acquire Archives - Valanchery Online

കെ-റെയില്‍: പരപ്പനങ്ങാടിയില്‍ ഇരുനൂറോളം കുടുംബങ്ങള്‍ ആശങ്കയില്‍

വളാഞ്ചേരിക്കാരൻ — Tue, 24 Aug 2021 06:00:19 +0000

പരപ്പനങ്ങാടി: കെ റെയില്‍ പദ്ധതി വീണ്ടും സജീവമായതോടെ പരപ്പനങ്ങാടി നഗരസഭയിലെ ഇരുനൂറോളം കുടുംബങ്ങള്‍ വലിയ ആശങ്കയിലാണ്. തിരുവനന്തപുരം-കാസര്‍കോട് തിവേഗ സില്‍വര്‍ ലൈന്‍ റെയില്‍വേക്ക് വേണ്ടിയുള്ള നടപടികള്‍ ആരംഭിച്ചതോടെ പരപ്പനങ്ങാടി ചെറമംഗലം ഭാഗത്തുള്ളവരാണ് വലിയ ആശങ്കയില്‍ കഴിയുന്നത്. ഇപ്പോള്‍ റയില്‍ കടന്ന് പോകുന്ന സ്ഥലത്ത് നിന്നും 30 മീറ്റര്‍ ആണ് സ്വീകരിക്കുന്നതെങ്കില്‍ ഇവിടത്തെ 174 വീടുകളെയാണ് അത് ബാധിക്കുക. പരപ്പനങ്ങാടി ടൗണിലെ അടക്കം നിരവധി കെട്ടിടങ്ങളെയും ബാധിക്കും. പല ടൗണുകളും ഇല്ലാതാകുകയും ചെയ്യും. കൃത്യമായ നഷ്ടപരിഹാരം നേരത്തെ ലഭിച്ചാല്‍ സ്ഥലവും വീടും വിട്ടു നല്‍കുന്നതിന് ഇവര്‍ക്ക് എതിര്‍പ്പില്ല. എന്നാല്‍ കൃത്യമായി അക്കൗണ്ടില്‍ പണമെത്താതെ ഒരു തിര ഭൂമിയും വിട്ടു നല്‍കാന്‍ ഇവര്‍ ഒരുക്കമല്ല. ഇതിനായി സംഘടിക്കാനൊരുങ്ങുകയാണ് പ്രദേശത്തുകാര്‍.

സ്ഥലത്തെ താങ്ങുവില കണക്കാക്കി നാലിരട്ടി നല്‍കുമെന്ന് കെ റെയില്‍ സി.ഇ.ഒ പ്രഖ്യാപിച്ചെങ്കിലും ജനങ്ങള്‍ വലിയ ആശങ്കയിലാണ്. ഇതിന്റെ അടിസ്ഥാനത്തില്‍ കഴിഞ്ഞ ദിവസം പ്രദേശവാസികള്‍ യോഗം ചേര്‍ന്നിരുന്നു. എല്ലാവര്‍ക്കും മാന്യമായ നഷ്ടപരിഹാരം ലഭ്യമാക്കുന്നതിനും മറ്റും സമതി രൂപീകരിക്കാനും അടുത്ത ദിവസം തന്നെ വിപുലമായ യോഗം ചേരാനും തീരുമാനിച്ചാണ് പിരിഞ്ഞത്. മുതിര്‍ന്നവരും സ്ത്രീകളുമടക്കം നിരവധി പേര്‍ യോഗത്തില്‍ പങ്കെടുത്തു. ഷരീഫ് വടക്കയില്‍, യു.എ റസാഖ്, അനീസ് കൂരിയാടന്‍, നവാസ് ചെറമംഗലം, യു.വി സുരേന്ദ്രന്‍, ചങ്ങാടന്‍ ഹംസ, ചെങ്ങാടന്‍ മുഹമ്മദ്, പൂഴിക്കല്‍ അഷ്‌റഫ്, കൗണ്‍സിലര്‍മാരായ ബേബി അച്ചുതല്‍, ജാഫര്‍ നെച്ചിക്കാട്ട്, ചോലയില്‍ ഹംസ, പി.വി സാലിം, കാരാടന്‍ മുഹമ്മദ്, ശിഹാബ് കുഞ്ഞോട്ട്, അരീക്കന്‍ ബഷീര്‍ മറ്റു പ്രമുഖരും പങ്കെടുത്തു.

The post കെ-റെയില്‍: പരപ്പനങ്ങാടിയില്‍ ഇരുനൂറോളം കുടുംബങ്ങള്‍ ആശങ്കയില്‍ appeared first on Valanchery Online.

ഫ്ലിപ്കാർട്ട് ക്ലിയർട്രിപ്പിനെ ഏറ്റെടുക്കുന്നു

വളാഞ്ചേരിക്കാരൻ — Fri, 16 Apr 2021 02:56:25 +0000

കൊച്ചി : രാജ്യത്തെ ഏറ്റവും പഴക്കമുള്ള ഓൺലൈൻ ട്രാവൽ കമ്പനിയായ ക്ലിയർട്രിപ്പിനെ വാൾമാർട്ടിന്റെ ഉടമസ്ഥതയിലുള്ള ഓൺലൈൻ റീട്ടെയിലറായ ഫ്ലിപ്കാർട്ട് ഏറ്റെടുക്കുന്നു. ഫ്ലിപ്കാർട്ട് ഓൺലൈൻ ട്രാവൽ വിപണിയിലേക്കു വൈവിധ്യവത്കരിക്കുന്നതിന്റെ ഭാഗമായാണ് ഏറ്റെടുക്കൽ. പ്രത്യേക ബ്രാൻഡായി ക്ലിയർട്രിപ്പിനെ നിലനിർത്തും. 100 ശതമാനം ഓഹരികളും ഏറ്റെടുക്കുന്നുണ്ട്. ഇടപാടിന്റെ മൂല്യം എത്രയാണെന്ന് ഇരുകൂട്ടരും വെളിപ്പെടുത്തിയിട്ടില്ല. ജീവനക്കാരെ പൂർണമായും നിലനിർത്താനും ധാരണയായിട്ടുണ്ട്.

