auction Archives - Valanchery Online

തവനൂർ വഞ്ചിനാട് ലെതേഴ്സ് ഭൂമി ലേലം മരവിപ്പിക്കണം -എംപ്ളോയീസ് കോ-ഓർഡിനേഷൻ കമ്മിറ്റി

വളാഞ്ചേരിക്കാരൻ — Wed, 26 Apr 2023 03:58:26 +0000

തവനൂർ: വഞ്ചിനാട് ലെതേഴ്സ് കമ്പനിയുടെ ഭൂമി സ്വകാര്യ ഭൂമികച്ചവട കമ്പനിക്ക് ലേലംചെയ്ത നടപടി മരവിപ്പിക്കണമന്ന് വഞ്ചിനാട് ലെതേഴ്സ് എംപ്ളോയീസ് കോ-ഓർഡിനേഷൻ കമ്മിറ്റി നേതാക്കൾ പത്രസമ്മേളനത്തിൽ ആവശ്യപ്പെട്ടു. നിലവിൽ 100 കോടിയിൽപ്പരം രൂപ ലഭിക്കാവുന്ന 16.5 ഏക്കർ ഭൂമി 19 കോടിക്കാണ് ഡെബിറ്റ് റിക്കവറി ട്രൈബ്യൂണൽ കൊല്ലത്തെ ഒരു സ്വകാര്യ ഭൂമിയിടപാട് കമ്പനിക്ക് ലേലത്തിൽ നൽകിയത്.

ഭൂമി കെ.എസ്.ഐ.ഡി.സി. ഏറ്റെടുത്ത് തൊഴിലാളികൾക്ക് നൽകുവാനുള്ള ശമ്പളക്കുടിശ്ശിക അടക്കമുള്ള ആനുകൂല്യങ്ങളും തൊഴിൽ നഷ്ടമായതിനുള്ള നഷ്ടപരിഹാരവും നൽകണമെന്ന് നേതാക്കൾ ആവശ്യപ്പെട്ടു. കെ.എസ്.ഐ.ഡി.സി.യുടെ നേതൃത്വത്തിൽ സ്വകാര്യ വ്യക്തികളുടേയും ധനകാര്യ സ്ഥാപനങ്ങളുടേയും പങ്കാളിത്തത്തോടെ 1976-ൽ ആരംഭിച്ച വഞ്ചിനാട് തുകൽ ഫാക്ടറി 1988-ൽ പ്രവർത്തനം നിർത്തുകയായിരുന്നു.

1967-ൽ ജയിൽ വകുപ്പ് സബ് ജയിൽ സ്ഥാപിക്കാനായി ദേശീയ പാതയോരത്ത് വാങ്ങിയ ഭൂമിയിൽനിന്ന് 1974-ൽ ആണ് 13.24 ഏക്കർ ഭൂമി വ്യവസായവകുപ്പിന് തുകൽഫാക്ടറി ആരംഭിക്കാൻ വിട്ടുനൽകിയത്. മൂന്നര ഏക്കറോളം ഭൂമി മാത്രമാണ് കമ്പനി പണംമുടക്കി വാങ്ങിയത്. ജയിൽവകുപ്പ് സൗജന്യമായി നൽകിയ 13.24 ഏക്കർ ഭൂമി ഉൾപ്പെടെയാണ് ഇപ്പോൾ സ്വകാര്യ കമ്പനിക്ക് ലേലത്തിൽ നൽകിയിരിക്കുന്നത്. ലേലത്തിൽ ഭൂമി ലഭിച്ച സ്വകാര്യ കമ്പനി ഇതിനകം ഫാക്ടറി ഭൂമിയിൽനിന്ന്‌ ലക്ഷക്കണക്കിന് രൂപയുടെ മരങ്ങൾ മുറിച്ചുകൊണ്ടുപോയതായും നേതാക്കൾ ആരോപിച്ചു.

ലേലം റദ്ദ് ചെയ്യണമെന്ന ആവശ്യം മുഖ്യമന്ത്രി ഉൾപ്പെടെയുള്ളവരെ നേരിൽക്കണ്ട് ഉന്നയിക്കുമെന്നും നേതാക്കൾ പറഞ്ഞു. ഭൂമി സർക്കാർ ഏറ്റെടുത്ത് തൊഴിൽ സംരഭങ്ങൾ ആരംഭിക്കണമെന്നും കമ്പനി തൊഴിലാളികളുടെ ആനുകൂല്യങ്ങൾ നൽകണമെന്നും ആവശ്യപ്പെട്ട് ഹൈക്കോടതിയെ സമീപിക്കുമെന്നും നേതാക്കൾ പറഞ്ഞു. ചെയർമാൻ പി. ജ്യോതി, കൺവീനർ ടി.പി. കുഞ്ഞുകുട്ടൻ, കെ. രാംദാസ്, കെ.ടി. സിദ്ദിഖ്, എ.എം. നാരായണൻ, പി. രാമചന്ദ്രൻ തുടങ്ങിയവർ പത്രസമ്മേളനത്തിൽ പങ്കെടുത്തു.

