complaint Archives - Valanchery Online

വളാഞ്ചേരി കാവുംപുറത്ത് സ്‌കൂൾ പരിസരത്തെ സിമന്റ് സംഭരണ കേന്ദ്രം;

വളാഞ്ചേരിക്കാരൻ — Thu, 01 Jan 2026 05:15:42 +0000

വളാഞ്ചേരി : സ്‍കൂൾ പരിസരത്തെ സിമൻറ് സംഭരണകേന്ദ്രത്തിനെതിരേ പരാതിയുമായി നാട്ടുകാർ രംഗത്ത്. കാവുംപുറത്ത് പ്രവർത്തിക്കുന്ന ബഡ്‌സ് സ്‌കൂളിന്റെ ചുമരിനോട് ചേർന്നും തൊട്ടടുത്തുതന്നെയുള്ള തൊഴുവാനൂർ എഎൽപി സ്‌കൂളിനരികിലുമായാണ് സിമന്റ് സംഭരണകേന്ദ്രത്തിന്റെ പ്രവർത്തനം. കേന്ദ്രത്തിന്റെ ലൈസൻസ് റദ്ദാക്കണമെന്നാവശ്യപ്പെട്ട് നാട്ടുകാരുടെ േനതൃത്വത്തിൽ നഗരസഭാധ്യക്ഷ ഹസീന വട്ടോളിക്ക് പരാതി നൽകി. സംഭരണകേന്ദ്രത്തിൽനിന്നുള്ള സിമന്റുപൊടി ക്ലാസുകളിലേക്ക് വരുന്നുണ്ടെന്നും ഇത് ബഡ്‌സ് സ്‌കൂളിലെ ഭിന്നശേഷിക്കാരായ വിദ്യാർഥികൾക്കും അധ്യാപകർക്കും ഗുരുതരമായ ആരോഗ്യപ്രശ്നങ്ങളുണ്ടാക്കുന്നതായും സിമന്റുമായി വരുന്ന വലിയ ട്രക്കുകൾ കുട്ടികളുടെ സുരക്ഷയ്ക്ക് ഭീഷണിയാണെന്നും പരാതിയിൽ പറയുന്നു. ബഡ്‌സ് സ്‌കൂളിലേക്ക് വരുന്നവരും ട്രക്കുകളും ഒരേ വഴിയിലൂടെ പ്രവേശിക്കുന്നതും ഗുരുതരമായ സുരക്ഷാഭീഷണിയാണ്. വൈസ്‌ ചെയർമാൻ കെ.വി. ഉണ്ണികൃഷ്ണൻ, പ്രതിപക്ഷനേതാവ് ടി.പി. അബ്ദുൾ ഗഫൂർ എന്നിവർക്കൊപ്പമെത്തിയാണ് നാട്ടുകാർ പരാതി നൽകിയത്.

The post വളാഞ്ചേരി കാവുംപുറത്ത് സ്‌കൂൾ പരിസരത്തെ സിമന്റ് സംഭരണ കേന്ദ്രം; appeared first on Valanchery Online.

