Financial crimes Archives - Valanchery Online

ഓൺലൈൻ തട്ടിപ്പുകാർക്ക് സ്വന്തം ബാങ്ക് അക്കൗണ്ട് നൽകി; പിടിയിലായ മലപ്പുറം സ്വദേശി റിമാൻ്റിൽ

വളാഞ്ചേരിക്കാരൻ — Sun, 30 Nov 2025 06:25:48 +0000

കൊച്ചി: മെഡിക്കൽ കോളേജ് ആശുപത്രിയിൽ ചികിത്സയ്ക്കായി കൊച്ചിയിൽ തങ്ങിയ മലപ്പുറം സ്വദേശിക്ക് സൈബർതട്ടിപ്പിലൂടെ 36 ലക്ഷം രൂപ നഷ്ടപ്പെട്ട കേസിൽ യുവാവ് അറസ്റ്റിൽ. പണം അയച്ചുകൊടുക്കാൻ തട്ടിപ്പ് സംഘം ഉപയോഗിച്ച ബാങ്ക് അക്കൗണ്ടിന്റെ ഉടമ മലപ്പുറം മഞ്ചേരിസ്വദേശി നജീബിനെയാണ് (40) ചേരാനെല്ലൂർ എസ്.എച്ച്.ഒ ആർ. വിനോദിന്റെ നേതൃത്വത്തിൽ കസ്റ്റഡിയിലെടുത്തത്. മലപ്പുറം തിരൂരങ്ങാടി ഊരകം വേങ്ങര കുറ്റാളൂർ വള്ളിക്കാടൻവീട്ടിൽ സാദിഖ് അലിക്കാണ് 2024 നവംബർ മൂന്നിനും നവംബർ ആറിനുമിടെ 3605036 ലക്ഷം രൂപ നഷ്ടപ്പെട്ടത്. ചികിത്സാർത്ഥം ചേരാനെല്ലൂർ പള്ളിക്കവലയിലെ വാടകവീട്ടിൽ താമസിക്കുമ്പോൾ ഇൻസ്റ്റഗ്രാമിലൂടെ പരിചയപ്പെട്ട ആളാണ് ഓൺലൈൻ ജോബിലൂടെ ലാഭം വാഗ്ദാനം ചെയ്ത് പണം തട്ടിയത്. തട്ടിപ്പ് സംഘം നൽകിയ അക്കൗണ്ട് നമ്പരുകളിൽ 10 തവണയായിട്ടാണ് പണം കൈമാറിയത്.ബാങ്ക് അക്കൗണ്ടുകളിൽ ഒരെണ്ണം നജീബിന്റേതാണെന്ന് പൊലീസ് കണ്ടെത്തിയതിനെ തുടർന്നാണ് അറസ്റ്റ്. 12ലക്ഷം രൂപയാണ് ഈ അക്കൗണ്ടിൽ സാദിഖ് അലി കൈമാറിയത്. തട്ടിപ്പ് സംഘം നജീബിന്റെ അക്കൗണ്ട് മ്യൂൾ അക്കൗണ്ടായി ഉപയോഗിച്ചെന്നാണ് അനുമാനം. കേസിൽ യുവതികൾ ഉൾപ്പെടെ കണ്ണികളാണെന്നും കണ്ടെത്തി. നജീബ് മരം വെട്ട് തൊഴിലാളിയാണ്. കോടതിയിൽ ഹാജരാക്കി റിമാൻഡ് ചെയ്തു. എസ്.ഐ റഷീദ്, എസ്.സി.പി.ഒ വിമൽ, പ്രശാന്ത്, ജോസഫ്, സാവിൻ എന്നിവരും അന്വേഷണ സംഘത്തിൽപ്പെടുന്നു.

The post ഓൺലൈൻ തട്ടിപ്പുകാർക്ക് സ്വന്തം ബാങ്ക് അക്കൗണ്ട് നൽകി; പിടിയിലായ മലപ്പുറം സ്വദേശി റിമാൻ്റിൽ appeared first on Valanchery Online.

സാമ്പത്തികത്തട്ടിപ്പ്; പ്രവീൺ റാണയെ കസ്റ്റഡിയിൽ വാങ്ങി ചങ്ങരംകുളം പോലീസ്

വളാഞ്ചേരിക്കാരൻ — Wed, 26 Jul 2023 00:13:35 +0000

എടപ്പാൾ : കോടികൾ തട്ടിയെടുത്ത കേസിലെ ഒന്നാംപ്രതി പ്രവീൺ റാണ(36)യെ ചങ്ങരംകുളം പോലീസ് കസ്റ്റഡിയിൽ വാങ്ങി. ശുകപുരം സ്വദേശിയായ വീട്ടമ്മയിൽനിന്ന് അഞ്ചുലക്ഷംരൂപ തട്ടിയെടുത്തെന്ന പരാതിയിൽ ചങ്ങരംകുളം പോലീസെടുത്ത കേസിന്റെ അന്വേഷണത്തിനായാണിത്. തൃശ്ശൂരിലുള്ള കേസുകളിൽ റിമാൻഡിൽ കഴിയുകയായിരുന്നു ഇയാൾ.