The post തവനൂർ വഞ്ചിനാട് ലെതേഴ്സ് ഭൂമി ലേലം മരവിപ്പിക്കണം -എംപ്ളോയീസ് കോ-ഓർഡിനേഷൻ കമ്മിറ്റി appeared first on Valanchery Online.

മലപ്പുറം എക്‌സൈസ് സ്‌പെഷ്യല്‍ സ്‌ക്വാഡ് ഓഫീസില്‍ വാഹന ലേലം ഏപ്രില്‍ 27ന്

വളാഞ്ചേരിക്കാരൻ — Wed, 14 Apr 2021 05:36:58 +0000

മലപ്പുറം എക്‌സൈസ് ഡിവിഷനിലെ വിവിധ അബ്കാരി /എന്‍.ഡി.പി.എസ് കേസുകളില്‍ ഉള്‍പ്പെട്ട് സര്‍ക്കാരിലേക്കു കണ്ടുകെട്ടിയ 136 വാഹനങ്ങള്‍ മലപ്പുറം എക്‌സൈസ് സ്‌പെഷ്യല്‍ സ്‌ക്വാഡ് ഓഫീസില്‍ ഏപ്രില്‍ 27ന് രാവിലെ 9.30ന് ലേലം ചെയ്യും. കൂടുതല്‍ വിവരങ്ങള്‍ ജില്ലയിലെ എല്ലാ എക്‌സൈസ് ഓഫീസുകളില്‍ നിന്നും ലഭിക്കും. ഫോണ്‍:0483 2734886.

The post മലപ്പുറം എക്‌സൈസ് സ്‌പെഷ്യല്‍ സ്‌ക്വാഡ് ഓഫീസില്‍ വാഹന ലേലം ഏപ്രില്‍ 27ന് appeared first on Valanchery Online.

വളാഞ്ചേരി പോലീസ് സ്റ്റേഷനിൽ സൂക്ഷിച്ച പഴയ മോട്ടോർ സൈക്കിളുകളുടെ ലേലം 8ന്

വളാഞ്ചേരിക്കാരൻ — Thu, 04 Feb 2021 08:23:03 +0000

വളാഞ്ചേരി: വളാഞ്ചേരി പോലീസ് സ്റ്റേഷനിൽ സൂക്ഷിച്ച പഴയ മോട്ടോർ സൈക്കിളുകളുടെ ലേലം 8ന്. ഉപയോഗശൂന്യമായ 16 മോട്ടോർ സൈക്കിളുകളാണ് തിങ്കളാഴ്ച രാവിലെ 10 :00 മണിക്ക് വളാഞ്ചേരി കാവുംപുറം സാഗർ ഓഡിറ്റോറിയത്തിൽ വെച്ച് പരസ്യമായി ലേലം ചെയ്യുന്നതണ്. 16 മോട്ടോർ സൈക്കിളുകൾ ഒരു ലോട്ട് ആയിട്ടാണ് ലേലം ചെയ്യുന്നത്. വിശദ വിവരങ്ങൾക്ക്: 04942644343

The post വളാഞ്ചേരി പോലീസ് സ്റ്റേഷനിൽ സൂക്ഷിച്ച പഴയ മോട്ടോർ സൈക്കിളുകളുടെ ലേലം 8ന് appeared first on Valanchery Online.

കുറ്റിപ്പുറം പഞ്ചായത്തിലെ ക്രമക്കേടുകൾ; നടപടിക്ക് ശുപാർശ

വളാഞ്ചേരിക്കാരൻ — Sun, 22 Jul 2018 14:14:24 +0000

കുറ്റിപ്പുറം: കഴിഞ്ഞദിവസങ്ങളിൽ ധനകാര്യ രഹസ്യവിഭാഗം പഞ്ചായത്തിൽ നടത്തിയ പരിശോധനയിൽ കണ്ടെത്തിയത് ഗുരുതര ക്രമക്കേടുകൾ. കുറ്റക്കാർക്കെതിരേ നടപടിയെടുക്കാൻ ധനകാര്യവകുപ്പ് ശുപാർശ ചെയ്തു.

