഷണവും നിയമബോധവത്കരണവും ലഭ്യമാക്കുന്നതിനുള്ളതാണ് ഇൗ സെൻറർ.

The post കനകദുർഗയെ വീട്ടിലേക്ക് കൊണ്ടുപോകാൻ ഭർത്താവ് വിസമ്മതിച്ചു appeared first on Valanchery Online.

വീട്ടിൽ മടങ്ങിയെത്തിയ കനകദുർഗയെ ഭർതൃമാതാവ് ആക്രമിച്ചെന്നു പരാതി

വളാഞ്ചേരിക്കാരൻ — Wed, 16 Jan 2019 00:08:13 +0000

പെരിന്തൽമണ്ണ∙ ശബരിമല ചവിട്ടിയ അങ്ങാടിപ്പുറം സ്വദേശിനി കനകദുർഗയെ ഭർതൃമാതാവ് ആക്രമിച്ചു പരുക്കേൽപിച്ചതായി പരാതി. കഴുത്തിലും ചെവിക്കും ക്ഷതമേറ്റ ഇവരെ കോഴിക്കോട് മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.
ശബരിമല ചവിട്ടി നുശേഷം ഇന്നലെ ആദ്യമായി വീട്ടിലെത്തിയ തന്നെ ഭർതൃമാതാവ് പട്ടികകൊണ്ട് പലതവണ മർദിച്ചെന്നും തലകറക്കമുണ്ടായപ്പോൾ വീട്ടിൽനിന്നു പുറത്താക്കി വാതിലടച്ചെന്നും കനകദുർഗ പൊലീസിനു മൊഴി നൽകി. അതേസമയം, കനകദുർഗ തള്ളിയിട്ടു പരുക്കേൽപിച്ചെന്നാരോപിച്ച് ഭർതൃമാതാവ് സുമതിയമ്മയും പെരിന്തൽമണ്ണ ജില്ലാ ആശുപത്രിയിൽ ചികിത്സ തേടി.
ശബരിമല ദർശനത്തിനായി കഴിഞ്ഞമാസം 21ന് അങ്ങാടിപ്പുറത്തെ വീട്ടിൽനിന്നു പുറപ്പെട്ട കനകദുർഗ ഇന്നലെ രാവിലെയാണ് തിരിച്ചെത്തിയത്. ഭർത്താവും മക്കളും ഈ സമയം വീട്ടിലുണ്ടായിരുന്നില്ല. ഭർതൃമാതാവുമായുള്ള സംഘർഷത്തിൽ പരുക്കേറ്റ ഇവരെ വീടിനു കാവൽനിന്ന പൊലീസുകാരാണ് ആശുപത്രിയിലെത്തിച്ചത്. ആദ്യം പെരിന്തൽമണ്ണ ജില്ലാ ആശുപത്രിയിലും തുടർന്ന് മഞ്ചേരി മെഡിക്കൽ കോളജിലും പ്രവേശിപ്പിച്ചെങ്കിലും ഇവിടെ ന്യൂറോ സർജന്റെ സേവനമില്ലാത്തതിനാലാണ് കോഴിക്കോട്ടേക്കു മാറ്റിയത്.

കനകദുർഗയുടെ മൊഴിയുടെ അടിസ്ഥാനത്തിൽ പെരിന്തൽമണ്ണ പൊലീസ് സുമതിയമ്മയ്ക്കെതിരെ കേസ് എടുത്തു. എന്നാൽ, ഒരു സംഘം ആളുകളുമായാണ് കനകദുർഗ വീട്ടിലെത്തിയതെന്നും കഴിഞ്ഞ 26 ദിവസം വീട്ടുകാരുമായി ബന്ധപ്പെടാത്തതിനാലാണു പുറത്താക്കാൻ ശ്രമിച്ചതെന്നും സുമതിയമ്മ പറഞ്ഞു. വീടിന്റെ വാതിലടയ്ക്കാൻ ശ്രമിച്ച തന്നെ കനകദുർഗ തള്ളിവീഴ്ത്തി പരുക്കേൽപിച്ചെന്നാണ് ഇവരുടെ പരാതി. കനകദുർഗയുടെ ഭർത്താവ് കൃഷ്ണിനുണ്ണി അമ്മയോടൊപ്പം പെരിന്തൽമണ്ണ ആശുപത്രിയിലുണ്ട്.
പത്തനംതിട്ട ളാക്കൂർ സ്വദേശിനി ബിന്ദുവിനൊപ്പം ഈ മാസം 2ന് ശബരിമല ദർശനം നടത്തിയ കനകദുർഗ കഴിഞ്ഞദിവസം കൊച്ചിയിൽ നടന്ന ‘ആർപ്പോ ആർത്തവം’ പരിപാടിയിലും പങ്കെടുത്തിരുന്നു. ജോലിയിൽ തിരികെ പ്രവേശിക്കാനാണ് ഇന്നലെ ഭർതൃവീട്ടിലെത്തിയതെന്നാണു വിവരം. ആനമങ്ങാട് മാവേലി സ്റ്റോറിലെ ജീവനക്കാരിയാണു കനകദുർഗ.

The post വീട്ടിൽ മടങ്ങിയെത്തിയ കനകദുർഗയെ ഭർതൃമാതാവ് ആക്രമിച്ചെന്നു പരാതി appeared first on Valanchery Online.