Loksabha Election 2019 Archives - Valanchery Online

നോട്ട: മലപ്പുറത്ത‌് 4480, പൊന്നാനിയിൽ 6231

വളാഞ്ചേരിക്കാരൻ — Fri, 24 May 2019 15:50:04 +0000

മലപ്പുറം: ലോക‌്സഭാ മണ്ഡലം തെരഞ്ഞെടുപ്പ‌് ഫലം പുറത്തുവന്നപ്പോൾ നോട്ടക്ക‌് ലഭിച്ചത‌് മലപ്പുറത്ത‌് 4480ഉം പൊന്നാനിയിൽ 6231ഉം വോട്ട‌്. മലപ്പുറത്ത‌് സ്വതന്ത്രർക്ക‌് ലഭിച്ചത‌് 3126 വോട്ടാണ‌്. ഇതിൽ എൽഡിഎഫ‌് സ്ഥാനാർഥി വി പി സാനുവിന്റെ അപരന‌് 2203 വോട്ട‌ുണ്ട‌്. പിഡിപി സ്ഥാനാർഥി നിസാർ മേത്തർ 3687 വോട്ടും നേടി.

പൊന്നാനിയിൽ സ്വതന്ത്രർക്ക‌് 25,810 വോട്ടാണ‌് കിട്ടിയത‌്. ഇതിൽ 4893 എണ്ണം എൽഡിഎഫ‌് സ്ഥാനാർഥി പി വി അൻവറിന്റെ അപരന്മാരുടേതാണ‌്. പിഡിപി സ്ഥാനാർഥി പൂന്തുറ സിറാജിന‌് 6122 വോട്ട് കിട്ടി. മലപ്പുറത്ത‌് 181ഉം പൊന്നാനിയിൽ 101ഉം വോട്ട‌് അസാധുവായി.

The post നോട്ട: മലപ്പുറത്ത‌് 4480, പൊന്നാനിയിൽ 6231 appeared first on Valanchery Online.

തെരഞ്ഞെടുപ്പ് വിജയം; വളാഞ്ചേരിയിൽ ബി.ജെ.പി ആഹ്ലാദം പ്രകടനം നടത്തി

വളാഞ്ചേരിക്കാരൻ — Fri, 24 May 2019 01:57:53 +0000

വളാഞ്ചേരി: കേന്ദ്രത്തിൽ നരേന്ദ്രമോദിയുടെ വിജയത്തിൽ ബി.ജെ.പി. പ്രവർത്തകർ വളാഞ്ചേരി നഗരത്തിൽ ആഹ്ലാദപ്രകടനം നടത്തി. സുരേഷ് പാറത്തൊടി, പി.പി. ഗണേശൻ, ഉണ്ണി വൈക്കത്തൂർ തുടങ്ങിയവർ നേതൃത്വംനൽകി.

ബി.ജെ.പി.യുടെ വിജയത്തിൽ എടയൂർ പഞ്ചായത്ത് ബി.ജെ.പി. കമ്മിറ്റി ബൈക്ക് റാലി നടത്തി. കെ.വി. മണികണ്ഠൻ, കെ.പി. ചന്ദ്രൻ, പരമേശ്വരൻ ചീനിച്ചോട്, ഹരിനന്ദനം ഗോപാലകൃഷ്ണൻ, കെ.കെ. ഗോപിനാഥ് എന്നിവർ നേതൃത്വംനൽകി.

The post തെരഞ്ഞെടുപ്പ് വിജയം; വളാഞ്ചേരിയിൽ ബി.ജെ.പി ആഹ്ലാദം പ്രകടനം നടത്തി appeared first on Valanchery Online.

യുഡിഎഫിനെ തുണച്ച് കേരളം; നാല് കാരണങ്ങൾ

വളാഞ്ചേരിക്കാരൻ — Thu, 23 May 2019 19:36:39 +0000

കേരളം ഇപ്പോള്‍ ഒന്നടങ്കം യുഡിഎഫിനെ തുണയ്ക്കുമ്പോള്‍ അതിന്റെ മുഖ്യ കാരണങ്ങള്‍ നാലാണ്. ശബരിമല പ്രശ്നത്തില്‍ സിപിഎമ്മിന്റെ വോട്ട് ബാങ്കിലുണ്ടുായ വിള്ളല്‍, മോദി സര്‍ക്കാരിനെതിരെ കോണ്‍ഗ്രസ്സിനനുകൂലമായി ന്യൂനപക്ഷ വോട്ടുകളുടെ ഏകീകരണം, പ്രളയം, രാഹുലിന്റെ വയനാട്ടിലെ സ്ഥാനാര്‍ത്ഥിത്വം എന്നീ ഘടകങ്ങളാണ് ഇടതുപക്ഷത്തിന്റെ ഈ വന്‍വീഴ്ചയ്ക്ക് പിന്നില്‍.

