fake gold Archives - Valanchery Online

മുക്കുപണ്ടംവെച്ച് തട്ടിപ്പ്: പ്രതികളെ സഹായിച്ചതിന് അപ്രൈസർ അറസ്റ്റിൽ

വളാഞ്ചേരിക്കാരൻ — Fri, 23 Aug 2024 02:13:03 +0000

വളാഞ്ചേരി : കെ.എസ്.എഫ്.ഇ.യുടെ വളാഞ്ചേരി ശാഖയിൽ മുക്കുപണ്ടം പണയംവെച്ച് കോടികൾ തട്ടിയ സംഭവത്തിൽ അപ്രൈസർ അറസ്റ്റിൽ. വളാഞ്ചേരി സ്വദേശിയായ കൊളത്തൂർ അമ്പലപ്പടി ശ്രീരാഗത്തിൽ രാജനാ (67)ണ് അറസ്റ്റിലായത്. അപ്രൈസറാണ് മുക്കുപണ്ടം സ്വർണമെന്ന വ്യാജേന പണയംവെക്കാനും പ്രതികൾക്ക് കോടികൾ കിട്ടാനും സഹായിച്ചതെന്ന് പോലീസ് പറഞ്ഞു. വളാഞ്ചേരി എസ്.എച്ച്.ഒ. ബഷീർ ചിറക്കലിന്റെ നേതൃത്വത്തിലുള്ള അന്വേഷണസംഘമാണ് രാജനെ പിടികൂടിയത്. ഇയാളെ കോടതിയിൽ ഹാജരാക്കി.

സംഭവത്തിലെ മറ്റ് പ്രതികളായ തിരുവേഗപ്പുറ വിളത്തൂർ സ്വദേശികളായ പടപ്പേത്തൊടി അബ്ദുൽനിഷാദ്, കാവുംപുറത്ത മുഹമ്മദ് ഷെരീഫ്, പറത്തോട്ടിൽ മുഹമ്മദ് അഷറഫ്, പനങ്ങാട്ടുതൊടി റഷീദലി എന്നിവരെ പിടികിട്ടിയിട്ടില്ല. ഇവർ ഒളിവിൽത്തന്നെയാണെന്നും പിടികൂടാനുള്ള ശ്രമം ഊർജിതമാമെന്നും പോലീസ് പറഞ്ഞു. 221പവൻ മുക്കുപണ്ടം പണയംവെച്ച് 1,00,48,996 രൂപയാണ് ഇവർ തട്ടിയെടുത്തുവെന്നാണ് ആദ്യദിവസം പുറത്തുവന്ന വിവരം. എന്നാൽ കെ.എസ്.എഫ്.ഇ.യുടെ ഓഡിറ്റ് ടീം തട്ടിപ്പ് ഏഴ്‌ കോടിയോളം രൂപയുണ്ടെന്ന് കണ്ടെത്തുകയായിരുന്നു. തുടർന്നാണ് ശാഖാ മാനേജർ പരാതി നൽകിയത്.

The post മുക്കുപണ്ടംവെച്ച് തട്ടിപ്പ്: പ്രതികളെ സഹായിച്ചതിന് അപ്രൈസർ അറസ്റ്റിൽ appeared first on Valanchery Online.

മുക്ക്പണ്ടം പണയംവെച്ച് തട്ടിപ്പ്; മലപ്പുറത്ത് യുവാവ് പിടിയിൽ

വളാഞ്ചേരിക്കാരൻ — Thu, 07 Jul 2022 04:28:33 +0000

ലപ്പുറം: മുക്ക്പണ്ടം സ്വർണ്ണമാണെന്ന് പറഞ്ഞ് പണയംവെച്ച് തട്ടിപ്പ്. രണ്ടുതവണകളിലായി തട്ടിപ്പ് നടത്തിയ യുവാവ് പിടിയിൽ. മലപ്പുറം ചെമ്പ്രശ്ശേരി കാളമ്പാറ സ്വദേശി നടുത്തൊടിക പറമ്പിൽ അരുൺ (27) നെയാണ് പാണ്ടിക്കാട് പൊലീസ് അറസ്റ്റ് ചെയ്തത്. കഴിഞ്ഞ ജനുവരി 25 ന് ചെമ്പ്രശ്ശേരി സർവ്വീസ് സഹകരണ ബാങ്കിൽ 38 ഗ്രാമിന്റെ മുക്ക് പണ്ടം സ്വർണ്ണമാണന്ന് പറഞ്ഞ് പണയം വെച്ച് 125000 രൂപയും, ജൂൺ 28, 29 എന്നീ തിയ്യതികളിൽ 42 ഗ്രാം പണയപ്പെടുത്തി ഒരു ലക്ഷം രൂപയുമാണ് അരുൺ തട്ടിയെടുത്തത്. തുടർന്ന് ബാങ്ക് ജീവനക്കാർ ആഭരണം പരിശോധിച്ചപ്പോഴാണ് മുക്കുപണ്ടമാണന്ന് തിരിച്ചറിഞ്ഞ്.