രണ്ട് മുൻ സെക്രട്ടറിമാർ, മുൻ അസി. എൻജിനീയർ, രണ്ട് താത്കാലിക ജീവനക്കാർ എന്നിവരുൾപ്പെടെ ഏഴുപേർക്കെതിരേയാണ് നടപടിയ്ക്ക് ശുപാർശ ചെയ്തിട്ടുള്ളത്. ക്രമക്കേടുകൾക്ക് കൂട്ടുനിന്ന ഭരണപക്ഷത്തെ രണ്ട് അംഗങ്ങൾക്കെതിരേ നടപടി സ്വീകരിക്കാൻ തിരഞ്ഞെടുപ്പ് കമ്മിഷനോട് ശുപാർശചെയ്യുമെന്നും സൂചനയുണ്ട്.

പഞ്ചായത്തിന് കീഴിലുള്ള ബങ്കുകളുടെ നടത്തിപ്പിലും ലേലംചെയ്ത് നൽകിയതിലും ക്രമക്കേടുകൾ കണ്ടെത്തിയിട്ടുണ്ട്. പഞ്ചായത്ത് സെക്രട്ടറിയുടെയും ചില അംഗങ്ങളുടെയും ഒത്താശയോടെയാണ് ഇത് നടത്തിയിട്ടുള്ളതെന്നും പരിശോധാസംഘത്തിന് ബോധ്യപ്പെട്ടിട്ടുണ്ട്. ടെണ്ടർ നടപടിക്രമങ്ങൾ പാലിക്കാതെയാണ് പഞ്ചായത്ത് ഓഫീസിലെ നവീകരണജോലികൾ നടത്തിത്. താത്കാലിക ജീവനക്കാരനെ കൺവീനറാക്കി ചെലവഴിച്ച ലക്ഷങ്ങൾ പഞ്ചായത്ത് സെക്രട്ടറിയിൽനിന്നും അസി. എൻജിനീയറിൽനിന്നും ഈടാക്കാനും ശുപാർശ ചെയ്തിട്ടുണ്ട്. കുടിവെള്ളപദ്ധതിയുടെ പമ്പ്‌സെറ്റ് മാറ്റി സ്ഥാപിച്ചതിൽ ലക്ഷങ്ങളുടെ ക്രമക്കേട് നടന്നതായും കണ്ടെത്തിയിട്ടുണ്ട്.

The post കുറ്റിപ്പുറം പഞ്ചായത്തിലെ ക്രമക്കേടുകൾ; നടപടിക്ക് ശുപാർശ appeared first on Valanchery Online.

കുറ്റിപ്പുറം പഞ്ചായത്തിൽ ധനകാര്യ രഹസ്യ വിഭാഗത്തിന്റെ പരിശോധന; ക്രമക്കേടുകൾ കണ്ടെത്തി

വളാഞ്ചേരിക്കാരൻ — Thu, 19 Jul 2018 01:43:03 +0000

കുറ്റിപ്പുറം: ബങ്കുകൾ ലേലംചെയ്ത് നൽകിയതുൾപ്പെടെയുള്ള കാര്യങ്ങളിൽ ഉയർന്ന പരാതിയുടെ അടിസ്ഥാനത്തിൽ ധനകാര്യ രഹസ്യവിഭാഗം പഞ്ചായത്ത് ഓഫീസിലെത്തി രേഖകൾ പരിശോധിച്ചു. രണ്ടുദിവസങ്ങളിലായി നടത്തിയ പരിശോധനയിൽ ക്രമക്കേടുകൾ കണ്ടെത്തി. ബങ്കുകളുടെ ലേലത്തിനു പുറമെ, കുടിവെള്ള പദ്ധതിയുടെ പമ്പ്‌സെറ്റ് മാറ്റൽ, അനധികൃത നിർമാണം, ഗ്രാമസഭ മിനുട്‌സ് തിരുത്തൽ തുടങ്ങിയ കാര്യങ്ങളിലാണ് പരാതിയുള്ളത്. ബങ്കുകളുടെ ലേലം സുതാര്യമായിരുന്നില്ലെന്നാണ് കണ്ടെത്തൽ. വിദേശത്തുള്ള ആളുടെ പേരിൽ ബങ്ക് ലേലം ഉറപ്പിച്ചതായും കൂടുതൽ സംഖ്യയ്ക്ക് വിളിച്ചയാളെ ഒഴിവാക്കി കുറഞ്ഞ തുകയ്ക്ക്‌ വിളിച്ചയാൾക്ക് ലേലം ഉറപ്പിച്ചതായും കണ്ടെത്തി.

