drdo Archives - Valanchery Online

കുറ്റിപ്പുറം എം.ഇ.എസ് കോളേജിന് അഭിമാന നേട്ടം; ‘ആയുധ’ക്ക് ദേശീയതലത്തിൽ ഒന്നാമത്‌

വളാഞ്ചേരിക്കാരൻ — Mon, 28 May 2018 14:44:24 +0000

കുറ്റിപ്പുറം: കേന്ദ്ര പ്രതിരോധ വകുപ്പിന്റെ കീഴിലുള്ള DRDO നടത്തിയ പ്രൊജക്ട് കോംപറ്റിഷനിൽ ദേശീയ ചാമ്പ്യൻഷിപ്പിൽ കുറ്റിപ്പുറം എം.ഇ.എസ് എഞ്ചിനീയറിംഗ് കോളേജിലെ ഇലക്ട്രിക്കൽ എഞ്ചിനീയറിങ്ങിലെ അവസാന വർഷ വിദ്യാർഥികളുടെ ടീം ഒന്നാം സ്ഥാനം കരസ്ഥമാക്കി.

സർക്യൂട്ടുകളെ സ്വപനം കണ്ടു നടക്കുന്ന ദിബുവിനോടൊപ്പം ഫാരിസ്, ഫാസില, ബാസിത്, സൂരജ് എന്നിവർ ചേർന്നപ്പോൾ രൂപം കൊണ്ടത് പ്രതിരോധ മേഖലയിലെ ഏത് പ്രതികൂല സാഹചര്യത്തിലും കടന്ന് ചെല്ലാവുന്ന ‘ആയുധ’ എന്ന വയർലസ് റോബോട്ട്‌. എം.ഇ.എസിലെ അവസാന വർഷ പ്രൊജക്ടിന്റെ ഭാഗമായി കോളജിലെ ഫാബ് ലാബിൽ വികസിപ്പിച്ചെടുത്ത ഈ റോബോട്ടാണിപ്പോൾ ഡി.ആർ.ഡി.ഒയുടെ വജ്ര ജൂബിലിയുടെ ഭാഗമായി നടത്തിയ DRUSE (DRDO Robotics and Unmanned System Expositions) എന്ന മത്സരത്തിൽ ഒന്നാം സമ്മാനം നേടിയിരിക്കുന്നത്.

പ്രതിരോധാവശ്യങ്ങൾക്ക് ഉപയോഗിക്കാവുന്ന ആളില്ലാ സംവിധാനങ്ങൾ രൂപകൽപന ചെയ്ത് വികസിപ്പിച്ചെടുക്കുന്നതിൽ, വിദ്യാർഥികൾക്കിടയിലെ ദേശീയ പ്രതിഭകളെ കണ്ടെത്താനുള്ള DRUSE ൽ ഒന്നാമതെത്തി ഒന്നര ലക്ഷം രൂപ സമ്മാനത്തുകയും ട്രോഫിയുമാണ് ഈ മിടുക്കർ കൈക്കലാക്കിയത്.

സാങ്കേതിക തികവിൽ മലയാളി വിദ്യാർഥികൾ ഒട്ടും പിറകിലല്ലെന്ന് തെളിയിച്ച മത്സരത്തിൽ ഐ.ഐ.ടി ഖരഗ്പൂരിലെയും പൂനെ കോളജ് ഓഫ് എഞ്ചിനീയറിങ്ങിലെയും മത്സരാർഥികളെ രണ്ടും മൂന്നും സ്ഥാനങ്ങളിലേയ്ക്ക് പിന്തള്ളി. ഈ കിരീടം കോളജിനൊരു സിൽവർ ജൂബിലി സമ്മാനമായി.
ഇവരുടെ ഈ സംരഭത്തിന് മികച്ച പിന്തുണയുമായി കോളേജിലെ അധ്യാപകരായ ഡോ മായ, ഷൈൻ എന്നിവർ കൂടെയുണ്ടായിരുന്നു. വിജയികളായ ദിബു, ഫാരിസ്, ഫാസില, ബാസിത്, സൂരജ് എന്നിവർക്ക് വളാഞ്ചേരി ഓൺലൈനിന്റെ സ്നേഹാഭിനന്ദനങ്ങൾ.

The post കുറ്റിപ്പുറം എം.ഇ.എസ് കോളേജിന് അഭിമാന നേട്ടം; ‘ആയുധ’ക്ക് ദേശീയതലത്തിൽ ഒന്നാമത്‌ appeared first on Valanchery Online.