The post ഫ്ലിപ്കാർട്ട് ക്ലിയർട്രിപ്പിനെ ഏറ്റെടുക്കുന്നു appeared first on Valanchery Online.

ദേശീയപാത വികസനം: സ്ഥാപനങ്ങൾക്ക് ഒഴിയാൻ നോട്ടീസ് നൽകിത്തുടങ്ങി

വളാഞ്ചേരിക്കാരൻ — Mon, 05 Apr 2021 03:05:04 +0000

വളാഞ്ചേരി: ദേശീയപാതാ വികസനത്തിന് അളന്നുതിട്ടപ്പെടുത്തിയ സ്ഥലങ്ങളിൽ പ്രവർത്തിക്കുന്ന കടകളും കെട്ടിടങ്ങളും ഒഴിയാൻ അധികൃതർ നോട്ടീസ് നൽകിത്തുടങ്ങി. 30 ദിവസം മുതൽ 60 ദിവസംവരെയാണ് കടകൾ ഒഴിയാൻ സമയംനൽകിയത്‌. ദേശീയപാത സ്ഥലമെടുപ്പുവിഭാഗം ഡെപ്യൂട്ടി കളക്ടറാണ് നോട്ടീസ് നൽകുന്നത്. ഭൂമിയും കെട്ടിടങ്ങളും ഒഴിഞ്ഞ് നിശ്ചിത ദിവസത്തിനകം റവന്യൂ അധികൃതർക്ക് രേഖകൾ കൈമാറണമെന്നും അല്ലെങ്കിൽ ഒഴിപ്പിക്കൽ നടപടി സ്വീകരിക്കുമെന്നുമാണ് നോട്ടീസിൽ പറയുന്നത്. ജൂൺ മാസത്തോടെ കെട്ടിടങ്ങൾ ഒഴിപ്പിക്കുമെന്നാണ് സൂചന.

എന്നാൽ ഒഴിപ്പിക്കലിനെതിരേ വ്യാപാരി വ്യവസായി ഏകോപനസമിതി പ്രതിഷേധമറിയിച്ചിട്ടുണ്ട്. കുറഞ്ഞ സമയപരിധിക്കുള്ളിൽ സ്ഥാപനങ്ങൾ ഒഴിയാൻ പറ്റാത്ത അവസ്ഥയാണെന്നും അതിനാൽ മതിയായ സമയം അനുവദിക്കണമെന്നും അവർ ആവശ്യപ്പെട്ടു. മതിയായ നഷ്ടപരിഹാര തുക നൽകി, കടകളിലെ തൊഴിലാളികളെയും വ്യാപാര സ്ഥാപനങ്ങളെയും പുനരധിവസിപ്പിക്കണമെന്ന് വ്യാപാരി സംഘടന ആവശ്യപ്പെട്ടു.

The post ദേശീയപാത വികസനം: സ്ഥാപനങ്ങൾക്ക് ഒഴിയാൻ നോട്ടീസ് നൽകിത്തുടങ്ങി appeared first on Valanchery Online.

വൈക്കത്തൂർ മഹാദേവ ക്ഷേത്രം ദേവസ്വം ബോർഡ് ഏറ്റെടുത്തു

വളാഞ്ചേരിക്കാരൻ — Mon, 22 Feb 2021 16:07:55 +0000

വളാഞ്ചേരി: പ്രസിദ്ധമായ വൈക്കത്തൂർ മഹാദേവ ക്ഷേത്രം ദേവസ്വം ബോർഡ് ഏറ്റെടുത്തു. തിങ്കളാഴ്ച രാവിലെ മലബാർ ദേവസ്വം ബോർഡ് അദികൃതർ ക്ഷേത്രത്തിലെത്തി ഏറ്റെടുത്തത്. ക്ഷേത്രം ഏറ്റെടുക്കുന്നത് സംബന്ധിച്ച് അറിയിപ്പ് ബോർഡ് ഊരാളന്മാർക്ക് കൈമാറിയിരുന്നു. ദേവസ്വം എക്സികുട്ടീവ് ഓഫീസറുടെ മേൽനോട്ടത്തിലായിരുക്കും ഇന്ന് മുതൽ ക്ഷേത്രത്തിൻ്റെ ഭരണം നിലവിൽ നിയമപരമായ ചില പ്രശ്നങ്ങൾ ഉള്ളത് കൊണ്ടാണ് ബോർഡ് ഏറ്റെടുക്കുന്നത് എന്നും ഇത് വരെ ഭരണം നടത്തിയിരുന്ന കമ്മറ്റി ഉദ്യോഗസ്ഥരുമായി സഹകരിച്ചു എന്നും ഏക്സികുട്ടീവ് ഓഫീസർ പറഞ്ഞു

The post വൈക്കത്തൂർ മഹാദേവ ക്ഷേത്രം ദേവസ്വം ബോർഡ് ഏറ്റെടുത്തു appeared first on Valanchery Online.

വട്ടപ്പാറ വളവ് വീതികൂട്ടുന്നതിന്‌ ഭൂമി ഏറ്റെടുക്കാനായി 48 ലക്ഷംരൂപ അനുവദിച്ചു

വളാഞ്ചേരിക്കാരൻ — Sat, 14 Mar 2020 02:23:52 +0000

വളാഞ്ചേരി : ദേശീയപാതയിലെ അപകടമേഖലയായ വട്ടപ്പാറ വളവ് വീതികൂട്ടുന്നതിന്‌ ഭൂമി ഏറ്റെടുക്കാനായി പൊതുമരാമത്തുവകുപ്പ് 48 ലക്ഷംരൂപ അനുവദിച്ചു. ദേശീയപാത 66-ൽ കാട്ടിപ്പരുത്തി വില്ലേജിലെ 11.85 സെന്റ്‌ ഭൂമി ഏറ്റെടുക്കുന്നതിനാണ് തുക അനുവദിച്ചത്. നേരത്തേ അനുവദിച്ച രണ്ടുകോടി രൂപ ഉപയോഗിച്ച് അപകടങ്ങൾ കുറയ്ക്കുന്നതിനുള്ള ജോലികൾ നടക്കുകയാണ്. പാചകവാതകടാങ്കറുകളുൾപ്പെടെ ഒട്ടേറെ വാഹനങ്ങൾ അപകടത്തിൽപ്പെടുന്നത് ഇവിടെ പതിവാണ്.