ബിനാമികളുടെ പേരിൽ ഭരണപക്ഷത്തെ ചില അംഗങ്ങൾ ബങ്കുകൾ കൈക്കലാക്കിയതായും ആക്ഷേപമുയർന്നിരുന്നു. പഞ്ചായത്ത് ഓഫീസിലെ നിർമാണത്തിനായി ഏഴുലക്ഷം രൂപ ചെലവഴിച്ചത് ചട്ടവിരുദ്ധമാണെന്ന് കണ്ടെത്തി. ടെൻഡറോ ക്വട്ടേഷനോ ഇല്ലാതെയാണ് കരാർ നൽകിയതെന്ന് പരിശോധനയിൽ കണ്ടെത്തി. ഗ്രാമസഭാ മിനുട്‌സിൽ തിരുത്തലുകൾവരുത്തി വ്യക്തിഗത ഗുണഭോക്താക്കൾക്കുള്ള ആനുകൂല്യങ്ങൾ സ്വന്തക്കാർക്ക് മറിച്ചു നൽകിയതും കണ്ടെത്തിയിട്ടുണ്ട്. ഇതിനെതിരേ സി.പി.എം. അംഗങ്ങൾ പഞ്ചായത്ത് ഡെപ്യൂട്ടി ഡയറക്ടർക്ക് പരാതി നൽകിയെങ്കിലും നടപടിയുണ്ടായില്ല.

The post കുറ്റിപ്പുറം പഞ്ചായത്തിൽ ധനകാര്യ രഹസ്യ വിഭാഗത്തിന്റെ പരിശോധന; ക്രമക്കേടുകൾ കണ്ടെത്തി appeared first on Valanchery Online.

വാശിയേറിയ ഓൺലൈൻ ലേലം; മലപ്പുറത്ത് രണ്ട് കരിങ്കോഴികൾ വിറ്റത് 50000 രൂപയ്ക്ക്!

വളാഞ്ചേരിക്കാരൻ — Sun, 13 May 2018 02:32:14 +0000

മലപ്പുറം : അഖില കേരള കർഷക സ്നേഹികളുടെ (AKKS) പത്തു കാർഷിക വാട്സാപ്പ് ഗ്രൂപുകളിൽ നടത്തിയ സൗഹൃദ ലേലത്തിൽ രണ്ടു കരിംകോഴികള്‍ ലേലത്തിൽ പോയത് 50000 രൂപയ്ക്ക്. ലേലത്തിൽ കിട്ടുന്ന പൂർണ ഫണ്ട്‌ സംഘടനയുടെ അടുത്ത പ്രവർത്തനമായ നോമ്പുതുറ പരുപാടിയിലേക്ക് വിനിയോഗിക്കുമെന്ന് സംസ്ഥാന സെക്രട്ടറി സജീഷ് കോഴിക്കോട് ഗ്രൂപ്പുകളിൽ പ്രഖ്യാപിച്ചതോടെ ഹരം കൂടിയ ഗ്രൂപ്പംഗങ്ങൾ നോമ്പുതുറ ഞങ്ങൾ നടത്തുമെന്ന വാശിയോടെ ലേലം വിളി തുടങ്ങി.

രാത്രി പത്ത് മണിക്ക് ലേലം തീരാൻ രണ്ടു മണിക്കൂർ ബാക്കി നിൽക്കേ AKKS ഗ്രൂപ്പുകളായ ക്ഷീര വിപ്ലവവും,ഇണക്കുരുവി ഗ്രൂപ്പുകളും തമ്മിലായീ അന്തിമപോരാട്ടം. വാശിയേറിയ ലേലത്തിനൊടുവിൽ റാഫി പേരാമ്പ്ര 50000 രൂപയ്ക്ക് രണ്ട് കരിംകോഴികളെ വിളിച്ചെടുക്കുകയായിരുന്നു. മെയ്‌ 27ന് മലപ്പുറം KTDC ഓഡിറ്റോറിയത്തിൽ നടക്കുന്ന മലബാർ നോമ്പുതുറ പരിപാടിയിൽ വെച്ച് ക്ഷീര വിപ്ലവം ഗ്രൂപ്പ്‌ മാനേജർ നിസാർ കോട്ടയം ട്രോഫി ഏറ്റുവാങ്ങുമെന്ന് സംസ്ഥാന കമ്മറ്റി അറിയിച്ചു.

The post വാശിയേറിയ ഓൺലൈൻ ലേലം; മലപ്പുറത്ത് രണ്ട് കരിങ്കോഴികൾ വിറ്റത് 50000 രൂപയ്ക്ക്! appeared first on Valanchery Online.