കാടാമ്പുഴ മലറോഡിൽ ബെവറജസ് ഔട്ട്‌ലെറ്റ്; പരാതി നൽകി മാറാക്കര ഗ്രാമപ്പഞ്ചായത്ത്

വളാഞ്ചേരിക്കാരൻ — Thu, 06 Feb 2025 01:33:44 +0000

മാറാക്കര : കാടാമ്പുഴ മലറോഡിൽ ബെവറജസ് ഔട്ട്‌ലെറ്റ് തുടങ്ങാനുള്ള നീക്കത്തിനെതിരേ മാറാക്കര ഗ്രാമപ്പഞ്ചായത്ത് ഭരണസമിതി മലപ്പുറം എക്‌സൈസ് ഡെപ്യൂട്ടി കമ്മിഷണർക്ക് പരാതി നൽകി. ഔട്ട്‍‌ലെറ്റിന് കണ്ടെത്തിയ സ്ഥലത്തിന് നൂറുമീറ്റർ ചുറ്റളവിലാണ് കാടാമ്പുഴ ഭഗവതീക്ഷേത്രം, ജുമാമസ്ജിദ്, മദ്രസ എന്നിവയുള്ളത്. പ്രസിഡന്റ് കെ.പി. ഷെരീഫ ബഷീർ, വൈസ് പ്രസിഡന്റ് ഉമറലി കരേക്കാട് എന്നിവരാണ് പരാതി നൽകിയത്. കാടാമ്പുഴ വ്യാപാരഭവനിൽ വ്യാഴാഴ്ച വൈകീട്ട് നാലിന് സർവകക്ഷി പ്രതിഷേധയോഗം സംഘടിപ്പിക്കും. യോഗത്തിൽ കർമസമിതി രൂപവത്കരിക്കുമെന്ന് ലഹരി നിർമാർജനമിതി സംസ്ഥാന വർക്കിങ് പ്രസിഡന്റ് ഒ.കെ. കുഞ്ഞിക്കോമു പറഞ്ഞു. മദ്യശാലക്കെതിരേ സർക്കാരിൽ സമ്മർദം ചെലുത്തണമെന്നാവശ്യപ്പെട്ട് ആബിദ് ഹുസൈൻ തങ്ങൾ എം.എൽ.എ.ക്ക് നിവേദനം നൽകി.

The post കാടാമ്പുഴ മലറോഡിൽ ബെവറജസ് ഔട്ട്‌ലെറ്റ്; പരാതി നൽകി മാറാക്കര ഗ്രാമപ്പഞ്ചായത്ത് appeared first on Valanchery Online.

കുറ്റിപ്പുറം ഗവ. താലൂക്ക് ആശുപത്രിയിൽ പരാധീനതകൾ പരിഹരിക്കണം; ജില്ലാ മെഡിക്കൽ ഓഫീസറെ നേരിൽ കണ്ട് നിവേദനം നൽകി ബ്ലോക്ക് പഞ്ചായത്ത് ഭരണ സമിതി

വളാഞ്ചേരിക്കാരൻ — Mon, 25 Nov 2024 02:39:39 +0000

കുറ്റിപ്പുറം: ഗവ. താലുക്ക് ആശുപത്രിയിൽ അടിയന്തിരമായി നടപ്പാക്കേണ്ട കാര്യങ്ങൾ ഉടൻ പ്രാബല്യത്തിൽ വരുത്തണം എന്ന് ആവശ്യപ്പെട്ട് കുറ്റിപ്പുറം ബ്ലോക്ക് പഞ്ചായത്ത് ഭരണ സമിതി ജില്ലാ മെഡിക്കൽ ഓഫീസറെ നേരിൽ കണ്ട് നിവേദനം നൽകി. കുറ്റിപ്പുറത്തേക്ക് നിയമിച്ച മെഡിക്കൽ ഓഫീസർ ഇതുവരെ ചാർജെടുക്കാൻ തയ്യാറായിട്ടില്ല : ഇതുകാരണം നിലവിൽ ശിശുരോഗ വിദഗ്ദ്ധൻ്റെ ഒ പി നിർത്തി വെച്ചിരിക്കുയാണ് :ഈ ഡോക്ടറെ ഉടൻ ചുമതല ഏൽപ്പിക്കുക , അല്ലെങ്കിൽ ബദൽ സംവിധാനം സത്വരമായി ഏർപ്പെടുത്തുക : നിർദിഷ്ട കണ്ണാശുപത്രി കെട്ടിടം പൂർത്തിയായിട്ടും വേണ്ട ഉപകരണങ്ങൾ ലഭ്യമാകാത്തതിനാൽ ഉൽഘാടനം ചെയ്യാൻ കഴിഞ്ഞിട്ടില്ല : ആയതിനാൽ കണ്ണാശുപത്രിക്കുള്ള എല്ലാ ഉപകരണങ്ങളും സ്റ്റാഫുകളെയും അടിയന്തിരമായി എത്തിക്കാനും നിയമിക്കാനു ഇടപെടൽ നടത്തുക : കോട്ടക്കൽ മണ്ഡലം എം എൽ എയുടെ വികസന ഫണ്ട് ഉപയോഗിച്ച് നിർമിച്ച ഫിസിയോ തെറാപ്പി സെൻ്റർ കം എക്സ്റേ യുണിറ്റ് തുറന്നു പ്രവർത്തിപ്പിക്കുന്നതിന് ഫിസിയോ തെറാപ്പിസ്റ്റിനെ അടിയന്തിരമായി നിയമിക്കുക : കൂടാതെ നിലവിലുള്ള ഐസിയുവിലേക്കുള്ള വിഭഗ്ദ്ധ സ്റ്റാഫുകളെ ഉടൻ നിയമിക്കുക തുടങ്ങിയ നിരവധി ആവശ്യങ്ങൾ ഡി എം ഒ യെ നേരിൽ ബോധിപ്പിച്ചു. കുറ്റിപ്പുറം ബ്ലോക്ക് പഞ്ചായത്ത് പ്രസിഡണ്ട് വസീമ വേളേരി, വൈസ് പ്രസിഡണ്ട് പി സി എ നൂർ , സ്റാൻ്റിംഗ് കമ്മറ്റി ചെയർമാൻമാരായ സാബിറ എടത്തടത്തിൽ , ഒ കെ സുബൈർ , ആയിഷ ചിറ്റ കത്ത്,’അടിയന്തിര നിവേദനവുമായി എന്നിവരാണ് ഡിഎം ഒ യെ സന്ദർശിച്ച സംഘത്തിൽ ഉണ്ടായിരുന്നത്

