fasal gafoor Archives - Valanchery Online

ഇരിമ്പിളിയം എം.ഇ.എസ്. ഹയർസെക്കൻഡറി സ്‌കൂൾ മാഗസിനായ ‘സമൂസ’ പുറത്തിറക്കി

വളാഞ്ചേരിക്കാരൻ — Thu, 18 Apr 2024 05:46:32 +0000

ഇരിമ്പിളിയം: ഇരിമ്പിളിയം എം.ഇ.എസ്. ഹയർ സെക്കൻഡറി സ്‌കൂൾ മാഗസിൻ ‘സമൂസ’ (സർഗാത്മക മൂല്യങ്ങളുടെ സമാഹാരം) പുറത്തിറക്കി. എം.ഇ.എസ്. സംസ്ഥാനപ്രസിഡന്റ് ഡോ. പി.എ. ഫസൽ ഗഫൂർ പ്രകാശനം നിർവഹിച്ചു. സ്കൂൾ മാനേജ്‌മെന്റ് കമ്മിറ്റി ചെയർമാൻ ഇ.പി. ഉബൈദുള്ള ആദ്യപതിപ്പ് ഏറ്റുവാങ്ങി. മാനേജ്‌മെന്റ് കമ്മിറ്റി അംഗം ഷൈഖ് അബ്ദുള്ള, പി.ടി.എ. പ്രസിഡന്റ് സുരേഷ് മലയത്ത്, പ്രിൻസിപ്പൽ കെ.കെ. നജ്മുദ്ദീൻ, പ്രഥമാധ്യാപകൻ അഷറഫലി കാളിയത്ത്, പി.ടി. ഷമീമ, എസ്. അനീഷ്, പി. സമീർ, ബി.പി. ശ്രീജിത്ത്, മുഹമ്മദ് മുനീർ, എം. നവാസ്, പി. ഷമീന, മുഹമ്മദ് ഷിബിലി തുടങ്ങിയവർ പ്രസംഗിച്ചു.

The post ഇരിമ്പിളിയം എം.ഇ.എസ്. ഹയർസെക്കൻഡറി സ്‌കൂൾ മാഗസിനായ ‘സമൂസ’ പുറത്തിറക്കി appeared first on Valanchery Online.

ഡോ. ഫസൽ ഗഫൂറിന്റെ പേരിൽവഞ്ചനക്കുറ്റത്തിന് കേസ്

വളാഞ്ചേരിക്കാരൻ — Fri, 18 Dec 2020 11:53:54 +0000

തിരൂർ : എം.ഇ.എസ്. സംസ്ഥാനപ്രസിഡന്റ് ഡോ. ഫസൽഗഫൂറിനെതിരേ തിരൂർ പോലീസ് വഞ്ചനക്കുറ്റത്തിന് കേസെടുത്തു. ആശുപത്രിനിർമാണത്തിന് നിക്ഷേപംവാങ്ങി വഞ്ചിച്ചതായുള്ള പരാതിയിലാണ് കേസ്. തിരൂർ നഴ്സിങ് ഹോം ഉടമയും പരേതനായ ഡോ. കെ. ആലിക്കുട്ടിയുടെ മകനുമായ ഡോ. അബ്ദുൽനാസർ ആണ് പരാതി നൽകിയത്.

കോഴിക്കോട് മിനി ബൈപ്പാസിൽ എം.ഇ.എസുമായി ചേർന്ന് സൂപ്പർസ്പെഷ്യാലിറ്റി ഹോസ്പിറ്റൽ തുടങ്ങാനാണെന്നു പറഞ്ഞ് കമ്പനിയുണ്ടാക്കി 2013 മുതൽ 13 ലക്ഷം രൂപ കൈപ്പറ്റി വഞ്ചിച്ചുവെന്നാണ് പരാതി. ഡോ. ഫസൽഗഫൂറിന് പുറമെ, മകൻ റഹീം ഫസൽ, പ്രൊഫ. ജമാലുദ്ദീൻ ലബ്ബ എന്നിവരെയും കേസിൽ പ്രതിചേർത്തതായി പോലീസ് പറഞ്ഞു.

The post ഡോ. ഫസൽ ഗഫൂറിന്റെ പേരിൽവഞ്ചനക്കുറ്റത്തിന് കേസ് appeared first on Valanchery Online.