തെളിവെടുപ്പിനും ചോദ്യംചെയ്യുന്നതിനുമായി കൊണ്ടുവന്ന പ്രതിയിൽനിന്ന് വിവരങ്ങൾ പോലീസ് ശേഖരിച്ചു. സംസ്ഥാനത്തിന്റെ വിവിധ ഭാഗങ്ങളിൽനിന്നായി കോടിക്കണക്കിനു രൂപ തട്ടിയെടുത്തതായാണ് ഇയാൾക്കെതിരേയുള്ള പരാതി. ക്രൈംബ്രാഞ്ചാണ് ഈ കേസന്വേഷിക്കുന്നത്. തൃശ്ശൂരിൽ സൈഫ് ആൻഡ് സ്‌ട്രോങ് ബിസിനസ് കൺസൾട്ടൻസി ഉടമയായ ഇയാൾക്കെതിരേയുള്ള പരാതിയിൽ സ്ഥാപനത്തിലെ ഒട്ടേറെ ജീവനക്കാരും പ്രതികളാണ്. ചങ്ങരംകുളം ഇൻസ്പെക്ടർ ബഷീർ ചിറക്കലിന്റെ നേതൃത്വത്തിൽ അന്വേഷണം പുരോഗമിക്കുകയാണ്. പ്രതിയെ പൊന്നാനി കോടതിയിൽ ഹാജരാക്കി.

The post സാമ്പത്തികത്തട്ടിപ്പ്; പ്രവീൺ റാണയെ കസ്റ്റഡിയിൽ വാങ്ങി ചങ്ങരംകുളം പോലീസ് appeared first on Valanchery Online.

വളാഞ്ചേരിയിൽ രേഖകളില്ലാത്ത 27.5 ലക്ഷം രൂപ പിടിച്ചു

വളാഞ്ചേരിക്കാരൻ — Thu, 27 Apr 2023 10:33:05 +0000

വളാഞ്ചേരി : ശരീരത്തിൽ ഒളിപ്പിച്ചുകടത്താൻ ശ്രമിച്ച അനധികൃത പണവുമായി മൂന്ന് കാർയാത്രികർ അറസ്റ്റിൽ. കോയമ്പത്തൂരിൽനിന്ന് വളാഞ്ചേരിയിൽ വിതരണംചെയ്യാനായി കൊണ്ടുവന്ന രേഖകളില്ലാത്ത 27.5ലക്ഷം രൂപയുമായി വളാഞ്ചേരി സ്വദേശികളായ മൂന്നു പേരെയാണ്‌ പോലീസ് പിടികൂടിയത്. വളാഞ്ചേരി വൈക്കത്തൂർ ‘ത്രിമൂർത്തി നിവാസി’ൽ ദത്താസേട്ട് (54), വളാഞ്ചേരി മൂച്ചിക്കൽ കളപ്പാട്ടിൽ ഹൗസിൽ നിസാർ (36) എന്നിവരും ഒരു സ്ത്രീയുമാണ് അറസ്റ്റിലായത്. സ്ത്രീയുടെ പേരു വിവരങ്ങൾ പോലീസ് വെളിപ്പെടുത്തിയിട്ടില്ല. വെള്ളിയാഴ്ച രാവിലെ വലിയകുന്ന് കൊടുമുടിയിൽവെച്ചാണ് വളാഞ്ചേരി എസ്.ഐ. ജലീൽ കറുത്തേടത്തും സംഘവും ഇവരെ കസ്റ്റഡിയിലെടുത്തത്.

നടപടിക്രമങ്ങൾക്കുശേഷം മുതലുകൾ കോടതിയിൽ ഹാജരാക്കി. എസ്.ഐ. അസീസ്, സി.പി.ഒ. ദീപു ഗിരീഷ്, സഫ്‌വാൻ, എ.എസ്.ഐ. അൻവർ എന്നിവരും പരിശോധനാ സംഘത്തിൽ ഉണ്ടായിരുന്നു. ജില്ലാ പോലീസ് മേധാവി സുനിൽദാസിന് ലഭിച്ച വിവരത്തിന്റെ അടിസ്ഥാനത്തിൽ തിരൂർ ഡിവൈ.എസ്.പി. ബിജുവിന്റെ നിർദേശപ്രകാരമാണ് പരിശോധനയും തുടർന്ന് പണവും പിടികൂടിയത്.

The post വളാഞ്ചേരിയിൽ രേഖകളില്ലാത്ത 27.5 ലക്ഷം രൂപ പിടിച്ചു appeared first on Valanchery Online.

വളാഞ്ചേരിയില്‍ വന്‍ കുഴല്‍പ്പണവേട്ട; കാറിലെ രഹസ്യഅറയില്‍ ഒളിപ്പിച്ച നിലയിൽ കണ്ടെത്തിയത് 1.76 കോടി രൂപ