The post കുറ്റിപ്പുറം ഗവ. താലൂക്ക് ആശുപത്രിയിൽ പരാധീനതകൾ പരിഹരിക്കണം; ജില്ലാ മെഡിക്കൽ ഓഫീസറെ നേരിൽ കണ്ട് നിവേദനം നൽകി ബ്ലോക്ക് പഞ്ചായത്ത് ഭരണ സമിതി appeared first on Valanchery Online.

കുറ്റിപ്പുറത്ത് യാത്രാക്കൂലിയിൽ ഇളവുനൽകാതെ വിദ്യാർഥിനികളെ ബസിൽനിന്ന്‌ ഇറക്കിവിട്ടതായി പരാതി

വളാഞ്ചേരിക്കാരൻ — Tue, 29 Nov 2022 01:28:51 +0000

കുറ്റിപ്പുറം : യാത്രാക്കൂലിയിൽ ഇളവുനൽകാതെ കണ്ടക്ടർ വിദ്യാർഥിനികളെ ബസിൽനിന്ന്‌ ഇറക്കിവിട്ടതായി പരാതി. തിങ്കളാഴ്‌ച രാവിലെ 8.40-ന് എടപ്പാളിൽനിന്ന്‌ വളാഞ്ചേരിയിലെ കോളേജിലേക്ക് പോകുന്നതിനായി സ്വകാര്യ ബസിൽ കയറിയ ഒൻപത്‌ വിദ്യാർഥിനികളെയാണ് കുറ്റിപ്പുറം ബസ്‍സ്റ്റാൻഡിൽ ഇറക്കിവിട്ടത്. ഇളവ് അനുവദിക്കില്ലെന്നും മുഴുവൻ തുകയും നൽകിയാൽ മാത്രമേ യാത്ര തുടരാൻ അനുവദിക്കൂവെന്നും കണ്ടക്ടർ പറഞ്ഞു. ഇതിന് വിദ്യാർഥിനികൾ തയ്യാറാകാത്തതിനാലാണ് ഇറക്കിവിട്ടത്. വിദ്യാർഥികൾ മോട്ടോർവാഹന വകുപ്പിൽ പരാതി നൽകി.

The post കുറ്റിപ്പുറത്ത് യാത്രാക്കൂലിയിൽ ഇളവുനൽകാതെ വിദ്യാർഥിനികളെ ബസിൽനിന്ന്‌ ഇറക്കിവിട്ടതായി പരാതി appeared first on Valanchery Online.

വളാഞ്ചേരിയിൽ ക്ഷേത്രത്തിൽ വച്ച് മധ്യവയസ്കയെ ആക്രമിച്ച് സ്വർണവും പണവും കവർന്നതായി പരാതി