ആബിദ്ഹുസൈൻ തങ്ങൾ എം.എൽ.എയുടെ ഇടപെടലിനേത്തുടർന്നാണ് അടിയന്തര ജോലികൾക്കായി എൻ.എച്ച്. വിഭാഗം രണ്ടുകോടി രൂപ അനുവദിച്ചത്. നിലവിലെ റോഡിന്റെ ഘടനയിൽ മാറ്റംവരുത്തുന്നതിന് അപകടമേഖലയായ മുടിപ്പിൻവളവിൽ സ്ഥിരം ഡിവൈഡർ നിർമിക്കുന്ന ജോലി പുരോഗമിക്കുകയാണ്. സൂചനാബോർഡുകൾ, ലൈറ്റുകൾ എന്നിവയും സ്ഥാപിക്കും.

The post വട്ടപ്പാറ വളവ് വീതികൂട്ടുന്നതിന്‌ ഭൂമി ഏറ്റെടുക്കാനായി 48 ലക്ഷംരൂപ അനുവദിച്ചു appeared first on Valanchery Online.

ദേശീയ പാത വികസനം; തിരൂർ താലുക്കിൽ ഭൂമി ഏറ്റെടുക്കുന്നതിനുള്ള ആദ്യ ഗഡു അനുവദിച്ചു

വളാഞ്ചേരിക്കാരൻ — Thu, 31 Oct 2019 16:46:04 +0000

മലപ്പുറം: ജില്ലയില്‍ ദേശീയപാത വികസനത്തിനായി ഭൂമി എറ്റെടുക്കുന്നതിനായി ആദ്യഘട്ടമായി 49.86 കോടി രൂപ ലഭിച്ചതായി ജില്ലാ കലക്ടര്‍ ജാഫര്‍ മലിക് അിറയിച്ചു. തിരൂര്‍ താലൂക്ക് പരിധിയിലെ നടുവട്ടം വില്ലേജില്‍ നിന്നും ഏറ്റെടുക്കുന്ന സ്ഥലത്തിന്റെയും കെട്ടിടങ്ങളുടെയും വൃക്ഷങ്ങളുടെയും കാര്‍ഷിക വിളകളുടെയും നഷ്ടപരിഹാരം നല്‍കുന്നതിനാണ് ഈ തുക വിനിയോഗിക്കുക. ലഭിച്ച 49.86 കോടി രൂപ പ്രോജക്ട് ഡയറക്ടറുടെയും ഡെപ്യൂട്ടി കളക്ടറുടെയും സംയുക്ത അക്കൗണ്‍ില്‍ ലഭ്യമായിട്ടുണ്ട്.
ദേശീയപാത വികസനത്തിനായി നടുവട്ടം വില്ലേജില്‍ നിന്നും ആകെ ഏറ്റെടുക്കേണ്‍ത് 2.6735 ഹെക്ടര്‍ ഭൂമിയാണ്.

ആയതില്‍ സര്‍ക്കാര്‍ ഭൂമി 0.1254 ഹെക്ടറും സ്വകാര്യ ഭൂമി 2.5481 ഹെക്ടറുമാണ്. ഒരു സെന്റ് ഭൂമിയ്ക്ക് ഗുണനഘടകവും സമാശ്വാസ പ്രതിഫലവും അടക്കം 4,18,254/രൂപ ലഭിക്കും. ഇതിനുപുറമെ വിജ്ഞാപന തീയതി മുതല്‍ അവാര്‍ഡ് തീയതി വരെ 12% നിരക്കില്‍ വര്‍ദ്ധനവും നഷ്ടപരിഹാരമായി ലഭിക്കുന്നതാണ്. കെട്ടിടങ്ങള്‍ക്കും മരങ്ങള്‍ക്കും കാര്‍ഷിക വിളകള്‍ക്കും ബന്ധപ്പെട്ട വകുപ്പുകള്‍ നിശ്ചയിക്കുന്ന വിലയുടെ ഇരട്ടി തുകയും നഷ്ടപരിഹാരമായി ലഭിക്കുന്നതാണ്. ദേശീയപാത വികസനം സംബന്ധിച്ച് ഹൈക്കോടതിയില്‍ കേസുകള്‍ നിലനില്‍ക്കുന്നതിനാല്‍, കോടതിയില്‍ നിന്നും അനുമതി ലഭിച്ചാലുടന്‍ തുക വിതരണം ചെയ്ത് തുടങ്ങുമെന്നും ജില്ലാ കലക്ടര്‍ അറിയിച്ചു.

The post ദേശീയ പാത വികസനം; തിരൂർ താലുക്കിൽ ഭൂമി ഏറ്റെടുക്കുന്നതിനുള്ള ആദ്യ ഗഡു അനുവദിച്ചു appeared first on Valanchery Online.

വൈക്കത്തൂർ മഹാദേവ ക്ഷേത്രം മലബാർ ദേവസ്വം ബോർഡ് ഏറ്റെടുക്കാൻ നടത്തുന്ന നീക്കത്തിനെതിരേ വിശ്വാസികളുടെ പ്രതിഷേധം

വളാഞ്ചേരിക്കാരൻ — Mon, 30 Sep 2019 08:12:33 +0000

വളാഞ്ചേരി: മലബാർ ദേവസ്വംബോർഡ് വൈക്കത്തൂർ മഹാദേവക്ഷേത്രം ഏറ്റെടുക്കാൻ നടത്തുന്ന നീക്കത്തിനെതിരേ വിശ്വാസികളുടെ പ്രതിഷേധം. വിശ്വാസികൾ ക്ഷേത്രമുറ്റത്ത് ദീപം തെളിച്ച് നാമജപത്തോടെയാണ് പ്രതിഷേധമറിയിച്ചത്.