വളാഞ്ചേരി സ്ക്വയർ മൂന്നാം ദിനം പിന്നിട്ടു

വളാഞ്ചേരിക്കാരൻ — Tue, 25 Feb 2020 02:41:17 +0000

വളാഞ്ചേരി: വളാഞ്ചേരി കൂട്ടായ്മ സംഘടിപ്പിക്കുന്ന വളാഞ്ചേരി സ്ക്വയർ മൂന്നാം ദിനം പിന്നിട്ടു. ഷഹീൻബാഗിൽ സമരം ചെയ്യുന്നവർക്ക് ഐക്യദാര്ഢ്യ വുമായാണ് വളാഞ്ചേരീ സ്‌ക്വയർ എന്ന പേരിൽ വളാഞ്ചേരിയിൽ പരിപാടി നടന്നുവരുന്നത്. ഒരാഴ്ചക്കാലം നടക്കുന്ന പരിപാടി മൂന്ന് ദിവസം പിന്നിട്ടു. എംഇഎസ് സംസ്ഥാന പ്രസിഡന്റ് ഡോ. ഫസല്‍ ഗഫൂർ, ശഹീബ വികെ എന്നിവർ വളാഞ്ചേരീ സ്‌ക്വയറിയിൽ മുഖ്യാതിഥികളായി സംസാരിച്ചു.

എല്ലാ ദിവസവും രാത്രി 8 മണിവരെയാണ് വളാഞ്ചേരി സ്‌ക്വയര്‍. കക്ഷി രാഷ്ട്രീയഭേദമന്യേ എല്ലാ വിഭാഗം ആളുകളുടെയും സഹകരണത്തോടെ വളാഞ്ചേരീ കൂട്ടായ്മയാണ് പരിപാടിക്ക് നേതൃത്വം നല്കു്ന്നത്. നാലാം ദിവസം കെ.ഇ.എൻ കുഞ്ഞഹമ്മദ്, ആര്യാടൻ ഷൌക്കത്ത് തുറ്റങ്ങിയവർ പങ്കെടുക്കുമെന്ന് സംഘാടകർ അറിയിച്ചു. വളാഞ്ചേരീ സ്‌ക്വയർ ശനിയാഴ്ച സമാപിക്കും.

The post വളാഞ്ചേരി സ്ക്വയർ മൂന്നാം ദിനം പിന്നിട്ടു appeared first on Valanchery Online.

മലബാറിലെ മുസ്ലിം വിദ്യാർത്ഥികളുടെ രക്ഷിതാക്കളേ..വരാനിരിക്കുന്ന ഈ അപകടം അറിഞ്ഞുവയ്ക്കുക!

രാജേഷ് വി അമല — Wed, 08 May 2019 02:45:07 +0000

ഹൈസ്കൂൾ, ഹയർ സെക്കണ്ടറി റിസൽട്ടിലെ മിന്നും തിളക്കവും മലപ്പുറത്തിന്റെ നേട്ടവും ആഘോഷിക്കുമ്പോൾ നിങ്ങളെ കാത്തിരിക്കുന്നത് അപകടകരമായൊരു സാമൂഹിക പ്രശ്നമാണ്. മലബാറിലെ പെൺകുട്ടികളുടെ ഉയർന്ന വിദ്യാഭ്യാസ നിലവാരവും ആൺകുട്ടികളുടെ വിദ്യാഭ്യാസ കുറവും, സാമൂഹിക ഇടപെടലിലും വിവാഹത്തിലും ദാമ്പത്യത്തിലുമെല്ലാം വലിയ വിള്ളലുകളാണ് വീഴ്ത്തിക്കൊണ്ടിരിക്കുന്നത് എന്ന സത്യമാണ് മറ നീക്കി പുറത്തു വന്നുകൊണ്ടിരിക്കുന്നത്. സെന്റർ ഫോർ ഇൻഫർമേഷൻ ആന്റ് ഗൈഡൻസ് ഇന്ത്യ (സിജി) സംഘടന മലബാറിലെ മൂന്ന് ജില്ലകളിൽ നടത്തിയ ഒൗദ്യോഗിക വിവരശേഖരണത്തിൽ ലഭിച്ചത് ഞെട്ടിപ്പിക്കുന്ന വിവരങ്ങളാണ്. ഏ പ്ലസ്സുകളുടെ എണ്ണത്തിൽ അഭിമാനിക്കുമ്പോഴും വരാനിരിക്കുന്ന ഈ വലിയ സാമൂഹ്യ പ്രശ്നത്തെ മുസ്ലീം സമൂഹം കാണാതെ പോയാൽ ഗുരുതരമായ സാമൂഹിക പ്രത്യാഘാതമായിരിക്കും സംഭവിക്കുക.