വളാഞ്ചേരിക്കാരൻ — Tue, 18 Apr 2023 10:15:31 +0000

വളാഞ്ചേരി: വളാഞ്ചേരിയില്‍ കാറില്‍ കടത്തുകയായിരുന്ന 1.76 കോടി രൂപയുടെ കുഴല്‍പ്പണം പിടികൂടി. എടപ്പാള്‍ കോലൊളമ്പ് സ്വദേശിയായ അഫ്‌സലില്‍നിന്നാണ് പണം പിടിച്ചെടുത്തത്. ഇയാള്‍ സഞ്ചരിച്ചിരുന്ന കാറും കസ്റ്റഡിയിലെടുത്തിട്ടുണ്ട്. വളാഞ്ചേരി പോലീസ് നടത്തിയ വാഹന പരിശോധനയിലാണ് ചൊവ്വാഴ്ച രാവിലെ എട്ടരയോടെ കുഴല്‍പ്പണവുമായി എത്തിയ അഫ്‌സല്‍ പിടിയിലായത്. കാറിന്റെ പിന്‍സീറ്റിനടിയിലെ രഹസ്യഅറയിലാണ് പണം സൂക്ഷിച്ചിരുന്നത്. വളാഞ്ചേരി എസ്.എച്ച്.ഒ. ജലീല്‍ കറുത്തേടത്തിന്റെ നേതൃത്വത്തില്‍ നടത്തിയ വിശദമായ പരിശോധനയിലാണ് രഹസ്യഅറയില്‍ ഒളിപ്പിച്ച പണം കണ്ടെത്തിയത്. പിടിച്ചെടുത്ത പണവും വാഹനവും തിരൂര്‍ ജുഡീഷ്യല്‍ ഫസ്റ്റക്ലാസ് മജിസ്‌ട്രേറ്റ് കോടതിയില്‍ ഹാജരാക്കി.

The post വളാഞ്ചേരിയില്‍ വന്‍ കുഴല്‍പ്പണവേട്ട; കാറിലെ രഹസ്യഅറയില്‍ ഒളിപ്പിച്ച നിലയിൽ കണ്ടെത്തിയത് 1.76 കോടി രൂപ appeared first on Valanchery Online.

വളാഞ്ചേരിയിൽ 1.68 കോടിയുടെ കുഴൽപ്പണം പിടികൂടി

വളാഞ്ചേരിക്കാരൻ — Thu, 06 Apr 2023 01:32:04 +0000

വളാഞ്ചേരി : രേഖകളില്ലാതെ കൊണ്ടുപോവുകയായിരുന്ന ഒരുകോടി അറുപത്തിയെട്ട് ലക്ഷം രൂപ പിടികൂടി. ഇതുമായി ബന്ധപ്പെട്ട് ഊരകം ഒ.കെ. മുറി സ്വദേശികളായ പൊതാപ്പറമ്പത്ത് വീട്ടിൽ മുഹമ്മദാലി (34), കുന്നത്തൊടി വീട്ടിൽ മൻസൂർ (37)എന്നിവരെ വളാഞ്ചേരി പോലീസ് പിടികൂടി.

പെരിന്തൽമണ്ണ റോഡിൽ വളാഞ്ചേരി പോലീസ് സ്റ്റേഷനുമുൻവശത്തുനിന്നാണ് കുഴൽപ്പണം പിടികൂടിയത്. കാറിൽ പ്രത്യേകമായി നിർമിച്ച രഹസ്യ അറയിലാണ് പണം സൂക്ഷിച്ചിരുന്നത്. ജില്ലാ പോലീസ് മേധാവി സുജിത്ദാസിന് ലഭിച്ച വിവരത്തെത്തുടർന്ന് തിരൂർ ഡിവൈ.എസ്.പി. കെ. ബിജുവിന്റെ നിർദേശപ്രകാരമാണ് പരിശോധന നടന്നത്.

വളാഞ്ചേരി സബ് ഇൻസ്പെക്ടർ ജലീൽ കറുത്തേടത്ത്, എ.എസ്.ഐമാരായ ബിജു, അൻവർ, സിവിൽ പോലീസ് ഓഫീസർമാരായ റഷീദ്, ശൈലേഷ്, ആൻസർ എന്നിവരുൾപ്പെട്ട സംഘമാണ് കുഴൽപ്പണം പിടികൂടിയത്.

The post വളാഞ്ചേരിയിൽ 1.68 കോടിയുടെ കുഴൽപ്പണം പിടികൂടി appeared first on Valanchery Online.

ഓൺലൈൻ ചൂതാട്ടത്തിൻ്റെ പേരിൽ സാമ്പത്തിക തട്ടിപ്പ്; എടയൂർ സ്വദേശിനിയും ഭർത്താവും അറസ്റ്റിൽ

വളാഞ്ചേരിക്കാരൻ — Fri, 06 Jan 2023 21:24:51 +0000

മങ്കട: ഗോവയില്‍ ഓണ്‍ലൈന്‍ ചൂതാട്ടത്തില്‍ പണം നിക്ഷേപിച്ച് വൻ ലാഭമുണ്ടാക്കാമെന്ന് വാഗ്ദാനം നല്‍കി ലക്ഷക്കണക്കിന് രൂപ തട്ടിയെടുത്ത കേസില്‍ കൂടുതൽ പ്രതികൾ പിടിയിൽ. എടയൂർ മാവണ്ടിയൂർ സ്വദേശിനി പട്ടന്‍മാര്‍തൊടിക റംലത്ത് (24), ഭർത്താവ് പൊൻമള സ്വദേശി പുല്ലാനിപ്പുറത്ത് മുഹമ്മദ് റാഷിദ്(32) എന്നിവരാണ് ഇപ്പോൾ അറസ്റ്റിലായത്. തമിഴ്നാട് ഏര്‍വാടിയിലെ രഹസ്യ കേന്ദ്രത്തില്‍നിന്നാണ് മങ്കട എസ്.ഐ സി.കെ. നൗഷാദും സംഘവും ദമ്പതികളെ പിടികൂടിയത്. കേസിൽ റംലയുടെ സഹോദരൻ റാഷിദ് നേരത്തെ അറസ്റ്റിലായിട്ടുണ്ട്.