വളാഞ്ചേരിക്കാരൻ — Thu, 24 Nov 2022 01:35:34 +0000

വളാഞ്ചേരി : ക്ഷേത്രത്തിൽ വെച്ച് മധ്യവയസ്കയെ ആക്രമിച്ച് അഞ്ച് പവൻ സ്വർണാഭരണവും പണവും കവർന്നതായി പരാതി. ആതവനാട് സ്വദേശി വിജയലക്ഷ്മിയാണ് പരാതി നൽകിയത്. കാട്ടിപ്പരുത്തിയിലെ കുടുംബക്ഷേത്രത്തിലാണ് സംഭവം. പരിക്കേറ്റ വിജയലക്ഷ്മി സ്വകാര്യ ആശുപത്രിയിൽ ചികിത്സയിലാണ്. വിജയലക്ഷ്മി ക്ഷേത്രപരിസരത്ത് കണ്ട അപരിചിതനോട് കാര്യം അന്വേഷിച്ചിരുന്നു. പിന്നീട് ക്ഷേത്രാവശ്യത്തിനുള്ള പാത്രങ്ങൾ കഴുകി വൃത്തിയാക്കുന്നതിനിടയിൽ ഇയാൾ പിൻവശത്തുകൂടി എത്തി വിജയലക്ഷ്മിയുടെ കഴുത്തിൽ തുണി ചുറ്റി ശ്വാസംമുട്ടിക്കുകയായിരുന്നെന്നും ഈ സമയത്ത് ക്ഷേത്രത്തിൽ മറ്റാരും ഉണ്ടായിരുന്നില്ലെന്നും അവർ പറയുന്നു. പെട്ടെന്നുള്ള ആക്രമണത്തിൽ ബോധം നഷ്ടപ്പെട്ടെന്നും സ്വബോധം വീണ്ടെടുത്തപ്പോഴാണ് തന്റെ പേഴ്‌സിലുണ്ടായിരുന്ന പണവും സ്വർണവും നഷ്ടപ്പെട്ടതായറിഞ്ഞതെന്നും പരാതിയിലുണ്ട്. വളാഞ്ചേരി പോലീസ് കേസെടുത്ത് അന്വേഷണം തുടങ്ങി.

The post വളാഞ്ചേരിയിൽ ക്ഷേത്രത്തിൽ വച്ച് മധ്യവയസ്കയെ ആക്രമിച്ച് സ്വർണവും പണവും കവർന്നതായി പരാതി appeared first on Valanchery Online.

ഇന്ധന അളവിൽ സംശയം തോന്നിയാല്‍ പരാതിപ്പെടാം

വളാഞ്ചേരിക്കാരൻ — Sun, 07 Nov 2021 01:26:33 +0000

മലപ്പുറം: വാഹനങ്ങളിൽ ഇന്ധനം നിറയ്ക്കുമ്പോൾ അളവുതൂക്കം സംബന്ധിച്ച് സംശയംതോന്നിയാൽ പരാതിപ്പെടാമെന്ന് ജില്ലാ ലീഗൽ മെട്രോളജി ഡെപ്യൂട്ടി കൺട്രോളർ അറിയിച്ചു. ഇന്ധനത്തിന്റെ അളവിൽ സംശയംതോന്നിയാൽ അളന്ന് ബോധിപ്പിച്ചുതരണമെന്ന് ഉപഭോക്താവിന് ആവശ്യപ്പെടാം. ഇതിനായി പെട്രോൾ പമ്പുകളിൽ ലീഗൽ മെട്രോളജി വകുപ്പ് മുദ്രപതിച്ചുനൽകിയിട്ടുണ്ട്. അളവിൽ കുറവുണ്ടെന്ന് തെളിഞ്ഞാൽ ലീഗൽ മെട്രോളജി വകുപ്പിൽ പരാതിപ്പെടാമെന്നും ഡെപ്യൂട്ടി കൺട്രോളർ സുജ എസ് മണി പറഞ്ഞു. ഫോൺ: 0483 2766157.

Read more: https://www.deshabhimani.com/news/kerala/news-malappuramkerala-07-11-2021/980622

The post ഇന്ധന അളവിൽ സംശയം തോന്നിയാല്‍ പരാതിപ്പെടാം appeared first on Valanchery Online.

പട്ടികജാതി വനിതയെ ഓഫീസിൽ അതിക്രമിച്ച് കയറി ഭീഷണിപ്പെടുത്തിയ പ്രതികളെ അറസ്റ്റ് ചെയ്യണം -ദളിത് സമുദായ മുന്നണി

വളാഞ്ചേരിക്കാരൻ — Sat, 09 Oct 2021 01:13:31 +0000

കുറ്റിപ്പുറം: പട്ടികജാതി വനിതയെ ഓഫീസിൽ അതിക്രമിച്ച് കയറി ഭീഷണിപ്പെടുത്തിയ പ്രതികളെ അറസ്റ്റ് ചെയ്യാൻ പോലീസ് തയ്യാറാകണമെന്ന് ദളിത് സമുദായ മുന്നണി ജില്ലാ കമ്മിറ്റി യോഗം ആവശ്യപ്പെട്ടു. ജീവനക്കാരിയുടെ പരാതിയിൽ കുറ്റിപ്പുറം പോലീസ് കേസ് രജിസ്റ്റർ ചെയ്തിട്ടും പ്രതികളെ അറസ്റ്റ് ചെയ്യാത്തത് ഭരണകക്ഷിയിലെ ഒരു കക്ഷിയുടെ ഇടപെടൽ മൂലമാണെന്നും യോഗം ആരോപിച്ചു.