പിന്നീട് ജീവനക്കാരുടെ പരാതിയെ തുടർന്നാണ് ഇയാളെ പാണ്ടിക്കാട് പൊലീസ് അറസ്റ്റ് ചെയ്തത്. ഇയാളുമായി ബന്ധപ്പെട്ട് കൂടുതൽ ബാങ്കുകളിൽ പൊലീസ് അന്വേഷിച്ച് വരികയാണ്. പ്രതിയെ പെരിന്തൽമണ്ണ കോടതിയിൽ ഹാജരാക്കി റിമാന്റ് ചെയ്തു. സ്റ്റേഷൻ ഹൗസ് ഓഫീസർ കെ.റഫീഖ്, എസ്‌ഐ.മാരായ എ.അബ്ദുൽ സലാം ,കെ.സുനീഷ്, എസ്.സി.പി.ഒമാരായ ശൈലേഷ് ജോൺ, ഗോപാലകൃഷ്ണൻ, സി.പി.ഒ കെ.ഫെബിന എന്നിവരാണ് പ്രതിയെ പിടികൂടിയത്.

The post മുക്ക്പണ്ടം പണയംവെച്ച് തട്ടിപ്പ്; മലപ്പുറത്ത് യുവാവ് പിടിയിൽ appeared first on Valanchery Online.

കുറ്റിപ്പുറത്ത് ബങ്കിൽ മുക്കുപണ്ടം പണയംവച്ച്‌ തട്ടിപ്പ്‌: 4 പേർ അറസ്‌റ്റിൽ

വളാഞ്ചേരിക്കാരൻ — Tue, 17 Dec 2019 00:26:46 +0000

കുറ്റിപ്പുറം: തവനൂർ മറവഞ്ചേരി കേരള ഗ്രാമീൺ ബാങ്ക് ശാഖയിൽ മുക്കുപണ്ടം പണയംവച്ച്‌ പതിനാറര ലക്ഷം രൂപ കൈക്കലാക്കിയ കേസിൽ നാലു പേർ അറസ്റ്റിൽ. മറവഞ്ചേരി സ്വദേശികളായ പൊറ്റെക്കാട്ട് പള്ളിയാലിൽ ഹരിദാസ്, പുറയാത്ത വളപ്പിൽ അശോകൻ, തപ്പിയത്‌ പറമ്പിൽ ചന്ദ്രൻ, നാലുകാണ്ഡത്തിൽ ശ്രീജിത്ത്‌ എന്നിവരെയാണ് കുറ്റിപ്പുറം സിഐ പി വി രമേശും സംഘവും അറസ്റ്റ് ചെയ്തത്. മാസങ്ങൾക്ക്‌ മുൻപ്‌ നാല്‌ ബാങ്ക്‌ അക്കൗണ്ട്‌ തുടങ്ങിയാണ്‌ പ്രതികൾ തട്ടിപ്പ്‌ നടത്തിയത്‌. ബാങ്കിലെ താൽക്കാലിക ജീവനക്കാരൻകൂടിയായ ഹരിദാസ്‌ ഇതിന്‌ സഹായിച്ചു. ബാങ്ക്‌ അധികൃതർ വർഷത്തിൽ നടത്തുന്ന സ്വർണ ഉരുപ്പടി പരിശോധനയിൽ സംശയമുണ്ടായതാണ്‌ പ്രതികൾക്ക്‌ വിനയായത്‌. വിശദ പരിശോധനയിൽ വ്യാജ ആഭരണങ്ങളാണെന്ന്‌ തെളിഞ്ഞു. തുടർന്ന് ബാങ്ക് മാനേജർ കുറ്റിപ്പുറം പൊലീസിൽ പരാതി നൽകുകയായിരുന്നു. ഇതിനിടെ പൊലീസ്‌ ബാങ്കിലെത്തി പരിശോധന നടത്തുന്നതിന് അധികൃതർ സമയപരിധി വച്ചത് തട്ടിപ്പ് ഒതുക്കിത്തീർക്കാനാണെന്ന്‌ ആക്ഷേപം ഉയർന്നിരുന്നു. പ്രതികളെ കോടതി റിമാൻഡ്‌ ചെയ്‌തു.