മങ്കട വടക്കാങ്ങര സ്വദേശിനിയുടെ പരാതിപ്രകാരമാണ് കേസ് രജിസ്റ്റര്‍ ചെയ്ത് അന്വേഷണം നടത്തിയത്. നവംബറിലാണ് കേസിനാസ്പദമായ സംഭവം. പ്രതികള്‍ വി.ഐ.പി ഇന്‍വെസ്റ്റ്മെന്‍റ് എന്ന വാട്സ്ആപ് കൂട്ടായ്മ വഴി പരാതിക്കാരിയുടെ നമ്പര്‍ ആഡ് ചെയ്ത് ഗോവ കാസിനോയില്‍ നടക്കുന്ന ഓണ്‍ലൈന്‍ ചൂതാട്ടത്തില്‍ പണം നിക്ഷേപിച്ചാല്‍ മണിക്കൂറുകള്‍ക്കുള്ളില്‍ രണ്ടിരട്ടിയോളം ലാഭവിഹിതം ലഭിക്കുമെന്നും പറഞ്ഞ് വിശ്വസിപ്പിച്ച് പലപ്പോഴായി അഞ്ചുലക്ഷം രൂപ തട്ടിയെടുക്കുകയായിരുന്നു.

ജില്ല പൊലീസ് മേധാവി എസ്. സുജിത്ത് ദാസ് ഐ.പി.എസിന് പരാതി നല്‍കിയതിനെ തുടര്‍ന്ന് മങ്കട എസ്.ഐ നടത്തിയ പ്രാഥമിക അന്വേഷണത്തില്‍ ഇത്തരത്തില്‍ നിരവധി വാട്സ്ആപ് ഗ്രൂപ്പുകളുണ്ടാക്കി ലക്ഷക്കണക്കിന് രൂപ തട്ടിയെടുത്ത് ആഡംബര ജീവിതം നയിച്ചിരുന്ന മുഹമ്മദ് റാഷിദ്, ഭാര്യ റംലത്ത്, ഇവരുടെ സഹോദരന്‍ പട്ടര്‍മാര്‍തൊടി മുഹമ്മദ് റാഷിദ് എന്നിവരെക്കുറിച്ച് സൂചന ലഭിച്ചു. മുഹമ്മദ് റാഷിദും ഭാര്യസഹോദരനും ഹാക്കിങ് കോഴ്സ് വിദ്യാർഥിയുമായ റാഷിദും കൂടിയാണ് തട്ടിപ്പ് ആസൂത്രണം ചെയ്തത്. യൂട്യൂബ് ട്രേഡിങ് വിഡിയോകള്‍ വഴി തങ്ങളുടെ വാട്സ്ആപ് ഗ്രൂപ് ലിങ്കുകള്‍ അയക്കുകയും വന്‍ ലാഭവിഹിതം വാഗ്ദാനം ചെയ്ത് ആളുകളില്‍നിന്ന് പണം വാങ്ങുകയും തുടക്കത്തിൽ ലാഭവിഹിതമെന്നപേരില്‍ കുറച്ച് തുക അയച്ചുകൊടുത്തുമായിരുന്നു തട്ടിപ്പ്.

പണം കിട്ടിയില്ലെന്ന പരാതികള്‍ വരുന്നതോടുകൂടി ഗ്രൂപ്പില്‍ നിന്ന് ലെഫ്റ്റ് ആകുകയും പുതിയ വാട്സ്ആപ് ഗ്രൂപ് ഉണ്ടാക്കി വീണ്ടും തട്ടിപ്പ് തുടരുകയും ചെയ്തു. റംലത്തിന്‍റെ ബാങ്ക് അക്കൗണ്ടിലേക്കാണ് പണം അയക്കാനായി ആവശ്യപ്പെട്ടിരുന്നത്. ഇവരുടെ സഹോദരന്‍ മുഹമ്മദ് റാഷിദിനെ കഴിഞ്ഞ ദിവസം മങ്കട എസ്.ഐ സി.കെ. നൗഷാദും സംഘവും വളാഞ്ചേരിയില്‍നിന്ന് കസ്റ്റഡിയിലെടുത്ത് അറസ്റ്റ് ചെയ്തിരുന്നു. തുടര്‍ന്ന് നാട്ടില്‍നിന്ന് മുങ്ങിയ മുഹമ്മദ് റാഷിദും റംലത്തും ഏര്‍വാടിയില്‍ പല സ്ഥലങ്ങളിലായി ഒളിവിൽ കഴിയുകയായിരുന്നു.

ഇത്തരത്തില്‍ തട്ടിപ്പിനിരയായ നിരവധി പേര്‍ പരാതിയുമായി പൊലീസിനെ സമീപിക്കുന്നുണ്ടെന്നും നിക്ഷേപം നടത്തുമ്പോള്‍ ജാഗ്രത പാലിക്കണമെന്നും പെരിന്തല്‍മണ്ണ ഡിവൈ.എസ്.പി എം. സന്തോഷ് കുമാര്‍, എസ്.ഐ സി.കെ. നൗഷാദ് എന്നിവര്‍ അറിയിച്ചു. എ.എസ്.ഐ സലീം, സി.പി.ഒ സുഹൈല്‍, പെരിന്തല്‍മണ്ണ ഡാന്‍സാഫ് സ്ക്വാഡ് എന്നിവരാണ് സംഘത്തിലുണ്ടായിരുന്നത്. പ്രതികളെ പെരിന്തല്‍മണ്ണ കോടതിയില്‍ ഹാജറാക്കി.

