സഞ്ചാരികളെ ആകര്‍ഷിക്കാന്‍ കോന്നി-അടവി-ഗവി ടൂര്‍ പാക്കേജ് പുനരാരംഭിച്ചു

വളാഞ്ചേരിക്കാരൻ — Wed, 07 Nov 2018 17:47:01 +0000

മനംകവരുന്ന കാഴ്ചകളൊരുക്കി വിനോദസഞ്ചാരികള്‍ക്ക് പ്രിയങ്കരമായി മാറിയ കോന്നി-അടവി-ഗവി ടൂര്‍ പാക്കേജ് പുനരാരംഭിച്ചു. യാത്രാനിരക്കില്‍ നേരിയ മാറ്റം വരുത്തിയാണ് ടൂര്‍ പാക്കേജ് വീണ്ടും ആരംഭിച്ചിരിക്കുന്നത്. അടവിയിലെ കുട്ടവഞ്ചി സവാരി, വള്ളക്കടവ് വൈല്‍ഡ് ലൈഫ് മ്യൂസിയം സന്ദര്‍ശനം എന്നിവയും കൂടാതെ പ്രഭാതഭക്ഷണം, ഉച്ചഭക്ഷണം, വൈകുന്നേരം ലഘുഭക്ഷണം എന്നിവയും ടിക്കറ്റ് നിരക്കില്‍ ഉള്‍പ്പെടും.

നിലവിലെ നിരക്കില്‍ നിന്നും 300 രൂപ വര്‍ദ്ധിപ്പിച്ച് ഒരാള്‍ക്ക് 2000 രൂപയാക്കിയാണ് കോന്നി ഫോറസ്റ്റ് ഡവലപ്മെന്റ് ഏജന്‍സി ടിക്കറ്റ് നിരക്ക് കൂട്ടിയത്. 10 മുതല്‍ 15 പേര്‍ വരെയുള്ള സംഘത്തിലെ ഓരോരുത്തര്‍ക്കും 1900 രൂപയും, 16 പേരുള്ള സംഘത്തിലെ ഓരോരുത്തര്‍ക്കും 1800 രൂപയുമാണ് ടിക്കറ്റ് നിരക്ക്. നേരത്തേ 1600, 1500 രൂപ എന്നിങ്ങനെയായിരുന്നു ടിക്കറ്റ് നിരക്ക്. അഞ്ച് വയസിന് താഴെയുള്ള കുട്ടികള്‍ക്ക് സൗജന്യ പ്രവേശനമാണ്.

രാവിലെ 7ന് കോന്നി ഇക്കോ ടൂറിസം സെന്ററില്‍ നിന്ന് ആരംഭിക്കുന്ന യാത്ര രാത്രി 9:30ന് അവസാനിക്കും. ജൈവവൈവിദ്ധ്യം കൊണ്ട് സമ്പന്നമായ കാനനഭൂമിയിലൂടെ സഞ്ചരിച്ച് പക്ഷിമൃഗാദികളെയും വിവിധ കാഴ്ചകളും കണ്ടറിഞ്ഞ് വേറിട്ടൊരു അനുഭവം സഞ്ചാരികള്‍ക്ക് നല്‍കുകയാണ് ലക്ഷ്യമിടുന്നതെന്ന് കോന്നി വനംവകുപ്പ് അധികൃതര്‍ അറിയിച്ചു.

കോന്നി ഇക്കോ ടൂറിസം സെന്ററില്‍ നിന്നും ആദ്യം അടവിയിലേയ്ക്കാണ് യാത്ര. ഇവിടെ കുട്ടവഞ്ചി സവാരി നടത്തിയ ശേഷം പ്രഭാതഭക്ഷണം. തുടര്‍ന്ന് തണ്ണിത്തോട്, ചിറ്റാര്‍, തീതത്തോട്, ആങ്ങമൂഴി, പ്ലാപ്പള്ളി, കോരുത്തോട്, മുണ്ടക്കയം, വളഞ്ഞങ്ങാനം വെള്ളച്ചാട്ടം, കുട്ടിക്കാനം, പീരുമേട്, വണ്ടിപ്പെരിയാര്‍, വള്ളക്കടവ് വഴി ഗവിയിലെത്തും.

ഗവിയില്‍ നിന്നും തിരികെ വള്ളക്കടവ്, പരുന്തുംപാറ, കുട്ടിക്കാനം, മുണ്ടക്കയം, എരുമേലി, റാന്നി, കുമ്പഴ വഴി കോന്നിയിലെത്തുന്ന രീതിയിലാണ് യാത്രാ. വള്ളക്കടവ് ചെക്ക്പോസ്റ്റ് മുതല്‍ ഗവി വരെ ടൈഗര്‍ റിസര്‍വ്ഡ് മേഖലയിലൂടെയാണ് യാത്ര കടന്നു പോകുന്നത്. പ്രളയം മൂലം ഉണ്ടായ ഉരുള്‍പൊട്ടലിനെ തുടര്‍ന്ന് ഗവി റൂട്ടിലൂടെയുള്ള യാത്ര

സഞ്ചാരയോഗ്യമല്ലാത്തതിനാല്‍ താല്‍ക്കാലികമായ യാത്രാമാര്‍ഗത്തിലും അധികൃതര്‍ മാറ്റം വരുത്തിയിട്ടുണ്ട്. ഗവിയിലേയ്ക്കുള്ള സന്ദര്‍ശകരുടെ വാഹനങ്ങള്‍ക്ക് നിയന്ത്രണം ഉള്ളപ്പോള്‍ സുരക്ഷിതത്വവും സൗകര്യപ്രദവുമായ ടൂര്‍പാക്കേജാണ് വനംവകുപ്പ് ഒരുക്കിയിരിക്കുന്നത്. www.konniecotourism.org എന്ന കോന്നി ഇക്കോ ടൂറിസം സെന്റര്‍ വെബ്സൈറ്റില്‍ ടിക്കറ്റ് മുന്‍കൂറായി ബുക്ക് ചെയ്യുന്നതിനുള്ള സൗകര്യമുണ്ട്. കോന്നി ഫോറസ്റ്റ് ഡവലപ്മെന്റ് ഏജന്‍സിയുടെ തീരുമാനപ്രകാരം നവംബര്‍ ഒന്ന് മുതല്‍ പുതിയ നിരക്ക് വര്‍ദ്ധന പ്രാബല്യത്തില്‍ വന്നു.