പാലക്കാട് എം ബി രാജേഷിനെതിരെ കോണ്‍ഗ്രസ്സിന്റെ വി കെ ശ്രികണ്ഠന്‍ നടത്തിയ വന്‍മുന്നേറ്റമാണ് ഈ തിരഞ്ഞെടുപ്പിലെ ഏറ്റവും വലിയ അട്ടിമറി. വടകരയില്‍ പി ജയരാജന്‍ പിന്നിലായതുപോലും പാലക്കാട്ടെ അട്ടിമറിക്ക് മുന്നില്‍ ഒന്നുമല്ല. ഏതുറക്കത്തിലും സഖാവ് കോടിയേരിയോട് ചോദിച്ചാല്‍ അദ്ദേഹം ഉറപ്പിച്ചു പറയുമായിരുന്ന സീറ്റായിരുന്നു പാലക്കാട്. അവിടെ ശ്രികണ്ഠന്‍ രാജേഷിന് ഒത്തൊരു എതിരാളിയല്ലെന്ന് കോണ്‍ഗ്രസ്സുകാര്‍ പോലും കരുതിയിരുന്നു. പാലക്കാട്ട് രാജേഷ് വീണതോടെ യുഡിഎഫ് തരംഗം പകല്‍ പോലെ വ്യക്തമാവുകയായിരുന്നു.

വളരെ നേരത്തെ തന്നെ സ്ഥാനാര്‍ത്ഥി പട്ടിക പ്രഖ്യാപിച്ച് കളത്തിലിറങ്ങിയ ഇടതുപക്ഷത്തിന് തുടക്കത്തില്‍ പ്രതീക്ഷകളേറെയായിരുന്നു. പൊതുവെ മികച്ച സ്ഥാനാര്‍ത്ഥികളെയാണ് ഇടതുപക്ഷം രംഗത്തിറക്കിയത്. എന്തു വിലകൊടുത്തും യു ഡിഎഫിനെ നേരിടണമെന്ന പിണറായിയുടെ നിലപാടാണ് നാല് സിപിഎം എല്‍ എ മാരുടെ സ്ഥാനാര്‍ത്ഥിത്വത്തില്‍ പ്രതിഫലിച്ചത്. വടകരയില്‍ ജയരാജന് എതിരെ കോണ്‍ഗ്രസ്സിന് സ്ഥാനാര്‍ത്ഥികളില്ല എന്നൊരു നിലവരെ ആദ്യമുണ്ടായി. പക്ഷേ, കോണ്‍ഗ്രസ് ഇടതുപക്ഷത്തെ ഞെട്ടിച്ചു. വടകരയില്‍ മുരളീധരന്‍ വന്നു. ആറ്റിങ്ങലിൽ അടൂര്‍ പ്രകാശ് കളത്തിലിറങ്ങി. എറണാകുളത്ത് കെ വി തോമസിന് പകരം ഹൈബി ഈഡന്‍ , കാസര്‍കോട്ട് രാജ്മോഹന്‍ ഉണ്ണിത്താന്‍ , കണ്ണൂരില്‍ കെ സുധാകരന്‍ – കോണ്‍ഗ്രസ്സിന്റെ സ്ഥാനാര്‍ത്ഥികള്‍ എണ്ണം പറഞ്ഞവരായിരുന്നു.

ഇനിയിപ്പോള്‍ ഇടതുപക്ഷത്തിന് തീര്‍ച്ചയായും കാര്യമായ ആത്മപരിശോധന നടത്തേണ്ടി വരും. ശബരിമല വിഷയം കൈകാര്യം ചെയ്ത രീതിയെക്കുറിച്ച് കാര്യമായ വിമര്‍ശം സിപിഎമ്മില്‍ നിന്നു തന്നെയുണ്ടാവും. സുപ്രീംകോടതി വിധി നടപ്പാക്കേണ്ട ബാദ്ധ്യതയും കടമയുമുള്ളപ്പോള്‍ തന്നെ അതിന് സ്വീകരിച്ച വഴികളെച്ചൊല്ലിയായിരിക്കും പിണറായി വിജയന്‍ വിചാരണ ചെയ്യപ്പെടുക. പ്രളയം കൈകാര്യം ചെയ്ത രീതിയേക്കാള്‍ പ്രളയത്തിന് കാരണമായത് അണക്കെട്ടുകള്‍ യഥാസമയം തുറന്നുവിടാത്തതുകൊണ്ടാണെന്ന ശക്തമായ വികാരം ജനങ്ങള്‍ക്കിടയിലുണ്ടായിരുന്നു. ഡാം മാനേജ്മെന്റിലുണ്ടണായ വീഴ്ചയാണ് പ്രളയത്തിന് കാരണമായതെന്ന അമിക്കസ് ക്യൂറിയുടെ റിപ്പോര്‍ട്ടും ഇടതുപക്ഷ സര്‍ക്കാരിന് വിനയായി.