പ്രതികളെ അറസ്റ്റ് ചെയ്തില്ലെങ്കിൽ തിരൂർ ഡിവൈ.എസ്.പി. ഓഫീസിനു മുന്നിൽ ധർണ നടത്താനും യോഗം തീരുമാനിച്ചു. ജില്ലാ പ്രസിഡന്റ് ടി.പി. അയ്യപ്പൻ അധ്യക്ഷനായി. ആർ.പി. മണി, സി. മനോജ്, മണികണ്ഠൻ മാറഞ്ചേരി, എം.പി. താമി, ശ്രീജ ആലങ്കോട് എന്നിവർ പ്രസംഗിച്ചു.

The post പട്ടികജാതി വനിതയെ ഓഫീസിൽ അതിക്രമിച്ച് കയറി ഭീഷണിപ്പെടുത്തിയ പ്രതികളെ അറസ്റ്റ് ചെയ്യണം -ദളിത് സമുദായ മുന്നണി appeared first on Valanchery Online.

പരാതികൾക്ക് പരിഹാരമില്ല; വൈക്കത്തൂരിൽ ജനവാസ മേഖലയിൽ പ്ലാസ്റ്റിക്ക് മാലിന്യം കത്തിക്കുന്നത് തുടരുന്നു

വളാഞ്ചേരിക്കാരൻ — Mon, 06 Sep 2021 01:06:51 +0000

വളാഞ്ചേരി : വൈക്കത്തൂർ ക്ഷേത്രം ബൈപ്പാസ് റോഡരികിലെ പറമ്പിൽ പ്ലാസ്റ്റിക് കത്തിക്കുന്നതു തുടരുന്നു. നഗരത്തിലെ സ്ഥാപനങ്ങളിൽനിന്നുള്ള പ്ലാസ്റ്റിക് മാലിന്യമാണ് ഇവിടെ കത്തിക്കുന്നത്. നഗരസഭാധ്യക്ഷനും സെക്രട്ടറിക്കും കഴിഞ്ഞ 25-ന് നാട്ടുകാരും പരാതി നൽകി. നടപടിയുണ്ടായില്ലെന്ന് ഇവർ കുറ്റപ്പെടുത്തുന്നു. ഞായറാഴ്ച രാവിലെ ഓട്ടോമൊബൈൽസ്, ജ്യൂസ് പാർലർ തുടങ്ങിയ കടകളിൽനിന്നുള്ള പ്ലാസ്റ്റിക്കാണ് കത്തിച്ചത്. സമീപത്തെ വിവിധ കെട്ടിടങ്ങളിലെ മുറികളിൽ താമസിക്കുന്ന മറുനാടൻ തൊഴിലാളികൾ ഭക്ഷണാവശിഷ്ടങ്ങൾ കവറുകളിൽ പൊതിഞ്ഞുകെട്ടി വഴിയരികിൽ തള്ളുന്നതായും ആക്ഷേപമുണ്ട്. അടിയന്തര പരിഹാരം ആവശ്യപ്പെട്ട് എട്ടാംവാർഡ് കൗൺസിലർ ദീപ്തി ഷൈലേഷും വൈക്കത്തൂർ റസിഡന്റ്‌സ് അസോസിയേഷനും പരാതി കൊടുത്തിരുന്നു. അതും അധികൃതർ അവഗണിച്ചതായി നാട്ടുകാർ പറയുന്നു.

The post പരാതികൾക്ക് പരിഹാരമില്ല; വൈക്കത്തൂരിൽ ജനവാസ മേഖലയിൽ പ്ലാസ്റ്റിക്ക് മാലിന്യം കത്തിക്കുന്നത് തുടരുന്നു appeared first on Valanchery Online.

