edappal Archives - Valanchery Online

എടപ്പാളില്‍ കെഎസ്ആര്‍ടിസി ബസില്‍ നടന്ന സ്വര്‍ണക്കവര്‍ച്ച; പ്രതികള്‍ പിടിയില്‍

വളാഞ്ചേരിക്കാരൻ — Mon, 21 Oct 2024 17:48:06 +0000

മലപ്പുറം: എടപ്പാളില്‍ കെഎസ്ആര്‍ടിസി ബസില്‍ നടന്ന സ്വര്‍ണക്കവര്‍ച്ചയിലെ പ്രതികള്‍ പിടിയില്‍.പള്ളുരുത്തി സ്വദേശികളായ പാറപ്പുറത്ത് നിസാര്‍ എന്ന ജോയ് (50) നെല്ലിക്കല്‍ നൗഫല്‍ (34), കോഴിക്കോട് കൊയിലാണ്ടി പൊയില്‍ക്കാവ് സ്വദേശി നാലേരി ജയാനന്ദന്‍ എന്ന ബാബു (61) എന്നിവരെയാണ് അന്വേഷണസംഘം പിടികൂടിയത്. ബസ്സില്‍ കയറി ആഭരണങ്ങളും പേഴ്സും അടക്കമുള്ളവ മോഷണം നടത്തുന്ന സ്ഥിരം മോഷണ സംഘമാണ് പിടിയിലായവര്‍ എന്നാണ് വിവരം.കവര്‍ച്ച ചെയ്ത സ്വര്‍ണ്ണാഭരണങ്ങള്‍ പ്രതികളില്‍ നിന്ന് കണ്ടെത്തിയിട്ടുണ്ട്. ശനിയാഴ്ച രാത്രി 10 മണിയോടെയായിരുന്നു കവര്‍ച്ച. തിരൂരിലുള്ള ജ്വല്ലറിയില്‍ മോഡല്‍ കാണിക്കുന്നതിനായി തൃശൂര്‍ സ്വദേശികളായ ജ്വല്ലറി ഉടമകള്‍ ജിബി എന്ന ജീവനക്കാരന്റെ കൈവശം കൊടുത്തുവിട്ട സ്വര്‍ണ്ണാഭരണങ്ങള്‍ കുറ്റിപ്പറത്ത് നിന്ന് തൃശ്ശൂരിലേക്കുള്ള യാത്രക്കിടെ ബാഗില്‍ നിന്ന് മോഷ്ടിക്കുകയായിരുന്നു.

കോഴിക്കോട് നിന്നും നെടുങ്കണ്ടത്തേക്ക് പോയിരുന്ന കെഎസ്ആര്‍ടിസി ബസില്‍ ശനിയാഴ്ച രാത്രി ഒമ്പതരയോടെയാണ് ജിബിന്‍ കുറ്റിപ്പുറത്ത് നിന്ന് തൃശ്ശൂരിലേക്ക് ടിക്കറ്റ് എടുത്തത്.ബസ്സില്‍ തിരക്കായത് കൊണ്ട് ബാഗ് പുറകിലിട്ട് നിന്നാണ് ജിബി എടപ്പാള്‍ വരെ യാത്ര ചെയ്തത്.എടപ്പാളില്‍ യാത്രക്കാര്‍ ഇറങ്ങിയതോടെ ലഭിച്ച സീറ്റീല്‍ ജിബി ഇരുന്നെങ്കിലും ബാഗ് പരിശോധിച്ചതോടെയാണ് ആഭരണങ്ങള്‍ സൂക്ഷിച്ച ബോക്സ് നഷ്ടപ്പെട്ടത് അറിയുന്നത്. ഉടനെ ബസ്സ് ജീവനക്കാരെ സംഭവം അറിയിക്കുകയായിരുന്നു.തുടര്‍ന്ന് ചങ്ങരംകുളം പോലീസ് സ്ഥലത്ത് എത്ത് ബസ്സ് സ്റ്റേഷനിലെത്തിച്ച് ബസ്സിലും യാത്രക്കാരെയും പരിശോധന നടത്തിയെങ്കിലും സ്വര്‍ണ്ണം കണ്ടെത്താനായില്ല.

