acquiring Archives - Valanchery Online

ദേശീയപാത: നഷ്ടപരിഹാരം ജൂൺ അവസാനം പ്രഖ്യാപിക്കും

വളാഞ്ചേരിക്കാരൻ — Fri, 27 Apr 2018 02:01:13 +0000

കോട്ടക്കൽ: ദേശീയപാത വികസനത്തിെൻറ പേരിൽ കുടിയൊഴിക്കപ്പെടുന്നവർക്കുള്ള നഷ്ടപരിഹാരം ജൂൺ അവസാനം പ്രഖ്യാപിക്കുമെന്ന് ഡെപ്യൂട്ടി കലക്ടർ ഡോ. ജെ.ഒ. അരുൺ അറിയിച്ചു. നവംബറിൽ ഫണ്ട് വിതരണം പൂർത്തിയാക്കിയ ശേഷം ഭൂമി ദേശീയപാത അതോറിറ്റിക്ക് കൈമാറാനാണ് തീരുമാനം. 2012ലെ ടൈപ്പ് ഫോർ കാറ്റഗറിയിൽ കെട്ടിടങ്ങൾക്ക് 12,800 രൂപയാണ് നിശ്ചയിച്ചിരുന്നത്. ഈ തുകയുടെ 40 ശതമാനം ഉയർത്തി 17,920 രൂപയാക്കി. വീടിനുള്ളിൽ പൈപ്പ് അടക്കമുള്ളവക്ക് 2150.40 രൂപ, വൈദ്യുതിയുള്ളവക്ക് 2240 എന്നിങ്ങനെയാണ് കണക്കുകൾ. ഈ തുക കൂട്ടി ലഭിക്കുന്ന തുകയുടെ നൂറു ശതമാനമടക്കം നൽകാനാണ് നിർദേശം. 1000 ചതുരശ്ര അടി വിസ്തീർണമുള്ള കോൺക്രീറ്റ് കെട്ടിടത്തിന് (വീട്) 41.45 ലക്ഷം രൂപയാണ് ലഭിക്കുക. എന്നാൽ, പൊതുമരാമത്ത് വകുപ്പാണ് വില നിർണയിച്ച് തിട്ടപ്പെടുത്തേണ്ടത്. തിരൂർ താലൂക്കിലെ ഭൂമി, മരങ്ങൾ, കാർഷിക വിളകൾ എന്നിവയുടെ കണക്കുകൾ ഈ മാസത്തോടു കൂടി പൂർത്തിയാകും. തുടർന്ന് തിരൂരങ്ങാടി, കൊണ്ടോട്ടി, താലൂക്കുകളിലെ നടപടികൾ ആരംഭിക്കും.

ഇതുവരെ പൊന്നാനി താലൂക്ക് ഒഴികെ 1928 പരാതികളാണ് എത്തിയത്. ഇതിെൻറ വിചാരണ മേയ് എട്ടിന് പൂർത്തിയാക്കും. ശേഷം പൊന്നാനിയിലെ വിചാരണ ആരംഭിക്കും. 362 പരാതികളാണ് പൊന്നാനിയിൽനിന്ന് ഇതുവരെ എത്തിയത്. ദേശീയ അതോറിറ്റിയുടെ അഭിപ്രായങ്ങൾ തേടിയാകും അവസാന നടപടികൾ.

The post ദേശീയപാത: നഷ്ടപരിഹാരം ജൂൺ അവസാനം പ്രഖ്യാപിക്കും appeared first on Valanchery Online.