പ്ലസ് ടു – ബിരുദ തലങ്ങളിൽ 2016 ൽ നടത്തിയ സർവ്വേയുടെ വിശദാംശങ്ങളാണ് സംഘടന പുറത്തു വിടാൻ തയ്യാറായിരിക്കുന്നത്. സിജി ജനറൽ സെക്രട്ടറിയും കോഴിക്കോട് ഗവ.ആർട്സ് ആന്റ് സയൻസ് കോളേജ് സ്റ്റാറ്റിസ്റ്റിക്സ് വിഭാഗം മേധാവിയുമായ ഡോ.സെഡ്.എ അഷ്റഫിന്റെ നേതൃത്വത്തിലായിരുന്നു പഠനം. ആൺ കുട്ടികളും പെൺകുട്ടികളും വിദ്യാഭ്യാസത്തോട് പുലർത്തുന്ന മനോഭാവവും അത് കൊണ്ടെത്തിക്കുന്ന പ്രശ്നങ്ങളും സങ്കീർണമാവുന്നു. പെട്ടന്ന് ജോലി കിട്ടണം എന്നാണ് ആൺകുട്ടികളിലെ വലിയൊരു വിഭാഗവും ആഗ്രഹിക്കുന്നത്. ഹൈസ്കൂൾ കാലം തൊട്ട് ഈയൊരു മനോഭാവം കാണാനുമാവും. പഠന കാലത്തു തന്നെ ഷോപ്പുകളിലും മറ്റും ജോലി ചെയ്യുന്ന ആൺകുട്ടികളുടെ തുടർ പഠനം പലപ്പോഴും അവിടെ അവസാനിക്കുന്നു. പെട്ടന്ന് പണം സമ്പാദിക്കുന്നതിനായി വിദേശത്തേക്ക് പറക്കുകയും സമ്പന്നനായി തിരികെയെത്തുമ്പോഴേക്കും കാത്തിരിക്കുന്നത് വിദ്യാസമ്പന്നയായ പെൺകുട്ടി! പലപ്പോഴും ഇത്തരം ബന്ധങ്ങളിലേക്ക് പെൺകുട്ടികൾ ഗത്യന്തരമില്ലാതെയാണ് ചെന്നെത്തുന്നത്.

ഇവയിൽ തന്നെ എൺപത് ശതമാനം മാർക്ക് ലഭിച്ചവർവരെയുണ്ട്. ആകർഷകമായ വരുമാനം, ബൈക്ക്, സ്മാർട്ട് ഫോൺ ഇവയൊക്കെത്തന്നെ അവയ്ക്കുള്ള ന്യായീകരണങ്ങൾ.കോളേജ് വിദ്യാഭ്യാസ മെടുത്താൽ കോഴ്സ് ദൈർഘ്യ കാരണത്താൽ ആൺകുട്ടികൾ വിമുഖത കാണിക്കുന്നു. ഒരു വർഷം ദൈർഘ്യമുള്ള ഡിപ്ളോമ കോഴ്സുകളിലാണ് പലർക്കും താൽപര്യം. കേന്ദ്ര സർവ്വകലാശാലകളിലും വിദ്യാർത്ഥികളായി പെൺകുട്ടികൾ തന്നെ കൂടുതൽ.