സി.പി.എം. നേതാവിന്റെ പേരിൽ വ്യാജ ഫെയ്‌സ്ബുക്ക് പേജ് നിർമിച്ച് പണംതട്ടുന്നതായി പരാതി

വളാഞ്ചേരിക്കാരൻ — Wed, 25 Aug 2021 00:38:10 +0000

വളാഞ്ചേരി : സി.പി.എം. നേതാവിന്റെ പേരിൽ വ്യാജ ഫെയ്‌സ്ബുക്ക് പേജ് നിർമിച്ച് പണംതട്ടുന്നതായി പരാതി. ജില്ലാ സെക്രട്ടേറിയറ്റ് അംഗവും സി.ഐ.ടി.യു. ജില്ലാ ജനറൽസെക്രട്ടറിയുമായ വി.പി. സക്കറിയയാണ് ഇതുസംബന്ധിച്ച് പരാതിനൽകിയത്. അക്കൗണ്ട്‌വഴി സക്കറിയയുടെ സുഹൃത്തുക്കൾക്ക് ‘എന്നെ സഹായിക്കണമെന്നും പണം അക്കൗണ്ടിലേക്ക് അയക്കണമെന്നും ആവശ്യപ്പെട്ട് സന്ദേശം അയക്കുന്നുണ്ടെന്നും അന്വേഷിക്കണമെന്നും ആവശ്യപ്പെട്ടാണ് സക്കറിയ പരാതി നൽകിയത്.

രാജസ്ഥാനിലെ ഉദയ്‌പുരിലെ രത്‌നാകർ ബാങ്ക് ലിമിറ്റഡിലെ 309014039368 എന്ന അക്കൗണ്ട് നമ്പറിലേക്ക് പണം കൈമാറണമെന്നാണ് ആവശ്യപ്പെടുന്നത്. വ്യാജ അക്കൗണ്ട് നീക്കംചെയ്യാനും തട്ടിപ്പുനടത്തുന്നവരുടെ പേരിൽ നടപടിയെടുക്കണമെന്നും പരാതിയിൽ പറയുന്നു. പോലീസ് അന്വേഷണം തുടങ്ങിയിട്ടുണ്ട്‌.

The post സി.പി.എം. നേതാവിന്റെ പേരിൽ വ്യാജ ഫെയ്‌സ്ബുക്ക് പേജ് നിർമിച്ച് പണംതട്ടുന്നതായി പരാതി appeared first on Valanchery Online.

വളാഞ്ചേരിയിലെ അനധികൃത മദ്യശാല ഉടമസ്ഥനെ അറസ്റ്റ് ചെയ്യണം-വെൽഫെയർ പാർട്ടി

വളാഞ്ചേരിക്കാരൻ — Tue, 20 Apr 2021 05:23:41 +0000

വളാഞ്ചേരി : നിയമത്തെയും ജനങ്ങളെയും വെല്ലുവിളിച്ച് വളാഞ്ചേരിയിൽ അനധികൃതമായി മദ്യശാല നടത്തിയ ഉടമസ്ഥനെതിരെ കേസെടുത്ത് അറസ്റ്റ് ചെയ്യണമെന്ന് വെൽഫെയർ പാർട്ടി വളാഞ്ചേരി മുൻസിപ്പൽ കമ്മിറ്റി ആവശ്യപ്പെട്ടു. ആവശ്യമായ നടപടി ക്രമങ്ങൾ പാലിക്കാതെയാണ് മദ്യഷാപ്പ് തുടങ്ങിയതെന്ന് ബോധ്യമായ സ്ഥിതിക്ക് ഉടമസ്ഥനെയും ഇതിന് പിന്നിൽ പ്രവർത്തിച്ച സാമൂഹ്യദ്രോഹികളേയും നിയമത്തിന് മുന്നിൽ കൊണ്ടുവരാൻ മുനിസിപാലിറ്റി അധികൃതർ തയ്യാറാകണമെന്ന് പാർട്ടി ആവശ്യപ്പെട്ടു. ഈ ആവശ്യമുന്നയിച്ച് നഗരസഭാ ചെയർമാന് മുനിസിപ്പൽ കമ്മിറ്റി നിവേദനം നൽകി. പ്രസിഡണ്ട് കെ.പി. സുബൈർ മാസ്റ്റർ, സെക്രട്ടറി പി. ശാക്കിർ, അസി. സെക്രട്ടറി കെ.ബി. അലി എന്നിവർ സംബന്ധിച്ചു.