The post ഓൺലൈൻ ചൂതാട്ടത്തിൻ്റെ പേരിൽ സാമ്പത്തിക തട്ടിപ്പ്; എടയൂർ സ്വദേശിനിയും ഭർത്താവും അറസ്റ്റിൽ appeared first on Valanchery Online.

“ഒരു ലക്ഷം തന്നാൽ എട്ട് മണിക്കൂർ കൊണ്ട് 2.40 ലക്ഷമാക്കി തരാം!!!”; യുവതിയിൽ നിന്ന് 5 ലക്ഷം രൂപ തട്ടിയ എടയൂർ സ്വദേശി അറസ്റ്റിൽ

വളാഞ്ചേരിക്കാരൻ — Tue, 03 Jan 2023 01:43:48 +0000

മങ്കട(മലപ്പുറം): ഓൺലൈൻ ചൂതാട്ടത്തിലൂടെ വൻലാഭം വാഗ്ദാനംചെയ്ത് പണം തട്ടിയ കേസിൽ യുവാവ് അറസ്റ്റിലായി. വളാഞ്ചേരി എടയൂർ പട്ടമ്മർതൊടി മുഹമ്മദ് റാഷിദിനെ (22) യാണ് മങ്കട പോലീസ് അറസ്റ്റുചെയ്തത്. അഞ്ചുലക്ഷം രൂപ തട്ടിയെടുത്തെന്ന മങ്കട വടക്കാങ്ങര സ്വദേശിനിയുടെ പരാതിയിലാണ് അറസ്റ്റ്.

യൂട്യൂബ് വീഡിയോ ലിങ്ക് വഴി പരസ്യം നൽകിയാണ് തട്ടിപ്പ് നടത്തിയിരുന്നതെന്ന് പോലീസ് പറഞ്ഞു. യുവതിയിൽനിന്ന് ഒരുലക്ഷം വാങ്ങി എട്ടു മണിക്കൂറിന് ശേഷം മുടക്കുമുതലും ഒരു ലക്ഷത്തി നാൽപ്പതിനായിരം രൂപ ലാഭവും തിരികെ ലഭിക്കുമെന്ന് പറഞ്ഞ് വിശ്വസിപ്പിച്ചു. നവംബർ 30 മുതൽ ഡിസംബർ മൂന്ന് വരെ ഇങ്ങനെ അഞ്ചുലക്ഷം രൂപ തട്ടിയെടുത്തു. പറഞ്ഞ തുക കിട്ടാത്തതിനെത്തുടർന്ന് യുവതി മങ്കട പോലീസിൽ പരാതി നൽകുകയായിരുന്നു.

റാഷിദിനെതിരേ സമാനമായ മറ്റ് പരാതികളുമുണ്ട്. ഇയാൾ ഗോവയിൽ ഓൺലൈൻ ചൂതാട്ടത്തിൽ പങ്കെടുത്തതായും പണം നഷ്ടമായതായും പോലീസ് പറഞ്ഞു. മങ്കട എസ്.ഐ. സി.കെ. നൗഷാദിന്റെ നേതൃത്വത്തിലുള്ള സംഘവും പെരിന്തൽമണ്ണ ഡാൻസാഫ് സംഘവും ചേർന്നാണ് അറസ്റ്റുചെയ്തത്. കൂടുതൽ പേരിൽനിന്ന് പണം തട്ടിയതിനെക്കുറിച്ച് അന്വേഷണം നടക്കുന്നതായും പോലീസ് പറഞ്ഞു.

The post “ഒരു ലക്ഷം തന്നാൽ എട്ട് മണിക്കൂർ കൊണ്ട് 2.40 ലക്ഷമാക്കി തരാം!!!”; യുവതിയിൽ നിന്ന് 5 ലക്ഷം രൂപ തട്ടിയ എടയൂർ സ്വദേശി അറസ്റ്റിൽ appeared first on Valanchery Online.

ഹണിട്രാപ്പിലൂടെ 68കാരൻ്റെ 23 ലക്ഷം രൂപ തട്ടി; വ്ലോഗറും ഭർത്താവും കല്പകഞ്ചേരിയിൽ പിടിയിൽ