The post കുറ്റിപ്പുറത്ത് ബങ്കിൽ മുക്കുപണ്ടം പണയംവച്ച്‌ തട്ടിപ്പ്‌: 4 പേർ അറസ്‌റ്റിൽ appeared first on Valanchery Online.

കൃത്രിമ സ്വർണം പണയം വച്ച് തട്ടിപ്പ് : പ്രതി വളാഞ്ചേരിയിൽ അറസ്റ്റിൽ

വളാഞ്ചേരിക്കാരൻ — Thu, 28 Mar 2019 01:24:46 +0000

വളാഞ്ചേരി: ചെമ്പിൽ സ്വർണം പൂശിയ ആഭരണങ്ങൾ സ്വകാര്യ പണമിടപാട് സ്ഥാപനത്തിൽ പണയം വച്ച് പണവുമായി മുങ്ങിയ പ്രതിയെ വളാഞ്ചേരി പൊലീസ് അറസ്റ്റ് ചെയ്തു. മലപ്പുറം പടിഞ്ഞാറ്റുംമുറി സ്വദേശി പാടിക്കൽ മുനീറിനെയാണ്(38 ) വളാഞ്ചേരി സി.ഐ. എസ്.പി. സുധീർ അറസ്റ്റ് ചെയ്തത്.

വളാഞ്ചേരി രാധാകൃഷ്ണ ഫിനാൻസിലാണ് ഇയാൾ വ്യാജസ്വർണം പണയം വച്ച് മുങ്ങിയത്.10 പവന്റെ സ്വർണമാണെന്ന് വിശ്വസിപ്പിച്ചാണ് പണയം വച്ചത്. തുടർന്ന് പണവുമായി മുങ്ങി. പിന്നീട് വ്യാജസ്വർണമാണെന്ന് മനസിലായതിനെ തുടർന്ന്ബാങ്ക് ജീവനക്കാർ പൊലീസിൽ പരാതിപ്പെട്ടു. മലപ്പുറത്ത് വച്ചാണ് പൊലീസ് ഇയാളെ പിടികൂടിയത്. പൊന്നാനി, മഞ്ചേരി, ചാവക്കാട് എന്നിവിടങ്ങളിലും പ്രതിക്കെതിരെ സമാനകേസുകൾ നിലവിലുണ്ട്. കേസുകളിൽ ജാമ്യമെടുത്ത് നിരവധി തവണയാണ് ഇയാൾ കുറ്റം നടത്തിയത്.

സുഹൃത്തുക്കളിൽനിന്നും വാഹനങ്ങൾ വാങ്ങി പണയം വയ്ക്കുന്നതും പതിവാണ്. വളാഞ്ചേരി സിഐ എസ്.പി സുധീർ,എസ്‌.ഐ ബിപിൻ എസ് നായർ, എ.എസ്‌.ഐ ഷംസുദ്ദീൻ,സി.പി.ഒമാരായ സജി, അക്ബർ എന്നിവരാണ് പ്രതിയെ പിടികൂടിയത്.

The post കൃത്രിമ സ്വർണം പണയം വച്ച് തട്ടിപ്പ് : പ്രതി വളാഞ്ചേരിയിൽ അറസ്റ്റിൽ appeared first on Valanchery Online.

14 തവണ മുക്കുപണ്ടം പണയം വച്ചയാൾ മലപ്പുറത്ത് പിടിയിൽ

വളാഞ്ചേരിക്കാരൻ — Thu, 04 Oct 2018 23:40:35 +0000

മലപ്പുറം: 14 തവണ മലപ്പുറം കുന്നുമ്മലിലെ സ്വകാര്യ ധനകാര്യസ്ഥാപനത്തിൽ മുക്കുപണ്ടം പണയം വെച്ചയാളെ മലപ്പുറം പോലീസ് പിടികൂടി. കോഡൂർ മങ്ങാട്ടുപുലം സ്വദേശി മുഹമ്മദ് മുസമ്മലി(28)ൽ ആണ് പിടിയിലായത്. ഫെബ്രുവരിമുതലാണ് ഇയാൾ പണയം വെക്കാൻ ആരംഭിച്ചത്. ഇതുവരെ 10.5 ലക്ഷത്തിന്റെ ഇടപാടുകൾ നടത്തുകയും ചെയ്തു.