കുറ്റിപ്പുറം എൻജിനീയറിങ് കോളജിന്റെ ‘ആയുധ’ ഫൈനലിൽ

വളാഞ്ചേരിക്കാരൻ — Wed, 18 Apr 2018 00:14:50 +0000

കുറ്റിപ്പുറം: എംഇഎസ് എൻജിനീയറിങ് കോളജിലെ വിദ്യാർഥികൾ രൂപകൽപന ചെയ്ത ‘ആയുധ’ വാഹനത്തിന് ഡിഫൻസ് റിസർച് ആൻ‍ഡ് ഡവലപ്മെന്റ് ഓർഗനൈസേഷൻ ഓഫ് ഇന്ത്യയുടെ ഫൈനൽ മത്സരത്തിലേക്ക് പ്രവേശനം ലഭിച്ചു. യുദ്ധഭൂമിയി‍ൽ സൈന്യത്തിന് സഹായകരമാകുന്ന രീതിയിലുള്ള സ്വയം നിയന്ത്രിത വാഹനം രൂപകൽപന ചെയ്ത കുറ്റിപ്പുറം എംഇഎസ് എൻജിനീയറിങ് കോളജിലെ വിദ്യാർഥികളുടെ ആശയത്തിനാണ് അംഗീകാരം.

ഡിഫൻസ് റിസർച് ആൻഡ് ഡവലപ്മെന്റ് ഓർഗനൈസേഷൻ ഓഫ് ഇന്ത്യ (ഡിആർഡിഒ)യുടെ വജ്ര ജൂബിലിയോട് അനുബന്ധിച്ച് രാജ്യത്തെ എൻജിനീയറിങ് വിദ്യാർഥികൾക്കായി സംഘടിപ്പിച്ച മത്സരത്തിലെ ഫൈനൽ റൗണ്ടിലേക്കാണ് കുറ്റിപ്പുറം എംഇഎസ് എൻജിനീയറിങ് കോളജിലെ അവസാനവർഷ ഇലക്ട്രിക്കൽ വിദ്യാർഥികൾ രൂപകൽപന ചെയ്ത ‘ആയുധ’ എന്ന വാഹനത്തിന് അനുമതി ലഭിച്ചത്. സൈനികർക്ക് ആവശ്യമായ യുദ്ധസാമഗ്രികൾ വഹിക്കാനും അത്യാവശ്യ ഘട്ടങ്ങളിൽ പരുക്കേറ്റ പട്ടാളക്കാരെ സുരക്ഷിതമായി തിരിച്ചു ക്യാംപുകളിൽ എത്തിക്കുന്നതിനും സഹായകരമായ രീതിയിലാണ് വാഹനത്തിന്റെ ചെറുരൂപം രൂപകൽപന ചെയ്തിരിക്കുന്നത്. സ്വയം നിയന്ത്രിത സംവിധാനത്തിന് പുറമേ വിദൂര നിയന്ത്രണ സൗകര്യവും ഇതിലുണ്ട്.

ഇന്റർ കണക്റ്റഡ് ഹൈബ്രിഡ് സിസ്റ്റം എന്ന നൂതന സാങ്കേതിക വിദ്യ ഉപയോഗിച്ചാണ് വാഹനം പ്രവർത്തിപ്പിക്കുന്നത്. രാജ്യത്തെ വിവിധ എൻജിനീയറിങ് കോളജുകളി‍ൽ നിന്നായി രണ്ടായിരത്തിൽപ്പരം അപേക്ഷകരാണ് മത്സരത്തിനുണ്ടായിരുന്നത്. ഇതിൽനിന്ന് 30 രൂപകൽപനകളാണ് ദക്ഷിണേന്ത്യയിൽനിന്ന് ആദ്യം തിരഞ്ഞെടുത്തത്. ഫൈനൽ റൗണ്ടിലേക്കുള്ള അഞ്ച് ദക്ഷിണേന്ത്യൻ ടീമുകളി‍ൽ ഒന്നാണ് കുറ്റിപ്പുറം എംഇഎസ് ടീം. അടുത്തമാസം 10,11 തീയതികളിൽ ഡിആർഡിഒയുടെ ഡൽഹി ഹെഡ്ക്വാർട്ടേഴ്സിലാണ് ഫൈനൽ മത്സരം. അവസാനവർഷ ബിടെക് വിദ്യാർഥികളായ ഫാരിസ്, ബാസിത്, സൂരജ്, ദിബു, അർജുൻ, ഫാസില എന്നിവർ ചേർന്നാണ് ‘ആയുധ’ രൂപകൽപന ചെയ്ത്.

The post കുറ്റിപ്പുറം എൻജിനീയറിങ് കോളജിന്റെ ‘ആയുധ’ ഫൈനലിൽ appeared first on Valanchery Online.

കുറ്റിപ്പുറം എം.ഇ.എസ് കോളേജിലെ വിദ്യാർഥികൾ നിർമ്മിച്ച സൈനിക വാഹനം ശ്രദ്ധയാകർഷിക്കുന്നു

വളാഞ്ചേരിക്കാരൻ — Tue, 10 Apr 2018 02:37:49 +0000

കുറ്റിപ്പുറം: പട്ടാളക്കാര്‍ക്ക് ഉപയോഗിക്കാനുള്ള ഓട്ടോമാറ്റിക് വാഹനം വികസിപ്പിച്ച് കുറ്റിപ്പുറം എം.ഇ.എസ്. എന്‍ജിനീയറിങ് കോളേജ് വിദ്യാര്‍ഥികള്‍. സൈനിക സാങ്കേതികവിദ്യാ വികാസത്തിന്റെ ചുമതലയുള്ള ഗവേഷണസ്ഥാപനമായ ഡി.ആര്‍.ഡി.ഒയുടെ വജ്രജൂബിലിയോടനുബന്ധിച്ച് നടത്തിയ മത്സരത്തിനായാണ് വിദ്യാര്‍ഥികള്‍ വാഹനം വികസിപ്പിച്ചത്.