സംഭവം അറിഞ്ഞ ജ്വല്ലറി ഉടമകളും സ്റ്റേഷനിലെത്തി പരാതി നല്‍കി. ചങ്ങരംകുളം പോലീസും കുറ്റിപ്പുറം പോലീസും തിരൂര്‍ ഡിവൈഎസ്പിക്ക് കീഴിലുള്ള പ്രത്യേക അന്വേഷണ സംഘവും ചേര്‍ന്നാണ് കേസില്‍ അന്വേഷണം തുടങ്ങിയത്. സംഭവം നടന്ന് ഒരു ദിവസത്തിനുള്ളില്‍ തന്നെ പ്രതികളെ കുറിച്ചുള്ള കൃത്യമായ വിവരങ്ങള്‍ അന്വേഷണ സംഘത്തിന് ലഭിച്ചതായാണ് സൂചന. സംഭവ സമയത്ത് 35 ഓളം യാത്രക്കാര്‍ എടപ്പാളില്‍ ഇറങ്ങിയതായി കെഎസ്ആര്‍ടിസി ജീവനക്കാര്‍ പറഞ്ഞിരുന്നു.എടപ്പാളില്‍ ഇറങ്ങിയ യാത്രക്കാരുടെ വിവരങ്ങളും സിസിടിവി ദൃശ്യങ്ങള്‍ അടക്കമുള്ള വിവരങ്ങളും ശേഖരിച്ചാണ് പോലീസ് അന്വേഷണം ആരംഭിച്ചത്. ഒരു കോടി എട്ട് ലക്ഷം രൂപ വില വരുന്ന 1512 ഗ്രാം സ്വര്‍ണ്ണമാണ് ജീവനക്കാരൻ്റെ കൈ വശം കൊടുത്തുവിട്ടിരുന്നതെന്നാണ് തൃശ്ശൂര്‍ സ്വദേശികളായ ഉടമകള്‍ പോലീസിന് നല്‍കിയ മൊഴിയില്‍ പറഞ്ഞിരുന്നത്.കസ്റ്റഡിയിലായ പ്രതികളില്‍ നിന്ന് നഷ്ടപ്പെട്ട സ്വര്‍ണ്ണം കണ്ടെത്തിയെന്നും സൂചനയുണ്ട്.

The post എടപ്പാളില്‍ കെഎസ്ആര്‍ടിസി ബസില്‍ നടന്ന സ്വര്‍ണക്കവര്‍ച്ച; പ്രതികള്‍ പിടിയില്‍ appeared first on Valanchery Online.

മലപ്പുറം എടപ്പാളിൽ കെഎസ്ആർടിസി ബസിൽ വൻ സ്വർണക്കവർച്ച: നഷ്ടപ്പെട്ടത് ഒരുകോടി രൂപ വിലമതിക്കുന്ന ഒന്നരക്കിലാേ സ്വർണം

വളാഞ്ചേരിക്കാരൻ — Mon, 21 Oct 2024 01:40:26 +0000

മലപ്പുറം: കെഎസ്ആർടിസി ബസിൽ വൻ സ്വർണക്കവർച്ച. യാത്രക്കാരന്റെ പക്കലുണ്ടായിരുന്ന ഒരുകോടിയോളം രൂപ വിലമതിക്കുന്ന ഒന്നരക്കിലാേ സ്വർണമാണ് നഷ്ടമായത്. സ്വർണവ്യാപാരിയായ തൃശൂർ മാടശ്ശേരി കല്ലറയ്ക്കൽ സ്വദേശി ജിബിന്റെ ബാഗിലുണ്ടായിരുന്ന സ്വർണമാണ് നഷ്ടപെട്ടത്. ചങ്ങരംകുളത്തുവച്ച് ബസ് യാത്രയ്ക്കിടെ സ്വർണം നഷ്ടപ്പെട്ടെന്നാണ് പരാതിയിൽ പറയുന്നത്. ശനിയാഴ്ച രാത്രി 10 മണിയോടെ ആയിരുന്നു സംഭവം. ജുവലറിയിൽ വിൽപനയ്ക്കായി കൊണ്ടുപോവുകയായിരുന്നു സ്വർണം. കോഴിക്കോട് നിന്നും അങ്കമാലിയിലേക്ക് പോവുകയായിരുന്ന കെഎസ്ആർടിസി ബസിലാണ് സംഭവം . കുറ്റിപ്പുറത്ത് നിന്നാണ് ജിബിൻ ബസിൽ കയറിയത്. തൃശൂർ ഭാഗത്തെ ജുവലറിയിലേക്കായിരുന്നു യാത്ര. രാത്രി പത്തുമണിയോ‌ടെ എടപ്പാളിൽ എത്തിയപ്പോൾ ബാഗ് തുറന്നു കിടക്കുന്നത് കണ്ട് പരിശോധിച്ചപ്പോഴാണ് സ്വർണം നഷ്ടമായത് ശ്രദ്ധയിൽപ്പെടുന്നത്. ബാഗ് ബസിൽ തൂക്കിയിട്ടിരിക്കുകയായിരുന്നു എന്നാണ് റിപ്പോർട്ട്.ചങ്ങരംകുളം പൊലീസിൽ വിവരം അറിയിച്ചതിന്റെ അടിസ്ഥാനത്തിൽ ബസ് പൊലീസ് സ്റ്റേഷനിൽ എത്തിച്ച് യാത്രക്കാരെ മുഴുവൻ പരിശോധിച്ചെങ്കിലും സ്വർണം കിട്ടിയില്ല. സംഭവത്തിൽ പൊലീസ് അന്വേഷണം ആരംഭിച്ചു. പ്രതികളെക്കുറിച്ച് സൂചന എന്തെങ്കിലും ലഭിച്ചോ എന്ന് വ്യക്തമല്ല.അടുത്തിടെ തൃശൂരിൽ പട്ടാപ്പകൽ സ്വർണവ്യാപാരിയെയും സുഹൃത്തിനെയും ആക്രമിച്ച് രണ്ടരക്കിലോഗ്രാം സ്വർണം കവർന്നിരുന്നു. കോയമ്പത്തൂരിൽ നിന്ന് കാറിൽ കൊണ്ടുവരികയായിരുന്ന സ്വർണമാണ് തട്ടിയെടുത്തത്. ദേശീയപാതയിൽ കുതിരാന് സമീപത്തുവച്ച് മൂന്നുകാറുകളിൽ പിന്തുടർന്നെത്തിയ അക്രമികൾ കാർ തടഞ്ഞുനിറുത്തിയാണ് ബലംപ്രയോഗിച്ച് സ്വർണം കവർന്നത്. ഇവർ മുഖംമൂടി ധരിച്ചിരുന്നു. കോയമ്പത്തൂരിൽ പണികഴിപ്പിച്ചശേഷം കൊണ്ടുവന്നതായിരുന്നു ആഭരണങ്ങൾ.

