Rescue Archives - Valanchery Online

പുതുവർഷത്തിൽ അവശ നിലയിൽ കണ്ടെത്തിയ കൊക്കിന് ശുശ്രൂഷ നൽകി തിരൂർ പോലീസ്

വളാഞ്ചേരിക്കാരൻ — Fri, 02 Jan 2026 05:42:46 +0000

തിരൂർ : പൊലീസ് സ്റ്റേഷനിൽ ന്യൂ ഇയർ ദിവസം രാത്രിയിൽ അതിഥിയായി കൊക്ക്. അവശനിലയിൽ നടക്കുവാൻ പ്രയാസപ്പെടുന്ന കൊക്കിനെ സ്റ്റേഷന് മുന്നിൽവച്ചാണ് പൊലീസുകാർ കണ്ടത്. പരിസരത്ത് നായകൾ ഉള്ളതിനാൽ കൊക്കിനെ സുരക്ഷിത സ്ഥലത്തേക്ക് മാറ്റി. ശേഷം ടി.ഡി.ആർ.എഫ് വൊളന്റിയർമാരുടെ സഹായത്തോടെ ആവശ്യമായ പ്രഥമ ശുശ്രൂഷകൾ നൽകിയ ശേഷമാണ് വിട്ടയച്ചത്. എസ്.ഐ നസീർ തിരൂർക്കാട്, പൊലീസ് ഉദ്യോഗസ്ഥരായ അനീഷ് , രതീഷ്, മനോജ്, ടി.ഡി.ആർ.എഫ് തിരൂർ മേഖല കോഓർഡിനേറ്റർ എം.ഷെഫീഖ് എന്നിവരും ചേർന്നാണ് കൊക്കിനെ രക്ഷപ്പെടുത്തിയത്.

The post പുതുവർഷത്തിൽ അവശ നിലയിൽ കണ്ടെത്തിയ കൊക്കിന് ശുശ്രൂഷ നൽകി തിരൂർ പോലീസ് appeared first on Valanchery Online.

കുറ്റിപ്പുറത്ത് കാൽവഴുതി പാളത്തിലേക്കു വീഴുകയായിരുന്ന യുവതിയെ രക്ഷിച്ച് റെയിൽവേ പോർട്ടർ

വളാഞ്ചേരിക്കാരൻ — Thu, 15 Feb 2024 00:23:05 +0000

കുറ്റിപ്പുറം : ട്രെയിനിൽനിന്ന് ഇറങ്ങുന്നതിനിടെ കാൽവഴുതി പാളത്തിലേക്കുവീണ യുവതിക്ക് രക്ഷകനായി റെയിൽവേ പോർട്ടർ. കുറ്റിപ്പുറം റെയിൽവേസ്റ്റേഷനിൽ ബുധനാഴ്ച ഉച്ചയ്ക്ക് 1.10-നാണ് സംഭവം. ചങ്ങരംകുളം കോക്കൂർ പുത്തൻവളപ്പിൽ ബഷീർ (53) ആണ് രക്ഷകനായത്. ചെന്നൈ-മംഗളൂരു-എഗ്‌മോർ എക്സ്പ്രസിൽ പോകുന്ന മൂത്തമകളെ യാത്രയാക്കാൻ എത്തിയതായിരുന്നു യുവതിയും മറ്റൊരു മകളും. ട്രെയിൻ സ്റ്റേഷനിൽ എത്തിയപ്പോൾ മൂവരും കയറി. സാധനങ്ങളെല്ലാം സുരക്ഷിതമായി വെക്കുന്നതിനിടെ ട്രെയിൻ നീങ്ങിത്തുടങ്ങി. ഉടനെ അമ്മയും മകളും പ്ലാറ്റ്ഫോമിലേക്ക് ചാടാൻ ശ്രമിച്ചു. ആദ്യം ചാടിയ മകൾ സുരക്ഷിതമായി എത്തി. അമ്മ പ്ലാറ്റ്ഫോമിനും ട്രെയിനിനും ഇടയിലായിപ്പോയി.