മേൽശാന്തി മുണ്ടക്കിഴി കാലടിമന നാരായണൻ നമ്പൂതിരി ക്ഷേത്രം പ്രസിഡന്റ് സുരേഷ്‌കുമാർ മലയത്തിന് വിശ്വാസ സംരക്ഷണദീപം കൈമാറി.

തുടർന്ന് ഭക്തർ ദീപവുമായി ക്ഷേത്രപ്രദക്ഷിണം നടത്തി. സംഗമം സുനിൽകുമാർ ഉദ്ഘാടനം ചെയ്തു. കെ. കൃഷ്ണരാജ് പ്രതിജ്ഞ ചൊല്ലിക്കൊടുത്തു. സെക്രട്ടറി മാധവൻ ചാരുത, ഇ.പി. ഗോവിന്ദൻ, സുരേഷ്‌കുമാർ, എ. അജിത്കുമാർ, എം.എ. ബാലകൃഷ്ണൻ, ആർ.കെ. സുധീർ, ഉണ്ണി പാലത്തോട്ടിൽ, നഗരസഭാംഗം സി. രാമകൃഷ്ണൻ, നഗരസഭാ വൈസ് ചെയർമാൻ കെ.എം. ഉണ്ണിക്കൃഷ്ണൻ തുടങ്ങിയവർ നേതൃത്വം നൽകി.

The post വൈക്കത്തൂർ മഹാദേവ ക്ഷേത്രം മലബാർ ദേവസ്വം ബോർഡ് ഏറ്റെടുക്കാൻ നടത്തുന്ന നീക്കത്തിനെതിരേ വിശ്വാസികളുടെ പ്രതിഷേധം appeared first on Valanchery Online.

പുത്തൂർ -ചെനയ്ക്കൽ ബൈപ്പാസ്; വിദഗ്ധസമിതി അന്തിമറിപ്പോർട്ട് നൽകി, ഇനി വേണ്ടത് ഭൂമി ഏറ്റെടുക്കൽ

വളാഞ്ചേരിക്കാരൻ — Wed, 10 Jul 2019 09:44:44 +0000

കോട്ടയ്ക്കൽ: കോട്ടയ്ക്കൽ പുത്തൂർ ‍-ചെനയ്ക്കൽ ബൈപ്പാസിന്റെ മൂന്നാംഘട്ടനിർമാണത്തിന് ഇനി ഭൂമി ഏറ്റെടുക്കാം. സാമൂഹിക പ്രത്യാഘാതപഠനത്തിന്മേലുള്ള വിദഗ്ധസമിതിയുടെ അന്തിമറിപ്പോർട്ട് കളക്ടർക്ക് സമർപ്പിച്ചതോടെയാണ് ഭൂമി ഏറ്റെടുക്കുന്നതിനുള്ള വഴിതെളിഞ്ഞത്. നഷ്ടപരിഹാരം, പുനരധിവാസം എന്നിവസംബന്ധിച്ച് ഭൂവുടമകളുമായി ജില്ലാഭരണകൂടം ധാരണയുണ്ടാക്കുകയാണ് അടുത്തപടി. 46 ഭൂവുടമകളുടെ പക്കലായി 5.75 ഏക്കർ സ്ഥലമാണ് മൂന്നാംഘട്ടനിർമാണത്തിന് ഏറ്റെടുക്കാനുള്ളത്. 16 മീറ്റർ വീതിയിൽ 1.55 കിലോമീറ്റർ നീളത്തിലാണ് റോഡ്.

മൂന്നാംഘട്ടത്തിന് 21.75 കോടി രൂപ ചെലവുവരും. രാജഗിരി ഔട്ട്‌റീച്ച് സർവീസ് സൊസൈറ്റി എന്ന ഏജൻസി പദ്ധതി സാമൂഹികാഘാതപഠനം നടത്തിയിരുന്നു. ഇതിന്മേൽ കളക്ടർ നിയോഗിച്ച വിദഗ്ധസമിതിയാണ് ഇപ്പോൾ അന്തിമവിലയിരുത്തൽ നടത്തി റിപ്പോർട്ട് സമർപ്പിച്ചത്. കോട്ടയ്ക്കൽ ടൗണിലെ ഗതാഗതക്കുരുക്കിന് വലിയൊരളവിൽ പരിഹാരമുണ്ടാക്കുന്നതാണ് പുത്തൂർ -ചെനയ്ക്കൽ ബൈപ്പാസ്. മലപ്പുറം -കോട്ടയ്ക്കൽ റോഡിലെ പുത്തൂർ മുതൽ ദേശീയപാത 17-ലെ ചെനയ്ക്കൽ വരെയാണിത്. മലപ്പുറം ഭാഗത്തുനിന്ന് വരുന്നവർക്ക് ഈ ബൈപ്പാസ് വഴിപോയാൽ ദേശീയപാതയിലേക്ക് കടക്കാൻ രണ്ടരക്കിലോമീറ്റർ ലാഭിക്കാം. തിരുനാവായ, പുത്തനത്താണി ഭാഗങ്ങളിൽനിന്ന് മലപ്പുറം, മഞ്ചേരി, നിലമ്പൂർ ഭാഗങ്ങളിലേക്ക് പോകുന്നവർക്കും ഇത്രയുംദൂരം ലാഭിക്കാം.

പുത്തൂർ -ചെനയ്ക്കൽ ബൈപ്പാസിന്റെ നിർമാണനടപടികൾ സംബന്ധിച്ച് ആബിദ്ഹുസൈൻതങ്ങൾ എം.എൽ.എ. നിയമസഭയിൽ ചോദ്യമുന്നയിച്ചിരുന്നു. അന്തിമറിപ്പോർട്ട് കളക്ടർ വിലയിരുത്തി ശുപാർശചെയ്യുന്നമുറയ്ക്ക് തുടർനടപടികൾ വേഗത്തിലാക്കുമെന്ന് റവന്യുമന്ത്രി മറുപടിയും നൽകിയിരുന്നു.

