elephant Archives - Valanchery Online

അങ്ങാടിപ്പുറം പൂരം; ആനപാപ്പാന്മാർക്ക് വിഷുപ്പുടവ നൽകി ആനപ്രേമി കൂട്ടായ്മ

വളാഞ്ചേരിക്കാരൻ — Thu, 14 Apr 2022 01:26:19 +0000

അങ്ങാടിപ്പുറം : ആനപ്രേമി കൂട്ടായ്മ പൂരത്തിനെത്തിയ ആനകളുടെ പാപ്പാൻമാർക്ക് വിഷുപ്പുടവ നൽകി. തിരുമാന്ധാംകുന്ന് ദേവസ്വം എക്‌സിക്യുട്ടീവ് ഓഫീസർ സി.സി. ദിനേശൻ വിതരണോദ്ഘാടനം നിർവഹിച്ചു. കൂട്ടായ്മ അംഗങ്ങളും ചടങ്ങിൽ പങ്കെടുത്തു.

The post അങ്ങാടിപ്പുറം പൂരം; ആനപാപ്പാന്മാർക്ക് വിഷുപ്പുടവ നൽകി ആനപ്രേമി കൂട്ടായ്മ appeared first on Valanchery Online.

അങ്ങാടിപ്പുറം തിരുമാന്ധാംകുന്ന് ക്ഷേത്രത്തിൽ എഴുന്നള്ളിപ്പിന് എത്തിച്ച ആന ഇടഞ്ഞു; പാപ്പാന് പരിക്ക്

വളാഞ്ചേരിക്കാരൻ — Sat, 27 Mar 2021 09:25:18 +0000

അങ്ങാടിപ്പുറം: അങ്ങാടിപ്പുറം തിരുമാന്ധാംകുന്ന് ഭഗവതി ക്ഷേത്രത്തിലെ പൂരത്തോടനുബന്ധിച്ച് എഴുന്നള്ളിപ്പിനായി കൊണ്ടു വന്ന ആന ഇടഞ്ഞു. പതിനൊന്ന് ദിവസം നീണ്ട് നിൽക്കുന്ന പൂരാഘോഷത്തിലെ ഏഴാം പൂര ദിവസമായ ഇന്ന് രാവിലെ ഒമ്പതരയോടെയാണ് സംഭവം.

എഴുന്നള്ളിപ്പിനു മുൻപായി കുളിപ്പിക്കുന്നതിനിടെയാണ് ഗുരുവായൂർ ദാമോദർദാസ് എന്ന ആന ഇടഞ്ഞത്. ആനയുടെ ആക്രമണത്തിൽ പ്രധാന പാപ്പാന് പരുക്കേറ്റു. പാപ്പാനെ സ്വകാര്യ ആശുപത്രിയിൽ പ്രവേശിപ്പിച്ചു. പാപ്പാനെ ആക്രമിച്ച ശേഷം ആന ക്ഷേത്ര പരിസരത്തുകൂടി ഓടി. മറ്റു പാപ്പാൻമാരെ അടുക്കാൻ സമ്മതിച്ചില്ല. ആനയെ മെരുക്കാനായി ഗുരുവായൂരിൽനിന്നു പ്രത്യേക സംഘമെത്തി. ഏകദേശം രണ്ട് മണിക്കൂറിന് ശേഷമാണ് ആനയെ തളക്കാനായത്. തുടർന്ന് ക്ഷേത്രത്തിൻ്റെ വടക്കെ നടയിലുള്ള ഒഴിഞ്ഞ പറമ്പിലേക്ക് ആനയെ മാറ്റി.

The post അങ്ങാടിപ്പുറം തിരുമാന്ധാംകുന്ന് ക്ഷേത്രത്തിൽ എഴുന്നള്ളിപ്പിന് എത്തിച്ച ആന ഇടഞ്ഞു; പാപ്പാന് പരിക്ക് appeared first on Valanchery Online.