ഈ സമയത്ത് പ്ലാറ്റ്ഫോമിൽ ഉണ്ടായിരുന്ന ബഷീർ കുതിച്ചെത്തി പാളത്തിലേക്ക് വീണുകൊണ്ടിരുന്ന യുവതിയെ വലിച്ചുകയറ്റുകയായിരുന്നു. യുവതിയെ രക്ഷിക്കുന്നതിനിടയിൽ ബഷീറിന് നെറ്റിയിൽ ചെറിയ മുറിവേൽക്കുകയും ചെയ്തു. രണ്ടുമാസം മുൻപും ഇത്തരത്തിൽ ഇദ്ദേഹം ജീവൻരക്ഷാ പ്രവർത്തനം നടത്തിയിരുന്നു. വർഷങ്ങളായി ഇവിടെ പോർട്ടറായി ജോലിചെയ്യുന്ന ബഷീർ ഏറെപ്പേരെ വലിയ അപകടങ്ങളിൽനിന്ന് ജീവൻ പണയംവെച്ച് രക്ഷപ്പെടുത്തിയിട്ടുണ്ട്.

The post കുറ്റിപ്പുറത്ത് കാൽവഴുതി പാളത്തിലേക്കു വീഴുകയായിരുന്ന യുവതിയെ രക്ഷിച്ച് റെയിൽവേ പോർട്ടർ appeared first on Valanchery Online.

കാവുംപുറത്ത് വഴിയാത്രക്കാരെ കുത്തി പരിക്കേൽപ്പിച്ച പെരുംതേനീച്ചയുടെ കൂടുകൾ നീക്കം ചെയ്തു

വളാഞ്ചേരിക്കാരൻ — Fri, 02 Dec 2022 01:17:53 +0000

വളാഞ്ചേരി: വളാഞ്ചേരി കാവുംപുറത്ത് വടക്കേ കുളമ്പിൽ താമസിക്കുന്ന പുത്തൻ പീടിയക്കൽ ഉണ്ണിൻ കുട്ടിയുടെ വീട്ടിലെ മാവിന്റെ മുകളിലായി രണ്ട് മീറ്ററോളം നീളത്തിൽ പെരുംതേനീച്ച കൂട് കൂട്ടിയത്. തിങ്കളാഴ്ച ഉച്ചയോടെ കൂട് പരുന്ത് റാഞ്ചി ഇളകുകയും വഴിയാത്രക്കാരായ നിരവതി പേരെ കുത്തി പരിക്കേൽപ്പിക്കുകയും തമിഴ് നാട്ടുകാരനായ ജോലിക്ക് വേണ്ടി വന്ന വ്യക്തിയടക്കം ഉള്ളവരെ കുത്തി പരിക്കേൽപ്പിക്കുകയും ഹോസ്പിറ്റലിൽ ചികിൽസ തേടുകയും ചെയ്തു. തുടർന്ന് വീട്ടുകാർ. കൗൺസിലർ ഫൈസൽ തങ്ങളെ വിവരം അറിയിക്കുകയും. കൗൺസിലർ പാമ്പ് പിടുത്തക്കാരനും തേനീച്ച കൂടുകൾ നീക്കം ചെയ്യുന്നതിൽ വിദഗ്തനും കൂടിയായ കൈപ്പുറം അബ്ബാസിനെ വിളിച്ചു വരുത്തുകയും . ചൊവ്വാഴ്ച രാവിലെ ഏഴ് മണിയോടെ അബ്ബാസെത്തി . ഇരുപത് അടിയോളം ഉയരമുള്ള മാവിന്റെ മുകളിൽ കയറി കൂട് നീക്കം ചെയ്ത് കൊടുത്തു. അന്ന് തന്നെ. വൈക്കത്തൂരിൽ താമസിക്കുന്ന കല്ലുവളപ്പിൽ അബ്ദുൾ കരീമിന്റെ വീട്ടിന്റെ മുമ്പിലെ പ്ലാവിൽ കൂട് കൂട്ടിയ പെരുംതേനീച്ച കൂടും കൈപ്പുറം അബ്ബാസ് ഒഴിവാക്കി കൊടുത്തു രാത്രിയിൽ കുട്ടികൾക്ക് പഠിക്കാൻ പോലും പറ്റാത്ത അവസ്ഥയിൽ ലൈറ്റിടുമ്പോൾ വീടിന്റെ ഉള്ളിലേക്ക് ഈച്ചകൾ പാറി ചെന്ന് നാട്ടുകാർ ബുദ്ധിമുട്ടിലായിരുന്നു. അപ്പിസ് ഡോസറ്റ എന്ന ശാസ്ത്രീയ നാമത്തിൽ അറിയപ്പെടുന്ന ഈ ഈച്ചയെ പെരുംതേനീച്ച കാട്ടീച്ച എന്നീ പേരുകളിലും അറിയപ്പെടുന്നു. ഇതിന്റെ കൂട്ടമായുളള കുത്തേറ്റാൽ മരണം വരെ സംഭവിക്കുന്നതാണ്. ഏതാനും മാസങ്ങൾക്ക് മുമ്പ് ഇത്തരത്തിലുള്ള ഈച്ചയുടെ കുത്തേറ്റ് കുറ്റിപ്പുറത്ത് ഒരു വ്യക്തി മരണപ്പെട്ടിരുന്നു.