പാലച്ചിറമാട് ബൈപാസ്; അഡ്വ. ശബീന ബീഗം നിരാഹാരം അവസാനിപ്പിച്ചു

വളാഞ്ചേരിക്കാരൻ — Wed, 11 Apr 2018 19:47:33 +0000

സ്വാഗതമാട്: വയൽനികത്തി സ്വാഗതമാട്–പാലച്ചിറമാട് ബൈപാസ് റോഡ് നിർമിക്കാനുള്ള നീക്കം ഉപേക്ഷിക്കണമെന്നാവശ്യപ്പെട്ട് പാടശേഖര സമിതിയുടെ നേതൃത്വത്തിൽ കഴിഞ്ഞ 11 ദിവസങ്ങളായി ചൂരപ്പുലാക്കൽ ഷബീന നടത്തിയ നിരാഹാരസമരം ഇന്നലെ രാത്രി അവസാനിപ്പിച്ചു. മന്ത്രി ജി.സുധാകരന്റെ സാന്നിധ്യത്തിൽ തിരുവനന്തപുരത്തു നടന്ന ജനപ്രതിനിധികളുടെയും ഉദ്യോഗസ്ഥരുടെയും യോഗത്തിലെ തീരുമാനത്തിന്റെ പശ്ചാത്തലത്തിലാണ് സമരം അവസാനിപ്പിച്ചതെന്ന് സമരസമിതി ഭാരവാഹികൾ അറിയിച്ചു.

സമര പന്തലിലെത്തിയ കോൺ‌ഗ്രസ് സംസ്ഥാന അധ്യക്ഷൻ എം.എം ഹസ്സൻ, ലീഗ് നേതാവ് അബ്ദുറഹിമാൻ രണ്ടത്താണി എന്നിവരുടെ സാന്നിധ്യത്തിലാ‍ണ് ശബീന നിരാഹാരം അവസാനിപ്പിച്ചത്.
സ്ഥലമെടുപ്പുമായി ബന്ധപ്പെട്ട് തർക്കമുണ്ടായ സ്ഥലങ്ങളിൽ വീണ്ടും പരിശോധന നടത്തും. 2013-ൽ ദേശീയപാത അതോറിറ്റി അംഗീകരിച്ച അലൈൻമെൻറും ഇപ്പോഴത്തെ അലൈൻമെൻറും പരിശോധിച്ച് ഏതാണ് അനുയോജ്യമെന്ന് കണ്ടെത്താനും യോഗത്തിൽ ധാരണയായി. ഇരു അലൈൻമൻറുകളും പരിശോധിക്കാൻ നാഷനൽ ഹൈവേ അതോറിറ്റിക്ക് നിർദേശവും നൽകി.

The post പാലച്ചിറമാട് ബൈപാസ്; അഡ്വ. ശബീന ബീഗം നിരാഹാരം അവസാനിപ്പിച്ചു appeared first on Valanchery Online.

ദേശീയപാതാവികസനം: ഭൂവുടമകളുടെ പരാതികേട്ട് ആബിദ് ഹുസൈന്‍ തങ്ങള്‍ എം.എല്‍.എ.

വളാഞ്ചേരിക്കാരൻ — Wed, 11 Apr 2018 00:08:29 +0000

വളാഞ്ചേരി: ദേശീയപാതാവികസത്തിന് സ്ഥലം ഏറ്റെടക്കുന്നതുമായി ബന്ധപ്പെട്ട് ഭൂമി നഷ്ടപ്പെട്ടവരുടെ പരാതികള്‍ ആബിദ് ഹുസൈന്‍ തങ്ങള്‍ എം.എല്‍.എ. കേട്ടു. വളാഞ്ചേരി നഗരസഭയിലും കുറ്റിപ്പുറം ഗ്രാമപ്പഞ്ചായത്തിലുമുള്ളവരെ കണ്ട് എം.എല്‍.എ. പ്രയാസങ്ങള്‍ ചോദിച്ചറിഞ്ഞു. വളാഞ്ചേരി വടക്കുംമുറിയി മേഖലയിലെത്തിയ എം.എല്‍.എയ്‌ക്കൊപ്പം നഗരസഭാധ്യക്ഷ എം. ഷാഹിന, കൗണ്‍സിലര്‍മാരായ ഇ.പി. യഹ്യ, ടി.പി. രഘുനാഥ്, അഷറഫ് അമ്പലത്തിങ്ങല്‍, സലാം വളാഞ്ചേരി, പി.പി. ഷാഫി, മുഹ്‌സിന്‍ വടക്കുംമുറി എന്നിവരുമുണ്ടായിരുന്നു.