ഏറെ പാടുപെട്ടിട്ടും കേരളത്തില്‍ അക്കൗണ്ട് തുറക്കാനാവാതെ പോയത് ബിജെപിക്ക് കനത്ത തിരിച്ചടിയാണ്. കുമ്മനം തിരുവനന്തപുരത്ത് നിന്ന് കരകയറുമെന്ന് ബിജെപി ശരിക്കും പ്രതീക്ഷിച്ചിരുന്നു. ശബരിമല പ്രശ്നത്തിലുണ്ടാക്കാനായ ധ്രുവീകരണത്തിനും കേരളത്തില്‍ ബിജെപിയെ രക്ഷിച്ചെടുക്കാനായില്ല എന്നതിന് ശ്രീധരന്‍പിള്ള ബിജെപി നേതൃത്വത്തോട് കണക്കുപറയേണ്ടി വരും.

The post യുഡിഎഫിനെ തുണച്ച് കേരളം; നാല് കാരണങ്ങൾ appeared first on Valanchery Online.

തൃശ്ശൂര്‍ ‘എടുത്തി’ല്ലെങ്കിലും സുരേഷ് ഗോപിയാണ് താരം: വോട്ടില്‍ വര്‍ധന രണ്ട് ലക്ഷം

വളാഞ്ചേരിക്കാരൻ — Thu, 23 May 2019 14:39:16 +0000

വെറും 17 ദിവസമാണ് സുരേഷ് ഗോപി തൃശ്ശൂരില്‍ പ്രചാരണ രംഗത്തുണ്ടായത്. അവസാന നിമിഷം അങ്കത്തട്ടിലേറിയ സ്ഥാനാര്‍ത്ഥി പക്ഷേ നേടിയ വോട്ടുകളുടെ എണ്ണം 293822. കൃത്യമായി പറഞ്ഞാല്‍ 2014ല്‍ ബിജെപി സ്ഥാനാര്‍ത്ഥിയായി മത്സരിച്ച കെ.പി ശ്രീശന്‍ നേടിയതിനെക്കാളും 191,141 വോട്ടുകളുടെ വര്‍ധനവ്. പ്രതാപനാണ് തൃശ്ശൂര്‍ പിടിച്ചടക്കിയതെങ്കിലും താരം സുരേഷ് ഗോപിയാണ്. രണ്ടാമത് എത്തിയ രാജാജിയെക്കാളും 20000 വോട്ടുകളുടെ കുറവ് മാത്രമാണ് സുരേഷ് ഗോപിക്ക് ഉണ്ടായിരുന്നത്.

2014ല്‍ താരതമ്യേന ബിജെപിക്ക് നാട്ടികയിലും പുതുക്കാടും മണലൂരുമാണ് ഏറ്റവും കൂടുകല്‍ വോട്ടുകള്‍ ലഭിച്ചത്. ഇവിടങ്ങളില്‍ 16000 ത്തില്‍ പരം വോട്ടുകളാണ് ബിജെപി നേടിയത്. ബിജെപിക്ക് ഏറ്റവും കുറവു വോട്ട് (12166) ലഭിച്ചത് തൃശ്ശൂര്‍ നിയമസഭാ മണ്ഡലത്തിലാണ്. അതേ തൃശ്ശൂര്‍ നിയമസഭാ മണ്ഡലത്തില്‍ സുരേഷ് ഗോപി രാജാജിയെ പിന്തള്ളി 37641 വോട്ടുകള്‍ നേടി രണ്ടാം സ്ഥാനത്തെത്തി. മിക്ക മണ്ഡലങ്ങളിലും 40000 ത്തോളം വോട്ടുകളാണ് സുരേഷ് ഗോപിക്ക് ലഭിച്ചത്. കുറവ് വോട്ട് ലഭിച്ച മണ്ഡലങ്ങളിലൊന്നാണ് തൃശ്ശൂര്‍.