ആദ്യതവണ പിടികൂടാതായപ്പോൾ പിന്നീട് സ്ഥിരമായി മുക്കുപണ്ടം വെക്കാൻ തുടങ്ങി. കഴിഞ്ഞദിവസം ബാങ്കിൽ പണയ ഉരുപ്പടികൾ പരിശോധിച്ചപ്പോഴാണ് മുസമ്മിൽ വെച്ചത് മുക്കുപണ്ടമാണെന്ന് തെളിഞ്ഞത്. തുടർന്ന് മലപ്പുറം പോലീസിൽ വിവരം അറിയിച്ചു.

സി.ഐ. എ. പ്രേംജിത്തിന്റെ നിർദേശപ്രകാരം പ്രതിയെ ബാങ്കിൽ വിളിച്ചുവരുത്തി. കൂടുതൽ തവണ പണയം വെച്ചതിനു മികച്ച ഉപഭോകാതാവിനുള്ള സമ്മാനം നൽകുന്നെണ്ടെന്ന വ്യാജേനയായിരുന്നു വിളിച്ചത്. പ്രതി സ്ഥാപനത്തിലെത്തിയപ്പോൾ എസ്.ഐ. മുഹമ്മദ് റഫീഖ്, സി.പി.ഒ. രജീഷ്, കെ. പ്രശാന്ത് എന്നിവർ ചേർന്ന് പിടികൂടുകയായിരുന്നു.

The post 14 തവണ മുക്കുപണ്ടം പണയം വച്ചയാൾ മലപ്പുറത്ത് പിടിയിൽ appeared first on Valanchery Online.

വളാഞ്ചേരിയില്‍ മുക്കു‌പണ്ടം പണയം വച്ച് തട്ടിപ്പ് നടത്തിയതിന് യുവതി പിടിയില്‍

വളാഞ്ചേരിക്കാരൻ — Fri, 23 Mar 2018 15:59:46 +0000

വളാഞ്ചേരി: മുക്കുപണ്ടം ബാങ്കിൽ പണയംവച്ചു പണം തട്ടിയ കേസിൽ യുവതി പിടിയിൽ. തൃശൂർ ചിറ്റണ്ട കക്കാട് സുബിത രാജനെ(39)യാണ് വളാഞ്ചേരി എസ്ഐ ബഷീർ സി.ചിറയ്ക്കൽ അറസ്റ്റ് ചെയ്തത്. കഴിഞ്ഞ ഫെബ്രുവരി 23ന് വളാഞ്ചേരി ഫെഡറൽ ബാങ്ക് ശാഖയിൽ 66.59 ഗ്രാം ആഭരണങ്ങൾ പണയപ്പെടുത്തി 1,23,000 രൂപ യുവതി തട്ടിയെടുത്തെന്നാണ് കേസ്. യുവതി ബാങ്കിൽ നൽകിയ വിലാസത്തിൽ അന്വേഷണം നടത്തിയപ്പോൾ ഇതു വ്യാജമാണെന്നു തെളിഞ്ഞു. എടയൂര്‍ പൂക്കാട്ടിരി സ്വദേശിനിയായ സുബൈദയാണ് സബിതാ രാജൻ എന്ന പേരിൽ പണ്ടം പണയം വച്ചത്. നിലവിൽ ഇവർ തൃശൂർ ജില്ലയിൽ താമസിച്ച് വരികയായിരുന്നു. മൊബൈൽ ടാർ ലൊക്കേഷൻ അടിസ്ഥാനമാക്കി അന്വേഷിച്ചാണ് പോലീസ് ഇവരെ കണ്ടെത്തിയത്.

തുടർന്നു ബാങ്ക് മാനേജർ സലീം വളാഞ്ചേരി പൊലീസിൽ പരാതി നൽകി. പൊലീസ് അന്വേഷണത്തിൽ യുവതിയെ തൃശൂരിലെ വാടകവീട്ടിൽനിന്ന് കസ്റ്റഡിയിൽ എടുക്കുകയായിരുന്നു. സ്വർണമെന്നും തോന്നിക്കുംവിധം ആഭരണങ്ങൾ ഉണ്ടാക്കിയതിന്റെ ഉറവിടം എവിടെ നിന്നാണെന്നും സംഭവത്തിൽ കൂട്ടുപ്രതികൾ ഉണ്ടോ എന്നതും അന്വേഷിക്കുമെന്നു പൊലീസ് അറിയിച്ചു.

The post വളാഞ്ചേരിയില്‍ മുക്കു‌പണ്ടം പണയം വച്ച് തട്ടിപ്പ് നടത്തിയതിന് യുവതി പിടിയില്‍ appeared first on Valanchery Online.