കുറ്റിപ്പുറത്ത് യു.ഡി.എഫ്. ചെയര്‍മാന്‍ പാറയ്ക്കല്‍ ബഷീര്‍, കണ്‍വീനര്‍ പരപ്പാര സിദ്ദിഖ്, ചന്ദ്രന്‍, കെ.പി. അലി, അഷ്‌റഫ്, അബ്ബാസ് മുസ്ലിയാര്‍ എന്നിവര്‍ എം.എല്‍.എയ്‌ക്കൊപ്പം വിവിധ സ്ഥലങ്ങള്‍ സന്ദര്‍ശിച്ചു. ബുധനാഴ്ച തിരുവനന്തപുരത്ത് ചേരുന്ന സര്‍വകക്ഷിയോഗത്തിന് മുന്നോടിയായാണ് ആബിദ് ഹുസൈന്‍ തങ്ങള്‍ എം.എല്‍.എ. ദേശീയപാതാ സ്ഥലമെടുപ്പുമായി ബന്ധപ്പെട്ട് ആശങ്കയില്‍ കഴിയുന്നവരുടെ പ്രയാസങ്ങള്‍ കേള്‍ക്കാന്‍ നേരിട്ടെത്തിയത്.

The post ദേശീയപാതാവികസനം: ഭൂവുടമകളുടെ പരാതികേട്ട് ആബിദ് ഹുസൈന്‍ തങ്ങള്‍ എം.എല്‍.എ. appeared first on Valanchery Online.

45 മീറ്ററിൽ ടോൾപ്ലാസകൾ നിർമ്മിക്കണമെന്ന് സർക്കാർ; കഴിയില്ലെന്ന് ദേശീയപാത അധികൃതർ

വളാഞ്ചേരിക്കാരൻ — Sat, 31 Mar 2018 01:39:56 +0000

കുറ്റിപ്പുറം: ദേശീയപാത ടോൾപ്ലാസകൾ 45 മീറ്ററിനുള്ളിൽ നിർമ്മിക്കണമെന്നുറച്ച് സർക്കാർ എന്നാൽ കേരളത്തിൽ മാത്രം ഇത്തരത്തിൽ ചെയ്യാനാകില്ലെന്ന് ദേശീയപാത അധികൃതർ അറിയിച്ചു. രാജ്യത്താകെ പാതകളിലെ ടോൾപ്ലാസകൾ നിർമ്മിക്കുന്നത് ഒരേ മാതൃകയിലാണെന്നാണ് ദേശീയപാത അധികൃതരുടെ വാദം.

സ്ഥലം ഏറ്റെടുക്കുന്നതുമായി ബന്ധപ്പെട്ട് ജില്ലാ കലക്ടർമാർ, ഡെപ്യൂട്ടി കലക്ടർ (എൽ.എ.എൻ.എച്ച്) തുടങ്ങിയ ഉന്നത ഉദ്യോഗസ്ഥരും ദേശീയപാത അധികൃതരും അടങ്ങിയ യോഗത്തിലാണ് ഏറ്റെടുക്കുന്ന 45 മീറ്ററിനുള്ളിൽ ടോൾ പ്ലാസകൾ നിർമ്മിക്കണമെന്ന് സർക്കാർ അറിയിച്ചത്. ടോൾപ്ലാസകൾ നിർമ്മിക്കുന്ന സ്ഥലങ്ങളിൽ സർവ്വീസ് റോഡുകൾ വേണ്ടതില്ലെന്നും സർക്കാർ പ്രതിനിധികൾ അറിയിച്ചു. എന്നാൽ ടോൾ പ്ലാസകൾ നിർമ്മിക്കുന്നയിടങ്ങളിൽ 60 മീറ്ററിൽ കുറയാത്ത സ്ഥലം വേണമെന്നാണ് ദേശീയപാത അധികൃതരുടെ നിലപാട്.

3.5 മീറ്റർ വീതിയിലാണ് ഓരോ റോഡുകളും നിർമ്മിക്കുന്നത്. ഇത്തരത്തിൽ 14 മീറ്റർ വീതി മാത്രമാണ് റോഡ് നിർമ്മിക്കാനാവശ്യം. ടോൾപ്ലാസകൾ വരുന്ന സ്ഥലങ്ങളിൽ ആധുനിക രീതിൽ താത്കാലിക ഇടത്താവളങ്ങൾ ഒരുക്കേണ്ടതുണ്ട്. സർക്കാർ ഭൂമിയുള്ള സ്ഥലങ്ങൽ ഇവ ഉൾപ്പെടാതെയാണ് പലയിടങ്ങളിലും 45 മീറ്റർ അളന്ന് കല്ലിടുന്നത്.