വിജയിയായ ടിഎന്‍ പ്രതാപന് 415084 വോട്ടും, രാജാജിക്ക് 321456 വോട്ടും സുരേഷ് ഗോപിക്ക് 293822 വോട്ടുമാണ് ലഭിച്ചത്. 2014ല്‍ എല്‍ഡിഎഫിന് 389209 വോട്ടും യുഡിഎഫിന് 350982 വോട്ടും ബിജെപിക്ക് 102681 വോട്ടുമാണ് ലഭിച്ചത്. യുഡിഎഫ് വോട്ടില്‍ 64107 വോട്ടുകളുടെയും ബിജെപിക്ക് 191141 വോട്ടിന്റെയും വര്‍ധനവുണ്ടായപ്പോള്‍ എല്‍ഡിഎഫ് വോട്ടുകളില്‍ 67753 വോട്ടുകളുടെ കുറവുണ്ടായി. അതായത് എല്‍ഡിഎഫ് വോട്ടുകളില്‍ ശക്തമായ വിള്ളലുണ്ടാക്കാന്‍ സുരേഷ് ഗോപിക്കായി.

The post തൃശ്ശൂര്‍ ‘എടുത്തി’ല്ലെങ്കിലും സുരേഷ് ഗോപിയാണ് താരം: വോട്ടില്‍ വര്‍ധന രണ്ട് ലക്ഷം appeared first on Valanchery Online.

വോട്ടെണ്ണല്‍:- ഉദ്യോഗസ്ഥര്‍ക്ക‌് പരിശീലനം

വളാഞ്ചേരിക്കാരൻ — Fri, 17 May 2019 01:41:49 +0000

മലപ്പുറം:ലോക്‌സഭാ തെരഞ്ഞെടുപ്പ് വോട്ടെണ്ണലുമായി ബന്ധപ്പെട്ട് കൗണ്ടിങ് സൂപ്പർവൈസർ, അസിസ്റ്റന്റ്, മൈക്രോ ഒബ്‌സർവർമാർ തുടങ്ങിയവർക്ക‌് പരിശീലന ക്ലാസ‌് സംഘടിപ്പിച്ചു. ഇലക്ഷൻ ഡെപ്യൂട്ടി കലക്ടർ വി കെ അനിൽകുമാർ നേതൃത്വംനൽകി. സ്വീപ് കോഡിനേറ്റർ അൻസു ബാബു ക്ലാസെടുത്തു. വോട്ടെണ്ണൽ നടപടിക്ക‌് 619 ഉദ്യോഗസ്ഥരെയാണ് ജില്ലയിൽ നിയോഗിച്ചിട്ടുള്ളത്. 244 മൈക്രോ ഒബ്‌സർവർമാർ, 216 കൗണ്ടിങ് സൂപ്പർ വൈസർമാർ, 230 കൗണ്ടിങ് സ്റ്റാഫ‌് എന്നിവരെയാണ‌് നിയമിച്ചത‌്. സെക്കൻഡ് റാൻഡമൈസേഷനുശേഷം നിയോജക മണ്ഡല കൗണ്ടിങ് ഹാൾ അടിസ്ഥാനത്തിലുള്ള ഉദ്യോഗസ്ഥരുടെ പട്ടിക 22ന് അസി. റിട്ടേണിങ് ഓഫീസർമാർക്ക് കൈമാറും. അവർ ഉദ്യോഗസ്ഥരെ ഫോൺ മുഖേന കൗണ്ടിങ് ഹാൾ സംബന്ധമായ വിവരം അറിയിക്കും.

ഓരോ അസംബ്ലി നിയോജക മണ്ഡലത്തിനും ഓരോ റൂം എന്ന നിലയിലാണ് വോട്ടെണ്ണൽ ക്രമീകരിച്ചിരിക്കുന്നത്. ഓരോ റൂമിലും 12 ടേബിൾ സജ്ജീകരിക്കും. ഓരോ ടേബിളിലും ഒരു കൗണ്ടിങ് സൂപ്പർവൈസർ, കൗണ്ടിങ് അസിസ്റ്റന്റ്, മൈക്രോ ഒബ്‌സർവർ എന്നിവരുണ്ടാകും. 23ന‌് രാവിലെ എട്ടിനാണ് വോട്ടെണ്ണൽ ആരംഭിക്കുക.

The post വോട്ടെണ്ണല്‍:- ഉദ്യോഗസ്ഥര്‍ക്ക‌് പരിശീലനം appeared first on Valanchery Online.

ജില്ലയിൽ വോട്ടെണ്ണലിനുള്ള ഒരുക്കങ്ങൾ തുടങ്ങി

വളാഞ്ചേരിക്കാരൻ — Tue, 14 May 2019 04:45:31 +0000

മലപ്പുറം: ലോക്‌സഭ തിരഞ്ഞെടുപ്പിന്റെ വോട്ടെണ്ണലിനുള്ള ഒരുക്കങ്ങൾ ജില്ലയിലെ വിവിധ വോട്ടെണ്ണൽ കേന്ദ്രങ്ങളിൽ തുടങ്ങി. വോട്ടെണ്ണൽ നടപടികൾക്കായി 619 ഉദ്യോഗസ്ഥരെയാണ് ജില്ലയിൽ നിയോഗിച്ചിട്ടുള്ളത്. 244 മൈക്രോ ഒബ്‌സർവർമാരെയും 216 കൗണ്ടിംഗ് സൂപ്പർവൈസർമാരെയും 230 കൗണ്ടിംഗ് സ്റ്റാഫിനെയുമാണ് ജില്ലയിൽ നിയോഗിച്ചിട്ടുള്ളത്. ഗസറ്റഡ് റാങ്കിലുള്ള കേന്ദ്രസർക്കാർ ഉദ്യോഗസ്ഥരെയാണ് മൈക്രോ ഒബ്‌സർവർമാരായി നിയമിച്ചിട്ടുള്ളത്.