The post മലപ്പുറം എടപ്പാളിൽ കെഎസ്ആർടിസി ബസിൽ വൻ സ്വർണക്കവർച്ച: നഷ്ടപ്പെട്ടത് ഒരുകോടി രൂപ വിലമതിക്കുന്ന ഒന്നരക്കിലാേ സ്വർണം appeared first on Valanchery Online.

എടപ്പാള്‍ മേല്‍പ്പാലത്തില്‍ കെഎസ്ആര്‍ടിസി ബസും പിക്കപ്പ് വാനും കൂട്ടിയിടിച്ചു; വാൻ ഡ്രൈവർക്ക് ദാരുണാന്ത്യം

വളാഞ്ചേരിക്കാരൻ — Thu, 21 Mar 2024 05:48:54 +0000

എടപ്പാള്‍: മേല്‍പ്പാലത്തില്‍ കെഎസ്ആര്‍ടിസി ബസും പിക്കപ്പ് വാനും കൂട്ടിയിടിച്ച് ഉണ്ടായ അപകടത്തില്‍ ഒരാള്‍ മരിച്ചു. ഇടിയുടെ ആഘാതത്തില്‍ വാഹനത്തില്‍ കുടുങ്ങിയ പിക്കപ്പ് വാനിലെ ഡ്രൈവര്‍ പാലക്കാട് സ്വദേശി രാജേന്ദ്രന്‍ (50) ആണ് മരിച്ചത്. പിക്കപ്പ് വാനില്‍ കുടുങ്ങിയ രാജേന്ദ്രനെ ഫയര്‍ഫോഴ്‌സ് എത്തി രണ്ടരമണിക്കൂര്‍ നീണ്ട പരിശ്രമത്തിന് ഒടുവില്‍ പുറത്തെടുത്ത് ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാന്‍ സാധിച്ചില്ല. പിക്കപ്പ് വാന്‍ വെട്ടിപ്പൊളിച്ചാണ് രാജേന്ദ്രനെ പുറത്തെടുത്തത്. പരിക്കേറ്റ മറ്റു യാത്രക്കാരെ ആശുപത്രിയിലേക്ക് മാറ്റി. ഇവരുടെ ആരുടെയും പരിക്ക് ഗുരുതരമല്ല എന്നാണ് റിപ്പോര്‍ട്ടുകള്‍. ഇന്ന് പുലര്‍ച്ചെ കെഎസ്ആര്‍ടിസി ബസും പിക്കപ്പ് വാനും നേര്‍ക്കുനേര്‍ കൂട്ടിയിടിക്കുകയായിരുന്നു. തൃശൂര്‍ ഭാഗത്ത് നിന്ന് കോഴിക്കോട് ഭാഗത്തേയ്ക്ക് പോകുകയായിരുന്നു കെഎസ്ആര്‍ടിസി ബസ്. എടപ്പാള്‍ മേല്‍പ്പാലത്തില്‍ വച്ച് എതിര്‍ദിശയില്‍ നിന്ന് വന്ന പിക്കപ്പ് വാനുമായി കൂട്ടിയിടിക്കുകയായിരുന്നു. അപകടത്തെ തുടര്‍ന്ന് പ്രദേശത്ത് ഗതാഗത കുരുക്ക് അനുഭവപ്പെട്ടു. ഓരോ നിമിഷവും നിരവധി വാഹനങ്ങളാണ് എടപ്പാള്‍ മേല്‍പ്പാലം വഴി കടന്നുപോകുന്നത്. അതുകൊണ്ട് തന്നെ അപകടത്തെ തുടര്‍ന്ന് വലിയ ഗതാഗത കുരുക്കാണ് അനുഭവപ്പെട്ടത്.

The post എടപ്പാള്‍ മേല്‍പ്പാലത്തില്‍ കെഎസ്ആര്‍ടിസി ബസും പിക്കപ്പ് വാനും കൂട്ടിയിടിച്ചു; വാൻ ഡ്രൈവർക്ക് ദാരുണാന്ത്യം appeared first on Valanchery Online.