വളാഞ്ചേരിക്കാരൻ — Tue, 22 Nov 2022 00:45:36 +0000

കൽപകഞ്ചേരി: അറുപത്തിയെട്ടുകാരനെ ഹണിട്രാപ്പിൽ കുടുക്കി ലക്ഷങ്ങൾ തട്ടിയ വ്ളോഗറും ഭർത്താവും പിടിയിൽ. വ്ളോഗർ താനൂർ സ്വദേശി റാഷിദ(28), ഭർത്താവ് തൃശൂർ കുന്നംകുളം സ്വദേശി നാലകത്ത് നിഷാദ് എന്നിവരെയാണ് കൽപകഞ്ചേരി പൊലീസ് പിടികൂടിയത്. ഹണിട്രാപ്പിലൂടെ അറുപത്തിയെട്ടുകാരനിൽ നിന്ന് പല തവണകളായി ഇരുപത്തിമൂന്ന് ലക്ഷം രൂപ തട്ടിയെടുത്തെന്നാണ് ദമ്പതികൾക്കെതിരെയുള്ള കേസ്. ഫെയ്‌സ്ബുക്കിലൂടെ ഉന്നത സ്വാധീനമുള്ള കൽപകഞ്ചേരി സ്വദേശിയായ വയോധികനുമായി റഷീദ ബന്ധം സ്ഥാപിക്കുകയായിരുന്നു. പ്രണയം നടിച്ച് ബന്ധം ദൃഢമാക്കി ഇവർ താമസിക്കുന്ന ആലുവയിലേക്ക് ഇടയ്‌ക്കിടെ ക്ഷണിച്ചുവരുത്തി അടുത്തിടപെട്ടു. എല്ലാത്തിനും സൗകര്യം ഒരുക്കിക്കൊടുത്തതാകട്ടെ നിഷാദും.

ഭർത്താവ് ഒരു ബിസിനസ് തുടങ്ങാൻ പോകുകയാണെന്നും സഹായിക്കണമെന്നും പറഞ്ഞാണ് യുവതി അറുപത്തിയെട്ടുകാരനോട് പണം ആവശ്യപ്പെട്ടുതുടങ്ങിയത്. പിന്നീട് ബന്ധം പരസ്യമാക്കുമെന്ന് പറഞ്ഞ് ഭീഷണിപ്പെടുത്തി പണം വാങ്ങാനും തുടങ്ങി. വയോധികന്റെ പണം നഷ്ടപ്പെടുന്നുണ്ടെന്ന് മനസിലാക്കിയ വീട്ടുകാർ കാര്യം തിരക്കുകയായിരുന്നു. ഇതോടെയാണ് ഹണിട്രാപ്പിനെക്കുറിച്ച് മനസിലായത്. തുടർന്ന് പൊലീസിൽ വിവരമറിയിക്കുകയായിരുന്നു. തുടർന്നാണ് റാഷിദയെയും നിഷാദിനെയും പിടികൂടിയത്. നിഷാദിനെ കോടതി റിമാൻഡ് ചെയ്തു. ആറ് മാസം പ്രായമുള്ള ഇരട്ടക്കുട്ടികളുള്ളത് കണക്കിലെടുത്ത് റാഷിദയ്ക്ക് കോടതി ഇടക്കാല ജാമ്യം നൽകി. മലായ് മല്ലു എന്ന യു ട്യൂബ് ചാനലിലൂടെ വീഡിയോകൾ ചെയ്യുന്നവരാണ് പ്രതികൾ. കൽപകഞ്ചേരി സ്വദേശിയിൽ നിന്ന് തട്ടിയ പണമുപയോഗിച്ച് ആഡംബര ജീവിതം നയിച്ച് വരികയായിരുന്നു.

The post ഹണിട്രാപ്പിലൂടെ 68കാരൻ്റെ 23 ലക്ഷം രൂപ തട്ടി; വ്ലോഗറും ഭർത്താവും കല്പകഞ്ചേരിയിൽ പിടിയിൽ appeared first on Valanchery Online.

കുറ്റിപ്പുറം നിക്ഷേപത്തട്ടിപ്പ്: അബ്ദുൾനൂർ വീണ്ടും അറസ്റ്റിൽ

വളാഞ്ചേരിക്കാരൻ — Thu, 04 Aug 2022 03:55:11 +0000

കുറ്റിപ്പുറം : കുറ്റിപ്പുറം നിക്ഷേപത്തട്ടിപ്പ് കേസിലെ പ്രതി വീണ്ടും അറസ്റ്റിലായി. കുറ്റിപ്പുറം തെക്കേ അങ്ങാടി കമ്പാല മുഹമ്മദ് അബ്ദുൾ നൂറിനെ(45)യാണ് കുറ്റിപ്പുറം സി.ഐ. ശശീന്ദ്രൻ മേലേയിൽ അറസ്റ്റുചെയ്തത്. 2008-ലാണ് റിയൽ എസ്റ്റേറ്റ് കച്ചവടത്തിന്റെ പേരിൽ നിക്ഷേപമായി സ്വീകരിച്ച കോടിക്കണക്കിനു രൂപ തട്ടിയെടുത്ത കേസിൽ ആദ്യം ഇയാൾ അറസ്റ്റിലാകുന്നത്. ജാമ്യത്തിലിറങ്ങിയതിനു ശേഷം മുങ്ങിയ ഇയാളെ പിന്നീട് 2013-ൽ പോലീസ് അറസ്റ്റുചെയ്തിരുന്നു.

ഇതിനുശേഷവും ജാമ്യത്തിലിറങ്ങിയ ഇയാൾ കേസുകളുടെ വിചാരണവേളയിൽ ഹാജരാകാതിരുന്ന സാഹചര്യത്തിലാണ് ബുധനാഴ്‌ച വീട്ടിൽനിന്ന്‌ പോലീസ് അറസ്റ്റു ചെയ്തത്. നിരവധി കോടതികളിൽ അബ്ദുൾ നൂറിനെതിരേ കേസുകളുണ്ട്.എസ്‌.ഐ. സജീഷ്, സി.പി.ഒ.മാരായ സുനിൽബാബു, ബിജു, രഞ്ജിത്ത് എന്നിവരും പോലീസ് സംഘത്തിലുണ്ടായിരുന്നു.