ബാക്കിയുള്ളവർ സംസ്ഥാന സർക്കാർ ഉദ്യോഗസ്ഥരാണ്. ഇ.വി.എമ്മുകൾ സൂക്ഷിച്ചിരിക്കുന്ന സ്‌ട്രോംഗ് റൂമുകളിൽ നിന്ന് കൗണ്ടിംഗ് സെന്ററിലെ ടേബിളുകളിലേക്ക് ഓരോ റൗണ്ടിലേക്കുമുള്ളവ എത്തിച്ച ശേഷമാണ് വോട്ടെണ്ണൽ നടക്കുക. വോട്ടർമാരുടെ എണ്ണത്തിനനുസരിച്ച് ഒരു മണ്ഡലത്തിൽ ശരാശരി 12 ടേബിളുകളുണ്ടാവും. ഓരോ ടേബിളിലും കൗണ്ടിംഗ് സൂപ്പർവൈസർ, കൗണ്ടിംഗ് അസിസ്റ്റന്റ്, കൗണ്ടിംഗ് മൈക്രോ ഒബ്‌സർവർമാർ എന്നിവർ വീതമുണ്ടാവും. ഇതിനു പുറമെ അസിസ്റ്റന്റ് റിട്ടേണിംഗ് ഓഫീസർമാർക്ക് പ്രത്യേകമായി ടേബിളുണ്ടാവും.

കൗണ്ടിംഗിന്റെ ആദ്യ റാൻഡമൈസേഷൻ പൂർത്തിയായി. അടുത്ത റാൻഡമൈസേഷൻ പൊതുനിരീക്ഷകരുടെ നേതൃത്വത്തിൽ നടക്കും. ഉദ്യോഗസ്ഥർക്ക് ഏത് കേന്ദ്രത്തിലാണ് ഡ്യൂട്ടി, ടേബിൾ തുടങ്ങിയ കാര്യങ്ങൾ അടുത്ത റാൻഡമൈസേഷനിൽ അറിയാം. വോട്ടെണ്ണൽ ഉദ്യോഗസ്ഥർക്കുള്ള പരിശീലനം മേയ് 16,17 തീയതികളിലായി പ്ലാനിംഗ് സെക്രട്ടേറിയറ്റിലെ കോൺഫറൻസ് ഹാളിൽ സംഘടിപ്പിക്കും.

The post ജില്ലയിൽ വോട്ടെണ്ണലിനുള്ള ഒരുക്കങ്ങൾ തുടങ്ങി appeared first on Valanchery Online.

അമേത്തിയിൽ സ്ട്രോംഗ് റൂമിൽ നിന്ന് വോട്ടിംഗ് യന്ത്രങ്ങൾ ട്രക്കിൽ കടത്തുന്ന വീഡിയോ പുറത്ത്

വളാഞ്ചേരിക്കാരൻ — Fri, 10 May 2019 00:15:07 +0000

ന്യൂഡൽഹി: രാഹുൽ ഗാന്ധി മത്സരിക്കുന്ന അമേതി മണ്ഡലത്തിലെ സ്ട്രോംഗ് റൂമുകളിൽ നിന്ന് വോട്ടിംഗ് യന്ത്രങ്ങൾ പുറത്തേക്ക് കടത്തി. ഇ.വി.എമ്മുകൾ സ്ട്രോംഗ് റൂമിൽ നിന്ന് പുറത്തേക്കെത്തിച്ച് ട്രക്കിൽ കടത്തുന്ന വീഡിയോയാണ് പുറത്ത് വന്നത്. വിഡിയോ പുറത്തുവന്നതിനു പിന്നാലെ റീപോളിംഗ് നടത്തണമെന്ന ആവശ്യവുമായി കോൺഗ്രസ് അദ്ധ്യക്ഷനും കോൺഗ്രസ് സ്ഥാനാർത്ഥിയുമായ രാഹുൽഗാന്ധി രംഗത്തെത്തി.