കുറ്റിപ്പുറം റെയിൽവെ മേൽപാലത്തിന് ശേഷം ദർഗ സംരക്ഷണമെന്ന പേരിൽ ഇടത് വശം ചേർന്ന് പോകുന്ന റോഡ് സർക്കാർ ഭൂമിയായ കിൻഫ്രാ പാർക്കെത്തുമ്പോൾ വലത് വശം ചേർന്നാണ് പോകുന്നത്. ഇവിടെയുള്ള ഏക്കർ കണക്കിന് സർക്കാർ ഭൂമിയിൽ തൊടാതെ സ്വകാര്യവ്യകതികളുടെ ഭൂമിയിലൂടെ പാത കൊണ്ട് പോകുന്നതിലും ദുരൂഹതയുണ്ടെന്നാണാക്ഷേപം.

ഓരോ 60 കിലോമീറ്റർ ദൂരത്തിലാണ് ടോൾപ്ലാസകൾ നിർമ്മിക്കുകയെന്നും ഇവ എവിടെയെല്ലാമാണ് നിർമ്മിക്കാനുദ്യേശിക്കുന്നതെന്ന് തീരുമാനിച്ചിട്ടില്ലെന്നും ദേശീയപാത പ്രജക്ട് ഓഫീസർ നിർമൽ പറഞ്ഞു. ടോൾപ്ലാസകൾ നിർമ്മിക്കുന്ന സ്ഥലങ്ങളിൽ കുറഞ്ഞത് 60 മീറ്റർ വീതിവേണമെന്നും ഇക്കാര്യം പിന്നീട് ചർച്ചചെയ്യുമെന്നും അദ്ദേഹം പറഞ്ഞു.

The post 45 മീറ്ററിൽ ടോൾപ്ലാസകൾ നിർമ്മിക്കണമെന്ന് സർക്കാർ; കഴിയില്ലെന്ന് ദേശീയപാത അധികൃതർ appeared first on Valanchery Online.

ദേശീയപാത 45 മീറ്ററില്‍ തന്നെ: ഭൂമിയേറ്റെടുക്കല്‍ നടപടി ഉടന്‍

വളാഞ്ചേരിക്കാരൻ — Thu, 07 Dec 2017 03:21:34 +0000

മലപ്പുറം: ദേശീയപാത 66 ഇടിമുഴിക്കല്‍ മുതല്‍ കാപ്പിരിക്കാടുവരെ വീതികൂട്ടി നവീകരിക്കാന്‍ സ്ഥലമേറ്റെടുക്കാന്‍ ഉടന്‍ നടപടിയാരംഭിക്കും. റോഡിന്റെ കരട് രൂപരേഖയ്ക്ക് പൊതുമരാമത്ത് വകുപ്പ് അംഗീകാരം നല്‍കി. ഇനി ദേശീയപാതാ അതോറിറ്റി തുടര്‍ നടപടിയെടുക്കണം.

നാല്‍പ്പത്തിയഞ്ചുമീറ്റര്‍ വീതിയില്‍ ദേശീയപാത നവീകരിക്കാന്‍ നടപടിയാരംഭിച്ചിട്ട് വര്‍ഷങ്ങളായെങ്കിലും വിവിധ കാരണങ്ങളാല്‍ മെല്ലെപ്പോക്കായിരുന്നു. ഇടിമുഴിക്കല്‍മുതല്‍ കാപ്പിരിക്കാടുവരെ 76.60 കിലോമീറ്ററാണ് മലപ്പുറം ജില്ലയിലൂടെ കടന്നുപോകുന്നത്. 2009-ല്‍ അലൈന്‍മെന്റ് നിശ്ചയിച്ചിരുന്നു. മെയ് ആറിന് ജനപ്രതിനിധികളുമായുള്ള ചര്‍ച്ചക്കുശേഷം തയാറാക്കിയ പുതുക്കിയ അലൈന്‍മെന്റ് ജൂലൈയില്‍ കലക്ടര്‍ പൊതുമരാമത്ത് വകുപ്പിന് സമര്‍പ്പിച്ചിരുന്നു. വിശദപഠനത്തിനുശേഷം ഇതിന് നവംബര്‍ 10ന് സര്‍ക്കാര്‍ അംഗീകാരംനല്‍കി. കഴിഞ്ഞദിവസം മലപ്പുറം കലക്ടറേറ്റില്‍ കലക്ടര്‍ അമിത് മീണയുടെ സാന്നിധ്യത്തില്‍ ചേര്‍ന്ന ദേശീയപാത- പൊതുമരാമത്ത് വകുപ്പ് അധികൃതരുടെ യോഗം തുടര്‍ നടപടി ചര്‍ച്ചചെയ്തു.