എടപ്പാൾ നടുവട്ടത്ത് ടയര്‍ പൊട്ടിയതിനെ തുടര്‍ന്ന് നിയന്ത്രണം വിട്ട ചരക്ക് ലോറി മറിഞ്ഞു

വളാഞ്ചേരിക്കാരൻ — Sat, 13 May 2023 00:41:11 +0000

എടപ്പാള്‍ : ടയര്‍ പൊട്ടിയതിനെ തുടര്‍ന്ന് നിയന്ത്രണം വിട്ട ചരക്ക് ലോറി റോഡില്‍ വശം ചെരിഞ്ഞു മറിഞ്ഞു. വള്ളിയാഴ്ച് വൈകുന്നേരം 4 ന് സംസ്ഥാന പാതയിലെ നടുവട്ടം പിലാക്കല്‍ പള്ളിക്കു സമീപമാണ് അപകടം. അംഗനവാടി വിദ്യാര്‍ത്ഥികള്‍ക്കുള്ള പോഷകാഹാരത്തിന്റെ പേക്കറ്റുകള്‍ അടങ്ങിയ ചാക്കുകളാണ് ലോറിയില്‍ ഉണ്ടായിരുന്നത്.തൃശൂരില്‍ നിന്നും കൊണ്ടോട്ടിയിലേക്ക് ചരക്കുമായി പോകുന്നതിനിടേയാണ് അപകടം.
അപകടത്തില്‍ ആര്‍ക്കും പരിക്കില്ല.

The post എടപ്പാൾ നടുവട്ടത്ത് ടയര്‍ പൊട്ടിയതിനെ തുടര്‍ന്ന് നിയന്ത്രണം വിട്ട ചരക്ക് ലോറി മറിഞ്ഞു appeared first on Valanchery Online.

ക്രിയേറ്റിവ് ഫിലിം ലാബ് ഒരുക്കുന്ന പ്രഥമ ഇന്റർനാഷണൽ ഷോർട് ഫിലിം ഫെസ്റ്റിവൽ ഏപ്രിൽ 29, 30 തിയ്യതികളിൽ എടപ്പാളും കുറ്റിപ്പുറത്തുമായി നടക്കും.

വളാഞ്ചേരിക്കാരൻ — Tue, 18 Apr 2023 09:27:14 +0000

കുറ്റിപ്പുറം: വളർന്നുവരുന്ന യുവ സിനിമാ പ്രതിഭകളെ പ്രോത്സാഹിപ്പിക്കുക എന്ന ഉദ്ദേശ ലക്ഷ്യത്തോടെ എടപ്പാൾ കേന്ദ്രമായി പ്രവർത്തിക്കുന്ന ക്രിയേറ്റിവ് ഫിലിം ലാബ് ഒരുക്കുന്ന പ്രഥമ Blue Rain Paint CFL ഇന്റർനാഷണൽ ഷോർട് ഫിലിം ഫെസ്റ്റിവൽ ഏപ്രിൽ 29 30 തിയ്യതികളിൽ എടപ്പാളും കുറ്റിപ്പുറത്തുമായി നടക്കും. ഫെസ്റ്റിവലിലേക്ക് പ്രവേശനം ലഭിച്ച ഷോർട് ഫിലിമുകളിൽ നിന്ന് തെരെഞ്ഞെടുത്ത സിനിമകളുടെ പ്രദർശനം ഏപ്രിൽ 29 എടപ്പാളിൾ ആസാദ് റിച്ചി റിച്ച് പാർട്ടി ഹാളിൽ വെച്ച് നടക്കും,സിനിമാ പ്രദർശനം വട്ടംകുളം പഞ്ചയത്ത് പ്രസിഡണ്ട് കഴുങ്ങിൽ മജീദ് ഉദ്ഘാടനം ചെയ്യും, മത്സരത്തിൽ പങ്കെടുക്കുന്ന സിനിമകളുടെ അണിയറ പ്രവർത്തകർ പങ്കെടുക്കുന്ന പ്രദർശന വേദിയിലേക്കുള്ള പ്രവേശനം പൊതുജനങ്ങൾക്കും സൗജന്യമായിരിക്കും.

തുടർന്ന് ഏപ്രിൽ 30 ന് ഫെസ്റ്റിവലിൽ പങ്കെടുത്ത സിനിമകളിലെ സമ്മാനർഹമായ പ്രതിഭകൾക്കുള്ള പുരസ്കാരവിതരണം കുറ്റിപ്പുറത്തെ നിളയോരം പാർക്കിലെ ഇടശ്ശേരി ഓപ്പൺ തിയേറ്ററിൽ (ഭാസി നഗർ)വെച്ച് നടക്കും, പ്രശസ്ത സിനിമാ സംവിധായകൻ അക്കു അക്ബർ, എഴുത്തുകാരനും സംവിധായകനുമായ എസ് സുനിൽ, സിനിമാ സീരിയൽ സംവിധായകൻ ദിലീപ് തവനൂർ എന്നിവർ അടങ്ങിയ ജൂറിയാണ് വിജയികളെ തെരെഞ്ഞെടുത്തത്.