പിടിയാനയെ കൊമ്പനാക്കി എഴുന്നള്ളിച്ച കമ്മിറ്റിക്ക് അടുത്ത പൂരത്തിന് വിലക്ക്

വളാഞ്ചേരിക്കാരൻ — Mon, 20 May 2019 00:33:44 +0000

തൂതപ്പൂരത്തിന്റെ ‘എ’ വിഭാഗം എഴുന്നള്ളിപ്പിൽ പിടിയാനയെ കൊമ്പനാക്കി കോലമേന്തിച്ച സംഭവത്തിൽ ആനയെ എഴുന്നള്ളിച്ച കമ്മിറ്റിക്ക് അടുത്ത പൂരത്തിന് വിലക്ക്. അമ്പലവട്ടം കമ്മിറ്റിക്കാണ് പൂരാഘോഷ കമ്മിറ്റി വിലക്ക് ഏർപ്പെടുത്തിയത്. അടുത്ത വർഷം വൈകീട്ടുള്ള കൂടിക്കാഴ്ചയിലെ എഴുന്നള്ളിപ്പിൽ അമ്പലവട്ടത്തെ പങ്കെടുപ്പിക്കില്ല. രാവിലെയുള്ള വഴിപാടു പൂരത്തിൽ പങ്കെടുക്കാം.

ശനിയാഴ്ച കൂടിയ തൂതപ്പൂരം ആഘോഷ കമ്മിറ്റിയുടെ പൂരം അവലോകന യോഗത്തിൽ പിടിയാനയെ എഴുന്നള്ളിച്ച സംഭവം ചർച്ചാ വിഷയമായിരുന്നു. അതിനിടയിൽ പ്രത്യേക സാഹചര്യത്തിലാണ് പിടിയാനയെത്തന്നെ എഴുന്നള്ളിപ്പിന് ഒരുക്കേണ്ടി വന്നതെന്നും ഇക്കാര്യത്തിൽ ദുഃഖമുണ്ടെന്നും പ്രായശ്ചിത്തത്തിന് തയ്യാറാണെന്നുമാണെന്ന നിലപാടാണ് അമ്പവവട്ടം കമ്മിറ്റി സ്വീകരിച്ചത്.
ലക്കിടി ഇന്ദിരയെന്ന പിടിയാനയെയാണ് ഫൈബർ കൊമ്പ് ഘടിപ്പിച്ച് കൊല്ലങ്കോട് കേശവനാക്കി മാറ്റിയത്. ചൊവ്വാഴ്ച തൂതപ്പൂരത്തിന് എ, ബി വിഭാഗം എഴുന്നള്ളിപ്പുകളിലായി നിരന്നത് 15 വീതം ആനകൾ. കരാറെടുത്ത വ്യക്തി എത്തിച്ച ആനകളിലൊന്ന് പിടിയാന.

എണ്ണം തികയ്ക്കാൻ ഈ പിടിയാനയെ ഫൈബർ കൊമ്പ് ഘടിപ്പിച്ച് കൊമ്പനാക്കുകയായിരുന്നു. തൂതപ്പൂരത്തിന് കീഴ്‌വഴക്കമനുസരിച്ച് പിടിയാനയെ എഴുന്നള്ളിക്കാറില്ല. പിടിയാനയെയാണ് കൊണ്ടുവരുന്നതെന്ന് തൂതപ്പൂരം ആഘോഷ കമ്മിറ്റി അറിഞ്ഞിരുന്നില്ല. പൂരം അവലോകന യോഗത്തിൽ ട്രസ്റ്റി ബോർഡ് ചെയർമാൻ വി. സന്തോഷ് അധ്യക്ഷനായി.

The post പിടിയാനയെ കൊമ്പനാക്കി എഴുന്നള്ളിച്ച കമ്മിറ്റിക്ക് അടുത്ത പൂരത്തിന് വിലക്ക് appeared first on Valanchery Online.

ദേവിയുടെ തിടമ്പേറ്റാൻ ഉത്സവകേരളത്തിലെ ചക്രവർത്തി പത്താം പൂര ദിവസം അങ്ങാടിപ്പുറത്തേക്ക് വരുന്നു

വളാഞ്ചേരിക്കാരൻ — Sun, 01 Apr 2018 08:07:40 +0000

അങ്ങാടിപ്പുറം: തിരുമാന്ധാംകുന്ന് പൂരത്തിന്റെ പള്ളിവേട്ട എഴുന്നള്ളിപ്പില്‍ ഭഗവതിയുടെ തിടമ്പേറ്റുന്നത് തലപ്പൊക്കമുള്ള തെച്ചിക്കോട്ടുകാവ് രാമചന്ദ്രന്‍. ഏപ്രിൽ 2, 2018 തിങ്കളാഴ്ചയാണ് പത്താംപൂരം. തെച്ചിക്കോട്ടുകാവ് രാമചന്ദ്രന്‍ തലയെടുപ്പുകൊണ്ട് ഏഷ്യയിലെ തന്നെ വലിയ ആനയായി അറിയപ്പെടുന്നു.

