bride Archives - Valanchery Online

പെണ്‍കുട്ടികളുടെ വിവാഹ പ്രായം ഉയര്‍ത്തുന്നതു സംബന്ധിച്ച സര്‍ക്കാര്‍ തീരുമാനം ഉടൻ

വളാഞ്ചേരിക്കാരൻ — Fri, 16 Oct 2020 13:19:45 +0000

ന്യൂഡല്‍ഹി: പെണ്‍കുട്ടികളുടെ വിവാഹ പ്രായം ഉയര്‍ത്തുന്നതു സംബന്ധിച്ച സര്‍ക്കാര്‍ തീരുമാനം ഉടനുണ്ടാവുമെന്ന് പ്രധാനമന്ത്രി നരേന്ദ്രമോദി. ഇതുസംബന്ധിച്ച കമ്മിറ്റി റിപോര്‍ട്ട് നല്‍കിയാലുടന്‍ വിവാഹത്തിനുള്ള ശരിയായ പ്രായം സര്‍ക്കാര്‍ തീരുമാനിക്കുമെന്നും പ്രധാനമന്ത്രി പറഞ്ഞു. ‘ഞങ്ങളുടെ പെണ്‍മക്കളുടെ വിവാഹത്തിന് ശരിയായ പ്രായം തീരുമാനിക്കുന്നതിനുള്ള ചര്‍ച്ചകള്‍ നടക്കുന്നുണ്ട്. ബന്ധപ്പെട്ട കമ്മിറ്റി എന്തുകൊണ്ട് ഇതുവരെ തീരുമാനം എടുത്തിട്ടില്ലെന്ന് ചോദിച്ച് രാജ്യത്തുടനീളം പെണ്‍മക്കള്‍ എനിക്ക് കത്തെഴുതിയിട്ടുണ്ട്. റിപോര്‍ട്ട് വന്നയുടനെ നടപ്പാക്കും’-മോദി പറഞ്ഞു. ഭക്ഷ്യ-കാര്‍ഷിക ഓര്‍ഗനൈസേഷനുമായുള്ള ഇന്ത്യയുടെ ദീര്‍ഘകാല ബന്ധത്തിന്റെ 75ാം വാര്‍ഷികത്തോടനുബന്ധിച്ച് 75 രൂപയുടെ സ്മാരക നാണയം പുറത്തിറക്കുന്ന പരിപാടിയില്‍ സംസാരിക്കുകയായിരുന്നു അദ്ദേഹം. പെണ്‍കുട്ടികളുടെ വിവാഹപ്രായം 18ല്‍നിന്ന് 21ലേക്ക് ഉയര്‍ത്താനുള്ള ശ്രമം നടക്കുന്നതായി റിപോര്‍ട്ടുകളുണ്ടായിരുന്നു.

സ്ത്രീകളുടെ ആരോഗ്യവും ശുചിത്വവും പരിപാലിക്കുന്നതിനായി സര്‍ക്കാര്‍ നടപടികള്‍ സ്വീകരിച്ചതായും അദ്ദേഹം പറഞ്ഞു. ‘ഞങ്ങളുടെ പെണ്‍മക്കളുടെ ക്ഷേമത്തിനായി ഞങ്ങള്‍ ഉചിതമായ നടപടികള്‍ സ്വീകരിക്കുന്നു. ജല്‍ ജീവന്‍ മിഷനിലൂടെ എല്ലാ വീടുകളിലും വെള്ളം ലഭ്യമാക്കാനുള്ള പ്രവര്‍ത്തനങ്ങള്‍ നടക്കുന്നുണ്ട്. ഒരു രൂപയ്ക്കു സാനിറ്ററി പാഡ് നല്‍കുന്നുണ്ട്’-അദ്ദേഹം പറഞ്ഞു.

വിവാഹ പ്രായവും മാതൃത്വവും തമ്മിലുള്ള പരസ്പരബന്ധം പരിശോധിക്കാന്‍ ഒരു ടാസ്‌ക് ഫോഴ്സ് രൂപീകരിച്ചിട്ടുണ്ടെന്ന് കേന്ദ്ര സര്‍ക്കാര്‍ സപ്റ്റംബര്‍ 22 ന് വ്യക്തമാക്കിയിരുന്നു.’ആരോഗ്യം, മെഡിക്കല്‍ ക്ഷേമം, അമ്മയുടെയും നവജാതശിശുവിന്റെയും/ശിശുവിന്റെയും/കുട്ടികളുടെയും പോഷക നിലവാരം, ഗര്‍ഭാവസ്ഥയിലും ജനനത്തിലും അതിനുശേഷവും സംബന്ധിച്ച് പരിശോധിക്കാന്‍ സമിതിയെ നിയോഗിച്ചിട്ടുണ്ട്. ശിശുമരണ നിരക്ക്, മാതൃമരണ നിരക്ക്, ആകെ ഫെര്‍ട്ടിലിറ്റി നിരക്ക്, ജനനസമയത്തെ ലൈംഗിക അനുപാതം, ശിശു ലൈംഗിക അനുപാതം, ആരോഗ്യവും പോഷകാഹാരവുമായി ബന്ധപ്പെട്ട മറ്റ് പ്രസക്തമായ കാര്യങ്ങള്‍ എന്നിവയെല്ലാം പരിശോധിക്കുന്നതായി കേന്ദ്ര വനിതാ ശിശു വികസന മന്ത്രി സ്മൃതി ഇറാനി കഴിഞ്ഞ പാര്‍ലമെന്റ് സമ്മേളനത്തില്‍ രാജ്യസഭാ എംപി സുശീല്‍ കുമാര്‍ ഗുപ്തയ്ക്ക് രേഖാമൂലം നല്‍കിയ മറുപടിയില്‍ വ്യക്തമാക്കിയിരുന്നു. നിലവില്‍ 18 വയസുള്ള സ്ത്രീകളുടെ നിയമപരമായ വിവാഹ പ്രായം സര്‍ക്കാര്‍ പുനര്‍വിചിന്തനം ചെയ്യുന്നത് വസ്തുതയാണോ എന്ന ചോദ്യത്തിനായിരുന്നു മറുപടി.