കോട്ടക്കൽ ബസ് സ്റ്റാന്റ് പരിസരത്ത് പീടിക മുറികൾ ലേലത്തിൽ പോയത് റെക്കോർഡ് തുകയ്ക്ക്

വളാഞ്ചേരിക്കാരൻ — Wed, 27 Dec 2017 07:30:20 +0000

കോട്ടയ്ക്കൽ: നഗരസ്ഭാ ചരിത്രത്തിലെ ഏറ്റവും വലിയ തുകയ്ക്ക് പീടികമുറികൾ ലേലം ചെയ്ത് കോട്ടക്കൽ നഗരസഭ. മാർക്കറ്റ് കവാടത്തിലെ രണ്ട് കടമുറികൾക്കാണ് നഗരസഭയെ ഞെട്ടിച്ച ലേലം അരങ്ങേറിയത്. രണ്ട് മുറികൾക്കായിരുന്നു ലേലം നിശ്ചയിച്ചിരുന്നത്. ഒരു മുറിക്ക് 1.25 കോടിയും മറ്റൊന്നിന് 1.55 കോടിയുമാണ് ലേലം ഉറപ്പിച്ചത്. പത്തിലധികം പേരാണ് ലേലത്തിനെത്തിയത്. 20 ലക്ഷത്തിൽ നിന്നാണ് കോടികളിലേക്ക് ലേലത്തുക ഉയർന്നത്. കോട്ടക്കൽ മാർക്കറ്റിലെ വ്യാപാരികളാണ് കടമുറികൾ ലേലത്തിനെടുത്തത്. വാശിയേറിയ ലേലത്തിനൊടുവിൽ ലേലത്തുക കോടിയിലെത്തിയത് ഏവരെയും അമ്പരപ്പിച്ചു കഴിഞ്ഞു. തുക നഗരസഭയുടെ ഫണ്ടിലേക്ക് ഉപയോഗിക്കുമെന്നും ബസ്‌റ്റാന്റ് കം ഷോപ്പിങ്ങ് കോമ്പ്ലക്സിന്റെ പ്രവൃത്തിയിലേക്ക് ഇത് മുതൽ‌കൂട്ടാകുമെന്ന് നഗരസഭാധ്യക്ഷൻ പറഞ്ഞു.

സെക്രട്ടറിയുടെ നേതൃത്വത്തിൽ ആയിരുന്നു ലേലനടപടികൾ നടന്നത്.

The post കോട്ടക്കൽ ബസ് സ്റ്റാന്റ് പരിസരത്ത് പീടിക മുറികൾ ലേലത്തിൽ പോയത് റെക്കോർഡ് തുകയ്ക്ക് appeared first on Valanchery Online.

കുറ്റിപ്പുറം ടൗണിലെ ശുചിമുറിയുടെ ലേലം 22ന്

വളാഞ്ചേരിക്കാരൻ — Sun, 10 Sep 2017 14:21:31 +0000

കുറ്റിപ്പുറം ∙ രണ്ടുവർഷത്തോളമായി അടഞ്ഞുകിടക്കുന്ന കുറ്റിപ്പുറം ടൗണിലെ ശുചിമുറി ഉടൻ പ്രവർത്തനമാരംഭിക്കും. ബസ് സ്റ്റാൻഡ് പരിസരത്ത് നേരത്തേയുണ്ടായിരുന്ന പഞ്ചായത്ത് ശുചിമുറിയാണ് അറ്റകുറ്റപ്പണിക്കുശേഷം തുറന്നുകൊടുക്കുന്നത്. മാലിന്യം പുറത്തേക്ക് ഒഴുകിയതിനെ തുടർന്ന് കോടതിയുടെ നിർദേശപ്രകാരമാണ് ശുചിമുറി പഞ്ചായത്ത് അടച്ചുപൂട്ടിയത്. നിലവിൽ നിയമനടപടികൾ പൂർത്തിയാക്കിയാണ് ശുചിമുറി തുറന്നുനൽകുന്നതെന്ന് ബന്ധപ്പെട്ടവർ അറിയിച്ചു. ശുചിമുറിയുടെ ഒരു വർഷത്തെ നടത്തിപ്പിനായുള്ള ലേലം 22ന് 11ന് പഞ്ചായത്ത് ഓഫിസിൽ നടക്കും.

Save

The post കുറ്റിപ്പുറം ടൗണിലെ ശുചിമുറിയുടെ ലേലം 22ന് appeared first on Valanchery Online.