1964 ൽ ജനിച്ച ഈ ആനയെ ബിഹാറിലെ ആനച്ചന്തയിൽനിന്ന് കേരളത്തിലേക്ക് കൊണ്ടുവരുമ്പോൾ മോട്ടിപ്രസാദ് എന്നായിരുന്ന് പേര്. പിന്നീട് തൃശ്ശൂരിലെ വെങ്കിടാദ്രിസ്വാമി, രാമചന്ദ്രനെ വാങ്ങിയപ്പോൾ ഗണേശൻ എന്ന് പേരിട്ടു. 1984 ലാണ് പേരാമംഗലം തെച്ചിക്കോട്ടുകാവ് ദേവസ്വം ഈ ആനയെ വാങ്ങുന്നത്. അന്ന് ഭഗവതിയുടെ നടയ്ക്കിരുത്തി രാമചന്ദ്രൻ എന്ന പേര് നൽകി.
317 സെന്റീമീറ്ററാണ് ഇരിക്കസ്ഥാനത്തുനിന്നുള്ള ഉയരം. ഉടല്‍നീളം 340 സെന്റീമീറ്ററോളമാണ്. വിരിഞ്ഞ മസ്തകം, കൊഴുത്തുരുണ്ട നീണ്ട ഉടല്‍, ഉറച്ച കാലുകള്‍, ആനച്ചന്തം എന്തെന്ന് ചൂണ്ടിക്കാണിക്കാവുന്ന മട്ടിലുള്ള നടത്തം ഇതൊക്കെ രാമചന്ദ്രനെ വ്യത്യസ്തനാക്കുന്നു. ലക്ഷണമൊത്ത 18 നഖവും നിലംമുട്ടുന്ന തുമ്പിക്കൈയും തലയെടുപ്പുമൊക്കെ കണ്ടാല്‍ രാമചന്ദ്രന്‍ നാടന്‍ ആനയാണെന്നേ ഒറ്റനോട്ടത്തില്‍ പറയൂ. എഴുന്നള്ളത്തിന് കോലം കയറ്റിക്കഴിഞ്ഞാല്‍ തിടമ്പിറക്കുംവരെയും തല എടുത്തുപിടിച്ചുനില്‍ക്കുമെന്നതാണ് രാമചന്ദ്രന്റെ പ്രത്യേകത.
വലതുകണ്ണിന്റെ കാഴ്ചയ്ക്ക് ഒരല്പം മങ്ങലുള്ളതിനാല്‍ രാമചന്ദ്രന് പേടിയൊരല്പം കൂടുതലുമാണ്. ഇതുമൂലം പാപ്പാന്മാർ ഇരുകൊമ്പിലും പിടിച്ചേ രാമചന്ദ്രനെ എഴുന്നള്ളത്തിന് കൊണ്ടുവരൂ.52 നടുത്ത് മാത്രം പ്രായമുള്ള രാമചന്ദ്രന് ഗജരാജകേസരി, ഗജസാമ്രാട്ട്, ഗജചക്രവര്‍ത്തി തുടങ്ങി ഒട്ടേറെ ബഹുമതികളും കിട്ടിയിട്ടുണ്ട്.അങ്ങാടിപ്പുറത്തെ ആനപ്രേമി കൂട്ടായ്മയാണ് അമ്മയുടെ തിടമ്പിനെ ഏറ്റവും ഉയരത്തിലേറ്റാന്‍ രാമചന്ദ്രനെ ക്ഷേത്രസന്നിധിയിലെത്തിക്കുന്നത്.

The post ദേവിയുടെ തിടമ്പേറ്റാൻ ഉത്സവകേരളത്തിലെ ചക്രവർത്തി പത്താം പൂര ദിവസം അങ്ങാടിപ്പുറത്തേക്ക് വരുന്നു appeared first on Valanchery Online.