The post പെണ്‍കുട്ടികളുടെ വിവാഹ പ്രായം ഉയര്‍ത്തുന്നതു സംബന്ധിച്ച സര്‍ക്കാര്‍ തീരുമാനം ഉടൻ appeared first on Valanchery Online.

വിവാഹനിശ്ചയ വേദിയിൽ വച്ച് ദുരിതാശ്വാസനിധിയിലേക്ക് സംഭാവന നൽകി രഞ്ചിമയും പ്രസൂണും

വളാഞ്ചേരിക്കാരൻ — Sun, 18 Aug 2019 10:20:37 +0000

വളാഞ്ചേരി: ജീവിതത്തിലെ പ്രധാന നാഴികകല്ല് വരനും വധുവും താണ്ടുന്നത് മഹത്തരമായ കർമ്മം നിർവഹിച്ച്. പ്രളയം മൂലം തകർന്ന കേരളത്തിന്റെ പുനർനിർമ്മിതിക്ക് മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭവന കൈമാറിയാണ് രഞ്ചിമയും പ്രസൂണും തങ്ങളുടെ വിവാഹ നിശ്ചയത്തിനൊരുങ്ങുന്നത്.

പൈങ്കണ്ണൂർ വാര്യത്തൊടി രവീന്ദ്രൻ-പ്രേമ ദമ്പതികളുടെ മകൾ രഞ്ചിമയും ആമ്പല്ലൂർ സ്വദേശി വേണു-പ്രസന്ന ദമ്പതികളുടെ മകൻ പ്രസൂണും തമ്മിലുള്ള വിവാഹനിശ്ചയമാണ് ഇന്ന് വധൂഗൃഹത്തിൽ വച്ച് നടന്നത്. ഇരുവരും ചേർന്ന് തങ്ങളുടെ സംഭാവന സി.പി.ഐ.എം ജില്ലാ സെക്രട്ടേറിയറ്റ് അംഗം വി.പി സക്കറിയക്ക് കൈമാറി. വളാഞ്ചേരി നഗരസഭ പ്രതിപക്ഷ നേതാവ് ടി.പി അബ്ദുൾ ഗഫൂർ, എടയൂർ പഞ്ചായത്ത് പ്രസിഡന്റ് രാജീവ് മാസ്റ്റർ മറ്റ് നേതാക്കൾ തുടങ്ങിയവർ ചടങ്ങിൽ സന്നിഹിതരായിരുന്നു.

The post വിവാഹനിശ്ചയ വേദിയിൽ വച്ച് ദുരിതാശ്വാസനിധിയിലേക്ക് സംഭാവന നൽകി രഞ്ചിമയും പ്രസൂണും appeared first on Valanchery Online.

കല്യാണപ്പെണ്ണ് ഒളിച്ചോടി; സുഹൃത്തുക്കൾക്ക് ബിരിയാണി വിളമ്പി വരൻ-വീഡിയോ

രാജേഷ് വി അമല — Thu, 11 Oct 2018 00:06:35 +0000

വളാഞ്ചേരി: ഒൻപത് വർഷത്തോളം പരസ്പരം പ്രണയിച്ച് നിശ്ചയമുറപ്പിച്ച പെൺകുട്ടി മറ്റൊരു യുവാവുമായി ഒളിച്ചോടിയതിൽ സുഹൃത്തുക്കൾക്ക് വിരുന്നൊരുക്കി പൊന്നാനി സ്വദേശിയായ വരൻ.പൊന്നാനി സ്വദേശി സ്വാലിഹും തെക്കപ്പുറം സ്വദേശിനിയായ യുവതിയും തമ്മിൽ ഒൻപത് വർഷമായി പ്രണയത്തിലായിരുന്നു.

ശേഷം ഇരുവരുടെയും നിക്കാഹ് നടക്കുകയും വിവാഹത്തിന് ഒരു വർഷം ഇടയും നൽകി.ശേഷം വരൻ വിദേശത്തേക്ക് മടങ്ങി. തുടർന്നായിരുന്നു പൊന്നാനി വണ്ടിപ്പേട്ട സ്വദേശിയായ മറ്റൊരു യുവാവുമായി യുവതി അടുപ്പത്തിലായത്.തുടർന്ന് കഴിഞ്ഞ ദിവസം ഇരുവരും വയനാട്ടിലേക്ക് ഒളിച്ചോടുകയും ശേഷം പൊന്നാനി പൊലീസ് തിരികെ കൊണ്ടുവരികയും ചെയ്തിരുന്നു.സംഭവത്തോടുള്ള പ്രതികരണമായാണ് വരൻ സുഹൃത്തുക്കൾക്കും സഹോദരങ്ങൾക്കും ഭക്ഷണം നൽകി ആഘോഷിക്കുന്നതെന്ന് സമൂഹമാധ്യമങ്ങളിൽ പരക്കുന്ന വിഡിയോ ദൃശ്യത്തിൽ സുഹൃത്തുക്കൾ പറയുന്നു.

The post കല്യാണപ്പെണ്ണ് ഒളിച്ചോടി; സുഹൃത്തുക്കൾക്ക് ബിരിയാണി വിളമ്പി വരൻ-വീഡിയോ appeared first on Valanchery Online.