അവാർഡ് ദിന പരിപാടികൾ മുൻമന്ത്രിയും തവനൂർ MLA യുമായ Dr. KT ജലീൽ ഉദ്ഘാടനം ചെയ്യും, കോട്ടക്കൽ MLA Prof.ആബിദ് ഹുസൈൻ തങ്ങൾ മുഖ്യാഥിതി ആയിരിക്കും, കേരളത്തിലെ രാക്ഷ്ട്രീയ- സാമൂഹ്യ- സിനിമാ രംഗത്തെ പല പ്രമുഖരും ചടങ്ങിൽ പങ്കെടുക്കും,തുടർന്ന് നടക്കുന്ന സാംസ്കാരിക സമ്മേളനത്തിൽ വെച്ച് പൊന്നാനി താലൂക്കിലെ വിവിധ മേഖലകളിൽ മികച്ച സേവനം കാഴ്ച്ചവെച്ച മൂന്ന് വ്യക്തിത്വങ്ങൾക്ക് വേണ്ടി CFL ഒരുക്കിയ Icon Awards (ഹരിതശ്രീ,സ്നേഹശ്രീ, കലാശ്രീ) പ്രഖ്യാപിക്കും.

മികച്ച സിനിമൾക്കും മറ്റു വിഭാഗത്തിലുള്ള വിജയികൾക്കുള്ള പുരസ്കാരങ്ങളും ചടങ്ങിൽ വിതരണം ചെയ്യും, തുടർന്ന് ടിവി ചാനൽ റിയാലിറ്റി ഷോ കളിലെ പ്രമുഖർ അവതരിപ്പിക്കുന്ന കലാപരിപാടികൾ അരങ്ങേറും. പ്രോഗ്രാം കമ്മറ്റി ചെയർമാൻ ജാഫർ കുറ്റിപ്പുറം, പ്രോഗ്രാം കമ്മറ്റി കൺവീനർ
രവീന്ദ്രൻ പികെ, ഫാറൂഖ് മുല്ലപ്പൂ, ബഷീർ വളാഞ്ചേരി എന്നിവർ പത്രസമ്മേളനത്തിൽ പങ്കെടുത്തു.

The post ക്രിയേറ്റിവ് ഫിലിം ലാബ് ഒരുക്കുന്ന പ്രഥമ ഇന്റർനാഷണൽ ഷോർട് ഫിലിം ഫെസ്റ്റിവൽ ഏപ്രിൽ 29, 30 തിയ്യതികളിൽ എടപ്പാളും കുറ്റിപ്പുറത്തുമായി നടക്കും. appeared first on Valanchery Online.

എടപ്പാൾ സ്ഫോടനം; പ്രതികളുമായി തെളിവെടുപ്പ് നടത്തി

വളാഞ്ചേരിക്കാരൻ — Sat, 29 Oct 2022 00:29:27 +0000

എടപ്പാൾ : ജംഗ്ഷനിലെ റൗണ്ട് എബൗട്ടില്‍ ഗുണ്ട് സ്ഫോടനം നടത്തിയ കേസിലെ സംഭവ സ്ഥലത്ത് എത്തിച്ച് തെളിവെടുപ്പ് നടത്തി.റൗണ്ട് എബൗട്ടിലും ഗുണ്ട് വാങ്ങിയ പട്ടാമ്പി റോഡിലെ പടക്ക കടയിലുമാണ് തെളിവെടുപ്പ് നടത്തിയത്. തിരൂർ ഡി.വൈ.എസ്.പി. ബെന്നി, ചങ്ങരംകുളം എസ്. ഐ .രാജേന്ദ്രൻ നായർ എന്നിവരുടെ നേതൃത്വത്തിലാണ് തെളിവെടുപ്പ് നടന്നത്.

The post എടപ്പാൾ സ്ഫോടനം; പ്രതികളുമായി തെളിവെടുപ്പ് നടത്തി appeared first on Valanchery Online.

എടപ്പാൾ മേൽപ്പാലത്തിന് മുകളിൽ കാറും ബൈക്കും കൂട്ടിയിടിച്ച് അഞ്ച് പേർക്ക് പരിക്ക്

വളാഞ്ചേരിക്കാരൻ — Sat, 29 Oct 2022 00:12:17 +0000

എടപ്പാൾ: സംസ്ഥാന പാത 69ലെ എടപ്പാൾ മേൽപ്പാലത്തിലുണ്ടായ വാഹനാപകടത്തിൽ അഞ്ച് പേർക്ക് പരിക്ക്. വെള്ളിയാഴ്ച രാത്രി എട്ട് മണിയോടെയാണ് സംഭവമുണ്ടായത്. സുസുക്കി ബലേനോ കാറും റോയൽ എൻഫീൽഡ് ബൈക്കും തമ്മിൽ കൂട്ടിയിടിച്ചാണ് അപകടമുണ്ടായത്. അപകടത്തിൽ പരിക്കേറ്റ കാർ യാത്രികരായ പൂക്കരത്തറ ചട്ടിക്കല്‍
അഖിൽ (30), ഭാര്യ ചഞ്ചൽ (22), മകൻ രണ്ടര വയസ്സുകാരന്‍ ആൽവിൻ, ചഞ്ചലിൻ്റെ സഹോദരി സോന (18) എന്നിവരെ എടപ്പാള്‍ ഹോസ്പിറ്റലിലും ബുള്ളറ്റ് യാത്രികനെ തൃശൂരിലെ സ്വകാര്യ ആശുപത്രിയിലും പ്രവേശിപ്പിച്ചു. എടപ്പാൾ പോലീസ് മേൽനടപടികൾ സ്വീകരിച്ചു.