കുടുംബ ബന്ധങ്ങളിലാണ് ഈ അസന്തുലിതാവസ്ഥ വലിയ തോതിലാണ് ബാധിക്കുന്നത്. ബിരുദവും ബിരുദാനന്തരമോ ഉളള പെൺകുട്ടികൾ കുറഞ്ഞ വിദ്യാഭാസ യോഗ്യതയുള്ളവരെ വിവാഹം ചെയ്യാൻ മടിക്കുന്നു. നടന്നാലും അത്തരം വിവാഹങ്ങൾ പിന്നീട് പ്രശ്നങ്ങളിലക്ക് ചെന്നെത്തുന്നു. വിദ്യാഭ്യാസം കുറഞ്ഞ ഭർത്താക്കന്മാരുമായി പൊരുത്തപ്പെടാൻ കഴിയാതെ വന്നിട്ടുള്ളതിന് കുടുംബ കോടതികളിൽ പോയാൽ നിരവധിയായ തെളിവുകൾ ലഭിക്കുമെന്നും റിപ്പോർട്ട് പറയുന്നു. അതേ സമയം ഉന്നത വിദ്യാഭ്യാസം നേടിയ പെൺകുട്ടികൾക്ക് വരനെ കിട്ടാൻ ബുദ്ധിമുട്ടുന്നു. ഈ സ്ഥിതി മൂലം ‘കിട്ടിയവ’യിൽ തൃപ്തിയടയേണ്ടി വരുന്നു. “ഉയർന്ന പോസ്റ്റുകളിൽ ജോലി ചെയ്യുന്ന സ്ത്രീകളുടെ ഭർത്താക്കന്മാർ പലപ്പോഴു വിദ്യാഭ്യാസം ആവശ്യമില്ലാത്ത ജോലി ചെയ്യുന്നവരായി കാണുന്നു. മുസ്ലിം ആൺകുട്ടിക്ക് എങ്ങനെയെങ്കിലും നാല് കാശുണ്ടാക്കിയാൽ മതി” എം.ഇ.എസ് പ്രസിഡന്റ് ഡോ. ഫസൽ ഗഫൂർ പറയുന്നു. പലപ്പോഴും ഈഗോ പ്രശ്നങ്ങൾ സംഭവിക്കുന്നു. പെൺകുട്ടിയുടെ വിദ്യാഭ്യാസ കൂടുതൽ കൊണ്ടാണ് പലപ്പോഴും ദാമ്പത്യ പീഡനം പൊട്ടി പുറപ്പെടുന്നത്. മുസ്ലിം സമുദായത്തിലെ പുരുഷ മേധാവിത്തവും ഇതിന് വിനയാവുന്നു. ജോലി സ്ഥലത്തെ സമ്പർക്കം, രാത്രി ഡ്യൂട്ടി, ജോലി ചെയ്തുണ്ടാക്കിയ പണം.. പ്രശ്നങ്ങൾ സങ്കീർണമാക്കുന്നു. ഗൾഫ് ജോലികൾ വിവാഹ കമ്പോളത്തിൽ വിദ്യാഭ്യാസ അന്തരത്തെ കുറച്ചിരുന്നെങ്കിലും ഗൾഫിലെ കൂട്ട പിരിച്ചുവിടൽ പ്രശ്നങ്ങളെ വീണ്ടും വലുതാക്കി മാറ്റി. വിദ്യാസമ്പന്നയായ ഭാര്യ സ്വാതന്ത്യ ബോധം പുലർത്തുകയും അവ കുടുംബത്തിനകത്തെ ആൺ അധീശ മനോഭാവത്തിന് വിപരീതമാവുകയും പ്രശ്നങ്ങൾ ഉടലെടുക്കുകയും ചെയ്യുന്നു.വിദ്യാസമ്പന്നരായ പെൺ കുട്ടികൾ തങ്ങളുടെ ഭർത്താവിനെ സമൂഹത്തിൽ അവതരിപ്പിക്കേണ്ടി വരുമ്പോൾ മടിക്കുന്ന അനുഭവങ്ങളുമുണ്ട്. വിദ്യാഭ്യാസ കാലത്ത് വിവാഹിതയാവുന്ന പെൺകുട്ടികളെ തുടർപഠനത്തിനയക്കണം എന്ന ഉറപ്പ് വരന്റെ വീട്ടുകാരെ സമ്മതിപ്പിക്കേണ്ടി വരുന്ന ഒരു അവസ്ഥ കൂടി വന്നു നിൽക്കുന്നു. അധികം വിദ്യാഭ്യാസമുള്ള പെൺകുട്ടികളെ വിവാഹം ചെയ്യാൻ താൽപര്യമില്ല എന്ന് പറയുന്നവരുടെ എണ്ണം കൂടി വരുന്നു. കാരണം ആൺകുട്ടിയുടെ പഠിപ്പ് കുറവ് തന്നെ!

