വളാഞ്ചേരി: എട്ടാംക്ലാസില്‍ പഠിക്കുന്ന ദളിത്‌ വിദ്യാര്‍ഥിനിയെ വര്‍ഷങ്ങളായി ലൈംഗികമായി പീഡിപ്പിച്ച കേസില്‍ ബന്ധുവടക്കം നാലുപേര്‍ അറസ്‌റ്റില്‍.

വട്ടംകുളം സ്വദേശിനിയായ പതിമൂന്നു വയസ്സുകാരിയെയാണു ബന്ധുക്കളടക്കം പീഡിപ്പിച്ചതെന്നു പോലീസ്‌ പറഞ്ഞു.

അറസ്‌റ്റിലായവരില്‍ ഒരാള്‍ക്കു പ്രായപൂര്‍ത്തിയായിട്ടില്ല. കൊടുവള്ളി സ്വദേശി കൈതകുന്നുമ്മല്‍ ശ്രീജിത്ത്‌(28), വളാഞ്ചേരി കൊട്ടാരം സ്വദേശി കാടഞ്ചേരി ഹൗസ്‌ ബൈജു(30),കൊടുവള്ളി സ്വദേശി വെളുത്തൂത്ത്‌ ചാലില്‍ എസ്‌. സന്ദീപ്‌ (26)എന്നിവരെയാണു പൊന്നാനി പോലീസ്‌ ഇന്നലെ വളാഞ്ചേരിയില്‍വെച്ചു അറസ്‌റ്റ് ചെയ്‌തത്‌.

വിദ്യാര്‍ഥിനി സ്‌കൂളില്‍ അസ്വസ്‌ഥത പ്രകടിപ്പിച്ചതിനെ തുടര്‍ന്നു അധ്യാപകര്‍ അന്വേഷിച്ചപ്പോഴാണു പീഡന വിവരം പുറത്തായത്‌. മാതാപിതാക്കള്‍ ജോലിക്കുപോകുന്ന സമയത്തു വീട്ടില്‍വെച്ചും അല്ലാത്തപ്പോള്‍ ഒഴിഞ്ഞ സ്‌ഥലങ്ങളില്‍ വെച്ചുമാണു പീഡനം നടത്തിയിരുന്നതെന്നും നാലാം ക്ലാസു മുതല്‍ കുട്ടിയെ പീഡിപ്പിക്കാന്‍ തുടങ്ങിയിട്ടുണ്ടെന്നും പോലീസ്‌ പറയുന്നു. പ്രതികളുടെ ഭീഷണി മൂലവും ഭയം മൂലവുമാണു കുട്ടി വിവരങ്ങള്‍ പുറത്തു പറയാഞ്ഞത്‌. പെണ്‍കുട്ടിയെ പൊന്നാനി താലൂക്കാശുപത്രിയില്‍ വൈദ്യപരിശോധനക്ക്‌ വിധേയമാക്കി. പൊന്നാനി സി.ഐ മനോജ്‌ കബീര്‍, അസിസ്‌റ്റന്റ്‌ എസ്‌.ഐമാരായ അബ്‌ദുള്‍ റഷീദ്‌, ബാബുരാജ്‌, സീനിയര്‍ സിവില്‍ പോലീസ്‌ ഓഫീസറായ മന്‍മദന്‍ എന്നിവരടങ്ങിയ സംഘമാണു പ്രതികളെ പിടികൂടിയത്‌.

The post ദളിത്‌ വിദ്യാര്‍ഥിനിയെ വര്‍ഷങ്ങളായി ലൈംഗികമായി പീഡിപ്പിച്ച വളാഞ്ചേരി സ്വദേശി അടക്കം നാലുപേര്‍ അറസ്‌റ്റില്‍ appeared first on Valanchery Online.