The post എടപ്പാൾ മേൽപ്പാലത്തിന് മുകളിൽ കാറും ബൈക്കും കൂട്ടിയിടിച്ച് അഞ്ച് പേർക്ക് പരിക്ക് appeared first on Valanchery Online.

എടപ്പാൾ സ്ഫോടനം; പ്രതികൾ പിടിയിൽ

വളാഞ്ചേരിക്കാരൻ — Fri, 28 Oct 2022 00:11:48 +0000

എടപ്പാൾ: മേൽപ്പാലത്തിനടിയിൽ ടൗണിന്റെ മധ്യത്തിലുള്ള റൗണ്ട് എബൗട്ടിൽ അപകടകരമാം വിധം പടക്കംപൊട്ടിച്ച സംഭവത്തിൽ രണ്ടു യുവാക്കളെ പോലീസ് അറസ്റ്റുചെയ്തു. മദ്യലഹരിയിൽ ചെയ്ത കുസൃതി വലിയ വാർത്താപ്രാധാന്യം നേടിയതോടെ ഡി.വൈ.എസ്.പി.യുടെ നേതൃത്വത്തിലുള്ള അന്വേഷണസംഘം രണ്ടാംദിവസംതന്നെ പ്രതികളെ കണ്ടെത്തി. പൊന്നാനി പള്ളപ്രം ഉറൂബ് നഗർ കോയിമ വളപ്പിൽ വിഷ്ണു(20), വെളിയങ്കോട് അയ്യോട്ടിച്ചിറ കരിക്കലത്ത് ജംഷീർ (19) എന്നിവരെയാണ് തിരൂർ ഡിവൈ.എസ്.പി. വി.വി. ബെന്നി, താനൂർ ഡിവൈ.എസ്.പി. മൂസ വള്ളിക്കാടൻ എന്നിവരുടെ നേതൃത്വത്തിലുള്ള അന്വേഷണസംഘം അറസ്റ്റുചെയ്തത്. ചൊവ്വാഴ്ച രാത്രി ഏഴരയോടെയാണ് പട്ടാമ്പി റോഡിൽനിന്ന് ബൈക്കിൽവന്ന ഇവർ റൗണ്ട് എബൗട്ടിൽ വീര്യമേറിയ ഗുണ്ട് വിഭാഗത്തിൽപ്പെട്ട പടക്കംവെച്ച് ബൈക്കിലിരുന്നുതന്നെ തീകൊളുത്തി കടന്നത്. പൊന്നാനി റോഡിലേക്ക് അതിവേഗത്തിൽ രക്ഷപ്പെടുകയായിരുന്നു. അപ്രതീക്ഷിതമായുണ്ടായ വൻ സ്ഫോടനവും വെളിച്ചവും പുകയും ടൗണിലാകെ പരിഭ്രാന്തി പരത്തി.

മറ്റു വാഹനങ്ങൾപോലും അപകടത്തിൽപ്പെടാനിടയാക്കുംവിധം നടത്തിയ പടക്കം പൊട്ടിക്കലിനെത്തുടർന്ന് പോലീസും ബോംബുസ്ക്വാഡും സയന്റിഫിക് വിഭാഗവും ഡോഗ് സ്ക്വോഡുമടക്കമുള്ളവർ എത്തിയാണ് അന്വേഷണമാരംഭിച്ചത്. 40-ഓളം നിരീക്ഷണ ക്യാമറകളിൽനിന്ന് യുവാക്കളുടെ ദൃശ്യവും, പടക്കം വാങ്ങിയ കടയുമെല്ലാം കണ്ടെത്തിയ പോലീസ് രണ്ടുദിവസത്തിനകംതന്നെ പ്രതികളെ അറസ്റ്റുചെയ്യുകയായിരുന്നു. പ്രതികളെ ചങ്ങരംകുളം എസ്.ഐ. രാജേന്ദ്രന്റെ നേതൃത്വത്തിലുള്ള പോലീസ് സംഘം എടപ്പാളിലെത്തിച്ച് തെളിവെടുപ്പ് നടത്തി. പൊതുസ്ഥലത്ത് ഭീതി പരത്തിയതിനുള്ള വകുപ്പുകൾ പ്രകാരം കേസെടുത്ത് ഇവരെ വെള്ളിയാഴ്ച കോടതിയിൽ ഹാജരാക്കും.

The post എടപ്പാൾ സ്ഫോടനം; പ്രതികൾ പിടിയിൽ appeared first on Valanchery Online.