മണ്ഡലത്തിലെ കോൺഗ്രസ് പ്രവർത്തകനാണ് ഇ.വി.എമ്മുകൾ പുറത്തേക്ക് എത്തിക്കുന്നതിന്റെ വീഡിയോ പുറത്തുവിട്ടത്. ഇ.വി.എമ്മുകൾ മാറ്റുന്നതു സംബന്ധിച്ച് തിരഞ്ഞെടുപ്പു കമ്മിഷന് അറിയിപ്പുകളൊന്നും ലഭിച്ചിട്ടില്ലെന്നും മെഷീനുകൾ കടത്തിയതിൽ ദുരൂഹതയുണ്ടെന്നും ഇയാൾ ആരോപിച്ചു. സംഭവത്തിൽ തിരഞ്ഞെടുപ്പു കമ്മിഷന് പരാതി നൽകിയിട്ടുണ്ട്. സംഭവത്തെക്കുറിച്ച് അന്വേഷിക്കാൻ ജില്ലാ ഓഫീസുമായി ബന്ധപ്പെട്ടെങ്കിലും പ്രതികരിക്കാൻ തയ്യാറായില്ലെന്ന് കോൺഗ്രസ് പ്രവർത്തകർ ആരോപിക്കുന്നു. മേയ് ആറിനായിരുന്നു അമേത്തിയിൽ വോട്ടെടുപ്പ് നടന്നത്.

The post അമേത്തിയിൽ സ്ട്രോംഗ് റൂമിൽ നിന്ന് വോട്ടിംഗ് യന്ത്രങ്ങൾ ട്രക്കിൽ കടത്തുന്ന വീഡിയോ പുറത്ത് appeared first on Valanchery Online.

അമേഠിയിൽ പച്ചമുളക് ചിഹ്നത്തിൽ സരിതാ നായർ

വളാഞ്ചേരിക്കാരൻ — Sat, 04 May 2019 04:51:41 +0000

അമേഠി: കോൺഗ്രസ് അധ്യക്ഷൻ രാഹുൽ ഗാന്ധിയുടെ മണ്ഡലമായ അമേഠിയിൽ സരിതാ എസ്. നായരും സ്ഥാനാർഥി. സ്വതന്ത്രയായാണ് മത്സരരംഗത്ത്. പച്ചമുളകാണ് സരിതയ്ക്ക്‌ അനുവദിച്ചിരിക്കുന്ന ചിഹ്നം. തിരുവനന്തപുരം മലയിൻകീഴ് വിളവൂർക്കലിലെ വീട്ടുവിലാസത്തിലാണ് പത്രിക സമർപ്പിച്ചിരിക്കുന്നത്.

രാഹുൽ ഗാന്ധി മത്സരിക്കുന്ന വയനാട്ടിലും സരിത നാമനിർദേശ പത്രിക നൽകിയിരുന്നു. എന്നാൽ ചില കേസുമായി ബന്ധപ്പെട്ട വിശദരേഖകൾ ഹാജരാക്കാനാവാതിരുന്നതിനാൽ പത്രിക തള്ളി. എറണാകുളം ലോക്‌സഭാ മണ്ഡലത്തിൽ നൽകിയ പത്രികയും തള്ളിപ്പോയി. മൊത്തം മത്സരാർത്ഥികളാണ് അമേത്തിയിൽ ഇത്തവണ ഉള്ളത്.

The post അമേഠിയിൽ പച്ചമുളക് ചിഹ്നത്തിൽ സരിതാ നായർ appeared first on Valanchery Online.

പൊന്നാനിയിൽ തോൽക്കുമെന്ന റിപ്പോർട്ട് വാസ്തവവിരുദ്ധം-ഇ.എൻ മോഹൻദാസ്

വളാഞ്ചേരിക്കാരൻ — Mon, 29 Apr 2019 02:41:46 +0000

മലപ്പുറം: പൊന്നാനിയിൽ പി.വി. അൻവറിന് തോൽവിയുണ്ടാവുമെന്ന് സംസ്ഥാനക്കമ്മിറ്റിക്ക് റിപ്പോർട്ട് നൽകിയെന്ന വാർത്ത വാസ്തവ വിരുദ്ധമെന്ന് ജില്ലാസെക്രട്ടറി ഇ.എൻ. മോഹൻദാസ്. 35,000 വോട്ടിനെങ്കിലും അൻവർ തോൽക്കുമെന്ന് സംസ്ഥാന കമ്മിറ്റിക്ക് റിപ്പോർട്ട് നൽകിയെന്നാണ് വാർത്ത പ്രചരിക്കുന്നത്.