മലബാറിൽ ഉന്നത വിദ്യാഭ്യാസം നേടിയ എത്ര മുസ്ലീം സ്ത്രീകൾ ദാമ്പത്യ ജീവിതത്തിൽ പ്രശ്നങ്ങളുണ്ടാവാതിരിക്കാൻ ജോലിക്ക് പോകാതിരിക്കുന്നു എന്നത് മനസ്സിലാവുമ്പോഴേ ഈ സാമൂഹിക പ്രശ്നത്തിന്റെ ആഴം മനസ്സിലാവൂ. ആൺ കുട്ടികളേയും പഠിപ്പിക്കുക എന്നത് തന്നെയാണ് ഇതിനുള്ള പരിഹാരം. ഉന്നത പഠനത്തിനു ശേഷമുള്ള ഈ വെറുതേയിരിപ്പ് സാക്ഷര കേരളത്തിന്റെ മറ്റൊരു ശാപമാണെന്ന് കൂട്ടി വായിക്കേണ്ടി വരുമെന്ന വലിയ സൂചനയാണ് ഈ വിവരശേഖരണം നൽതുന്നത്. ഇനിയും അവഗണിച്ചാൽ മൂർത്തമായ വലിയ സാമൂഹിക പ്രശ്നമായി മാറാൻ അധിക കാലം വേണ്ടി വരില്ല.
കടപ്പാട്: പി.എസ് റംഷാദ്/ ഇന്ത്യൻ എക്സ്പ്രസ്

The post മലബാറിലെ മുസ്ലിം വിദ്യാർത്ഥികളുടെ രക്ഷിതാക്കളേ..വരാനിരിക്കുന്ന ഈ അപകടം അറിഞ്ഞുവയ്ക്കുക! appeared first on Valanchery Online.

എംഇഎസ് കോളേജുകളില്‍ മുഖം മറച്ചുള്ള വസ്ത്രധാരണം നിരോധിച്ച് കൊണ്ടുള്ള സര്‍ക്കുലര്‍ പുറത്തിറങ്ങി

വളാഞ്ചേരിക്കാരൻ — Thu, 02 May 2019 01:59:22 +0000

കോഴിക്കോട്: അടുത്ത അധ്യയന വർഷം മുതൽ എം.ഇ.എസ് കോളജുകളിൽ മുഖം മറച്ചുള്ള വസ്ത്രധാരണം നിരോധിച്ചുകൊണ്ടുള്ള സർക്കുലർ പുറത്തുവിട്ടു. എം.ഇ.എസ് പ്രസിഡൻറ് ഡോ. പി.കെ ഫസൽ ഗഫൂറാണ് സർക്കുലർ പുറത്തുവിട്ടത്. കേരള ഹൈകോടതി വിധിയുടെ അടിസ്ഥാനത്തിലാണ് പുതിയ നിയമമെന്നും സർക്കുലറിൽ പറയുന്നുണ്ട്

പൊതു സമൂഹത്തിന് സ്വീകാര്യമല്ലാത്ത വിധത്തിലുള്ള വേഷ വിധാനങ്ങൾ അത് ആധുനികയുടെ പേരിലായാലും മതാചാരങ്ങളുടെ പേരിലായാലും അംഗീകരിക്കാൻ കഴിയില്ലെന്ന് സർക്കുലറിൽ ചൂണ്ടിക്കാട്ടുന്നു. ഹൈകോടതി വിധിയുടെ അടിസ്ഥാനത്തിൽ വിദ്യാർഥിനികൾ മുഖം മറച്ചുകൊണ്ടുള്ള യാതൊരു വിധത്തിലുമുള്ള വസ്ത്ര ധാരണത്തിലും ക്ലാസുകളിലേക്ക് വരുന്നില്ലെന്ന് അധ്യാപകർ ഉറപ്പ് വരുത്തണം.

വിവാദത്തിന് ഇടം കൊടുക്കാതെ 2019-20 അധ്യയന വർഷം മുതൽ അത് പ്രാവർത്തികമാക്കണമെന്നും ഇക്കാര്യം നിയമമായി ഉൾപ്പെടുത്തി പുതിയ അധ്യയന വർഷത്തെ കോളജ് കലണ്ടർ തയാറാക്കണമെന്നും സർക്കുലറിൽ നിർദേശിക്കുന്നുണ്ട്.

The post എംഇഎസ് കോളേജുകളില്‍ മുഖം മറച്ചുള്ള വസ്ത്രധാരണം നിരോധിച്ച് കൊണ്ടുള്ള സര്‍ക്കുലര്‍ പുറത്തിറങ്ങി appeared first on Valanchery Online.