എടപ്പാൾ ജംഗ്ഷനിലെ ചത്വരത്തിൽ സ്ഫോടനം; പോലീസ് അന്വേഷണം ആരംഭിച്ചു

വളാഞ്ചേരിക്കാരൻ — Wed, 26 Oct 2022 01:44:01 +0000

എടപ്പാൾ : എടപ്പാള്‍ ജംഗ്ഷനിലെ ചത്വരത്തിൽ സ്പോടനം. മേല്പാലത്തിന് കീഴിലെ ചത്വരത്തിന്റെ ഒരു ഭാഗം സ്പോടനത്തില്‍ തകര്‍ന്നു. ചൊവ്വാഴ്ച രാത്രി 7.15 നാണ് സ്പോടനം. സ്പോടനത്തിന്റെ ഉഗ്രശബ്ധം കേട്ട് പരിസരത്തുണ്ടായിരുന്നവർ കാര്യമറിയാതെ ഏറെ നേരം കുഴങ്ങി. പിന്നീടാണ് ചത്വരത്തിൻ്റെ ഒരു ഭാഗം തകർന്ന നിലയില്‍ കണ്ടത്‌. നിരിക്ഷണ ക്യാമറ ദൃശ്യങ്ങള്‍ പരിശോധിച്ച പോലിസ് സ്ഫോടനം സൃഷ്ടിച്ച വസ്തു കത്തിച്ചത് ഇരുചക്രവാഹനത്തിൽ എത്തിയ രണ്ട് യുവാക്കളാണെന്ന് സ്ഥിരീകരിച്ചു. ഏകദേശം മൂന്ന് മിനുട്ടോളം സമയം എടുത്താണ് ഇവര്‍ സ്ഫോടന വസ്തു റൗണ്ട് എബൗട്ടില്‍ വെച്ച് കത്തിക്കുന്നത്. സ്ഫോടന വസ്തു കത്തിച്ചതിനു ശേഷം പൊന്നാനി റോഡിലേക്കാണ് ഇവര്‍ വാഹനം ഓടിച്ചു പോകുന്നത്. വാഹനത്തിന്റെ നമ്പര്‍ വ്യക്തമല്ല. സമീപത്തായി കാറും ബസും നിൽക്കുന്ന സമയത്താണ് അപകടകരമായ രീതിയിൽ ഇത്തരമൊരു പ്രവൃത്തി അജ്ഞാതരായ യുവാക്കളുടെ ഭാഗത്ത് നിന്നുണ്ടായത്. കൂടുതല്‍ സി.സി.ക്യാമറകള്‍ പോലീസ് പരിശോധിച്ചു വരികയാണ്.

The post എടപ്പാൾ ജംഗ്ഷനിലെ ചത്വരത്തിൽ സ്ഫോടനം; പോലീസ് അന്വേഷണം ആരംഭിച്ചു appeared first on Valanchery Online.

എടപ്പാള്‍ മേല്‍പ്പാലം നാളെ നാടിന് സമര്‍പ്പിക്കും

വളാഞ്ചേരിക്കാരൻ — Fri, 07 Jan 2022 16:41:21 +0000

എടപ്പാൾ:പുതുവത്സര സമ്മാനമായി എടപ്പാള്‍ മേല്‍പ്പാലം നാളെ രാവിലെ 10 ന് പൊതുമരാമത്ത് വകുപ്പ് മന്ത്രി പി.എ മുഹമ്മദ് റിയാസ് നാടിന് സമര്‍പ്പിക്കും. ഡോ കെ.ടി ജലീല്‍ എം.എല്‍ എ അധ്യക്ഷനാകും. ധനകാര്യ വകുപ്പ് മന്ത്രി കെ.എന്‍ ബാലഗോപാല്‍ മുഖ്യാതിഥിയും കായിക വകുപ്പ് മന്ത്രി വി. അബ്ദുറഹിമാന്‍ വിശിഷ്ടാതിഥിയുമാകും. ഇ.ടി മുഹമ്മദ് ബഷീര്‍ എം.പി മുഖ്യപ്രഭാഷണം നടത്തും.