The post വളാഞ്ചേരിയിലെ അനധികൃത മദ്യശാല ഉടമസ്ഥനെ അറസ്റ്റ് ചെയ്യണം-വെൽഫെയർ പാർട്ടി appeared first on Valanchery Online.

കുറ്റിപ്പുറം കംഫർട്ട്സ്റ്റേഷൻ പ്രവർത്തിപ്പിക്കണമെന്നാവശ്യപ്പെട്ട് കേരള മനുഷ്യാവകാശ സംരക്ഷണ സമിതി പരാതികൾ നൽകി

വളാഞ്ചേരിക്കാരൻ — Fri, 25 Dec 2020 03:30:06 +0000

കുറ്റിപ്പുറം: ബസ് സ്റ്റാന്റിനടുത്ത് പ്രവർത്തിച്ചിരുന്ന കംഫർട്ട് സ്റ്റേഷൻ മാസങ്ങളോളമായി പ്രവർത്തിക്കാതിരിക്കുകയും അതുമൂലം കുറ്റിപ്പുറം ബസ് സ്റ്റാന്റിലേക്ക് ബസ് വഴിയും ട്രെയിൻ വഴിയും അതുപോലെ മറ്റു വാഹനങ്ങളിലുമായി നിരവധി അന്യ സംസ്ഥാനങ്ങളിൽ നിന്നുള്ളവരും നമ്മുടെ സംസ്ഥാനങ്ങളിൽ നിന്നുള്ളവരുമായ സ്ത്രീകളും കുട്ടികളും വൃദ്ധരും രോഗികളും അടക്കം പ്രതിദിനം ആയിരക്കണക്കിന് ആളുകൾ ഈ പ്രദേശത്തുകൂടെ കടന്നുപോയിട്ടും നിരവധി വ്യാപരികളും തൊഴിലാളികളും ഉള്ള മേഖലയായിട്ടും ഈ പ്രദേശത്ത് പ്രൈവറ്റ് ബസ് സ്റ്റാന്റും ഓട്ടോ – ടാക്സി സ്റ്റാന്റ് എന്നിവയും ഉണ്ടായിട്ടും ഈ കംഫര്ട്ട് തുറന്നു പ്രവർത്തിക്കാതിരിക്കുന്നത് അധികാരികളുടെ ഭാഗത്ത് നിന്നുള്ള തികച്ചും നിരുത്തരവാദപരമായ പ്രവർത്തമാണ്. ഈ കൊറോണ മഹാമാരിയുടെ കാലത്ത് പൊതു സ്ഥലത്ത് തുപ്പുവാൻ പോലും പാടില്ല എന്ന് പറയുന്ന ഈ സമയത്തും ഈ കംഫർട്ട് സ്റ്റേഷൻ തുറന്നു പ്രവർത്തിക്കാനാവശ്യമായ യാതൊരു വിധ നടപടിയും അധികാരികളുടെ ഭാഗത്തു നിന്ന് ഉണ്ടാകാത്തതിൽ പ്രതിഷേധിച്ച് കുറ്റിപ്പുറം ഗ്രാമ പഞ്ചായത്ത് സെക്രട്ടറിക്കും മലപ്പുറം ജില്ലാ കളക്ടർക്കും തിരൂർ താലൂക്ക് ലീഗൽ സർവീസ് അതോറിറ്റിക്കും പരാതി നൽകി കേരള മനുഷ്യാവകാശ സംരക്ഷണ സമിതി. കേരള മനുഷ്യാവകാശ സംരക്ഷണ സമിതി ഭാരവാഹികളായ അഡ്വ. കബീർ കാരിയാട്ട്, സുരേഷ് കുമാർ എ.വി, സുന്ദരൻ തൈക്കാട്, മുഹമ്മദ്‌ ഫാറൂക്ക് കെ.പി എന്നിവർ പങ്കെടുത്തു.

The post കുറ്റിപ്പുറം കംഫർട്ട്സ്റ്റേഷൻ പ്രവർത്തിപ്പിക്കണമെന്നാവശ്യപ്പെട്ട് കേരള മനുഷ്യാവകാശ സംരക്ഷണ സമിതി പരാതികൾ നൽകി appeared first on Valanchery Online.