The post സഞ്ചാരികളെ ആകര്‍ഷിക്കാന്‍ കോന്നി-അടവി-ഗവി ടൂര്‍ പാക്കേജ് പുനരാരംഭിച്ചു appeared first on Valanchery Online.

ഇന്നു മുതല്‍ സഞ്ചാരികളെ നെടുങ്കയത്തേക്ക് കടത്തിവിടും

വളാഞ്ചേരിക്കാരൻ — Sun, 06 May 2018 04:01:00 +0000

കരുളായി:വനത്തിനകത്തെ പാരിസ്ഥിതിക വിനോദ സഞ്ചാര കേന്ദ്രമായ നെടുങ്കയത്തേക്ക് സഞ്ചാരികള്‍ക്ക് വനംവകുപ്പ് ഏര്‍പ്പെടുത്തിയിരുന്ന താത്കാലിക വിലക്ക് പിന്‍വലിച്ചു. ശനിയാഴ്ചമുതല്‍ സഞ്ചാരികള്‍ക്ക് നെടുങ്കയത്ത് പ്രവേശിക്കാം.

വേനല്‍ ശക്തി പ്രാപിക്കുമ്പോള്‍ കാട്ടുതീ സാധ്യത കണക്കിലെടുത്താണ് മാര്‍ച്ച് മാസം തുടക്കത്തില്‍ കേന്ദ്രം താത്കാലികമായി അടച്ചത്. തുടര്‍ച്ചയായി വനത്തില്‍ മഴ ലഭിച്ചതിനെത്തുടര്‍ന്ന് പുല്ല് കിളിര്‍ക്കുകയും കാട്ടുതീ സാധ്യത ഇല്ലാതാകുകയും ചെയ്തതിനെത്തുടര്‍ന്നാണ് വീണ്ടും സഞ്ചാരികള്‍ക്കായി കവാടം തുറക്കുന്നത്. ജില്ലയിലെതന്നെ പ്രധാന വിനോദ സഞ്ചാര കേന്ദ്രങ്ങളില്‍ ഒന്നായ നെടുങ്കയത്തേക്ക് നിത്യേന ജില്ലയ്ക്കകത്തും പുറത്തുംനിന്നുള്ളവര്‍ എത്താറുണ്ട്.

പാറക്കെട്ടുകള്‍ നിറഞ്ഞ കരിമ്പുഴ, ബ്രിട്ടീഷ് ഫോറസ്റ്റ് എഞ്ചിനീയറായിരുന്ന ഡോസണ്‍ സായ്പിന്റെ ശവകുടീരം, ആനപ്പന്തി, ബ്രിട്ടീഷുകാര്‍ പണിത ഗര്‍ഡര്‍ പാലം, നൂറുവര്‍ഷം പഴക്കമുള്ള തേക്ക് തോട്ടങ്ങള്‍, തടി ഡിപ്പോ, ഫോറസ്റ്റ് ഇന്‍സ്‌പെക്ഷന്‍ ബംഗ്ലാവ് തുടങ്ങിയവയാണ് നെടുങ്കയത്തെ കാഴ്ചകള്‍. ചെറുപുഴ ചെക്‌പോസ്റ്റ് കഴിഞ്ഞാല്‍ നെടുങ്കയം വരെയുള്ള വനയാത്രയും സഞ്ചാരികള്‍ക്ക് ആകര്‍ഷകമാകും.

ആന, മാന്‍ തുടങ്ങിയ വന്യമൃഗങ്ങളെ കാണാനുള്ള സാധ്യതയും ഏറെയാണ്. തിരിച്ചുവരുമ്പോള്‍ ആദിവാസികള്‍ ശേഖരിച്ച ശുദ്ധീകരിച്ച കാട്ടുതേന്‍, കൊടംപുളി, പന്തം തുടങ്ങിയ വനവിഭവങ്ങള്‍ വനം സംരക്ഷണ സമിതിയുടെ സ്റ്റോറില്‍നിന്ന് വാങ്ങാനും കിട്ടും. നെടുങ്കയം സന്ദര്‍ശിക്കുന്നതിനുള്ള ടിക്കറ്റ് ചെറുപുഴ ചെക്‌പോസ്റ്റില്‍ ലഭിക്കും.

The post ഇന്നു മുതല്‍ സഞ്ചാരികളെ നെടുങ്കയത്തേക്ക് കടത്തിവിടും appeared first on Valanchery Online.

eco-tourism Archives - Valanchery Online

സഞ്ചാരികളെ ആകര്‍ഷിക്കാന്‍ കോന്നി-അടവി-ഗവി ടൂര്‍ പാക്കേജ് പുനരാരംഭിച്ചു

ഇന്നു മുതല്‍ സഞ്ചാരികളെ നെടുങ്കയത്തേക്ക് കടത്തിവിടും