The post പുത്തൂർ -ചെനയ്ക്കൽ ബൈപ്പാസ്; വിദഗ്ധസമിതി അന്തിമറിപ്പോർട്ട് നൽകി, ഇനി വേണ്ടത് ഭൂമി ഏറ്റെടുക്കൽ appeared first on Valanchery Online.

വളാഞ്ചേരിയിൽ രണ്ട് ബൈപ്പാസുകൾക്ക് സ്ഥലം ഏറ്റെടുക്കാൻ തീരുമാനം

വളാഞ്ചേരിക്കാരൻ — Sun, 23 Jun 2019 06:21:38 +0000

വളാഞ്ചേരി: വളാഞ്ചേരി നഗരത്തിലെ ഗതാഗതക്കുരുക്കിന് പരിഹാരംകാണാൻ നിലവിലെ രണ്ട് ബൈപ്പാസുകൾ സ്ഥലം ഏറ്റെടുത്ത് വീതികൂട്ടാൻ തീരുമാനം. വളാഞ്ചേരി -മൂച്ചിക്കൽ -കരിങ്കല്ലത്താണി, മീമ്പാറ -വൈക്കത്തൂർ എന്നീ ബൈപ്പാസ് റോഡുകളാണ് വീതി കൂട്ടുന്നത്.

മുൻധാരണയനുസരിച്ച് സ്ഥലം സൗജന്യമായി വിട്ടുതരാൻ ഉടമകൾ തയ്യാറാകാത്തപക്ഷം കിഫ്ബി മാനദണ്ഡപ്രകാരം പതിനഞ്ചുമീറ്റർ വീതിയിൽ സ്ഥലം ഏറ്റെടുത്ത് റോഡ് പ്രവൃത്തിയുമായി മുന്നോട്ടുപോകാൻ നഗരസഭയിൽ ചേർന്ന സർവകക്ഷിയോഗം ഐകകണേ്ഠ്യന തീരുമാനിച്ചു.

നഗരസഭാധ്യക്ഷ സി.കെ. റുഫീന അധ്യക്ഷയായി. വൈസ് ചെയർമാൻ കെ.എം. ഉണ്ണികൃഷ്ണൻ, സ്ഥിരംസമിതി അധ്യക്ഷരായ സി. രാമകൃഷ്ണൻ, സി. അബ്ദുൾനാസർ, മൈമൂന, ഫാത്തിമക്കുട്ടി, കൗൺസിലർമാരായ മൂർക്കത്ത് മുസ്തഫ, ടി.പി. അബ്ദുൽഗഫൂർ, പി.പി. ഹമീദ്, ഷിഹാബുദ്ദീൻ, ഇ.പി. യഹ്‌യ, റഹ്‌മത്ത്, വിവിധ രാഷ്ട്രീയപ്പാർട്ടികളെ പ്രതിനിധീകരിച്ച് അബു യൂസഫ് ഗുരുക്കൾ, പറശ്ശേരി അസൈനാർ, ഫൈസൽ തങ്ങൾ, ഫിറോസ്, സലാം വളാഞ്ചേരി, സുരേഷ്, സഹദേവൻ, അബ്ദുറഹ്‌മാൻ എന്ന മാനു, അഷറഫ് അമ്പലത്തിങ്ങൽ, ഹബീബ് റഹ്‌മാൻ, സഫീർഷാ, റവുഫ്, എ.ഇ. വിനോജ്, ആർ.ഐ. ശശിധരൻ തുടങ്ങിയവർ പങ്കെടുത്തു.

The post വളാഞ്ചേരിയിൽ രണ്ട് ബൈപ്പാസുകൾക്ക് സ്ഥലം ഏറ്റെടുക്കാൻ തീരുമാനം appeared first on Valanchery Online.

ദേശീയപാത വികസനം: മലപ്പുറം ജില്ലയിൽ 63 ഹെക്ടർ കൂടി അധികമായി ഏറ്റെടുക്കും

വളാഞ്ചേരിക്കാരൻ — Wed, 02 Jan 2019 02:25:03 +0000

മലപ്പുറം: ദേശീയപാത വികസനവുമായി ബന്ധപ്പെട്ട് ജില്ലയിൽ 63 ഹെക്ടർ ഭൂമി കൂടി അധികമായി ഏറ്റെടുക്കും. ഭൂമിയേറ്റെടുക്കൽ ആക്ട് (എൽ.എ) വകുപ്പ് ത്രീ എ പ്രകാരമുള്ള നോട്ടിഫിക്കേഷനിൽ തെറ്റുകൾ സംഭവിച്ചതാണ് കാരണം. അധിക ഭൂമി ഏറ്റെടുക്കുന്നത് കേന്ദ്ര സർക്കാരിന്റെ എൽ.എ പോർട്ടലിൽ അപ്‌ലോഡ് ചെയ്യേണ്ടതുണ്ട്. പൊന്നുംവില നോട്ടിഫിക്കേഷനിൽ ചില വില്ലേജുകൾ തെറ്റായി ഒഴിവാക്കപ്പെട്ടു. ഇവ തിരുത്തി കേന്ദ്ര മന്ത്രാലയത്തിന് സമർപ്പിച്ച ശുപാർശയ്ക്ക് അംഗീകാരം ലഭിക്കേണ്ടതുണ്ട്.