The post കാവുംപുറത്ത് വഴിയാത്രക്കാരെ കുത്തി പരിക്കേൽപ്പിച്ച പെരുംതേനീച്ചയുടെ കൂടുകൾ നീക്കം ചെയ്തു appeared first on Valanchery Online.

അധികൃതർ തിരിഞ്ഞ് നോക്കിയില്ല; കുറ്റിപ്പുറത്ത് കിണറ്റിൽ വീണ പന്നിയെ രക്ഷിച്ച് നാടുകാർ

വളാഞ്ചേരിക്കാരൻ — Thu, 13 Oct 2022 00:31:00 +0000

കുറ്റിപ്പുറം : കിണറ്റിൽ വീണ പന്നിയെ രക്ഷപ്പെടുത്തണമെന്ന നാട്ടുകാരുടെ അഭ്യർത്ഥന അധികൃതർ കണ്ടില്ലെന്നു നടിച്ചപ്പോൾ ഒടുവിൽ നാട്ടുകാർതന്നെ പന്നിയെ രക്ഷപ്പെടുത്തി. താഴേയങ്ങാടി ലൗലി സ്ട്രീറ്റിലെ ചേക്കുട്ടിയുടെ ആൾമറയില്ലാത്ത കിണറ്റിൽ ബുധനാഴ്ച പുലർച്ചെയാണ് പന്നി വീണത്. കുറ്റിപ്പുറം പോലീസിനെയാണ് നാട്ടുകാർ ആദ്യം വിവരമറിയിച്ചത്. പോലീസ് അഗ്നിരക്ഷാസേനയെ അറിയിക്കാൻ നിർദേശിച്ചു. അഗ്നിരക്ഷാസേന പഞ്ചായത്ത് സെക്രട്ടറിയെ അറിയിക്കാനാണ് നിർദേശിച്ചത്. പഞ്ചായത്ത് സെക്രട്ടറി അഗ്നിരക്ഷാസേനയെയും പോലീസിനെയും അറിയിക്കാനാണ് നിർദേശിച്ചത്. എല്ലാ വകുപ്പ് അധികൃതരും ഉത്തരവാദിത്വമൊഴിയാൻ ശ്രമിച്ചതോടെ നാട്ടുകാർതന്നെ മുന്നിട്ടിറങ്ങുകയായിരുന്നു. അധികൃതരുടെ നിലപാടിൽ നാട്ടുകാർ പ്രതിഷേധം രേഖപ്പെടുത്തി. വാർഡ് മെമ്പർ ബേബി, ദാസൻ, ഷെഫീഖ്, ജാഫർ എന്നിവർ നേതൃത്വം നൽകി.

The post അധികൃതർ തിരിഞ്ഞ് നോക്കിയില്ല; കുറ്റിപ്പുറത്ത് കിണറ്റിൽ വീണ പന്നിയെ രക്ഷിച്ച് നാടുകാർ appeared first on Valanchery Online.

കുറ്റിപ്പുറം മിനിപമ്പയിൽ രക്ഷാപ്രവർത്തനങ്ങൾക്കായി ബോട്ടുകൾ എത്തിച്ചു

Basith Vakkarath — Mon, 27 Jun 2022 11:19:25 +0000

കുറ്റിപ്പുറം: ഭാരതപ്പുഴയിലെ രക്ഷാപ്രവർ ത്തനങ്ങൾക്കുള്ള ബോട്ടുകൾ മിനിപമ്പയിൽ എത്തി. മൂന്ന് ബോട്ടുകളാണ് പുഴയിലെ രക്ഷാദൗത്യത്തിനായി ഇന്നലെ മിനിപമ്പയിൽ എത്തിയത്. നേരത്തെ കെ.ടി.ഡി.സിയുടെ മിനി ബോട്ടുകളാണ് ഭാരതപ്പുഴയിലെ രക്ഷാപ്രവർത്തനങ്ങൾക്ക് ഉപയോഗിച്ചിരുന്നത്. ഇത് ഉപയോഗശൂന്യമായതിനെ തുടർന്നാണ് തീരദേശ പൊലിസ് സ്റ്റേഷനിൽ നിന്നും മൂന്ന് ചെറിയ ബോട്ടുകൾ മിനിപമ്പയിൽ എത്തിച്ചത്.