കൊളമംഗലത്ത് പാടം നികത്തിയതുമായി ബന്ധപ്പെട്ട് ഡി.വൈ.എഫ്.ഐ വില്ലേജ് ഓഫീസർക്ക് പരാതി നൽകി

വളാഞ്ചേരിക്കാരൻ — Sat, 30 May 2020 05:25:20 +0000

വളാഞ്ചേരി: കൊളമംഗലത്ത് നിർമ്മാണ പ്രവൃത്തികൾ നടത്തിയതിന് സ്റ്റോപ് മെമ്മോ നൽകിയെന്ന് പറയപ്പെടുന്ന പാടശേഖരത്തിൽ പണികൾ തുടരുന്നുവെന്ന് കാണിച്ച് പരാതിയുമായി ഡി.വൈ.എഫ്.ഐ. കൊളമംഗലത്തെ പാടശേഖരത്തിലാണ് ഇത്തരത്തിൽ പ്രവൃത്തികൾ നടക്കുന്നുവെന്ന് കാണിച്ച് ഡി.വൈ.എഫ്.ഐ വളാഞ്ചേരി മേഖലാ കമ്മറ്റി കാട്ടിപ്പരുത്തി വില്ലേജ് ഓഫീസർക്ക് പരാതി നൽകിയത്. 2019 ൽ കരിങ്കൽ കൊണ്ടും, ചെങ്കല്ല് കൊണ്ടും 4 അടി ഉയരത്തിൽ പാടം കെട്ടി പൊന്തിച്ചിരുന്നുവെന്നും അന്ന് നാട്ടുകാരും സി.പി.ഐ(എം) കൊളമംഗലം ബ്രാഞ്ച് കമ്മിറ്റിയും മലപ്പുറം ജില്ലാ കലക്ടർക്ക് പരാതി നൽകുകയുണ്ടായതായും പറയുന്നു. അന്ന് പരാതി നൽകിയതിന്റെ പശ്ചാത്തലത്തിൽ ബന്ധപ്പെട്ട കക്ഷികൾക്ക് കാട്ടിപ്പരുത്തി വില്ലേജ് ഓഫീസർ സ്റ്റോപ്പ് മെമ്മോ കൊടുത്തിരുന്നുവെന്നും ആ സ്ഥലമാണ് രാത്രിയുടെ മറവിൽ ജെ.സിബി ഉപയോഗിച്ച് നികത്തിയതായി കാണിച്ച് പരാതി നൽകിയത്.

മണ്ണിട്ട സ്ഥലം പൂർവ്വസ്ഥിതിയിലാക്കണമെന്നും, കുറ്റക്കാർക്കെതിരെ ശക്തമായ നിയമ നടപടി സ്വീകരിക്കണമെന്നും ആവശ്യപ്പെട്ട് ഡി.വൈ.എഫ്.ഐ വളാഞ്ചേരി മേഖലാ കമ്മിറ്റി കാട്ടിപ്പരുത്തി വില്ലേജ് ഓഫീസർക്ക് പരാതി നൽകി. കൃഷിയോഗ്യമായ പാടശേഖരങ്ങൾ മണ്ണിട്ട് നികത്തുന്ന ഇത്തരം നടപടിക്കെതിരെ ജനങ്ങളെ അണിനിരത്തി ശക്തമായ സമരം നടത്തുമെന്ന് മണ്ണിട്ട സ്ഥലത്ത് നടത്തിയ പ്രതിഷേധ സമരത്തിൽ നേതാക്കൾ പറഞ്ഞു. പ്രതിഷേധസമരം സി.പി.ഐ(എം) വളാഞ്ചേരി ലോക്കൽ കമ്മിറ്റി അംഗം കെ.പി. യാസർ അറഫാത്ത് ഉദ്ഘാടനം ചെയ്തു. കെ ജയകൃഷ്ണൻ അധ്യക്ഷത വഹിച്ചു. ടി.വി വിശാഖ് ഉണ്ണി, വി.പി സബ്നേഷ്, എം ഹസൈൻ, എം ആഷിക് എന്നിവർ സംസാരിച്ചു.

The post കൊളമംഗലത്ത് പാടം നികത്തിയതുമായി ബന്ധപ്പെട്ട് ഡി.വൈ.എഫ്.ഐ വില്ലേജ് ഓഫീസർക്ക് പരാതി നൽകി appeared first on Valanchery Online.