ഭൂമിയേറ്റെടുക്കലിലെ അന്തിമ നടപടിയായ ത്രീഡി വകുപ്പ് പ്രകാരമുള്ള നടപടിക്രമങ്ങൾ മാർച്ച് 31നകം പൂർത്തിയാക്കാനാണ് അധികൃതർ ലക്ഷ്യമിടുന്നത്. ജില്ലയ്ക്ക് സമാനമായി എതിർപ്പുകൾ നേരിടേണ്ടിവന്ന കോഴിക്കോട് ജില്ലയിൽ മാർച്ച് 15നകം നടപടികൾ പൂർത്തിയാക്കാനാണ് പദ്ധതി. പൊന്നുംവില നടപടികൾ മന്ദഗതിയിലായതാണ് കോഴിക്കോടിന് തടസമായത്. മറ്റു പല ജില്ലകളിലും അന്തിമനടപടികൾ ഏറെ മുന്നേറിക്കഴിഞ്ഞു. ജില്ലയിൽ ജനുവരി 31നകം ഭൂമിയേറ്റെടുക്കൽ പൂർത്തിയാക്കി ദേശീയപാത അതോറിറ്റിക്ക് കൈമാറാനാണ് ഡെപ്യൂട്ടി കളക്ടറുടെ നേതൃത്വത്തിലുള്ള ടീം ലക്ഷ്യമിട്ടിരുന്നതെങ്കിലും ഇതു സാദ്ധ്യമായില്ല. കഴിഞ്ഞ മാർച്ചിൽ ശക്തമായ പ്രതിഷേധങ്ങൾക്കിടയിലാണ് സർവേ നടപടികൾ പൂർത്തിയാക്കിയത്.

ഭൂമിയേറ്റെടുക്കലിന്റെ ആദ്യഘട്ടത്തിൽ വലിയ പ്രക്ഷോഭങ്ങളുണ്ടായ എ.ആർ. നഗർ പഞ്ചായത്തിലെ അരീത്തോട് , വലിയ പറമ്പ്, ചേലേമ്പ്ര പഞ്ചായത്തിലെ ഇടിമുഴീക്കൽ എന്നിവിടങ്ങളിലുൾപ്പെടെ ആദ്യ അലൈൻമെന്റ് അനുസരിച്ച് തന്നെയാണ് ഭൂമിയേറ്റെടുക്കുന്നത്. ഭൂമിയേറ്റെടുക്കുന്നതിനെതിരെ പ്രക്ഷോഭമുണ്ടായ സ്ഥലങ്ങളിൽ ജനപ്രതിനിധികളും പൊതുജനങ്ങളും ബദൽ അലൈൻമെന്റുകൾ നിർദ്ദേശിച്ചിരുന്നെങ്കിലും ഇവ പ്രായോഗികമല്ലെന്ന റിപ്പോർട്ടാണ് ദേശീയപാത അതോറിറ്റി സംസ്ഥാന സർക്കാരിന് നൽകിയത്. ഭൂമിയേറ്റെടുക്കൽ വേഗത്തിൽ പൂർത്തിയാക്കി പദ്ധതി യാഥാർ‌ത്ഥ്യമാക്കുമെന്ന മുഖ്യമന്ത്രിയുടെ നിലപാടും ഇതുസംബന്ധിച്ച പ്രവർത്തനങ്ങൾ വേഗത്തിലാക്കിയിട്ടുണ്ട്.

76 കിലോമീറ്റർ ഭാഗത്താണ് ഇടിമുഴീക്കൽ മുതൽ പൊന്നാനി വരെയായി ദേശീയപാത വികസിപ്പിക്കുന്നത്. 212.5732 ഹെക്ടർ ഭൂമിയാണ് വികസനത്തിനായി നേരത്തെ ഏറ്റെടുക്കാൻ നിശ്ചയിച്ചിരുന്നത്. വിലനിർണ്ണയമടക്കം പൂർണ്ണം ഒക്ടോബറോടെ ഭൂമിയേറ്റെടുക്കൽ പൂർത്തിയാക്കാനാണ് തീരുമാനിച്ചിരുന്നതെങ്കിലും പ്രളയം കാരണം നീണ്ടു. നേരത്തെ അളന്ന് തിട്ടപ്പെടുത്തിയ സ്ഥലങ്ങളിലെ കെട്ടിടങ്ങൾ, മരങ്ങൾ, കാർഷിക വിളകൾ എന്നിവയുടെ കണക്കെടുത്തിട്ടുണ്ട്. ഏറ്റെടുക്കുന്ന ഭൂമിയുടെയും കെട്ടിടങ്ങൾ ഉൾപ്പെടെയുളള നിർമ്മിതികളുടെയും വില നിർണ്ണയിച്ച് ഉത്തരവായിട്ടുണ്ട്.

കേന്ദ്ര പൊതുമരാമത്ത് വകുപ്പിന്റെ 2012ലെ പ്ലിന്ത് ഏരിയ റേറ്റ് അടിസ്ഥാനമാക്കിയാണ് കെട്ടിടങ്ങൾക്കും മറ്റ് നിർമ്മിതികൾക്കും വില കണക്കാക്കുന്നത്. അതുകൊണ്ട് 2018ലേക്ക് ബാധകമായ 40 ശതമാനം വർദ്ധനവ് ലഭിക്കുമെന്ന് അധികൃതർ പറയുന്നു. വീട് അടക്കമുള്ള കെട്ടിടങ്ങളുടെ വില പൊതുമരാമത്ത് വകുപ്പും മരങ്ങളുടേത് സോഷ്യൽ ഫോറസ്ട്രിയും കാർഷിക വിളകളുടേത് കൃഷി വകുപ്പുമാണ് നിശ്ചയിച്ചത്.

The post ദേശീയപാത വികസനം: മലപ്പുറം ജില്ലയിൽ 63 ഹെക്ടർ കൂടി അധികമായി ഏറ്റെടുക്കും appeared first on Valanchery Online.