കഴിഞ്ഞ ദിവസം കുറ്റിപ്പുറം പൊലിസ് വിളിച്ചു ചേർത്ത യോഗത്തിൽ ഇതു സംബന്ധിച്ച തീരുമാനമെടുത്തിരുന്നു.
പുഴയിലെ അപകടമേഖലകളിൽ മുന്നറിയിപ്പ്ബോർഡുകളും സ്ഥാപിക്കും കൂടാതെ പുഴയിൽ ഉയർന്നു നിൽക്കുന്ന ബലൂൺ ബോർഡുകളും സ്ഥാപിക്കാനുള്ള പദ്ധതിയിലാണ് അധികൃതർ.
സ്വകാര്യവ്യക്തികളുടെ പറമ്പുകളിൽ നിന്ന് പുഴയിലേക്ക് ഇറങ്ങുന്ന വഴികൾ അടക്കാനും തീരുമാനിച്ചിട്ടുണ്ട്. അപകട സമയത്ത് രക്ഷാപ്രവർത്തനത്തിൽ താൽപര്യമുള്ള യുവാക്കൾക്കും മറ്റും അഗ്നി രക്ഷാ സേനയുടെ നേതൃത്വത്തിൽ പരിശീലനം നൽകുകയും ചെയ്യും.

പഞ്ചായത്തിന്റെ നേതൃത്വത്തിൽ കുട്ടികൾക്ക് നീന്തൽ പരിശീലനം നൽകുന്നതിന് പദ്ധതികൾ ആവിഷ്കരിച്ചതായി പഞ്ചായത്ത് പ്രസിഡന്റ് ഫസീന അഹമ്മദ്കുട്ടി അറിയിച്ചു.

The post കുറ്റിപ്പുറം മിനിപമ്പയിൽ രക്ഷാപ്രവർത്തനങ്ങൾക്കായി ബോട്ടുകൾ എത്തിച്ചു appeared first on Valanchery Online.

വെട്ടിച്ചിറയിൽ കെട്ടിട്ടം തകർന്നുവീണത് ആശങ്ക പരത്തി

വളാഞ്ചേരിക്കാരൻ — Sun, 27 Feb 2022 06:02:25 +0000

ആതവനാട്: വെട്ടിച്ചിറയിൽ പൊളിച്ചുകൊണ്ടിരുന്ന കെട്ടിടം തകർന്നു വീണത് ആശങ്ക പടർത്തി. ദേശീയപാത വികസനത്തിൻ്റെ ഭാഗമായി വെട്ടിച്ചിറ അങ്ങാടിയിൽ സ്ഥലമേറ്റെടുത്ത പ്രദേശത്ത് സ്ഥിതി ചെയ്തിരുന്ന ബഹുനില കെട്ടിടം കഴിഞ്ഞ കുറച്ച് ദിവസങ്ങളായി പൊളിച്ച് വരികയായിരുന്നു. ശനിയാഴ്ച രാത്രി ഏഴേ മുക്കാലോടെയാണ് കെട്ടിടത്തിൻ്റെ ഒരു വശം പൊടുന്നനെ തകർന്ന് വീണത്. നേരത്തെ ഈ കെട്ടിടത്തിൻ്റെ വശങ്ങളിൽ സമീപത്തെ ക്വാർട്ടേഴ്സുകളിൽ താമസിക്കുന്ന ഇതര സംസ്ഥാന തൊഴിലാളികൾ കൂട്ടം കൂടിയിരുന്നിരുന്നു. കെട്ടിടം തകർന്നത് അറിഞ്ഞ് ഇവരിൽ ആരെങ്കിലും അകപ്പെട്ടിരിക്കാമെന്ന സംശയത്തിൽ പോലീസും ഫയർ ഫോഴ്സും ചേർന്ന് തിരച്ചിൽ നടത്തി ആരും അകപ്പെട്ടില്ലെന്ന് ഉറപ്പ് വരുത്തിയ്തോടെയാണ് ആശങ്കയ്ക്ക് വിരാമമായത്.

The post വെട്ടിച്ചിറയിൽ കെട്ടിട്ടം തകർന്നുവീണത് ആശങ്ക പരത്തി appeared first on Valanchery Online.