മലപ്പുറം ജില്ലയില്‍ ടൗണിന് കുറുകെയും റോഡിന് സമാന്തരവുമായി നിര്‍മ്മിക്കുന്ന ആദ്യ മേല്‍പ്പാലമാണിത്. കിഫ്ബി യില്‍ നിന്ന് 13.68 കോടി ചെലവഴിച്ചാണ് നിര്‍മ്മാണം. രണ്ട് വരി ഗതാഗതത്തിന് അനുയോജ്യമായ രീതിയില്‍ 259 മീറ്റര്‍ നീളത്തിലാണ് നിര്‍മ്മാണം. എടപ്പാള്‍ ജംങ്ഷനില്‍ കോഴിക്കോട്- തൃശൂര്‍ റോഡിന് മുകളിലൂടെയാണ് മേല്‍പ്പാലം ഒരുക്കിയിരിക്കുന്നത്. പൂര്‍ണമായും സര്‍ക്കാര്‍ സ്ഥലത്തു കൂടി പദ്ധതി കടന്നുപോകുന്നത്.തൃശൂര്‍ -കുറ്റിപ്പുറം പാതയില്‍ ഏറ്റവുമധികം ഗതാഗതക്കുരുക്ക് നേരിടുന്ന ജംങ്ഷനാണ് എടപ്പാള്‍. നാല് റോഡുകള്‍സംഗമിക്കുന്ന ജംങ്ഷനില്‍ ഗതാഗതക്കുരുക്കിന് പരിഹാരമായാണ് മേല്‍പ്പാല നിര്‍മ്മാണം. മേല്‍പ്പാലത്തിന് അനുബന്ധമായി പാര്‍ക്കിംഗ് സൗകര്യങ്ങളും മറ്റും ഒരുക്കിയിട്ടുണ്ട്. പി. നന്ദകുമാര്‍ എം.എല്‍ എ, പ്രൊ. ആബിദ് ഹുസൈന്‍ തങ്ങള്‍ എം.എല്‍.എ, ജില്ലാ പഞ്ചായത്ത് പ്രസിഡന്റ് എം.കെ റഫീഖ, ജില്ലാ കലക്ടര്‍ വി.ആര്‍ പ്രേംകുമാര്‍, പൊന്നാനി ബ്ലോക്ക് പഞ്ചായത്ത് പ്രസിഡന്റ് സി രാമകൃഷ്ണന്‍, ജനപ്രതിനിധികള്‍ തുടങ്ങിയവര്‍ പങ്കെടുക്കും.

The post എടപ്പാള്‍ മേല്‍പ്പാലം നാളെ നാടിന് സമര്‍പ്പിക്കും appeared first on Valanchery Online.

വട്ടംകുളം ടെക്നിക്കൽ ഹയർസെക്കൻഡറി സ്കൂളിൽ താത്കാലിക അധ്യാപകരെ നിയമിക്കുന്നു

വളാഞ്ചേരിക്കാരൻ — Wed, 20 Oct 2021 00:56:02 +0000

വട്ടംകുളം : ഐ.എച്ച്.ആർ.ഡി.യുടെ വട്ടംകുളം ടെക്നിക്കൽ ഹയർസെക്കൻഡറി സ്കൂളിൽ ഫിസിക്സ്, കെമിസ്ട്രി, സുവോളജി, കമ്പ്യൂട്ടർ സയൻസ് വിഷയങ്ങളിൽ താത്കാലിക അധ്യാപകരെ നിയമിക്കുന്നു. ബുധനാഴ്ച 10.30-നാണ് അഭിമുഖം. ഫോൺ: 0494- 2681498.

The post വട്ടംകുളം ടെക്നിക്കൽ ഹയർസെക്കൻഡറി സ്കൂളിൽ താത്കാലിക അധ്യാപകരെ നിയമിക്കുന്നു appeared first on Valanchery Online.

നടുവട്ടം ഉറൂസ് സമാപിച്ചു

വളാഞ്ചേരിക്കാരൻ — Sat, 16 Oct 2021 00:54:19 +0000

എടപ്പാൾ : സൂഫീവര്യൻ കൊടക്കാട്ടുവളപ്പിൽ ശൈഖ് അഹ്‌മദ് അൽഖാദിരിയുടെ ആണ്ടു നേർച്ച നടുവട്ടത്ത് സമാപിച്ചു. അനവധി വിശ്വാസികളും പണ്ഡിതരും പങ്കാളികളായി. പിലാക്കൽ പള്ളിയിലെ മഖാം സിയാറത്തിന് കെ എം സ്വാലിഹ് മുസ്‌ലിയാർ കക്കിടിപ്പുറം നേതൃത്വം നൽകി. തുടർന്നു നടന്ന
മൗലിദ് ജൽസയ്ക്കും കൂട്ടുപ്രാർഥനയ്ക്കും സയ്യിദ് എസ് ഐ കെ തങ്ങൾ അൽബുഖാരി, ഹാഫിള് ഹബീബുല്ല ബാഖവി ലക്ഷദ്വീപ്, എം.കെ സൈനുദ്ദീൻ മുസ്‌ലിയാർ, മുഹമ്മദലി ബാഖവി അത്തിപ്പറ്റ, സലീം അഹ്സനി, ലുഖ്മാനുൽ ഹകീം ഫാളിലി, ശുഅയ്ബ് സഖാഫി, അബ്ദുറഹ്മാൻ ഫൈസി തുടങ്ങിയവർ നേതൃത്വം നൽകി. ടി മൂസ മുസ്‌ലിയാർ, എൻ വി ബാവ മുസ്‌ലിയാർ, കെ ബി കുഞ്ഞുമോൻ ഹാജി, കരിമ്പനക്കൽ ബാപ്പു ഹാജി, ഒ ഒ ഉമർ ഹാജി, സി വി അബ്ദുൽ ഖാദർ ഹാജി, എം കെ മാനു ഹാജി, കോഹിനൂർ മുഹമ്മദ്, യു വി കെ മരക്കാർ, എം കെ മൊയ്തുണ്ണി തുടങ്ങിയ പൗരപ്രമുഖരും സംബന്ധിച്ചു.

The post നടുവട്ടം ഉറൂസ് സമാപിച്ചു appeared first on Valanchery Online.