ദേശീയപാത സ്ഥലമെടുപ്പ്; മരങ്ങൾക്കും വിളകൾക്കും ലഭിക്കുന്ന നഷ്ടപരിഹാരത്തെകുറിച്ച് അറിയാം

വളാഞ്ചേരിക്കാരൻ — Wed, 31 Oct 2018 02:45:02 +0000

മലപ്പുറം∙ ദേശീയപാതയ്‌ക്കു ഭൂമി ഏറ്റെടുക്കുമ്പോൾ ഭൂമിക്കും വിളകൾക്കും നഷ്‌ടപരിഹാരം കണക്കാക്കുന്നത് 2013ലെ ഭൂമി ഏറ്റെടുക്കൽ നിയമപ്രകാരം. ഓരോരുത്തർക്കും ലഭിക്കുന്ന നഷ്‌ടപരിഹാരം വിചാരണവേളയിൽ അറിയിക്കുമെന്ന് കലക്‌ടർ പറഞ്ഞു. കായ്‌ഫലമുള്ള തെങ്ങിന് 50,000 രൂപയും കായ്‌ക്കാത്തതിന് 25,000 രൂപയും തെങ്ങിൻതൈക്ക് 4,000 രൂപയും ലഭിക്കും. ഭൂവുടമകൾക്കായി നവംബർ 15 മുതൽ ഡിസംബർ 15 വരെ തെളിവെടുപ്പു നടത്തും.

മറ്റു വിളകളുടെ നഷ്‌ടപരിഹാരം ഇങ്ങനെ:
1. ജാതി (കായ്‌ഫലമുള്ളത്) – 1,00,000 രൂപ
2. ജാതി (കായ്‌ഫലമില്ലാത്തത്) -50,000
3. ജാതി (തൈ) -6,000
4. കമുക് (കായ്‌ഫലമുള്ളത്) – 14,000.
5. കമുക് (കായ്‌ഫലമില്ലാത്തത്) -6,000
6. കമുക് (തൈകൾ) – 600
7. 75 സെന്റി മീറ്ററിൽ കൂടുതലുള്ള പ്ലാവ്, മാവ് 20,000
8. പ്ലാവ്, മാവ് 75 സെന്റിമീറ്റർ വരെ 12,000
9. പ്ലാവ്, മാവ് തൈകൾ 2,000
10. പട്ട, ഗ്രാമ്പൂ, കൊക്കോ (കായ്‌ഫലമുള്ളത്) – 14,000
11. പട്ട, ഗ്രാമ്പൂ, കൊക്കോ (കായ്‌ഫലമില്ലാത്തത്) – 6,000
12. പട്ട, ഗ്രാമ്പൂ, കൊക്കോ ( തൈകൾ) – 2,000
13. കുലയ്‌ക്കാത്ത വാഴ – 300
14. മരച്ചീനി ഒരു ഹെക്‌ടർ – 40,000
15. കായ്‌ഫലമുള്ള കശുമാവ് – 14,000
16. കശുമാവ് കായ്‌ഫലമില്ലാത്തത് – 6,000
17. കശുമാവ് തൈകൾ – 1,000
18. കുരുമുളക് കായ്‌ഫലമുള്ളത് (ഒരു ചുവടിന്) – 14,000.
19. കുരുമുളക് കായ്‌ഫലമില്ലാത്തത് – 6,000
20. കുരുമുളക് തൈകൾ – 1,000
21. വെറ്റിലക്കൊടി – 2,000
22. റമ്പുട്ടാൻ മുതലായവയ്‌ക്ക് കായ്‌ഫലമുള്ളതിന് – 30,000
23. റമ്പുട്ടാൻ മുതലായവയ്‌ക്ക് കായ്‌ഫലമില്ലാത്തത് – 14,000
24. റമ്പുട്ടാൻ മുതലായവയ്‌ക്ക് തൈകൾ – 2,000
25. പേര, സപ്പോട്ട, ആത്തച്ചക്ക, സീതപ്പഴം, ഞാവൽ, മുട്ടപ്പഴം, ബട്ടർ ഫ്രൂട്ട് കായ്‌ഫലമുള്ളത് – 10,000
26. പേര, സപ്പോട്ട, ആത്തച്ചക്ക, സീതപ്പഴം, ഞാവൽ, മുട്ടപ്പഴം, ബട്ടർ ഫ്രൂട്ട് കായ്‌ഫലമില്ലാത്തത് – 4,000
27. പേര, സപ്പോട്ട, ആത്തച്ചക്ക, സീതപ്പഴം, ഞാവൽ, മുട്ടപ്പഴം, ബട്ടർ ഫ്രൂട്ട് തൈകൾ – 1,000

The post ദേശീയപാത സ്ഥലമെടുപ്പ്; മരങ്ങൾക്കും വിളകൾക്കും ലഭിക്കുന്ന നഷ്ടപരിഹാരത്തെകുറിച്ച് അറിയാം appeared first on Valanchery Online.

ദേശീയപാതാ വികസനം സ്ഥമെടുപ്പ് : തിരൂര്‍ താലൂക്കിലെ അന്തിമവിജ്ഞാപനം ഇറങ്ങി

വളാഞ്ചേരിക്കാരൻ — Sat, 28 Jul 2018 14:17:46 +0000

ദേശീയപാതാ വികസനത്തിനു ഭൂമി ഏറ്റെടുക്കുന്നതുമായി ബന്ധപ്പെട്ട് തിരൂര്‍ താലൂക്കിലെ അന്തിമ വിജ്ഞാപനം (3 ഡി വിജ്ഞാപനം) ഇറങ്ങിയതായി ജില്ലാ കലക്ടര്‍ അമിത് മീണ അറിയിച്ചു. തിരൂര്‍ താലൂക്കില്‍ 65.9457 ഹെക്ടര്‍ ഭൂമിയിലാണ് ത്രീ എ വിജ്ഞാപനം മുമ്പ് ഇറങ്ങിയിരുന്നത്. ഇതില്‍പെട്ട 51.7684 ഹെക്ടറിലാണ് ഇപ്പോള്‍ അന്തിമ വിജ്ഞാപനം ഇറങ്ങിയത്. ആതവനാട് വില്ലേജില്‍ 3.2618 ഹെക്ടര്‍, കല്‍പകഞ്ചേരി വില്ലേജില്‍ 2.1818 ഹെക്ടര്‍, കാട്ടിപ്പരുത്തിയില്‍ 16.4353 ഹെക്ടര്‍, കോട്ടക്കലില്‍ 0.5500 ഹെക്ടര്‍, കുറുമ്പത്തൂരില്‍ 10.0953 ഹെക്ടര്‍, കുറ്റിപ്പുറത്ത് 8.9027 ഹെക്ടര്‍, മാറാക്കരയില്‍ 2.8116 ഹെക്ടര്‍, നടുവട്ടത്ത് 2.6735 ഹെക്ടര്‍, പെരുമണ്ണയില്‍ 4.8564 ഹെക്ടര്‍ എന്നിങ്ങനെയാണ് ഇപ്പോള്‍ അന്തിമ വിജ്ഞാപനം ഇറങ്ങിയത്.