വെട്ടിച്ചിറയിൽ നാല് ദിവസമായി കിണറിൽ കുടുങ്ങിയ പൂച്ചയെ സാഹസികമായി രക്ഷപ്പെടുത്തി

വളാഞ്ചേരിക്കാരൻ — Tue, 08 Feb 2022 21:53:08 +0000

ആതവനാട്: അബദ്ധത്തിൽ കിണറ്റിലകപ്പെട്ട് നാല് ദിവസത്തോളമായി കുടുങ്ങിയ പൂച്ചക്ക് രക്ഷകരായത് ട്രോമ കെയർ വളണ്ടിയർമാർ. വെട്ടിച്ചിറയിൽ ഫോക്കസ് ആട്ടോമൊബൈൽസ് എന്ന സ്ഥാപനത്തിന് സമീപത്തെ കിണറ്റിലകപ്പെട്ട പൂച്ചക്കാണ് വളാഞ്ചേരി ട്രോമാകെയർ പ്രവർത്തകർ തുണയായത്. അബദ്ധവശാൽ കിണറ്റിൽ വീണ പൂച്ചയെ രക്ഷിക്കാൻ നാട്ടുകാർ ശ്രമിച്ചെങ്കിലും നടന്നില്ല. തുടർന്ന് വാട്സാപ്പ് ഗ്രൂപ്പുകളിലൂടെ വളാഞ്ചേരിയിലെ ട്രോമാകെയർ പ്രവർത്തകർ അറിഞ്ഞ് ദൗത്യം ഏറ്റെടുക്കുകയുമായിരുന്നു.

വളാഞ്ചേരി സ്റ്റേഷൻ യൂണിറ്റ് അംഗങ്ങളായ ലീഡർ സൈഫു പാടത്തിൻ്റെ നേതൃത്വത്തിൽ ജാസിർ , സതീഷൻ എന്നിവർ ചേർന്നാണ് അവശയായ പൂച്ചയെ പുറത്തെടുത്തത്. കഴിഞ്ഞ ദിവസങ്ങളിൽ ആട്ടോമൊബൈൽ ജീവനക്കാർ കിണറ്റിലേക്ക് ഭക്ഷണമെത്തിച്ചെങ്കിലും അവശയായ പൂച്ച ഭക്ഷണം കഴിച്ചിരുന്നില്ല. പൂച്ച കരക്കെത്തിയതിൻ്റെ ആശ്വാസത്തിലാണ് വർക്ക്ഷോപ്പ് ജീവനക്കാർ.

The post വെട്ടിച്ചിറയിൽ നാല് ദിവസമായി കിണറിൽ കുടുങ്ങിയ പൂച്ചയെ സാഹസികമായി രക്ഷപ്പെടുത്തി appeared first on Valanchery Online.

ആദ്യ ദിനത്തിലെ തിരച്ചിൽ അവസാനിപ്പിച്ചു; കുറ്റിപ്പുറത്ത് പുഴയിൽ ചാടിയ ആളെ കണ്ടെത്തിയില്ല

വളാഞ്ചേരിക്കാരൻ — Sun, 17 Oct 2021 15:25:56 +0000

കുറ്റിപ്പുറം: ശനിയാഴ്ച കുറ്റിപ്പുറം പാലത്തിൽ നിന്ന് പുഴയിലേക്ക് ചാടിയ ആളെ കണ്ടെത്താനായില്ല. മഴയും പുഴയിലെ വെള്ളവും അടിയൊഴുക്കും കൂടികൊണ്ടിരുന്നതിനാൽ ആദ്യ ദിവസത്തെ തിരച്ചിൽ ഇന്ന് വൈകീട്ട് അഞ്ച് മണിയോടെ അവസാനിപ്പിച്ചു. പൊന്നാനി ഫയർ സ്റ്റേഷനിൽ നിന്നുള്ള ഉദ്യോഗസ്ഥരാണ് ഇന്ന് തിരച്ചിലിന് നേതൃത്വം നൽകിയത്. കനത്ത ഒഴുക്കും കൂടെ മാലിന്യങ്ങളും വരുന്നത് ബോട്ടിൻ്റെ എഞ്ചിൻ്റെ പ്രവർത്തനത്തെ ബാധിക്കുന്നുണ്ടെന്ന് ഉദ്യോഗസ്ഥർ പറഞ്ഞു. രണ്ടാം ദിവസത്തെ തിരച്ചിൽ തിങ്കളാഴ്ച രാവിലെ ഒമ്പത് മണിക്ക് ആരംഭിക്കും.

The post ആദ്യ ദിനത്തിലെ തിരച്ചിൽ അവസാനിപ്പിച്ചു; കുറ്റിപ്പുറത്ത് പുഴയിൽ ചാടിയ ആളെ കണ്ടെത്തിയില്ല appeared first on Valanchery Online.