മലപ്പുറത്ത് കുഞ്ഞാലിക്കുട്ടിയുടെ ഭൂരിപക്ഷം നന്നായി കുറയുമെന്നും റിപ്പോർട്ടിലുള്ളതായി പറയുന്നു. ബൂത്ത് കമ്മിറ്റികളിൽനിന്ന് ശേഖരിച്ച വിവരങ്ങളുടെ അടിസ്ഥാനത്തിലാണ് റിപ്പോർട്ട് നൽകിയതെന്നാണ് പറയുന്നത്. തവനൂർ, തൃത്താല, പൊന്നാനി മണ്ഡലങ്ങളിൽ മാത്രമേ അൻവറിന് ലീഡുണ്ടാവൂ. താനൂരിലടക്കം ഇ.ടിക്കാവും ഭൂരിപക്ഷമെന്ന് റിപ്പോർട്ടിലുണ്ടെന്ന് പറയുന്നു. എന്നാൽ ഇത്തരം വാർത്തകളെല്ലാം ഊഹങ്ങൾ മാത്രമാണെന്നും പൊന്നാനിയിൽ പാർട്ടിക്ക് നല്ല വിജയപ്രതീക്ഷയാണുള്ളതെന്നും സി.പി.എം ജില്ലാ സെക്രട്ടറി ഇ.എൻ മോഹൻദാസ് പറഞ്ഞു. 20,000 വോട്ടിനെങ്കിലും അൻവർ ജയിക്കുമെന്നാണ് പാർട്ടിയുടെ വിലയിരുത്തൽ. മലപ്പുറത്ത് നല്ല മുന്നേറ്റമുണ്ടാക്കാനും സാധിക്കുമെന്നും ഇ.എൻ. മോഹൻദാസ് പറഞ്ഞു.

The post പൊന്നാനിയിൽ തോൽക്കുമെന്ന റിപ്പോർട്ട് വാസ്തവവിരുദ്ധം-ഇ.എൻ മോഹൻദാസ് appeared first on Valanchery Online.

യു.ഡി.എഫ്. ചരിത്രവിജയം നേടും -വി.വി. പ്രകാശ്

വളാഞ്ചേരിക്കാരൻ — Wed, 24 Apr 2019 02:33:59 +0000

മലപ്പുറം: കേന്ദ്ര, സംസ്ഥാന സർക്കാരുകളുടെ ജനവിരുദ്ധ നയങ്ങൾക്കെതിരേയുള്ള പ്രതിഷേധമാണ് ലോക്‌സഭാ തിരഞ്ഞെടുപ്പിലെ ഉയർന്ന പോളിങ് ശതമാനമെന്ന് ഡി.സി.സി. പ്രസിഡന്റ് വി.വി. പ്രകാശ് പറഞ്ഞു. രാഹുൽഗാന്ധിയുടെ സ്ഥാനാർഥിത്വത്തിലൂടെ മതേതര ശക്തികളെ കൂട്ടിയിണക്കിയുള്ള മുന്നേറ്റത്തിന് സാക്ഷ്യംവഹിക്കുന്ന തിരഞ്ഞെടുപ്പാണിത്.

യു.ഡി.എഫ്. മികച്ച വിജയം നേടുമെന്ന പരിഭ്രാന്തിയിലാണ് സി.പി.എം. എം.കെ. രാഘവനെതിരേയും കെ. സുധാകരനെതിരേയും കള്ളക്കേസ് ചുമത്തിയത്. വർഗീയതക്കെതിരേയുള്ള പോരാട്ടത്തിന് ശക്തിപകരുന്ന ജനാധിപത്യത്തിന്റെ ഏറ്റവും ഉജ്ജ്വലമായ മുഹൂർത്തങ്ങളാകും വയനാട്, മലപ്പുറം, പൊന്നാനി പാർലമെന്റ് മണ്ഡലങ്ങൾ സമ്മാനിക്കുകയെന്നും അദ്ദേഹം പറഞ്ഞു.

The post യു.ഡി.എഫ്. ചരിത്രവിജയം നേടും -വി.വി. പ്രകാശ് appeared first on Valanchery Online.

വോട്ടിങ്ങില്‍ ക്രമക്കേട് ആരോപിക്കുന്നവര്‍ തെളിയിച്ചില്ലെങ്കില്‍ നടപടി

വളാഞ്ചേരിക്കാരൻ — Tue, 23 Apr 2019 10:12:33 +0000

തിരുവനന്തപുരം: വോട്ടിങ്ങില്‍ ക്രമക്കേട് ആരോപിക്കുന്നവര്‍ തെളിയിച്ചില്ലെങ്കില്‍ ഇന്ത്യന്‍ ശിക്ഷാ നിയമം സെക്ഷന്‍ 177 പ്രകാരം കേസെടുക്കുമെന്ന് മുഖ്യ തെരഞ്ഞെടുപ്പ് ഓഫിസര്‍ അറിയിച്ചു.