ഇതിനു പുറമെ 19.6140 ഹെക്ടറിനായുള്ള ത്രീ എ, ത്രീ ഡി വിജ്ഞാപനം അടുത്ത ദിവസം ഇറങ്ങും. ആതവനാട് വില്ലേജില്‍ 1.4439 ഹെക്ടര്‍, കല്‍പകഞ്ചേരി വില്ലേജില്‍ 0.9548 ഹെക്ടര്‍, കാട്ടിപ്പരുത്തിയില്‍ 7.8050 ഹെക്ടര്‍, കോട്ടക്കലില്‍ 0.0763 ഹെക്ടര്‍, കുറുമ്പത്തൂരില്‍ 2.0447 ഹെക്ടര്‍, കുറ്റിപ്പുറത്ത് 3.4165 ഹെക്ടര്‍, മാറാക്കരയില്‍ 1.6264 ഹെക്ടര്‍, നടുവട്ടത്ത് 0.6262 ഹെക്ടര്‍, പെരുമണ്ണയില്‍ 1.6202 ഹെക്ടറുമാണ് ഇതില്‍ ഉള്‍പ്പെടുക.

ഇതു കൂടി ചേരുമ്പോള്‍ ആകെ ഒമ്പതു വില്ലേജുകളിലെ 1851 ഭൂവുടമകളില്‍ നിന്നായി 71.3824 ഹെക്ടര്‍ ആണു ഏറ്റെടുക്കുക. ആതവനാട് വില്ലേജില്‍ 191, കല്‍പകഞ്ചേരി വില്ലേജില്‍ 155, കാട്ടിപ്പരുത്തിയില്‍ 374, കോട്ടക്കലില്‍ 21, കുറുമ്പത്തൂരില്‍ 422, കുറ്റിപ്പുറത്ത് 325, മാറാക്കരയില്‍ 152, നടുവട്ടത്ത് 56, പെരുമണ്ണയില്‍ 155 ഭുവുടമകളില്‍ നിന്നായാണ് ഭൂമി ഏറ്റെടുക്കുന്നത്.

അന്തിമ വിജ്ഞാപനം ഇറങ്ങിയ 51.7684 ഹെക്ടറില്‍ 2.3516 ഹെക്ടര്‍ സര്‍ക്കാര്‍ ഭൂമിയാണ്. ആതവനാട് വില്ലേജില്‍ 0.0683 ഹെക്ടറും കാട്ടിപ്പരുത്തിയില്‍ 1.0972, കോട്ടക്കലില്‍ 0.0027 ഹെക്ടര്‍, കുറുമ്പത്തൂരില്‍ 0.1798 ഹെക്ടര്‍, കുറ്റിപ്പുറത്ത് 0.0986 ഹെക്ടര്‍, നടുവട്ടം 0.0525 ഹെക്ടര്‍, പെരുമണ്ണ വില്ലേജില്‍ 0.8525 എന്നിങ്ങനെയാണ് സര്‍ക്കാര്‍ ഭൂമി ഉള്‍പ്പെടുന്നത്.

ജില്ലയില്‍ ആകെ 74 കിലോമീറ്റര്‍ ദൂരമാണ് ദേശീയപാതയ്ക്കായി ഏറ്റെടുക്കാനുള്ളത്. ത്രീഡി വിജ്ഞാപനം സംബന്ധിച്ച നടപടികള്‍ പൂര്‍ത്തിയാവുന്നതോടെ നഷ്ടപരിഹാരം നിശ്ചയിക്കും. ഓരോ ഉടമയുടെയും ഭൂമിയുടെ വില റവന്യൂ വകുപ്പും കെട്ടിടങ്ങളുടെ വില പൊതുമരാമത്ത് വകുപ്പുമാണ് നിര്‍ണ്ണയിക്കുന്നത്. മരങ്ങളുടെ വില സോഷ്യല്‍ ഫോറസ്ട്രി വകുപ്പും കാര്‍ഷിക വിളകളുടെ വില കൃഷി വകുപ്പും നിര്‍ണ്ണയിക്കും. ഇതു നാലും ക്രോഡീകരിച്ചാണ് വില നിശ്ചയിക്കുന്നത്. വില നിശ്ചയിച്ച ശേഷം ഓരോ ഭൂവുടമകളെ വിളിച്ചു വരുത്തി കൂടിക്കാഴ്ച നടത്തും. ഭൂവുടമകള്‍ക്ക് നഷ്ടപരിഹാരം സംബന്ധിച്ച പരാതിയും ആക്ഷേപവും ഉന്നയിക്കാന്‍ അവസരം ഉണ്ടാകും. തുടര്‍ന്നു അന്തിമ വില നിശ്ചയിക്കും. പിന്നീട് ഗസറ്റിലും പ്രാദേശിക പത്രങ്ങളിലും പരസ്യപ്പെടുത്തി വില നല്‍കി ഉടന്‍ തന്നെ സര്‍ക്കാറിന്റെ ഭാഗമാക്കി മാറ്റാമെന്ന പ്രതീക്ഷയിലാണ് സ്ഥലമെടുപ്പ് ചുമതലയുള്ള ഡെപ്യൂട്ടി കലക്ടര്‍ ഡോ. ജെ.ഒ. അരുണും സംഘവും.

The post ദേശീയപാതാ വികസനം സ്ഥമെടുപ്പ് : തിരൂര്‍ താലൂക്കിലെ അന്തിമവിജ്ഞാപനം ഇറങ്ങി appeared first on Valanchery Online.