The post കുറ്റിപ്പുറം നിക്ഷേപത്തട്ടിപ്പ്: അബ്ദുൾനൂർ വീണ്ടും അറസ്റ്റിൽ appeared first on Valanchery Online.

അടിപിടിക്കേസിൽപ്പട്ടയാളെ സ്വാധീനിച്ച് കേസ് നടത്തിത്തരാമെന്ന് പറഞ്ഞ് വിശ്വസിപ്പിച്ച് ലക്ഷങ്ങൾ തട്ടി; രണ്ടുപേർ വളാഞ്ചേരി പോലീസിന്റെ പിടിയിൽ

Basith Vakkarath — Thu, 28 Jul 2022 12:12:47 +0000

വളാഞ്ചേരി: താനൂർ സ്വദേശി ഹസ്കറും പുറമണ്ണൂർ സ്വദേശി സിയാദുമാണ് അറസ്റ്റിലായത്.
വളാഞ്ചേരി വലിയകുന്ന് സ്വദേശിയായ ബൈജുവിന്റെ ഭാര്യയുടെ പരാതിയിലാണ് കേസ്. കഴിഞ്ഞ മാസം 27നാണ് കേസിനാസ്പദമായ സംഭവം നടന്നത്. പരാതിക്കാരിയുടെ ഭര്‍ത്താവായ ബൈജുവും അനസെന്നയാളും തമ്മില്‍ വാഹനം ഓവര്‍ടേക്ക് ചെയ്യുന്നതുമായി ബന്ധപ്പെട്ടുണ്ടായ തര്‍ക്കം അടിപിടിയില്‍ കലാശിക്കുകയായിരുന്നു. വളാഞ്ചേരി പോലീസില്‍ ഈ അടിപിടിക്കേസ് നിലനില്‍ക്കെയാണ് താനൂര്‍ ചെറുപുരക്കല്‍ വീട്ടില്‍ ഹസ്‌കറും ഇരിമ്പിളിയം പുറമണ്ണൂര്‍ സ്വദേശി ഇരുമ്പലയില്‍ സിയാദും ബൈജുവിനെ സമീപിച്ചത്. അടിപിടിക്കേസില്‍ ബൈജുവിനോടൊപ്പം ഉണ്ടായിരുന്നയാള്‍ക്കെതിരെ കേസ് ശക്തമാക്കാമെന്നും കേസിനാവശ്യമായ സൗകര്യങ്ങള്‍ ചെയ്തുതരാമെന്ന് പറഞ്ഞുമാണ് സ്വാധീനിച്ചത്. പറഞ്ഞ് വിശ്വസിപ്പിച്ച ഇരുവരും ഇയാളില്‍നിന്നും ഒരു ലക്ഷത്തി ഇരുപത്തി ഏഴായിരം രൂപയോളം കൈക്കലാക്കിയതായും പരാതിയുണ്ട്. കേസില്‍ യാതൊരു പുരോഗതിയും ഉണ്ടാവാത്തതില്‍ സംശയം തോന്നിയതോടെയാണ് കബളിപ്പിച്ചതാണെന്ന് മനസിലാക്കാനായത്. തുടര്‍ന്നാണ് വളാഞ്ചേരി പോലീസില്‍ പരാതി നല്‍കിയത്.
പോലീസിൽ പിടിപാടുണ്ടെന്നും മന്ത്രി തലത്തിൽ വരെ സ്വാധീനം ചെലുത്താം എന്നും പറഞ്ഞുമാണ് പരാതിക്കാരനെ ഇരുവരും സ്വാധീനിച്ചതെന്നും പോലീസ് പറയുന്നു. ഇവർക്കെതിരെ നിരവധി കേസുകൾ നിലവിലുണ്ടെന്നും പോലീസ് പറഞ്ഞു. ഇതിലെ ഒന്നാം പ്രതിയായ ഹസ്കറിനെ താനൂർ പോലീസിന്റെ സഹാത്തോടെ താനൂരിൽ നിന്നും സിയാദിനെ പുറമണ്ണൂരിൽ നിന്നും ആണ് പിടികൂടിയത്. SHO ജിനേഷിനെ കൂടാതെ എസ്ഐ മാരായ ഷമീൽ, ഉണ്ണികൃഷ്ണൻ. എസ്. സി.പി.ഒ പത്മിനി. സി.പി.ഒ വിനീത് എന്നിവർ പോലിസ് സംഘത്തിൽ ഉണ്ടായിരുന്നു. പ്രതികളെ കോടതിയിൽ ഹാജരാക്കി റിമാന്റ് ചെയ്തു.

The post അടിപിടിക്കേസിൽപ്പട്ടയാളെ സ്വാധീനിച്ച് കേസ് നടത്തിത്തരാമെന്ന് പറഞ്ഞ് വിശ്വസിപ്പിച്ച് ലക്ഷങ്ങൾ തട്ടി; രണ്ടുപേർ വളാഞ്ചേരി പോലീസിന്റെ പിടിയിൽ appeared first on Valanchery Online.