ഇലക്ട്രിക്കല്‍ അവസാനവര്‍ഷ വിദ്യാര്‍ഥികളായ ഫാരിസ്, ബാസിത്, സൂരജ്, ദിബു, അര്‍ജുന്‍, ഫാസില എന്നിവരാണ് വാഹനം രൂപകല്പനചെയ്തത്. പട്ടാളക്കാര്‍ക്ക് ആവശ്യമായ യുദ്ധസാമഗ്രികള്‍ വഹിക്കാനും പരിക്കേറ്റ പട്ടാളക്കാരെ സുരക്ഷിതമായി ബേസില്‍ എത്തിക്കുന്നതിനുള്ള വാഹനമാണ് നിര്‍മിച്ചിരിക്കുന്നത്. സെന്‍ഡിങ് ആന്‍ഡ് മോണിറ്ററിങ് സാങ്കേതികവിദ്യയും വാഹനത്തിലുണ്ട്. കണക്ടഡ് ഹൈബ്രിഡ് സിസ്റ്റം എന്ന നൂതന സാങ്കേതികവിദ്യ ഉപയോഗിച്ചാണ് വണ്ടി പ്രവര്‍ത്തിപ്പിക്കുന്നത്.
ഡി.ആര്‍.ഡി.ഒയുടെ റോബോട്ടിക്‌സ് ആന്‍ഡ് അണ്‍മാന്ഡ് സിസ്റ്റം എക്‌സ്‌പൊസിഷന്‍ (ഡി.ആര്‍.യു.എസ്.ഇ.) മത്സരത്തില്‍ ‘സൈനിക സഹായ വാഹനം’ എന്ന വിഷയത്തെ ആസ്പദമാക്കി നിര്‍മിച്ചതാണ് വാഹനം. മത്സരത്തിന് വിവിധ സംസ്ഥാനങ്ങളില്‍നിന്നായി രണ്ടായിരത്തോളം അപേക്ഷകരുണ്ടായിരുന്നു. മത്സരത്തിന് അംഗീകാരം കിട്ടിയ ദക്ഷിണേന്ത്യയില്‍നിന്നുള്ള 30 പ്രോജക്ടുകളിലാണ് ഈ വാഹനം ഉള്‍പ്പെട്ടത്. ദക്ഷിണേന്ത്യയിലെ മികച്ച പ്രൊജക്ടുകള്‍ക്കുള്ള അംഗീകാരമായി കാഷ് പ്രൈസും സര്‍ട്ടിഫിക്കറ്റും ഇവര്‍ക്ക് ലഭിച്ചു. സംസ്ഥാനത്തുനിന്ന് മൂന്ന് ടീമുകള്‍ക്കാണ് അംഗീകാരം ലഭിച്ചത്.

മറ്റ് മേഖലകളിലെ പ്രോജക്ടുകളുടെ അവതരണം ഈ മാസം പകുതിയോടെ പൂര്‍ത്തിയാകും. അതിനുശേഷമായിരിക്കും ഫൈനല്‍ റൗണ്ടിലേക്കുള്ള തിരഞ്ഞെടുപ്പ്. 30 പ്രോജക്ടില്‍നിന്ന് അഞ്ച് ടീമുകളെയാണ് ഡല്‍ഹിയില്‍ നടക്കുന്ന ഫൈനല്‍ റൗണ്ടിലേക്ക് തിരഞ്ഞെടുക്കുക.
ദക്ഷിണേന്ത്യയിലെ അഞ്ചില്‍ ഒരു ടീമായി ഫൈനല്‍ റൗണ്ടിലെത്താന്‍ കഴിയുമെന്ന പ്രതീക്ഷയിലാണ് ഈ എന്‍ജിനീയറിങ് വിദ്യാര്‍ഥികള്‍.എംഇഎസിന് പുറമേ എൻഐടി കോഴിക്കോട്, ആഐടി കോട്ടയം എന്നിവിടങ്ങളിലെ വിദ്യാർഥികളാണ് സെമിഫൈനൽ റൗണ്ടിൽ തിരഞ്ഞെടുക്കപ്പെട്ട കേരളത്തിലെ ടീമുകൾ.

The post കുറ്റിപ്പുറം എം.ഇ.എസ് കോളേജിലെ വിദ്യാർഥികൾ നിർമ്മിച്ച സൈനിക വാഹനം ശ്രദ്ധയാകർഷിക്കുന്നു appeared first on Valanchery Online.