കൊണ്ടോട്ടി, തിരൂര്‍, തിരൂരങ്ങാടി, പൊന്നാനി താലൂക്കുകളിലായി 24 വില്ലേജുകളിലൂടെയാണ് മലപ്പുറം ജില്ലയില്‍ എന്‍എച്ച് 17 കടന്നുപോകുന്നത്. സ്ഥലം ഏറ്റെടുക്കല്‍ നടപടിക്കും മറ്റുമായി 2009-ല്‍ കോട്ടക്കലില്‍ സംസ്ഥാന സര്‍ക്കാര്‍ ഡെപ്യൂട്ടി കലക്ടറുടെ നേതൃത്വത്തില്‍ പ്രത്യേകം ഓഫീസ് തുറന്നിരുന്നു. തഹസില്‍ദാര്‍മാരും ഡെപ്യൂട്ടി തഹസില്‍ദാര്‍മാരും ഉള്‍പെടെ 52 ജീവനക്കാരും ഇവിടെയുണ്ട്. എസ് ജയശങ്കര്‍ പ്രസാദാണ് ഡെപ്യൂട്ടി കലക്ടര്‍.

അലൈന്‍മെന്റിന് പൊതുമരാമത്ത് വകുപ്പ് അനുമതി നല്‍കിയതോടെ തുടര്‍പ്രവര്‍ത്തനം ഉടന്‍ ആരംഭിക്കുമെന്ന് ലാന്‍ഡ് അക്വിസിഷന്‍ വിഭാഗം ഡെപ്യൂട്ടി കലക്ടര്‍ വി രാമചന്ദ്രന്‍ പറഞ്ഞു. കേന്ദ്ര സര്‍ക്കാര്‍ ഗസറ്റിലും പത്രങ്ങളിലും 3എ പ്രകാരം ദേശീയപാത അതോറിറ്റി കരട് വിജ്ഞാപനം പുറപ്പെടുവിക്കും. ഇതുസംബന്ധിച്ച പരാതികള്‍ രേഖപ്പെടുത്താന്‍ 21 ദിവസംവരെ അനുവദിക്കും. തുടര്‍ന്ന് പരാതികേള്‍ക്കും, ഒപ്പം സര്‍വേയും ആരംഭിക്കും. ഏറ്റെടുക്കുന്ന ഭൂമിയുടെ വിലയും ഇതോടൊപ്പം നിശ്ചയിക്കും. സ്ഥലത്തിന്റെ അഞ്ച് കിലോമീറ്റര്‍ ചുറ്റളവില്‍ നിലനില്‍ക്കുന്ന മൂന്നുവര്‍ഷത്തെ വിപണിവിലയുടെ അടിസ്ഥാനത്തിലാണ് വിലനിശ്ചയിക്കുക. വിളകള്‍ക്കും കെട്ടിടങ്ങള്‍ക്കും പ്രത്യേകം വില നിര്‍ണയിക്കും. തുടര്‍ന്ന് ഏറ്റെടുക്കുന്ന ഭൂമിയുടെ കൃത്യമായ രൂപരേഖയുള്‍ക്കൊള്ളുന്ന 3 ഡി വിജ്ഞാപനം കേന്ദ്ര സര്‍ക്കാര്‍ പുറപ്പെടുവിക്കും. ഒപ്പം ഇവയുടെ നഷ്ടപരിഹാരവും പാസാക്കും. ബംഗളൂരുവിലെ ഫീഡ്ബാക്ക് ഇന്‍ഫ്രാ എന്ന സ്ഥാപനത്തിനാണ് റോഡിന്റെ വിശദ രൂപരേഖ (ഡിപിആര്‍) തയാറാക്കാനുള്ള ചുമതല.