വളാഞ്ചേരിയിൽ 26 ലക്ഷം രൂപയുടെ കുഴൽപ്പണം പിടികൂടി

വളാഞ്ചേരിക്കാരൻ — Wed, 06 Apr 2022 09:37:09 +0000

വളാഞ്ചേരി: വാഹന പരിശോധനയ്ക്കിടെ കാർ യാത്രക്കാരനിൽ നിന്നും രേഖകളില്ലാത്ത 26,83,500 രൂപ വളാഞ്ചേരി പൊലീസ് ഇൻസ്‌പെക്ടർ കെ.ജെ. ജിനേഷിന്റെ നേതൃത്വത്തിലുള്ള സംഘം പിടിച്ചെടുത്തു. ചൊവാഴ്ച രാവിലെ 11 മണിയോടെ പട്ടാമ്പി റോഡിൽ കാർത്തിക തിയറ്ററിന് സമീപത്ത് വച്ചാണ് തൃശൂർ തളി സ്വദേശി വലിയ പീടിയേക്കൽ അബ്ദുൽഖാദറെ (37) പണവും കാറും സഹിതം പിടികൂടിയത്. പട്ടാമ്പി ഭാഗത്ത് നിന്നും കോട്ടക്കൽ ഭാഗത്തേക്ക് പോവുകയായിരുന്ന കാറിന്റെ ഡ്രൈവർ സീറ്റിനോട് ചേർന്ന ഭാഗത്തെ അറയിൽ സൂക്ഷിച്ച നിലയിലായിരുന്നു പണം. ഇയാളിൽ നിന്ന് ജനുവരി മാസത്തിൽ വളാഞ്ചേരി പൊലീസ് 48 ലക്ഷം രൂപ മറ്റൊരു കാറിൽ നിന്ന് പിടികൂടിയിരുന്നു. പരിശോധനാ സംഘത്തിൽ സി.ഐ കൂടാതെ എസ്.ഐ. നൗഷാദ്, സി.പി.ഒമാരായ ആൻസൺ, ജോൺസൻ, വിനീത്, ഗിരീഷ് എന്നിവരുമുണ്ടായിരുന്നു. പിടികൂടിയ പണം കോടതിയിൽ ഹാജരാക്കി ട്രഷറിയിൽ നിക്ഷേപിക്കുമെന്നും ഇൻകം ടാക്സ് ഡിപ്പാർട്ട്‌മെന്റിനേയും എൻഫോഴ്സ്‌മെന്റിനേയും അറിയിക്കുമെന്നും പൊലീസ് പറഞ്ഞു.

The post വളാഞ്ചേരിയിൽ 26 ലക്ഷം രൂപയുടെ കുഴൽപ്പണം പിടികൂടി appeared first on Valanchery Online.

കോട്ടോപ്പാടം ചിട്ടി തട്ടിപ്പുകേസ്: ഒരാൾ അറസ്റ്റിൽ

വളാഞ്ചേരിക്കാരൻ — Thu, 03 Feb 2022 01:30:10 +0000

കുറ്റിപ്പുറം : ചിട്ടി തട്ടിപ്പുകേസിൽ കോട്ടോപ്പാടം ചിറ്റ്സ് ഫണ്ട് ഡയറക്ടർ തവനൂർ കല്ലൂർ ശിവശക്തിയിൽ സുകുമാരൻ (54) അറസ്റ്റിൽ. ലക്ഷക്കണക്കിനു രൂപയുടെ ചിട്ടികൾ നടത്തിയിരുന്ന സ്ഥാപനത്തിന്റെ പ്രവർത്തനം സാമ്പത്തിക ബാധ്യതകളെത്തുടർന്ന് 2019 സെപ്റ്റംബറിൽ നിലച്ചു. തുടർന്നുനടന്ന അന്വേഷണത്തിലൊടുവിലാണ് സുകുമാരനെ അറസ്റ്റുചെയ്തത്.

കുറ്റിപ്പുറം ഹൈവേ ജങ്ഷനിലെ കെട്ടിടത്തിലായിരുന്നു ചിട്ടി കമ്പനി ഓഫീസ് പ്രവർത്തിച്ചിരുന്നത്. അഞ്ചുലക്ഷം, ഒന്നരലക്ഷം എന്നിങ്ങിനെ രണ്ടു കുറികളാണ് സ്ഥാപനം പ്രവർത്തനം നിലയ്ക്കുന്ന സമയത്ത് നടത്തിയിരുന്നത്.

കുറി രജിസ്ട്രാറുടെ അനുമതിയില്ലാതെയാണ് ഈ കുറികൾ നടത്തിയിരുന്നതെന്ന് പിന്നീടു നടന്ന പൊലീസ് അന്വേഷണത്തിൽ കണ്ടെത്തിയിരുന്നു. മാനേജിങ് ഡയറക്ടറായിരുന്ന രാജേഷ് 2019-ൽ മരിച്ചു. മറ്റു ബോർഡ് അംഗങ്ങളുടെ മുൻകൂർ ജാമ്യാപേക്ഷ ഹൈക്കോടതിയുടെ പരിഗണനയിലാണ്. സി.ഐ. ശശീന്ദ്രൻ മേലേയിലാണ് പ്രതിയെ അറസ്റ്റുചെയ്തത്.

The post കോട്ടോപ്പാടം ചിട്ടി തട്ടിപ്പുകേസ്: ഒരാൾ അറസ്റ്റിൽ appeared first on Valanchery Online.