ഇക്കാര്യം പ്രിസൈഡിങ് ഓഫീസര്‍ ക്രമക്കേട് ഉന്നയിക്കുന്ന ആളെ ബോധ്യപ്പെടുത്തണം. പരാതിയില്‍ ഉത്തമ ബോധ്യത്തോടെ ഉറച്ചു നില്‍ക്കുകയാണെങ്കില്‍ ഡിക്ലറേഷന്‍ ഫോമില്‍ പരാതി എഴുതി വാങ്ങണം. ആരോപണം തെറ്റാണെന്നു തെളിഞ്ഞാല്‍ ഉടന്‍ പോലീസില്‍ ഏല്‍പ്പിക്കാന്‍ നടപടി സ്വീകരിക്കണം.

The post വോട്ടിങ്ങില്‍ ക്രമക്കേട് ആരോപിക്കുന്നവര്‍ തെളിയിച്ചില്ലെങ്കില്‍ നടപടി appeared first on Valanchery Online.

കേരളം വിധി എഴുതി തുടങ്ങി, ഉറച്ച പ്രതീക്ഷയോടെ മുന്നണികള്‍

വളാഞ്ചേരിക്കാരൻ — Tue, 23 Apr 2019 03:18:49 +0000

തിരുവനന്തപുരം: ലോക്‌സഭാ തിരഞ്ഞെടുപ്പിലേക്കുള്ള കേരളത്തിന്റെ ഊഴം ആരംഭിച്ചു. രാവിലെ ഏഴു മണിക്കു തന്നെ 20 മണ്ഡലത്തിലേക്കുള്ള വോട്ടെടുപ്പും ആരംഭിച്ചു. ഏഴു മണി മുതല്‍ വൈകിട്ട് 6 വരെയാണ് പോളിംഗ്. അതിരാവിലെ മുതല്‍ തന്നെ വിവിധ പോളിംഗ് സ്‌റ്റേഷനുകളില്‍ വോട്ടര്‍മാരുടെ നീണ്ട നിരയാണ് കാണാന്‍ കഴിയുന്നത്. 20 മണ്ഡലങ്ങളിലുമായി 227 സ്ഥാനാര്‍ത്ഥികളാണുള്ളത്. ഇവരില്‍ 23 പേര്‍ വനിതകളാണ്. വോട്ടര്‍ തിരിച്ചറിയല്‍ കാര്‍ഡ് ഇല്ലാത്തവര്‍ക്ക് പാസ്‌പോര്‍ട്ട്, ഡ്രൈവിംഗ് ലൈസന്‍സ്, ആധാര്‍, പാന്‍ കാര്‍ഡ് ഉള്‍പ്പെടെ 11 തിരിച്ചറിയല്‍ രേഖകളിലൊന്ന് ഹാജരാക്കി വോട്ടിടാന്‍ അനുമതിയുണ്ട്. വോട്ടെടുപ്പ് ആരംഭിക്കുന്നതിന് മുമ്ബ് മോക് പോള്‍ നടത്തി വോട്ടിംഗ് മെഷീനുകളില്‍ പ്രശ്‌നങ്ങളില്ലെന്ന് ഉദ്യോഗസ്ഥര്‍ ഉറപ്പാക്കി.

എന്നാല്‍ മോക് പോളിനിടെ ചില ബൂത്തുകളില്‍ വോട്ടിംഗ് യന്ത്രങ്ങളില്‍ ചെറിയ തകരാറുകള്‍ കണ്ടെത്തിയിരുന്നു. വോട്ടെടുപ്പിന് ആരംഭിക്കുന്നതിന് മുമ്ബ് തന്നെ മിക്കതും പരിഹരിച്ചു. ചിലയിടങ്ങളില്‍ തകരാറുകള്‍ പരിഹരിച്ച്‌ വരികയാണ്‌
കേരളത്തില്‍ ആകെ 2.61 കോടി വോട്ടര്‍മാരാണുള്ളത്. ഇതില്‍ 2,88,191 പേര്‍ കന്നിവോട്ടര്‍മാരാണ്. മലപ്പുറത്താണ് ഏറ്റവും കൂടുതല്‍ വോട്ടര്‍മാര്‍. ഏറ്റവും കുറവ് വയനാട്ടിലും. സംസ്ഥാനത്ത് ഒറ്റഘട്ടമായി നടക്കുന്ന തിരഞ്ഞെടുപ്പിന് ആകെ 24970 പോളിങ് ബൂത്തുകള്‍ സജ്ജമാക്കിയിട്ടുണ്ട്.

The post കേരളം വിധി എഴുതി തുടങ്ങി, ഉറച്ച പ്രതീക്ഷയോടെ മുന്നണികള്‍ appeared first on Valanchery Online.